Ga Be Ayuweg e Gagiyeg rok Jehovah Nth’abi Tolang, Fa?

“Mogned ngak urngin e nam ni nge lungumed, ‘I Somol e ir e pilung.’”​—PSALM 96:10.

1, 2. (a) Mang ban’en nib ga’ fan ni buch u bang ko October 29 C.E.? (b) Mang fan ere n’em u wan’ Jesus?

I BUCH ban’en nrib ga’ fan, ndawor ni guy bayay u fayleng ko October 29 C.E. Matthew ni ma yoloy e Gospel e gaar: “Ma nap’an ni yugu ntaufenag Jesus, me yib u fithik’ e ran nga talang. Me mab e tharmiy ngak, me guy [John ni Tataufe] fare Kan ni Thothup rok Got ni be yib u lang i yib nga but’ ni bod ba bulogol me yib i par nga daken [Jesus]. Me non ba lam u tharmiy ni gaar, ‘Ereray Fakag nib t’uf rog ni kari felan’ug ngak.’” Ireray reb fapi n’en ni buch ni yoloy fa aningeg i girdi’ ni yad ma yoloy e Gospel murung’agen.​—Matthew 3:16, 17; Mark 1:9-11; Luke 3:21, 22; John 1:32-34.

² Fare kan ni thothup nni puog nga daken Jesus e ke dag ni ir faen ni Kan Dugliy, ni be yip’ fan e Messiah, ara Kristus. (John 1:33) Fin aram e ngiyal’ ni ke m’ug faen ni “fak” ara owchen ni kan micheg! Facha’ ni be sak’iy u p’eowchen John ni Tataufe e aram e cha’ nra k’ad Satan wurilen e rifrif u ay ma ir e ra pirdiiy lolugen ere toogor rok Jehovah nth’abi ga’ nem nge Gagiyeg rok. (Genesis 3:15) Ka nap’an ere ngiyal’ i n’em, ma ke nang Jesus nthingari athamgil nge libguy e n’en nib m’agan’ Got ngay u murung’agen e gagiyeg Rok nth’abi tolang nge fare Gil’ilungun.

3. Uw rogon ni fal’eg Jesus rogon ko maruwel ni kan pi’ ngak ni nge ayuweg e gagiyeg rok Jehovah nth’abi tolang?

³ “Me sul Jesus u Jordan nib sug ko kan ni thothup, me mang fare kan ni thothup e pow’iy nga daken e ted” ni fan e nge yog ni fal’eg rogon ko maruwel ni kan pi’ ngak. (Luke 4:1; Mark 1:12) U lan 40 e rran u rom, e yib e tayim ni nge fal’eg Jesus i lemnag fare deer ni sunmiy Satan u murung’agen e en ni bay mat’awun ni nge gagiyeg nge n’en Nra rin’ me ayuweg e gagiyeg rok Jehovah nth’abi tolang. Ba muun urngin e piin ni kan sunmiyrad ko re deer ney​—u tharmiy ngu fayleng. Ere susuna ngad lemnaged e yul’yul’ ni tay Jesus ma gad guy e n’en nthingar nda rin’ed ni ngad daged ni ku gad baadag ni ngad ayuweged e gagiyeg rok Jehovah nth’abi tolang.​—Job 1:6-12; 2:2-6.

