Tin Som’mon E Kristiano Nge Fare Motochiyel Rok Moses

“Fare Motochiyel e ir e ke mang matanag ngodad nge yan i mada’ ko ngiyal’ ni yib Kristus riy.”​—GALATIA 3:24, NW.

1, 2. Mang angin ni keb ngak piyu Israel ni ur folgad ko Motochiyel rok Moses nib fel’ rogon?

ULAN e duw ni 1513 B.C.E., me pi’ Jehovah boch e motochiyel ngak piyu Israel. Me yog ngak e girdi’ ni faan yad ra fol ko thin rok, ma ra flaabnagrad ma ra yog ngorad e yafas nib falfalan’.​—Exodus 19:5, 6.

² Pi Motochiyel nem, ni ka nog e Motochiyel rok Moses ngay, ara ke mus ni “fare Motochiyel,” e “ba thothup ma ba mat’aw ma ba fel’.” (Roma 7:12) I m’onognag e pi felngin nrib fel’ ni bod e gol, nge yul’yul’, nge gafarig nib fel’, nge t’ufeg ko piin buguliy yoror. (Exodus 23:4, 5; Leviticus 19:14; Deuteronomy 15:13-15; 22:10, 22) Fare Motochiyel e ku ke pug laniyan’ piyu Jew ni ra bagayad me t’uf rok bagayad. (Leviticus 19:18) Maku, ka nog ngorad ni dabra chaggad ngak e girdi’ ni gathi yad piyu Israel ara ra feked e ppin riy, ngar laayed ni piin dar moyed u tan fare Motochiyel. (Deuteronomy 7:3, 4) Bod rogon reb e “yoror” ni bay u thilin piyu Jew nge piin gathi yad piyu Jew, ma fare Motochiyel rok Moses e ke ayuweg e girdi’ rok ni dabi af ngorad e lem nge ngongol ko piin gathi yad piyu Jew.​—Efesus 2:14, 15; John 18:28.

3. Bochan dariy be’ nrayog rok ni nge fol ko fare Motochiyel ni polo’, ma mang angin ni ke yib?

³ Machane, mus ko piyu Jew ni ri ma athamgil ni ngar folgad ko Motochiyel rok Got maku der yog ni ngar folgad riy ni polo’. Kaygi pag rogon e n’en ni baadag Jehovah ni ngara rin’ed? Danga’. Reb i fan ni kan pi’ fare Motochiyel ngak piyu Israel e nge “gagiyel e ngongol nib kireb.” (Galatia 3:19, NW) Fare Motochiyel e i ayuweg piyu Jew nib yul’yul’ ni ngar naabgad ngay nrib t’uf be’ ni Ma Biyuliyey. Nap’an ni i taw e en Ma Biyuliyey, ma piyu Jew nib yul’yul’ e kar felfelan’gad. Ke chuchugur ni ngan chuwegrad ko buch waathan ni bay u tan gelngin e denen nge yam’!​—John 1:29.

