Dab Mu Pagtalin e Bin Th’abi Ga’ e Magawon ni Bay

1, 2. (a) Mang e bin th’abi ga’ e magawon ni bay e chiney? (b) Mang fan nib t’uf ni nge ga’ fan e re magawon ney u wan’dad?

BOOR e girdi’ e yad ma lemnag ni magawon ko salpiy e aram e bin th’abi ga’ e magawon ni bay e ngiyal’ ney. Ere, ba ga’ ni yad ma fanay yooren e tayim rorad ni ngar guyed rogon ni nge yoor e salpiy rorad ara ngar guyed rogon ni nge dabi m’ay e salpiy ni kar yognaged. Ma boch e girdi’ e yad ma lemnag ni tabinaw rorad, nge rarogon fithik’ i dowrad, nge boch ban’en ni yad baadag ni ngar yognaged u lan e yafos rorad e aram e bin th’abi ga’ e magawon ni bay.

² Machane bin riyul’ riy e, rogon ni nge gagiyel mat’awun Jehovah ni nge gagiyeg e aram e bin th’abi ga’ e magawon ni bay e chiney. Ere, ba t’uf ni ngad guyed rogon ndab da paged talin e re magawon ney. Uw rogon nrayog ni nge buch e re n’ey? Rayog ni ngad mitgad ko pi n’en ni gad ma rin’ u reb e rran ngu reb ara ud pared ni gad be lemnag e pi magawon rodad, ma gad pagtalin feni ga’ fan ni nge gagiyel ni Got e ir e bay mat’awun ni nge gagiyeg. Maku reb e, faanra rib ga’ fan u wan’dad rogon ni nge gagiyel mat’awun Jehovah ni nge gagiyeg, ma aram e ra mom ngodad ni ngad athamgilgad u fithik’ e pi magawon ni gad ma mada’nag u reb e rran ngu reb. Ma re n’ey e ra gelnag e chugur ko tha’ u thildad Jehovah.

MANG NRIB GA’ FAN?

3. Mang e ke yog Satan u murung’agen e gagiyeg rok Got?

³ Bochan e n’en ni rin’ Satan ni Moonyan’, ma aram e n’en ni k’aring ni nge sum fare deer ni bay rogon nga mat’awun e gagiyeg rok Jehovah. Ke yog Satan nib kireb rogon e gagiyeg ni be tay Jehovah ma bay boch ban’en nib fel’ nder pi’ ngodad. Ki yog nra felfelan’ e girdi’ maku ra fel’ rogon e par rorad ni faanra yad e yad be gagiyegnaged yad. (Gen. 3:1-5) Ki yog Satan ndariy be’ nriyul’ nib yul’yul’ ngak Got ma faanra mada’nag e magawon ma ra togopuluw ko gagiyeg ni be tay Jehovah. (Job 2:4, 5) Ere, aram fan ni ke pag Jehovah ba ngiyal’ ni nge yan ya nge yag ni gagiyel ndabiyog ni nge fel’ e par ko girdi’ ni faanra gathi ir e be gagiyegnagrad.

4. Mang fan nib t’uf ni nge tamilang e fulweg ko fare deer ni ke sum u murung’agen e en ni bay mat’awun ni nge gagiyeg?

⁴ Bin riyul’ riy e, manang Jehovah nde riyul’ e n’en ni ke yog Moonyan’. Ere, mang fan ni ke dugliy ni nge pag e re magawon ney ni nge ulul, me pi’ e tayim ngak Satan ni nge micheg e n’en ni be yog? Fulweg ko re deer ney e bay rogon ngak urngin e piin ni yad be par u tharmiy ngu fayleng. (Mu beeg e Psalm 83:18.) Bin riyul’ riy e, ke siyeg Adam nge Efa ni ngar parew u tan e gagiyeg rok Jehovah, maku aram rogon yugu boch e girdi’ nra bad nga tomurrow. Ere bochan e re n’ey, ma rayog ni nge lemnag boch e girdi’ nib puluw e n’en ni ke yog Moonyan’. Maku reb e, n’umngin nap’an nder tamilang e fulweg ko re deer ney u wan’ e girdi’ nge pi engel, ma aram e dabiyog ni ngad pared u fithik’ e gapas nge taareban’. Machane, tomuren nra gagiyel ni Jehovah e ir e en ni bay mat’awun ni nge gagiyeg, ma aram e urngin e piin ni yad bay u tharmiy ngu fayleng e yad ra par u tan e gagiyeg rok nib mat’aw ndariy n’umngin nap’an. Aram e ngiyal’ nra sul urngin ban’en ni bay u ga’ngin e palpalth’ib ngki gapas bayay.​—Efe. 1:9, 10.

