Uw Rogon ni Ngaum Par nib Fel’ e Nangan’ Rom?

1, 2. Mang nib ga’ fan e compass, ma uw rogon nrayog ni ngan taarebrogonnag ko nangan’?

MU LEMNAG be’ ni be kol e yap’ u reb e barkow; fa be’ ni be yan u daken e ted nib palog ko gin ni bay e girdi’ riy; fa be’ ni be kol e yap’ ko sikoki ni ke yan nga daken e manileng ndab ki guy e nam. Mang e ba t’uf ko pi cha’ ney? Ba mudugil nra dariy e compass ni be pow’iyrad, ma yad ra malog.

² Compass e ban’en ni bay e magnet ko chaygar riy ni ma par nib sap ko lel’uch ni yima fek ko milekag ni nge pow’iyey ko gin ni ngan sor ngay. Faanra bay e compass rom nge map ma rayog ni nge ayuwegem ndab mu malog. Re n’ey e rayog ni ngan taarebrogonnag nga ba tow’ath nrib fel’ ni ke pi’ Jehovah ni aram e nangan’ rodad. (James 1:17) Ra dariy e nangan’ rodad, ma dariy ban’en nra pow’iydad. Ma faan gad ra maruwel ngay nib fel’ rogon, ma rayog ni nge ayuwegdad ngad nanged e tin nib mat’aw ni ngad rin’ed. Machane som’on e gad ra weliy ko mang e nangan’ nge rogon ni ma maruwel. Ngemu’, ma gad weliy dalip ban’en ni baaray: (1) Rogon ni nge fel’ e nangan’ rodad, (2) fan ni ngaud lemnaged laniyan’ boch e girdi’, nge (3) angin nra yib ngodad ni faanra ba fel’ e nangan’ rodad.

FAN E NANGAN’ NGE ROGON NI MA MARUWEL

3. Mang fan fare bugithin ni Greek ni kan pilyeg ni “nangan’”? Uw rogon nib thil e girdi’ nga boch ban’en ni sunumiy Got u fayleng?

³ Fare bugithin ni Greek ni kan pilyeg ni “nangan’” ni bay u Bible e be yip’ fan e “tamilangan’ ni bay rok be’.” Gadad ba thil nga boch ban’en ni sunumiy Got u roy u fayleng ni bochan e ke pi’ ban’en ngodad nra ayuwegdad ni ngad nanged rarogodad. Maku rayog ni ngad yaliyed gadad, ma gad nang ko mang e ngad rin’ed nib mat’aw. Lanin’dad e ma micheg e tin riyul’ ngodad, maku ma dag ngodad e kanawo’ nge lem ni ngad mel’eged. Rayog ni nge pow’iydad ko tin nib fel’ ara ayuwegdad ngad nanged e n’en nib kireb ndab da rin’ed. Ere faanra mmel’eg e tin nib fel’, ma ra yog lanin’um ngom nib fel’ e n’en ni kam rin’, ma faanra tin nib kireb e kam mel’eg ni ngam rin’, ma ra i magawon e nangan’ rom.

4, 5. (a) Uw rogon ni kad nanged ni bay e nangan’ rok Adam nge Efa? Mang wenegan ni yib ni bochan e da kur folgow ko motochiyel rok Got? (b) Mang e gad ra fil u murung’agen e nangan’ rok boch e tapigpig rok Got nib yul’yul’ kakrom?

⁴ Kan sunmiy Adam nge Efa ni bay e nangan’ rorow ni bochan e kar tamra’gow u tomuren ni kar denengow. (Genesis 3:7, 8) Ba gel e kireban’ riy, ya nap’an ni magawon e nangan’ rorow ma dakuriy ban’en ni ku rayog ni ngar rin’ew, ya kar mu’gow i th’ab e motochiyel rok Got ni lem rorow. Ere aram fan ni kar mangew toogor rok Jehovah Got. Nni sunmiyrow ni yow ba flont, ere yow manang e n’en ni yow be rin’.

