Mu Tayfan Mat’awun e Gagiyeg rok Jehovah!

1, 2. Ra bagadad ma mang e thingari dugliy u wan’? (Mu guy e sasing ni bay u tabolngin e re article ney.)

KAD weliyed ko fa binem e article ni ke yan ni ke yog Moonyan’ nde fel’ rogon e gagiyeg ni be tay Jehovah ma ra fel’ rogon e par ko girdi’ ni faanra yad e yad be gagiyegnaged yad. Ere gur, ba puluw e n’en ni ke yog Satan? Mu susunnag nrayog ko girdi’ ni ngar gagiyegnaged yad mar pared ndariy n’umngin nap’an. Ere gur, ra fel’ rogon e par rorad ni faanra goo yad e ngar gagiyegnaged yad ndariy e ayuw rok Got riy? Ga ra felfelan’ ni ngam par ndariy n’umngin nap’an ni gur rom e ngam gagiyegnigem ndabi ayuwegem Got, fa?

² Dariy be’ nrayog ni nge pi’ e fulweg ko gal deer ney, ya ra bagadad ma ir rok e nge fal’eg i lemnag e fulweg riy. Ya ireray kanawoen nrayog ni nge tamilang ni birok Got e gagiyeg e aram e bin nib fel’ mab mat’aw, ma bay rogon ni ngad ted fan. Bay e thin nu Bible ni be micheg nriyul’ e re n’ey. Bod ni, am lemnag e n’en ni be yog e Bible u murung’agen feni mat’aw e gagiyeg rok Jehovah.

BAY MAT’AWUN JEHOVAH NI NGE GAGIYEG

3. Mang fan ni kemus ni yigoo Jehovah e ir e bay mat’awun ni nge Gagiyeg?

³ Jehovah e ir e bay mat’awun ni nge Gagiyegnag e palpalth’ib ni bochan e ir Got ni gubin ma rayog rok ma Ir e Ke Sunmiy urngin ban’en. (1 Kron. 29:11; Acts 4:24) Fare thin ni bay ko Revelation 4:11 e be dag yaan e piin ni yad ra un ngak Kristus ko gagiyeg u tharmiy ni yad 144,000 u gubin ni be lungurad: “Somol romad ma Got romad! Ba’ rogom ni nga nog e sorok ngom, min ta’ fam, ma ba’ rogom ni nge mil suwon urngin ban’en ngom. Yi gur e mu sunumiy urngin ban’en, yi gur e mu lemnag mi yad sum ni yad ba fos.” Arrogon, bochan ni Jehovah e ir e ke sunmiy urngin ban’en, ma aram fan ni bay mat’awun ni nge gagiyegnag e girdi’ ni kub muun e pi engel ngay.

4. Mang fan ni faanra togopuluw be’ nga mat’awun e gagiyeg rok Got, ma aram e der maruwel ko puf rogon ni kan pi’ ngak nib fel’ rogon?

⁴ Dariy ban’en ni ke sunmiy Satan. Ere, dariy mat’awun ni nge gagiyegnag e palpalth’ib. Nap’an nra togopuluwgad e gal nsom’on e girdi’ nga mat’awun e gagiyeg rok Jehovah, ma aram mar ngongolgad u reb e kanawo’ ni be m’ug riy ni yad ba tolangan’. (Jer. 10:23) Riyul’ nrayog ni ngar mel’eged ni ngar gagiyegnaged yad ndabi ayuwegrad Got ni bochan e puf rogon ni kan pi’ ngorad. Machane gur, bay mat’awrad ni ngar rin’ed e re n’ey? Dariy, ya puf rogon ni kan pi’ ko girdi’ e nge ayuwegrad ni ngar dugliyed boch ban’en nib fel’ ni ngar rin’ed u reb e rran ngu reb. Gathi kan pi’ e puf rogon ko girdi’ ni bochan e nge yib mat’awrad ni ngar togopuluwgad ngak e En Tasunmiy ma Ir e Ke Pi’ e Yafos ngorad. Ere, ba tamilang ni faanra togopuluw be’ ngak Jehovah, ma aram e der maruwel ko puf rogon ni kan pi’ ngak nib fel’ rogon. Gadad e girdi’ e ba t’uf ni ngad pared u tan e gagiyeg rok Jehovah nib mat’aw.