4. Uw rogon ma fare Motochiyel e bod ba “matanag ni be pow’iyey nge yan i mada’ ko ngiyal’ ni yib Kristus riy”?

⁴ Fare Motochiyel ni kan pi’ u daken Moses e kan ngongliy ni nge par ni bay n’umngin nap’an. Nap’an ni yol Paul ni apostal ngak pi walagen ni Kristiano, me weliy murung’agen fare Motochiyel ni bod ba “matanag nge yan i mada’ ko ngiyal’ ni yib Kristus riy.” (Galatia 3:24) Ani matanag ara tutor kakrom e yad ma un ko pi bitir nga ranod nga skul mar sulod nga tabinaw. Baga’ ni gathi ir e ma fil ban’en ngak e pi bitir; ya maruwel rok e kemus ni ma pow’iyrad nga ranod ngak e sensey rorad. Maku aram rogon fare Motochiyel rok Moses ni i pow’iy piyu Jew ni bay madgun Got u wan’rad nge yan i mada’ ko ngiyal’ ni yib Kristus riy. I micheg Jesus ngak pi gachalpen ni gubin ngiyal’ ma bay rorad “nge yan i mada’ nga tomren e fayleng.” (Matthew 28:20) Ere, nap’an ni kan sunmiy fare ulung ko Kristiano, ma fare “matanag”​—ni aram fare Motochiyel—​e dakuriy ban’en ni nge rin’. (Roma 10:4; Galatia 3:25) Machane boch e Kristiano ni piyu Jew e yad ba sasagaal ni ngar nanged fan e re thin riyul’ ney nib ga’ fan. Ma angin, e ka yad be rin’ boch yang ko fare Motochiyel ni mus nga tomren ni kan faseg Jesus ko yam’. Ma, boch i yad, e ka ra puluwnaged e lem rorad. Bochan e n’en ni ka ra rin’ed, e kar daged ban’en nib fel’ ni ngad folgad riy e ngiyal’ ney. Ngad guyed ko uw rogon.

N’en nib Biech ko Machib ko Kristiano ni Ma Pug Lanin’uy

5. Mang e thin ni ka nog ngak Peter u nap’an ni ke pig e changar rok, ma mang fan ni kari gin ngay?

⁵ U lan e duw ni 36 C.E., me Peter ni apostal ni Kristiano e ke pig e changar rok e ke guy ban’en ni yira ngat ngay. Ngiyal’ nem meb reb e lam u tharmiy ni be tay chilen ngak ni nge li’ boch e arche’ nge gamanman nge longuy ni aram e gamanman nib alit nrogon ni yog fare Motochiyel. Kari gin Peter ngay! Dawori “longuy ban’en nib alit ara de biech.” Machane fare lam e yog ngak ni gaar: “Dariy ban’en ni ngam lemnag nde biech ni faanra ke yog Got ni ke biech.” (Acts 10:9-15) Daki gelnag Peter laniyan’ me fol ko fare Motochiyel, ya ke puluwnag e lem rok ngay. Me aw ni kari tamilang u wan’ murung’agen e tin nib m’agan’ Got ngay.

6, 7. Mang e ke ayuweg Peter ni nge nang ni chiney e rayog ni nge machibnag e piin ni gathi yad piyu Israel, ma mang e n’en ni ku sana ke nang murung’agen?

⁶ Ireray e n’en ni buch. Dalip e pumoon e ranod nga naun rok Peter ngar wenignaged ngak ni nge un ngorad nga ranod nga tafen be’ ni gathi be’ nu Israel ni dawor ni maadadnag ni bay madgun Got u wan’ ni Kornelius fithingan. I pining Peter e pi cha’ nem nga naun rok ngar sabethingad. Bochan ni ke nang Peter fan e n’en ni ke guy u nap’an ni kan pingeg e changar rok, ma bin migid e rran me un ngorad karanod nga naun rok Kornelius. Mu rom e kari machibnag Peter riy murung’agen Jesus Kristus. Ma ngiyal’ nem, me weliy Peter ni gaar: “Ka fin gu nang e chiney nriyul’ ni gubin e girdi’ ma taareb rogorad u wan’ Got. En ni ba’ madgun Got u wan’ ma be rin’ e tin nib mat’aw e ra i par nib fel’ u wan’ Got ndemtrug ko be’ u kun nam.” Gathi ke mus ni Kornelius ya kub muun ngay e pi girdi’ rok nge pi tafager rok ni ke mich Jesus u wan’rad, me “yib fare kan ni thothup nga daken urngin e piin be motoyil ko fapi thin.” Peter e ke nang ni pa’ Jehovah e be ayuwegrad, me “yog ni ngan taufenagrad nga fithingan Jesus Kristus.”​—Acts 10:17-48.

