Ga Be ‘Nang Fan’ Fa Danga’?

1, 2. Uw rogon ni gelnag Jesus e michan’ rok pi gachalpen ko rofen ni baaram ni fas ko yam’?

ARAM e rofen ni kan faseg Jesus ko yam’. Ma bay l’agruw i gachalpen ni yow be yan u but’ i yan nga reb e binaw ni medlip e mayel palogin u Jerusalem. Ngiyal’ nem e dawor ra nangew ni ke fas Jesus ko yam’, ere ri ka be kireban’row ko pi n’en ni ka fini buch ndawori n’uw nap’an. Ma yugu ra gingow ma bay Jesus u toobrow. Ma aram me tabab ni nge fal’eg lanin’row. Ni uw rogon? I weliy “ngorow e tin ni murung’agen ni kan weliy u lan urngin ken e babyor nib thothup, ni tabab ko yu ke rok Moses e babyor nge urngin e tin ni yoloy e pi profet.” (Luke 24:13-15, 27) Ka ngiyal’ nem mi yow thamiy rorow ni bod ba nifiy ni be yik’ u ngorngorrow ni bochan e ke “weliy fan” ara ke tamilangnag fan fapi thin ni bay u lan e Babyor nib Thothup ngorow.​—Luke 24:32.

² Ka rofen nem ni blayal’, ma aram me sul fa gali cha’ ni gachalpen Jesus nga Jerusalem. Ma nap’an nra piriegew e pi apostal rok Jesus, ma rognew ngorad urngin ban’en ni ke buch. Nap’an ni ka yow be non, me m’ug Jesus ngorad. Mi ri rus e pi apostal rok, ma aram me tabab ni nge maruwar Jesus u wan’rad. Machane, uw rogon ni gelnag Jesus e michan’ rorad bayay? Be gaar e Bible: “Ma aram me tamilangnag an’rad ngar nanged fan e pi n’em ni bay u lan e babyor nib thothup.”​—Luke 24:45.

3. Mang boch e magawon nrayog ni ngad mada’naged, ma mang e ra ayuwegdad ni ngkud felfelan’gad bayay ko machib ni gad be tay?

³ Bay yu ngiyal’ ni ma kireban’dad nib gel ni bod fa gali cha’ ni gachalpen Jesus. Ya sana gad be fanay yooren e tayim rodad ni ngad pigpiggad ngak Jehovah, machane darud guyed angin e maruwel ni gad be tay. (1 Kor. 15:58) Fa reb e ba sagaal ni be mon’og e piin ni gad ma fil e Bible ngorad. Maku rayog ni bay boch i yad ni kar talgad ni dakurur filed murung’agen Jehovah. Ere, faanra aray rogon e lem rodad, ma uw rogon ni ngkud felfelan’gad bayay ko machib ni gad be tay? Reb e ban’en nrayog ni nge ayuwegdad e aram e ngad guyed rogon ngad nanged fan e pi fanathin rok Jesus ni bay u lan e Bible. Chiney e ngad weliyed dalip ko pi fanathin nem, ma gad guy ko mang e rayog ni ngad filed riy.

FARE MOON NI WEREG E AWOCH NGEMU’ ME YAN I MOL

4. Mang e be yip’ fan fare fanathin rok Jesus ni murung’agen be’ ni yung e awoch u milay’ rok ngemu’ me yan i mol?

⁴ Mu beeg e Mark 4:26-29. Mang e be yip’ fan fare fanathin rok Jesus ni murung’agen be’ nib moon ni wereg e awoch u milay’ rok ngemu’ me yan i mol? Fare moon e be yip’ fan e piin ni yad be machibnag fare thin nib fel’ ni murung’agen Gil’ilungun Got. Fapi awoch e be yip’ fan fare thin nib fel’ ni gad ma machibnag ngak e piin ni yad baadag ni ngar nanged e tin riyul’. Rogon ni bay ko fare fanathin e tomuren ni wereg fare moon fapi awoch u milay’ rok, ma aram me sul nga i rin’ e pi n’en ni ka ma rin’, maku be “mol nnep’ ma be od ni rran.” Ba n’uw nap’an ni i ga’ fapi awoch. Ma re n’ey e i buch u nap’an e ngiyal’ ni baaram nni yung e pi awoch nem nge yan i taw ko ngiyal’ ni ke el wom’engin nrayog ni ngan fek. Thilin e ngiyal’ ni baaram nsom’on nni yung e pi awoch nem nge ngiyal’ ni ke el wom’engin e aram e ngiyal’ ni i “tugul fapi awoch [ma] be ga’ i yan.” Pi awoch nem e ur ga’gad ni ‘yad’ rorad ni buchuuw ma buchuuw. Re n’ey e rayog ni ngan taarebrogonnag nga rogon ni ma mon’og be’ ko tirok Got ban’en. Ma buch ni buchuuw ma buchuuw. Nap’an nra mon’og be’ nge taw ko ngiyal’ ni ke dugliy u wan’ ni nge pigpig ngak Got, ma aram e ke taareb rogon ko fare awoch ni ke yib wom’engin. Re n’ey e be yip’ fan ni nge ognag e yafas rok ngak Jehovah me un ko taufe.

