“Ma Pi’ Gelngin e Piin ni Dakuriy Gelngirad ma Kar Magargad”

¹ Gad gubin ma yu ngiyal’ ma gad ma magar. Sana bochan e maruwel fa yugu boch ban’en machane ku bochan e pi magawon ni ma yib ngodad ko ngiyal’ ney ni “mo’maw’ ni ngan par nrogon e tin riyul’ girdien Kristus.” (2 Tim. 3:1) Gad e tapigpig rok Jehovah me ere uw rogon ni ma yib gelngidad ko tirok Got ban’en ni dab da sagaalgad ko machib rodad? Rogon ni gad ma rin’ e re n’ey e gad ma taga’ nga daken fa en ni “gelngin e rib gel,” ni Jehovah. (Isa. 40:26) Manang e tin nib t’uf rodad ma ri ba adag ni nge ayuwegdad.​—1 Pet. 5:7.

² Pi N’en ni Pi’ Jehovah: Ma gelnagdad Jehovah u daken e kan ni thothup rok, ni aram gelngin ni fanay ni nge sunumiy e palpal th’ib. Kan ni thothup rok Got e ma ayuwegdad “nge yib gelngidad biyay” ni faanra gad ra magar. (Isa. 40:31) Mu fithem ni ‘Wuin e yay ntomur ni kug meybil ni nge pi’ fare kan ni thothup gelngig ni rayog ni nggu rin’ e tin nib t’uf ko Kristiano?’​—Luke 11:11-13.

³ Gad ra bieg e Thin rok Got u gubin e rran ma gad fl’eg i lemnag ma ngad filed e pi babyor ko Kristiano ma gad bod ba ke “gek’iy ni ke tugul u tooben ba lul’; gubin ngiyal’ ni ma k’uf ko ngiyal’ nra taw ngay ni nge k’uf, ma der mororoy yuwan.”​—Ps. 1:2, 3.

⁴ Ku ma fanay Jehovah e pi walag ni rayog ni ngar “pied e ayuw” ngodad. (Kol. 4:10, 11) Yad ma pi’ gelngidad u nap’an e pi muulung ko ulung u daken e sabethin, nge fulweg nge welthin ni yad ma pi’ ni ma ubungdad. (Acts 15:32) Ma ba ga’ ni pi piilal e yad ma pi’ e ayuw ko tirok Got ban’en ma yad ma pi’ e athamgil nga laniyan’ e girdi’.​—Isa. 32:1, 2.

⁵ Fare Machib: Faanra ga be guy ni ga be magar, ma dabmu tal ko machib! Ya gathi bod yugu boch ban’en ya ga ra un ko machib u gubin ngiyal’ ma ra yib e toffan ngom. (Matt. 11:28-30) Gad ra un ko machib ma ra ayuwegdad ngad tedan’dad ko Gil’ilungun Got ma gad ra tiyan’ ko gabul nge langlath nge pi flaab ni bay nga m’on.

⁶ Boor ban’en ni ngan rin’ u m’on nran thang e re m’ag nib kireb ney. Bay boor fan ni ngad pared nib mudugil ko machib u “gelngin ni ke pi’ Got” ngodad. (1 Pet. 4:11) Ra ayuwegdad Jehovah ni ngad rin’ed e maruwel rodad nge mus rogon ya “ma pi’ gelngin e piin ni dakuriy gelngirad ma kar magargad.”​—Isa. 40:29.