Ngan Pining E Sorok Ngak Got “Nib Taareb Lunguy”

“Mu pininged e sorok ngak Got ma Chitamangin Jesus Kristus ni Somol rodad nib taareb lungumed.”​—ROMA 15:6, NW.

1. Mang e n’en ni ke fil Paul ngak pi walagen u rogon ni ngan ayuweg e girdi’ nib thil thil e lem rorad?

URNGIN e Kristiano e ba thil thil rogon ni yad ma mel’eg ban’en ara de taareb rogon e n’en ni yad baadag. Yugu aram rogon, ma fapi Kristiano ni gubin e thingar u ranod u taabang u kanawo’ ko yafas. Gur rayog ni nge buch ban’en ni aram rogon fa? Arrogon, faanra dabda paged ni nge ga’ e magawon nib achichig. Ireray e n’en ni i fil Paul ni apostal ngak e piin ni taareb e michan’ rorad ko bin som’mon e chibog. Uw rogon ni i weliy e re n’en ney nib ga’ fan? Ma uw rogon ni ngada folgad ko fonow rok ni kan thagthagnag e ngiyal’ ney?

Uwfeni Ga’fan ni Nge Taareb e Kristiano

2. Uw rogon ni tamilangnag Paul nib t’uf ni ngan taareb?

² Manang Paul nib ga’ fan ni nge taareb e pi Kristiano, ma ke pi’ e fonow nib fel’ ni nge ayuweg e Kristiano ni ngar gum’an’gad ngorad u fithik’ e t’ufeg. (Efesus 4:1-3; Kolose 3:12-14) Yugu aram rogon, ma tomren ni ke ayuweg ni nge sum boor e ulung me yan ni nge guy yugu boch ni sogonapan 20 e duw, ma ma nang ni rogon ni ngan ayuweg e ulung ni nge taareb e mmo’maw’. (1 Korinth 1:11-13; Galatia 2:11-14) Ere, i tay ir ngak e pi walagen u Roma ni gaar: “I Got ni ir e ma yib e gum’an’ nge athamgil laniyan’ rok ngodad e nge ayuwegmed . . . ma rogon ni ke taareban’med ngay e nga mu pininged e sorok ngak Got ma Chitamangin Somol rodad i Jesus Kristus u taabang.” (Roma 15:5, 6, NW) Ngiyal’ ney, maku thingarda pininged e sorok ngak Jehovah Got “nib taareb lungundad” ni gadad e girdi’ rok ni ke taareban’dad. Uw feni gel ni gad be rin’ ban’en ni aram rogon?

3, 4. (a) Mang e n’en nib thilthil u rarogon fapi Kristiano nu Roma? (b) Uw rogon ma fapi Kristiano u Roma e rayog ni ngar pigpiggad ku Jehovah nib “taareb lungurad”?

³ Boor e Kristiano nu Roma ni fager rok Paul. (Roma 16:​3-​16) Yugu aram rogon nib thilthil e gin ni ra bad riy, ma i tay Paul ni yad e pi walagen ni gubin ma yad “ba t’uf rok Got.” I yoloy ni gaar: “Gu be pining e magar ku Got rog u daken Jesus Kristus nbochmed ni gimed gubin, ya fayleng ni ga’ngin e be weliy murung’agen e michan’ romed.” Ba tamilang, ni piyu Roma e yad ma dag e ngongol nib fel’ u boor e kanawo’. (Roma 1:7, 8; 15:14) Machane ku riyul’ ni, bay boch e girdi’ u lan e ulung nib thil rogon ni yad ma lemnag boch ban’en. Bochan ni Kristiano ko ngiyal’ ney e ra bad u yu yang ni ba thilthil e yalen riy, ni yad be fil rogon e fonow rok Paul ni kan thagthagnag ni be dag rogon ni ngan pithig e magawon ma ra ayuwegrad ni nga rogned e thin “nib taareb lungurad.”

