Dam Nang Ko Uw E Ra Yib Angin Riy!

“Mu yung e woldug ko ley ni kadbul e yal’ nge mithigyal’; ma dabiyog ni ngam nang ko gubin nra tugul nib fel’ rogon fa danga’, fa reb e ra tugul bang e woldug rom nib fel’ rogon ma bang e dabi fel’ rogon.”​—EKL. 11:6.

1. Mang fan ni yira ngat maku ra sobut’an’uy ni ngan guy ba woldug ni be ga’ i yan?

BE’ NI tamilay’ e ba t’uf ni nga i gum’an’. (Jas. 5:7) Tomren ni ke wereg awochngin e woldug rok, mab t’uf ni nge sonnag ni nge tugul me ilal. Munmun, nfaanra bfel’ rogon, ma ra pil nge tugul, me yib i m’ug u fithik’ e but’ nga lang. Me ga’ me yib wom’engin. Munmun, ma rayog rok facha’ ni nge kunuy wom’engin e woldug rok. Riyul’ ni yira ngat ngay ni ngan guy ere maang’ang nem ko woldug ni be tugul be ga’ i yan! Maku ra sobut’an’dad ni gad ra nang ko mini’ Tapgin ma ke tugul. Rayog ni ngad ayuweged fare awoch. Maku rayog ni ngad pied e ayuw u rogon i tarannag. Machane kemus ni yigoo Got e rayog ni ayuweg nge tugul.​—Mu taarebnag e 1 Korinth 3:6.

2. Mange fil Jesus u murung’agen rogon ni ngan ilal ko tirok Got ban’en u lan fapi fanathin ni kad weliyed ko fa binem e article?

² Rogon ni kad guyed ko fa bin ni ke m’ay e article, e ke taarebrogonnag Jesus e maruwel ko machib ko Gil’ilungun nga rogon ni ma wereg be’ nib tamilay’ e awoch. U lan fare fanathin u murung’agen e but’ nib thilthil, e tamilangnag Jesus riy nyugu aram rogon nib fel’ e awoch ni ke yung fare tamilay’, machane rarogon gum’irchaen be’ e ir era dugliy ko ra tugul fare awoch nge ilal fa. (Mark 4:3-9) U lan fare fanathin u murung’agen reb e tamilay’ ni yung e awoch me mol, e tamilangnag Jesus riy nde nang fare tamilay’ rogon nra mang be’ reb i gachalpen Jesus. Re n’ey e bochan ni gelngin Got e ma ilalnag ban’en, gathi bochan e n’en ni be rin’ e girdi’. (Mark 4:26-29) Ngkud guyed dalip ko pi fanathin rok Jesus​—fare awochngin e mustard, n’en ni ma thownag e flowa, nge fagi nug.a

Fare Fanathin u Murung’agen e Awoch ko Mustard

3, 4. Gin ngan ko fare machib u murung’agen e Gil’ilungun e be tamilangnag fare fanathin u murung’agen e mustard?

³ Fare fanathin u murung’agen e awoch ko mustard, ni kun weliy murung’agen u Mark guruy ni 4, e be tamilangnag l’agruw i ban’en: bin nsom’on, e mon’og ni be tay fare machib u murung’agen fare Gil’ilungun ni yibe wereg; ma bin l’agruw e ayuw ni yira pi’ ngak e piin ni yad ra motoyil ko re thin nem. I gaar Jesus: “Susun e be mang e gadad ra susunnag e gagiyeg rok Got ngay? Fa mang fanathin e ir e gadad ra maruwel ngay nge mang ir e tamilangnag? Bod rogon ba awochngin e mustard, ni ir e th’abi achichig u fithik’ urngin mit e awoch u fayleng. Me fek be’ nge yung; ma faani munmun me tugul nge ga’ nge mang ir e th’abi ga’ u fithik’ urngin e woldug. Me yib papa’ngin ni ba ga’, me yib e arche’ ra toyed taferad ko yungi n’en nib tagalul’ u fithik’ i papa’ngin.”​—Mark 4:30-32.