5. Mang fan nrayog ni nge pagan’dad nib mat’aw rogon ni ma dugliy Got ban’en?

⁵ Ku reb i fan ni Jehovah e ir e bay mat’awun ni nge Gagiyeg e bochan nib mat’aw rogon ni ma maruwel nga mat’awun. Ke yog ni gaar: “Gag Somol e gub gol, ma gu ma rin’ e tin nib yal’uw nge tin nib mat’aw u fayleng. Ereray e pi n’en ni gub adag.” (Jer. 9:24) Der ma fanay Jehovah e motochiyel ni ke ngongliy e girdi’ ndawor ra flontgad ni nge ayuweg u rogon ni nge dugliy e n’en nib mat’aw mab yal’uw ni nge rin’. Ya bin riyul’ riy e, ir e ma dugliy rogon e tin nib mat’aw ban’en ma aram e n’en ni ma fanay ni nge ngongliy e motochiyel ni fan ko girdi’. “Tin nib mat’aw nge tin nib yal’uw e ke mang def ko gagiyeg [rok],” ere rayog ni nge pagan’dad ni gubin e motochiyel, nge kenggin e motochiyel, nge pi n’en ni ma dugliy e ba mat’aw. (Ps. 89:14; 119:128) Ere, yugu aram rogon ni ke yog Satan nib kireb rogon e gagiyeg ni be tay Jehovah, machane dabiyog rok ni nge gagiyegnag e re fayleng ney nge par nib mat’aw gubin ban’en riy.

6. Mang reb i fan ni Jehovah e ir e en ni bay mat’awun ni nge gagiyegnag e re fayleng ney?

⁶ Ku reb i fan ni Jehovah e ir e bay mat’awun ni nge Gagiyeg e bochan ni bay e tamilangan’ nge gonop rok u rogon ni nge ayuweg e pi n’en ni bay u palpalth’ib. Am lemnag rogon ni pi’ gelngin Fak ni nge golnag boch e m’ar ni immoy rok boch e girdi’ kakrom ndabiyog ni nge pirieg e pi togta e falay riy. (Matt. 4:23, 24; Mark 5:25-29) Yugu aram rogon ni gad ra lemnag e pi n’em ma bogi maang’ang, machane pi n’em e gathi bogi maang’ang u wan’ Jehovah. Ya manang rogon ni ma maruwel fithik’ i dow e girdi’, ma rayog rok ni nge sulweg e yungin ni ke kireb riy nga rogon. Ku arrogon e piin ni kar m’ad ni bay gelngin nrayog ni nge fasegrad bayay, maku rayog rok ni nge taleg boch ban’en ni ma buch ni yima gafgow riy ni bod rogon e durru’, nge yoko’, nge ku boch ban’en.

7. Uw rogon nib gel e thil ko gonop rok Jehovah ko gonop rok e girdi’ ko re fayleng ney ni be gagiyegnag Satan?

⁷ Re fayleng ney ni Satan e ir e be gagiyegnag e ka be gay e girdi’ riy rogon ni ngar pithiged boch e magawon ni be sum u thilin e girdi’ u boch e nam nge boch e magawon ni be sum u thilin boch e nam nge boch. Machane, gad manang ni kemus ni yigoo Jehovah e ir e th’abi ga’ e gonop rok nrayog ni nge fek e gapas i yib nga fayleng. (Isa. 2:3, 4; 54:13) Ere, nap’an ni gad ra fil murung’agen e tamilangan’ nge gonop rok Jehovah, ma aram e gad ra lem ni bod rogon apostal Paul ni faan nni thagthagnag e pi thin ni baaray nga laniyan’ ni nge yoloy ni gaar: “Ri ba ga’ e flaab rok Got! Ma rib toar e gonop rok nge llowan’ rok! Mini’ e rayog ni nge weliy rogon ni ma turguy Got ban’en? Mini’ e manang rogon kanawoen ni ma maruwel?”​—Rom. 11:33.