Ke Togopuluw Satan ko Gagiyeg rok Jehovah ni Th’abi Tolang

4. Mang e rin’ Satan me gagiyel murung’agen fare deer ko en ni bay mat’awun ni nge gagiyeg?

⁴ Riyul’, ya dariy ban’en ni kad weliyed ni ke buch nde nang Satan. Ke gurgur ke cham ngak faen ni “fak” ara owchen fare “pin” rok Got. (Genesis 3:15) Dalip yay ni gay Satan rogon ni nge bannag Jesus, ni yog ngak nsusuna nge rin’ e n’en nib fel’ ngak ma gathi n’en ni baadag e Chitamangin. Fa yay ndalip ngay ni gay rogon ni nge bannag e yibi gagiyel fare deer u murung’agen e en ni bay mat’awun ni nge gagiyeg. Nap’an nibe dag ngak Jesus “urngin e nam nu fayleng nge fel’ngin,” me gaar Satan ngak Jesus: “Faan ga ra ragbug nga but’ ngam ta’ fag mu gu pi’ e pi n’ey ni urngin ngom.” Bochan ni manang Jesus ni fare Moonyan’ e ir e be gagiyegnag “urngin e nam nu fayleng,” me dag e gin ni bay riy ko fare deer ni ke sum u murung’agen e en ni bay mat’awun ni nge gagiyeg ni gaar: “Satan, mman ngam chuw! Ya babyor nib thothup e be gaar, ‘Mu ta’ fan Somol ni Got rom ma yigo ir e ngam pigpig ngak!’”​—Matthew 4:8-10.

5. Mang maruwel nib mo’maw’ e thingari rin’ Jesus?

⁵ I dag Jesus u rogon kanawoen e yafas rok ni, n’en nrib ga’ fan ni ngan nameg e ngan ayuweg e gagiyeg rok Jehovah nth’abi tolang. Ri manang Jesus nthingari par nib yul’yul’ nge ni mada’ ko ngiyal’ nra yim’ u tan pa’ Satan​—ni aram e n’en ni yog e profet u m’on riy ni aram e ra k’ad wurilen e rifrif u ay e en ni “fak” ara owchen fare pin—​ni bochan e nge m’ug e mich riy ni Got e ire bay mat’awun ni nge gagiyeg. (Matthew 16:21; 17:12) Maku thingari dag e mich riy ni Gil’ilungun Got e aram ere am ni be gagiyegnag Jehovah ni nge gel ku Satan me yibnag e gapas nge yaram nga gubin ban’en ni kan sunmiy. (Matthew 6:9, 10) Mang e rin’ Jesus ni nge lebguy ere maruwel ney nib mo’maw’?

“Gagiyeg rok Got e Ke Chugur”

6. Mang e i rin’ Jesus nge yog ni nang e girdi’ ni fare Gil’ilungun e aram e n’en nra fanay Got ni nge ‘kirebnag e maruwel rok fare Moonyan’’?

⁶ I “yan Jesus nga Galile, nge machibnag e thin nib fel’ ni yib rok Got, ni be gaar: ‘Ke taw nga nap’an nnog, ma gagiyeg rok Got e ke chugur.’” (Mark 1:14, 15) Tin nriyul’ riy, e gaar: “Dabi siy ni ngku gu machibnag u boch e binaw i yan fare Thin Nib Fel’ ni murung’agen e gagiyeg rok Got, ya ke l’ugeg Got ku gub ni ereray e n’en ni nggu rin’.” (Luke 4:18-21, 43) I milekag Jesus u baley e nam nga baley, “ni be machibnag ngak e girdi’ e Thin Nib Fel’ ni murung’agen e gagiyeg rok Got.” (Luke 8:1) Ki ngongliy Jesus boor e maang’ang​—i duruw’iy e girdi’, ma be fal’eg e yafang, ma be golnag e m’ar, ma be faseg e yam’. U daken e pi maang’ang ney, e micheg Jesus riy nrayog rok Got ni nge chuweg gubin e kireb nge gafgow ni ke sum ni bochan e togopuluw ntay u Eden miki ‘kirebnag e maruwel rok fare Moonyan’.’​—1 John 3:8.