5. Mang fan ni weliy Jesus fare fanathin ni murung’agen fare moon ni wereg e awoch ngemu’ me yan i mol?

⁵ Mang fan ni weliy Jesus e re fanathin ney? Ke weliy ni bochan e nge ayuwegdad ni ngad nanged ni Jehovah e ir e ma ayuweg awochngin e tin riyul’ ni nge ilal u laniyan’ e piin nriyul’ ni yad baadag ni ngar nanged e tin riyul’. (1 Kor. 3:7) Gadad e gad ma yung e awoch mu ud puoged e ran ngay, machane Got e ir e be ayuweg be ga’. Dariy ban’en nrayog ni ngad rin’ed ko re awoch ney nge ga’ nib papey, ya bod rogon fare moon nni weliy murung’agen u lan fare fanathin nde nang rogon ni i ga’ fapi awoch ni yung. Ere, dabiyog ni ngad nanged rogon ni be ilal awochngin e tin riyul’ u laniyan’ be’. Machane, ra munmun ma ra yib wom’engin fapi awoch ni kad yunged, ma aram me tabab facha’ ni nge un ngodad ko re maruwel ney ni gad be rin’, miki yib angin e ayuw ni be pi’ ngodad.​—John 4:36-38.

6. Mang e ba t’uf ni ngad nanged u rogon ni ma mon’og be’ ko tirok Got ban’en?

⁶ Mang e gad ra fil ko re fanathin ney? Bin som’on e, ba t’uf ni ngad nanged ndabiyog ni ngad gagiyegniged rogon ni be mon’og be’ ni gad be fil e Bible ngak ko tirok Got ban’en. Faanra gad manang e gin ni ngad musgad riy, ma aram e dab da towasariyed facha’ ni nge un ko taufe. Gad ra athamgil u rogon nrayog rodad ni ngad ayuweged, machane thingar da nanged ni ir e ba milfan ngak ni nge dugliy ni nge ognag ir ngak Got. Ya faanra ke ognaged be’ ir ngak Jehovah ni bochan e riyul’ nib t’uf Jehovah rok, ma aram e ra m’agan’ Jehovah ko n’en ni ke dugliy facha’ ni nge rin’.​—Ps. 51:12; 54:6; 110:3.

7, 8. (a) Mang e ku rayog ni ngad filed ko fare fanathin rok Jesus ni murung’agen fare moon ni yung e awoch ngemu’ me yan i mol? Mu weliy ban’en ni ke buch. (b) Mang e be fil e re n’ey ngodad u murung’agen Jehovah nge Jesus?

⁷ Bin migid e, faanra tamilang u wan’dad fan e re fanathin ney, ma ra ayuwegdad ni nge dabi mulan’dad ni faanra darud guyed angin e maruwel ni gad be tay ko som’on. Ba t’uf ni ngaud gum’an’niged gadad. (Jas. 5:7, 8) Mus ni faanra der ilal awochngin e tin riyul’ ni kad yunged nga laniyan’ be ni yugu aram rogon ni gad be athamgil u rogon nrayog rodad ni ngad ayuweged facha’, ma aram e gathi be yip’ fan nde fel’ rogon ni gad ma fil ban’en ngak be’. Ya kemus ni yigoo piin nib sobut’an’rad ma yad baadag ni ngar thilgad e ra pag Jehovah awochngin e tin riyul’ ni nge ilal u gum’ircha’rad. (Matt. 13:23) Ere, susun ndab ud lemnaged angin e machib ni gad ma tay ni be yan u rogon urngin e girdi’ ni kad ayuweged ni nge un ko taufe. Ya Jehovah e der ma yaliy angin e machib ni gad ma tay ni be yan u rogon ni be adag e girdi’ e machib. Ya athamgil ni gad ma tay u fithik’ e yul’yul’ e aram e n’en ni ma sap Jehovah ngay.​—Mu beeg e Luke 10:17-20; 1 Korinth 3:8.

