Ngad Sonnaged e Tomur nib Taareban’dad

1, 2. Mang e baadag Got ni fan ko pi tapigpig rok ni demtrug ko kab fel’ yangarrad fa danga’?

GUR reb e fel’ yangaren, fa? Faanra gur reb, ma ngam nang nrib ga’ fam u lan e ulung rok Jehovah u fayleng. Boor e nam ni yooren e piin ni yad be un ko taufe riy e kab fel’ yangarrad. Rib manigil ni yibe guy boor e piin fel’ yangaren ni kar dugliyed ni ngar pigpiggad ngak Jehovah!

² Ga baadag ni ga ma chagil ngak yugu boch e fel’ yangaren, fa? Dabisiy ni ga baadag. Gad gubin ni gad baadag ni ngaud chagilgad ko pi taab yangar rodad. Machane, demtrug ko gad mini’ ara demtrug ko kab fel’ yangardad fa danga’, ma baadag Got ni ngaud pigpiggad ngak u taabang nib taareban’dad. I yog apostal Paul ni baadag Got ni “urngin e girdi’ ni ngar thapgad ngak ma ngar nanged e tin nib riyul’.” (1 Tim. 2:3, 4) Be yog e Revelation 7:9 ni pi tapigpig rok Got e kar bad u “gubin e nam, nge ganong, nge gubin mit e girdi’, ngu gubin e thin.”

3, 4. (a) Mang reb e lem ni ke garer ko pi fel’ yangaren e ngiyal’ ney? (b) Mang lem e ba puluw ko fare thin ni bay ko Efesus 4:25?

³ Rriyul’ nrib gel e thil u thilin e piin fel’ yangaren ni yad ma pigpig ngak Jehovah nge pi fel’ yangaren ko re fayleng ney! Boor e fel’ yangaren ndarur pigpiggad ngak Jehovah ni kemus ni yigoo yad nge tin ni yad baadag e ir e yad ma lemnag. Ma yog boch e girdi’ ni yad ma fal’eg i gay murung’agen boch ban’en ni biney e mfen e “Ba Mfen ni Gubin Ban’en Me Gag.” Ma m’ug ko thin rorad nge munmad ni yad ma tay ni dariy fan yugu boch e girdi’ u wan’rad nib ga’ ni piin ni yad ba piilal ngorad.

⁴ Ke garer e re lem ney u gubin yang. Mab ga’ ni be pirieg e pi fel’ yangaren ni yad ma pigpig ngak Jehovah nib mo’maw’ ni ngar siyeged e re lem ney mar rin’ed e tin nib m’agan’ Got ngay. Mus nga nap’an e bin som’on e chibog, me nang Paul nib t’uf ni nge pi’ e athamgil nga laniyan’ e piin taareb e michan’ rorad ni ngar siyeged e kanawo’ ni ‘u ranod’ riy kafram ni aram “fare lem ni be gagiyegnag e piin ndarir folgad rok Got.” (Mu beeg e Efesus 2:1-3.a) Rib fel’ e n’en ni ma rin’ e pi fel’ yangaren ni yad ma guy rogon ni ngar siyeged e mit ney e lem mar maruwelgad e tin ni ka bay e walag u taabang nib taareban’rad. Ba puluw e re lem ney ko n’en ni yog Paul ni faani gaar, “gadad gubin ni goo gadad yu yang u downgin Kristus.” (Efe. 4:25) Chiney ni gad be chugur nga tungun e re m’ag ney e rib ga’ fan ni ngaud maruwelgad u taabang nib taareban’dad. Chiney e ngad weliyed boch ban’en nra ayuwegdad ni nge ga’ fan u wan’dad ni ngaud pared u taabang nib taareban’dad.

KAR PARED U TAABANG

5, 6. Mang e gad ra fil rok Lot nge fa gal rugod ni fak u murung’agen rogon ni ngaud pared ni gad ba chugur nga taabang?

⁵ Kakrom e i m’agan’ Jehovah ngay ni nge ayuweg e girdi’ rok u nap’an ni i guy ni yad be ayuweged yad u nap’an ni kar mada’naged boch e magawon nib ga’. Ku rayog ni nge fil e pi tapigpig rok Got ban’en ko re n’ey e ngiyal’ ney ndemtrug ko kab fel’ yangarrad fa danga’. Ngad guyed e n’en ni buch rok Lot.

