Ke Magar Machane Dabi Tal

“Jehovah, ni ir e ke Sunmiy e fayleng ni ga’ngin, . . . e ma pi’ gelngin ngak e en ke magar; nge en dakuriy gelngin e ri ma pi’ gelngin nge mus rogon.”​—ISAIAH 40:28, 29, NW.

1, 2. (a) Mang pong ni yibaadag ni kan pi’ ngak urngin e girdi’ ni baadag ni ngar folgad ko liyor nib machalbog? (b) Mang e rayog ni ngari magawonnag e tirok Got ban’en u puluwdad?

GADAD pi gachalpen Jesus, e ri gad manang e pong rok ni be pi’ e athamgil nga lanin’uy ni be gaar: “Mired ngog, ni gimed gubin e piin ni ke aw parowmed i fek e n’en nib tomal ni gimed be fek, mu gu pi’ e toffan ngomed. . . . Ya re mat’ ni gu ra pi’ ngomed e mmom, ma tomalngin e re n’en ni gu ra tay nga pomed e bbaud.” (Matthew 11:28-30) Maku kan ognag ngak e Kristiano “ngal’an e toffan . . . u p’eowchen Jehovah.” (Acts 3:19, NW) Ba mudugil ni kam pirieged ni ke fal’eg lanin’med e tin riyul’ ni kam filed u Bible, ya bay e athap riy nib tamilang ni fan ko gabul nge langlath, nge rogon ni gimed be fol ko kenggin e motochiyel rok Jehovah.

² Yugu aram rogon, ma boch ko pi tapigpig rok Jehovah e ke war lanin’rad. Yu ngiyal’ e ra par e re magawon ney nib ngoch nap’an. Ma yu ngiyal’ e ra par nib n’uw nap’an. Ra i yan e tayim, ma boch e girdi’ e yad ra lemnag ni maruwel rorad ni yad e Kristiano e ke mang ban’en ni be tomalnag lanin’rad ma gathi ban’en ni ma baudnag lanin’uy nrogon ni i micheg Jesus. Lem ni de fel’ ni aram rogon e ra magawonnag e tha’ u thilin reb e Kristiano nge Jehovah.

3. Mang fan ni ke pi’ Jesus fare fonow ni bay ko John 14:1?

³ De n’uw nap’an u m’on ni kan kol Jesus min li’ ngem’, i yog ngak pi gachalpen ni gaar: “Dabi magafan’med ma dabi wagagey lanin’med. Mpagedan’med ngak Got, mi ki gimed pagan’med ngog.” (John 14:1) I yog Jesus e pi thin nem ya fapi apostal e ke chuchugur ni nge buch ban’en rorad ni ra kireban’rad. Tin migid ngay e ra yib e togopuluw ngorad. Manang Jesus ni rayog ni nge war e pi apostal rok ya ra mulan’rad nib gel. (John 16:1) Faanra dabni gagiyegnag, ma kireban’ e rayog ni nge kirebnagrad ko tirok Got ma ra war e pagan’ rorad ngak Jehovah. Maku aram rogon e tin riyul’ e Kristiano e ngiyal’ ney. Ra nge war lanin’uy nib n’uw nap’an ma rayog ni ra k’aring e kireban’ nrib gel, me tomalnag gum’irchadad. (Jeremiah 8:18) Rayog ni nge war laniyan’dad ma gad war. U tan e re mochuch ney, e rayog ni warnagdad nge gelngin e lem rodad ko tirok Got, maku dabkuuda adaged e liyor ku Jehovah.

4. Mang e ra ayuwegdad ma ra dabi magar gum’irchadad ni be yip’ fan ban’en?

⁴ Rib puluw e fonow u lan e Bible ni be gaar: “N’en ni rib t’uf ni ngan matanagiy, e nguum matanagiy gum’irchaem, ya bochan e ir tabolngin e yafas.” (Proverbs 4:23, NW) Bible e be fonownagdad nra ayuwegdad ni ngada yororiyed gum’irchadad ni be yip’ fan ban’en ni nge dabi war ko tirok Got. Machane, som’mon, mab t’uf ni ngad nanged e n’en ni be k’aring ni nge warnag lanin’dad.

