Briyul’ Got U Wan’um?

NAP’AN nra yib e magawon ngom, ma ga ma ning e ayuw rok Got u fithik’ e meybil fa? Faanra arrogon, ma bod ni gad be non ku be’ nib riyul’ fa?

I weliy Jesus u morngaagen e Chitamangin nu tharmiy ni gaar: “En ni ke l’ugeg ku gub e ba riyul’.” (John 7:28) Arrogon, Jehovah Got e briyul’, ma nap’an ni ngam meybil ngak ma bod ni ga be non ku be’ ni fager rom ni nge ayuwegem. Ma faanra nge rung’ag Got e meybil rodad ma thingari puluw ko Bible. Susun, thingarda meybilgad ko fa “An ma Rung’ag e meybil” u fithik’ e sobut’an’ u daken Fak ni Jesus Kristus.​—Psalm 65:2; 138:6; John 14:6.

Boch e girdi’ e ra lemnag ni bochan ni danir guy Got, ere gathi ir be’. Yad be lemnag ni Got e ban’en ni yigi sum u lanin’uy. Mus ko boch e Kristiano ni kar filed u morngaagen pi felngin Got ma yu ngiyal’ e mo’maw ni ngar lemnaged ni ir be’ nib riyul’. Aram rogom fa? Faanra er rogon, ma mang e rayog ni nge ayuwegdad nge riyul’ Jehovah Got u wan’dad?

Mu Fil e Thin ko Bible

Ga ma fil e Thin nib Thothup u gubin ngiyal’ fa? Rogon fene yoor yay nge fene elmirin ni ga ma fil e Bible, ma ra gel rogon fene riyul’ Jehovah Got u wan’um. Ra gel e michan’ rom, ma aram e ‘gowa ga be guy fare Got ndab ni guy nga owchey.’ (Hebrews 11:6, 27) Ma faanra ke mus ni fin munmun ni ga ma fil e Bible ma dabi gel e michan’ rom.

Susun: Mu lemnag ni ke yog e togta ni ngam thiy ko flay l’agruw yay u reb e rran ni nge chuw e gachal u dowam. Ra m’ay fare gachal nfaanra kari mus ntaab yay ara l’agruw yay u reb e pul ni kam thiy ko falay fa? Sana danga’. Ku aram rogon e n’en ni bay ko Psalm ni bod e “prescription” ni nge fel’ fithik’ i dowdad ko tirok Got ban’en. Mu bieg e Thin rok Got “ni rran nge nep’.” (Psalm 1:1, 2) Ra nge yib angin ngodad ma ba t’uf ni ngad folgad ko re “prescription” ney​—ma gad fil e Thin rok Got u gubin e rran nge ku boch e babyor ko ulung.​—Joshua 1:8.

Ga ba adag ni nge fel’ e fol babyor ni ga ma tay me gelnag e michan’ rom? Baaray ban’en ni ngam rin’: Tomren ni kam poy reb e guruy ko fare Bible ni New World Translation of the Holy Scriptures ara yugu ba ken e Bible ni bay e cross-reference, ngam mel’eg reb e verse riy ni ga ba adag ma ga poy yugu boch e thin ko Bible nib puluw ngay. Aram rogon ma ra fel’ boch e fol babyor rom, ma ga ra ngat nga urngin e thin ko Bible nib puluw reb nga reb. Ma aram me riyul’ u wan’um e An ke yoloy e pi thin nem ni Jehovah Got.

Faanra ga ra fanay e cross-reference ma ra ayuwegem ngam nang fan e thin ko profet u lan e Bible nge rogon ni ke lebug. Sana ga manang e thin ko profet ni baga’ fan u lan e Bible ni bod e tin nib sor fan ko ngiyal’ ni thang yu Babylon yu Jerusalem. Machane, ka bay boch e thin ko profet nib peth reb nga reb. Boch e pi thin ko profet nem e gathi ri yima nang morngaagen.

Susun, mu bieg fare thin ko profet u morngaagen e gechig ni bay nta’ ngak e en ra guy rogon nge sul fare binaw nu Jeriko nga rogon ma ga lemnag rogon ni ke lebug. Joshua 6:26 e be gaar: “Me ning Joshua chilen ngak e girdi’ e ngiyal’ nem ni gaar: ‘En nra guy rogon ni nge fulweg e re binaw nu Jeriko ney nga rogon e ra bucheg [Jehovah] waathan. En nra tabab i muruwliy e ra yim’ e bin th’abi ilal i fak ni pumoon; ma en nra ubung e garog riy e ra yim’ e bin th’abi bitir i fak.’” Ke lebug e re n’ey 500 e duw u tomren, ya be weliy ko 1 Kings 16:34 ni gaar: “Ngiyal’ ni ir [Ahaz ni Pilung] e be gagiyeg me sul Hiel nu Bethel nge ngongliy rogon e binaw nu Jeriko bayay. Faani ta’ pa’ ko maruwel, me yim’ Abiram ni bin nganni i fak ni pumoon, ma faani ngongliy rogon e pi garog nu Jeriko, me yim’ Segub, ni bin th’abi bitir i fak ni pumoon, ni bod rogon ni yiiynag [Jehovah] u l’ugun Joshua ni fak Nun.”a Kari mus nib Got nib riyul’ e rayog ni nge thagthagnag e thin ko profet nga laniyan’ e girdi’ me lebuguy.