⁴ U Roma ma immoy piyu Jew nge piin ni gathi yad piyu Jew ni ke michan’rad. (Roma 4:1; 11:13) Boch e Kristiano ni piyu Jew e ba tamilang ni dabiyog rorad ni ngar talgad i rin’ boch e yalen ni ur rin’ed u tan fare Motochiyel rok Moses, nyugu aram rogon ni dabisiy ni ka ra nanged ni pi ngongol nem e gathi ban’en nib ga’ fan ni ngar rin’ed ni fan ni ngar thapgad ngak Got. Ma reb, e boor e Kristiano ni piyu Jew ni ke mich u wan’rad e maligach rok Kristus ni ke pithigrad u boch e motochiyel ni ur folgad riy u m’on ni kar manged Kristiano. Ma bochan e re n’em, ma kar thiliyeged boch e tin ni yad ma rin’ nge yalen rorad. (Galatia 4:8-11) Yugu aram rogon, ma bod ni weliy Paul, yad gubin ma yad “ba t’uf rok Got”. Rayog ni ngar pininged e sorok ngak Got “nib taareb lungurad” ni yad gubin nfaanra ra bagayad ma ba fel’ e lem rok ngak bagayad. Gadad e chiney e ku rayog ni nge thilthil e lem rodad u boch ban’en, ere thingarda fal’eged i lemnag nib fel’ rogon ko uw rogon ni weliy Paul e re kenggin e motochiyel nem nib ga’ fan.​—Roma 15:4.

“Nge Fel’ Bigimed u Wan’ Bigimed”

5, 6. Mang fan nib thilthil e lem ko girdi’ u lan e ulung nu Roma?

⁵ U lan fare babyor rok Paul ni i pi’ ngak piyu Roma, me weliy murung’agen laniyan’ e girdi’ nib thilthil. Ke yoloy ni gaar: “Ke mich u wan’ be’ nrayog ni nge kay urngin ban’en, machane be’ nib meewar e ma kay e yasay.” Mang fan ni aram rogon? U tan e Motochiyel ni kan pi’ ngak Moses, e dabiyog ni ngan lunguy ufin e babi. (Roma 14:2; Leviticus 11:7) Machane, tomren ni yim’ Jesus e daki t’uf ni ngan fol ko re Motochiyel nem. (Efesus 2:15) Ngemu’, ma dalip nge baley e duw u tomren e yam’ ni tay Jesus, me yog ba engel ngak Peter ni apostal ni rogon e lem rok Got e dariy e ggan ni ngan lemnag nib alit. (Acts 11:7-12) Bochan e pi nem, ma boch e Kristiano ni piyu Jew e ur lemnaged nrayog ni ngar lunguyed ufin e babi​—ara ngar ked boch e ggan ni yog fare Motochiyel ni dabni kay.

⁶ Machane, ngan lemnag ni ngan kay e ggan ni kafram e ka nog nib alit e sana ke mang ban’en nrib kireb u wan’ yugu boch e Kristiano ni piyu Jew. I magawon laniyan’ boch e pi walag ni piyu Jew ni ka yad be fol ko tin yad ma rin’ u nap’an ni kar guyed e pi walagrad ni girdien Kristus ni piyu Jew ni kar kayed e ggan ni aram rogon. Maku, boch e Kristiano, ni gathi yad piyu Israel ni teliw rorad e dariy e motochiyel ni kan ta’ ni fan ko ggan, e sana ke balyangan’rad ni bay e girdi’ ni yad ma maluagthin u murung’agen e ggan. Riyul’, ni dariy e kireb riy ni nge siyeg be’ boch e ggan, nfaanra dabi yog nib t’uf ni ngan yodor ni fan ni ngan thap ngak Got. Yugu aram rogon, ma lem nib thilthil e ba mom ni nge k’aring e maluagthin u lan e ulung. Fapi Kristiano u Roma e ba t’uf ni ngar kol ayuwgad ni re magawon nem e dabi talegrad ni ngar pininged e sorok ngak Got “nib taareb lungurad.”

