Kan Fanenikay Ni Dariy Tapgin

“Kar fanenikayed gag ndariy tapgin.”​—JOHN 15:25.

1, 2. (a) Mang fan ni boch e girdi’ e ke balyangan’rad u nap’an ni yira t’ar e thin ngad ken e Kristiano, machane mang fan ni thin ni aram rogon e susun dabda gingad ngay? (b) Bin ngan i fan fare bugithin ni “fanenikay” e gad ra weliy ko re article ney? (Mu guy e footnote.)

PI MICH ROK JEHOVAH e yad be athamgil ni ngar pared ni yad be fol ko kenggin e motochiyel ni bay ko Thin rok Got. Bochan e re n’ey, ma yima yog e thin nib fel’ u murung’agrad u boor e nam. Machane, yu ngiyal’, yima t’ar e thin nga dakenrad. Ni bod be’ ni girdien e am u lan fare mach ni St. Petersburg, u Russia, e ke yib ngan’ ban’en me yog ni gaar: “Ka nog ngomad ni Pi Mich Rok Jehovah e ba ulung nib mith ma yad ma li’ e piin bitir ngar m’ad ma yad ma li’ed yad.” Machane tomren ni ke un e cha’ nem ko Pi Mich Rok Jehovah ko maruwel ni fan nga reb e international convention, miki yog ni gaar: “Chiney e kug guy e girdi’ nib fel’ ngongolrad, ni yad ma siminmin . . . Yad e girdi’ nib gapas ma yad ba mocha’, ma rib t’uf bagayad rok bagayad.” Me ulul ngay ni gaar: “Ri dagu nang fan ko mang fan ni ma yog e girdi’ e thin nde riyul’ u murung’agrad.”​—1 Peter 3:16.

² Pi tapigpig rok Got e gathi yad ra felfelan’ ni ma t’ar e girdi’ e thin nga dakenrad ni bod ni i ma yog ni yad ma rin’ e tin nib kireb, machane u nap’an ni ra yog e girdi’ e thin nib togopuluw ngorad ma dabra gingad ngay. I ginang Jesus pi gachalpen ni gaar: “Faanra fanenikaymed e girdi’ nu fayleng, ma thingar mu nanged ni gag e som’mon ni ar fanenikayed gag. . . . Machane thingari aw ni ara’ rogon, ya nge yib i m’ug nib riyul’ e tin ni kan yoloy u fithik’ e Motochiyel ni gaar, Kar fanenikayed gag ndariy tapgin.”a (John 15:18-20, 25; Psalm 35:19; 69:4) U m’on riy me yog ngak pi gachalpen ni gaar: “Faanra kan pining Beelzebul, ngak e en ni ir lolugen e tabinaw, ma urngin e girdi’ ko fare tabinaw ni bay ni pining boch e ngachal ngorad ni kab kireb ko biney?” (Matthew 10:25) Piin Kristiano e kar nanged fan ni ngar k’adan’gad ko gafgow ni ra yib ngorad nbochan e thin nib kireb ni ma yib ngorad e bang ko fare “ley i gek’iy ni yima gafgow riy” ni ke m’agan’rad ngay ni nguur feked u nap’an ni kar manged pi gachalpen Kristus.​—Matthew 16:24.

3. Uw feni gel e togopuluw nge gafgow ni yima ta’ ngak e tin riyul’ e tapigpig?

³ Kab kakrom i yib ni yima gafgownag e tin riyul’ e tapigpig, ni ka nap’an “Abel ni be’ nib mat’aw.” (Matthew 23:34, 35) Gathi ban’en ni kan dugliy nga in i ban’en. I yog Jesus ni “gubin e girdi” e bay ra fanenikayed pi gachalpen ni bochan fithingan. (Matthew 10:22) Maku, i yoloy Paul ni apostal ni urngin e pi tapigpig rok Got​—ni ra bagadad ma ba muun ngay—​ma nga i lemnag ni rayog ni ngeb e togopuluw nge gafgow ngak. (2 Timothy 3:12) Mang tapgin?