7. Mang e fonownag Jesus pi gachalpen ni ngar rin’ed, ma mang angin?

⁷ I kunuy Jesus ba ulung i girdi’ ni yad ba yul’yul’ ni ngar manged pi gachalpen me skulnagrad ko re maruwel nem, ni fan e nge yog nni machibnag fare thin nib fel’ ko Gil’ilungun nge ni mus rogon. Som’on, e motochiyel ngak fa 12 i apostal me “l’ograd nga ranod ni ngar machibniged ngak e girdi’ murung’agen e gagiyeg rok Got.” (Luke 9:1, 2) Ma aram me l’og 70 i yad ni ngar weliyed fare thin ni: “Gagiyeg rok Got e ba chugur ngomed.” (Luke 10:1, 8, 9) Nap’an ni sul pi gachalpen Jesus nga rogned ngak angin e machib ni kar ted u murung’agen fare Gil’ilungun, me gaar: “Kug guy Satan ni ke mul u lan e lang ni bod e uluch.”​—Luke 10:17, 18.

8. Mang e be dag rarogon e yafas ku Jesus?

⁸ I fanay Jesus gelngin nrib fel’ rogon ma de siyeg e kanawo’ ni i mab ngak ni nge machibnag murung’agen fare Gil’ilungun. I maruwel ni gubin ngiyal’, ni rran nge nep’, miki digey e pin’en ni yima felfelan’ ngay ko yafas. I gaar: “Gamanman ni fox e bay e low ni taferad, ma arche’ e bay taferad ni kar toyed, machane en ni Fak e Girdi’ e dariy bang ni nge pag ir riy nga but’ nge toffan.” (Luke 9:58; Mark 6:31; John 4:31-34) De n’uw nap’an u m’on ni ngem’, ma de rus ni nge non u p’eowchen Pontius Pilate ni gaar: “Ni gargelnigeg ngaray nga fayleng ni bochan e nggu weliy murung’agen e tin riyul’.” (John 18:37) Rogon e yafas ku Jesus e dag nde yib, ni fan e nge mang reb e sensey nib fel’ ara nga i ngongliy e maang’ang ara kemus ni nge pagfan ir me thapeg e girdi’, ya bochan ni nge ayuweg me tay nga tagil’ e n’en nib m’agan’ Jehovah ngay me machibnag ngan nang nrayog rok Got ni nge lebguy ere n’em nib m’agan’ ngay u daken Gil’ilungun.​—John 14:6.

“Ke Libug!”

9. Uw rogon ni buch e n’en ni lemnag Satan ni aram e nge maad’ad nga wurilen ay faen ni “fak” ara owchen fare ppin rok Got?

⁹ Gubin ban’en ni rin’ Jesus ni fan ko fare Gil’ilungun e de fel’ u wan’ e Toogor rok, ni aram Satan ni fare Moonyan’. Bayay ngo bayay, u daken ‘fak’ ara owchen ni bay u roy u fayleng​—ni aram e pi am nge pi yurba’ i teliw—​e ke gay Satan rogon ni nge thang faen ni “fak” ara owchen fare ppin rok Got. Nap’an nni gargeleg Jesus nge ni mada’ ko ngiyal’ ni mus e yafas rok u fayleng, ma Satan nge piin ni yad ba muun ngak e ur nameged. Ma nap’an e 33 C.E., ma aram e ngiyal’ nni pi’ faen Fak e girdi’ nga pa’ e Toogor rok ni nge maad’ad nga wurilen e rifrif u ay. (Matthew 20:18, 19; Luke 18:31-33) Rib tamilang rogon ni be dag e pi Gospel ni gagiyegnag Satan e girdi’ ni ngar togopuluwgad ngak Jesus mar ted ni nge yim’ u daken baley i gek’iy​—ni tabab rok Judas Iskariot me yan u rom ko pi tolang ko prist, me yan ngak e pi tamachib ko motochiyel, me yan ngak e pi Farise, ma aram me yan ngak piyu Roma.​—Acts 2:22, 23.