BIROK JEHOVAH E GAGIYEG E ARAM E BIN TH’ABI FEL’

8. Uw rogon u wan’um e gagiyeg rok Jehovah?

⁸ Gathi kemus ni be tamilangnag e Bible ni Jehovah e ir e bay mat’awun ni nge gagiyeg, ya ku be weliy fan ni birok e gagiyeg e aram e bin th’abi fel’ ni bay. Reb i fan e bochan ni ma gagiyeg u fithik’ e t’ufeg. Ere, dariy e maruwar riy ni gad ra felfelan’ u nap’an ni gad ra lemnag rogon ni ma dugliy ni nge maruwel nga mat’awun e gagiyeg rok. Be yog e Bible “nri ma runguy e girdi’ ma ma kireban’ ngorad, ni gathi mmachreg ni ma yib e puwan’ ngak, ma ma t’ufeg e girdi’ ma ma yul’yul’ ngorad.” (Ex. 34:6) Got e ma tayfan e girdi’ ni yad ma pigpig ngak. Kab pag feni manigil rogon ni ma ayuwegdad nga rogon nrayog rodad ni ngad ayuweged gadad. Maku reb e, der ma tel boch ban’en nib fel’ ndabi pi’ ko pi tapigpig rok ni yad ba yul’yul’ ni bod rogon e n’en ni yog Moonyan’. Ya bin riyul’ riy e, mus ngak Fak nrib t’uf rok ni ke pi’ ya ngki yag bayay e athap ko yafos ndariy n’umngin nap’an ngodad!​—Mu beeg e Psalm 84:11; Roma 8:32.

9. Uw rogon ni kad nanged ni ma lemnag Got e girdi’ ni be’ nge be’?

⁹ Gathi kemus ni ma lemnag Jehovah rarogon e girdi’ rok ni yad gubin, ya ku ma lemnag rarogorad ni be’ nge be’. Am lemnag e n’en ni buch kakrom. Dalip e chibog ni i fanay Jehovah boch e girdi’ ni ngar manged tapufthin ni ngar ayuweged piyu Israel u pa’ e pi toogor rorad. Nap’an e re ngiyal’ i n’em, ma ki i lemnag Jehovah e girdi’ rok ni be’ nge be’. Bagayad e pi girdi’ nem e aram Ruth ni gathi ir be’ nu Israel ni pag fan boch ban’en ya nge yag ni un ko bin riyul’ e liyor. I tow’athnag Jehovah Ruth ni aram e pi’ reb e pumoon ni nge leay miki fakay reb e bitir nib pagel. Machane, gathi kemus e tow’ath ni pi’ Jehovah ngak Ruth, ya nap’an ni yira faseg ko yam’ ma ra yan i nang nre pagel ni fak nem e ir reb i girdien fare tabinaw ni yib fare Messiah riy. Kum lemnag gelngin e felfelan’ nra tay u nap’an nra nang ni kan tay murung’agen nga lan ba ken e babyor ko Bible ni bay fithingan riy!​—Ruth 4:13; Matt. 1:5, 16.

10. Mang fan nrayog ni nga dogned nder ma gafgownag Jehovah e piin ni yad bay u tan e gagiyeg rok?

¹⁰ Ku der ma gafgownag Jehovah e piin ni yad bay u tan e gagiyeg rok. Ya bin riyul’ riy e, gagiyeg rok Jehovah e ma pi’ e puf rogon ko girdi’ ma ma k’aring e felfelan’ ngorad. Baaray rogon ni weliy David murung’agen Jehovah. I yog ni gaar: “Malup’lup’ rok [Got] nge feni rir e ke liyeg, gel nge felfelan’ e ba suguy e Tempel rok.” (1 Kron. 16:7, 27, BT) Ki yoloy reb e psalmist ni ka nog Ethan ngak ni gaar: “Ba felfelan’ e piin ni yad ma ta’ fam ko tang ni yad ma yin’, ni yad be par u fithik’ ramaen fanam gol. Polo’ e rran ni yad ba felfelan’ ni bocham ma yad be pining e sorok ngom ni bochan e tin nib fel’ ni ga be rin’ ngorad.”​—Ps. 89:15, 16.