En ni Tabolngin e Fanenikay ni Dariy Tapgin

4. Uw rogon ni dag e Bible ko mini’ e tabolngin urngin e fanenikan ni dariy tapgin?

⁴ Be dag e Thin Rok Got ni aram ko tabolngin, ma bay be’ ni danir guy ni be k’aring e togopuluw. Mu lemnag Abel ni ir e bin som’mon e girdi’ nib gel e michan’ rok ni kan li’ ngem’ u fithik’ e damumuw nrib gel. Be weliy e Bible ni Kain ni walagen ni ma thang e fan, “ni yib rok faanem nib kireb,” ni Satan ni fare Moonyan’. (1 John 3:12) I dag Kain e ngongol rok Satan, me fanay fare Moonyan’ ni nge lebuguy e n’en ni be nameg. Maku be dag e Bible e maruwel rok Satan ko n’en ni rin’ ni i magawonnag Job nge Jesus Kristus u fithik’ e damumuw nib gel. (Job 1:12; 2:6, 7; John 8:37, 44; 13:27) Fare babyor ni Revelation e be weliy nib tamilang murung’agen e tabolngin e togopuluw nge gafgow ni ma yib ngak pi gachalpen Jesus ni be gaar: “I moonyan’ e bayi skengnagmed ya bayi gagiyegnag nga nin’ boch e gimed nga kalbus; ma gafgow ni nge yib ngomed e bayi par ni ragag e rran.” (Revelation 2:10) Arrogon, Satan e ir tabolngin urngin e fanenikay ngak e girdi rok Got ndariy tapgin.

5. Mang fan ni ma fanenikay Satan e tin riyul’ e tapigpig?

⁵ Mang fan ni ma fanenikay Satan e pi’ tapigpig nib riyul’? Lem rok nib mith e be dag ni ir be’ nrib tolangan’, i togopuluw Satan ngak Jehovah, ni ir “fare Pilung ni bayi par ndariy n’umngin nap’an.” (1 Timothy 1:17; 3:6) Be yog ni ma gagiyegnag e piin ke sunmiy nrib pag rogon ma dariy bagayad ni be pigpig ngak Jehovah u daken e lem rok nib fel’, pi girdi’ nem e kar pigpiggad ngak ni kemus ni bochan ni nge yog boch ban’en ngorad. Me yog Satan ni faanra ngan pag ni nge skengnag e girdi’, ma rayog ni nge talegrad ni gubin ni dabkuura pigpiggad ngak Got. (Genesis 3:1-6; Job 1:6-12; 2:1-7) Nap’an ni ke t’ar Satan e thin nga daken Jehovah ni be yog ni kaygi pag rogon e motochiyel rok, ma ir be’ ni ma lifith l’ugun, ma de yib angin e gagiyeg rok, e be guy rogon ni nge gagiyeg ni ba’ mat’awon ni bod Got ntha’bi tolang. Ere, lem rok ni baadag ni ngan pigpig ngak e ke k’aring ni nge damumuw ngak e pi tapigpig rok Got.​—Matthew 4:8, 9.

6. (a) Uw rogon ni ra bagadad ma ba l’ag ko fare issue u murung’agen e gagiyeg rok Jehovah ni th’abi tolang? (b) Uw rogon ma gad ra nang fan e re issue ney ma ra ayuwegdad ni nguuda pared nib yul’yul’? (Mu guy fare kahol ko page 10.)

⁶ Kam guy ko mang e ke rin’ e re n’ey ko yafas rom? Sana kam pirieg ni gur reb e tapigpig rok Jehovah, ni yugu aram rogon nib mo’maw’ ni ngan rin’ e tin nib m’agan’ Got ngay, machane kab gel e taw’ath ni ra yib ngom riy. Machane, mang e ngam rin’ nfaanra rarogon e par rom e be mo’maw’nag, maku ra amithnagem nfaanra ngam ulul ni ngam fol ko pi motochiyel nge kenggin e motochiyel rok Jehovah? Ma uw rogon nfaanra gowa de fel’ rogom riy? Gur ga ra yog ni dariy fan ni nguum pigpig ku Jehovah? Ara rayog ni bochan e t’ufeg rom ngak Jehovah nge ta’ fan nib gel ko pi felngin nrib fel’ e ra k’aringem ni ngam ulul ngam man ko kanawo’ rok ni gubin? (Deuteronomy 10:12, 13) Bochan kan pag Satan ni nge gafgownagdad, ma be pi’ Jehovah e kanawo’ ngodad ni be’ nge be’ ni ngada fulweged e thin ni yog Satan nib togopuluw ngak.​—Proverbs 27:11.

