Nguum Fol ko Nangan’ Rom

“Urngin ban’en ma mmachalbog u wan’ e piin ni yad rorad ma yad mmachalbog; machane dariy ban’en nib machalbog u wan’ e piin ni ba alit lanin’rad ma de mich Kristus u wan’rad.”​—TITUS 1:15.

1. Mang e rin’ Paul ngak e pi ulung nu Krete?

TOMREN ni mu’nag apostal Paul dalip yay e milekag ni tay ni be machib, min kol ma tomur riy min fek nga Roma, mi nin’ nga kalbus u rom ni l’agruw e duw. Mang e rin’ u nap’an ni kan pag? Tomren ni kan pag, ma ranow Titus nga Krete, ma tomur riy me yol Paul ngak ni gaar: “Gu pagem u Krete ni fan e ngam fal’eg rogon e tin ni ka bay ban’en ni ngan maruweliy, ma nge reb e binaw ma ga dugliy e piin ni ngar manged piilal ko galesiya riy.” (Titus 1:5) I rin’ Titus e re maruwel nem nib l’ag e nangan’ rok boch e girdi’ ngay.

2. Nap’an ni immoy Titus u Krete, ma mang magawon e thingari pithig?

² I weliy Paul ngak Titus murung’agen rarogon e pi piilal ko tirok Got miki weliy ni ‘pire’ e girdi’ ni kar togopuluwgad ko re thin nem kar banniged boch e girdi’ ko tin ndariy fan ni yad be weliy.’ Pi girdi’ nem e “yad be yoornag laniyan’ girdien e tabinaw i yan, ni bochan e yad be machibnag e tin nsusun e dab ra machibniged.” Thingari ‘fonownagrad’ Titus ni gubin ngiyal’. (Titus 1:10-14; 1 Timothy 4:7) Yog Paul ni ke ‘alit’ e lem rorad nge nangan’ rorad, ni be fanay e thin ni yima fanay ko mad ni ke af reb e raen ngay. (Titus 1:15) Boch e pi pumoon nem e sana kar uned nga boch e yalen rok piyu Jew, ya ‘yad ma fol ko fare yalen ni ngan maad’adnagey.’ Ngiyal’ ney ma girdi’ ni yad be lemnag nib t’uf ni ngan fol ko re motochiyel ney e darur magawonnaged laniyan’ e girdi’ u lan e ulung; machane ku rayog ni ngad filed boor ban’en u murung’agen e nangan’ ko fonow ni ke pi’ Paul ngak Titus.

Piin ni Ke Alit e Nangan’ Rorad

3. Mang e ke yoloy Paul ngak Titus u murung’agen e nangan’?

³ Mu lemnag rarogon e girdi’ ni weliy Paul ngorad murung’agen e nangan’. “Urngin ban’en ma mmachalbog u wan’ e piin ni yad rorad ma yad mmachalbog; machane dariy ban’en nib machalbog u wan’ e piin ni ba alit lanin’rad ma de mich Kristus u wan’rad ya lem rorad nge lanin’rad e ke alit. Yad be yog ni yad manang Got, machane be m’ug u pangirad ndar nanged Got.” Ba tamilang, ni boch e girdi’ ko ngiyal’ nem e ba t’uf ni ngar thilyeged e ngongol rorad nge yog ni “mich Kristus u wun’rad nib fel’ rogon.” (Titus 1:13, 15, 16) Ke mo’maw’ rorad ni ngar nanged e tin nib beech nge tin nib alit, nib muun ngay e nangan’ rorad.

4, 5. Mang magawon e bay rok boch e girdi’ u lan e ulung, ma mang e ke rin’ e re n’ey ngorad?