11. Uw rogon nrayog ni ngari pagan’dad ni birok Jehovah e gagiyeg e aram e bin th’abi fel’?

¹¹ Faanra ud fal’eged i lemnag feni fel’ Jehovah, ma aram e rayog ni ngari pagan’dad ni gagiyeg rok e aram e bin th’abi fel’ e gagiyeg ni bay. Re n’ey e ku ra ayuwegdad ni ngad lemgad ni bod fare psalmist ni faani gaar: “Taareb e rran ni yira par u tempel rom ma kab fel’ nga bbiyu’ e rran nni par u yugu bang.” (Ps. 84:10) Jehovah e Ir e Ke Sunmiydad, ere manang e tin nib t’uf rodad nra yibnag e felfelan’ ngodad, ma gubin ngiyal’ ni ma pi’ nge yan i pag e fol riy. Pi n’en ni ma yog ni ngad rin’ed e gadad e fan ngodad. Yugu aram rogon ni bay yu ngiyal’ nib t’uf ni ngad paged fadad ni fan e ngad folgad ko pi n’en ni ke yog ngodad, machane faan gad ra fol rok ma gubin ngiyal’ nra yib e felfelan’ riy ngodad.​—Mu beeg e Isaiah 48:17.

12. Mang e bin th’abi ga’ i fan ni gad ma tayfan mat’awun e gagiyeg rok Jehovah?

¹² Be yog e Bible nu tomuren e Gagiyeg Nra Tay Kristus u Lan fare Biyu’ i Duw, ma bay boch e girdi’ ni yad ra dugliy ni ngar togopuluwgad nga mat’awun e gagiyeg rok Jehovah. (Rev. 20:7, 8) Mang e ra k’aringrad ni ngar rin’ed e re n’ey? Ra taw ko ngiyal’ nem ma aram e yira pag Moonyan’ nib ngoch nap’an, ma aram e ra guy rogon ni ngki bannag e girdi’ bayay. Dariy e maruwar riy nra k’aringrad ni ngar lemnaged ni ngar rin’ed boch ban’en ni yad e nge fel’ ngorad ni bod e n’en ni ma rin’ ni kab kafram i yib. Sana ra guy rogon ni nge k’aring e girdi’ ni ngar lemnaged ni bay reb e kanawo’ nrayog ni ngar pared riy ndariy n’umngin nap’an ndab ra folgad rok Jehovah. Machane, gad manang nde riyul’ e re n’ey. Ere, ba t’uf ni ngad fithed gadad ni nge lungudad: ‘Gur, ra mich e re ban ney u wan’ug, fa?’ Faanra ba t’uf Jehovah rodad ma gad ma pigpig ngak ni bochan e ir reb e Got nib manigil ma ir e bay mat’awun ni nge Gagiyegnag e palpalth’ib, ma aram e ba mudugil ndab da adaged ni nge mich e re ban ney u wan’dad. Maku reb e, dab da adaged ni ngad pared u tan e gagiyeg rok yugu be’, ya kemus ni yigoo Jehovah e ir e gad ra adag ni ngad pared u tan e gagiyeg rok ni bochan e gad ba t’uf rok.

NGAD TED FAN MAT’AWUN E GAGIYEG ROK GOT U FITHIK’ E YUL’YUL’

13. Uw rogon nra m’ug ni gad be tayfan e gagiyeg rok Got ni faanra ud folwokgad rok?

¹³ Dariy e maruwar riy ni bay rogon ni ngad ted fan mat’awun e gagiyeg rok Jehovah. Kad weliyed faram ni ir e bay mat’awun ni nge gagiyeg ma birok e gagiyeg e aram e bin th’abi fel’ e gagiyeg ni bay. Ere, rayog ni nge m’ug ni gad be tayfan mat’awun e gagiyeg rok Jehovah ni aram e ngad pigpiggad ngak u fithik’ e yul’yul’. Ku mang reb e kanawo’ nrayog ni ngad ted fan e gagiyeg rok Got riy? Ba t’uf ni ngaud folwokgad u rogon ni ma rin’ Jehovah boch ban’en. Ya faan gad ra rin’ ni aray rogon, ma aram e gad be dag ni gad baadag e birok e gagiyeg ma gad be tayfan.​—Mu beeg e Efesus 5:1, 2.

