Jehovah, Ir E ‘Yoror Rodad U Nap’an Ni Keb E Gafgow Ngodad’
“Ayuw ni fan ko piin nib mat’aw e ma yib rok Jehovah; ir e yoror rorad u nap’an ni keb e gafgow ngorad.”—PSALM 37:39, NW.
1, 2. (a) Mang e ke yibilay Jesus ni fan ko pi gachalpen? (b) Mang e tin nib m’agan’ Got ngay ko girdi’ rok?
JEHOVAH e th’abi gel gelngin. Bay gelngin ni nge yororiy e pi tapigpig rok nib yul’yul’ nyugu demtrug e kanawo’ ni baadag. Maku rayog ni nge tay e girdi’ rok ko gin ni bay e pagan’ nge bin riyul’ e gapas riy nib dar ko girdi’ nu fayleng. Machane, rogon murung’agen e pi gachalpen, e i meybil Jesus ngak e Chitamangin nu tharmiy ni gaar: “Ma gathi gu be wenignag ngom ni ngam fekrad ngar chuwgad u fayleng, machane gu be wenignag ngom ni ngam ayuwegrad rok Faanem nib Kireb.”—John 17:15.
2 I mel’eg Jehovah ni dabi fekdad “u fayleng.” Ya, ba m’agan’ ngay ni ngad pared u fithik’ e girdi’ ni yoor ko re fayleng ney ni fan ni ngada machibnaged e thin rok ni murung’agen fare athap ma ra fal’eg laniyan’ e girdi’. (Roma 10:13-15) Machane, rogon e n’en ni yog Jesus ko meybil rok, e gad ra par ko re fayleng ney, ma rayog ni nge kirebnagdad “faanem nib kireb.” Girdi’ ni der fol nge pi kan nib kireb e ma amithnagey ma ma gafgownagey nrib gel, maku rayog ni gafgow e pi Kristiano.—1 Peter 5:9.
3. Mang e n’en ni musko pi tapigpig rok Jehovah nib yul’yul’ e thingara mada’naged, machane mang e n’en ni bay ko Thin rok Got ni ra fal’eg lanin’uy?
3 U tan e pi skeng nem, ma rayog ni yu ngiyal’ me mulan’uy. (Proverbs 24:10) Kan ta’ ko Bible murung’agen boor e girdi’ nib yul’yul’ ni ka ranod u fithik’ boch e gafgow. “En nib mat’aw e boor e gafgow ni ma yib ngak,” ir e n’en ni be yog fare psalmist, “machane i Somol e ma chuweg u fithik’ ni gubin.” (Psalm 34:19) Arrogon, ku ma buch e tin nib kireb ngak e “piin nib mat’aw.” Ni bod David ni fare psalmist, u yu ngiyal’ e rayog ni nge “war ma ra mulan’dad nrib gel.” (Psalm 38:8, NW) Machane, ra fal’eg lanin’uy ni ngan nang ni “Jehovah e ba chuchugur ngak e piin ni ke kireban’rad nib gel; ma ma ayuweg e piin ni kari mulan’rad.”—Psalm 34:18, NW; 94:19.
4, 5. (a) Ba puluw ko Proverbs 18:10, mang e thingarda rin’ed ma rayog ni nge yororiydad Got? (b) Mang boch ban’en ni gad ra rin’ ni fan ni nge ayuwegdad Got?
4 Rogon nib puluw ko meybil rok Jesus, ri ma matanagiydad Jehovah. I ir e ma “yororiydad u nap’an ni keb e gafgow ngodad.” (Psalm 37:39) Fare babyor ni Proverbs e be fanay e thin ni taareb rogon ngay u nap’an ni yog ni gaar: “Ngochol rok Jehovah e ba wulyang nib gel. Ma piin nib mat’aw e ma mil ngay ma ra yororiyrad.” (Proverbs 18:10, NW) Re thin nu Bible ney e be dag u murung’agen e tin riyul’ ni ri ma runguy Jehovah e tin ni ke sunmiy. Ri ma yororiy Got e piin nib mat’aw ni yad ba pasig i gay Got, ni bod ni gad be mil i yan nga ba wulyang nib gel ni ngan yororiydad.