⁴ Boor ko ragag e duw nga m’on riy ni ke dugliy fare governing body ndaki t’uf ni ngan maad’ad ku be’ mfini mang bang ko tin riyul’ e Kristiano, ma aram e kar wereged e thin riy ko pi ulung i yan. (Acts 15:1, 2, 19-29) Machane boch e girdi’ nu Krete e ka yad be ‘fol ko yalen ni ngan maad’adnag e pumoon.’ Kar togopuluwgad ko fare governing body ma ur machibniged e “tin nsusun e dab ra machibniged.” (Titus 1:10, 11) Bochan nde puluw e lem rorad, ma sana kar daged ko ngongol rorad ni yad be fol ko pi motochiyel u murung’agen e ggan nge ngan klinnag ban’en. Sana boch i yad e kar puthuyed boch ko n’en ni be yog fare Motochiyel, ni bod rogon e n’en ni i rin’ e pi ga’ rorad u nap’an Jesus, maku ke mich u wan’rad e yat nge boch e motochiyel ni girdi’ e sunmiy.​—Mark 7:2, 3, 5, 15; 1 Timothy 4:3.

⁵ Lem ni aram rogon e kirebnag rogon ni ur dugliyed ban’en, ni aram e nangan’ rorad. Yoloy Paul ni gaar: “Dariy ban’en nib machalbog u wan’ e piin ni ba alit lanin’rad ma de mich Kristus u wan’rad.” Kari tagan e nangan’ rorad ke ni taw ko gin daki yog ni nge pow’iy rogon e ngongol nge lem rorad. Maku, kar turguyed e kireb nga daken e pi walag ko tin ra reb e Kristiano ma rogon ra dugliy. Bochan e re n’ey, ma piyu Krete e ur lemnaged nib alit e tin nib beech ban’en. (Roma 14:17; Kolose 2:16) Yugu aram rogon ni yad be yog ni yad manang Got, machane be m’ug ko ngongol rorad ndar nanged.​—Titus 1:16.

‘Urngin Ban’en Ma Mmachalbog Ngak e Piin nib Machalbog’

6. Mang l’agruw mit e girdi’ ni weliy Paul murung’agen?

⁶ Uw rogon nra fel’ rogodad ko n’en ni yoloy Paul ngak Titus? Mu guy l’agruw ban’en nib thil ko pi thin ni baaray ni gaar: “Urngin ban’en ma mmachalbog u wan’ e piin ni yad rorad ma yad mmachalbog; machane dariy ban’en nib machalbog u wan’ e piin ni ba alit lanin’rad ma de mich Kristus u wan’rad ya lem rorad nge lanin’rad e ke alit.” (Titus 1:15) Mmutrug nde yog Paul ni Kristiano nib fel’ e ngongol rok e aram e urngin ban’en ni be lemnag mab klin ma rayog ni ngan rin’. Ba mudugil ni aram rogon ya ke yog Paul u reb e babyor ni yoloy ni girdi’ ni ma un ko ngongol ni darngal, nge meybil ko liyos, nge pig e “dabiyog ni ngar manged girdien e gin nsuwon Got.” (Galatia 5:19-21) Ere ba puluw ni ngad dogned ni be weliy Paul murung’agen l’agruw mit e girdi’, ni aram e girdi’ nib fel’ e ngongol rorad mab fel’ thilrad Got nge girdi’ ni danga’.

