Ma Pi’ Jehovah Gelngin Ngak E En Ke Aw Parowon

“[Ma pi’ Jehovah] gelngin e piin ni dakuriy gelngirad ma kar magargad.”​—ISAIAH 40:29.

1. Ngam weliy fan gelngin Got ni ma par ko pi n’en ni ke sunmiy.

GELNGIN Jehovah e dabi m’ay. Ma kaygi gel gelngin ni ma par u fithik’ e pi’ n’en ni ke sunmiy! Fare atom nib achichig​—ni aram e n’en ni yima fana’ ni fan ni ngan sunmiy urngin ban’en—​e rib achichig ya bod ga’ngin ta’reb e waangchal ko ran ma bay raay e billion e atom riy.a Urngin e yafas u fayleng e ma tor nga daken fare gelngin ni ma yib ni bochan e atom ni bay ko yal’. Machane uw urngin gelngin e yal’ nib t’uf ni nge yib nga fayleng ni nge ayuweg e n’en ni bay e yafas riy? Ke mus ni ri buchuw u fithik’ gelngin e yal’ e ma yib nga fayleng. Yugu aram rogon, ma “fare gelngin e yal’ ni ma aw nga Fayleng . . . e sogonap’an 100,000 yay ni kab gel ko gelngin e gamig ni ma fana’ e girdi’ nu fayleng,” ara’ rogon ni yog reb e mathematician ni Sir Fred Hoyle fithingan u lan e babyor rok ni Astronomy.

2. Ma mang e be yog ko Isaiah 40:26 u murung’agen gelngin Jehovah, aram ko tobolngin?

² Faan gad ra lemnag murung’agen fare atom ara fare palpalthib nib ga’, ma gad ra gin ko gelngin Jehovah nrib gel. Arfan nrayog ni nge yog ni gaar: “Mu sapgad nga lan e lang! Mini’ e sunmiy e pi t’uf ni gimed be guy? En ni be pow’iyrad ni bod baraba’ i salthaw ni pire’; manang urngirad, ma pining fithingrad ni tataa bagayad! Gelngin e rib gel, dariy reb ni kaa yan nga bang”! (Isaiah 40:26) Arrogon, Jehovah e “ba gel gelngin,” ma ir fare Tabolngin ni ma yib rok fare “gelngin” ni sum e palpalthib riy.

Ba t’uf e Gelngin ni Th’abi Gel

3, 4. (a) Mang boch ban’en ni ra warnag gelngidad? (b) Mang e deer nib t’uf ni ngan lemnag?

³ Yugu aram rogon ni Got e bay gelngin ni dabi m’ay, ma girdi’ e ma magar. Demtrug bang ni nga darod nga’, ma gad ma guy e girdi’ ni kar magargad. Yad ma od ni kar magargad, yad ma un ko maruwel ara skul ni kar magargad, ma yad ma sul nga tabinaw ni kar magargad, ma yad ma mol ni gathi kemus ni goo kar magargad ya ke awparowrad. Boch e girdi’ e baadag ni nga ranod nga bang nrayog ni ngar toffangad boch riy. Gadad, ni gadad e pi tapigpig rok Jehovah, e ku ma yib e magar ngodad, ya pigpig ni gad ma tay ngak Got e ba t’uf ni ngan gelnag boch. (Mark 6:30, 31; Luke 13:24; 1 Timothy 4:8) Ma ka bay boor ban’en ni ra chuweg gelngidad.

⁴ Yugu aram rogon ni gadad e piin ni Kristiano, ma dabiyog ni ngada siyeged e pi magawon ni ma yib ngak urngin e girdi’. (Job 14:1) M’ar, nge magawon ko salpiy, ara boch e magawon ni ma chachalban e girdi’ ngay, ma warnag lanin’rad. Ma reb e magawon nrayog ni ngan uneg ngay e aram e skeng ni ma yib ngak e piin ni ma yan ko kanawo’ nib mat’aw. (2 Timothy 3:12; 1 Peter 3:14) Bochan e pi magawon u fayleng ni ma yib ngodad u gubin e rran nge togopuluw ni yima ta’ ko maruwel rodad ko machib, ma bochi gadad e ma war me sagaal ko pigpig ku Jehovah. Maku, ma fanay Satan urngin ban’en ni bay rok ni fan ni nge kirebnag e yul’yul’ rodad ku Got. Ere, uw rogon ni nge yog gelngidad ko tirok Got ma aram e dabi war lanin’dad ma dabda talgad?

