Uw Rogon Ni Ngam Ayuweg Fakam Ni Ke “Malog”?

“Ngad falfalan’gad . . . ya i malog machane chiney e kan pirieg.”​—LUKE 15:32.

1, 2. (a) Uw rogon e machib nriyul’ u wan’ boch e piin nib fel’ yangaren? (b) Ma uw rogon laniyan’ e pi bitir nem ma uw rogon laniyan’ e gallabthir rorad?

“GU RA PAG e machib!” Rib gel e kireban’ rok e pi gallabthir ni bay madgun Got u wan’rad ni kar athamgilgad ni ngar chuguliyed pi fakrad nrogon e Kristiano ma kar rung’aged e re thin ney ko fakrad! Yugu boch e piin nib fel’ yangaren e kar “man’gad” ni dar rogned ni ngar thaygad ko machib. (Hebrews 2:1) Boor e piin nib fel’ yangaren ney ni yad bod fare pagal ni ke malog ko fanathin rok Jesus ni ke chuw u tafen chitamangin me adbey e tirok e chitamangin u yugu reb e nam nib palog.​—Luke 15:11-16.

² Baga’ ni dariy e re magawon ney rok e Pi Mich Rok Jehovah, machane bay boch i yad ni bay e re magawon ney rorad, ma dariy bugithin nrayog ni ngan nog nge chuw e kireban’ rorad. Maku bay e kireban’ rok e ani fel’ yangaren ni ke malog. Ya nangan’ rok e ra magawon. U lan e fanathin rok Jesus e ke “sulan’” fare pagal ni ke malog, meri falfalan’ e Chitamangin. Mang e rayog ni nge rin’ e pi gallabthir nge yugu boch e girdi’ u lan e ulung ngar ayuweged e piin ni kar maloggad ni nge “sulan’rad”?​—Luke 15:17.

Fan Ni Ma Chuw Boch e Girdi’

3. Mang boch i fan ni ke pag boch e piin nib fel’ yangaren e ulung ni Kristiano?

³ Bay bokum miriay e biyu’ e piin nib fel’ yangaren ni yad ma pigpig ku Jehovah u fithik’ e falfalan’ u lan e ulung ni Kristiano. Ere mang fan ni ma chuw boch e piin nib fel’ yangaren? Sana boch i yad e ma lemnag ni bay ban’en ko fayleng ni dariy rorad. (2 Timothy 4:10) Ara yad be lemnag ni kaygi gel e motochiyel u lan tafen e saf rok Jehovah. Maku boch ban’en nrayog ni nge n’igin ni nge chuw reb e fel’ yangaren ko ulung rok Jehovah e aram e nangan’ ni be yog ngak ni ke rin’ e kireb, ara ke adag daken yugu be’ nib rugod ara pagal, ara ba adag ni nge fel’ u wan’ e piin ni yad. Maku rayog ni nge tal be’ nib fel’ yangaren ko pigpig ku Jehovah ni bochan e be guy e gallabthir rok ara yugu boch e Kristiano ni yad be dake modingniged yad.

4. Mang kenggin i fan ni ma malog boch e piin nib fel’ yangaren?

⁴ Nap’an nra togopuluw be’ nib fel’ yangaren ma aram e be m’ug riy ni ke meewar e michan’ rok ma ngongol rok e be dag e n’en ni bay u gumerchaen. (Proverbs 15:13; Matthew 12:34) Yugu demutrug ko mang fan ni ma malog be’ nib fel’ yangaren, ma kenggin e magawon rok e ri “de nang e tin riyul’ e thin.” (2 Timothy 3:7) Ri baga’ fan ni nge fl’eg e piin nib fel’ yangaren e thin u thilrad Jehovah, ma gathi ke mus ni goo ngar dake yad be liyor ngak Jehovah. Mang e ra ayuwegrad ni ngar fl’eged e thin u thilrad Jehovah?

Mu Chugur Ngak Got

5. Mang e ba t’uf ni fan e ngki fel’ e thin u thilin e piin nib fel’ yangaren nge Got?

⁵ Be gaar James: “Mu chugurgad ngak Got me chugur ngomed.” (James 4:8) Thingar ni ayuweg e piin nib fel’ yangaren ni ngar adaged e Thin Rok Got ya ngar adaged ni ngar chugurgad ngak Got. (Psalm 34:8) Somm’on ma ba t’uf rok fare “milik”​−ni aram e tin nib mom e machib u lan e Bible. Ma nap’an ni ra falan’ ko Thin Rok Got ma ra adag e “tin nib el e ggan”​−ni aram e machib nib toar−​ma aram e dabi n’uw nap’an ma ra ilal nrogon e Kristiano. (Hebrews 5:11-14; Psalm 1:2) Bay be’ nib fel’ yangaren ni ke malog me un ko ngongol ko fayleng ma tomur riy e ke tabab ni nge tay fan e machib. Mang e ke ayuweg ni nge thil? Ka nog ngak ni nge bieg ga’ngin yang e Bible, me fol riy me bieg yu yang e Bible ni gubin e rran. Arrogon, thingar mu bieg e Bible ni gubin e rran ni faan ga ra chugur ngak Jehovah.