Ngongolen e Kristiano e Gathi Ban’en nib Pag Rogon

5. Mang e n’en ni yibe lemnag nib togopuluw nga murung’agen be’ ni nge mang gachalpen Kristus?

⁵ Riyul’, ni rogon ni nge mang be’ e Kristiano e rib t’uf ni ngari athamgil. (Luke 13:24) I yog Jesus ni gaar: “En ni dabi yin’ nga pon fare ley i gek’iy rok ni yima gafgow riy nge lekeg e dabiyog ni nge mang gachalpeg.” (Luke 14:27, NW) Sana yibe lemnag nib togopuluw e pi thin ney ko thin ni yog Jesus u murung’agen gilban nib baud ma rayog ni nge toffan e girdi’ riy, machane tin riyul’ riy e dariy ban’en riy nib togopuluw.

6, 7. Mang fan ni rayog ni nga nog ni liyor rodad e gathi ban’en ni ma warnag lanin’uy?

⁶ Yugu aram rogon ni athamgil nge maruwel nib gel e rayog ni nge magar e girdi’ riy, maku rayog ni nge gamaneg lanin’uy me gelnag lanin’uy ni faanra ffel’ e n’en ni yibe nameg riy. (Eklesiastes 3:13, 22) Ma gur ka bay ban’en ni kab fel’ ko fare n’en ni ngan wereg e thin riyul’ u Bible ngak e piin ni buguli yoror rodad? Maku, maruwel ni gad ma ta’ ni fan ni ngada folgad ko motochiyel rok Got e rib achichig ra ngan taareb rogonnag ko taw’ath ni nge yog ngodad riy. (Proverbs 2:10-20) Mus u nap’an ni keb e skeng nge togopuluw ngodad, ma gad be ta’ nib n’en nib fel’ ni kan gafgownagdad ni bochan Gil’ilungun Got.​—1 Peter 4:14.

⁷ Gilban Jesus e riyul’ ni ma baudegey, ni baga’ ni ra ngan taareb rogonnag ko piin yad be par u fithik’ e lumor ko tirok Got u tan e mat’ ko teliw ni googsur. Got e ma t’ufegdad u fithik’ e gol ma der ma ning ban’en ngodad ni dabiyog rodad. Motochiyel rok Jehovah e “gathi rib mo’maw’.” (1 John 5:3) Ngongolen e Kristiano, nrogon ni yog e Thin nu Bible, e gathi ban’en ni ma tomalnag lanin’uy. Ba tamilang, ni rogon e liyor rodad e der ma warnag lanin’uy nge mulan’uy.

“Ngan Chuweg Urngin Ban’en ni Be Tomalnagey”

8. Mang e ma k’aring e magar ko tirok Got ban’en?

⁸ Urngin ban’en ni be magarnagdad ko tirok Got e baga’ ni bochan e tomal ni be pi’ e re m’ag ney nib kireb ngodad. Bochan ni “fayleng ni polo’ e bay u gelngin faanem nib kireb,” ma ke liyegdad gelngin e kireb ni rayog ni nge warnagdad ma nge kirebnag rarogodad ni gadad e Kristiano. (1 John 5:19) Gad ra nameg e tin nu fayleng ndariyfan ma ra mo’maw’nag me magawonnagdad ma dabkiyog ni ngada rin’ed e tin gad ma rin’ ni gadad e Kristiano. Pi n’en ney ni ke tomalnagdad e ra magawonnagdad ma ra kireban’nagdad. Rib puluw ni be fonownagdad e Bible ni ngad “paged urngin ban’en ni be magawon ngodad.”​—Hebrews 12:1-3.

9. Uw rogon ma gad ra nameg ni nge yoor e chugum rodad e ra tomalnagdad?

⁹ Ni bod e fayleng ni ri yad be lemnag ni nge gilbugurad, nge salpiy, nge tin yima felfelan’ ngay, nge milekag ni fan ko fafel, nge boch ban’en e ra magawonnag lanin’dad. (1 John 2:15-17) Boch e Kristiano ko bin som’mon e chibog ni kar nameged ni nge yoor e salpiy rorad e ke magawon e yafas rorad. Paul ni apostal e ke weliy ni gaar: “Machane piin ni yad baadag ni nge yoor e salpiy rorad e yad ma pagrad ngak e pi n’en ni ma pingeg e girdi’ nge denen, mi yad aw ko wup ko ar’ar ni aram e yibe ar’arnag e tin ndariy fan nge tin nra kirebnigey, ni ir e ma girngiy e girdi’ ko tagan mi yad malog. Ya chogowen e salpiy e ir lik’ngin urngin mit e kireb. Boch e girdi’ e ri yad baadag ni nge yog ngorad ni aram tapgin ma kar mal’afgad u rogon ni nge mich Kristus u wan’rad, ma ke m’ingan’rad ke yib e kireban’ ni pire’ ngorad.”​—1 Timothy 6:9, 10.