⁶ Immoy ba ngiyal’ ni par e yafas rok Lot nge chon e tabinaw rok nga thatharen e riya’. Ngiyal’ nem e be n’en ni nge thang Jehovah fare nam nu Sodom, ma aram e gin ni ma par Lot nge chon e tabinaw rok riy. Ere, yog e engel rok Got ngak Lot ni ngar chuwgad chon e tabinaw rok ko re mach nem, mar milgad nga daken e burey. I yog ngak ni gaar: “Mmilgad ngam ayuweged e pogofan romed!” (Gen. 19:12-22) I fol Lot nge fa gal rugod ni fak ko n’en nnog ngorad, ma aram ma ranod ngar chuwgad ko re mach nem. Machane, rib gel e kireban’ riy ni bochan e bay boch i chon e tabinaw rorad ndar folgad. Fa gal pagel ni kan dugliy ni ngar leayew fa gal rugod ni fak Lot e ur lemnagew “ni be thin ni gosgos.” Ma ireram e n’en ni rin’ ma de yag ni ngar mageygow ni yow ba fos. (Gen. 19:14) Yigoo Lot nge fa gal rugod ni fak e yag ni ngar mageygad ni yad ba fos ni bochan e ra pired u taabang.

7. Uw rogon ni ayuweg Jehovah e piin ni u ranod u taabang u nap’an ni chuw piyu Israel u Egypt?

⁷ Kum lemnag reb e ban’en ni buch kakrom. Nap’an ni chuw piyu Israel u Egypt, ma dar ki’gad nge boch i yad me yan u bang. Ma nap’an ni “fal Moses pa’ nga daken e day” me sey Jehovah fagi day nge par ni ke ruw raba’, ma de yan Moses nga barba’ riy ni goo ir ara kemus nri in piyu Israel e ra uned ngak. Ya ayuwegrad Jehovah ni yad gubin ngar thapgad nga barba’ fagi day. (Ex. 14:21, 22, 29, 30) Ra pared nib taareban’rad, ma “boor yugu boch e girdi’,” ni gathi yad piyu Israel nra uned ngorad. (Ex. 12:38) Ba mudugil ndariy boch e fel’ yangaren u fithik’rad nra pethgad nga taabang nga ranod u yugu reb e kanawo’ ni yad be lemnag nib fel’ ni nga ranod riy. Ya faan gomanga bay boch i yad ni rin’ ni aram rogon, mab mudugil nde ayuwegrad Jehovah.​—1 Kor. 10:1.

8. Uw rogon ni dag e girdi’ rok Got nib taareban’rad u nap’an Jehoshafat?

⁸ Nap’an Jehoshafat ni Pilung, me yib “baraba’ i salthaw nib ga’” ni ngar chamgad ko girdi’ rok Got. (2 Kron. 20:1, 2, BT) Machane, ba manigil e n’en ni rin’ e pi tapigpig rok Got ni bochan e dar guyed rogon ni ngar chamgad ko pi toogor rorad nem ni goo yad, ya ra ninged e ayuw ngak Jehovah. (Mu beeg e 2 Kronicles 20:3, 4.) Ku dar wergad nge bagayad me guy rogon ni nge pithig e re magawon nem ni goo ir rok, ya be gaar e Bible: “Gubin e pumoon nu Judah, nge pi leengirad nge pi fakrad, ni yad be sak’iy u rom ko fare Tempel.” (2 Kron. 20:13, BT) Yad gubin ndemtrug yangarrad ni kar athamgilgad u taabang ni ngar folgad ko n’en ni ke yog Jehovah ngorad, me ayuwegrad Jehovah u pa’ e pi toogor rorad. (2 Kron. 20:20-27) Ireray reb e ban’en ni buch nrayog ni nge ayuweg e pi tapigpig rok Got ni ngar gelgad nga boch e magawon u taabang.

9. Mang e rayog ni ngad filed ko pi Kristiano ko bin som’on e chibog u rogon ni ur pared nib taareban’rad?

⁹ Mus ko pi Kristiano ko bin som’on e chibog, ma ur maruwelgad u taabang. Bod nu tomuren ni pig boor e Jew nge piin gathi yad e Jew ngar manged Kristiano, mar “pired ni be machibnagrad e pi apostal, ma yad be par ni ke taareban’rad, ma yad be abich ma yad be meybil u taabang.” (Acts 2:42) Ma nap’an ni i mada’nag e piin Kristiano e togopuluw, ma ur pared nib taareban’rad. Ma aram e ngiyal’ nrib t’uf ni nge bagayad me ayuweg bagayad. (Acts 4:23, 24) Ere, nap’an ni gad ra mada’nag e togopuluw, ma thingar da pared nib taareban’dad ma nge bagadad me ayuweg bagadad.