7. Mang lem nib thilthil e sum u murung’agen e ngan ta’ reb e rran u reb e wik nib ga’ fan?

⁷ Ke weliy Paul e bin l’agruw e magawon ni gaar: “Bayi n’en me turguy be’ ni ba’ reb e rran ni ir e ba ga’ fan nga yugu boch e rran, ma be’ e be turguy ntaareb rogon urngin e rran.” (Roma 14:5a) U tan fare Motochiyel ni kan pi’ ngak Moses, ma dariy e maruwel ni ngan rin’ u nap’an e Sabbath. Musko milekag ma dab ni tay e roran nem. (Exodus 20:8-10; Matthew 24:20; Acts 1:12) Machane, nap’an ni kan chuweg fare Motochiyel, ma daki t’uf ni ngan fol riy. Yugu aram rogon, ma boch e Kristiano ni piyu Jew e ke magafan’rad ni ngan rin’ ban’en ndemtrug ara ngan milekag nga bang nib palog u reb e rran ni kafram e kar ted ni ba thothup. Mus u tomren ni kar manged Kristiano, ma sana kar ted e bin medlip e rran ni kemus ni fan ko tirok Got, nyugu aram rogon ni kan chuweg fare Motochiyel ko Sabbath. Gur kar olobochgad riy? Danga’, nfaanra dab rogned ni ngan fol ko fare Sabbath ya ban’en ni baadag Got ni ngan rin’. Ere, bochan be ta’ fan Paul e nangan’ rok e pi walagen ni Kristiano, mi yoloy ni gaar: “Mu pag ni ra be’ ma ngari mudugil laniyan’.”​—Roma 14:5b, NW.

8. Yugu aram rogon ni gad ra ta’ fan e nangan’ ku boch e girdi’, mang e n’en ni susun dabi rin’ fapi Kristiano nu Roma?

⁸ Yugu aram rogon, ni kari pi’ Paul e athamgil nga laniyan’ e pi walagen ni ngar gum’an’gad u puluwon e piin nib mo’maw’ ngorad ni ngar dugliyed ban’en ni be yan u rogon e n’en ni be yog e nangan’ rorad ngorad, ma ke fonownagrad Paul nrib gel ni piin ni yad be guy rogon ni ngar towasariyed e piin nib taareb e michan’ rorad ngar folgad ko fare Motochiyel ni kan pi’ ngak Moses ni ban’en ni susun ni ngar rin’ed ni fan ni nga ra thapgad ngak Got. Ni bod ni, sagonapan 61 C.E., ni yoloy Paul fare babyor ni Hebrews, ni reb e babyor nib gel gelngin ni fan ko fapi Kristiano ni piyu Jew ni be weliy nrib tamilang ni dakuriy fan ni ngan fol ko fare Motochiyel ni kan pi’ ngak Moses ya bochan ni ri bay e athap ko Kristiano nbochan fare maligach ni biyul ni pi’ Jesus.​—Galatia 5:1-12; Titus 1:10, 11; Hebrews 10:1-17.

9, 10. Mang e thingar dabi rin’ e pi Kristiano? Mu weliy.

⁹ Rogon e n’en ni kad guyed, nke weliy Paul ni ngan mel’eg ban’en nib thilthil e susun dabi wageynag e girdi’ nfaanra dariy kenggin e motochiyel ko Kristiano ni kan th’ab. Arfan, ni ke fith Paul e Kristiano nib meewar e nangan’ rok ni gaar: “Mang fan ni kam turguy e kireb nga daken be’ ni walagem?” Me fith ngak e piin nib gel (ni sana aram e piin ni nangan’ rorad e ma pag ni ngar ked boch e ggan ni fare Motochiyel e be yog ni dabiyog ni ngan kay ara ngan rin’ ban’en u nap’an e Sabbath) ni gaar: “Mang fan ni ga be dariyfannag walagem?” (Roma 14:10) Rogon ni yog Paul, fapi Kristiano ni bay e nangan’ rorad nib meewar e thingar dabra dugliyed e kireb nga daken e pi walagrad nib gel e nangan’ rorad. Maku, fapi Kristiano nib gel e nangan’ rorad e dabra dariyfannaged e piin ni nangan’ rorad e ka ba meewar u boch ban’en. Urngin e girdi’ e thingari ta’ fan e lem rok yugu boch e girdi’ ma gathi yad e nge “ga’ i lemnagrad [rorad] nge pag rogon.”​—Roma 12:3, 18, NW.