Nap’an ni ga be poy e Bible, ma sana bay ban’en nra pug e tafinay rom. Susun, sana ga be lemnag ko in e duw ni ke yan u thilin e ngiyal’ ni kan yiiynag ban’en nge ngiyal’ ni ke lebug. Dab kum fith ku be’ ni nge yog ngom, ya ngam athamgil ni ngam pirieg e fulweg riy. Ngam fanay e chart nge boch ban’en ko Bible, ma ngam fl’eg i gayiy e fulweg ni gowa ga be guy rogon ni ngam nang fan ba babyor ni yaan e kanawo’ ni be sor iyan ko gin ni bay e machaf riy. (Proverbs 2:4, 5) Faanra ngam pirieg e fulweg ma ra gel e michan’ rom ma ra gelnag rogon ni ke mich Jehovah Got u wan’um.

Ngam Meybil u Gubin Ngiyal’ u Fithik’ e Pasig

Ma dabmu dariy fannag rogon fene ga’ fan e meybil nge michan’uy. I ning pi gachalpen Jesus e re n’ey ngak ni gaar: “Mu gelnag e michan’ romad ngak Got.” (Luke 17:5) Faanra de riyul’ Jehovah u wan’um ma mang ni damu meybil ngak ni nge gelnag e michan’ rom ngak? Mmeybil ngak e Chitamam nu tharmiy u fithik’ e pagan’ ni nge ayuwegem nge riyul’ u wan’um.

Faanra bay ban’en ni be magawonnag lanin’um ma ga weliy ngak e Fager rom nu tharmiy u rogon ni bay u gum’erchaem. Nap’an ni ke chugur ni nge yim’ Jesus, me meybil nib elmirin. Ke puwan’ ko yalen ko teliw ni ngan meybil nib n’uw nap’an u fithik’ e yoor, machane ke par reb e nep’ ni polo’ ni be meybil ni goo ir u m’on ni ke mel’eg fa 12 e apostal. (Mark 12:38-40; Luke 6:12-16) Ku rayog ni ngad filed ban’en rok Hannah, ni chitingin Samuel. Ba adag ni nge diyennag bochi pagal, “me par ngi i meybil ngak [Jehovah] nib n’uw nap’an.”​—1 Samuel 1:12.

Mang e gad be fil ko pi n’ey? Faanra ga ba adag ni ngan fulweg taban e meybil rom, ma thingar mu meybil nib elmirin, ngu fithik’ e yul’yul’, nge gubin ngiyal’​—ma thingari puluw ko tin m’agan’ Got ngay. (Luke 22:44; Roma 12:12; 1 Thessalonika 5:17; 1 John 5:13-15) Ngam rin’ e re n’ey ma ra ayuwegem nge riyul’ Got u wan’um.

Mu Yaliy e Tin Kan Sunmeg

Rayog ni nge m’ug pangin be’ ni ma art ko tin ni ke artnag. Ku aram rogon “felngin [Jehovah] ndabiyog ni ngan guy” ni ir e An ke Artnag nge An Sunmeg urngin ban’en, ma be m’ug pangin ko tin ni ke sunmiy. (Roma 1:20) Nap’an ni gad ra yaliy e pi n’en ni sunmiy Jehovah, ma rayog ni ngad nanged fan pangin, ma aram e ra riyul’ u wan’dad.

Faanra ga ra fl’eg i yaliy e pi n’en ni sunmiy Got, ma ga ra ngat nga rogon ni be m’ug pangin riy. Susun, ngam fil u morngaagen e pi arche’ ni yad ba paluw ara navigate ma ga ra tay fan rogon fene gonop Jehovah. Nap’an ni ngam fil u morngaagen e palpal th’ib ma ga ra nang fare Milky Way ni 100,000 light-years n’umngin baraba’ nga baraba’, ma aram ke mus ntaareb ko bokum bilyon e galaxy u palpal th’ib. Gathi ga be ngat nga rogon fene gonop e An Ta Sunmiy urngin ban’en?