5 Nap’an ni ra yib e magawon ngodad ni be kireban’dad, ma uw rogon ni ngad milgad ngak Jehovah ni nge yororiydad? Gad ra weliy dalip ban’en ni rayog ni ngada rin’ed ma rayog ni nge ayuwegdad Jehovah riy. Som’mon, thingarda meybilgad ngak e Chitamangidad nu tharmiy. Bin l’agruw, thingarda maruwelgad ni gad be fol u rogon ni be pow’iydad fare kan ni thothup rok. Ma bin dalip, thingarda folgad ko yaram rok Jehovah ni gad be chag ngak e pi walagdad ni Kristiano ni piin rayog ni nge baudnag lanin’dad u nap’an ni keb e gafgow ngodad.
Fare Gelngin e Meybil
6. Uw rogon u wan e Kristiano e meybil?
6 Boch e girdi’ ni ka nog e health experts ngorad e ma yog ni meybil a ra chuweg e kireban’ nge mochuch. Yugu aram rogon ni ngan fal’eg i lemnag ban’en ni bod e meybil e sana riyul’ ni nge chuweg e mochuch, maku rayog ni nge buch ban’en ni aram rogon u daken e ngan rung’ag laman ban’en ara ngan chamgiy keru’uy. Piin Kristiano e dar ma dariyfannag e meybil ni yad be lemnag ni ireray e falay ko lem. Gad ma ta’ ni meybil e aram e numon ngak e en Tasunmiy u fithik’ e tayfan nib gel. Meybil e ba muun ngay e yul’yul’ nge pagan’ rodad ku Got. Arrogon, meybil e ir bang ko liyor rodad.
7. Mang e be yip’ fan ni ngan meybil u fithik’ e pagan’, ma uw rogon ni nge ayuwegdad e pi meybil ney u nap’an ni keb e gafgow ngodad?
7 Meybil rodad e thingari un ngay e pagan’ ngak Jehovah. I yoloy John ni apostal ni gaar: “Aram fan nib pagan’dad u p’eowchen Got; mmudgil u wun’dad nra rung’ag e tin ni gadad be yog ni faan gadad ra ning ban’en nib m’agan’ ngay.” (1 John 5:14) Jehovah, ni ir e En Th’abi Tolang, ma karimus ni ir e bin riyul’ e Got mab th’abi gel gelngin, e riyul’ ni ri ma tiyan’ ko meybil ko piin nib yul’yul’ ngak ni pi tapigpig rok. Kemus ni ngan nang ni Got rodad ni ma t’ufegey e ma rung’ag u nap’an ni gad ra yog ngak e magafan’ nge magawon rodad e ra fal’eg lanin’dad.—Filippi 4:6.
8. Mang fan ni dabi tamra’ e pi Kristiano nib yul’yul’ ara ra lemnaged ndariy farad u nap’an ni yad be meybil ku Jehovah?
8 Pi Kristiano nib yul’yul’ e thingar dabra tamra’gad, ara ra lemnaged ni dariy farad, ara ba war e pagan’ rorad u nap’an yad be meybil ku Jehovah. Riyul’, ni nap’an ni ra mulan’dad ara gad be thamiy ni kaygi tomal e magawon ni keb ngodad, e sana gathi ri gad baadag ni ngada meybilgad ngak Jehovah. Ngiyal’ ni aram rogon ma thingarda lemnaged ni Jehovah e “ma runguy e girdi’ rok nib gafgow” ma ma “fal’eg laniyan’ e piin ni kan sobut’nagrad.” (Isaiah 49:13, NW; 2 Korinth 7:6, NW) Baga’ ni nap’an e kireban’ nge gafgow e rib t’uf ni nga darod ngak e Chitamangidad nu tharmiy u fithik’ e pagan’ ya ir e yoror rodad.