14. Uw rogon nrayog ni nge folwok e piin piilal nge piin lolugen e tabinaw rok Jehovah?

¹⁴ Kad filed u Bible ni gubin ngiyal’ ni ma maruwel Jehovah nga mat’awun u fithik’ e t’ufeg. Ere, piin lolugen e tabinaw nge piin piilal u lan e ulung ni yad baadag e birok Got e gagiyeg e susun ni ngar folwokgad rok ma dab ur gelnaged e thin ngak e piin ni yad bay u tan pa’rad ara ur gagiyegnaged gubin e mithmith rorad. Paul e ir be’ ni i folwok rok Got nge Fak. (1 Kor. 11:1) Da i k’aring e tamra’ ngak yugu boch e girdi’ ara i towasariyrad ni ngar rin’ed boch ban’en. Ya bin riyul’ riy e, i guy rogon ni nge pi’ e athamgil nga lanin’rad ni ngar rin’ed e tin nib mat’aw. (Rom. 12:1; Efe. 4:1; Filem. 8-10) Ma aram rogon ni ma rin’ Jehovah ban’en. Ere, piin ni yad baadag e birok Got e gagiyeg ma yad ma tayfan e ku aram rogon nsusun e ngaur ngongolgad.

15. Faanra ud ted fan e piin ni ke tayrad Jehovah ni nga u rogned e thin rodad, ma uw rogon nra m’ug riy ni gad baadag e birok e gagiyeg?

¹⁵ Uw rogon u wan’dad e piin ni ke tayrad Got ni nga u rogned e thin rodad? Faanra ud folgad rorad u fithik’ e tayfan, ma aram e gad be dag ni gad be tayfan mat’awun e gagiyeg rok Jehovah. Mus ni faanra darud nanged fan ara der m’agan’dad ko n’en ni kar dugliyed, ma ka gad ra fol ko n’en ni kar dugliyed nib m’agan’ Jehovah ngay. Re n’ey e ba thil nga rogon ni ma rin’ e girdi’ nu fayleng boch ban’en, machane aram rogon ni yima rin’ ban’en u tan e birok Jehovah e gagiyeg. (Efe. 5:22, 23; 6:1-3; Heb. 13:17) Faan gad ra rin’ ni aray rogon, ma aram e ra yib angin ngodad ni bochan e baadag Got boch ban’en nib fel’ ni fan ngodad.

16. Uw rogon ni ma dugliy e piin ni yad ma tayfan e gagiyeg rok Got boch ban’en?

¹⁶ Ku rayog ni nge m’ug ni gad be tayfan mat’awun e gagiyeg rok Got u rogon e pi n’en ni gad ma dugliy ni ngad rin’ed. Gathi gubin ban’en ni gad ma rin’ ni bay e motochiyel riy ni ke ngongliy Jehovah. Ya n’en ni ma rin’ e ma tamilangnag ngodad rogon e lem rok. Bod ni, dawori tay nga lan e Bible rarogon e re miti mad ni baadag ni nga i chuw e piin Kristiano ngay. Ya bin riyul’ riy e, ke tamilangnag ngodad nib m’agan’ ngay ni ngad munmadgad ma gad ngongliy yaadad u reb e kanawo’ nib yalen mab m’ag ko pi tamachib ni Kristiano. (1 Tim. 2:9, 10) Ku baadag ni ngad guyed rogon ndab da magawonnaged laniyan’ yugu boch e girdi’ ni bochan e pi n’en ni gad ma dugliy. (1 Kor. 10:31-33) Faanra ud dugliyed boch ban’en nrogon nib m’agan’ Jehovah ngay ma gathi rogon ni gad baadag, ma aram e gad be dag ni gad baadag e birok e gagiyeg ma gad be tayfan.

17, 18. Mang boch e kanawo’ nrayog ni nge dag e piin mabgol riy ni yad be tayfan mat’awun e gagiyeg rok Jehovah?