NGAD PARED NIB TAAREBAN’DAD U M’ON NI NGE YIB FARE RRAN ROK JEHOVAH

10. Mingiyal’ e rra t’uf ni ngad pared nrib taareban’dad?

¹⁰ Gad be chugur i yan ko fare rran nth’abi gel e gafgow nra tay e girdi’ riy. I yog Joel ni profet ni chirofen nem e “ra yan i aw nde fel’ lan e lang ma der m’ug ramaen e yal’.” (Joel 2:1, 2; Zef. 1:14) Ra taw ko re rran nem, ma aram e ngiyal’ ni nge par e girdi’ rok Got u taabang nib taareban’rad. Dab mu pagtalin fapi thin ni yog Jesus ni faani gaar: “Re nam nra ruwraba’nag ir ngar chamgow ngorow e dabi par nib n’uw nap’an.”​—Matt. 12:25.

11. Mang e rayog ni nge fil e girdi’ rok Got u murung’agen e taareban’ ko fare thin ni bay ko Psalm 122:3, 4? (Mu guy e sasing ni bay u tabolngin e re article ney.)

¹¹ Tin ni ka bay e rran ni bayi fini yib ko re m’ag nib kireb ney e ra t’uf ni ngad pared nrib taareban’dad. Re taareban’ ney e rayog ni ngan taarebrogonnag nga rogon e naun ni immoy u lan fare mach nu Jerusalem kakrom. Naun ko re mach nem e rib chichir nga taabang ni ga ra yaliy u palog ma gowa taab naun. Bochan ni aram rogon e naun ko re mach nem ma aram fan ni i par e girdi’ riy nib pagan’rad, ma kub mom nrayog ni ngar ayuweged yad. Maku reb e, rogon feni chichir e pi naun nem nga taabang e ku rayog ni ngan taarebrogonnag nga rogon e taareban’ ni ma m’ug u thilin fapi ganong nu Israel u nap’an ni yad ra muulung nga taabang ni ngar liyorgad ngak Jehovah. (Ps. 122:3, 4) Chiney i yan ko tin bay fini yib e rran nga m’on ni ke mo’maw’ e par e ba t’uf ni ngad pared ni gad ba taareb.

12. Mang e ra ayuwegdad ni ngad mageygad ni gad ba fos u nap’an ni yira cham ko girdi’ rok Got?

¹² Mang nib ga’ fan ni ngad pared e ngiyal’ nem ni gad ba taareb? Ezekiel ko guruy ni 38 e be weliy murung’agen e cham nra tay “Gog . . . nu Magog” ko girdi’ rok Got. Gathi aram e ngiyal’ ni ngad paged ban’en ni nge weregdad. Maku dab da sapgad ko fayleng ni nge ayuwegdad. Ya aram e ngiyal’ ni ngad pared ni gad ba chugur ngak pi walagdad. Machane, gad manang ndabi yag e yafas ngodad ni faanra kemus ni gad bang ko re ulung rok Jehovah nem. Ya thingari pagan’dad ngak ma gad fol rok. Faan gad ra rin’ ni aram rogon, ma aram e ra ayuwegdad Jehovah nge Jesus ni ngad mageygad ni gad ba fos ko re ngiyal’ i n’em. (Joel 2:32; Matt. 28:20) Machane, ga be lemnag ma ra taw ko ngiyal’ nem ma ra ayuweg Got e piin ni kar dugliyed ni ngar rin’ed e tin ni yad baadag ma darur taarebgad ko ulung rok?​—Mik. 2:12.

13. Mang e rayog ni nge fil e piin fel’ yangaren ko pi n’en ni kad weliyed?

¹³ Ere, ba tamilang ndad gonopgad ni faanra ngad folgad ko n’en ni be rin’ e pi fel’ yangaren ni kar palognaged yad ko tin nib fel’ kar pared nga bang ni goo yad ma yad be rin’ e tin ni yad baadag. Gad be chugur i yan ko ngiyal’ nra t’uf ni nge bagadad me ayuweg bagadad. Ma gad gubin nib t’uf ni ngad rin’ed e re n’ey ndemtrug ko kab fel’ yangardad fa danga’! Ireray e ngiyal’ ni ngad maruwelgad u taabang ni ngad pared nib taareban’dad, ya ra yan i taw ko ngiyal’ nem ma ireray e n’en nib t’uf ni ngad rin’ed.

“GOO GADAD YU YANG U DOWNGIN KRISTUS”

14, 15. (a) Mang fan ni be fil Jehovah rogon ni ngaud pared nib taareban’dad e ngiyal’ ney? (b) Mang fonow e be pi’ Jehovah ngodad ni nge ayuwegdad ni ngaud pared nib taareban’dad?

