Ba T’uf ni Nge Un e Piin Kristiano ko Taufe

1, 2. (a) Mang e ma lemnag boch e gallabthir ni Kristiano u nap’an nra yog reb i fakrad ni baadag ni nge un ko taufe? (b) Mang fan ni yima fith e piin ni ngar uned ko taufe ko kar ognaged yad ngak Jehovah fa dawor? (Mu guy e sasing ni bay u tabolngin e re article ney.)

GALLABTHIR rok Maria nreb e buliyel e yow be yaliy e piin ni yad ra un ko taufe. Ma aram me sak’iy Maria nge fapi cha’ nga lang me fith faen ni be pi’ e welthin l’agruw e deer ngorad, ma aram me pi’ Maria e fulweg riy ni ke non nib ga’ laman mab tamilang. De n’uw nap’an nga tomuren, ma aram me un ko taufe.

² Ke felfelan’ e gallabthir rok Maria ni ke dugliy ni nge ognag e yafos rok ngak Jehovah nge un ko taufe. Yugu aram rogon, ma immoy boch ban’en ni i maruwar u wan’ e chitiningin Maria u m’on ni nge un ko taufe, ya i gaar u wan’: ‘Gur, kaygi bitir Maria ni nge un ko taufe? Gur, ri manang feni ga’ fan e n’en ni ke dugliy ni nge rin’? Ma gur, ba fel’ ni nge son buchuuw u m’on ni nga fini un ko taufe?’ Ireray boch e deer ni ma lemnag boch e gallabthir u nap’an nra yog reb i fakrad ni baadag ni nge un ko taufe. (Ekl. 5:5) Bin riyul’ riy e, nge ognag be’ ir ngak Got me un ko taufe e aram e gali n’en nth’abi ga’ fan nra rin’ reb e Kristiano u lan e yafos rok.​—Mu guy fare kahol ni kenggin e “Kam Ognagem ngak Jehovah, Fa?”

3, 4. (a) Uw rogon ni weliy apostal Peter reb e fanathin ni be tamilangnag feni ga’ fan e taufe? (b) Mang fan nrayog ni ngan taareb rogonnag e taufe ko fare arke nni toy u nap’an Noah?

³ Nap’an ni be weliy apostal Peter murung’agen e taufe, ma aram me weliy murung’agen fare arke ni toy Noah ni gaar: “Taufe ni be yip’ fan e re n’ey e ku aram e n’en ni be thapegmed e chiney.” (Mu beeg e 1 Peter 3:20, 21.a) Re arke nem e micheg ngak e girdi’ ni baadag Noah ni nge rin’ e tin nib m’agan’ Got ngay u polo’ i gum’irchaen. I rin’ Noah e maruwel ni pi’ Jehovah ngak u fithik’ e yul’yul’. Arrogon, pi n’en ni rin’ Noah u fithik’ e michan’ rok ngak Got e aram e n’en ni ayuweg e yafos rorad chon e tabinaw rok u nap’an fare Ran ni Tharey e Fayleng. Ere, mang e be guy Peter rogon ni nge tamilangnag ko re fanathin nem?

⁴ Fare arke e aram e n’en ni micheg ko girdi’ nib mich Got u wan’ Noah. Ere, nap’an nra guy e girdi’ be’ ni ke un ko taufe, ma aram e kar nanged ni ke ognag e yafos rok ngak Jehovah ni bochan e ba mich Kristus u wan’ ni ke fos ko yam’. Piin ni kar uned ko taufe e yad ma rin’ e maruwel ni ke pi’ Got ngorad u fithik’ e yul’yul’ ni bod rogon Noah. Pi tapigpig rok Got ni kar uned ko taufe ni yad ba yul’yul’ ngak e yira ayuweg e yafos rorad u nap’an ni yira thang e re fayleng nib kireb ney, ni bod rogon nni ayuweg e yafos rok Noah u nap’an fare Ran ni Tharey e Fayleng. (Mark 13:10; Rev. 7:9, 10) Aram fan nrib t’uf ni nge ognag be’ e yafos rok ngak Got me un ko taufe. Be’ ni susun e rayog ni nge un ko taufe ma der rin’ e rayog ni nge mul e athap ko yafos ni manemus u pa’.

