Piin Gallabthir, Gimed Be Ayuweg Pi Fakmed ni Ngar Mon’oggad Nge Yag Nra Uned ko Taufe, Fa?

1. Mang e baadag e pi gallabthir ni Kristiano ni nge yag ni rin’ pi fakrad u m’on ni ngar uned ko taufe?

“BOOR e pul ni u gog ngak e Chitamag nge Chitinag ni gu baadag ni nggu un ko taufe, ma kub ga’ ni yow ma weliy murung’agen e taufe ngog. Yow baadag ni ngari tamilang u wan’ug ni n’en ni kug dugliy ni nggu rin’ e ban’en nrib ga’ fan. Nap’an e December 31, 1934, ma aram mug rin’ e re n’ey, ni aram ban’en nrib ga’ fan ni buch u lan e yafos rog.” Ireray e n’en ni yog Blossom Brandt ni buch u nap’an ni dugliy ni nge un ko taufe. Pi gallabthir ni Kristiano e ngiyal’ ney e ku yad baadag ni ngar ayuweged pi fakrad ni ngar dugliyed ban’en u fithik’ e gonop. Faanra son be’ ndab kaa un ko taufe ara ke taw nga nap’an nsusun e rayog ni nge un ko taufe ma dabi rin’, ma rayog ni nge kireb e tha’ u thilrow Got. (Jas. 4:17) Machane, pi gallabthir ni yad ba gonop e yad baadag nu m’on ni nge un pi fakrad ko taufe, ma ke bung rogorad rayog ni ngar rin’ed e pi n’en nib milfan ngak pi gachalpen Kristus.

2. (a) Mang reb e magawon ni ke guy e piin ni yad ma lekag e ulung? (b) Mang e gad ra weliy ko re article ney?

² Bay boch e walag ni yad ma lekag e ulung ni ka rogned ni kar guyed ni boor e piin fel’ yangaren ni ke chugur ni nge gaman 20 e duw rorad ara ka fini pag ndawor ni taufenagrad, ni yugu aram rogon ni kan chuguliyrad ko tin riyul’. Ba ga’ ni bayi n’en ma pi fel’ yangaren ney e yad ma un ko muulung nge machib, maku yad ma tay ni yad boch e Pi Mich Rok Jehovah. Yugu aram rogon, ma dawor ra ognaged yad ngak Jehovah ngar uned ko taufe. Gur, mang fan e re n’ey? Bay yu ngiyal’ ni bochan e be yog e gallabthir rorad ngorad ni ngar songad buchuuw u m’on ni nga fin ra uned ko taufe. Ere, re article ney e gad ra weliy riy aningeg ban’en ni ir e ma k’aring boch e gallabthir ni Kristiano ni nge dab ra pied e athamgil nga laniyan’ pi fakrad ni ngar uned ko taufe.

KE ILAL FAKAG NRAYOG NI NGE UN KO TAUFE, FA?

3. Mang e i maruwar u wan’ e gallabthir rok Blossom?

³ Gallabthir rok Blossom ni faan kan weliy murung’agrow ko bin som’on e paragraph e i maruwar u wan’row ko ke ilal fakrow nrayog ni nge nang fan e taufe ni nge un ngay nge feni ga’ fan, fa dawor. Ere, uw rogon me yag ni nge nang e piin gallabthir ni ke bung rogon reb i fakrad nrayog ni nge ognag ir ngak Got?

4. Uw rogon nrayog ni nge ayuweg fare thin ni tay Jesus chilen ko Matthew 28:19, 20 e piin gallabthir u nap’an ni yad be fil e thin rok Got ngak pi fakrad?

⁴ Mu beeg e Matthew 28:19, 20. Rogon ni kad weliyed ko fa binem e article ni ke yan e der yog e Bible ni bay e re yangar nra taw be’ ngay, ma aram e rayog ni nge un ko taufe. Machane, ba fel’ ni nge fal’eg e piin gallabthir i lemnag fan fare thin ni be yog ni ngan yognag boch e girdi’ ni ngar manged pi gachalpen Jesus. Fare bugithin ni Greek ni kan pilyeg ni ‘ngan pingegrad ngar manged pi gachalpen’ ni bay ko Matthew 28:19 e be yip’ fan ni ngan fil ban’en ku be’ ni yibe nameg ni nge mang reb i gachalpen Jesus. Be’ ni gachalpen Jesus e aram be’ ni ke fil e pi n’en ni i machibnag Jesus, ma ke tamilang u wan’, ma ke dugliy ni nge fol riy. Ere, n’en ni nge nameg gubin e gallabthir ni Kristiano e aram e ngar filed e thin rok Got ngak pi fakrad u nap’an ni ka yad ba achig mar nameged ni ngar ayuweged yad ni ngar manged boch i gachalpen Kristus ni kan taufenagrad. Machane bin riyul’ riy e, dabiyog ni ngan taufenag reb e bitir ni kab madway. Yugu aram rogon, ma be tamilangnag e Bible ni mus ngak be’ nri kab bitir ma rayog ni nge tamilang me ga’ fan e tin riyul’ u Bible u wan’.