⁴ U roy e kad guyed riy e mon’og ko “fare gil’ilungun Got” ni aram e ke m’ug e mich riy u daken fare machib u murung’agen fare Gil’ilungun ni be garer i yan nge rogon e mon’og ni ke tay fare ulung ko Kristiano u nap’an e Pentekost 33 C.E. i yib nge mada’ ko ngiyal’ ney. Ba awochngin e mustard e ba awoch nib achig nrayog ni nge yip’ fan ban’en nrib achig. (Mu taarebnag e Luke 17:6.) Yugu aram rogon, ma ra munmun, ma bake mustard e rayog ni nge ilal nge gaman 10 i yan ko 15 e feet tolngin ken ma be gel papa’ngin ere rayog ni nge bod yaan e gek’iy.​—Matt. 13:31, 32.

5. Mang mon’og e ke guy e ulung ko Kristiano ko bin nsom’on e chibog?

⁵ Mon’og ni tay fare ulung ko Kristiano e tabab nib achig u nap’an e 33 C.E. ko ngiyal’ nni dugliy 120 i gachalpen Jesus ko kan ni thothup. U lan bochi tayim nib achig, ma chi ulung i gachalpen Jesus ney e un ngorad bokum e biyu’ e piin ni michan’rad. (Mu beeg e Acts 2:41; 4:4; 5:28; 6:7; 12:24; 19:20.) Kemus nu lan guyey e duw ma ke yoor i yoor girdien e mokun woldug nge ni mada’ ko ngiyal’ nrayog ni yog apostal Paul ngak fare ulung nu Kolose ni fare thin nib fel’ e kan “machibnag ngak urngin e girdi’ u fayleng.” (Kol. 1:23) Rib gel e mon’og ni be tay e machib!

6, 7. (a) Mang mon’og e buch ni ka nap’an e duw ni 1914? (b) Ku mang boch e mon’og ni bay ki buch?

⁶ Ka nap’an e ngiyal’ ni kan sunmiy Gil’ilungun Got u tharmiy ko duw ni 1914, ma pa’pa’ngin fare ke “gek’iy” ni mustard e ke ga’ ke pag ga’ngin nni lemnag. Girdi’ rok Got e kar guyed ni ke lebug fare yiiy rok Isaiah ni gaar: “Mus ko re tabinaw nib th’abi lich e girdi’ riy ma ba sobut’ ni bay ra pired ni bod ba nam ni ba ga’ ma ba gel.” (Isa. 60:22) Fachi ulung ko piin ni kan dugliyrad ni ur uned ko fare maruwel ni fan ko Gil’ilungun u tabolngin e bin 20 e chibog e dar lemnaged nra taw ko duw ni 2008, ma sogonap’an medlip milyon e Pi Mich ni yad be un ko re maruwel ney u lan boor ko 230 e nam. Riyul’ nrib gel e mon’og ni be tay e machib, ni ke taareb rogon ko fare awochngin e mustard u lan fare fanathin rok Jesus!

⁷ Machane, gur ke tal u rom? Danga’. Ra taw nga nap’an ma gubin e piin ni yad be par u fayleng e yad ra par u tan Gil’ilungun Got. Gubin e piin ni yad be togopuluw e goo yira thangrad. Ra buch ere n’ey ni angin e n’en ni be gay e girdi’ rogon ni ngar rin’ed machane bochan ni fare Got Nth’abi Tolang ni aram Jehovah e rab i pithig e magawon ko girdi’. (Mu beeg e Daniel 2:34, 35.) Ma aram e gad ra guy ni ki lebug reb e yiiy rok Isaiah ni gaar: “Ma girdi’ ko nam e ri bayi tamilangan’rad u murung’agen Somol ni bod rogon lan e yungi day nib sug ko day.”​—Isa. 11:9.