10. Mang e ke libguy Jesus ko yam’ ni tay u daken fa ley i gek’iy ko gafgow?

¹⁰ Mang e ma yib ngan’um u nap’an ni gara lemnag yaan Jesus u daken fa ley i gek’iy ko gafgow nge ni mada’ ko ngiyal’ ni yim’ nib sowath e yam’ ni tay? Sana ra yib ngan’um fare biyul ni pi’ Jesus ni fan ngak e girdi’ ntadenen. (Matthew 20:28; John 15:13) Sana gara ngat nga gelngin e t’ufeg ni ke dag Jehovah u daken ere maligach nem ni ke pi’. (John 3:16) Sana gara lem ntaareb rogon ngak fare salthaw nu Roma ni gaar: “Riyul’ ni ir Fak Got!” (Matthew 27:54) Gubin e pi n’ey nib puluw ni nga nog. Maku reb e, dab mu pagtalin ntin tomur e thin rok Jesus u daken faley i gek’iy e: “Ke libug!” (John 19:30) Mang e ke libug? Yugu aram rogon ni yognag Jesus boor ban’en u lan e yafas rok ngu daken e yam’ ni tay, ma bochan ni yib Jesus nga fayleng e fan ni nge pithig e deer ni ke sum u murung’agen e gagiyeg rok Jehovah nth’abi tolang. Ma ku nog u m’on riy faram ni bochan e ir faen ni “fak” ara owchen ma ra gafgow ko skeng nib gel u tan pa’ Satan ni fan e nge dabkun kirebnag thin fithingan Jehovah. (Isaiah 53:3-7) Ba gel e pi maruwel ney, machane libguy Jesus ni gubin. Kari libug nrib fel’ rogon!

11. Mang e ra rin’ Jesus ni nge libguy fare yiiy ni ke sum u Eden?

¹¹ Bochan e yul’yul’ ni tay Jesus ma arame kan faseg Jesus ko yam’ ni gathi kab girdi’, ya ba “kan ni ma pi’ e yafos.” (1 Korinth 15:45; 1 Peter 3:18) N’en ni micheg Jehovah ngak Fak ni kan tolangnag e: “Mpar iray nga ba’ ni mat’aw rog nge yan i mada’ ko ngiyal’ ni bay gu tay e pi toogor rom nga tan e rifrif u em.” (Psalm 110:1) Fapi “toogor” e ba muun ngorad faen nth’abi ga’ ni be k’aring e magawon, ni aram Satan, nge gubin pi ‘fak’ ara owchen. Bochan ni Jesus e ir e Pilung ko fare Gil’ilungun e Messiah rok Jehovah, ma ir era chuweg gubin e piin ni yad be togopuluw u tharmiy ngu fayleng. (Revelation 12:7-9; 19:11-16; 20:1-3, 10) Fin aram e ra libug fare yiiy u Genesis 3:15 nge fare meybil ni fil Jesus ngak pi gachalpen ni gaar: “Me yib Gil’ilungum ngomad. Min rin’ e tin nib m’agan’um ngay u roy u but’ ni bod rogon ni yibe rin’ u tharmiy.”​—Matthew 6:10, NW; Filippi 2:8-11.

I Tay Jesus e Kanawo’ ni Ngad Leked

12, 13. (a) Mang angin fare thin nib fel’ u murung’agen fare Gil’ilungun ni gad be guy e ngiyal’ ney? (b) Mang e susun ni ngad fithed gadad riy nfaanra gad baadag ni ngad leked luwan ay Kristus?

¹² Ngiyal’ ney, e yibe machibnag fare thin nib fel’ u murung’agen fare Gil’ilungun u boor e nam, ni bod rogon ni yiiynag Jesus nra buch. (Matthew 24:14) Angin riy, e bokum milyon e girdi’ ni kar ognaged e yafas rorad ku Got. Ma kar felfelan’gad ko pi tow’ath nra yibnag fare Gil’ilungun. Yad be sap nga m’on ko ngiyal’ ni yad ra par u fithik’ e gapas nge pagan’ u paradis u fayleng, ma yad be weliy ngak e girdi’ murung’agen e athap rorad u fithik’ e felfelan’. (Psalm 37:11; 2 Peter 3:13) Gur bagayad e pi tamachib ko Gil’ilungun ney, fa? Faanra gur bagayad, ma yibe pining e magar ngom. Machane, ku bay ban’en nthingari bagadad me lemnag.