5, 6. (a) Mang e kad nanged u murung’agen e ngiyal’ nni taufenag Timothy ko n’en ni be yog e Bible u murung’agen? (b) Uw rogon ni nge ayuweg e pi gallabthir ni yad ba gonop pi fakrad u reb e kanawo’ nra yib angin?

⁵ Timothy e ir reb i gachalpen Jesus ni dugliy ni nge pigpig ngak Jehovah u nap’an ni kab fel’ yangaren. I yog apostal Paul ni tabab Timothy i fil e tin riyul’ u lan e Babyor nib Thothup u nap’an ni kab bitir. Yugu aram rogon ni ilal u reb e tabinaw nib thilthil e michan’ ko girdi’ riy, machane i ayuweg e chitiningin nge titaw rok ni yow l’agruw e Jew ni nge ga’ fan u wan’ e thin ni bay u lan fare Babyor nib Thothup, nrogon nib puluw ko pi n’en ni ke tamilang u wan’ e pi Jew. Bochan e re n’ey, ma aram fan ni yag ni nge par nib gel e michan’ rok. (2 Tim. 1:5; 3:14, 15) Nap’an ni ke chugur ni nge gaman 20 e duw rok ara ka fini pag, ma ke mang reb i gachalpen Kristus nrayog ni ngan pi’ boch e maruwel ngak u lan e ulung.​—Acts 16:1-3.

⁶ Riyul’ nra reb e bitir ma rogon. Gathi gubin e bitir ni taareb rogon ni yad ma mon’og. Bay boch e bitir ni ma tamilang e tin riyul’ u wan’rad, me yag nra dugliyed ban’en u fithik’ e gonop, mar adaged ni ngar uned ko taufe u nap’an nri ka yad bbitir. Ma boch e fin yad ra ilal boch mfin aram e ngiyal’ ni ke bung rogorad nrayog ni ngar uned ko taufe. Ere, pi gallabthir ni yad ba gonop e darur towasariyed pi fakrad ni ngar uned ko taufe, ya yad ma ayuwegrad ni tat’abagayad ni ngar mon’oggad ko tirok Got ban’en u rogon payngin nrayog rorad. Rayog ni nge felfelan’ e piin gallabthir u nap’an nra fol reb i fakrad ko fare thin ni bay ko Proverbs 27:11. (Mu beeg.) Machane, susun e dab ra paged talin ni n’en ni yad be nameg e aram e ngar ayuweged pi fakrad ni ngar manged boch i gachalpen Kristus. Aram fan nib fel’ ni nge fith e piin gallabthir yad ni nge lungurad, ‘Ke gaman urngin ban’en ni ke tamilang u wan’ fakag nrayog ni nge ognag ir ngak Got nge un ko taufe, fa?’

KE GAMAN E TIN KE TAMILANG U WAN’ FAKAG, FA?

7. Ba t’uf ni nge nang be’ urngin e machib u lan e Bible u m’on ni nge un ko taufe, fa? Mu tamilangnag.

⁷ Piin gallabthir e aram e piin ni yad ma fil ban’en ko girdi’ u lan e tabinaw rorad. Ere ba puluw ni ngar adaged ni nge tamilang e tin riyul’ u wan’ pi fakrad nib fel’ rogon u m’on ni ngar ognaged yad ngak Got. Yugu aram rogon, ma de t’uf ni nge nang be’ urngin ban’en u lan e Bible u m’on ni nga fini ognag ir ngak Got nge un ko taufe. Tomuren nra un be’ ko taufe, ma susun ni ngki ulul i guy rogon ni nge ga’ e tamilangan’ rok ko tin riyul’ u lan e Bible. (Mu beeg e Kolose 1:9, 10.) Ere, uw urngin ban’en nib t’uf ni nge tamilang u wan’ be’ u m’on ni nge un ko taufe?

8, 9. Mang e gad be fil ko fare thin nu Bible ni murung’agen Paul nge fare pilungen e kalbus?