⁷ Mang e ke k’aring Peter ni nge yog ni piin gathi yad piyu Israel ni dar moyed u tan fare Motochiyel e ku rayog ni ngar manged pi gachalpen Jesus Kristus e chiney? Immoy e tamilangan’ rok ko tirok Got ban’en. Bochan ni ke dag Got ni ke fel’ u wan’ e piin gathi yad piyu Israel ni dan maadadnagrad, me puog e kan ni thothup rok nga dakenrad, me tamilangan’ Peter nrayog ni ngan taufenagrad. Ma re ngiyal’ nem, me riyul’ u wan’ Peter nde lemnag Got ni piin gathi yad piyu Israel ni Kristiano e ngar folgad ko Motochiyel rok Moses mfin aram e rayog ni ngar uned ko taufe. Faanra um moy ko ngiyal’ nem, ma ra m’agan’um ngay ni ngam taarebnag e lem rom ko n’en ni rin’ Peter?

Boch i Yad e Ka Yad Ma Fol ko fare “Matanag”

8. Mang lem u murung’agen fare motochiyel ni ngan maadadnag e pumoon nib thil ko lem rok Peter ni ke mon’ognag boch e Kristiano ni ma par u Jerusalem, ma mang fan?

⁸ Tomren ni ke chuw Peter u naun rok Kornelius, me yan nga Jerusalem. Thin ni kan wereg ni murung’agen e piin gathi yad piyu Israel ni dan maadadnagrad ni “ke fel’ e thin rok Got u wan’rad” e ke taw ko ulung u rom, ma boch u fithik’ pi gachalpen ni piyu Jew e ke kireban’rad nbochan e re n’em. (Acts 11:1-3) Yugu aram rogon ni ke fel’ u wan’rad ni piin gathi yad piyu Israel e rayog ni ngar manged gachalpen Jesus, ma “piin ma lemnag nib t’uf ni ngan maadadnag e pumoon” e ka rogned ni piin ni gathi yad piyu Israel e thingara folgad ko fare Motochiyel ma rayog nra thapgad ngak Got. Machane, u lan fapi binaw ni ka boor e piin ni gathi yad piyu Israel ni ma par riy, e ke mus ni buchuw e Kristiano ni piyu Jew riy, e dan maluagthin ko ba t’uf ni ngan maadadnag e pumoon fa danga’. Ma gali lem rorad nem ni yow ba togopuluw e ke ulul i yan ni sogonap’an 13 e duw. (1 Korinth 1:10) Reb e skeng ko yul’yul’ eram nrib gel ni fan ko piin Kristiano kakrom​—ni baga’ ni piin ni gathi yad piyu Israel ni bay ko binaw ni baga’ ni piyu Jew e ma par riy!

9. Mang fan nib ga’fan ni ngan pithig fare magawon u murung’agen fare motochiyel ni ngan maadadnag e pumoon?

⁹ Ma tomur riy e kari gel fare magawon ko duw ni 49 C.E. u nap’an ni piin Kristiano u Jerusalem e ka ranod nga Syrian Antioch, ni aram e binaw ni be machib Paul riy. Kar tababgad i machib ni piin gathi yad piyu Jew ni kar manged Kristiano e thingar ni maadadnagrad nrogon ni be yog fare Motochiyel. Ma rib gel e maluagthin ni ke sum u fithik’rad nge Paul nge Barnabas! Faanra dabni pithig fare magawon, ma boch e Kristiano, ndemtrug ko yad piyu Jew ara piin ni gathi yad piyu Jew e mmutrug ni ra war e michan’ rorad. Arfan, ni kan yarmiy ni Paul nge yugu boch e girdi’ e nga ranod nga Jerusalem nga rogned ngak e pi Kristiano ni yad bang ko fare governing body ni ngar pithiged fare magawon taab yay nge ma’.​—Acts 15:1, 2, 24.

Karogned e Lem Rorad nib Thil Thil u Fithik’ e Yul’yul’​—Me, Yani Taareban’rad!