⁵ Yugu aram rogon ndaki flont e girdi’ ni bod Adam nge Efa, machane immoy boch e girdi’ ni kar fanayed e nangan’ rorad nib fel’ rogon. Job ni i par nib yul’yul’ e yog ni gaar: “Dariy e ngiyal’ ni gu ra pag i yog ni gub mat’aw; ya mmich u wun’ug ni gub fel’.”a (Job 27:6, BT) Ma pag Job e nangan’ rok ni nge pow’iy ko n’en ni nge rin’. Aram fan nrayog ni nge yog nder magawon laniyan’ fa be tamra’ ko n’en ni ke rin’. Bay ban’en nib thil rok Job nge David. Nap’an ndaki tay David fan Saul ni dugliy Jehovah ni nge mang pilung, “me dabuy David e re n’em ni ke rin’.” (1 Samuel 24:5) Pi n’en ni i methan’ David ngay e ir e ayuweg ni nge dab ki darifannag Saul bayay.

6. Mang e be dag ni nangan’ e reb e tow’ath ni ke pi’ Got ni fan ngak e girdi’ ni gubin?

⁶ Gur, kemus ni yigoo pi tapigpig rok Jehovah e ke pi’ e nangan’ ngorad nib tow’ath? Mu lemnag e n’en ni yog apostal Paul ni kan thagthagnag ni gaar: “Piin ni gathi yad piyu Israel e dariy e re Motochiyel nem rorad; machane ngiyal’ ni yad ra ngongliy e tin ni be yog e re Motochiyel nem ni yad e sum u lanin’rad ni ngar ngongliyed, e aram e kar manged ba motochiyel ngorad, ni yugu aram rogon ndariy fare Motochiyel rok Moses rorad. Ya ngongol rorad e be m’ug riy ni tin ni be yog fare Motochiyel ni ngan rin’ e yad manang u lanin’rad. Ya ku er rogon lanin’rad ni be dag ni re n’ey e ba riyul’, ni bochan e yu ngiyal’ e ma yog e lem rorad ngorad nib tagan e tin ni kar ngongliyed, ma yu ngiyal’ e ma yog ngorad nib mat’aw e tin ni kar ngongliyed.” (Roma 2:14, 15) Ere, mus ko piin ndar nanged e motochiyel rok Jehovah ni bay yu ngiyal’ ni yad ma ngongol nib puluw ko motochiyel rok ni bochan e nangan’ ni bay rorad.

7. Mang fan nrayog ni nge bannagdad e nangan’ rodad?

⁷ Bay yu ngiyal’ ni ma bannagdad e nangan’ rodad. Mang fan? Bod fare compass. Faan ga ra chugurnag ko wasey ma dabki sap e chaygar riy ko lel’uch. Ma faanra ga be sap ngay ma da mur fol ko map, ma ba m’ay fan. Ere, ku er rogon e nangan’ rodad. Faan gad ra pag e ar’ar rodad ni nge gagiyegnag, ma rayog ni nge bannagdad. Ma faanra dab da paged e Thin rok Got ni nge pow’iy e nangan’ rodad, ma boor ban’en ni gad ra mada’nag ndabi yog e nangan’ rodad ngodad e tin nib fel’ riy nge tin nib kireb. Ere, faanra nge maruwel e nangan’ rodad nib fel’ rogon, mab t’uf ni nge pow’iydad gelngin Jehovah nib thothup. I yoloy Paul ni gaar: ‘Lanin’ug ni gelngin Got nib thothup e be gagiyegnag e ku be micheg ngog ni dagur ban.’ (Roma 9:1) Machane, uw rogon ma gad nang ni be maruwel e nangan’ rodad nib puluw nga gelngin Jehovah nib thothup? Thingar da skulnaged.