“Nap’an nra Yog e Girdi’ ni Gimed Ba Kireb”

7. Mang reb e wo’ ni ma fanay fare Moonyan’ ni be guy rogon ni nge chefegdad nga orel rok Jehovah?

⁷ Gad ra yaliy e chiney nib fel’ rogon reb ko pi n’en ni ma fanay Satan u fithik’ e sasalap ni fan ni nge gelnag e n’en ni ke yog nib togopuluw ku Got nge pi tapigpig rok​—ni aram e thin ni de riyul’ ni be kirebnagrad. I pining Jesus e “Chitamangin urngin e malulfith” ngak Satan. (John 8:44) Fare ngochol ni Moonyan’, e ri fan e “Ma T’ar e Thin nga Daken Be’,” e be dag ni ir e en ni ma t’ar e thin nga daken Got, nge thin rok ni ba’ fel’, nge fithingan nib thothup. Fare Moonyan’ e ma fanay e fanathin, ma ma t’ar e thin nga daken be’, ma ma lifith l’ugun ni fan ni nge togopuluw ko liw rok Jehovah ni th’abi tolang, ma ma fanay e re wo’ ney ni fan ni nge kirebnag e pi tapigpig rok Got nib yul’yul’. Bochan ni ma ulunguy e thin ni kireb nga daken e Pi Mich rok Jehovah, ma aram e rayog ni ngari gelnag i skengnagrad ngari mo’maw’ ni ngar kadedan’rad riy.

8. Mang e rin’ Satan me m’ug nib kireb Job u wan’uy, ma mang e n’en ni buch?

⁸ Mu lemnag e n’en ni ke buch rok Job, ni fithingan e be yip’ fan “Be’ ni Yima Fanenikay.” Gathi ke kirebnag Satan e pi n’en ni ma ayuweg e par rok Job, nge pi bitir rok, nge dowef rok, ya ke rin’ Satan ban’en ni nge m’ug ni gowa ke denen Job ma arfan ni i gechignag Got. Yugu aram rogon ni Job e ir be’ ni ri yima ta’ fan, ma kan dariyfannag, nib muun ngay e girdi’ rok nge fager rok nrib chuchugur. (Job 19:13-19; 29:1, 2, 7-11) Maku, daken e girdi’ ni yad be dake ta fal’eg lanin’uy, me athamgil Satan ni ngari ‘mulan’ Job u daken e fapi thin,’ ni som’mon riy e ka nog e fanathin ni be dag ni susun ke ngongliy e denen nrib ubchiya mi nog ngak ni ir be’ ni tadenen. (Job 4:6-9; 19:2; 22:5-10) Rib gel e kireban’ ni keb ngak Job riy!

9. Mang e kan rin’ ngak Jesus ni nge m’ug ni ir be’ ni tadenen?

⁹ Bochan en ni Fak Got e ir e kari n’uf e gagiyeg rok Jehovah ni th’abi tolang, ma aram e rib gel e fanenikan ni ta’ Satan ngak. Nap’an ni yib Jesus nga fayleng, i rin’ Satan ban’en ni nge m’ug Jesus riy nib kireb u wan’uy, ni bod e n’en ni rin’ ngak Job, i gagiyegnag ni nge m’ug ni Jesus e be’ ni tadenen. (Isaiah 53:2-4; John 9:24) Ma yog e girdi’ ni ir be’ ni tachingaw ma be’ ni taabich ma ‘ke ying e moonyan’ ngak.’ (Matthew 11:18, 19; John 7:20; 8:48; 10:20) Min nog e thin de riyul’ u murung’agen ni gaar ke yog e thin ni be dariyfannag Got. (Matthew 9:2, 3; 26:63-66; John 10:33-36) Bochan e re n’ey ma ke kireban’ Jesus, ya bochan e manang nra kirebnag e Chitamangin u wan’ e girdi’. (Luke 22:41-44) Tomur riy, min richibiy Jesus ni bod be’ ni tadenen. (Matthew 27:38-44) Rogon ni dag nrib yul’yul’, me k’adan’ Jesus ko “togopuluw ni ma ta’ e piin tadenen ngak.”​—Hebrews 12:2, 3.