¹⁷ Kum lemnag reb e kanawo’ nrayog ni nge tay e piin mabgol ni Kristiano fan mat’awun e gagiyeg rok Jehovah riy. Uw rogon ni faanra be mada’nag ba wu’ e mabgol boch e magawon u lan e mabgol rorow nda ur lemnagew nra buch? Ma uw rogon ni faanra ba ga’ e pi magawon nem ni yow be mada’nag? Faanra ireray e n’en ni be buch ko mabgol rom, ma mang ndab mu fal’eg i lemnag rogon e ngongol rok Jehovah ngak piyu Israel? I taareb rogonnag ir ngak be’ ni figirngiy u nap’an ni be non ko girdi’ ko re nam nem. (Isa. 54:5; 62:4) Boor yay ni kirebnag girdien e re nam nem laniyan’ Jehovah. Rogon e tha’ u thilrad Jehovah e bod rogon e tha’ u thilin ba wu’ e mabgol ni boor e magawon ni yow be mada’nag u lan e mabgol rorow. Yugu aram rogon, ma de n’agrad Jehovah ni ka chingiyal’ nem. Boor yay ni i runguyrad ma be dag nib yul’yul’ ko m’ag ni ke ngongliy u thilrad. (Mu beeg e Psalm 106:43-45.) Ere, faan gad ra lemnag rogon e t’ufeg ni ma dag Jehovah u fithik’ e yul’yul’, ma gathi ra k’aringdad ni ngad adaged ni ngad chugurgad ngak?

¹⁸ Ere, ba wu’ e mabgol nib t’uf Jehovah rorow e yow ma guy rogon ni ngar folwokgow rok. Mus ni faanra yow be mada’nag e magawon u lan e mabgol rorow, ma dabi guy bagayow rogon ni nge chuw nde puluw fan ko Bible. Yow manang ni Jehovah e ir e ke chagiyrow ma baadag ni ngar “pirew” u taabang. Kemus nrogon nrayog ni nge chuw be’ ko en mabgol rok ngki mabgol bayay nrogon nib puluw ko Bible e faanra ke un e en mabgol rok ko ngongol ndarngal. (Matt. 19:5, 6, 9) Faanra athamgil e piin mabgol ni Kristiano ni ngar fal’eged e mabgol rorad nge manigil, ma aram e yad be tayfan mat’awun e gagiyeg rok Jehovah.

19. Faanra kad olobochgad, ma mang e susun ni ngad rin’ed?

¹⁹ Gad gubin ndawor da flontgad, ere bay yu ngiyal’ ni gad ma rin’ boch ban’en ni ma kirebnag laniyan’ Jehovah. Yugu aram rogon, ma manang e re n’ey. Ere, aram fan ni ke pi’ fare biyul ni fan ngodad u daken Kristus. Ere, nap’an ni gad ra oloboch ma susun e ngad weniggad ngak Jehovah ni nge n’ag fan rodad. (1 John 2:1, 2) Maku reb e, dab ud pared ni be kireban’dad ni bochan e oloboch ni kad rin’ed, ya susun e ngad guyed rogon ni ngad filed ban’en riy. Faanra ud pared ni gad ba chugur ngak Jehovah, ma aram e ra n’ag fan e kireb rodad me ayuwegdad ni nge dab ku ud lemnaged me yag ni ngad ululgad ko pigpig ni gad be tay ngak.​—Ps. 103:3.

20. Mang fan ni ireray e ngiyal’ ni ngad ted fan mat’awun e gagiyeg rok Jehovah?

²⁰ Nap’an ni gad ra yan nga lan e bin nib beech e fayleng, ma gubin e girdi’ ni yad ra par u tan e gagiyeg rok Jehovah mar filed murung’agen e pi n’en ni ma rin’ nib mat’aw. (Isa. 11:9) Machane boor ko pi n’ey e gad be fil murung’agen e chiney. Ma gad manang ndab ki n’uw nap’an ma bayi gagiyel e fulweg ko fare deer ni ke sum u murung’agen e en ni bay mat’awun ni nge gagiyeg. Ere, ireray e ngiyal’ ni ngad ted fan mat’awun e gagiyeg rok Got ni aram e ngaud folgad rok, ma gad be pigpig ngak u fithik’ e yul’yul’, ma gad athamgil u rogon nrayog rodad ni ngaud folwokgad rok ko pi n’en ni gad ma rin’.