10. Mang boch ban’en ni nge tiyan’ fare governing body ngay u m’on ni ngar dugliyed ban’en u murung’agen rarogon e piin gathi yad piyu Israel?

¹⁰ Nap’an e re muulung nem, ma boch i yad e kar weliyed nib fel’ ni ngan maadadnag e pumoon, ma boch i yad e kar togopuluwgad ngay. Machane de gel e lem nib gel yuwan ko re rran nem. Tomren ni kar maluagthingad, ma gali apostal ni Peter nge Paul e kar weliyew e pow ni ke rin’ Jehovah ngak e piin ni ke michan’rad ni dan maadadnagrad. Kar weliyew ni ke puog Got e kan ni thothup nga daken e piin ni gathi yad piyu Jew ni dan maadadnagrad. Bod ni kar fithed e deer ni, ‘Fare ulung ko Kristiano e ba mat’aw ni nge n’ag e piin ni kar fel’gad u wan’ Got?’ Me ere James ni gachalpen e ke bieg reb e thin nu Bible ni ke ayuweg urngin e girdi’ ni kar uned ko re muulung nem ngar nanged fan e tin nib m’agan’ Jehovah ngay ko re magawon nem.​—Acts 15:4-17.

11. Mang e n’en ni de un ngay ko ngiyal’ ni ngan dugliy ban’en nib l’ag ko ngan maadadnag e pumoon, ma mang e be dag ni ke flaabnag Jehovah fare n’en ni kan dugliy?

¹¹ Chiney e ke urngin e girdi’ ma kar sapgad ko fare governing body. Gur bochan e piin ni piyu Jew ni kuura folgad ko fare Motochiyel ni kakrom e bay ra dugliyed ban’en ni fan e nge gel fare motochiyel ni ngan maadad ko pumoon fa? Danga’. Picha’ nem ni yad ba yul’yul’ e ke mudugil lanin’rad ni ngar folgad ko Thin nu Bible nge rogon ni be pow’iyrad e kan ni thothup rok Got. Tomren ni kar rung’aged urngin ban’en ni kan weliy nib l’ag ngay, ma urngin e girdi’ ni yad bang ko fare governing body e ke taareban’rad kar dugliyed ni de t’uf ni ngan maadadnag e pumoon ni Kristiano ni gathi yad piyu Israel ma ku de t’uf ni ngar pared u tan fare Motochiyel rok Moses. Nap’an ni ke rung’ag a pi walag murung’agen e n’en ni kan dugliy, ma kar felfelan’gad, ma “yad be yoor i yan ni gubin e rran.” Pi Kristiano nem ni kar folgad u rogon ni be pow’iyrad Got e kan taw’athnagrad ma kan pi’ ngorad reb e fulweg nrib fel’ mab puluw ko thin nu Bible. (Acts 15:19-23, 28, 29; 16:1-5) Yugu aram rogon, ma ka bay reb e deer nib ga’fan ni ngan fulweg.

Ma Uwrogon Piyu Jew ni Kristiano?

12. Mang deer e dawor ni pirieg e fulweg riy?

¹² Fare governing body e ka ra weliyed nib tamilang ni piin Kristiano ni gathi yad piyu Jew e de t’uf ni ngan maadadnagrad. Machane uw rogon e pi Kristiano ni piyu Jew? N’en ni ke dugliy fare governing body e de un e re deer ney ngay.