Dabi siy ni ba riyul’ e gonop rok Jehovah! Machane mang fan e re n’em ngom? Dabi yoor laniyan’ ko pi magawon ni gad ma weliy ngak u fithik’ e meybil. Arrogon, mus ni buch uw ban’en ni gad manang u morngaagen e tin ni sunmiy e rayog ni nge n’igin nge riyul’ Jehovah u wan’um.

Mmarod u Taabang rok Jehovah

Rayog ni ngam nang ko uw fene riyul’ Jehovah fa? Arrogon, nfaanra ga bod Noah ni be’ nib yul’yul’. Gubin ngiyal’ ni ma fol rok Jehovah, ma aram min nog morngaagen ni gaar: “I par [Noah] ni ba’ Got rok.” (Genesis 6:9) I par Noah ni gowa ba’ Jehovah u charen. Rayog ni nge riyul’ Got u wan’um ni aram rogon.

Faanra ga be yan u taabang rok Got, me ere ga ma pagan’ ko pi n’en ni kan micheg u lan e Bible ma ga ma ngongol nib puluw ngay. Susun, ra mich u wan’um e n’en ni yog Jesus ni gaar: “Ngam m’oneged e gagiyeg rok Got nge tin nib m’agan’ ngay ni ngam rin’ed, ma aram me pi’ urngin e pi n’ey ngomed.” (Matthew 6:25-33) Rriyul’, gathi gubin ngiyal’ nra pi’ Jehovah e n’en nib t’uf rom u rogon ni ga be lemnag. Machane, nap’an ni ngam meybil ma ngam nang ni ke ayuwegnem, ma ra riyul’ Got u wan’um ni bod be’ ni bay u charem.

Aram rogon e tha’ u thilrow Jehovah nge be’ ni ma athamgil ni nge yan u taabang rok Got. Mu lemnag Manuela ni reb e Mich rok Jehovah nu Spain, ma boor e magawon ni ke yib ngak. Be gaar: “Demtrug ni ke magawon lanin’ug ara bay ban’en nib t’uf rog, ma gu ma fol ko n’en ni bay ko Proverbs 18:10. Gu ma sap ngak Jehovah ni nge ayuwegneg. Gubin ngiyal’ ma ke par ni ir ba ‘wulyang nib gel’ ni fan ngog.” Yog Manuela e re n’ey u tomren 36 e duw ni ke par ni be taga’ nga daken Jehovah ni be ayuweg.

Ka fin mu tabab ni ngam pagan’um ngak Jehovah fa? Dabi mulan’um nfaanra dawori fel’ thilmew u rogon ni ga ba adag. Mu par u gubin e rran ni bod be’ ni be yan u taabang rok Got. Nap’an ni ngam fol ko re n’ey ko yafas rom ma ga yul’yul’ ngay, ma ra fel’ iyan thilmew Jehovah.​—Psalm 25:14; Proverbs 3:26, 32.

Ku reb e kanawo’ ni rayog ni nga darod u taabang rok Got e ngad uned ko maruwel rok nib elmirin. Nap’an ni ngam un ko machib ko Gil’ilungun Got, ma ga be maruwel u taabang rok Jehovah. (1 Korinth 3:9) Faanra ngam nang e re n’em u wan’um ma ra ayuwegem nge riyul’ Got u wan’um.

Be yog ko Psalm ni gaar: “Mu piem ngak [Jehovah]; mu pagan’um ngak, me ayuwegnem.” (Psalm 37:5) Dabmu tinna’ ni ngam piem ngak Got ndemtrug e n’en ni be tomalnag lanin’um. Gubin ngiyal’ ma ga sap ngak ni nge ayuwegem me pow’iyem. Faanra ga ra taga’ nga daken Jehovah u fithik’ e meybil ma gubin ngiyal’ ni ngam pagan’um ngak, ma ra gapas lanin’um ya ga manang ni dabi tinna’ ni nge ayuwegem. Ke pagan’um u nap’an ni ga ma meybil ku Jehovah u morngaagen e tin ni bay u lanin’um fa? Ri er rogon​—nfaanra briyul’ Got u wan’um.

[Boch e Thin nra Tamilangnag Murung’agen]

[Sasing ko page 29]

Mu tay e fol Bible rom nge gelnag e michan’ rom

[Sasing ko page 30]

Mu pag e tayim ni ngam meybil nib elmirin u gubin ngiyal’

[Sasing ko page 31]

Mu fl’eg i yaliy u rogon ni be m’ug felngin Got ko pi n’en ni sunmiy

[Credit Line]

Hummingbird: U.S. Fish and Wildlife Service, Washington, D.C./Dean Biggins; stars: Photo: Copyright IAC/RGO 1991, Dr. D. Malin et al, Isaac Newton Telescope, Roque de los Muchachos Observatory, La Palma, Canary Islands