10. Mang e gad ra fil u murung’agen e chugum ko fanathin rok Jesus ko en ma yung e awoch?

¹⁰ Faanra ke aw parowdad me mulan’dad ko pigpig ku Got, gur gathi bochan e ar’ar rodad ko chugum e ir e be magawonnag e tirok Got ban’en u puluwdad? Riyul’ nrayog ni nge buch ban’en ni aram rogon, ni bod rogon e n’en ni yog Jesus ko fanathin rok ko en tamilay’. I taareb rogonnag Jesus e “pi n’en ni ma magafan’ e girdi’ ngay ko biney e tamilang, nge chogowen e fel’ rogon, nge urngin mit ban’en ni yad be chogownag ni nge yog ngorad” ko rachngal ni “nge thang” e awoch ko thin rok Got u lan gum’irchadad. (Mark 4:18, 19) Arfan ni, fare Bible e be fonownagdad ni gaar: “Dabi m’on e salpiy u lanin’med, ma ngam pired ni nge fel’ u wun’med e tin ni ba’ romed ban’en. Ya ke yog Got ni ke gaar, ‘Ri dab gu pagem; ma ri dab gu n’igem.’”​—Hebrews 13:5.

11. Uw rogon ni ngada chuweged e pi n’en ni be tomalnagdad?

¹¹ Yu ngiyal’ ma n’en ni ra magawonnag e yafas rodad, e gathi bochan ni gad be ar’arnag ni nge yoor e chugum rodad, ya n’en ni gad be rin’ ko pi n’en ni ba’ rodad. Boch e sana ke magawon e tafinay rorad nbochan e m’ar rorad nib gel, ara ke yim’ e girdi’ nib t’uf rorad. Kar guyed nib t’uf ni ngar thiliyeged boch ban’en yu ngiyal’. Ba wu’ i mabgol e kar dugliyew ni ngar pagew boch ban’en ni yow baadag ni ngara rin’ew nge boch ban’en ni kar dugliyew kafram ni ngara rin’ew nde ga’ fan. Ma ra yaliyew e chugum rorow ni fan ko n’en ni de ga’ fan ni kar dugliyew ko som’mon ni ngar rin’ew ngar tew nga bang. Ra fel’ rogodad ni gadad gubin nra ngada fal’eged i lemnag e pi n’en ni gad ma rin’ nge chugum rodad, ma ngad chuweged urngin ban’en ni de ga’ fan ni be tomalnagdad ma aram e dabi aw parowdad ma dabda wargad nge mulan’dad.

Filmunguyan’uy nge Ngan Nang e Tin Rayog e Baga’fan

12. Mang e susun ni ngada nanged u murung’agen e kireb rodad?

¹² Tin ni kad rin’ed nib kireb, ni mus ko tin ba achichig ban’en, e rayog ni nge magawonnag e yafas rodad. Rib riyul’ e thin ni yog David ni gaar: “Tin nib kireb ni kug rin’ e ke yoor i yoor; ni bod ba gilab nib tomal ni kaygi tomal ni nggu fek.” (Psalm 38:4, NW) Baga’ ni, ra ngan thiliyeg nge puluw boch ban’en ma ra ayuwegdad nge baud e tin ba tomal ni gad be fek.

13. Uw rogon ma filmunguyan’uy e ra ayuwegdad ni nge par nib fel’ rogon e changar rodad ko maruwel rodad ni ngan wereg e machib?