⁸ Bin dalip e, gathi gubin ngiyal’ ni gad ma guy rogon ni ma thilyeg e tin riyul’ laniyan’ be’. Bod ni immoy ba wu’ i mabgol ni i fil reb e walag nib missionary e Bible ngorow nrognew ko re walag nem ni yow baadag ni ngar unew ko publisher. Ere, puguran fare walag ngorow ni u m’on ni ngar unew ko publisher, mab t’uf ni ngar talgow ko tamagow. Machane, ma rognew ngak ni ke yan in e pul ni kar talgow ko tamagow. Kari gin fare walag ko n’en ni ka rognew ngak. Mang fan ni kar talgow ko tamagow? Kar nangew ni faan yow ra tamagow ma rayog ni nge guyrow Jehovah, ma ma fanenikay Jehovah e piin ni yad ma dake yad be liyor ngak machane bin riyul’ riy e ba kireb e ngongol rorad. Ere, kar turguyew u wan’row nreb e ngar ululgow ko tamagow ndab kur mithagew ko fare walag, ma reb e ngar talgow. T’ufeg rorow ngak Jehovah e ir e ayuwegrow ni ngar mel’egew e n’en nib fel’ ni ngar rin’ew. Ere, bin riyul’ riy e kar mon’oggow ko tirok Got ban’en ni yugu aram rogon nde nang fare walag.

BANGI NUG NNI PAG U LAN E LIPATH

9. Mang e be yip’ fan fare fanathin ni murung’agen fagi nug nni pag u lan e lipath?

⁹ Mu beeg e Matthew 13:47-50. Mang e be yip’ fan fare fanathin rok Jesus ni murung’agen fagi nug nni pag u lan e lipath? I taarebrogonnag Jesus fare thin nib fel’ ni murung’agen Gil’ilungun Got ni yima machibnag ko girdi’ nga bangi nug nni pag u lan e lipath. Re nug nem e “urngin mit e nig” ni aw ngay. Taareb rogon ko machib ni gad ma tay ni urngin mit e girdi’ ni yad ma motoyil ngay. (Isa. 60:5) Be m’ug e mich riy u urngin e girdi’ ni yad ma un ko pi convention nge Puguran ni gad ma tay u gubin e duw. Bay boch e pi girdi’ ney ni taareb rogorad ko fapi nig nib “fel’” ni kan kunuyrad nga lan e ulung ni Kristiano. Machane, boch i yad e taareb rogorad ko fapi nig “ndariy ban’en nra fel’ ngay” ni bochan e dar fel’gad u wan’ Jehovah.

10. Mang fan ni weliy Jesus fare fanathin ni murung’agen fagi nug nni pag u lan e lipath?

¹⁰ Mang fan ni yog Jesus e re fanathin ney? Fapi nig ni kan kiegrad u lan fare fanathin e der yip’ fan e bin tomur e pufthin ni yira tay ko girdi’ u nap’an fare gafgow nib ga’. Ya be tamilangnag ban’en nra buch ko ngiyal’ ney ko tin tomuren e rran ko re m’ag nib kireb ney. I yog Jesus ni gathi urngin e piin ni yad baadag ni ngar motoyilgad ko tin riyul’ e yad ra mang tapigpig rok Jehovah. Boor e pi girdi’ ney e kar uned ko pi muulung ni gad ma tay. Ku bay boch i yad ni kar uned ngodad ko fol Bible machane dubrad ni ngar ognaged e yafas rorad ngak Jehovah.(1 Ki. 18:21) Ku bay boch i yad ni kar talgad ni dakurur uned ko muulung. Bay boch e fel’ yangaren ni gallabthir rorad e yad boch e Kristiano nde t’uf Jehovah rorad. Demtrug rogon, ma n’en ni tamilangnag Jesus e ra bagadad mab t’uf ni nge dugliy e n’en ni nge rin’. Ya piin ni yad ra dugliy ni ngar pigpiggad ngak Jehovah e taareb rogorad ko “pi machaf” ara pi n’en nib tolang puluwon ni kan fek ko “pi nam.”​—Hag. 2:7, BT.