5. Mang e gad ra weliy ko re article ney?

⁵ Chiney ni kad nanged feni ga’ fan e taufe e bay dalip e deer nib t’uf ni ngad weliyed e fulweg riy. Bin som’on e, mang e be yog e Bible u murung’agen e taufe? Mang boch ban’en nthingari rin’ be’ u m’on ni nge un ko taufe? Ma mang fan nib t’uf ni nga i lemnag be’ feni ga’ fan e taufe u nap’an ni be fil e Bible ngak pi fak ara yugu be’?

N’EN NI BE YOG E BIBLE U MURUNG’AGEN E TAUFE

6, 7. (a) Mu weliy fan e taufe ni i tay John ko girdi’. (b) Mini’ e taufenag John ni yugu ba thil fan, ma mang fan?

⁶ Tin som’on e taufe ni kan weliy murung’agen u Bible e aram e taufe ni i tay John ni Tataufe ngak boch e girdi’. (Matt. 3:1-6) Piin ni i taufenagrad John e ra uned ko taufe ni bochan e ngar daged ni kar kalgadngan’rad ko denen ni ur rin’ed nib togopuluw ko fare Motochiyel rok Moses. Machane, mu tay fanam i yan riy ni bin th’abi ga’ fan e taufe ni tay John e dariy rogon ngak be’ ni ke kalngan’ ko denen rok. Rib tow’ath John ni bochan e ir e taufenag Jesus ni Fak Got nib flont. (Matt. 3:13-17) Jesus e dariy e denen rok, ere de t’uf ni nge kalngan’. (1 Pet. 2:22) I un ko taufe ni bochan e nge dag ni ke ognag ir ni nge rin’ e tin nib m’agan’ Got ngay.​—Heb. 10:7.

⁷ Nap’an ni i machib Jesus u fayleng, maku bay boch i gachalpen ni ur taufenaged yugu boch e girdi’. (John 3:22; 4:1, 2) Pi girdi’ nem e nni taufenagrad ni bochan e nge m’ug ni kar kalgadngan’rad ko denen ni ur rin’ed nib togopuluw ko fare Motochiyel rok Moses. Machane, tomuren ni yim’ Jesus min faseg ko yam’, ma piin ni yad baadag ni ngar manged boch i gachalpen Jesus e ba thil fan ni ur uned ko taufe.

8. (a) Mang thin e tay Jesus chilen ngak pi gachalpen u tomuren ni fos ko yam’? (b) Mu weliy feni ga’ fan e taufe ni ma tay e piin Kristiano.

⁸ Nap’an e duw ni 33 C.E., u tomuren ni kan faseg Jesus ko yam’ ma aram me m’ug ngak bogi girdi’ ni kar muulunggad nib pag 500 urngirad ni pumoon, nge ppin, ma sana ku immoy e bitir u fithik’rad. Sana rayog ni aram e ngiyal’ ni yog fapi thin ni be gaar: “Mmarod ngak girdien e pi nam u gubin yang ngam pingeged yad ngar manged pi gachalpeg, mi gimed taufenagrad nga fithingan e Chitamangiy nge Fak nge fare Kan ni Thothup [“gelngin Got nib thothup,” NW], mi gimed fil ngorad rogon ni nguur folgad u gubin e tin ni ku gog ngomed ni nguum rin’ed.” (Matt. 28:19, 20; 1 Kor. 15:6) Arrogon, bod nsana bokum miriay pi gachalpen Jesus ni ur moyed ko ngiyal’ ni yog Jesus ni ngan yognag boch e girdi’ ni ngar manged pi gachalpen. Ki yog nib t’uf ni ngan taufenag e piin ni yad baadag ni ngar manged boch i gachalpen ara ngar feked e mat’ rok. (Matt. 11:29, 30) Faanra baadag be’ ni nge fel’ e pigpig ni be tay u wan’ Got, ma thingari tamilang u wan’ ni be fanay Jehovah Jesus ni nge lebguy e n’en nib m’agan’ ngay. Tomuren e re n’ey, ma aram e rayog ni nge un facha’ ko taufe. Kemus rogon e taufe nrayog ni ngan tay ku be’ nib m’agan’ Got ngay. Boor e thin nu Bible ni be micheg ni piin ni ur manged boch i gachalpen Jesus u nap’an e bin som’on e chibog e yad manang feni ga’ fan ni nge un be’ ko taufe. Ma da ur lemnaged ni ngar songad nib n’uw nap’an mfin nra uned ko taufe.​—Acts 2:41; 9:18; 16:14, 15, 32, 33.