¹³ Fare Bible e be pi’ e athamgil nga lanin’dad ni ngad maruweliyed nge yog ngodad e “gonop nge gelngin i fal’eg i lemnag ban’en.” (Proverbs 3:21, 22, NW) “Gonop ni yib u tharmiy . . . e sumnguynigey,” ireray e n’en ni be yog e Bible. (James 3:17) Boch e girdi’ e yad be lemnag nib t’uf ni ngada rin’ed e tin ma rin’ boch e girdi’ ko maruwel ko Kristiano ni ngan wereg e machib. Machane, fare Bible e be fonownagdad ni be gaar: “Ra be’ ma nge mang ir e changar ngak nge fal’eg i yaliy e ngongol rok ara pangin. Ma faanra ba fel’ e ngongol rok, me ere rayog ni nge felfelan’ ko ngongol ni ke rin’, me siy i puluwnag e ngongol rok ko ngongol ni ke rin’ yugu be’. Ya ra be’ ma ba’ gilban ni be fek.” (Galatia 6:4, 5) Riyul’, ngongol nib fel’ ni be dag pi walagdad ni Kristiano e ra pi’ e athamgil nga lanin’dad ni ngada pigpiggad ku Jehovah u polo’ i gum’irchadad, machane gonop nge filmunguyan’uy e ra ayuwegdad ni ngada nameged ban’en ni rayog rodad ni be yan u rogon e par rodad.

14, 15. Uw rogon ni ngada daged e gonop u rogon ni gad be ayuweg e tin nib t’uf rodad ni fan ko dowef rodad nge lem rodad?

¹⁴ Gad ra filmunguyan’dad ni kura pi n’en ni be m’ug ni gowa gathi rib ga’ fan ma ra ayuwegdad ni dabi aw parowdad. Ni bod ni, gad ma rin’ ban’en nib thabthabel ni ra ayuweg nge fel’ fithik’ i dowdad? Mu lemnag e n’en ni rin’ ba wu’ i mabgol ni yow be maruwel u reb e tochuch ko Pi Mich Rok Jehovah. Kar guyew feni ga’ fan e gonop ni nge dabi aw parorow. Faen leengiy e ke yog ni gaar: “Demtrug feni yoor e maruwel romow, ma gamow ma guy rogon ni nggu molow ni taareb ngal’an ni gubin e nep’. Maku gamow ma un ko exercise ni gubin ngiyal’. Kari ayuwegmow e re n’en ney. Kug nangew e tin dabiyog romow, ma gamow ma rin’ ban’en nib puluw. Gamow be guy rogon ni dabgu taareb rogonnagew gamow ko piin ni gowa der m’ay gelngirad.” Gad ma kay e ggan nib fel’ ma ma gaman e toffan rodad fa? Gad ra ayuweg dowdad ko urngin ban’en ma ra ayuweg ni ri dabi magar e lem rodad ko tirok Got ban’en.

¹⁵ Boch i gadad e bay ban’en nib t’uf rok nib thil. Ni bod ni, reb e walag ni ppin ni Kristiano e ke un ko maruwel ni ngan wereg e machib ni polo’ e tayim rok ko pi binaw nib mo’maw’. Ke yib e m’ar ngak, mab muun ngay e cancer. Mang e ke ayuweg ni nge dabi war nbochan e re par rok nem ni be mochuchnag? Be yog ni gaar: “Baga’ fan ngog ni bay e tayim rog ni gu ma par ni goo gag ko gin dariy lingan ban’en riy. Faanra kug thamiy ni ke gel i yan e mochuch nge magaf ni keb ngog, ma rib t’uf rog e tayim ni gu ma par ni goo gag ko gin nib gapas ma rayog ni nggu bieg e babyor ma gu be toffan.” Gonop nge gelngin i lemnag ban’en e ra ayuwegdad ni ngada nanged me gaman e tin nib t’uf rok be’ nge be’ ma aram dabda magargad ko tirok Got.

Jehovah Got e Be Gelnagdad

16, 17. (a) Mang fan ni rib ga’ fan ni ngan ayuweg rarogodad ko tirok Got ban’en? (b) Mang e thingarda uneged ko urngin ban’en ni gad ma rin’ u gubin e rran?

¹⁶ Riyul’ ni rib ga’ fan ni ngada ayuweged gadad ko tirok Got. Faanra ke fel’ thildad Jehovah Got, maku rayog ni ngad magargad, machane dabda magargad ko liyor ngak. Jehovah e ir e ke “pi’ gelngin e piin ni kar magargad; nge piin ni dakuriy gelngirad ma ma pi’ gelngirad nib gel.” (Isaiah 40:28, 29) Paul ni apostal, ni ir be’ ni ke guy ni riyul’ e pi thin ney, e ke yoloy ni gaar: “Ereray fan nri der mulan’dad. Yugu ra be meewar dowdad i yan, ma lanin’dad e yibe biechnag u reb e rran ngu reb.”​—2 Korinth 4:16.