5. Mang e ba milfan ngodad ni ngad rin’ed ya nge yag nda uned i tayfan mat’awun e gagiyeg rok Jehovah?

⁵ Dabki n’uw nap’an ma bayi gagiyel feni mat’aw e gagiyeg rok Jehovah, ma aram me chuw e gagiyeg ni be tay Satan nge girdi’. Ra fel’ rogon e gagiyeg nra tay Got u daken Gil’ilungun fare Messiah, ma urngin e girdi’ ni yad ba yul’yul’ e yad ra micheg nrayog ko girdi’ ni ngar pared ni yad ba yul’yul’ ngak Got mar ted fan mat’awun e gagiyeg rok. (Isa. 45:23, 24) Ere gur, ga baadag ni ngam mang bagayad e piin ni kar pared ni yad ba yul’yul’ ngak Jehovah ma yad be tayfan mat’awun e gagiyeg rok, fa? Ba mudugil ni ga baadag. Ere, ba t’uf ni ngad l’eged owchedad ko re magawon ney ni ke sum, ya aram e n’en nib t’uf ni ngad tedan’dad ngay ma gad fal’eg i lemnag feni ga’ fan.

KAB GA’ FAN NI NGE GAGIYEL NI GOT E IR E BAY MAT’AWUN NI NGE GAGIYEG KO YAFOS NDARIY N’UMNGIN NAP’AN NI GAD BE ATHAPEG

6. Uw feni ga’ fan ni nge gagiyel ni Jehovah e ir e bay mat’awun ni nge gagiyeg?

⁶ Kad weliyed faram ni bin th’abi ga’ e magawon ni bay e chiney e aram e rogon ni nge gagiyel mat’awun Jehovah ni nge gagiyeg. Kab ga’ fan e biney e magawon ko felfelan’ rodad. Ere gur, re n’ey e be yip’ fan nde ga’ fan e yafos ni manemus ni gad be athapeg ni nge yag ngodad ara der lemnagdad Jehovah? Danga’. Uw rogon ni kad nanged e re n’ey?

7, 8. Mang fan nnap’an nra gagiyelnag Got ni ir e bay mat’awun ni nge gagiyeg, ma aram e ku ra lebguy e pi n’en ni ke micheg nra rin’ ni fan ngodad?

⁷ Rib t’uf e girdi’ rok Jehovah ma rib ga’ farad u wan’. I m’agan’ ngay ni nge pi’ Fak ni nge yim’ ni fan e nge yag e yafos ndariy n’umngin nap’an ngodad. (John 3:16; 1 John 4:9) Ere, faanra dabi lebguy Jehovah e pi n’en ni ke micheg nra rin’ ni fan ngodad, ma aram e ra yan i aw nib puluw e n’en ni ke yog Satan ni aram e ke ban Jehovah, ma bay boch ban’en nib fel’ nder pi’ ko girdi’, ma de mat’aw rogon e gagiyeg rok. Ku ra micheg e n’en ni ma yog e piin ni yad ma moningnagdad ni ma lungurad: “I yog faram ni bay sul, er rogon ni yog fa danga’? Ere ba uw? Chitamangidad e kar m’ad, machane urngin ban’en ni ka be par ni ka rogon ni ka nap’an e ngiyal’ ni sum e fayleng riy ke mada’ ko chiney!” (2 Pet. 3:3, 4) Ere, aram fan nra n’igin Jehovah ni nge gagiyel ni ir e bay mat’awun ni nge gagiyeg miki pi’ e yafos ndariy n’umngin nap’an ngak e piin ni yad be fol rok! (Mu beeg e Isaiah 55:10, 11.) Maku reb e, gagiyeg rok Jehovah nib tolang e be tor nga daken e t’ufeg rok. Ere, ku aram reb i fan nrayog ni nge pagan’dad ni gubin ngiyal’ nra i t’ufeg e pi tapigpig rok ni yad ba yul’yul’ ma ra ur pared nib ga’ farad u wan’.​—Ex. 34:6.