10. Uw rogon ma tin ka ba’ ko piin ni kan dugliyrad e ri ma tiyan’ Satan ngorad e ngiyal’ ney?

¹⁰ Ngiyal’ ney, ma tin ni ka ba’ ko pi gachalpen Kristus ni kan dugliyrad e ku be fanenikayrad fare Moonyan’. Kan weliy ni Satan e “ma egnag e pi walagen [Kristus] . . . , ni ma egnagrad ni rran nge nep’ u p’eowchen Got.” (Revelation 12:9, 10) Ka nap’an e ngiyal’ ni kan nin’ nga wuru’ e tharmiy me par nib chugur ko fayleng, me gelnag Satan e maruwel ni ta’ ni fan ni nge m’ug riy ni pi walagen Kristus e yad e girdi’ ni yima moningnagrad ma kan n’agrad. (1 Korinth 4:13) U lan boch e nam, e ka nog e ba nochi ulung nib kireb ngorad ni bod e n’en ni buch rok e Kristiano ko bin som’mon e chibog. (Acts 24:5, 14; 28:22) Rogon e n’en ni weliy ko tabolngin, kan kirebnagrad u daken e thin ni kan wereg nde riyul’. Yugu aram rogon, “u daken e thin ni be pining e sorok nge thin ni be kirebnag be’ u wan’uy, nge thin nib fel’ nge thin nib kireb ni yima wereg u murung’agrad,” ma piin walagen Kristus ni kan dugliyrad, ni “yugu boch e saf,” e be ayuwegrad e yad be athamgil ni ‘ngar folgad ko motochiyel rok Got ma kar machibnaged murung’agen Jesus.’​—2 Korinth 6:8; John 10:16; Revelation 12:17.

11, 12. (a) Sana bochan e mang ni yima t’ar e thin nga daken e Kristiano? (b) Mang boch e kanawo’ nrayog ni ngeb e gafgow riy ngak reb e Kristiano ndariy tapgin nbochan e michan’ rok?

¹¹ Riyul’, ni gathi gubin ngiyal’ ni yima yog e thin ni ma kirebnag e pi tapigpig rok Got ni be’ nge be’ ni bochan e “tin nib mat’aw’” ni kar rin’ed. (Matthew 5:10) Boch e magawon e ma yib ni bochan daworda flontgad. Dariy ban’en nib fel’ riy nfaanra nap’an ni “kad denengad min batnagdad, ma gad [kadedan’dad] riy.” Machane, faanra reb e Kristiano e “be k’adan’ ko tin ni be k’aring e kireban’ ma kan gafgownag ndariy tapgin, ni bochan e be fol ko nangan’ rok ni fan ku Got, ma ireray e n’en nib fel’” u owchen Jehovah. (1 Peter 2:19, 20) Baga’ ni ma buch ban’en ni aram rogon ni bochan e mang?

¹² Boch i yad e kan gafgownagrad ya bochan dar uned nga boch e yalen ko gum’eyag nde puluw ko thin nu Bible. (Deuteronomy 14:1) Pi Mich nib fel’yangaren e yima yog e thin nib kireb nib togopuluw ngorad ya bochan yad be fol ko motochiyel rok Jehovah. (1 Peter 4:4) Boch e gallabthir ni Kristiano e kan t’ar e thin ngad kenrad ma ka nog ni “yad ma dariyfannag” ara “ma gafgownag” e bitir rorad nbochan e yad baadag e falay ndariy e racha’ riy. (Acts 15:29) Piin ni Kristiano e ke n’agrad e girdi’ rorad nge piin buguliy yoror rorad ya bochan kar manged e tapigpig rok Jehovah. (Matthew 10:34-37) Urngin e pi cha’ nem e yad be fol ko tin ni rin’ e pi profet nge Jesus ni ur gafgowgad ndariy tapgin.​—Matthew 5:11, 12; James 5:10; 1 Peter 2:21.