6, 7. Uw rogon nrayog ni nge ayuweg e gallabthir pi fakrad ni ngar adaged e Thin Rok Got?

⁶ Ere thingari ayuweg pi gallabthir pi fakrad ni ngar adaged e Thin Rok Got! Reb e rugod e ke chag ngak e piin nib kireb ni yugu aram rogon ni yima fil e machib u tabinaw. I weliy morngaagen e machib u tabinaw ni gaar: “I fith Papa e deer, mu gu bieg e fulweg riy ni da gu sap nga owchen.” Ere gathi ke mus ni ngan bieg e babyor u nap’an e machib, ya pi gallabthir ni yad ba gonop e yad ba salap i fil ban’en. (2 Timothy 4:2) Ra falfalan’ be’ nib fel’ yangaren ko machib u tabinaw ni faan manga be un ngay. Ere mu deeriy nge weliy laniyan’. Mu pi’ e athamgil ngak ni nge maruweliy e machib ni yibe weliy.a

⁷ Maku mu guy rogon ni yi ba adag fare machib ni gimed be weliy. Ma nap’an nra m’ag ngay me tay ni nge yan e piin nib fel’ yangaren u yaan fare machib. Mu ayuwegrad ni ngar gonopiyed u lanin’rad fare binaw ni ke buch riy fapi n’en ni gimed be weliy. Baga’ e ayuw ko fapi map ara yaan e binaw ni kan yoloy. Arrogon, rayog ni ngan falfalan’ ko machib u tabinaw ni faan yira gonopiy rogon. Ma kub fel’ ni nge gonopiy e gallabthir ko uw rogon thilrad Jehovah. Ya nap’an ni yad ra chugur iyan ku Jehovah ma ku rayog ni ngar ayuweged pi fakrad ni ngar chugurgad ku Jehovah.​—Deuteronomy 6:5-7.

8. Uw rogon nra chugur be’ ngak Got ni bochan e meybil?

⁸ Meybil e ku ra ayuweg be’ ni nge chugur ku Got. Reb e rugod nib fel’ yangaren e ke ruw raba’ laniyan’ ya ba adag e ngongol ni Kristiano ma ku ba adag e pi tafager rok ni dar uned ko machib. (James 4:4) Ere mang e ke rin’? I gaar fare rugod: “Aram e yay ni somm’on ni kug meybil ku Jehovah mu gu weliy lanin’ug ngak.” Me yog fare rugod ni ke fulweg Jehovah taban e meybil rok ya ke pirieg be’ ni tafager rok u lan e ulung ni Kristiano ni rayog ni nge weliy laniyan’ ngak. Ke nang ni Jehovah e pow’iy iyan me tabab ni nge fel’ e thin u thilrow Got. Rayog rok e pi gallabthir ni ngar ayuweged pi fakrad ni nge fel’ e meybil rorad. Ya nap’an ni ra meybil girdien e tabinaw u taabang ma rayog ni nge weliy e gallabthir e tin ni bay u gumercha’rad ya nge guy pi fakrad ni ke fel’ e thin u thilin e gallabthir rorad nge Jehovah.

Mu Gum’an’um Machane Mu Par Ni Gab Mudugil

9, 10. Uw rogon ni pi’ Jehovah kanawoen e gum’an’ ngodad u rogon ni i gum’an’ u puluwon piyu Israel ni dar yul’yul’gad?

⁹ Nap’an ni ra tabab be’ nib fel’ yangaren ni nge malog ma sana ra adag ni nge par ni goo ir u bang ma ra togopuluw ngak e gallabthir rok ni yow ra machibnag. Ere mang e rayog ni nge rin’ e gallabthir? Amu lemnag e n’en ni rin’ Jehovah ngak piyu Israel kakrom. I gum’an’nag ir u puluwon piyu Israel ni ba gel e lem rorad ni 900 e duw mfini n’agrad. (Exodus 34:9; 2 Chronicles 36:17-21; Roma 10:21) Yugu aram rogon ni ur “skengnaged Jehovah” ni boor yay, i runguyrad. “Boor yay ni i t’ar laniyan’, ma de pug e damumuw rok.” (Psalm 78:38-42) Dariy ban’en nib kireb ni rin’ Got ngorad. Pi gallabthir ni ma t’ufeg pi fakrad e yad ra folwok rok Jehovah ma ra gum’an’rad ni faanra dubun pi fakrad e ayuw ni yad be pi’.