7. Hebrews 13:4 e be yog nib kireb e mang, machane mang deer e rayog ni sum riy?

⁷ Pi n’en nib t’uf ni nge siyeg e Kristiano nib yul’yul’ e gathi kemus ni tin nib tamilang ni be yog e Bible ndabin rin’. Reb riy, e mu lemnag e re thin ney nib tamilang ni gaar: “Mabgol e urngin e girdi’ ni nge ta’ fan, ma pumoon nge ppin ni kar uned ko mabgol e thingari bagayad mi i par nib yul’yul’ ngak bagayad. Ya ra gechignag Got e pi arorad ni be ngongliy e ngongol ko darngal nge piin ni yad be par e girdi’ ni gathi mabgol rorad.” (Hebrews 13:4) Ki mada’ ko piin ni gathi Kristiano nge piin ndar nanged e thin nu Bible ma rayog ni nga rogned nre verse ney e be yog ni dabin un ko ngongol ni darngal. Re verse ney nge boch e thin nu Bible e be dag nib tamilang nib kireb ni nge par reb e pumoon ara reb e ppin nge be’ ni gathi mabgol rok. Machane uw rogon nfaanra un l’agruw ni’ ndawora mabgolgow ko oral sex ara ngan fanay l’uguney nga yu yang u dowey nib mith ni fan ko ngongol ndarngal? Boor e piin ni fel’ yangaren ni yad ma yog ndariy e kireb riy ya re n’ey e gathi par ko pumoon nge ppin. Gur rayog ni nge lemnag e Kristiano ni oral sex e ba klin?

8. Uw rogon nib thil e Kristiano ko girdi’ nu fayleng u rogon ni yad ma lemnag e oral sex?

⁸ Hebrews 13:4 nge 1 Korinth 6:9 e be tamilangnag ndabun Got e ngongol ndarngal (Greek, e por·neiʹa). Mang e ba muun ko re ney? Re thin nu Greek ney e ba muun ngay ni ngan fanay e yungi n’en nib mith u dowey nrogon nib yalen nge rogon nde yalen u reb e kanawo’ nib kireb. Ba muun ngay e par ko pumoon nge ppin nde yalen ma de puluw ko mabgol nrogon ni be yog e Bible. Ere kub muun ngay e oral sex, nyugu aram rogon ni boor e fel’ yangaren u fayleng iyan ni ka nog ngorad ara ka rogned nde kireb e oral sex. Tin riyul’ e Kristiano e darur paged e ‘piin ni ma yog e thin ndariy fan, nge piin ni ma bannag laniyan’ be’’ ni ngar gagiyegnaged e lem rorad. (Titus 1:10) Yad ma fol ko motochiyel u Bible. Darur rogned nib fel’ e oral sex, ya yad manang ni Bible e be dag ni kub mit e ngongol ndarngal e re n’ey, ara por·neiʹa, ma yad ma skulnag e nangan’ rorad ni ngar paloggad riy.a​—Acts 21:25; 1 Korinth 6:18; Efesus 5:3.

Nangan’ nib Thilthil, e Ma Dugliy Ban’en nib Thilthil

9. Faanra “urngin ban’en ma mmachalbog,” ma mang e ba milfan ko nangan’ rodad?

⁹ Machane mang e be yip’ Paul fan u nap’an ni yog ni “urngin ban’en ma mmachalbog u wan’ e piin ni yad rorad ma yad mmachalbog”? I weliy Paul murung’agen e Kristiano ni kar puluwniged e lem rorad ko motochiyel rok Got, ni bay ko Thin rok ni ke thagthagnag. Manang e pi Kristiano nem ni boor ban’en ni gathi rib tamilang rogon ni be weliy e Bible murung’agen, ma rayog ni nge thilthil rogon e lem ko Kristiano riy. Yad ma sap ngay nib ‘klin’ e tin de yog Got nib kireb. Darur lemnaged ni nge taareb rogon e lem rok urngin e walag u murung’agen boch ban’en ni gathi ri be tamilangnag e Bible murung’agen. Ngad guyed boch ban’en ni be dag ni aram rogon.