⁸ Nap’an ni gad ra tamilangnag feni ga’ fan e gagiyeg rok Jehovah, ma gathi aram e gad be darifannag e yafos ndariy n’umngin nap’an ni gad be athapeg ni nge yag ngodad ara gad be m’aynag fadad u wan’. Ya n’en ni gad be rin’ e gad be guy rogon ni nge puluw rogon ni gad ma lemnag murung’agen e gagiyeg rok Jehovah nge yafos ndariy n’umngin nap’an ni gad be athapeg. Faanra nge yag nda l’eged owchedad ko bin nib ga’ e magawon ni bay ma gad dag ni gad ba muun nga tan e gagiyeg rok Jehovah nib mat’aw, ma aram e ba t’uf ni nge puluw e lem rodad u murung’agen e re n’ey.

ROGON NI THILYEG JOB ROGON E LEM ROK

9. Mang e yog Satan u murung’agen Job? (Mu guy e sasing ni bay u tabolngin e re article ney.)

⁹ Fare babyor rok Job e aram ba ken ko tin som’on e babyor ko Bible nni yoloy kakrom. U lan e re ke babyor nem e kan tamilangnag riy feni ga’ fan ni nge puluw rogon ni ngaud lemnaged murung’agen e gagiyeg rok Got. Rayog ni ngad beeged ko re ke babyor ney e n’en ni yog Satan ni aram e faanra mada’nag Job e gafgow nib gel, ma aram e ra togopuluw ngak Got. Ki yog Satan ngak Jehovah ni nge gafgownag Job. Machane, de rin’ Jehovah e re n’em. Yugu aram rogon me pag Satan ni nge skengnag Job ni aram e gaar ngak: “Ke mil fan e urngin rok ngom.” (Mu beeg e Job 1:7-12.) De n’uw nap’an nga tomuren, ma aram me yim’ e pi tapigpig rok Job, nge pi gamanman rok, nge fa ragag i bitir ni fak. I k’aring Satan e pi gafgow ney ni nge buch u reb e kanawo’ nra m’ug riy ni gowa Got e ir e ke k’aring e pi n’em ni nge buch rok Job. (Job 1:13-19) Bin migid, ma aram me k’aring Satan ba mit e m’ar nge yib ngak Job nrib gel e amith riy ma kub sonogor. (Job 2:7) Kub gel e gafgow ni tay u nap’an ni yog leengin nge fa dalip i pumoon ni ur dake yad e fager rok boch e thin nri kireban’ ngay miki muleg laniyan’.​—Job 2:9; 3:11; 16:2.

10. (a) Mang e rin’ Job ni be dag nib yul’yul’ ngak Got? (b) Mang fan nib t’uf ni ngan yal’uweg e lem rok?

¹⁰ Ere, mang e buch nga tomuren? I gagiyel ni yigoo bogi ban e thin ni ke yog Satan. I siyeg Job ni nge togopuluw ngak Got. (Job 27:5) Machane, immoy ba ngiyal’ nde puluw rogon ni i lem Job. Yigi par ni be yog ndariy ban’en nib kireb ni ke rin’, miki yog ni baadag ni nge nang ko mang fan ni ke yib e gafgow ngak ni aram gelngin. (Job 7:20; 13:24) Sana gad ra lemnag nib puluw ni nge lem ni aram rogon ni bochan urngin e gafgow ni ke yan u fithik’. Machane, i guy Jehovah nib t’uf ni nge yal’uweg e lem rok Job. Ere, mang e yog ngak?