8. (a) Mini’ e be yip’ fapi arche’ u lan e fanathin rok Jesus fan? (b) Mang e n’en ni mus ko chiney ma yibe ayuwegdad riy?

⁸ I yog Jesus ni pi arche’ ni yad be chachangeg u lan e lang e rayog ni ngar pirieged e toffan ko tagalul’ ko re Gil’ilungun ney. Pi arche’ ney e der yip’ fan e pi toogor ko fare Gil’ilungun ni yad be gay rogon ni ngar longuyed e tin nib fel’ e awoch, ni bod fapi arche’ u lan fare fanathin u murung’agen fare moon ni wereg e awoch nga daken e but’ ni boor mit. (Mark 4:4) Ya, u lan ere fanathin ney e fapi arche’ e be yip’ fan e piin nib mat’aw ni yad be gayiy e ayuw u lan e ulung ko Kristiano. Mus ko chiney, ma pi girdi’ ney e kan ayuwegrad ni nge dab ra rin’ed e ngongol nib kireb, nge boch e ngongol nib kireb u lan ere fayleng ni kireb ney. (Mu taarebnag ko Isaiah 32:1, 2.) Maku arrogon ni taarebrogonnag Jehovah Gil’ilungun fare Messiah ngab ke gek’iy ni yog ko yiiy ni gaar: “Gu ra yung nge tugul nggu fek ngagu yung nga daken e burey nib tolang u Israel, me yib papa’ngin nge k’uf me mang ba ke gek’iy ni cedar nib ga’. Mu tan e ra i par urngin e arche’ riy; ma yad ra par ko tagulul’ u yuwan.”​—Ezek. 17:23, NW.

Fare Fanathin ko N’en ni Ma Thownag e Flowa

9, 10. (a) Mange n’en ni tamilangnag Jesus u lan fare fanathin u murung’agen e n’en ni ma thownag e flowa? (b) U lan e Bible, ma mange ba ga’ ni ma yip’ e n’en ni ma thownag e flowa fan, ma mang deer u murung’agen e re n’ey ni weliy Jesus e gad ra weliy?

⁹ Mon’og e gathi gubin ngiyal’ nrayog ni nge guy e girdi’. U lan e bin migid e fanathin ni pi’, me tamilangnag Jesus e re n’ey. I gaar: “Gagiyeg nu tharmiy e bod e n’en ni ma thownag e flowa ni fek be’ ni ppin nge athkuy nga ba dabiy i flowa me thownag fa gi flowa ni ga’ngin.” (Matt. 13:33) Re n’ey ni ma thownag e flowa e mang e be yip’ fan, ma uw rogon nib l’ag rogon ko mon’og ni be tay fare Gil’ilungun?

¹⁰ U lan e Bible, ma n’en ni ma thownag e flowa e ba ga’ ni yima fanay ni be yip’ fan e denen. Apostal Paul e weliy murung’agen e n’en ni ma thownag e flowa ko biney e kanawo’ u nap’an ni be weliy murung’agen e ngongol nib kireb rok reb e tadenen u lan e ulung u Korinth nrayog ni nge af ngak boch e girdi’. (1 Kor. 5:6-8) Be fanay Jesus e n’en ni ma thownag e flowa ni nge yip’ fan e mon’og ni be tay ban’en nib kireb, fa?

11. Uw rogon ni yima fanay e n’en ni ma thownag e flowa u Israel kakrom?

¹¹ U m’on ni gad ra fulweg ere deer nem, mab t’uf ni ngad tedan’dad nga dalip ban’en nib riyul’. Bin taareb, yugu aram rogon nde pag Jehovah ni ngan tay e n’en ni ma thownag e flowa ko flowa u nap’an e madnom ko paluk’af, ma yu ngiyal’ e i fel’ u wan’ e maligach ni bay e n’en ni ma thownag e flowa riy. N’en ni ma thownag e flowa e kan fanay nib peth ko maligach ni yima yog e communion ngay, ni faen ni ma pi’ e maligach e ma ognag e maligach rok ni be pining e magar ngak Jehovah ni bochan e tow’ath ni ma pi’. Re abich ney e ra yibnag e felfelan’ ngak e piin ni yad ra un ngay.​—Lev. 7:11-15.