ROGON NI NGAD SKULNAGED E NANGAN’ RODAD

8. (a) Mang e rayog ni nge rin’ gum’ircha’dad ko nangan’ rodad? Mang e thingar da rin’ed u m’on ni ngad dugliyed ban’en? (b) Mang fan nde gaman ni kemus ni nge par e nangan’ rok reb e Kristiano ndariy ban’en ni be magawonnag? (Mu guy e footnote.)

⁸ Uw rogon ni ngam dugliy ban’en nrogon ni be yog e nangan’ rom? Boch e girdi’ e ma dugliy ban’en nrogon ni baadag laniyan’. Sana ra lungurad, “Der magawonnag e nangan’ rog.” Machane, ar’ar u lan gum’ircha’dad e rib gel nrayog ni nge suruy e nangan’ rodad. Be gaar e Bible: “Mini’ e rayog ni nge nang fan laniyan’ [“gum’irchaen,” NW] e girdi’? Dakuriy yugu reb e ban’en ni aram feni sasaliyeb.” (Jeremiah 17:9, BT) Ere, gathi n’en ni gad baadag e ba ga’ fan, ya u m’on ni ngad dugliyed ban’en ni ngad rin’ed ma ngad lemnaged rogon laniyan’ Jehovah Got riy.b

9. Uw rogon be’ ni bay madgun Got u wan’? Faanra bay madgun Got u wan’dad, ma mang e ra rin’ ko nangan’ rodad?

⁹ Faan gad ra dugliy ban’en nrogon nib puluw ko nangan’ rodad ni kan skulnag, ma aram e be dag ni bay madgun Got u wan’dad, ma gathi gad be rin’ ban’en nrogon ni baadag lanin’dad. Mu lemnag Nehemiah ni ir reb e governor nib yul’yul’ ni immoy. Bay mat’awun ni nge yog ko girdi’ nu Jerusalem ni ngar pied puluwon boch ban’en nib muun e tax ngay, nrogon ni baadag. Machane de rin’. Mang fan? Ya dabun ni nge kireb e tha’ u thilrow Jehovah ni bochan e be gafgownag e girdi’ rok. I gaar: “Gag e ba thil e ngongol rog, ni bochan e ug tayfan Got.” (Nehemiah 5:15, BT) Madgun Got e ba ga’ fan, ya ra bay rok be’ ma be rus ni nge kirebnag laniyan’ Jehovah. Ma re n’ey e ra ayuwegdad ni ngad dugliyed ban’en nrogon nib puluw ko Thin Rok.

10, 11. Mang boch kenggin e motochiyel nu Bible nib l’ag rogon ko muun alkul? Uw rogon ni nge pow’iydad Got ngad folgad ko pi motochiyel ney?

¹⁰ Am lemnag rogon e muun alkul. Nap’an ni gad ra yan nga reb e abich, ma boor i gadad e ma lemnag e re deer ni baaray, Gu ra unum ban’en ni bay e alkul riy fa danga’? Som’on, e ngad nanged ko mang e ngad rin’ed. Mang e be yog e motochiyel nu Bible u murung’agen e re n’ey? Der yog e Bible ndab ni unum e alkul. Ya mus ko wain ni kan pining e sorok riy ngak Jehovah, ya reb e tow’ath ni ke pi’. (Psalm 104:14, 15) Machane, be yog e Bible nib kireb e chingaw nge mur nib pag rogon. (Luke 21:34; Roma 13:13) Kan taarebrogonnag e chingaw nga boch e denen nib ubchiya’ ni bod e ngongol ndarngal.c​—1 Korinth 6:9, 10.