10. Uw rogon nrayog ni nge sum e magawon u nap’an e m’agpa’ (ara nap’an ni ke yim’ be’)?

¹⁰ Boor e tabinaw ni kemus ni taa bagayow ko fa gali mabgol e ke mang Kristiano ma bagayow e danga’. (1 Peter 3:1; 4:3) Rayog ni nge sum boch e magawon riy, ni bod nfaanra bay e madnom ko m’agpa’ ara kem’ be’ u tabinaw. Mu lemnag e n’en ni buch rok reb i leengiy ni Kristiano ni pumoon rok e ba thil e teliw rok. Bay reb e girdi’ rok nra un ko mabgol, ma yira ta’ e m’agpa’ rok u lan tafen e muulung ko teliw ni googsur. (Ara ke yim’ reb e girdi’ rok nsana bagayow e gallabthir rok, ma yira ta’ e yam’ u lan tafen e muulung ko yugu reb e teliw.) Kan piningrow ni ngar unew ma baadag fare pumoon ni nge un leengin ngak. Mang e be yog e nangan’ rok ngak? Mang e ra rin’? Mu lemnag l’agruw ban’en ni baaray nrayog ni nge rin’.

11. Mu weliy rogon nra lemnag reb i leengiy ni Kristiano ko ra un nga reb e madnom ko m’agpa’ fa danga’, ma mang e ra buch?

¹¹ Ke fal’eg Lois i lemnag e motochiyel u Bible ni gaar, ‘Mu chuwgad rok fare Babylon nib Gilbuguwan,’ ni aram e pi yurba’ i teliw ngoogsur. (Revelation 18:2, 4) Kakrom e i un ko re raba’ i teliw nem ni yira tay e m’agpa’ ko galesiya rorad ma manang ni urngin e girdi’ nra moy u rom e yira yog ngorad ni ngar uned nga boch ban’en ni yima rin’ riy, ni bod e meybil, tang, ara ku boch ban’en. Kari mudugil u wan’ nri dabi un ngay ma dabun ni nge yan ngaram ngan towasariy nge rin’ ban’en nra kirebnag e michan’ rok. Be tay Lois fan e pumoon rok ma baadag ni nge fol rok, ya ir lolugen nrogon ni yog e Bible; machane, dabun ni nge darifannag e Thin nu Bible ni ke fil. (Acts 5:29) Ere, ke weliy nib fel’ rogon ko ani mabgol rok nfaanra ke dugliy ni nge un ngaram, ma ir e dabiyog. Rayog ni nge weliy ngak nfaanra yan ngaram ma dabi un ko pi n’en ni yira rin’ u rom, ma rayog ni nge tamra’nag e pumoon rok, ere arfan ni kab fel’ ndabi un. N’en ni ke dugliy e ra ayuweg ni nge par nib klin e nangan’ rok.

12. Mang e rayog ni lemnag me rin’ be’ ni kan pining ni nge un ko m’agpa’ u lan tafen e muulung ko teliw ni googsur?

¹² Ruth e ki yib e magawon ngak ni aram rogon. Be tay fan e pumoon rok, ma ke dugliy ni nge par nib yul’yul’ ku Got, ma ma fol ko nangan’ rok. Tomren ni ke fal’eg i lemnag Ruth boch ban’en ni taareb rogon ko n’en ni lemnag Lois, me beeg fare “Question From Readers” (Deer ko Piin Ma Beeg) ko fare The Watchtower ni May 15, 2002. Ke yib ngan’ ni fa dalip i pagel ni Hebrew e kar folgad ko motochiyel ni nga ranod ko gin ni yira meybil ko liyos riy, machane kar pared nib yul’yul’ ndar uned ko meybil ko liyos. (Daniel 3:15-18) Ke dugliy ni nge un ko pumoon rok machane dabi un ko tin ni yira rin’ u rom ni bay rogon ko teliw ni googsur, ma aram e be fol ko nangan’ rok. Me weliy nib fel’ rogon ngak e pumoon rok e n’en nra pag e nangan’ rok ni nge rin’ nge n’en ndabiyog. Be athapeg Ruth nra guy e pumoon rok e thil u thilin e bin riyul’ e liyor nge bin de riyul’.​—Acts 24:16.