12. Mange rayog nda filed u rogon ni ma fanay e Bible ban’en ni nge yip’ fan ban’en?

¹² Bin l’agruw, yugu aram rogon nrayog ni ngan fanay ban’en ni nge yip’ fan ban’en nib kireb u lan e Bible, machane ba ngiyal’ ma rayog ni ngkun fanay fare n’em ni nge yip’ fan ban’en nib fel’. Bod, ko 1 Peter 5:8, e kan taarebrogonnag Satan ngab layon, ni nge yip’ fan rarogon. Machane u Revelation 5:5, e kan taarebrogonnag Jesus nga ba layon​—“fare Layon ni yib ko ganong rok Judah.” Yan tomur u roy e kan fanay e layon riy ni nge yip’ fan e tin nib mat’aw mab mudugil.

13. Fare fanathin rok Jesus u murung’agen e n’en ni ma thownag e flowa e mange be dag u murung’agen e mon’og ni be tay e tirok Got ban’en?

¹³ Bin dalip e, lan fare fanathin ku Jesus, ma de yog ni fare n’em ni ma thownag e flowa e ke kirebnag ga’ngin yang fare flowa ndabkiyog ni ngan kay. Ya ke weliy murung’agen rogon ni yima ngongliy e flowa. Fare pin ni ma lith e flowa e ra tay boch e n’en ni ma thownag e flowa ko fare flowa, ma angin e ba fel’. Fare n’en ni ma thownag e flowa e ba mith u fithik’ fare flowa. Ere, dabiyog ni nge guy fare pin e n’en ni be buch u fithik’ fare flowa ma be thow. Re n’ey e be puguran ngodad fare moon ni yung e awoch ma faani nep’ me mol. I yog Jesus ni ‘tugul fapi awoch me ga’ i yan. Machane de nang [fare moon] rogon e n’en ni rin’ me yodorom.’ (Mark 4:27) Rib mom rogon ni ngan fanathinnag rogon ni be mon’og e tirok Got ban’en ndanir guy! Sana dab da guyed e ngiyal’ nem machane ra munmun ma ra gagiyel.

14. Gin ngan ko fare maruwel ni machib e kan fanathinnag u nap’an ni yog e Bible ni fare n’en ni yima tay ko flowa ni nge thownag e ke thownag fare dabiy i flowa?

¹⁴ Gathi kemus ndabiyog ni ngan guy e re mon’og ney machane ka be buch u ga’ngin yang e fayleng. Ku ireray ban’en ni kan tamilangnag u lan fare fanathin u murung’agen e n’en ni yima tay ko flowa. Fare n’en ni yima tay ko flowa ni nge thownag e ra thownag fare “dabiy i flowa” ni ga’ngin. (Luke 13:21) Bod e n’en ni ma thownag e flowa, fare machib ni yibe tay u murung’agen fare Gil’ilungun ni ke k’aring ni nge yoor pi gachalpen Jesus e yibe machibnag e chiney ko “yungi n’en ni yan i mus e fayleng ngay.” (Acts 1:8; Matt. 24:14) Ri gad ba tow’ath ni gad be un ko re maruwel ney ni fan ko fare Gil’ilungun!

Fagi Nug

15, 16. (a) Mu weliy fare fanathin u murung’agen fagi nug ni yima fanay ko fita’. (b) Mange be yip’ fagi nug fan, ma gin ngan ko mon’og ni be tay fare Gil’ilungun e be yip’ e re n’ey fan?