DAB MU SON NGE PAG NAP’AN

9, 10. Mang e rayog ni ngad filed u murung’agen e taufe nni tay ngak fare moon nu Ethiopia nge apostal Paul?

⁹ Mu beeg e Acts 8:35, 36. Am lemnag e n’en ni buch rok fare moon nu Ethiopia ni pig nge mang reb e Kristiano. Ngiyal’ nem e ka fini sul ko liyor ni ma tay u Jerusalem ni be sor i yan nga tafen. I l’og e engel rok Jehovah Filip ni nge yan i non ngak e re moon nem me weliy ngak “fare Thin Nib Fel’ ni murung’agen Jesus.” Ere, mang e rin’ fare moon? N’en ni rin’ e be micheg nrib ga’ fan u wan’ e tin riyul’ ni ke fil. Baadag ni nge rin’ e n’en nib m’agan’ Jehovah ngay ni nge rin’. Ere, ka chingiyal’ nem ma aram me un ko taufe.

¹⁰ Bin migid e reb e pumoon nib Jew ni i gafgownag e piin Kristiano. Fare nam nu Israel e ba nam ni kan ognag ngak Got, machane ke kireb e tha’ u thilrad Jehovah ni bochan e da ur folgad. I lemnag Saul ni kab m’agan’ Got ko pigpig ni be tay e pi Jew, ere aram fan ni i gafgownag e piin Kristiano. Machane faani reb e rran, ma aram me non Jesus Kristus u tharmiy ngak. Ngiyal’ nem e kan faseg Jesus ko yam’ ma bay u tooben e chitamangin u tharmiy. Ere, mang e rin’ e re moon nem? I pag Ananias nreb e Kristiano ni nge ayuweg. Be gaar e Bible: “Me sak’iy Saul nga lang min taufenag.” (Acts 9:17, 18; Gal. 1:14) Boch nga tomuren ma aram me mang apostal Paul. Machane, mu tay fanam i yan riy nu tomuren ni tamilang u wan’ ni be fanay Got Jesus ni nge lebguy e n’en nib m’agan’ ngay, ma aram me rin’ e n’en nthingari rin’. Ka chingiyal’ nem ma aram me un ko taufe.​—Mu beeg e Acts 22:12-16.

11. (a) Mang e ma k’aring e piin ni yad ma fil e Bible e ngiyal’ ney ni ngar uned ko taufe? (b) Uw rogon e lem rodad u nap’an ni gad ra guy be’ ni ke un ko taufe?

¹¹ Ku arrogon e piin ni gad ma fil e Bible ngorad e ngiyal’ ney ndemtrug ko ka yad bbitir fa kar piilalgad. Piin nib mich Got u wan’rad mab ga’ fan e tin riyul’ u Bible u wan’rad e ri yad baadag ni ngar ognaged yad ngak Got ngar uned ko taufe. Fare welthin ni yima pi’ u nap’an e pi assembly nge convention ni fan ko piin ni ngar uned ko taufe e aram reb e welthin nib ga’ fan ni yima pi’ u nap’an e pi muulung ney. Ri ma felfelan’ e Pi Mich Rok Jehovah u nap’an nra mich e tin riyul’ u wan’ be’ ni be fil e Bible me mon’og i yan nge mada’ ko ngiyal’ ni ke un ko taufe. Kub gel e felfelan’ ni ma tay e pi gallabthir ni Kristiano u nap’an ni yad ra guy pi fakrad ni kar uned ko taufe. Nap’an e September ko duw ni 2016 nge yib i mada’ ko August ko duw ni 2017, mab pag 284,000 e girdi’ ni yad baadag ni nge “yog e yafos” ngorad ni kar uned ko taufe ni aram e pow riy ni kar ognaged yad ngak Jehovah. (Acts 13:48) Ba tamilang ni pi walag ney e yad manang nib t’uf ni nge un e piin Kristiano ko taufe. Ere, mang boch ban’en ni kar rin’ed u m’on ni ngar uned ko taufe?