13. Mang fan nde t’uf ni nge magawon laniyan’ be’ nbochan e ba thilthil e n’en ni ke dugliy l’agruw e Kristiano?

¹³ Bochan nib thil e n’en nra dugliy l’agruw e Kristiano ma aram e be dag nyugu demtrug e n’en nrayog ni nge rin’ be’ ara ba’ bagayow e gali Kristiano nem nib meewar e nangan’ rok, fa? Danga’. Bochan ni manang Lois e mit i musik nge pi n’en ni yima rin’ ko raba’ e teliw nem, ma aram e lemnag nra un ngay ma bay e riya’ riy ngak. Ma pi n’en ni yow ma rin’ e pumoon rok kakrom u taabang ni bay rogon ko teliw e rayog ni nge rin’ ban’en ko nangan’ rok. Ere ke mich u wan’ nib fel’ ngak e n’en ni ke dugliy.

14. Mang e thingari lemnag e Kristiano u murung’agen boch ban’en nra be’ ma ir rok e nge dugliy?

¹⁴ Machane ba kireb e n’en ni ke dugliy Ruth, fa? Dariy mat’awun be’ ni nge turguy ni aram rogon. Thingar dabra turguyed e kireb nga daken ara ra gathibthibniged ya ke mel’eg ni nge yan ko re madnom nem machane de un ko pi n’en ni kan rin’ u rom. Mu lemnag fare fonow ni pi’ Paul u murung’agen ba mit e ggan nra be’ ma ir rok e nge dugliy ko ra kay fa danga’ ni gaar: “En ndemtrug e n’en nra kay e dabi darifannag e en nder yog ni nge rin’ ni bod ir . . . Ya Masta rok e ir e bayi turguy ko yog rok fa de yog rok e tin ni nge rin’. Ma mmudugil nrayog rok, yi Somol e rayog rok ni nge ayuweg faanem nge yog rok e tin ni nge rin’.” (Roma 14:3, 4) Ba mudugil ndariy reb e Kristiano ni baadag ni nge yog ngak be’ ni nge darifannag e n’en ni be yog e nangan’ rok nib fel’, ya ra rin’ ban’en ni aram rogon ma bod ni be darifannag ba lam nra pi’ e thin nra ayuweg e yafas.

15. Mang fan nthingar ni lemnag e nangan’ nge lem rok boch e girdi’?

¹⁵ Ma ban’en ni kub l’ag ngay, e gali Kristiano nem e thingar ra lemnagew ban’en ni kub chagil ngay, ni aram e nangan’ rok boch e girdi’. I fonownagdad Paul ni gaar: “Ngam turguyed ni nge dab kum rin’ed ban’en nra waliy be’ ni walagmed nge tun ay ara mul nga fithik’ e denen.” (Roma 14:13) Sana manang Lois ni faanra yan ko re madnom nem ma rayog ni nge magawonnag laniyan’ girdien e ulung ara tabinaw rok, ma n’en ni ke rin’ e ba’ ban’en nib ga’ fan nra rin’ ngak e bitir rok. Machane, Ruth e sana manang nra yan ko re madnom nem ndabi un ko n’en ni yira rin’ riy ma dabi magawonnag laniyan’ girdien e ulung nge girdi’ u lan binaw. Gali ppin nem nge gadad ni gubin e thingar da naabgad ni nangan’ ni kan skulnag nib fel’ rogon e ri manang e n’en nra magawonnag laniyan’ e girdi’. I gaar Jesus: “Kab fel’ ni yira they’ gafan ba malang ni ba ga’ nga belel’ugun be’ nga nin’ nga rigur nge limoch, ko bin ni nge waliy reb e pi bitir ney ni kug mich u wan’ nge pi’ keru’ ngog.” (Matthew 18:6) Faanra dabi lemnag be’ ban’en nrayog ni nge magawonnag e nangan’ ko girdi’, ma rayog ni nge kireb e nangan’ rok, ni bod e n’en ni buch ko pi Kristiano nu Krete.