¹¹ Nangan’ ko Kristiano e kan skulnag ko pi kenggin e motochiyel nu Bible. Ere, nap’an ni gad ra mada’nag e magawon ni aray rogon u nap’an reb e abich, ma thingar da fithed gadad ni nge lungudad: ‘Uw rogon e re mur ney? Ba mom ni nge sum e wagey riy? Mang e gub meewar riy? Gu ma yim’ ni bochan ni nggu unum e alkul, fa rib ga’ fan ngog, fa gu ma unum ya nge fel’ lanin’ug me gagiyegnigeg? Rayog ni nggu kol ayuw u rogon ni gu ma unum e alkul, fa?’ Nap’an ni gad be fal’eg i lemnag e pi kenggin e motochiyel nu Bible nge pi deer ni bay rogon ngay, mab fel’ ni ngad meybilgad ngak Jehovah ni nge pow’iydad. (Mu beeg e Psalm 139:23, 24.) Faan gad ra rin’ ni aray rogon, ma aram e gad be pag ni nge pow’iydad gelngin Jehovah nib thothup, maku gad be skulnag e nangan’ rodad ni nga i par nib puluw ko pi kenggin e motochiyel nu Bible. Machane, ku bay ban’en ni ngari fel’ i lemnag rodad u m’on ni ngad dugliyed boch ban’en.

MANG FAN NI NGAUD LEMNAGED LANIYAN’ BOCH E GIRDI’?

12, 13. Mang boch i fan nib thilthil e nangan’ ko Kristiano? Mang e gad ra rin’ ni faanra ba thil e nangan’ rodad be’ u murung’agen ban’en?

¹² Sana bay yu ngiyal’ ni ga ma gin nga rogon feni thilthil e nangan’ ko Kristiano. Be’ e be yog laniyan’ ngak ndabi rin’ ban’en; ma be’ e baadag ni nge rin’ ya der magawonnag laniyan’. Bod nnap’an ni kan yan nga reb e abich, ma bay be’ ni baadag ni nge unum buchuuw e alkul ma yad be sabethin e fager rok u taabang; machane bay be’ ni ke magawon laniyan’ ni bochan e re n’em. Mang fan nib thilthil e nangan’ ko girdi’, ma susun ni mang e ra rin’ ko pi n’en ni gad ma dugliy?

¹³ Boor fan nib thilthil rarogon e girdi’, ya ra be’ ma rogon. Bay boch e girdi’ ni immoy ban’en ni yad ba meewar riy kafram ni ur gayed rogon ni ngar digeyed mab mo’maw’ ngorad. (1 Kings 8:38, 39) Ere, nap’an nra yan nga murung’agen e alkul, ma girdi’ ni aray rogon e ri yad ma fal’eg i lemnag e re n’ey nib fel’ rogon. Faanra ke yib be’ ni aray rogon nga tabinaw rom, ma ga ra ognag e alkul ngak mab mudugil nra siyeg. Ere gur, ga ra dabuy? Fa ga ra towasariy? Danga’, ya ga ra lemnag rogon laniyan’ walagem ni bochan e ba t’uf rom, ni demtrug ko ga manang fan ni ke siyeg fa danga’.

14, 15. Mang e i magawonnag e nangan’ rok boch e Kristiano kakrom, ma mang e ke yog Paul?

¹⁴ Nap’an e tin som’on e Kristiano, me guy apostal Paul nib thilthil rogon e nangan’ rorad. Boch e Kristiano e ngiyal’ nem e ke magawon lanin’rad u murung’agen e ggan ni kan pi’ ni maligach ko liyos. (1 Korinth 10:25) Da i magawon laniyan’ Paul ko ggan ni un pi’ ni chuway’ u market. Manang ni liyos e dariy ban’en ni yad manang, ma dabiyog ni ngar ked e ggan, ya manang ni ggan e ba milfan ngak Jehovah. Ere, ba thil e n’en ni i lemnag Paul ko n’en ni i lemnag boch e girdi’. Sana immoy boch e girdi’ kakrom ni ur uned i tayfan e liyos u m’on nra manged Kristiano. Pi Kristiano nem e ur lemnaged ni gubin ban’en ni yima pi’ ko liyos e ba kireb. Ere, mang e rin’ Paul?