5. Mang fan nib t’uf rodad gelngin ban’en ni kab gel ko gelngin e girdi’ ni fan e ngada rin’ed e maruwel rodad ni gadad e pi tapigpig?

⁵ Thingari l’agan’dad ngak Jehovah ya ir e en ni Sunmiydad ni th’abi gel gelngin, ma aram e rayog ni nge par nib gel gelngidad. Paul ni apostal e ke weliy ni pigpig ni ma ta’ e Kristiano e ba t’uf riy gelngin ban’en ni kab gel ko gelngin e girdi’ ni dawori flont. I yoloy ni gaar: “Machane gamad e piin ni ba’ romad e re n’ey nib fel’ ni pi’ fare Kan ni Thothup e gamad bod e rume’ ni but’, ni nge m’ug ni re gelngin nem ni ir e ba th’abi gel e yib rok Got, ma gathi gamad e yib romad.” (2 Korinth 4:7) Piin Kristiano ni kan dugliyrad e yad ma un ko maruwel ni ngar “pingeged e girdi’ ni ngar manged tafager rok Got” ni piin ni bay e athap rorad ni yad ra par u fayleng e be ayuwegrad e pi fager rorad. (2 Korinth 5:18; John 10:16; Revelation 7:9) Bochan ni gadad e piin ni daworda flontgad ma gad be maruweliy e maruwel rok Got u fithik’ e togopuluw, ma arfan ni dabiyog ni ngada rin’ed e re n’ey u gelngidad. Ma fanay Jehovah e kan ni thothup rok ni nge ayuwegdad, ma arfan ni fadad meewar e ra mug riy feni gel gelngin. Ma ri gad be falfalan’ ko thin ni be micheg ni “Jehovah e ma ayuweg e piin nib mat’aw”!​—Psalm 37:17.

‘Jehovah e Ma Pi’ Gelngig’

6. Mang e be yog ngodad e Thin rok Got ni be dag ni Got e ir e Yib gelngidad Rok?

⁶ Chitamangidad u tharmiy e “ba gel gelngin” mab mom rok ni nge pi’ gelngidad. Riyul’, ni ka nog ngodad ni gaar: “Ma pi’ [Jehovah] gelngin e piin ni dakuriy gelngirad ma kar magargad. Mus ngak e piin nib fel’ yangarrad ni yad ma meewar i yan; girdi’ ni kab pagel e rayog ni ngar awgad nga but’ ko magar. Machane piin ni yad be tor ngak Somol ni nge ayuwegrad e bay ra pirieged ni ke yib gelngirad bayay. Bay ra changeggad ni bod rogon e manuw; yad ra mil, ma dab ra magargad; ma yad ra yan, ma dabi m’ay gelngirad.” (Isaiah 40:29-31) Bochan ni ke yoor e magawon ni be tomalnag lanin’uy, ma yu ngiyal’ e gadad bod be’ ni be un ko sagreng ni kari magar ma be lemnag ndabkiyog ni nge yan ko gin nib palog boch. Machane fare tungun e sagreng ko yafas e ke chuchugur, ma susun ni dabi mulan’dad. (2 Chronicles 29:11) Toogor rodad ni fare Moonyan’, e yugu be yan “ni bod ba layon ni be tolul,” ma baadag ni nge talegdad. (1 Peter 5:8) Dabda paged talin ni ‘Jehovah e ir gelngidad nge ir e manaf rodad,’ ma ma pi’ e ayuw ni boor ni fan ni nge ‘pi’ gelngin ngak e en ni ke magar.’​—Psalm 28:7.

7, 8. Mang e be micheg ni Jehovah e ir e ke gelnag David, nge Habakkuk, nge Paul?

⁷ I pi’ Jehovah gelngin ngak David ni aram e n’en nib t’uf rok ma aram e rayog ni nge k’adan’ ko ngiyal’ nra yib e magawon ni ba gel ngak. Arfan, ni ke yol David u fithik’ e pagan’ ni gaar: “Got e ir e ra ayuwegmad ni ngeb gelngimad nib gel, ma ir e ra yityit nga but’ e piin ni toogor romad.” (Psalm 60:12, New World Translation) Maku ke pi’ Jehovah gelngin ngak Habakkuk ma aram e rayog ni nge mu’nag e maruwel rok ni ir reb e profet. Habakkuk 3:19 (NW) e be gaar: “Jehovah ni Somol e ma pi’ gelngig. Ir e ma gagiyegnageg nggu machreg ni bod feni machreg ba gamanman ni dir, me gagiyegnigeg nguug wan ko yungi n’en nib tolang ni dabi buch ban’en rog.” Maku baga’ fan e n’en ni rin’ Paul, me yoloy ni gaar: “Demtrug e mit i n’en ni gu ra mada’nag ma ba’ gelngig ni ke pi’ [Got] nrayog ni gu par riy.”​—Filippi 4:13, NW.