¹⁰ I weliy Paul murung’agen e lem nib thabthabel ni gaar: “En ndemtrug e n’en nra kay e dabi dariyfannag e en ni der yog ni nge rin’ ni bod ir; ma en ni ke mus ni yasay e ma kay e dabi turguy e kireb nga daken e en ndemtrug e n’en ni ma kay, ya cha’nem e ba yal’uw u wan’ Got.” Maku, i yog ni gaar: “Maku kad felgad u wan’ Kristus, ni fan ni ngan pining e sorok ngak Got.” Bochan ni en nib gel nge en nib meewar e nangan’ rok e yow ba fel’ u wan’ Got nge Kristus, thingari aram rogon e lem rodad ni ra “bagadad ma nge fel’ u wan’ bagadad.” (Roma 14:3; 15:7, NW) Mini’ e ra togopuluw ko re n’em?

T’ufeg ko Walag e Be Ayuweg ni Ngan Taareb e Ngiyal’ Ney

11. Mang magawon nib thil e ke sum u nap’an Paul?

¹¹ U lan fare babyor ni ke pi’ Paul ngak piyu Roma, e ke weliy murung’agen e magawon nib thilthil. Kafini chuweg Jehovah reb e m’ag me sunmiy reb nib biech. Boch e girdi’ e mmo’maw ngorad ni ngar puluwniged e lem rorad ngay. Magawon ni ri aram rogon e dakuriy e chiney, machane yu ngiyal’ ma boch e magawon nib chuchugur ni nge taareb rogon ngay e rayog ni nge sum.

12, 13. Mang boch ban’en nrayog ni nge ta’ e pi Kristiano fan e nangan’ rok pi walagrad riy e ngiyal’ ney?

¹² Ni bod ni, susun reb e ppin ni Kristiano ni kafram e ir bang ko teliw ni ma machibnag ni ngan fanay e mad ndariy boor ban’en ni kan tay ngay ma ngan fal’eg yaay ni de pagrogon. Nap’an ni ke m’agan’ ko tin riyul’, ma sana mo’maw’ rok ni nge taareb rogonnag e lem rok ko tin baaray ni rayog ni ngan fanay e mad nib fel’ yaan ni boor ramaen ni be yan u rogon e gin ni ngan yan ngay, ara ngan tay boch ban’en nga dowey ni de pag rogon. Bochan ndariy kenggin e motochiyel u Bible ni kan th’ab, ma de puluw ni be’ e nge k’aring reb e ppin ni Kristiano ni nge togopuluw ko nangan’ rok. Maku, ke nang ni thingar dabi thibthibnag e piin ni ppin ni Kristiano ni nangan’ rorad e be pag ni ngara fanayed e pi’ n’en nem.

¹³ Mu lemnag yugu reb e magawon. Reb e pumoon ni Kistiano e sana kan chuguliy ko gin ni girdi’ riy e dabun e alkul. Tomren ni ke nang e tin riyul’, me tamilang u wan’ ni rrum e ireray e taw’ath ni yib rok Got rogon ni yog e Bible ma rayog ni ngan unum nib fel’ urngin. (Psalm 104:15) Ke fel’ u wan’ e re n’em. Machane, bochan e yafas rok kafram, me kari dugliy ni nge siyeg e alkul ni polo’, machane der ma thibthibnag e piin ni ma unum nib fel’ urngin. Ere ke fol ko thin rok Paul ni gaar: “Gubin ngiyal’ ma thingar ud nameged e pi n’en ni ma fek e gapas i yib, nge pi n’en ni ma gelnagdad.”​—Roma 14:19.

14. Mang e pi n’en ni rayog ko fapi Kristiano ni ngara fanayed e lem ko fonow rok Paul ngak piyu Roma?

¹⁴ Ma sum yugu boch e magawon nib t’uf ni ngan fanay e fonow rok Paul ni fan ko piyu Roma. Fare ulung ko Kristiano e boor e girdi’ riy, mab thilthil e n’en ni yad baadag. Arfan, nrayog ni ngar mel’eged ban’en nib thilthil​—ni bod e mad nge rogon ni ngar fal’eged yaarad. Riyul’, ni fare Bible e bay kenggin e motochiyel riy nib tamilang ni urngin e Kristiano e ngar folgad riy. Dariy bagadad ni nge yon’ e mad ara nge fal’eg piyan lolugen ni yugu ba thil yaan ara ppag rogon ara be m’ug u yaan ni gad be un ko tin nib kireb nu fayleng. (1 John 2:15-17) Ba t’uf ni fapi Kristiano e dabra paged talin ni gubin ngiyal’, ni mus nga nap’an ni yad be fafel, ma yad e pi tapigpig rok e En Th’abi Tolang u Palpalthib. (Isaiah 43:10; John 17:16; 1 Timothy 2:9, 10) Machane, u boor yang e bay boor ban’en riy nrayog ni nge mel’eg e Kristiano.a