11, 12. Mang e ayuweg Jehovah Job ni nge ga’ fan u wan’, ma mang e rin’ Job ni bochan e re n’ey?

¹¹ Rayog ni ngad beeged murung’agen e pi n’en ni yog Got ngak Job ko guruy ni 38 nge mada’ ko 41 ko fare babyor rok Job. Machane, faan gad ra beeg e pi guruy nem ma dariy bang riy ni be yog ni weliy Got ngak Job fan ni be gafgow. Fan ni yog Jehovah e pi thin nem ngak Job e gathi bochan e nge weliy fan ngak ni be gafgow, ya nge tamilang nde kireb e rok Jehovah. Ya baadag Jehovah ni nge ayuweg Job ni nge tamilang u wan’ ni faanra nge taareb rogonnag ir ngak ma rib gel e thil rorow, ya kab pag feni manigil Jehovah. Ki ayuweg Job ni nge tamilang u wan’ ni ka bay boch e magawon ni kab ga’ ko magawon ni be yan u fithik’, ma aram e n’en nib t’uf ni nge tiyan’ ngay. (Mu beeg e Job 38:18-21.) Re n’ey e ayuweg Job ni nge puluw rogon ni be lem.

¹² Ere gur, ba kireb Jehovah ko fonow nib gel ni pi’ ngak Job u tomuren urngin e gafgow ni ke yan u fithik’? Danga’, maku de lemnag Job ni aram rogon. I tamilang u wan’ fan e fonow ni ke pi’ Jehovah ngak miki dag nib ga’ fan u wan’. Ki yog ni gaar: “Kug tamra’ nga urngin e tin ni kug weliy ma kug kolngan’ug u roy u fithik’ e fiyath nge awat.” Ere, rib ga’ angin e fonow nib gel ma kub manigil ni pi’ Jehovah ngak Job. (Job 42:1-6) U m’on ko re n’ey, maku immoy reb e moon nib bitir ngak Job ni ka nog Elihu ngak ni ki guy rogon ni nge yal’uweg e lem rok Job. (Job 32:5-10) Tomuren ni fol Job ko fonow ni pi’ Got ngak me yal’uweg rogon e lem ni be tay, ma aram me yog Jehovah ngak fa dalip i pumoon ni ur dake yad e fager rok ni kari felfelan’ ngak nga rogon e yul’yul’ ni ke tay u fithik’ urngin e gafgow ni ke mada’nag.​—Job 42:7, 8. 

13. Uw rogon ni ayuweg e fonow rok Jehovah Job u tomuren ni ke thumur fapi gafgow ni i yan u fithik’?

¹³ Fonow ni pi’ Jehovah ngak Job e ki ayuweg nge mada’ ko ngiyal’ ni ke thumur fapi gafgow ni i yan u fithik’. Ni uw rogon? Yugu aram rogon ni tow’athnag Jehovah “Job ko tin ni baaram e duw ni bay nga tungun e par rok Job ko biney e tamilang, ni ka ba ga’ nga rogon ni fal’eg waathan ko tin ni baaram e duw ni immoy nga tabolngin e par rok ko biney e tamilang,” machane dabisiy nib n’uw nap’an mfini sul Job ngki fel’ rogon bayay e par rok, ya fin boch nga tomuren me gaman “medlip e pagel ni fak nge dalip e ppin.” (Job 42:12-14) Dariy e maruwar riy ni i tawrengnag Job fa tin baaram e bitir rok ni li’rad Satan ngar m’ad. Maku reb e, ba mudugil nde pagtalin urngin e gafgow nranod chon e tabinaw rok u fithik’. Mus ni faanra munmun me tamilang u wan’ fan e pi skeng nem ni yib ngak, machane rayog nsana immoy yu ngiyal’ ni i lemnag ko mang fan ni pag Got ni nge gafgow ni aram gelngin. Demtrug rogon e lem rok, machane ba mudugil ni i lemnag e fonow ni pi’ Got ngak. Ma aram e n’en ni i fal’eg laniyan’ me ayuweg ni nge par nib puluw e lem rok.​—Ps. 94:19.