⁸ Ni bod David, nge Habakkuk, nge Paul, ma thingari l’agan’dad ngay ni Got e bay gelngin ni nge gelnagdad ma rayog ni nge ayuwegdad. Bochan ni gad manang ni Jehovah ni ir Somol rodad me ir e Tabolngin fare “gelngin nib gel,” ma aram e gad ra weliy e chiney boch e kanawo’ ni ma yib gelngidad riy ko tirok Got ni aram e ayuw ni boor ni yib rok.

Ayuw nib Spiritual ni Ma Gelnagdad

9. Uw rogon ni ma duruwiydad e pi babyor ni kan ngongliy?

⁹ Fol Bible u fithik’ e yul’yul’ ni yima fanay e pi babyor ni ke ngongliy e piin Kristiano e ra ayuwegdad ma ra pi’ gelngidad. I yon’ fare psalmist e tang ni gaar: “Ba falan’ e cha’ . . . [ni] ra bieg e motochiyel rok Somol ma ma yib e falfalan’ riy ngak, ma ku aram rogon ni ra bieg ni rran nge nep’ ni bochan e nge nang fan. I ir e bod ba ke gek’iy ni ke tugul u tooben ba lul’; gubin ngiyal’ ni ma k’uf ko ngiyal’ nra taw ngay ni nge k’uf.” (Psalm 1:1-3) Ni bod ni thingar da ked e ggan ma aram e rayog ni nge par ni bay gelngidad, kub t’uf ni ngada ked e ggan ni spiritual ni Got e ma pi’ ngodad ni aram e Thin rok nge boch e babyor ni kan ngongliy ma aram e rayog ni nge par ni gad ba gel ko tirok Got. Arfan, ni fol Bible nge ngan fal’eg i lemnag e ri baga’ fan.

10. Wuin e rayog ni ngada pirieged e tayim ko fol babyor min fal’eg i lemnag?

¹⁰ Riyul’ ni ma yib angin nib gel nfaan ran fal’eg i lemnag fan e “tin ba toar ko thin rok Got.” (1 Korinth 2:10, NW) Machane mang ngiyal’ ni rayog ni ngada pirieged e tayim ni ngada fal’eged i lemnag ban’en? Isak ni fak Abraham e “immoy u daken e flang u nap’an ni ke gonowrug ni fan ni nge fal’eg i lemnag ban’en.” (Genesis 24:63-67) David ni psalmist i fal’eg i ‘lemnag Got u n’umngin e nep’.’ (Psalm 63:6) Sana gad ma fil e Thin rok Got ma gad ma fal’eg i lemnag ni kakadbul, nge ngiyal’ ni ke balayal’, nge nap’an ni ke nep’​—riyul’ ni demtrug ngal’an. Fol Bible nge ngan fal’eg i lemnag ban’en e ra pow’iyey nga reb e ayuw ni ke pi’ Jehovah nra gelnag​—nge meybil.

11. Mang fan ni thingarda tayed nga lanin’dad ni baga’ fan ni ngada meybilgad u gubin ngiyal’?

¹¹ Meybil ku Got ni gubin ngiyal’ e ra gelnagdad. Ere yibe athapeg ni “ngada meybilgad ni gubin ngiyal’.” (Roma 12:12) Yu ngiyal’, mab t’uf ni ngad ninged ku Got nib tamilang ni nge yog ngodad e gonop nge gelngidad nib t’uf rodad ma aram e rayog ni ngad gelgad ko skeng. (James 1:5-8) Maku ngada pininged e magar nge sorok ngak Got ko ngiyal’ ni kad guyed ni be lebug e tin nib m’agan ngay ara kada guyed ni ke gelnagdad ma aram ke yog ni ngad ululgad ko pigpig ngak. (Filippi 4:6, 7) Faan gad ra meybil ku Jehovah ma gad ra par nib chuchugur ngak, ma dabi pagdad. I yon’ David e tang ni gaar, “Mu sap! Got e ir e ma ayuwegeg.”​—Psalm 54:4.