12. Mang boch ban’en nthingari rin’ be’ ni be fil e Bible u m’on ni nge un ko taufe?

¹² U m’on ni nge un be’ ni be fil e Bible ko taufe, ma thingari maruweliy e michan’ rok ko tamilangan’ ni ke fil u murung’agen Got, nge n’en nib m’agan’ ngay, nge n’en ni ke rin’ ni nge yognag e yafos ko girdi’. (1 Tim. 2:3-6) Michan’ rok faen ni be fil e Bible e aram e n’en nra k’aring ni nge siyeg e pi ngongol ni yima rin’ nde m’agan’ Jehovah ngay, me guy rogon ni nge puluw e ngongol rok ko pi motochiyel rok Jehovah nib mat’aw. (Acts 3:19) Ba ga’ fan e re n’ey ni bochan e dabiyog ni nge m’agan’ Got ngak be’ ni ke ognag e yafos rok ngak, ma ka be rin’ boch e ngongol ni ma fanenikan. (1 Kor. 6:9, 10) Machane, gathi kemus nib t’uf ni nge puluw e ngongol rok be’ ko pi motochiyel rok Jehovah, ya kub t’uf ni nga i un ko muulung ma be machibnag ma be fil e tin riyul’ ko girdi’ ni gubin ngiyal’. I yog Jesus ni tin riyul’ i gachalpen e aram e piin ni yad ra rin’ fare maruwel ni machib. (Acts 1:8) Ireray e pi n’en nthingari rin’ be’ ni be fil e Bible u m’on ni nge ognag ir ngak Jehovah u daken e meybil me un ko taufe.

IRERAY REB E BAN’EN NI NGE NAMEG E PIIN BE FIL E BIBLE

13. Nap’an ni gad be fil e Bible ngak be’, ma mang fan nthingar dab da paged talin ni taufe e aram reb e ban’en nib t’uf ni nge rin’ be’ ni baadag ni nge mang reb e Kristiano?

¹³ Nap’an ni gad be ayuweg pi fakdad nge piin ni gad be fil e Bible ngorad ni ngar rin’ed e pi n’en nib t’uf ni ngar rin’ed, ma thingar dab da paged talin ni taufe e aram reb e ban’en nib t’uf ni nge rin’ be’ ni faanra baadag ni nge mang reb e tin riyul’ i gachalpen Jesus. Faanra ud lemnaged e re n’ey, ma aram e rayog ni nge fel’ rogon e numon u thildad pi fakdad nge en ni gad be fil e Bible ngak. Maku ra ayuwegdad ni nge dab da magagawongad ni nga dogned ngorad feni ga’ fan ni ngar ognaged e yafos rorad ngak Got ngar uned ko taufe ko ngiyal’ nib t’uf ni ngar rin’ed riy. Arrogon, gad baadag ni nge mon’og pi fakdad nge piin ni gad be fil e Bible ngorad nge yag nra uned ko taufe!

14. Mang fan nsusun e dab da towasariyed be’ ni nge un ko taufe?

¹⁴ Susun e dariy be’ ni nge towasariy fak ara en ni be fil e Bible ngak ni nge un ko taufe, ya Jehovah e der ma towasariydad ni ngad pigpiggad ngak. (1 John 4:8) N’en ni ngad rin’ed e nap’an ni gad be fil e Bible ngorad ma ngad tamilangnaged ngorad feni ga’ fan ni nge bagayad me guy rogon ni nge chugur e tha’ u thilrow Got. Faanra ke ga’ fan e tin riyul’ u wan’ be’ ma baadag ni nge rin’ e pi n’en nthingari rin’ e tin riyul’ e Kristiano, ma aram e ngiyal’ nra adag ni nge un ko taufe.​—2 Kor. 5:14, 15.