¹³ I yoloy apostal Peter ni gaar: “Kristus e ir e gafgow ni bochmed me dag ngomed rogon ni ngam folwokgad rok, ni aram e nguum leked luwan ay.” (1 Peter 2:21) Gara guy ni gathi pasig ni i tay Jesus ara salap rok ko machib, ya gafgow ni tay e aram e n’en ni weliy Peter murung’agen. Bochan ni ke guy Peter e n’en ni ke buch, ma manang gelngin e gafgow ni yira tay ngak Jesus ya nge yog ni par u tan e gagiyeg rok Jehovah nth’abi tolang me micheg ni Satan ba malulfith l’igin. Ere, mang kanawo’ e rayog ni ngad leked luwan ay Jesus riy? Thingar da fithed gadad ni nge lungudad: ‘Uw gelngin e gafgow ni gura tay ni fan e nggu ayuweg mug n’uf e gagiyeg rok Jehovah nth’abi tolang? Gu be dag ko ngongol rog nge pasig ni gu be tay ni n’en nib m’on u wan’ug e nggu ayuweg e gagiyeg rok Jehovah nth’abi tolang, fa?’​—Kolose 3:17.

14, 15. (a) Mang e rin’ Jesus nga boch e ban nge boch ban’en nni ognag ngak, ma mang fan? (b) Mang deer e thingar ud lemnaged ni gubin ngiyal’?

¹⁴ Gubin e rran ni gad ma mada’nag e skeng ni tin nib ga’ nge tin nib achig. Uw rogon ma gad nang e n’en ni ngad rin’ed ngay? Bod ni, nap’an ni yira waliydad ni ngad rin’ed ban’en nra taydad nga thatharen e riya’, ma mang e gadra rin’? Nap’an ni puwan’ Peter ngak Jesus, ma mang e rin’? I gaar Jesus: “Satan, mu chuw rog! Ya lem ni ga be tay e lem rok e girdi’, ma gathi lem rok Got.” (Matthew 16:21-23) Nap’an ni kan ognag e maruwel ngodad nrayog boor e salpiy riy nra magawonnag e tin ni gad be rin’ ni gad e Kristiano nge tha’ u thildad Got, ma gur gadra rin’ e n’en ni rin’ Jesus? Nap’an ni nang Jesus ni piin nra guyed e maang’ang ni ke ngongliy e “yad be n’en ni ngar bad ngak ngar feked ngar tiyed ni ir e nge mang pilung rorad,” me gur nge yan nge chuw rorad.​—John 6:15.

¹⁵ Mang fan ni rin’ Jesus ban’en nib gur e ngiyal’ nem nge ku boch e tayim? Ya manang ni bay ban’en ni kab ga’ fan ko nge ayuweg ir ara n’en ni be lemnag nib fel’ ngak. Baadag ni nge rin’ e n’en nib m’agan’ e Chitamangin ngay me ayuweg e gagiyeg rok Jehovah nth’abi tolang ndemtrug e n’en nra buch. (Matthew 26:50-54) Ere, faanra de tamilang u wan’dad murung’agen ere deer ni ke sum nem, ni bod Jesus, ma bay e riya’ riy ni gadra rin’ ban’en nib kireb. Mang fan? Bochan e rayog ni ngad awgad ko pi ban rok Satan, ya ba salap i pingeg ban’en nib kireb nge m’ug ni gowa ba fel’, ni bod e n’en ni rin’ u nap’an ni bannag Efa.​—2 Korinth 11:14; 1 Timothy 2:14.