13. Mang fan nde puluw ni ngan weliy nib t’uf ni ngan fol ko fare Motochiyel rok Moses ni fan ni ngan thap ngak Got?

¹³ Boch e Kristiano ni piyu Jew ni yad “ba elmirin ko fare Motochiyel” e kar ululgad ngay yad be maadadnag pi fakrad ma kar folgad u yu yang ko fare Motochiyel. (Acts 21:20, NW) Boch i yad e rib gel e n’en ni ka ra rin’ed ngay, ya ka rogned nib t’uf rok e piin Kristiano ni piyu Jew ni ngar folgad ko fare Motochiyel mar thapgad ngak Got. Rib gel e oloboch rorad u roy. Ni bod ni, uw rogon ni nge pi’ e Kristiano e maligach ni gamanman ni nge n’agfan denen? Dabkiyog ni ngan fanay e pi maligach nem nbochan e maligach ni pi’ Kristus. Ma uw rogon fare n’en ni bang ko fare Motochiyel ni yog ni piyu Jew e dab ra chaggad ngak e piin gathi yad piyu Jew? Rib mo’maw ko urngin e tamachib ni Kristiano nib pasig ni ngar folgad ko pi motochiyel nem ma ku ngar lebguyed fare maruwel ni ngan fil ngak e piin gathi yad piyu Jew urngin ban’en ni ke fil Jesus ngorad. (Matthew 28:19, 20; Acts 1:8; 10:28)a Dariy e mich riy ni kan tamilangnag e re n’en ney u reb e muulung ni i tay fare governing body. Machane, dan pag fare ulung ni dan ayuweg.

14. Mang ayuw u murung’agen fare Motochiyel ni i pi’ fare babyor rok Paul ni kan thagthagnag?

¹⁴ Ke yib e n’en ni nge pow’iyrad, ni gathi babyor ni pi’ fare governing body, machane boch e babyor ni kan thagthagnag ni fapi apostal e kar yoloyed. Ni bod ni, Paul ni apostal e ke pi’ reb e babyor nib gel e thin riy ngak piyu Jew nge piin ni gathi yad piyu Jew ni ma par u Rome. U lan e re babyor nem, e weliy ni cha’ nriyul’ ni ir be’ u Israel e “cha’ ni ir be’ u Israel u fithik’ laniyan’, e kan maadadnag laniyan’ u daken e kan ni thothup.” (Roma 2:28, 29) Ma u lan e re gi babyor nem, me weliy Paul reb e fanathin ni be dag ni piin Kristiano e dabkuura pared u tan fare Motochiyel. I weliy ni reb e ppin e dabiyog ni nge un ko mabgol nge leay l’agruw e pumoon taab yay. Machane faanra ke yim’ e pumoon rok, ma ke puf rogon ni nge un ko mabgol biyay. Me weliy Paul fan fare fanathin, me dag ni Kristiano ni kan dugliyrad e dabiyog ni ngar pared u tan fare Motochiyel rok Moses ma ku yad be par ni Jesus e masta rorad. Thingara “m’ad rok e Motochiyel” ma aram rayog ni ngar manged bangi downgin Kristus.​—Roma 7:1-5.

Ba Sasagaal ni Ngar Nanged Fan

15, 16. Mang fan ni boch e Kristiano ni piyu Jew e de yog rorad ni ngar nanged fan murung’agen fare Motochiyel, ma mang e be dag riy ko uw feni ga’fan ni ngan par nib od ko tirok Got?

¹⁵ Rogon ni weliy Paul murung’agen fare Motochiyel e dabiyog ni ngan warnag. Ere, uw rogon ma boch e Kristiano ni piyu Jew e dar nanged fan? Reb i fan, e gathi rib tamilang ban’en u wan’rad. Ni bod ni, kar dabuyed ni ngar filed ngar ked e ggan nib spiritual nib toar fan. (Hebrews 5:11-14) Maku darur uned ko muulung ko Kristiano u gubin ngiyal’. (Hebrews 10:23-25) Maku reb i fan ni boch i yad e de yog rorad ni ngar nanged murung’agen e bochan rarogon fare Motochiyel. Baga’ ni ma weliy murung’agen ban’en ni rayog ni ngan guy ma rayog ni ngan thamiy ma rayog ni ngan math ngay, ni bod e tempel nge n’en ni bay rogon ko piin prist. Piin ni yad ba war ko tirok Got e kab mom ngorad ni ngar folgad ko fare Motochiyel ko bin ni ngar folgad ko kenggin e motochiyel ni bay rogon ko Kristiano, ni baga’ nib l’ag ko pi n’en nib riyul’ ni danir guy nga owchey.​—2 Korinth 4:18.