⁸ N’en ni buch u reb e tabinaw u nap’an e bin som’on e chibog e rayog ni nge ayuweg e pi gallabthir e ngiyal’ ney. (Acts 16:25-33) Nap’an e yay ni l’agruw e milekag ni tay Paul ko duw ni 50 C.E. ni be machib, ma aram me yan nga Filippi. Nap’an ni yow bay Silas u rom, ma aram min kolrow, ngan t’ar e thin nga dakenrow, mi nin’row nga kalbus. Ma gonap’an e ke lukngun e nep’, ma aram mi yigi yib ba durru’ nib gel nge rurug fare kalbus nge mada’ ko def riy, ma ka chingiyal’ nem me mab urngin e mab. Mi ri rus faen ni pilungen e kalbus ni bochan e be finey ni ke mil urngin fapi kalbus, ma aram me girngiy e sayden rok ni nge li’ ir ngay. Machane, me tolul Paul ngak ni nge dabi li’ ir. Tomuren e re n’ey, ma aram me fil Paul nge Silas e tin riyul’ u murung’agen Jesus ngak fare pilungen e kalbus nge chon e tabinaw rok. Ere, bochan nrib ga’ fan u wan’rad e tin riyul’ nra filed u murung’agen Jesus, ma mang e k’aringrad ni ngar rin’ed? Ka chingiyal’ nem ma aram mar uned ko taufe. Ere, mang e gad be fil ko re n’ey?

⁹ Fare pilungen e kalbus e sana ir reb e salthaw nu Roma ni ke taw nga nap’an ni nge tal ko salthaw. De nang e Thin rok Got. Ere, faanra nge mang reb e Kristiano, mab t’uf ni nge fil e pi kenggin e machib u Bible, me nang e n’en ni be yip’ fan ni nge mang be’ reb e tapigpig rok Got, me dugliy ni nge fol ko pi n’en ni i fil Jesus. Machane, pi kenggin e machib ni fil ko thin rok Got u lan ba ngiyal’ nde n’uw nap’an nge rogon feni ga’ fan u wan’ e aram e n’en ni k’aring ni nge adag ni nge un ko taufe. Dariy e maruwar riy nu tomuren ni un ko taufe, miki ulul ni nge fil boor ban’en ko thin rok Got. Ere, mang e rayog ni ngam rin’ ni faanra ke yog fakam ngom ni baadag ni nge un ko taufe ni bochan e ba t’uf Jehovah rok ma baadag ni nge rin’ e tin nib m’agan’ ngay? Rayog ni ngam pag ni ngar nonad e piin piilal u lan e ulung ya nge yag nra nanged ko ke bung rogon nrayog ni nge un ko taufe fa dawor.a Ra ulul fakam i fil boor ban’en u murung’agen Jehovah u n’umngin nap’an e yafos rok ni bod rogon e tin ni ka bay e Kristiano ni kar uned ko taufe. Bin riyul’ riy e, ireray ban’en nra rin’ ndariy n’umngin nap’an.​—Rom. 11:33, 34.

MANG E BIN TH’ABI FEL’ E SKUL NI NGE UN FAKAG NGAY?

10, 11. (a) Mang e ma lemnag boch e gallabthir? (b) Mang e susun ni nge m’on u wan’ e piin gallabthir?

¹⁰ Bay boch e gallabthir ni kar lemnaged nib fel’ ni nge son pi fakrad nge boch ngaram mfin nra uned ko taufe, ya nge yag nra uned ko skul nib tolang me yag reb e maruwel nib fel’ puluwon ngorad. Sana ba fel’ e n’en ni yad be lemnag ni fan ngak pi fakrad, machane gur, ra ayuweg e re n’ey pi fakrad ni nge fel’ rogon e par rorad? Ma bin th’abi ga’ fan riy e gur, ba puluw e re n’ey ko n’en ni be yog e Bible, fa? Mang e be pi’ e Thin rok Jehovah e athamgil nga lanin’dad ni ngad rin’ed?​—Mu beeg e Eklesiastes 12:1.

¹¹ Ba ga’ fan ndab da paged talin nre fayleng ney nge pi n’en ni bay riy e ba togopuluw ko lem rok Jehovah nge n’en ni baadag. (Jas. 4:7, 8; 1 John 2:15-17; 5:19) Faanra par reb e bitir nib chugur e tha’ u thilrow Jehovah, ma aram e n’en nth’abi fel’ nra ayuweg fare tir ni nge togopuluw ngak Satan, nge re fayleng ney, nge lem nib kireb ni bay riy. Faanra m’oneg e piin gallabthir e skul nib tolang nge maruwel nib fel’, ma rayog ni nge lemnag pi fakrad ni kab ga’ fan e pi n’en ni bay ko re fayleng ney ko tha’ u thilrad Jehovah. Re n’ey e bay e riya’ riy. Gimed e piin gallabthir, gimed baadag ni nge mang re fayleng ney e ir e fil ngak pi fakmed e n’en nra yibnag e bin riyul’ e felfelan’ ngorad, fa? Bin riyul’ riy e, faan gad ra m’oneg Jehovah u lan e yafos rodad, ma aram e n’en nra yibnag e bin riyul’ e felfelan’ ngodad me fal’eg e par rodad.​—Mu beeg e Psalm 1:2, 3. 