16. Mang e susun ni ngad nameged u nap’an ni gad be ayuweg e girdi’?

¹⁶ Nap’an e machib ni gad ma tay ma, gad ma athamgil ni ngad nonad ngak e girdi’ u murung’agen e n’en nibe magawon lanin’rad riy ma gad dag ngorad e fulweg riy u Bible. Ireray reb e kanawo’ nrayog ni ngad ayuweged e girdi’ riy ngar adaged e fol Bible. Machane, n’en ni gad be nameg e gathi kemus ni ngad ayuweged e girdi’ ngar nanged e n’en ni be yog e Bible ara miti tow’ath nra yibnag Gil’ilungun Got. Ya thingar da ayuweged yad ngar nanged fan e deer ni ke sum u murung’agen e gagiyeg rok Jehovah nth’abi tolang. Ke m’agan’rad ngay ni ngar manged e tin nriyul’ e Kristiano ngar feked e ley rorad e ‘gek’iy’ ko gafgow ngar gafgowgad ni fan ko fare Gil’ilungun, fa? (Mark 8:34) Ke fel’ rogorad ni ngar uned ngak e piin ni yad be ayuweg mat’awun e gagiyeg rok Jehovah nib tolang mar micheged Satan nib malulfith l’igin mab ta gathibthib, fa? (Proverbs 27:11) Gad ba felfelan’ ngay ni ngad ayuweged gadad nge boch e girdi’ ni ngar rin’ed ere n’ey.​—1 Timothy 4:16.

Nap’an nra Gagiyegnag Got “Urngin Ban’en”

17, 18. Mang e gad be sonnag ni ba yib boch nga m’on nfaanra daged ni gad ba mang ko gagiyeg rok Jehovah nth’abi tolang?

¹⁷ Nap’an ni gad be rin’ e tin nrayog rodad e ngiyal’ ney ni ngad daged ko ngongol nge machib ni gad be tay ni gad ba mang ko gagiyeg rok Jehovah, ma rayog ni ngad sapgad nga m’on ko ngiyal’ ni Jesus Kristus era pi’ “urngin ban’en ni be gagiyegnag ngak Got ni Chitamangiy.” Wuin era buch ere n’em? I weliy apostal Paul ni gaar: “Bayi gel ngak urngin e pi kan ni be gagiyeg, nge piin ni yad be tay murung’agen ban’en, nge piin ni yad be yog e thin. Yi Kristus e thingari mang ir e i gagiyeg nge yan i mada’ ko ngiyal’ ni ke gel Got ngak urngin e pi toogor me ta’rad nga tan e rifrif u ay. . . . Ma aram e ir, ni ir e Fak Got, e bayi ta’ ir nga tan pa’ Got ni ke ta’ urngin ban’en nga tan pa’ Kristus; ma aram e Got e bay i gagiyegnag urngin ban’en.”​—1 Korinth 15:24, 25, 28.

¹⁸ Nap’an nra gagiyegnag Got “urngin ban’en”​—ma ireram ba ngiyal’ ni yira felfelan’ riy! Fare Gil’ilungun e ke libguy e n’en ni be nameg. Gubin e piin ni ur togopuluwgad ko gagiyeg rok Jehovah nth’abi tolang e kan chuwegrad. Ke yib e gapas nge yaram nga ga’ngin yang e fayleng. Fare thin ko psalmist e be yog ni gubin e girdi’ e yadra tang ni lungurad: “Mpininged e sorok nga fithingan Somol nga feni yul’yul’ . . . Mogned ngak urngin e nam ni nge lungumed, ‘I Somol e ir e pilung!’”​—Psalm 96:8, 10.

Rayog nim Fulweg?

• Uw rogon ni ga’nag Jesus fan fare deer ni ke sum u murung’agen e gagiyeg rok Got nth’abi tolang?

• Mang e ke libguy Jesus ko machib nge yam’ ni tay?

• Mang kanawo’ e rayog ni ngad folwokgad ko n’en ni rin’ Jesus ma gad dag ni gad be ayuweg e gagiyeg rok Jehovah nth’abi tolang?