¹⁶ Maku reb i fan ni boch e piin ni ma yog ni yad e Kristino e yad baadag ni ngar folgad ko fare Motochiyel ni aram e n’en ni ke weliy Paul u babyor rok ni ke pi’ ngak piyu Galatia. I yog ni pi cha’ nem e yad baadag ni ngar uned ko teliw nib fel’ u wan’ boor e girdi’ ya yad baadag ni nge tay e girdi’ farad. Ba m’agan’rad ni ngar paged e tin riyul ni fan ni ngar manged bang ko girdi’ ni yoor ko bin ni yira nang ni yad e Kristiano. Ka yad baadag ni ngar fel’gad u wan’ e girdi’ ko bin ni ngar fel’gad u wan’ Got.​—Galatia 6:12.

17. Wuin e fini puluw rogon fare lem nib l’ag nga rogon ni ngan fol ko fare Motochiyel e aw ni kari tamilang?

¹⁷ Piin Kristiano nib gonop ni ur filed nib fel’ rogon e babyor ni yoloy Paul ni Got e ke thagthagnag e ke tamilang u wan’rad murung’agen fare Motochiyel. Machane, de tamilang nge ni taw ko duw ni 70 C.E. fini tamilang fan fare Motochiyel rok Moses u wan’ urngin e Kristiano ni piyu Jew. Aram e n’en ni buch u nap’an ni ke pag Got ni ngan gothey Jerusalem, nge tempel, nge boch e babyor ni bay rogon ko piin prist. Bochan e re n’em ma ke mo’maw’ rok urngin e girdi’ ni nge fol u urngin yang ko fare Motochiyel.

Ngan Fol ko Tin nib Ga’fan Riy e Ngiyal’ Ney

18, 19. (a) Mang e pi lem ni ngad faned ma mang e pi lem e ngad pilo’gad riy ni fan ni ngad pared ni gadad ba gel ko tirok Got? (b) Mang e n’en ni ke rin’ Paul ni ke fil ngodad rogon ni nga uda leked e fonow ko piin ma ayuweg e ulung? (Mu guy fare kahol ko page 16.)

¹⁸ Tomren ni kam fil e pi n’en ney ni buch kakrom, ma sana ga ra lemnag e chiney ni: ‘Faanra ug moy ko ngiyal’ nem, ma mang e nggu rin’ u nap’an ni kebi m’ug e tin nib m’agan’ Got ngay ni buchuw ma buchuw? Gu ra par ni nggu fol ko yalen ni yima rin’? Ara nggu par ni gub guman’ nge yan i mada’ ko ngiyal’ ni kari tamilang fan fare Motochiyel? Ma nap’an ni ke taw ko ngiyal’ ni kari tamilang fan fare Motochiyel u wan’ e girdi’, ma nggu taarebnag e lem rog ngay nggu fol riy u polo’ i gum’irchaeg fa?’

¹⁹ Riyul’, ni dabiyog ni ngad nanged ko mang e gad ra rin’ nfaanra ud moyed ko ngiyal’ nem. Machane rayog ni ngad fithed gadad ni nge lungudad: ‘Mang e nggu rin’ nfaanra kan tamilangnag fan reb e thin nu Bible e ngiyal’ ney? (Matthew 24:45) Nap’an ni kan pi’ boch e thin nib l’ag ko Thin nu Bible, ma gu ma guy rogon ni nggu fol riy, ni gathi kemus ni gu be fol ko thin ni bay riy ya gu be fol ko kenggin i fan? (1 Korinth 14:20) Gu ma sonnag Jehovah u fithik’ e gum’an’ ko ngiyal’ ni ke sagaal ni ngeb e fulweg u boch e deer?’ Rib fel’ ni ngarda ked e ggan nib spiritual ni bay rodad ko ngiyal’ ney, ma aram e “dabda man’gad riy nga orel.” (Hebrews 2:1) Nap’an nra pow’iydad Jehovah u daken e Thin Rok, nge kan ni thothup, nge ulung rok u fayleng, ma ngad motoyilgad ngay nib fel’rogon. Faanra ngad yodoromgad, ma ra taw’athnagdad Jehovah nge yog ngodad e yafas ndariy n’umngin nap’an ni ba felfelan’ ma ba gaman e urngin riy.