9. Mang e ma rin’ e michan’ u nap’an ni gad ra meybil ku Got?
9 Rogon ni ngari fel’ rogodad ko meybil, e ba t’uf ni bay e michan’ rodad nib riyul’. Be yog e Bible ni “en nra yib ngak Got e thingari mich u wan’ ni ba’ Got ma ra taw’athnag e piin ni yad be gayiy Got.” (Hebrews 11:6) Nge mich u wan’uy ni bay Got e dabi gaman. Michan’ nib riyul’ e ba muun ngay ni kari mich u wan’uy gelngin Got nge lem rok ni baadag ni nge taw’athnagdad ya bochan gad ma fol rok. “Ke yiluy e changar rok ngak e piin ni ma rung’ag e meybil rorad.” (1 Peter 3:12) Nguun lemnag ni gubin ngiyal’ e t’ufeg nge magafan’ rok Jehovah ni fan ngodad e ri ma pi’ fan e meybil rodad.
10. Susun uw rogon e meybil rodad ma rayog ni ngeb ngodad e ayuw rok Jehovah ko tirok Got?
10 Ma motoyil Jehovah ko meybil rodad nfaanra kad ognaged u polo’ i gum’irchadad. I yoloy fare psalmist ni gaar: “Kug piningem u polo’ i gum’irchaeg. Ah Jehovah mu fulweg lungug.” (Psalm 119:145, NW) De taareb rogon ko meybil ni ma rin’ boor e teliw nib mudugil rogon ma yima sul u daken ya meybil rodad e gathi yima sul u daken ara de polo’ gum’irchadad ngay. Nap’an ni gad ra meybil ku Jehovah u “polo’ i gum’irchadad,” ma thin rodad e ri bay fan ma bay ban’en ni be nameg. Tomren ni kad meybilgad nib u gum’irchadad, ma gad ra thamiy ni ke baud lanin’dad ya bochan kad pied “gilbadad nib tomal ngak Jehovah.” Rogon ni be micheg e Bible ni gaar, “ir e ra ayuwegdad”.—Psalm 55:22, NW; 1 Peter 5:6, 7.
Kan ni Thothup Rok Got e Ir e Taayuw Rodad
11. Mang reb e kanawo’ ni ma fulweg Jehovah ngodad u nap’an ni “nguuda ninged” e ayuw ngak?
11 Jehovah e gathi kemus ni Ma Rung’ag e meybil ya ku Ma Fulweg taban. (Psalm 65:2) I yoloy David ni gaar: “Rorran ni keb e gafgow ngog e nggu piningem, ya bochan ga ra fulweg ngog.” (Psalm 86:7, NW) Arfan ni, i pi’ Jesus e athamgil nga laniyan’ pi gachalpen ni “nguura ninged” e ayuw rok Jehovah ya “fare Chitamangiy nu tharmiy” e ra “pi’ e kan ni thothup ngak e piin be ning ngak.” (Luke 11:9-13) Arrogon, gelngin Got e ir e taayuw, ara ta ma fal’eg laniyan’ e girdi’ rok.—John 14:16.
12. Uw rogon ni nge ayuwegdad e kan ni thothup rok Got u nap’an ni keb e magawon ngodad nib mo’maw’?
12 Ni mus u nap’an ni keb e skeng ngodad, ma ra pi’ e kan ni thothup rok Got “gelngin nrib gel” ngodad. (2 Korinth 4:7) Paul ni apostal, ni i kadan’ u boor e magawon ni ma mochuchnagey, e ke yog u fithik’ e pagan’ ni gaar: “Ba’ gelngig ni fan ko urngin ban’en nbochan e en ke pi’ gelngin ngog.” (Filippi 4:13, NW) Maku, boor e Kristiano e ngiyal’ ney e kar thamiyed ni kan gelnagrad ko tirok Got nge lem rorad ya kan fulweg taban e meybil rorad nib gel. Baga’ ni, pi magawon ni ma k’aring e kireban’ e ra m’ug ni gathi rib tomal u tomren ni keb e kan ni thothup rok Got ni nge ayuwegey. Bochan e re gelngin ney ni Got e ke pi’ ngodad, ma rayog ni nga dogned, ni bod e n’en ni yog fare apostal ni gaar: “Ke diliiymad u urngin e kanawo’, machane gathi ban’en ni ri dab kiyog ni nggu mithmithgad; ke balyangan’mad, machane gathi ban’en ni ri dariy ban’en ni rayog ni nggu rin’ed; kan gafgownagmad, ma dan pagmad ni polo’; kug dolgad, machane dawor nthang e fan romad.”—2 Korinth 4:8, 9, NW.