16. Mang e pi n’en nrayog ni nge thil e lem rok e Kristiano riy u tomren nra yan boch e tayim?

¹⁶ Thingari fel’ i yan e tha’ u thilin reb e Kristiano nge Got, nge rogon ni ma motoyil ko n’en ni be yog e nangan’ rok. Ngad lemnaged Mark, ni be’ ni ka fini un ko taufe. Nangan’ rok e be yog ngak ni nge siyeg e ngongol nde puluw ko Bible ni pi n’en ni i rin’ kafram, nsana bay rogon ko liyos ara racha’. (Acts 21:25) Riyul’ riy, e chiney e ri ma siyeg i rin’ e tin ni gathi rib tamilang ko dabun Got fa danga’. Machane, ke balyangan’ nga fan ni boch e girdi’ e kar dabuyed e pi n’en nib fel’ u wan’, ni bod rogon boch e program ko television.

17. Mu dag rogon ni tayim nge ngan mon’og ko tirok Got e rayog ni nge rin’ ban’en ko nangan’ rok e Kristiano nge rogon ni ma mel’eg ban’en.

¹⁷ Munmun, ma ke mon’og Mark me ke chugur e tha’ u thilrow Got. (Kolose 1:9, 10) Mang angin? Nangan’ rok e kan skulnag nib fel’ rogon. Chiney e ke adag Mark ni nge motoyil ko nangan’ rok maku ma fal’eg i lemnag kenggin e pi motochiyel ko Bible. Riyul’ riy, e ke naab ngay ni boch ban’en ni i siyeg ni “gathi rib tamilang” ko ba kireb fa danga’ e gathi ban’en nib togopuluw ko lem rok Got. Maku, bochan ke adag Mark ni nge fol u kenggin e pi motochiyel u Bible nge nangan’ rok ni kan skulnag nib fel’ rogon, ma chiney e ma siyeg boch e program u T.V. nib fel’ u wan’ kafram. Arrogon, ke mon’og rogon ni ma maruwel e nangan’ rok.​—Psalm 37:31.

18. Mang boch ban’en nrayog ni nge k’aring e felfelan’ ngodad?

¹⁸ Oren e ulung, e ba thilthil rogon e mon’og ni be tay e girdi’ riy ko tirok Got. Boch i yad e kafin ra uned ko tin riyul’. Sana nangan’ rorad e de tamilang u boch ban’en, ma boch ban’en e ba tamilang riy. Pi cha’ nem e ba t’uf rorad e tayim nge ayuw ni ngar adaged ni ngar folgad ko thin rok Jehovah nge nangan’ rorad ni kan skulnag nib fel’ rogon. (Efesus 4:14, 15) Maku, lan e re ulung nem, e bay boor e girdi’ riy ni bay e tamilangan’ nib toar rorad, ma kar salapgad u rogon ni ngaur folgad u kenggin e pi motochiyel nu Bible nge nangan’ rorad nib puluw ko lem rok Got. Rib gel e felfelan’ riy ni ngad chaggad ngak e piin nib “machalbog” ni ma guy nib “machalbog” e tin nib fel’ u wan’ Somol! (Efesus 5:10) Yibe athapeg ni gadad gubin ma ngad nameged ni nge mon’og e nangan’ rodad nge puluw ko tamilangan’ ko thin riyul’ nge yul’yul’ ku Got.​—Titus 1:1.

[Footnote]

Uw Rogon ni Ga Ra Fulweg?

• Mang fan ni ke kireb e nangan’ rok boch e Kristiano u Krete?

• Uw rogon ma l’agruw e Kristiano ni bay e nangan’ rorow ni kan skulnag nib fel’ rogon e rayog ni nge thil rogon ni yow ra dugliy ban’en?

• Ra yan boch e tayim, ma mang e ra buch ko nangan’ rodad?

[Picture on page 28]

L’agruw e Kristiano ni yow ra mada’nag taab magawon e rayog nib thil e n’en ni yow ra dugliy