11, 12. (a) Uw rogon nrayog ni nge yib angin ngodad fare fanathin ni murung’agen fagi nug nni pag u lan e lipath? (b) Mang e be fil ngodad u murung’agen Jehovah nge Jesus?

¹¹ Uw rogon nrayog ni nge yib angin ngodad fare fanathin ni murung’agen fagi nug nni pag u lan e lipath? Gad ra nang fan e re fanathin ney ma ra ayuwegdad ni nge dabi kireban’dad nib pag rogon ara mulan’dad ni faanra dabun e en ni gad ma fil e Bible ngak ara reb e bitir rodad ni nge pigpig ngak Jehovah. Ya demtrug gelngin e athamgil ni kad ted, maku rayog ni nge buch e re n’ey. Ra un be’ ko fol Bible ara nni chuguliy be’ ko tin riyul’, ma gathi aram e be yip’ fan nra adag e cha’nem ni nge pigpig ngak Jehovah. Machane, piin ndab ra folgad ko gagiyeg rok Jehovah e ra munmun mar paloggad ko ulung rok Got.

¹² Ere gur, re n’ey e be yip’ fan ni faanra ke digey be’ e tin riyul’ ma aram e dakuriy ba ngiyal’ nra sul ko ulung rok Got? Ma faanra dabi ognag be’ e yafas rok ngak Jehovah, ma aram e ke par ni ke taareb rogon ko fapi nig “ndariy ban’en nra fel’ ngay,” ma aram e dariy ba ngiyal’ nra thil? Danga’. Ka rayog ni nge thil e pi girdi’ ney e chiney ndawori tabab fare gafgow nib ga’. Ma bod ni be gaar Jehovah ngorad: “Mu sulod ngog, mu gu sul ngomed.” (Mal. 3:7) Ireray e n’en ni ki tamilangnag Jesus u reb e fanathin ni ki weliy ni murung’agen fare pagel ni yan nga bang.​—Mu beeg e Luke 15:11-32.

FARE PAGEL NI YAN NGA BANG

13. Mang e be yip’ fan fare fanathin ni murung’agen fare pagel ni yan nga bang?

¹³ Mang e be yip’ fan fare fanathin rok Jesus ni murung’agen fare pagel ni yan nga bang? Fare matam u lan e re fanathin nem ni ma runguy pi fak e be yip’ fan Jehovah ni ir e Chitamangidad ni bay u tharmiy. Fare pagel ni fak fare moon ni fek e tirok e salpiy nge yan i wereg nge m’ay e be yip’ fan e piin ni kar maloggad ko ulung. Re n’em ni kar chuwgad ko ulung e gowa bod ni ka ranod ko milekag nga reb e “nam” nib palog ni be yip’ fan e fayleng rok Satan, ma kar paloggad rok Jehovah. (Efe. 4:18; Kol. 1:21) Machane, bay boch i yad ni bayi munmun me sulan’rad ngak Jehovah bayay, ma aram mu kur sulod ko ulung rok ni bochan e kar nanged ni kar olobochgad. Pi girdi’ ney nib sobut’an’rad ma riyul’ ni kar kalgadngan’rad e nap’an ni yad ra sul ngak Jehovah ma ri ma felfelan’.​—Isa. 44:22; 1 Pet. 2:25.

14. Mang fan ni weliy Jesus fare fanathin ni murung’agen fare pagel ni yan nga bang?

¹⁴ Mang fan ni weliy Jesus e re fanathin ney? I tamilangnag Jesus ni baadag Jehovah ni nge sul e piin ni kar maloggad Ngak. Fare matam nni weliy murung’agen ko fare fanathin e i par ma be athapeg ni nge sul fak nga tabinaw. Ere, nap’an ni yigi guy fare pagel ni fak ni ke sul, me mil i yan ngak ni yugu aram rogon ni “kab orel ko tabinaw.” Re n’ey e rayog ni nge pi’ e athamgil nga laniyan’ e piin ni kar talgad ni dakurur pigpiggad ngak Jehovah ni ngar sulod ngak ni ka chiney. Ba mudugil ni kar meewargad ko tirok Got ban’en, maku reb e sana yad be tamra’, fa ba mo’maw’ ni ngar sulod. Machane, dabi yan i aw nib m’ay fan e n’en ni yad ra dugliy ni ngar rin’ed, ya ki mada’ ko pi engel u tharmiy ma yad ra felfelan’.​—Luke 15:7.