UW ROGON NI FAANRA KE DENEN FAKAG?

12. Mang fan ni bay boch e gallabthir ni yad baadag ni nge son pi fakrad nge boch ngaram mfin nra uned ko taufe?

¹² Reb e matin ni Kristiano e weliy fan ndabun ni nge un ba rugod ni fak ko taufe ni gaar, “Gu be tamra’ ni nggog e re n’ey, machane fan nri dabug ni nge un ko taufe e bochan fare yaram u murung’agen e piin ni yima tharbograd.” Bay boch e gallabthir ni yad bod e re walag ney, ya yad ma lemnag ni kab fel’ ni nge son pi fakrad ndab ka ar uned ko taufe ni bochan e ka yad bbitir nib mom ngorad ni ngar rin’ed boch ban’en nib kireb. (Gen. 8:21; Prov. 22:15) Rayog ni nge lemnag e pi gallabthir ney ni faanra dabi un pi fakrad ko taufe, ma aram e dabiyog ni ngan tharbograd ko ulung. Machane, mang fan nde puluw e re lem ney?​—Jas. 1:22.

13. Faanra son be’ ndab kaa un ko taufe, ma aram e be yip’ fan ndabi weliy ngak Jehovah rogon e n’en ni i rin’, fa? Mu tamilangnag.

¹³ Riyul’ ni dabun e piin gallabthir ni Kristiano ni nge un pi fakrad ko taufe u nap’an ndawori bung rogorad ni ngar ognaged e yafos rorad ngak Jehovah. Machane, ba oloboch reb e gallabthir ni be lemnag ni faanra dabi un fak ko taufe, ma aram e dabi weliy ngak Jehovah rogon e n’en ni i rin’. Mang fan e re n’ey? Gathi fin ngiyal’ nra un reb e bitir ko taufe e aram e ngiyal’ nthingari weliy ngak Jehovah rogon e n’en ni i rin’, ya nap’an nra nang fare tir e n’en nib fel’ nge n’en nib kireb u p’eowchen Jehovah, ma aram e ngiyal’ nthingari weliy ngak Jehovah rogon e n’en ni i rin’. (Mu beeg e James 4:17.) Ere pi gallabthir ni yad ba gonop e yad ma athamgil nib gel ni ngar daged e kanawo’ nib fel’ ni nge folwok pi fakrad riy ko bin ni ngar taleged yad ndab ra uned ko taufe. Ku yad ma fil ngak pi fakrad ni nge ga’ fan u wan’rad e pi motochiyel rok Jehovah u murung’agen rogon e ngongol ni ngaun rin’ u nap’an nri ka yad bbitir. (Luke 6:40) Faanra t’uf Jehovah rok fakam, ma aram e n’en nra ayuweg ndabi rin’ reb e denen nib ubchiya’ ni bochan e baadag ni nge rin’ e tin nib mat’aw u p’eowchen Jehovah.​—Isa. 35:8.

RAYOG NI NGE PI’ YUGU BOCH E GIRDI’ E AYUW

14. Uw rogon nrayog ni nge ayuweg e piin piilal e piin gallabthir ko pi n’en ni yad be rin’?

¹⁴ Rayog ni nge ayuweg e piin piilal e piin gallabthir ko pi n’en ni yad be rin’ ni aram e ngar weliyed fel’ngin boch ban’en nrayog ni ngan nameg ni fan ko tirok Got ban’en. Bay reb e walag nib pin ni ke pigpig ni ir reb e pioneer nib pag 70 e duw ni weliy murung’agen e n’en nra weliyew Brother Charles T. Russell u nap’an ni ka fini gaman nel’ e duw rok nge angin ni yib ngak. I yog ni gaar, “I tay 15 e minit ni nge weliy ngog murung’agen e pi n’en nrayog ni nggu nameg ni fan ko tirok Got ban’en.” Arrogon, faanra nog boch e thin nib fel’ ngak be’ nrayog ni nge pi’ e athamgil nga laniyan’, ma aram e rayog ni nge yib angin ngak u n’umngin nap’an e yafos rok. (Prov. 25:11) Ku rayog ni nge pining e piin piilal e piin gallabthir nge pi fakrad ni ngar pied e ayuw u boch e maruwel ni yima rin’ ko Tagil’ e Liyor rodad. Rayog ni nga rogned ko fapi bitir ni ngar rin’ed boch e maruwel nib m’ag nga yangarrad nge tin nrayog rorad.