13, 14. (a) Uw rogon ma daken e thin rok Jehovah ni kan yoloy e ke mang Got e yoror rodad? (b) Uw rogon ni ke ayuwegem ya kam fol ko kenggin e motochiyel u Bible?
13 Maku fare kan ni thothup e ke thagthagnag ma ke ayuweg e Thin rok Got ni fan ni nge fel’ rogodad riy. Uw rogon me mang Jehovah e manab rodad u daken e Thin rok u nap’an ni keb e gafgow ngodad? Reb e kanawo’ e ma pi’ e gonop ngodad nge gelngin e lem rodad. (Proverbs 3:21-24) Fare Bible e ma skulnag gelngin e lem rodad ma ma gelnagdad rogon ni gad ma weliy fan ban’en. (Roma 12:1) Gad ra bieg ma gad ra fil e Thin rok Got ni gubin ngiyal’, maku ngada fanayed e n’en ni kada filed, ma ra pi’ gelngidad i “nang fan ban’en ni fan e nge yog ni ngan nang e tin nib mat’aw nge tin nib kireb.” (Hebrews 5:14, NW) Sana bay ban’en ni ke buch rom ni dag ko uw rogon ni ke ayuwegem kenggin e motochiyel u Bible ma kam dugliy ban’en nib fel’ u nap’an ni keb e magawon ngom. Bible e ma pi’ e gonop ngodad ma rayog ni ngad pirieged e kanawo’ ni ngad pithiged reb e magawon ni ma k’aring e kireban’.—Proverbs 1:4.
14 Fare Thin rok Got e be pi’ ngodad yugu reb ni ku ma yib gelngidad riy—ni aram athap ni ngad thapgad ngak Got. (Roma 15:4) Fare Bible e be yog ngodad ni tin nib kireb ni ma yib ngodad e dabi par ni manemus. Demtrug e gafgow ni keb ngodad ma ba’ n’umngin nap’an. (2 Korinth 4:16-18) Bay e “athap rodad ni yafas ndariy n’umngin nap’an ni i micheg Got kakrom ni kakrom, ma der ma ban.” (Titus 1:2, NW) Faan gad ra felan’ ko re athap nem, mab muun ngay ni gad be lemnag ni gubin ngiyal’ e tin ni ke micheg Jehovah nib tamilang ni bay yib, ma rayog ni ngad k’adedan’dad u fithik’ e gafgow.—Roma 12:12; 1 Thessalonika 1:3.
Fare Ulung —Be Dag e T’ufeg rok Got
15. Uw rogon ma pi Kristiano e ra bagayad mi i ayuweg bagayad?
15 Reb ni ki pi’ Jehovah ngodad nrayog ni nge ayuwegdad u nap’an ni keb e gafgow e aram e gad ma chag ngak e girdi’ u lan e ulung ko Kristiano. Be yog e Bible ni gaar: “Fare fager nib riyul’ e ma dag e t’ufeg rok ni gubin ngiyal’, mab walag ni kan gargelnag ni fan ko ngal’an e gafgow.” (Proverbs 17:17, NW) Thin rok Got e be pi’ e athamgil nga laniyan’ urngin e girdi’ u lan e ulung ni ngur ted farad ma nguur t’ufeged yad. (Roma 12:10) “Ra be’ ma gathi go’ ir e ngi i tafinaynag e tin nib fel’ ngak, ya ngki tafinay e tin nib fel’ ngak boch e girdi’,” ireray e n’en ni yoloy Paul ni apostal. (1 Korinth 10:24) Ra bay e lem rodad ni aram rogon ma ra ayuwegdad ni ngad tedan’dad ko tin nib t’uf rok yugu boch e girdi’ ko bin ni nguuda lemnaged e pi skeng ni keb ngodad. Ma nap’an ni gad ra ayuweg yugu boch e girdi’, ma gathi kemus ni gad be ayuwegrad ya ku ra felan’dad ma ra gaman u wan’dad ma ireray e n’en nra baudeg e magawon rodad.—Acts 20:35.