Dabmu Magawonnag e Michan’ rok Boch e Girdi’

15. Wuin e rayog rok reb e Kristiano ni nge pag mat’awon ni fan ni nge fel’ ngak pi walagen?

¹⁵ Ka bay reb e kenggin e motochiyel nib ga’ fan ni dag Paul ngodad ko fonow rok ni fan ko Kristiano u Roma. Yu ngiyal’, e reb e Kristiano ni bay e nangan’ rok ni kan skulnag nib fel’ rogon e ra dugliy ni dabi rin’ ban’en ndariy e kireb riy. Mang fan? Ya manang ni ra rin’ ma rayog ni nge kirebnag boch e girdi’. Ra aram rogon, ma mang e gad ra rin’? I yog Paul ni gaar: “Ffel’ ni nge dabni kay e ufin ara dabni unum e wain ara nrin’ ban’en nra magawonnag e michan’ rok walagem.” (Roma 14:14, 20, 21) Ere, “gadad . . . e piin ni ba gel e nangan’ rodad e ngada ayuweged e piin nib meewar e nangan’ rorad, ma dagathi ngada felfelan’niged gadad. Ra bagadad me felfelan’nag e en buguli yoror rok ko tin nib fel’ ni fan ni nge gel faanem.” (Roma 15:1, 2, NW) Faanra ra magawon e nangan’ rok reb e Kristiano nbochan e n’en ni gad be rin’, ma t’ufeg rodad ni fan ko walag e ra k’aringdad ni ngad lemnaged rarogorad ma dabkuda rin’ed ban’en ni aram rogon. Ma reb ni aram rogon e rogon ni ngan fanay e alkul. Reb e Kristiano e rayog ni nge unum e wain nib fel’ urngin. Machane faanra ra magawonnag e nangan’ rok walagen ni ra nge yodor, ma dabki ulul i rin’ e ni aram rogon.

16. Uw rogon ni ngada ted fan e girdi’ ni yad ma par ko binaw ni gad ma machib riy?

¹⁶ Re kenggin e motochiyel ney e ku rayog ni ngada fanayed ni fan ko girdi’ ni gathi bang ko ulung ko Kristiano. Ni bod ni, sana gad ma par ko binaw ni teliw riy ni boor e girdi’ ni be un ngay e kan motochiyelnag ni ngar ted reb e rran u reb e wik ni rran ko toffan. Ma bochan e re n’em, ni fan ni nge dabda magawonnaged e piin buguli yoror rodad ma ra magawonnag e maruwel rodad i wereg e machib, ma ngada siyeged i rin’ ban’en nrogon nrayog rodad ko re rran ney nra k’aring e damumuw ngorad. Ma reb, e reb e Kristiano nib fel’ rogon e sana ra yan nga bang nrib t’uf e ayuw rorad ni girdi’ riy e yad ba gafgow. Sana ra mel’eg ni nge lemnag rarogon e piin buguli yoror rok nib biech ma ngi i chuw ko mad ni de tolang puluwon ara mel’eg e par ndariy e chugum ni boor nyugu aram rogon ni bay e salpiy rok.