12. Mang fan ni thingarda ninged ku Got e kan ni thothup rok?

¹² Chitamangidad u tharmiy e ma fanay e kan ni thothup rok ara gelngin ni fan ni nge gelnagdad. I yoloy Paul ni gaar: “Ereray fan ni gu ma ragbug u p’eowchen Got ni Chitamangiy . . . ni bay e flaab rok ndabi m’ay ma kug wenig ngak ni nge pi’ gelngimed u daken fare Kan ni Thothup rok, ya nge yib gelngin lanin’med.” (Efesus 3:14-16) Thingar da meybilgad ni nge yog ngodad e kan ni thothup, nib mich u wan’dad nra flaabnagdad Jehovah riy. Me weliy Jesus fan ni gaar: Faanra ning reb e bitir e nig, ma chitamangin nib t’uf rok e ra pi’ e porchoyog, ngak? Ri danga’. Arfan ni i ulul ngay ni gaar: “Yugu ereyer [fanmed kireb], ma gimed manang, rogon ni ngam pied e tin nib fel’ ban’en ngak pi fakmed. Ere en ni Chitamangiy ni bay u tharmiy e ri ra pi’ fare Kan ni Thothup ngak e piin ni yad ra ning ngak!” (Luke 11:11-13) Ngada meybilgad u fithik’ e pagan’ ma dabda paged talin ni pi tapigpig rok Got nib yul’yul’ e rayog ni “nge yog gelngirad” u daken gelngin.

Fare Ulung e Aram e Ayuw ni Ma Pi’ Gelngiy

13. Uw rogon u wan’dad e pi muulung ni ma ta’ e Kristiano?

¹³ Ma pi’ Jehovah gelngidad u daken e pi muulung ni ma tay e ulung ko Kristiano. I yog Jesus ni gaar: “Ya gin nra gak l’agruw fa dalip ni’ ngay u fithingag, e aram e gu ba’ rorad ko gin’em.” (Matthew 18:20) Nap’an ni ke micheg Jesus e re n’em, ma be weliy boch ban’en nib t’uf ni nge ayuweg riy e piin ni ma ayuweg e ulung. (Matthew 18:15-19) Machane, kenggin e pi thin rok e ba m’ag ko pi muulung rodad, nge pi assembly, nge convention, ya yima tabab ko meybil nge yima museg ko meybil u daken fithingan. (John 14:14) Ere ffel’ ni nganni un ko pi muulung ko Kristiano ney, ndemtrug ko buchuw ara bokum e biyu’ e girdi’ ni bay riy. Ere ngada daged ni gad be falfalan’ ko re yaram ney ni kan ngongliy ni fan ni nge gelnagdad ko tirok Got ma be ayuwegdad ni ngad daged e t’ufeg nge boch e ngongol nib fel’.​—Hebrews 10:24, 25.

14. Mang angin ni ma yib ngodad ko maruwel ni ma tay e piin piilal?

¹⁴ Piin ni piilal e ma pi’ e ayuw ko tirok Got ma ma pi’ athamgil nga lanin’uy. (1 Peter 5:2, 3) I ayuweg Paul e pi ulung ni kan ta’ ni ir e ra ayuwegrad, ni taab rogon ko n’en ni ma rin’ e piin ni piilal ko ngiyal’ ney. Riyul’, ni baadag ni nge chag ngak e pi walag ni ngan pi’ e athamgil nga laniyan’rad nge bagayad me fel’ rogon ko michan’ rok bagayad. (Acts 14:19-22; Roma 1:11, 12) Yibe athapeg ni gubin ngiyal’ ma ngada ted fan e piin ni piilal rodad nge yugu boch e walag ni kan tayrad ni ngara ayuweged e ulung, ni yad ma maruwel nib gel ni fan ni ngar gelnaged gadad ko tirok Got.