¹⁷ Mu lemnag fare bugithin ni “u reb e rran ngu reb.” Re n’ey e be yip’ fan ni ngada fanayed e tin ma pi’ Jehovah ngodad u gubin e rran. Reb e missionary ni ke un ko re maruwel ney u fithik’ e yul’yul’ u lan 43 e duw e immoy ba ngiyal’ ni ke meewar me mulan’. Machane de tal. Ke yog ni gaar: “Gu ma od ni kakadbul nbochan e u m’on ni nggu tabab ko maruwel rog ndemtrug, ma rayog ni nggu fanay e tayim ni nggu meybil ku Jehovah ma nggu bieg e Thin rok. Ma re n’ey ni gu ma rin’ u gubin e rran e ke ayuwegeg ni nggu kadan’ug nge mada’ ko chiney.” Riyul’ ni rayog ni ngada pagedan’dad nga gelngin Jehovah ni nge gelnagdad nfaanra gubin ngiyal’, arrogon “reb e rran ngu reb,” ma ngada meybilgad ngak ma ngad fal’eged i lemnag felngin nrib fel’ nge pi n’en ni ke micheg.

18. Uw rogon ni be fal’eg e Bible laniyan’ e piin nib yul’yul’ ni kar pillibthirgad ara piin nib m’ar?

¹⁸ Ri ma ayuweg e re n’en ney e piin ni ke mulan’rad nbochan e kar pillibthirgad ma kar m’ar gad. Pi cha’nem e rayog ni nge keriban’rad, ni gathi bochan e yad be taareb rogonnagrad ngak yugu boch e girdi’, ya kar taareb rogonnaged e n’en nrayog ni ngar rin’ed e chiney ko n’en ni ur rin’ed kakrom. Ri be fal’eg lanin’uy ni ngan nang ni be ta’ fan Jehovah e piin pilibthir! Be yog e Bible ni gaar: “Lolugen ni ke mana’ e ba fel’ yaan nfaanra kan pirieg ni be yan u kanawo’ nib mat’aw.” (Proverbs 16:31, NW) Manang Jehovah e tin dabiyog rodad ma rib ga’ fan u wan’ e liyor rodad ngak u polo’ i gum’irchadad nyugu demtrug fadad meewar. Ma maruwel nib fel’ ni kada rin’ed e dabkiyog ni ngan chuweg u laniyan’ Got. Thin nu Bible e ke micheg ngodad ni gaar: “Yi Got e gathi ba laniyan’. Gathi bayi pag talin e maruwel ni kam ngongliyed, ara rogon nib t’uf romed ni kam daged ni bochan e ayuw ni kam pied ma ki gimed be pi’ ngak e piin ni gimed ni girdien Kristus.” (Hebrews 6:10) Ri gad ba felfelan’ ni ba’ rodad e piin ni kar yul’yul’gad ku Jehovah u lan boor e duw!

Dabmu Tal

19. Uw rogon ni nge fel’ rogodad riy nfaanra nguuda rin’ed e tin nib fel’?

¹⁹ Boor e girdi’ e ke michan’rad ni ngan rin’ e maruwel nib gel ni gubin ngiyal’ e ra chuweg e chalban. Maku, ngan rin’ e pi maruwel ni fan ku Got e ra ayuweg ni nge chuw e chalban ara tin nib spiritual ban’en. Be yog e Bible ni gaar: “Dabi chalbadad i rin’ e tin nib fel’; ya gad ra t’ar wom’engin ko ngiyal’ ni kan dugliy nfaanra dabda talgad. Ere, riyul’ ni nap’an ke mab e kanawo’ ngodad ni ngada rin’ed e re n’en ney, ma ngada maruweliyed e tin nib fel’ ngak urngin e girdi’, machane kab ga’ e t’ufeg rodad ngak e piin nib taareb e michan’ rodad.” (Galatia 6:9, 10, NW) Mu lemnag fare bugithin ni ngan “rin’ e tin nib fel’” nge ‘ngan maruweliy e tin nib fel’.’ Fan e re n’en ney e bay ban’en ni nguuda ngongliyed. Nguun rin’ e tin nib fel’ ni fan ku boch e girdi’ e riyul’ ni ra ayuwegdad ni dabi chalbadad ko pigpig rodad ku Jehovah.