14. Mang e rayog ni ngad filed ko n’en ni buch rok Job?

¹⁴ Ku arrogodad nrayog ni nge ayuwegdad e n’en ni buch rok Job ni nge fel’ lanin’dad me puluw rogon e lem ni gad ma tay. Bin riyul’ riy e, ke tay Jehovah e pi n’ey nga lan e Bible ni “nge fonownagdad, ni bochan e nge yog e l’agan’ ngodad u fithik’ e gum’an’ nge athamgil laniyan’ ni be pi’ e thin ko babyor nib thothup ngodad.” (Rom. 15:4) Ere, mang e gad be fil ko re n’ey? Gad be fil riy ndab da paged e pi n’en ni be buch u lan e yafos rodad ara pi magawon ni gad be yan u fithik’ ni nge par ni yigoo aram e pi n’en ni gad be lemnag ma gad pagtalin e bin ni kab ga’ e magawon ni bay, ni aram e rogon ni nge gagiyel mat’awun Jehovah ni nge gagiyeg. Maku reb e, ngad guyed rogon ndab da paged talin ni n’en nib milfan ngodad ni ngad rin’ed ni bay rogon ko re magawon ney e aram e ngad pared ni gad ba yul’yul’ u fithik’ urngin e gafgow nge magawon ni gad be mada’nag ni bod rogon ni rin’ Job.

15. Mang angin e yul’yul’ ni gad ma tay u fithik’ e pi skeng ni gad ma mada’nag?

¹⁵ Mang fan nra fel’ lanin’dad u nap’an ni gad ra lemnag feni ga’ fan e yul’yul’ ni gad ma tay? Ya re n’ey e be dag ni bay fan e skeng ni gad be mada’nag. Gathi gad ma mada’nag e skeng ni bochan e ke damumuw Jehovah ngodad, ya fan e pi skeng ney ni gad be mada’nag e bochan ni gad be tayfan mat’awun e gagiyeg rok Got. (Prov. 27:11) Ma k’adan’ ni gad ma tay u fithik’ e pi skeng ney e “ma fal’egdad u wan’ Got,” me ayuwegdad ni ngari l’agan’dad ko pi n’en ni ka bay nga m’on. (Mu beeg e Roma 5:3-5.) Ba tamilang ko n’en ni buch rok Job ni Jehovah e “ri ma runguy ma ma taganan’ ngak e girdi’.” (Jas. 5:11) Ere, rayog ni nge pagan’dad nra tow’athnagdad nge urngin e piin ni yad ra tayfan mat’awun e gagiyeg rok. Re n’ey e ra ayuwegdad ni ngad “athamgiliyed urngin ban’en u fithik’ e gum’an’” nge felfelan’.​—Kol. 1:11.

NGAD TEDAN’DAD KO N’EN NIB GA’ FAN

16. Mang fan nib t’uf ni ngaud pugeduran ngan’dad feni ga’ fan ni nge gagiyel mat’awun Jehovah ni nge gagiyeg?

¹⁶ Riyul’ nib mo’maw’ ni ngaud pared ma gad be lemnag rogon nra gagiyel mat’awun Jehovah ni nge gagiyeg u nap’an ni gad be mada’nag boch e magawon u lan e yafos rodad. Mus nga nochi magawon nib achig ma rayog ni ngad lemnaged ni bogi magawon nib ga’ ni faanra ud pared ma gad be lemnag. Ere, ba fel’ ni ngaud pared ni gubin ngiyal’ ma gad be puguran ngan’dad feni ga’ fan ni ngad uned i tayfan mat’awun e gagiyeg rok Got u nap’an ni kad mada’naged boch e magawon nib mo’maw’.

17. Faanra ud rin’ed e maruwel rok Jehovah ni gubin ngiyal’, ma uw rogon nra ayuwegdad ni ngad tedan’dad ko bin th’abi ga’ e magawon ni bay?