¹⁵ Ban’en ni kab ga’ fan nga urngin e piin ni yad be yog ni yad boch pi gachalpen Jesus Kristus e fel’ngirad. Be sor rogon ere n’ey ko mon’og ni be tay fare Gil’ilungun u nap’an ni ki pi’ reb e fanathin, nreb ni be weliy murung’agen e nug ni yima fanay ko fita’. I gaar: “Ma ku er rogon ni gagiyeg nu tharmiy e bod ba nug nni yan ni pag u lan e lipath, ni urngin mit e nig ma ra aw ngay.”​—Matt. 13:47.

¹⁶ Fagi nug, ni be yip’ fan fare maruwel ni ngan wereg e thin ko Gil’ilungun, e ma kunuy gubin mit e nig. I ulul Jesus ngay nge gaar: ‘Ma faani sug [fare nug] me girngiy girdien e fita’ nga dap’e l’ay mi yad par nga but’ ngar mel’eged fapi nig, mi yad yin’ e tin nib fel’ nga lan e chel rorad, ma tin ndariy ban’en nra fel’ ngay e ra n’iged. Aram e n’en ni ra rin’ ko ngiyal’ ni tomur ko re m’ag ney: pi engel e bay ranod ngar kunuyed urngin e girdi’ ni kireb ni bay u fithik’ e girdi’ nib fel’, nga ron’ed yad nga mit fare nifiy ni be yik’, ni ereram e gin ni bay ur yorgad riy ma be chachafin nguwelrad.’​—Matt. 13:48-50.

17. Mingiyal’ e be buch fare maruwel ni yibe kieg ni kan weliy ko fare fanathin u murung’agen fagi nug?

¹⁷ Gur, re n’ey ni ngan kieg e be yip’ fan e bin tomur e pufthin ni yira tay ko saf nge kaming ni yog Jesus nra buch u nap’an nra yib? (Matt. 25:31-33) Danga’. Re pufthin nem ko tomur e ra buch ko ngiyal’ nra yib Jesus riy u nap’an fare gafgow nib ga’. Rib thil, re n’em ni yibe kieg e nig nni weliy u lan fare fanathin u murung’agen bangi nug e ra buch “ko ngiyal’ ni tomur ko re m’ag ney.”b Ireray e ngiyal’ ni gad bay riy e chiney​—tin tomren e rran ni be yan i yan ko fare gafgow nib ga’. Ere uw rogon ni yibe kieg e pi nig nem e chiney?

18, 19. (a) Uw rogon ni yibe kieg e nig nib fanathin e chiney? (b) Mange ba t’uf ni nge rin’ e piin ni yad ba mat’aw? (Kum guy e footnote ko page 27.)

¹⁸ Riyul’ ni boor mit e nig nib fanathin ni be yip’ fan e girdi’ ni kar adaged e ulung rok Jehovah ko ngiyal’ ney. Boch i yad e ma un ko fare Puguran, ma boch i yad e ma un ko pi muulung rodad, ma boch i yad e ma fil e Bible. Machane gubin e pi girdi’ ney nriyul’ ni yad e Kristiano, fa? Sana ra giringiyrad girdien e fita’ ‘nga dap’e l’ay,’ machane ke yog Jesus ngodad ni kemus ni yigoo ‘tin nib fel’’ e yira yin’ nga lan e chel, ni be yip’ fan e ulung ko Kristiano. Tin ni baaram ndabi fel’ e yira n’ag, ma ra taw nga nap’an mi nin’rad nga fithik’ e nifiy ni aram e be yip’ fan e magothgoth ni bay ntay ngorad boch nga m’on.