[Footnote]

Uw Rogon ni Ngam Pi’ e Fulweg?

• Uw rogon ma fare Motochiyel rok Moses e bod ba “matanag ni be pow’iyey nge yan i mada’ ko ngiyal’ ni yib Kristus riy”?

• Uw rogon ni ngam weliy murung’agen e n’en nib thil riy u thilin Peter nge “piin ri ma fol ko fare motochiyel ni ngan maadad ngak e pumoon” ko n’en ni ka ra rin’ew nbochan e thin riyul’ ni kan puluwnag?

• Mang e kam fil u murung’agen fare kanawo’ ni ma dag Jehovah e tin riyul’ riy e ngiyal’ ney?

[Box/Picture on page 16]

I Mada’nag Paul Reb e Skeng u fithik’ e Sobut’an’

Tomren e milekag ni tay Paul ni be machib ni keb angin, me taw nga Jerusalem ko 56 C.E. Mu rom e bay e skeng riy ni keb ngak. Kan wereg e thin ni ke machibnag ngak e girdi’ ni fare Motochiyel e kan chuweg me taw ko ulung u rom e re n’en ney. Piin ni piilal e kar rusgad ni piyu Jew ni kefin ra manged Kristiano e ra war e michan’ rorad nbochan e thin rok Paul nib gel u murung’agen fare Motochiyel ma rayog ni ngar lemnaged ni piin Kristiano e dar ma ta’fan e yaram rok Jehovah. U lan e ulung, ma immoy aningeg e Kristiano ni piyu Jew ni kar micheged ban’en, sana ereray e n’en ni ma rin’ e piin Nazirite. Thingar ranod nga tempel ni fan e ngar mu’naged fare n’en ni kar micheged.

Piin piilal e kar ninged ngak Paul ni nge un ngak e picha’ nem ni yad aningeg nga ranod nga tempel ma nge ayuwegrad ko salpiy. I yoloy Paul l’agruw e babyor ni kan thagthagnag me weliy riy ni fan ni ngan thap ngak Got e de t’uf ni ngan fol ko fare Motochiyel. Machane, ri be lemnag rogon e nangan’ rok yugu boch e girdi’. U m’on riy i yoloy ni gaar: “Nap’an ni gu bay u fithik’ e piin ni yad be par u tan e motochiyel ma gu bod be’ ni bay u tan e motochiyel . . . ma aram rayog ni nggu ayuweg e piin ni bay u tan e motochiyel.” (1 Korinth 9:20-23, NW) Yugu aram rogon ni dabi th’ab Paul kenggin e motochiyel u Bible, ma i lemnag ni rayog ni nge fol ko thin ni yog e piin piilal. (Acts 21:15-26) De kireb ni nge rin’ e re n’em. Dariy ban’en u Bible nib togopuluw nga murung’agen fare yaram ko ngan micheg ban’en ara vows, ma fare tempel e yima fanay ni fan ko liyor nib machalbog, ma de fanay ni fan ko liyor ko liyos. Ere arfan ni dabi warnag e michan’ ku be’, i rin’ Paul e n’en ni ka nog ngak. (1 Korinth 8:13) Dariy e maruwar riy nib t’uf ni ngari sobut’nag laniyan’, ni aram e n’en ni be gelnag e ta’ fan rodad ni fan ngak.

[Picture on page 14, 15]

U lan boor e duw, me par nib thil thil e lem rok e piin Kristiano u murung’agen fare Motochiyel rok Moses