16. Uw rogon ma ra reb e Kristiano ma rayog ni nge pi’ e athamgil nga laniyan’uy?
16 Piin ni pumoon nge ppin ni kar ilalgad ko tirok Got e ri bay rogorad ni ngar gelnaged boch e girdi’. Rogon ni buch e n’en ni aram rogon, e kar ngongolgad nrogon ni nge mom rok e girdi’ ni ngar chuchugurgad ngorad ma yad ma ayuwegrad. (2 Korinth 6:11-13) Riyul’ ni ra fel’ rogon e ulung nfaanra urngin e girdi’ ma ra guy rogon ni ngar pininged e magar ngak e piin nib fel’ yangaren ko tin nib fel’ ni ka ra rin’ed, ma nguura gelnaged e piin ni kefini michan’rad, ma nguura pied e athamgil nga laniyan’ e piin ni ke kireban’rad. (Roma 15:7) Maku t’ufeg ni fan ko walag e ra ayuwegdad ni nge dabi war e pagan’ rodad ngodad. Dabda gurgurgad ni nga dogned ni ke war be’ ko tirok Got ya bochan keb e gafgow ngak. Rib puluw e fonow rok Paul ngak e Kristiano ni “ngar pied e athamgil nga laniyan’ e piin ni ke kireban’rad.” (1 Thessalonika 5:14) Be dag e Bible ni mus ko Kristiano nib yul’yul’ e ku ma yib e gafgow ngorad.—Acts 14:15.
17. Mang ngiyal’ e rayog ni ngada gelnaged e m’ag u thildad ni gadad e walag ni Kristiano?
17 Pi muulung ko Kristiano e ir e tayim nib fel’ ni ngada fale’ged lanin’dad ma nge bagadad me pi’ e athamgil nga laniyan’ bagadad. (Hebrews 10:24, 25) Re sabethin ney u fithik’ e t’ufeg e yima rin’ ni gathi ke mus nu nap’an e muulung. Tin ma rin’ e girdi’ rok Got e ku yad ma gay e tayim ni ngar chaggad u taabang ni goo yad e ngar yarmiyed. Nap’an ni ra yib e magawon ni ra k’aring e kireban’, ma ba m’agan’dad ni ngad ayuweged gadad ya bochan fare m’ag ko fager ni kari gel u thildad. I yoloy Paul ni apostal ni gaar: “Ere de yu raba’ dowey, machane urngin yang . . . ni yad be ayuweg yad. Faanra gafgow bayang u dowey, ma urngin e yu yang ni ka ba’ e yad ma un ngak ko gafgow; faanra nog e sorok ngak bayang riy, ma urngin e yu yang ni ka ba’ riy ni yad ra un ngak fa gi nem ko felfelan’.”—1 Korinth 12:25, 26.
18. Mang lem e thingarda siyeged u nap’an ni kari kireban’dad?
18 Yu ngiyal’, e sana ke kireban’dad nib gel ya kad dabuyed ni ngad chaggad ngak e pi walagdad ni Kristiano. Thingarda chamgad ko lem ni aram rogon ma dabiyog ni ngad paloggad rok e pi walagdad nrayog ni ngar fal’ged lanin’dad ma rayog ni ngar pied e ayuw ngodad. Be ginangdad e Bible ni be gaar: “En ni ma par ni goo ir e be gay e lem nib siin; ma ra togopuluw ko urngin e gonop nib fel’.” (Proverbs 18:1, NW) Pi walagdad ni pumoon nge ppin e be micheg ni be ayuwedad Got. Faanra ngada ted fan e re n’en nem ni kan pi’ ngodad, ma ra baud lanin’dad u nap’an ni keb e gafgow.