Kadan’ u Fithik’ e Thin nib Kireb ni Yibe Yog

13. Mang e ra ayuwegdad ma rayog ni nge par ni gadad ba fel’ ko tirok Got u nap’an ni ri yibe t’ar e thin nga dakendad?

¹³ U nap’an ni yira yog e thin ngodad ni rib gel e kireb riy nbochan e michan’ rodad, ma rayog ni nge mulan’dad, ni bod Jeremiah ni fare profet, ma gad lemnag ni dabkiyog ni ngad ululgad ko pigpig ku Got. (Jeremiah 20:7-9) Mang e ra ayuwegdad ni nguud pared ni gad ba fel’ ko tirok Got? Mu guy rogon ni ngam changar ko re n’em ni rogon ni ma changar Jehovah ngay. Rogon ni ma changar ngak e piin kar pared nib yul’yul’ u nap’an ni keb e skeng ngorad ma kar gelgad, ma gathi piin ke aw e gafgow ngorad. (Roma 8:37) Mu guy rogon ni ngam fal’eg i lemnag e piin ni kar gagiyelnaged e gagiyeg rok Jehovah nth’abi tolang nyugu demtrug urngin ban’en ni ke rin’ Satan nib togopuluw ngorad ni ngan moningnagrad​—ni piin ni pumoon nge ppin ni bod Abel, Job, nge Maria ni chitiningin Jesus, nge boch e girdi’ kakrom nib yul’yul’, nge pi tapigpig ni walagdad e ngiyal’ ney. (Hebrews 11:35-37; 12:1) Mu fal’eg i lemnag e yul’yul’ ni kar ted. Pi cha’ nem nib yul’yul’ ni pire’ ni pire’ e yad be piningdad ni ngad uned ngorad ni kar gelgad u daken e michan’ rorad ni aram e n’en ni kan ta’ ni fan ko piin ni kar gelgad ko fayleng nbochan e michan’ rorad.​—1 John 5:4.

14. Uw rogon ma meybil u fithik’ e yul’yul’ e ra gelnagdad ni nguuda pared nib yul’yul’?

¹⁴ Faanra ‘ke yoor e lem rodad ni be magawonnagdad,’ ma rayog ni ngada meybilgad ku Jehovah u fithik’ e yul’yul’, ma ra fal’eg lanin’dad me gelnagdad. (Psalm 50:15; 94:19) Ra pi’ ngodad e llowan’ nib t’uf rodad ni ngad gelgad ko skeng ma ra ayuwegdad ni ngarda tedan’dad ko fare issue nib ga’, ni aram e gagiyeg rok Jehovah nth’abi tolang, ni ireray fan ni yima fanenikay e pi tapigpig rok ndariy tapgin. (James 1:5) Maku rayog rok Jehovah ni nge pi’ ngodad “e gapas rok ndabi chuchugur ni nge nang e girdi’ fan.” (Filippi 4:6, 7) Re gapas ney ni Got e ke pi’ ngodad e ra ayuwegdad ni nge par nib gapas lanin’dad mab mudugil ko ngiyal’ nir yibe mochuchnagdad, ndabi gel e maruwar nge marus ngodad. U daken e kan ni thothup rok, nma ayuwegdad Jehovah ko urngin ban’en ni ra pag ni nge buch rodad.​—1 Korinth 10:13.