15. Uw rogon ni pi walagdad u lan e ulung e yad ra mang “taayuw nib gel”?

¹⁵ Pi walag u lan e ulung ni urngin e rayog ni ngar “pied e ayuw.” (Kolose 4:10, 11) Bochan ni yad e ‘tafager rodad nib riyul’’ ma aram rogon rayog ni ngara ayuweged gadad ko ngiyal’ ni keb e gafgow ngodad. (Proverbs 17:17) Ni bod ni, nap’an ni kan pag e pi tapigpig rok Got ni yad 220 u Sachsenhausen concentration camp ko duw ni 1945 ni immoy e matanag ni Nazi ni be guyrad, mab t’uf ni ngar uned ko milekag ni 120-mile palgin. Ka ranod u taabang, ma piin nib gel gelngirad e kara giringeyed e piin ni kar meewargad ni kan tayrad nga daken e nochi cart nib achichig. Mang wenegen ni yib riy? Re yan rorad nem e ke pag 10,000 u fithik’ e piin ni kan kalbusnagrad u concentration ni kar m’ad, e dariy bagayad ni mich rok Jehovah. Pi thin ney ni yibe weliy murung’agen e bay ko fapi babyor ni ke ngongliy fare Watch Tower, nib muun ngay fare Yearbook of Jehovah’s Witnesses nge Jehovah’s Witnesses​—Proclaimers of God’s Kingdom, ni be dag ni Got e ma pi’ gelngin ngak girdien, ma aram e dabi mulan’rad.​—Galatia 6:9.b

Yima Gel u Daken e Maruwel Rodad ko Machib

16. Uw rogon ni ra gelnagdad e tirok Got nfaan gad ra un i machibnag e thin rok Got u gubin ngiyal’?

¹⁶ Ngani un i wereg e machib ko gil’ilungun e ra gelnagdad ko tirok Got. Re maruwel n’ey e ra ayuwegdad ni ngad tiyan’dad nga Gil’ilungun Got ma ngada lemnaged ni aram e n’en ni ra par ndariy n’umngin nap’an nge pi taw’ath ni bay riy. (Jude 20, 21) Thin rok Got ni be micheg ban’en ni gad ma weliy ngak e girdi’ u nap’an ni gad be machib ma ra gelnag e l’agan ngodad ma ra ayuwegdad ni ngada boded Mikah ni profet ni i par nib mudugil, me yog ni gaar: “Gadad . . . e nga darod u fithingan Jehovah ni Got rodad ni dariy n’umngin nap’an.”​—Mikah 4:5, NW.

17. Mang boch ban’en ni kan pi’ ni ngan fil e Bible riy ngak be’ ni baadag e machib?

¹⁷ Faanra nguuda filed e Thin rok Got ngak yugu boch e girdi’ nib fel’ rogon ma ra gel thildad Jehovah i yan. Ni bod ni, nap’an ni yibe fil e Bible ngak be’ ni yibe fanay fare babyor ni Knowledge That Leads to Everlasting Life, mab fel’ ni ngan bieg min weliy fan boch e thin nu Bible ni ke mus ni kan ta’ e guruy nge verse riy. Ma ra ayuweg e re n’ey fa cha’ ni be un ngodad ko fol Bible maku ra ayuwegdad ni ngari tamilang boch ban’en u wan’dad. Faanra mo’maw’ rok facha’ ni be un ngodad ko fol Bible ni nge nang fan taa ban’en riy ara reb e fanathin, mab t’uf ni ngan fil taareb e guruy ko babyor ni Knowledge ni boor yay. Kari falfalan’dad ni faanra ngada fal’eged rogodad nib fel’ rogon mada athamgilgad ni ngada ayuweged yugu boch e girdi’ ni ngara chuchugurgad ku Got!

18. Ngam weliy rogon fare babyor ni Knowledge ni yibe fanay nib fel’ rogon.

¹⁸ Gubin e duw, ma fare babyor ni Knowledge e yima fana’ nib fel’ rogon ni fan e ngan ayuweg bokum biyu’ e girdi’ ni ngara manged e pi tapigpig rok Jehovah, ma boch i yad e dariy ban’en ni manang u Bible. Ni bod facha’ ni Hindu u Sri Lanka, ni nap’an ni kab bitir, ma ke rung’ag reb e Mich ni be weliy murung’agen e Paradis. Me yan boch e duw nga tomren, me yan ni nge gu’ fare ppin, ma de n’uw nap’an nga tomren mi yow tabab fa en figirngin e re ppin nem ni ngar filew e Bible. Ma riyul’, ni gubin e rran ma ma yib fare pagal ni ngar filew boch, ma kara mu’nagew i fil fare babyor ni Knowledge nib ngoch nap’an. Me tabab ni nge un ko urngin e muulung, me chuw ko teliw rok, me mang reb e publisher. Ma nap’an ni kan taufenag, ma immoy be’ ni yow ma fil e Bible ni ma un ngorow reb e fager rok e cha’ nem.