¹⁵ I gaar: “Gadad e piin nib gel e michan’ rodad ngak Somol e susun e ngad ayuweged e piin ni yad mmeewar ngad uned i fek gilbarad. Ma gathi gadad e nga darod nga lanin’dad. Yi Kristus e de yan nga laniyan’.” (Roma 15:1, 3) Ere, ke tamilangnag Paul nthingar da ayuweged pi walagdad ni yad ba meewar ni bod rogon ni i rin’ Kristus. Miki yog ni kab fel’ ndabi kay e ufin ya nge dabi kirebnag e michan’ rok boch e Kristiano.​—Mu beeg e 1 Korinth 8:13; 10:23, 24, 31-33.

16. Mang fan ni piin ni kar turguyed ndab ra rin’ed ban’en e dab ra turguyed e n’en ni nge rin’ e piin nib thil e nangan’ rorad?

¹⁶ Piin ni kar dugliyed ndab ra rin’ed ban’en e thingar dab rogned ban’en nib kireb ngak boch e girdi’, fa rogned ni tin ni yad be lemnag e ba mat’aw. (Mu beeg e Roma 14:10.) Riyul’ nthingar da fanayed e nangan’ rodad ya nge yag nda nanged e tin nib fel’ ko tin nib kireb. Machane, gathi aram e kan pi’ mat’awdad ni ngad turguyed e kireb ku be’. Dab mu pagtalin e thin rok Jesus ni gaar: “Dab mu turguyed e kireb nga daken e girdi’, nge dabi turguy Got e kireb nga dakenmed.” (Matthew 7:1) Gubin e girdi’ u lan e ulung e dab ur maluagthingad u murung’agen e nangan’ rorad. Ya thingar ra gayed e kanawo’ ni ngar t’ufeged yad riy, mu ur pared u taabang u fithik’ e gapas, mu ur pied e athamgil nga lanin’rad, ma gathi ngaur gafgownaged yad.​—Roma 14:19.

RA FEL’ ROGOY KO NANGAN’ NIB FEL’

17. Mang e ke buch ko nangan’ rok boor e girdi’ e ngiyal’ ney?

¹⁷ I gaar apostal Peter: “Mpired ndariy ban’en ni be methan’med ngay.” (1 Peter 3:16) Nangan’ nib fel’ u p’eowchen Jehovah Got e aram e tow’ath nib fel’. Boor e girdi’ e ngiyal’ ney ni gathi aram rogon e nangan’ rorad. Ke tamilangnag Paul ni “gowa kan urfiy lanin’rad nga ba wasey ni gowel.” (1 Timothy 4:2) Wasey nib gowel e ra urfeg dowey ma ra magey e fath riy ndab kun thamiy. Boor e girdi’ ni bay e nangan’ rorad, machane gowa ke yim’ ni dakir thamiy ban’en, ya yad ra rin’ e kireb ma dakir magawonnag lanin’rad. Boor e girdi’ e ngiyal’ ney e yugu ra yad be rin’ e tin nib kireb ma dariy fan u wan’rad.

18, 19. (a) Mang angin ni faanra i magawon lanin’um? (b) Mang e rayog ni ngad rin’ed ni faanra yugu be magawonnagdad e nangan’ rodad ni bochan reb e denen nib ubchiya’ ni kad rin’ed kafram ma kad kalgadngan’dad riy?

¹⁸ Faanra magawon laniyan’ be’ ma aram e be yog e nangan’ rok ngak ni ke rin’ ban’en nib kireb. Faanra mu kalngan’um ko denen ni kam rin’ ni bochan e ke yog e nangan’ rom ngom, ma ra n’ag Got fan ni mus ko tin th’abi gel e kireb riy. David ni Pilung e rin’ reb e denen nib ubchiya’, machane ke n’ag Jehovah fan ni bochan e kari kalngan’. Bochan ni kari fanenikay e n’en ni ke rin’, ma baadag ni nge fol ko pi motochiyel rok Jehovah, ma aram fan ni ke guy ni Jehovah e ir reb e Got nib ‘gol ma ma n’ag fan u wan’ e kireb.’ (Psalm 51:1-19; 86:5) Machane, mang e ngad rin’ed ni faanra kad kalgadngan’dad, ma ke n’ag Got fan e denen ni kad rin’ed, ma ka be magawon lanin’dad?