15. Mang e ra ayuwegdad ni dabda damumuwgad u nap’an ni keb e gafgow ngodad?

¹⁵ Mang e ra ayuwegdad ni dabda damumuwgad ngak e piin ni be fanenikaydad ndariy tapgin? Mu lemnag ni pilungen e toogor rodad e Satan nge fapi moonyan’. (Efesus 6:12) Yugu aram rogon ni boch e girdi’ e kar togopuluwgad ngodad ni lem rorad, ma boor u fithik’ e piin ni yad be togopuluw ngak e girdi’ rok Got e dar nanged fan ara bay boch e girdi’ ni be gagiyegnagrad. (Daniel 6:4-16; 1 Timothy 1:12, 13) Baadag Jehovah ni “urngin e girdi’” e “ngar thapgad ngak ma ngar nanged e tin nib riyul’.” (1 Timothy 2:4) Tin riyul’ riy, boch e girdi’ ni yad ma togopuluw ngodad kafram e kar manged e Kristiano ni walagdad e chiney ya bochan kar guyed e ngongol rodad nib fel’. (1 Peter 2:12) Maku, rayog ni ngad filed ban’en ko tin ni rin’ Josef ni Fak Jakob. Yugu aram rogon ni rib gel e gafgow ni keb ngak Josef nbochan e n’en ni rin’ e pi walagen ngak, ma de fanenikayrad. Mang fan? Ya bochan ke nang ni Jehovah e ba muun ngay, ni be gagiyegnag ni nge buch boch ban’en ni fan ni nge lebuguy e tin nib m’agan’ ngay. (Genesis 45:4-8) Maku rayog rok Jehovah ni nge gagiyegnag ni urngin e gafgow ni keb ngodad e ra aw ni yira pining e sorok nga fithingan riy.​—1 Peter 4:16.

16, 17. Mang fan ni thingar dabi magafan’dad ko maruwel ni ma ta’ e piin tatogopuluw ni ngara taleged gadad ko maruwel ni ngan wereg e machib?

¹⁶ De t’uf ni ngari kireban’dad nfaanra bay e tayim ni gowa ke yog rok e piin tatogopuluw ni ngar taleged ni nge dabi mon’og fare thin nib fel’. Ngiyal’ ney ma be rurug Jehovah e pi nam u daken e machib ni kan wereg u ga’ngin e fayleng, ma tin nib fel’ e yad be yib nga lan. (Haggai 2:7) Kristus Jesus, ni fare Tachugol saf nib fel’, e i yog ni gaar: “Saf rog e yad ma rung’ag lungug, ma gu manangrad, ma yad ma lekeg. Ma gu ra pi’ e yafas ndariy n’umngin nap’an ngorad, . . . ma dariy be’ nrayog ni nge lagrad rog.” (John 10:27-29) Maku be un e pi engel ko mukun woldug nib spiritual nib gel e maruwel riy. (Matthew 13:39, 41; Revelation 14:6, 7) Ere, dariy ban’en ni ma yog ara rin’ e piin tatogopuluw nrayog ni nge taleg e tin nib m’agan’ Got ngay.​—Isaiah 54:17; Acts 5:38, 39.

¹⁷ Baga’, ni n’en ni ma rin’ e piin tatogopuluw e ma chel nge togopuluw ngorad. Reb e flak u Africa, e kan wereg boor e thin nde riyul’ u murung’agen e Pi Mich Rok Jehovah, nib muun ngay ni yad ma liyor ko Moonyan’. Ma bochan e re n’ey, nap’an ni yib e Pi Mich ko tabinaw rok Grace, ma mil nga wuru’ e naun rok nge mith nge mada’ ko ngiyal’ ni kar chuwgad. Reb e rran ma fare pastor ko teliw rok e dag reb e babyor me yog ngak urngin e girdi’ ni ur moyed ni dabra bieged e re n’em ya ra k’aringrad ni ngar digeyed e teliw rorad. Biney e thin ni yog e ke pug e tafinay rok Grace. Yay ni migid me yib e Pi Mich ni ngar guyed, de mith rorad ya ke un ngorad ko sabethin me yog ngak baken e re babyor nem. Kan tababnag e fol Bible, ma nap’an e duw ni 1996 me un ko taufe. Chiney be fanay Grace e tayim rok ni nge gay e piin ni sana ka nog ngorad e thin nde riyul’ u murung’agen e Pi Mich Rok Jehovah.

Mu Gelnag e Michan’ Rom e Chiney

18. Mang fan nib t’uf ni ngada gelnaged e michan’ rodad u m’on ni nge yib e skeng nib gel, ma uw rogon ni ngada rin’ed ni aram rogon?