¹⁰ Fan e gum’an’ nge k’adan’ e gathi ke mus ni ngkum athamgil nib n’uw nap’an ya ku be yip’ fan ni ngkum athapeg ni ku rayog ni ngki fel’ e thin u thilmew biyay. I pi’ Jehovah e kanawo’ u rogon e gum’an’. Ir e ke l’og e pi mol’og rok ngak piyu Israel ni boor yay. I runguy Jehovah e girdi’ rok ni yugu aram rogon ni ur moningnaged e pi mol’og rok e bin riyul’ e Got ma ur dariy fannaged e thin rok. (2 Chronicles 36:15, 16) I wenignag piyu Israel ni gaar: “Wenig ngomed, mu sulod ma nge bigimed e nge pag e ngongol rok nib kireb.” (Jeremiah 25:4, 5) Machane gathi be yip’ fan ni ke fel’ e kireb u mit Jehovah ya i par ko pi motochiyel rok nib mat’aw. Ka nog ngak piyu Israel ni “ngar sulod” ngak Got nge kanawo’ rok.

11. Uw rogon ni rayog ni nge gum’an’ e pi gallabthir u puluwon fakrad ni kar maloggad machane ngar pared ni yad mudugil?

¹¹ Rayog ni nge folwok e pi gallabthir rok Jehovah ni dab ra gurgad ni ngar paged fare tir ni be togopuluw. Yad ra athapeg ni ku ra fel’ fare tir biyay ma yad ra guy rogon ni nge yog ni ngki non fare tir ngorad ara yad ra guy rogon ni nge mab e kanawo’ ni nge non fare tir ngorad biyay. Pi gallabthir e ra par nib mudugil ko tin nib mat’aw ban’en, machane ku rayog ni ngar weniggad ni boor yay ni nge sul fare tir ko kanawoen e riyul’.

Nap’an Ni Kan Tharbog Be’ Nib Fel’ Yangaren

12. Mang e mmil fan ngak e gallabthir ni bay fak nib fel’ yangaren ni ma par u tabinaw machane kan tharbog ko ulung?

¹² Ra uw rogon ni faan manga be’ nib fel’ yangaren ni ma par u tafen e gallabthir rok e ke un ko ngongol nib kireb min tharbog ko ulung ni bochan e dabi kalngan’? Bochan e ma par fare tir u tafen e gallabthir rok, thingar ra machibnagew ma ngar yal’uwegew nrogon e Thin Rok Got. Uw rogon ni yow ra rin’?​—Proverbs 6:20-22; 29:17.

13. Uw rogon nrayog ni nge taw e thin rok e gallabthir nga gumerchaen fak ni ke togopuluw?

¹³ Rayog ni ngan machibnag ma ngan yal’uweg ni ngan fil e Bible ngak ni goo ir u bang​−ma sana aram e bin nib fel’ e kanawo’. Thingari guy e gallabthir e n’en ni bay u gumerchaen fak ma gathi ke mus ni nge guy e togopuluw ni be tay. Mang fan ni ke war e michan’ rok? (Proverbs 20:5) Rayog ni nge taw e thin rom nga gumerchaen me munguy, fa? Mang thin ko Bible ni ra m’ag ko magawon rok? I micheg apostal Paul ngodad ni gaar: “Ya thin rok Got e ba fos ma ba’ gelngin ni ma maruwel. Ya kab m’uth nga bangi sayden ni ruw raba’ ma mm’uth. Ya me yan nge yan I taw nga fithik’ i lanin’dad ko n’en ni gadad be lemnag, nge fithik’ e ul’ul nge yil’ ma ma pufthinnag e n’en ni yima yim’ ni bochan nge tin ni yima lemnag.” (Hebrews 4:12) Arrogon, gathi ke mus ni nge yog e gallabthir ngak fak ni nge dabi un ko kireb biyay. Ya thingar ra ayuwegew ni nge gol ko m’ar rok.

14. Mang e thingari rin’ be’ nib fel’ yangaren ya nge fel’ thilrow Jehovah biyay, ma mang e rayog ni nge rin’ e gallabthir ni ngar ayuwegew fakrow ni nge rin’ e re n’en ney?