¹⁷ Faan gad ra ulul i rin’ e maruwel rok Jehovah ni gubin ngiyal’, ma aram e rayog ni nge ayuwegdad ni ngad tedan’dad ko bin th’abi ga’ e magawon ni bay. Bod ni, bay reb e Pi Mich ni ka nog Renee ngak ni yib e stroke ngak, ma gubin ngiyal’ ni ma par u fithik’ e amith, miki yib e cancer ngak. Ere, nap’an ni immoy u boch e aspital ni yibe tafalaynag, ma aram mi i machibnag boch e girdi’ ni yad ma maruwel u rom, nge boch e m’ar, nge girdi’ ni yad be yib ni ngar guyed e m’ar. Immoy bayay nni tay nga reb e aspital u lan l’agruw nge baley e wik, ma aram me fanay 80 e awa ni nge machibnag e girdi’ u rom. Mus ko ngiyal’ ni be n’en ni nge yim’, ma de pagtalin feni ga’ fan ni nge gagiyel mat’awun Jehovah ni nge gagiyeg. Ma aram e n’en ni pi’ e gapas nga laniyan’.

18. Uw rogon ni ke m’ug ko n’en ni buch rok reb e walag nib pin nib ga’ angin nra yib ngodad ni faan gad ra tayfan mat’awun e gagiyeg rok Jehovah?

¹⁸ Ku gad baadag ni ngaud lemnaged mat’awun e gagiyeg rok Jehovah u nap’an ni gad be mada’naged boch e magawon nde ga’ u reb e rran ngu reb. Jennifer e dalip e rran ni par u reb e sikojio ni be sonnag e sikoki ni nge un riy nge yan ko gin ni ma par riy. Boor e sikoki nnin’ yaran. Ere, kari aw parawon Jennifer ni baadag ni nge toffan, ma kki kireban’ ni bochan e yigoo ir ni be milekag. Ere, ba mom ni nge mulan’. Machane, n’en ni rin’ e aram e meybil ngak Jehovah ni nge ayuweg ya nge yag ni weliy fare thin nib fel’ ngak yugu boch e girdi’ ni yad bay u rom ni ku yad be sonnag e sikoki rorad. Ere, mang angin ni yib riy? Boor e girdi’ ni yag ni nge machibnagrad maku boor e babyor ni yag ni nge pi’ ko girdi’. I yog ni gaar, “Yugu aram rogon e magawon ni kug mada’nag, machane kug guy ni ke tow’athnageg Jehovah ma ke pi’ gelngig ya nge yag ni nggu ngongol u reb e kanawo’ nra guy e girdi’ mi yad pining e sorok riy nga fithingan.” Arrogon, i par e re walag ney ni be tiyan’ ko n’en nib m’agan’ Jehovah ngay.

19. Mang reb e ban’en ni ma gagiyelnag e tin riyul’ e tapigpig rok Got?

¹⁹ Kemus ni yigoo girdi’ rok Jehovah e yad manang feni ga’ fan ni nge gagiyel mat’awun Jehovah ni nge gagiyeg. Ma ireray reb e ban’en ni ma tay e ba’ nriyul’ e teliw nib gagiyel u fithik’ e pi yurba’ i teliw ni googsur. Ere, gad e piin ni gad be un ko bin riyul’ e liyor e susun ni ngad athamgilgad ni ngaud ted fan mat’awun e gagiyeg rok Jehovah.

20. Uw rogon u wan’ Jehovah e athamgil ni ga be tay ni ngam tayfan mat’awun e gagiyeg rok?

²⁰ Dab mu pagtalin nib ga’ fan u wan’ Jehovah e athamgil ni ga be tay ni ngam tayfan mat’awun e gagiyeg rok, ni aram e ngam pigpig ngak u fithik’ e yul’yul’ mag athamgil u fithik’ e pi skeng ni ga be mada’nag. (Ps. 18:25) Bin migid e article e gad ra weliy riy boch i fan ni bay rogon ni ngad ted fan mat’awun e gagiyeg rok Jehovah nge ku boch e kanawo’ nrayog ni ngkud rin’ed e re n’ey riy.