¹⁹ Yu ngiyal’ e ma magawon e nangan’ rodad nge pag rogon ni yugu aram rogon ni kan n’ag fan e denen ni kad rin’ed. Faanra aray rogon, ma ngad nanged ni Jehovah e kab ga’ nga lanin’dad. Thingari mich u wan’dad ni ma t’ufegdad Jehovah, ma ma n’ag fan e kireb rodad ni bod rogon ni gad ma pi’ e athamgil nga laniyan’ boch e girdi’ ni ke magawon lanin’rad. (Mu beeg e 1 John 3:19, 20.) Maku reb e, faanra ba beech e nangan’ rodad ma rayog ni ngad pared nib gapas lanin’dad ma gad ba felfelan’. Boor e girdi’ ni kar rin’ed reb e denen nib ubchiya’ ni ke fel’ lanin’rad ni bochan e re n’ey, ma ke yag ni ngkur pigpiggad ngak Jehovah bayay.​—1 Korinth 6:11.

20, 21. (a) Mang fan ni kan fal’eg e re ke babyor ney? (b) Mang e ke pi’ Jehovah ngak e piin Kristiano ni ngar felfelan’gad ngay, ma uw rogon ni ngar maruwelgad ngay?

²⁰ Re ke babyor ney e kan fal’eg ni nge ayuwegem ngaum par ni gab felfelan’, ma be par e nangan’ rom nib fel’ u n’umngin nap’an e re m’ag rok Satan ney nib sug ko kireb. Dabiyog ni nge weliy e re ke babyor ney gubin e motochiyel nu Bible nib t’uf ni ngad nanged ma gad fol riy ni gubin e rran. Ya fan e re ke babyor ney e nge ayuwegem ni ngam fil rogon ma ga nang ko uw rogon ni ngam fanay e nangan’ rom ni ngam fil e Thin rok Got ma ga fol riy u gubin e rran. Ba thil e Motochiyel Nni Pi’ Ngak Moses ko “motochiyel ni pi’ Kristus,” ya motochiyel ni pi’ Kristus e be yog ngodad ni ngad fanayed e nangan’ rodad ni gubin ngiyal’ ma gathi kemus ni ngad folgad ko pi motochiyel ni kan yoloy nga babyor. (Galatia 6:2) Ke pi’ Jehovah e puf rogon ngak e pi Kristiano. Machane, Thin rok e be puguran ngodad ni gathi ke puf rogodad ni ngaud “upunguyed ban’en nib kireb.” (1 Peter 2:16) Ya puf rogon ni bay rodad e aram reb e kanawo’ nrayog ni ngad daged riy nib t’uf Jehovah rodad.

²¹ Faan ga ra meybil ma ga lemnag rogon ni ngaum par ni ga be fol ko pi motochiyel nu Bible u m’on ni ngam dugliy ban’en, ma rayog ni nge ayuwegem ni ngam mon’og ko pi n’en ni kam fil u murung’agen Jehovah. Faan ga ra rin’ ni aram rogon, ma aram e ga be maruwel ko nangan’ rom, ma rayog ni ‘ngam nang e tin nib fel’ ko tin nib kireb.’ (Hebrews 5:14) Ra be fol e nangan’ rom ko thin nu Bible ma ra ayuwegem u gubin e rran. Nangan’ rom e ra ayuwegem ni ngam dugliy boch ban’en nra felfelan’nag e Chitamangidad ni bay u tharmiy ni bod rogon fare compass ni be pow’iy be’ u nap’an ni be milekag. Ireray e bin th’abi fel’ e kanawo’ ni ngaum par ni gab t’uf rok Got.