Nguun Par nib Fel’ Rogon ni Yibe Lemnag Ban’en
19, 20. Uw rogon ni nge ayuwegdad e Thin nu Bible ni ngad n’aged e lem nib kireb?
19 Nap’an ni ke mulan’dad ma ke kireban’dad, e mmom ni ngada paged nge par e lem nib kireb rodad. Ni bod ni, nap’an ni keb e gafgow, e sana boch e girdi’ e ra tabab ni nge maruwaran’rad ko tirok Got, ni yad be lemnag ni magawon ni keb ngorad e ba pow ko damumuw rok Got ngorad. Machane dabmu pagtalin, ni Jehovah e der ma skengnag be’ ko “tin nib kireb.” (James 1:13) “Gathi ke yib u gum’irchaen [Got] ni be gafgownag ma be kireban’nag pi fak e girdi’,” ireray e n’en ni yog e Bible. (Lamentations 3:33) N’en nib thil riy, e Jehovah e ri ma kireban’ u nap’an ni ke gafgow e pi tapigpig rok.—Isaiah 63:8, 9; Zekariah 2:8.
20 Jehovah e ir “fare Chitamangin e wurengan’ ma fare Got ni ri ma fal’eg lanin’uy.” (2 Korinth 1:3, NW) Ri ma lemnagdad, ma ra tolangnagdad u ngal’an ni ke dugliy. (1 Peter 5:6, 7) Nguun lemnag ko uw rogon ni ma t’ufegdad Got e ra ayuwegdad ni nge par nib fel’ lanin’dad, maku ra felan’dad. I yoloy James ni gaar: “Pi walageg, mu ted ni reb e felfelan’ u nap’an ni keb ngomed fapi skeng nib thilthil.” (James 1:2, NW) Mang fan? Ke fulweg ni gaar: “Ya bochan en ni ke fel’ u wan’ ma yira pi’ e teeliyaw ko yafas ngak, ni ir e n’en ni ke micheg Jehovah ngak e piin ni be par nib t’uf rorad.”—James 1:12, NW.
21. Yugu demtrug e gafgow ni keb ngodad, ma mang e ke micheg Got ngak e piin nra par nib yul’yul’ ngak?
21 Rogon ni i ginangdad Jesus, ni bay e gafgow ni ra yib ngodad u fayleng. (John 16:33) Machane Bible e be micheg ni dariy “gafgow ara kireban’ ara togopuluw ara yibe par ni dariy e mad ara ban’en ni yira riya’ riy” nrayog ni nge daregdag u rogon ni gadad ba t’uf rok Jehovah nge Fak. (Roma 8:35, 39) Ri ma fal’eg lanin’uy ni ngad nanged ni demtrug e gafgow ni gad be mada’nag e ba’ n’umngin nap’an! Chiney, ni gad be sonnag ni nge m’ay e gafgow ko girdi’, ma Chitamangidad nib tarunguyey, i Jehovah, e be matanagiydad. Faanra ngada milgad ngak ni nge yororiydad, ma ra mang “gin nib tolang ni bay e pagan’ riy ngak e piin ni kan gafgownagrad, gin nib tolang ma bay e pagan’ riy u nap’an ni keb e gafgow.”—Psalm 9:9, NW.
Mang e Kada Filed?
• Susun mang e rayog ni nge buch rok e piin Kristiano ni yad be par ko re fayleng ney nib kireb?
• Uw rogon ma meybil rodad ni yib u gum’irchadad e ra gelnagdad u nap’an ni keb e skeng ngodad?
• Uw rogon ma kan ni thothup rok Got e reb e taayuw?
• Mang e gad ra rin’ ma rayog ni ngada ayuweged gadad?
[Picture on page 12]
Thingarda gayed Jehovah ni gowa gad be mil i yan nga reb e wulyang nib gel
[Pictures on page 14]
Piin ni kar ilalgad ko tirok Got e yad ma fanay urngin e tayim nib mab ni ngar pininged e magar ngak boch e girdi’ ko tin nib fel’ ni kara rin’ed mi yad pi’ e athamgil nga lanin’rad