¹⁹ Bod rogon fapi nig ndabi fel’, boor e piin ni ku ur filed e girdi’ rok Jehovah e Bible kafram ni kar talgad. Boch e piin ni kan gargelnagrad mab Kristiano e gallabthir rorad e dar adaged ni ngar manged e piin ni yad ma lek luwan ay Jesus. Dawori yog ni ngar dugliyed ni ngar pigpiggad ngak Jehovah ma faanra kar tababgad ko pigpig ma dabi n’uw nap’an mar talgad.c (Ezek. 33:32, 33) Rib t’uf ni gubin e piin ni yad ba mat’aw ma ngar paged yad ngan tayrad nga lan fare chel ni be yip’ fan fare ulung u m’on ni nge mus nap’an e pufthin mar pired ko gin ndariy ban’en nra buch rorad riy.

20, 21. (a) Mange kad filed ko n’en ni kad guyed ko fare fanathin rok Jesus u murung’agen e mon’og? (b) Mange kam dugliy ni ngam rin’?

²⁰ Ere, mange kam fil ko n’en ni kad filed ko fanathin rok Jesus u murung’agen e mon’og? Bin som’on, bod rogon e mon’og ko awochngin e mustard, ke gel e mon’og ni be tay urngin e girdi’ ni yad be fol ko fare machib ni yibe wereg u murung’agen fare Gil’ilungun. Dariy ban’en nrayog ni nge taleg e mon’og ni be tay e maruwel rok Jehovah! (Isa. 54:17) Maku, piin ni kar gayed e “tagalul’ u fithik’ i papa’ngin [fare ke gekiy]” e kan ayuwegrad rok Satan nge re fayleng ni kireb ney. Bin migid, Got e ir e ma ayuweg ni nge mon’og. Bod fare n’en ni ma thownag e flowa ni bay u fithik’ e flowa ni be thownag, re mon’og ney e gathi gubin ngiyal’ ni kan guy ara kan nang fan, machane be buch! Bin dalip, gathi gubin e piin ni kar motoyilgad e kar daged ni yad bfel’. Boch i yad e bod fapi nig ndabi fel’ u lan e fanathin rok Jesus.

²¹ Ere, rra yib e athamgil nga lanin’dad ni gad ra guy ni boor e piin ni yad bfel’ ni ke kunuyrad Jehovah ngak! (John 6:44) Re n’ey e keb angin ni mon’og ni yibe tay u reb e nam nge reb. Yigoo Jehovah Got e ngan pining e sorok ngak ko re mon’og ney ni yibe tay. Bochan ni kad guyed ere n’ey ni be buch, ma ra bagadad ma susuna nge adag ni nge fol ko fare thin ni kan yoloy u boch e chibog ni ke yan ni gaar: “Mu yung e woldug ko ley ni kadbul e yal’ . . . , dabiyog ni ngam nang ko gubin nra tugul nib fel’ rogon fa danga’, fa reb e ra tugul bang e woldug rom nib fel’ rogon ma bang e dabi fel’ rogon.”​—Ekl. 11:6.

[Footnotes]

Uw Rogon ni Ga Ra Fulweg?

• Mange be fil fare fanathin rok Jesus u murung’agen awochngin e mustard ngodad u rogon e mon’og ni be tay fare Gil’ilungun nge rogon ni yibe ayuwegey rok Satan nge re fayleng ni kireb ney?

• Mange be yip’ fan fare n’em ni yima tay ko flowa ni nge thownag, ma mang thin nriyul’ u murung’agen e mon’og ni be tay fare Gil’ilungun ni tamilangnag Jesus?

• Gin ngan ko mon’og ni be tay fare Gil’ilungun e kan tamilangnag u lan fare fanathin u murung’agen fagi nug?

• Uw rogon ni ngad pired ni gad ba muun ko piin ni ‘yibe tayrad nga lan e chel’?

[Pictures on page 24]

Mange be fil fare fanathin u murung’agen awochngin e mustard ngodad u rogon e mon’og ni be tay fare Gil’ilungun?

[Picture on page 25]

Mange kad filed ko fare fanathin u murung’agen e n’en ni ma thownag e flowa?

[Picture on page 27]

Fare nig ni yibe kieg e tin nib fel’ ko tin nib kireb e be dag yaan e mang?