¹⁸ Bochan ni demtrug e tayim ma rayog rok Satan ni ngeb nib tomgin ngodad ni nge cham ngodad be fanenikaydad ndariy tapgin, rib ga’ fan ni ngada gelnaged e michan’ rodad e chiney. Uw rogon ni ngad rin’ed ban’en ni aram rogon? Reb e report ni yib u reb e nam ni girdi’ rok Jehovah e yibe gafgownagrad e yog ni gaar: “Reb e ban’en e kari tamilang: Piin nib fel’ rogon ni ke mecham i rin’ e tirok Got ban’en ngorad ma ri yad ma tayfan e thin riyul’ u Bible ma kar pared nib mudugil ko ngiyal’ ni ra taw e skeng ngorad. Machane piin ni ma pag e muulung ni mus ko ngiyal’ nib ‘fel’ e yafang’, ma gathi gubin ngiyal’ ni ma un ko machib, ma yad ma th’ab e motochiyel ko tin nib achichig e baga’ ni ka ra mulgad u nap’an ni yib e ‘skeng nib gel” ngorad. (2 Timothy 4:2) Faanra kam guy bang nib t’uf ni ngam gelnigem riy, nga mu gurgur ni ngam rin’.​—Psalm 119:60.

19. Mang e ke rin’ e yul’yul’ ko pi tapigpig rok Got u nap’an ni keb e fanenikan ndariy tapgin ngorad?

¹⁹ Yul’yul’ rok e tin riyul’ e tapigpig u tan e fanenikan ni ma ta’ Satan e ri be micheg nib puluw, ma ba’ rogon, mab mat’aw e gagiyeg rok Jehovah ni th’abi tolang. Yul’yul’ rorad e be felfelan’nag gum’irchaen Got. Yugu aram rogon ni girdi’ e ma ulunguy e thin ni kireb nga dakenrad, ma en ni kab tolang ko fayleng nge tharmiy e “der tamra’, ni nga nog ni ir e Got rorad.” Tin riyul’ riy, e rogon urngin e piin nib yul’yul’, e ba puluw ni nga nog ni gaar: “Dab ra m’aggad e girdi’ nu roy u fayleng.”​—Hebrews 11:16, 38.

[Footnote]

Rayog ni Ngam Weliy Fan?

• Mang e n’en ni be ta’ tanggin e fanenikan ngak e tin riyul’ e tapigpig ndariy tapgin?

• Uw rogon ni ke fanay Satan e gafgow ni nge kirebnag e yul’yul’ rok Job nge Jesus?

• Uw rogon ni ma gelnagdad Jehovah ma rayog ni ngada pared nib mudugil u nap’an e fanenikay rok Satan?

[Box/Picture on page 10]

Kari Tamilang fare Issue u Wan’rad

Bagayad e Pi Mich u Ukraine, ni fare maruwel ni ngan machibnag e thin u murung’agen Gil’ilungun e kan magawonnag ni ke pag 50 e duw, e ke yog ni gaar: “Rarogon e Pi Mich Rok Jehovah e thingar dabni guy ni kemus ni rogon e tha’ u thilin e girdi’. . . . Baga’ ni girdien e am e kemus ni yad be rin’ e maruwel rorad. Ran thiliyeg e am, ma ra thil e yul’yul’ rok girdien e am, machane gamad e ka be par e yul’yul’ romad ni kargon. Gamad manang ni bin riyul’ e tabolngin e gafgow romad e kan dag u Bible.

“Dagur lemnaged ni kemus ni kug awgad nga pa’ e piin ni yad ma magawonnigey. N’en ni ke ayuwegmad ma rayog ni nggu kadedan’mad riy e kari tamilang u wan’mad ni fare issue ni sum u lan fare milay’ nu Eden​—fare issue u murung’agen mat’awon Got ni nge gagiyeg. . . . Kug pared nib mudugil ni fan nga reb e issue ni gathi ke mus fan ko girdi’ ya ku fan ko en Th’abi Tolang u palpalthib. Kari tamilang u wan’mad ko mang fare issue nib riyul’ nib muun ngay. Ireray e n’en ni ke pi’ gelngimad ma ke ayuwegmad ni nggu pared nib yul’yul’ ni mus ko ngiyal’ ni mmo’maw e par romad.”

[Picture]

Kan kol Victor Popovych ko duw ni 1970

[Picture on page 7]

Mini’ e be ta’ tanggin e gafgow ni yib ngak Jesus?

[Pictures on page 9]

Job, nge Maria, nge pi tapigpig rok Got e ngiyal’ ney, ni bod Stanley Jones, e kar gagiyelnaged e gagiyeg rok Jehovah ni th’abi tolang