¹⁴ Thingar ni ayuweg be’ nib fel’ yangaren ni ke malog ni nge fel’ thilrow Jehovah biyay. Somm’on ma thingari “kalngan’ me pi’ keru’ ko kireb.” (Acts 3:19; Isaiah 55:6, 7) Nap’an nra ayuweg e gallabthir fak ni nge kalngan’ ma thingar ra “ “gum’an’ ma ba sumunguy ko ngiyal’ ni be guy rogon ni nge fil e tin nib riyul’ ngak e piin ni kar olobochgad ma yad be togopuluw ngak.” (2 Timothy 2:24-26) Thingar ra ginanged fare tir nrogon e thin ko Bible. Fare bugithin nu Greek ni kan pilyeg ni “ginang” e ku be yip’ fan “ngan pi’ e mich riy.” (Revelation 3:19; John 16:8) Ere nap’an ni ngan ginang fare tir ma thingar ni pi’ e mich riy ya ngan micheg ngak fare tir fene kireb e ngongol rok. Riyul’ ni de mom ni ngan rin’. Machane faan rayog ma nge guy rogon e gallabthir ni nge taw e thin rorow nga gumerchaen ma ngar fanayew urngin ban’en nib puluw ko Bible ni ngar michegew ngak fakrow. Ngar guyew rogon ni ngar ayuwegew ni nge “fanenikay e kireb ma nge t’uf rok e tin nib mat’aw ban’en.” (Amos 5:15) Sana ra “sulan’ me chuw ko wup’ rok Moonyan’.”

15. Mang ayuw ni ma pi’ e meybil ya nge fel’ e thin u thilin Jehovah nge be’ ni ke malog?

¹⁵ Thingar ni meybil ni fan e ngki fel’ e thin u thilin be’ nge Jehovah. Dab ni yibilay be’ ni kaa un ko ulung ni Kristiano ma chiney e be un ko ngongol nib kireb ma dubun ni nge kalngan’. (1 John 5:16, 17; Jeremiah 7:16-20; Hebrews 10:26, 27) Arrogon, machane rayog ni nge yibilay e gallabthir ni nge pi’ Jehovah e gonop ngorad ya ngar pithiged e magawon rorad. (James 1:5) Ma faanra be’ nib fel’ yangaren ni kan tharbog ko ulung e ke kalngan’ machane dawori “puf e thin rok u p’eowchen Got” ma rayog ni nge yibilay e gallabthir rok ni faan manga bay rogon ni nge n’ag Got fan e denen rok fakrow ma nge rin’ Got e tin nib m’agan’ ngay. (1 John 3:21) Faanra rung’ag fare tir e meybil ni aray rogon ma ra nang ni Jehovah e ir ba Got ni ma runguyey.b​—Exodus 34:6, 7; James 5:16.

16. Uw rogon nrayog ni ngada ayuweged girdien e tabinaw rok be’ nib fel’ yangaren ni kan tharbog ko ulung?

¹⁶ Faanra kan tharbog be’ nib fel’ yangaren ko ulung ma “dabi chag” girdien e ulung ngak. (1 Korinth 5:11; 2 John 10, 11) Bochan e dab ni chag ngak ma sana ra “sulan’” me sul nga lan e ulung rok Got. (Luke 15:17) Yugu demutrug ko ra sul fa danga’, ma girdien e ulung e ra pi’ e athamgil nga laniyan’ chon e tabinaw rok fare tir ni kan tharbog. Ngada gayed e kanawo’ ni ngada daged ni “ba taareb e lem rodad” ma “ngada runguyed” girdien e tabinaw rok faanem ni kan tharbog.​—1 Peter 3:8, 9.

Rogon Ni Nge Pi’ Yugu Boch E Girdi’ E Ayuw

17. Mang e thingari tamilang u wan’ girdien e ulung ni yad be ayuweg be’ nib fel’ yangaren ni ke malog?

¹⁷ Uw rogon ni faanra dawor ni tharbog be’ nib fel’ yangaren ko ulung, machane ke meewar e michan’ rok? I gaar apostal Paul: “Faanra gafgow bayang u dowey, ma urngin e yu yang ni ka ba’ e yad ma un ngak ko gafgow.” (1 Korinth 12:26) Rayog ni nge pi’ yugu boch e girdi’ e ayuw ngak faanem ni ke meewar e michan’ rok. Machane ngan ayuw riy ya rayog ni nge suruy faanem ni ke meewar yugu boch e piin nib fel’ yangaren. (Galatia 5:7-9) U lan reb e ulung e ba adag boch e piin ni kar ilalgad ni ngar ayuweged boch e piin nib fel’ yangaren ni ke meewar e michan’ rorad mar ulunguyed nga taabang ni ngar musikgad. Ba adag fa piin nib fel’ yangaren e musik machane ke taareb e lem rorad kar chuwgad ko ulung. (1 Korinth 15:33; Jude 22, 23) N’en ni ra ayuweg reb e fel’ yangaren ni ke meewar e gathi ngan fafel u taabang ni dariy e machib riy, ya ba t’uf ni nge chag ngak e piin nra ayuweg ni nge tay fan e tirok Got ban’en.c