15. Mang boch e kanawo’ nrayog ni nge pi’ yugu boch e walag u lan e ulung e athamgil nga laniyan’ e piin bitir?

¹⁵ Ku rayog ni nge pi’ e pi walag u lan e ulung e ayuw ni aram e ngar daged ngak e piin bitir ni yad be lemnagrad ni be’ nge be’. Re n’ey e kub muun ngay ni ngar tedan’rad nga boch ban’en u rarogon fapi bitir ni be dag ni yad be mon’og ko tirok Got ban’en. Gur, ke pi’ reb e bitir reb e fulweg nib fel’ u nap’an e muulung ni keb u gum’irchaen, fa ke pi’ reb e welthin u nap’an e muulung ni yima tay u lan e wik? Ke machibnag reb e bitir be’ u skul, fa ke rin’ e n’en nib fel’ ni nge rin’ u nap’an ni kan towasariy ni nge rin’ ban’en nib kireb, fa? Faanra arrogon, mag gurnagem nga mog ngak nib fel’ e n’en ni ke rin’. Ma uw rogon e bin baaray ni ngam guy rogon ni ngam non ngak e piin bitir u m’on ara tomuren e muulung? Faan gad ra rin’ ni aray rogon, ma aram e rayog ni ngad ayuweged e pi bitir ney ni ngar nanged ni yad bang ko ‘ulung’ rodad.​—Ps. 35:18.

MU AYUWEG FAKAM NI NGE MON’OG NGE YAG NI UN KO TAUFE

16, 17. (a) Mang rogon e taufe ko athap rok be’ boch nga m’on? (b) Mang e rayog ni nge felfelan’ e piin gallabthir ngay? (Mu guy e sasing ni bay u tabolngin e re article ney.)

¹⁶ Reb e tow’ath nrib manigil ni bay rok e piin gallabthir e aram e ngar ‘llowan’naged pi fakrad, mi yad fonownagrad nrogon girdien Kristus.’ (Efe. 6:4; Ps. 127:3) Pi fak e piin gallabthir ni Kristiano e gathi kan gargelegrad nga reb e nam ni kan ognag ngak Jehovah ni bod rogon pi fak piyu Israel kakrom. Maku reb e, bochan nib t’uf Got nge tin riyul’ ko piin gallabthir, ma gathi aram e be yip’ fan ni ku ra t’uf rok pi fakrad. Ka nap’an e rofen nni gargeleg reb e bitir, ma aram e ngiyal’ ni nge tabab e gallabthir i guy rogon ni nge ayuweg fare tir ni nge mang reb i gachalpen Jesus, me ognag ir ngak Jehovah nge un ko taufe. Dariy ban’en nib ga’ fan nge migid e re n’ey. Bin riyul’ riy e, faanra ognag be’ ir ngak Got nge un ko taufe, me pigpig ngak u fithik’ e yul’yul’, ma aram e n’en nra bing e kanawo’ ngak ni nge magey nib fos u nap’an fare gafgow nib ga’ ni bay yib.​—Matt. 24:13.

¹⁷ Nap’an ni yog Blossom Brandt ni baadag ni nge un ko taufe, ma baadag e gallabthir rok ni nge mudugil u wan’row ko riyul’ ni ke bung rogon ni nge rin’ e re n’ey fa danga’. Nap’an ni mudugil u wan’row ni ke bung rogon nrayog ni nge un ko taufe, ma aram mar dagew ni ke m’agan’row ko n’en ni ke dugliy. Re nep’ u m’on ni nge un ko taufe, ma aram me rin’ e chitamangin ban’en nrib manigil. I yog Blossom ni gaar: “I yog ngomad ni nggu ragbuggad nga but’, ma aram me tabab ni nge meybil. I yog ngak Jehovah ni kari felfelan’ ko n’en ni ke dugliy fak ni aram e nge ognag e yafos rok Ngak.” Ba pag 60 e duw nga tomuren, me yog Blossom ni gaar: “Rayog ni nge pagan’med ngay ndariy e ngiyal’ ni gu ra pagtalin e re nep’ i n’em!” Ere gimed e piin gallabthir e manga yugum felfelan’gad me pagan’med u nap’an ni gimed ra guy pi fakmed ni kar ognaged yad ngak Jehovah kar uned ko taufe, ma kar manged boch e tapigpig rok.