15, 16. (a) Gur, bay e re yangar nra taw be’ ngay mfin aram e rayog ni nge un ko taufe, fa? Mu weliy rogon. (b) Mang fan nthingari un be’ ni be fil e Bible ko taufe ni yugu aram rogon ni kan taufenag u yugu reb e teliw?

¹⁵ Dawor ni dugliy e re yangar nra taw be’ ngay mfin aram e rayog ni nge un ko taufe. Ra be’ ma rogon ni ma mon’og ko tirok Got ban’en. Boor e girdi’ ni ma taufe nri kab bitir, mar pared ni yad ba yul’yul’ ngak Jehovah u nap’an ni yad be ilal i yan. Ma boch e girdi’ e fin yad ma fil e tin riyul’ u Bible u nap’an ni kar pilibthirgad mar uned ko taufe. Boch i yad e ke pag 100 e duw rok mfini un ko taufe!

¹⁶ Immoy be’ ni tabab ko fol Bible u nap’an ni ke pilibthir ni fith e en ni yow ma fil e Bible ko ba t’uf ni ngki taufe bayay fa danga’, ya ke yoor raba’ e teliw ni kan taufenag riy u m’on ni nge un ko fol Bible. Ere, dag faen ni yow be fil e Bible boch e thin nu Bible ngak ni be pi’ e fulweg ko deer rok. Tomur riy ma aram me tamilang u wan’ e n’en ni be yog e Bible nib t’uf ni nge rin’, ma de n’uw nap’an nga tomuren ma aram me un ko taufe. Yugu aram rogon ni ke chugur ni nge gaman 80 e duw rok, machane de lemnag nde t’uf ni nge un ko taufe. Arrogon, ra m’agan’ Jehovah ko taufe ni kad ted ni faanra kad nanged e tin riyul’ u murung’agen e n’en nib m’agan’ ngay. Ere, piin ni ka fin nra manged boch i gachalpen Jesus e ba t’uf ni ngan taufenagrad ni yugu aram rogon ni kar taufegad u yugu reb e teliw.​—Mu beeg e Acts 19:3-5.

17. Mang e ba t’uf ni nge lemnag be’ ko rofen nra un ko taufe?

¹⁷ Rib gel e felfelan’ ni yima tay ko rofen nra un be’ ko taufe. Machane, ku aram e rofen nthingari lemnag facha’ boch ban’en nib ga’ fan. Thingari maruwel nib gel ya nge yag ni tay u gil’ e n’en ni ke micheg ngak Got u nap’an ni ke ognag e yafos rok ngak. Aram fan ni yog Jesus ni faanra nge mang be’ reb i gachalpen ma bod ni ke fek ba mat’ ke tay nga daken pon. Ra mang be’ reb i gachalpen Jesus ma ‘dab ki ngongol ni be yan nga tabon laniyan’, machane nge ngongol ni be yan ngan’ faanem ni ir e ke yim’ ni fan ngak ma kan faseg ko yam’.’​—2 Kor. 5:15; Matt. 16:24.

18. Mang boch e deer ni gad ra weliy ko bin migid e article?

¹⁸ Ireray e pi n’en ni i lemnag e chitiningin Maria u nap’an ni fith fapi deer ni kad weliyed aram ko tabolngin. Faanra gur reb e gallabthir, ma sana rayog ni kam lemnag e pi deer ni baaray ni be gaar: ‘Gur, ke bung rogon fakag nrayog ni nge un ko taufe? Ke gaman urngin ban’en ni ke tamilang u wan’ nrayog ni nge ognag ir ngak Got, fa? Gur, ba t’uf ni nge un fakag ko skul nib tolang me yag reb e maruwel nib fel’ ngak u m’on ni nge un ko taufe, fa? Ma uw rogon ni faanra ke un ko taufe, me boch nga tomuren me rin’ reb e denen nib ubchiya’?’ Ireray e pi deer ni gad ra weliy ko bin migid e article. Ku gad ra weliy rogon nrayog ni nge puluw rogon ni nge lemnag e pi gallabthir ni Kristiano murung’agen e taufe.