18. Uw rogon nrayog ni ngada folwokgad rok fare matam ko fanathin rok Jesus u morngaagen fare pagal ni ke malog?

¹⁸ Amu lemnag laniyan’ be’ nib fel’ yangaren ni ke chuw ko ulung me sul ko muulung u lan e Kingdom Hall ara ke un ko reb e assembly. Susun ngada boded fare matam ko fanathin rok Jesus u morngaagen fare pagal ni ke malog ni ke falan’ ni ke sul fak, fa? (Luke 15:18-20, 25-32) Reb e fel’ yangaren ni ke chuw ko ulung e ke un ko reb e assembly me gaar: “U wan’ug e dabi non girdien e ulung ngak be’ ni bod gag, machane i non girdien e ulung ngog mar pininged e magar ngog. Kari munguy lan gumerchaeg.” I tabab ni nge fil e Bible biyay ma tomur riy me un ko taufe.

Dab Mu Pag

19, 20. Mang fan ni ngada athapeged e tin nib fel’ u nap’an ni gad be ayuweg be’ nib fel’ yangaren ni ke malog?

¹⁹ Thingari k’adan’ e pi gallabthir nge yugu boch e girdi’ ma ngar athamgilgad u nap’an ni yad ra ayuweg be’ nib fel’ yangaren ni ke “malog” ni nge “sulan’” ya mo’maw’. Machane dab mu pag. “Ya dawori sowath Somol ni nge rin’ e tin ni ke yog nra rin’, ni bod rogon ni be lemnag boch e girdi’. Ya be gum’an’nag ir u puluwmed ni fan e dubun ni nge n’ag be’, ya ba adag ni nge urngin e girdi’ mi yad pi’ keru’rad ko urngin e denen ni yad be rin’.” (2 Peter 3:9) Ere bay e mich riy u lan e Bible ni ba adag Jehovah ni nge pi’ e girdi’ keru’rad ko kireb mi yad par nib fas. Ma ir e ke rin’ ban’en ni fan e nge yog ni nge fel’ e girdi’ u p’eowchen. (2 Korinth 5:18, 19) Bokum million e girdi’ ni ke sulan’rad ni bochan e i k’adan’ Got.​—Isaiah 2:2, 3.

²⁰ Ere susun e nge rin’ e pi gallabthir urngin ban’en nrayog ni de togopuluw ko Bible ni fan e ngar ayuweged pi fakrad ni kar maloggad ni nge sulan’rad, fa? Mu folwok rok Jehovah, mu gum’an’um ni ga be ayuweg fakam ni nge sul ngak Jehovah. Mu par ni gab mudugil ko thin ko Bible ma ga dag pi fel’ngin Jehovah ni aram e t’ufeg, nge mat’aw, nge gonop ma ga yibilay ni nge ayuwegem. Boor e piin ni tatogopuluw ni ur folgad ko thin rok Jehovah ni ngar sulod ngak, ma ku arrogon nrayog ni nge sul fakam ni malog nga lan tafen e saf rok Jehovah.​—Luke 15:6, 7.

[Footnotes]

Ka Ga Manang?

• Mang kenggin i fan ni ma pag boch e piin nib fel’ yangaren e ulung?

• Uw rogon nrayog ni ngan ayuweg e piin nib fel’ yangaren ni nge fel’ thilrad Jehovah?

• Mang fan ni nge gum’an’ e gallabthir ma ngar pared nib mudugil u nap’an ni yad be ayuweg fakrad ni kar maloggad?

• Uw rogon nrayog ni nge pi’ girdien e ulung e ayuw ya sul be’ nib fel’ yangaren ni ke malog?

[Picture on page 27]

Thingar da bieged e Thin Rok Got ya nge fel’ thildad Jehovah

[Picture on page 27]

Meybil rok e gallabthir e rayog ni nge ayuweg pi fakrad ni ngar nanged ni ba fel’ thilin e gallabthir nge Jehovah

[Picture on page 29]

Ngan pining e magar ngak be’ nib fel’ yangaren ni ke malog me “sulan’”

[Picture on page 30]

Mu rin’ boch ban’en ni ngam ayuweg fakam ni nge sul ngak Jehovah