17. Mang fan ni bay fan ni ngan ta’ fan boch e girdi’ ko pi n’en ni gad ra mel’eg?

¹⁷ Gur bay fan ni ngan lemnag ni piin nib “gel” e nangan’ rorad e ra thiliyeg rarogon e par rorad ni aram rogon? Mu lemnag e re fanathin ni baaray: Nap’an ni gad be kol e yap’ ko karro rodad u kanawo’ ni ga’, ma kad guyed ni bay boch e bitir ni yad ra maadad ni be yan u but’ nib chuchugur ko kanawo’ ni ra yan e karro rodad riy. Ngada ululgad nga darod ko karro nib papey ya dawori taw nga payngin nib togopuluw ko motochiyel ma bay mat’awdad ni ngad yodoromgad? Danga’, gad ra yan ko karro nib sasagaal ni nge dabi buch ban’en rok fapi bitir. Yu ngiyal’, mab t’uf e lem ni aram rogon ni ngan sasagaalnag ban’en, ara ngan pag ban’en, ni fan ni nge ayuweg e tha’ u thildad e pi walagdad ara boch e girdi’. Sana gad be rin’ ban’en ni ri bay mat’awdad ni ngada rin’ed. Dariy kenggin e motochiyel ni gad be th’ab riy. Yugu aram rogon, faanra rayog ni ngada magawonnaged boch e girdi’ riy ara gad ra magawonnag e piin nib meewar, ma t’ufeg ko Kristiano e ra k’aringdad ni ngada kol ayuwgad. (Roma 14:13, 15) Ngan ayuweg ni nge taareban’uy ma ngan gelnag e tin fan ko Gil’ilungun e kab ga’ fan ko ngan rin’ mat’awuy.

18, 19. (a) Rogon ni gad be ta’ fan boch e girdi’, uw rogon ni gad be fol ko tin ni rin’ Jesus? (b) Mang e pi n’en ni ngada maruweliyed ni kari taareban’dad ngay, ma mang e yira weliy ko bin migid e article?

¹⁸ Gad ra rin’ ni aray rogon, ma gad be fol ko bin tha’bi fel’ e kanawo’. Be yog Paul ni gaar: “Yi Kristus e de yan nga laniyan’, machane yan i aw ni bod ni ke yog e babyor nib thothup ni be gaar, “Thin nib kireb ni ke yog e piin ni ka rogned e thin nib kireb ngom e ke aw ngog.” Ke m’agan’ Jesus ngay ni nge pagfan e yafas rok ni fan ngodad. Ere nge m’agan’dad ngay ni ngada paged fan boch i mat’awdad nfaanra rayog ni ngan ayuweg e “piin nib meewar” ngar uned ngodad i pining e sorok ngak Got u taabang. Riyul’ ni, ngan dag e runguy nge gol ngak e Kristiano nib war e nangan’ rorad​—ara dabda folgad ko urngin ban’en ni gad baadag ni kad mel’eged ma dabda rin’ed e n’en ni bay mat’awdad riy u fithik’ e towasar—​e ra dag ni bay e “lem rodad ni taareb rogon ko lem rok Kristus Jesus.”​—Roma 15:1-5.

¹⁹ Yugu aram rogon ni lem rodad nga boch ban’en ni de peth ko kenggin e motochiyel u Bible e ba thilthil, ma pi n’en ni bay rogon ko liyor rodad, e ngada maruwelgad ngay ni kari taareban’dad. (1 Korinth 1:10) Ni bod ni, ra m’ug ni ke taareban’dad, ko tin gad ma rin’ ngak e piin ni ma togopuluw ko liyor nib riyul’. Thin rok Got e ma yog e pi cha’ nem ni tatogopuluw ni girdi’ ni dan nangrad ma be ginangdad ni ngada kol ayuwgad ni dabda motoyilgad nga “laman e piin ni dan nangrad.” (John 10:5, NW) Uw rogon ni ngada poyed e pi cha’ nem? Mang e gad ra rin’ ngorad? Pi deer ney e yira weliy ko bin migid e article.

[Footnote]

Uw Rogon ni Ngam Pi’ e Fulweg?

• Mang fan ni lem nib thilthil ko tin baadag be’ e dabi magawonnag e girdi’ ni ke taareban’rad?

• Mang fan ni gadad e piin ni Kristiano e ra bagadad ma ngari tayfan bagadad?

• Mang boch e kanawo’ nrayog ni ngada folgad riy e ngiyal’ ney ko fonow rok Paul u rogon ni nge taareb e girdi’, ma mang e ra k’aringdad ni ngada yodoromgad?

[Picture on page 22]

Fonow rok Paul u rogon ni nge taareb e girdi’ e baga’fan ni fan ko ulung

[Picture on page 24]

Fapi Kristiano e ke taareban’rad nyugu demtrug feni ba thilthil e gin ra bad riy

[Picture on page 25]

Mang e ra rin’ e cha’ ney e chiney ni be kol e yap’ ko karro?