19. Bochan nib m’on e gagiyeg rok Got u wan’dad, ma mang e n’en ni ke riyul’ riy?

¹⁹ Ngan m’oneg u wan’uy e gagiyeg rok Got e ra fek e falfalan’ nib gel i yib ngodad. (Matthew 6:33) Yugu aram rogon ni ma yib ngodad e skeng nib thilthil, ma gad ra ulul i machibnag fare thin nib fel’ u fithik’ e falfalan’ nge pasig. (Titus 2:14) Boor i gadad e ke yog rorad ni ngara uned ko pioneer, ma boch e karanod nga bang ni rib t’uf e ayuw riy. Yugu demtrug ko gad be un ko re maruwel n’ey ara gad be un ko yugu reb e kanawo’ ni fan e ngada weliyed murung’agen Gil’ilungun Got ngak e girdi’, ma ke mudugil lanin’dad ni dabi pagtalin Jehovah e maruwel rodad nge t’ufeg ni kad daged ni fan ko ngochol rok.​—Hebrews 6:10-12.

Ngan Ulul ni Ngan Tor Nga Daken Gelngin Jehovah

20. Uw rogon ni ngad daged ni gad ma sap ngak Jehovah ni nge ayuwegdad?

²⁰ Ngada daged u fithik’ e yul’yul’ ni ma pagan’dad ku Jehovah ma gad ma sap ngak ni nge gelnagdad. Ma rayog ni ngada yodoromgad nfaan gad ra fol u polo’ i lanin’dad ko pi n’en nib spiritual ni ma pi’ Got ngodad u daken fare ‘tapigpig nib yul’yul’.’ (Matthew 24:45) Ngan fil e Thin rok Got ni tataa be’ ara u lan e ulung ni ngan fanay boch e babyor ko ulung, nge meybil u fithik’ e yul’yul’, nge ayuw ni ma pi’ e piin piilal, nge n’en ni ma rin’ boch e walag nib yul’yul’, nge nga ni machibnag e thin rok Got u gubin ngiyal’ e ra ayuwegey nge fel’ thildad Jehovah ma ra gelnagdad ni ngada ululgad ko pigpig nib thothup ngak.

21. Mang e ke yog Peter ni apostal nge Paul ni be dag nib t’uf ko girdi’ e ayuw ni yib rok Got?

²¹ Yugu aram feni gad ba meewar, ma Jehovah e ra gelnagdad ni ngad rin’ed e tin nib m’agan’ ngay nfaanra pagan’dad ko ayuw rok. Bochan ni manang Peter nib t’uf rok e girdi’ ere ayuw nem, ma ke yoloy ni gaar: “Ma cha’ ni be pigpig e thingari pigpig u gelngin ni ke pi’ Got ngak.” (1 Peter 4:11) Ma i dag Paul ni ma pagan’ ko gelngin Got ni kan pi’ ngak ko ngiyal’ ni gaar: “Ba fel’ u wun’ug e meewar, nge tin nib mo’maw’, nge gafgow ni yibe tay ngog, nge tin nib mo’maw’ ban’en ni gu be mada’nag ni fan ngak Kristus. Ya ngiyal’ ni gub meewar, e aram e ngiyal’ ni gub gel.” (2 Korinth 12:10) Yibe athapeg ni ngada daged e michan’ ni aram rogon nra rirnag Jehovah ni ir e Somol rodad ni Th’abi Tolang, ni ir e ma pi’ gelngin e en ke magar.​—Isaiah 12:2.

[Footnotes]

Uw rogon ni Ngam Pi’ e Fulweg?

• Mang fan ni girdi’ rok Jehovah e ba t’uf rorad gelngin ban’en ni kab gel ko gelngin e girdi’?

• Mang thin u Bible ni be micheg ni Got e ma gelnag e pi tapigpig rok?

• Mang e n’en ni ma pi’ Jehovah e ayuw ngodad riy ni fan e nge gelnagdad?

• Uw rogon ni ngada daged ni gad ma sap ngak Got nra gelnagdad?

[Picture on page 24]

Nap’an ni gad be fil e Bible ngak yugu boch e girdi’ ma ngari fel’ thildad Jehovah