20. Rogon ni nge dabi mulan’dad, ma mini’ e thingar dabda chaggad ngorad?

²⁰ N’en nib thil riy, e nge chag be’ ngak e girdi’ ni dar ma fol ko motochiyel rok Got me un ngorad ko maruwel e rayog ni nge aw parowon riy. Fare Bible e be ginangdad ni gaar: “Tomalngin e malang nge yan’ e yira puluwnag ko gafgow ni balyang e gagiyegnag nge yib, ma dabi chugur ni kab baud e malang nge yan’.” (Proverbs 27:3) Rogon ni nge dabi mulan’dad ma dabi aw parowdad, e thingar dabda chaggad ngak e piin ni be par ni bay e lem rorad ni de puluw ma ma gay thibngin e girdi’ ma ma gathibthibnag boch e girdi’.

21. Uw rogon ni ngada pied e athamgil nga laniyan’ boch e girdi’ u nap’an e muulung ko Kristiano?

²¹ Muulung ko Kristiano e ban’en ni ke pi’ Jehovah nrayog ni nge pi’ gelngidad ko tirok Got. Ri bay e tayim rodad u rom ni nge bagadad ma nge pi’ e athamgil nga laniyan’ bagadad u daken e thin ni ma gelnagey nge nguun chag nga taabang. (Hebrews 10:25) Urngin e girdi’ u lan e ulung e thingara athamgilgad ni ngar pied gelngin e girdi’ u nap’an ni yad be weliy ban’en ko muulung ara nap’an ni be pi’ e welthin. Piin ni yad be ayuweg e ulung ni yad ma fil ban’en ngorad e kari mil fan ngorad ni ngar pied e athamgil nga laniyan’ boch e girdi’. (Isaiah 32:1, 2) Ni mus ko ngiyal’ nib t’uf rok be’ ni ngan fonownag ara ngan llowan’nag, ma thingarni pi’ e fonow rogon ni ma gelnagey. (Galatia 6:1, 2) T’ufeg rodad ni fan ku boch e girdi’ e riyul’ ni ma ayuwegdad ni ngad pigpiggad ngak Jehovah ni dabi chalbadad.​—Psalm 133:1; John 13:35.

22. Yugu demtrug ni gadad e girdi’ ni daworda flontgad, ma mang fan nrayog ni ngada pired ni dabda rusgad?

²² Ngan liyor ku Jehovah e ngiyal’ ney ni ka nog tin tomren e rran ngay e ba muun ngay e maruwel. Maku rayog ni nge magar laniyan’ e Kristiano, nge nge amith lanin’uy, nge par ni yibe mochuch. Rarogodad ni gadad e girdi’ ni daworda flontgad e ba meewar, ni bod e rume’ ni but’. Machane, be yog e Bible ni be gaar: “Ke yog ngodad e pi n’en ney u lan e th’ib ni but’, ni fan ni nge gagiyel ni gelngin nib gel e ma yib rok Got ma gathi ma yib rodad.” (2 Korinth 4:7, NW) Arrogon, ma aw parowdad, machane dabda talgad. Ma n’en gad ra rin’, e “dab kud tamdaggad ma nge lungudad: ‘Jehovah e ir e be ayuwegeg.’”​—Hebrews 13:6, NW.

Ngan Sul Buchuw Nga Daken

• Mang boch ban’en nib tomal ni rayog ni ngad chuweged?

• Uw rogon ni ngada rin’ed e “tin nib fel’” ngak e pi walagdad ni Kristiano?

• Uw rogon ni nge gelnagdad Jehovah u nap’an ni ke aw parowdad ara ke mulan’dad?

[Picture on page 17]

Manang Jesus ni ra n’uw nap’an ni mulan’uy ma ra wageynag laniyan’ fapi apostal

[Picture on page 18]

Boch e kar paged e tin yad baadag ni ngar rin’ed nge pi n’en ni kar dugliyed ni gathi rib ga’ fan

[Picture on page 20]

Yugu aram rogon ni bay boch ban’en ni dabkiyog ni ngada rin’ed, ma rib ga’ fan u wan’ Jehovah e liyor rodad u polo’ i gum’irchadad