15, 16. (a) Mang e rayog ni ngad filed ko fare fanathin rok Jesus ni murung’agen fare pagel ni yan nga bang? Mu weliy e n’en ni ke buch rok l’agruw ni’. (b) Mang e be fil ngodad u murung’agen Jehovah nge Jesus?

¹⁵ Uw rogon nrayog ni nge yib angin ngodad fare fanathin ni murung’agen fare pagel ni yan nga bang? Susun ni ngad folwokgad rok Jehovah. De fel’ ni ngad lemnaged ni gad ba “fel’,” ma dab da adaged ni nge sul e piin ni kar kalgadngan’rad ko ulung rok Got. Faanra ud lemgad ni aray rogon ma rayog ni nge kirebnag e tha’ u thildad Jehovah. (Ekl. 7:16, BT) Bay ban’en ni ku rayog ni ngad filed ko re n’ey. Faanra ke chuw be’ ko ulung, ma susun ni ngaud ted facha’ ni bod “ba saf ni ke malog” ni dabisiy nra ba ngiyal’ ma ku ra sul bayay. (Ps. 119:176, BT) Faanra kad mada’naged be’ ni ke malog ko ulung, machane dawor ni tharbog, ma gad ra guy rogon ni ngad ayuweged ni nge sul ko ulung bayay fa danga’? Gad ra gur nga dogned ko piin piilal ya nge yag nni ayuweg fa danga’? Gad ra rin’ ni faanra gad be fol ko fare fanathin rok Jesus ni murung’agen fare pagel ni yan nga bang.

¹⁶ Mu tay fanam i yan u rogon ni ke pining boch e walag ni kar sulod ko ulung e magar ngak Jehovah nge ulung rok ko t’ufeg nge runguy ni kan dag ngorad. Reb e walag ni pumoon ni ke gaman 25 e duw ni kan tharbog ko ulung miki sul bayay e yog ni gaar: “Ka nap’an nni sulwegeg ko ulung keb i mada’ ko chiney ni be gel e felfelan’ rog i yan ni bochan e be pi’ Jehovah ngog e ‘ngiyal’ ni nge yib gelngig.’ (Acts 3:19, 20) Gubin e girdi’ ni yad be ayuwegeg ma yad be dag e t’ufeg ngog! Gu bay u reb e tabinaw nrib manigil.” Ku bay reb e walag nib pin ni kab fel’ yangaren ni ki tal ndaki pigpig ngak Jehovah u lan lal e duw ni ki yog ni gaar: “Dabiyog ni nggu weliy gelngin e felfelan’ ni kug tay u nap’an ni gguy fare t’ufeg ni i weliy Jesus murung’agen ni kan dag ngog. Ri gub felfelan’ ni gag bang ko ulung rok Jehovah, ma dariy ban’en nrayog ni ngan taarebrogonnag ngay!”

17, 18. (a) Mang boch ban’en ni kad filed ko fapi fanathin rok Jesus? (b) Mang e susun ni ngad rin’ed?

¹⁷ Mang e kad filed ko re dalip i fanathin ney? Bin som’on e, ba t’uf ni ngad nanged ndabiyog ni ngad gagiyegniged rogon e mon’og ni ma tay be’ ko tirok Got ban’en, ya kemus ni Jehovah e rayog ni nge rin’ e re n’ey. Bin migid e, de puluw ni ngad lemnaged ni urngin e piin ni yad be fil e Bible ara yad ma un ko muulung e yad ra mang tapigpig rok Jehovah. Ma bin dalip e, yugu aram rogon ni ke tal boch e girdi’ ni dakurur pigpiggad ngak Jehovah, ma susun ni ngaud pired ma gad be athapeg ni ka yad ra sul. Ma faanra kar sulod, ma ngad daged ngorad ni kar da felfelan’gad ni bod rogon Jehovah.

¹⁸ Manga yigi bagadad me ulul i gay e tamilangan’, me guy rogon ni nge nang fan boch ban’en, me gay e gonop. Nap’an ni gad ra beeg murung’agen e pi fanathin rok Jesus ney, ma ngad fithed ko mang e be yip’ fan, ma mang fan nni yoloy nga lan e Bible, ma uw rogon nrayog ni ngad folgad riy, ma mang e be fil ngodad u murung’agen Jehovah nge Jesus. Faan gad ra rin’ ni aray rogon, ma aram e gad be nang fan fapi thin rok Jesus.