¹⁴ Be ayuwegdad Jehovah ni ngad pigpiggad ngak u “taab yang.” (Fil. 1:27; Zef. 3:8) Be fal’eg rogodad ni fan ko par rodad boch nga m’on. Mang e ba muun ko re n’ey? Ba m’agan’ ngay ni nge “kunuy urngin e tin ni sunumeg ban’en nga taabang, ni urngin ban’en ni bay u tharmiy ngu but’, me par Kristus ni ir e llug riy.” (Mu beeg e Efesus 1:9, 10.) Arrogon, baadag ni nge ayuweg urngin e piin ni yad bay u tharmiy ngu fayleng ni ngar pared ni yad ba taareb, ma gad manang nrayog rok ni nge rin’ e re n’ey. Ma gimed e piin fel’ yangaren e rayog ni ngam pared ni gimed bang ko re ulung ney ndariy n’umngin nap’an. Ere, kam guyed feni ga’ fan ni ngam chagilgad ko ulung rok Jehovah ngam pared ni kam taarebgad, fa?

¹⁵ Be fil Jehovah rogon ni ngad pared nib taareban’dad e chiney ya nge yag nda pared nib taareban’dad u lan e bin nib beech e fayleng rok ndariy n’umngin nap’an. Boor yay ni be yog e Bible ngodad ni ngad ‘ayuweged gadad,’ me ‘bagadad me t’uf bagadad rok,’ mu ‘ud pied e athamgil nga lanin’dad,’ me ‘bagadad mi i ayuweg bagadad.’ (1 Kor. 12:25; Rom. 12:10; 1 Thess. 4:18; 5:11) Manang Jehovah ndawori flont e piin Kristiano, ma rayog ni nge mo’maw’ rorad ni ngar pared nib taareban’rad, ere ba t’uf ni ngaud ‘n’iged fan u wan’dad e tin nib kireb ni ke rin’ bagadad ngak bagadad.’​—Efe. 4:32.

16, 17. (a) Mang reb i fan ni gad ma tay e pi muulung rodad? (b) Mang e rayog ni nge fil e piin fel’ yangaren ko n’en ni rin’ Jesus u nap’an ni kab fel’ yangaren?

¹⁶ Ke fal’eg Jehovah rogon e pi muulung ke tay ni ku aram e gin nrayog ni ngad filed riy rogon ni ngaud pared nib taareban’dad. Ba ga’ ni gad ma beeg fare thin ni bay ko Hebrews 10:24, 25. Reb i fan ni gad ma tay e pi muulung ney e bochan ni “nge bagadad ma ngi i ayuweg bagadad ma be dag ngak nib t’uf rok ma be rin’ e tin nib fel’ ngak.” Ere, rib ga’ fan e pi muulung ney ni kan yarmiy rogon kan tay ni bochan e rayog ni nge ayuwegdad u rogon ni ngaud ‘pied e athamgil nga lanin’dad.’

¹⁷ Nap’an ni kab fel’ yangaren Jesus, me dag e kanawo’ nib fel’ ni ngan folwok riy u rogon ni i tay nib ga’ fan e muulung u wan’. Nap’an ni ke gaman 12 e duw rok, me un ko gallabthir rok nga ranod nga reb e muulung nib ga’ nni tay kakrom. Me taw nga ba ngiyal’ ma daki nang e gallabthir rok e gin ni ke yan ngay. Ere, gur ke mil rorow ke yan i chagil ngak boch e fel’ yangaren? Danga’, ya yan i pirieg e gallabthir rok ni bay u tempel ni yad be weliy e pi tamachib murung’agen e thin rok Got.​—Luke 2:45-47.

18. Uw rogon nrayog ni nge ayuwegdad e meybil ni ngaud pared nib taareban’dad?

¹⁸ Faanra ud yibilayed pi walagdad maku aram reb e kanawo’ nrayog ni ngad pared nib taareban’dad. Faanra ud yibilayed pi walagdad ma aram e rayog ni ngaud pugeduran ngan’dad feni ga’ fan pi walagdad u wan’dad. Ireray boch ban’en ni gathi kemus ni yigoo pi Kristiano ni kar piilalgad e rayog ni ngar rin’ed. Faanra gur reb e fel’ yangaren, ma kam gay rogon ni ngam rin’ e pi n’ey ya nge yag ni par nib chugur e tha’ u thilmed e pi walag u lan e ulung, fa? Faan ga ra rin’ ni aray rogon, ma ra yan i taw ko ngiyal’ ni ngan thang e re fayleng nib kireb ney ma ga be par ni gab palog riy.

NGAD DAGED NI “GADAD YU YANG I DOWNGIN TAAB DOWEF”

19-21. (a) Mang boch e kanawo’ ni gad ma dag riy nriyul’ ni “gadad yu yang i downgin taab dowef”? Mu weliy boch ban’en ni ke buch. (b) Mang e kam fil u rogon ni ma ayuweg e pi walag boch e walag ni kar gafgowgad?

¹⁹ Pi tapigpig rok Jehovah e ngiyal’ ney e yad be fol ko fare kenggin e motochiyel ni bay ko Roma 12:5 ni be gaar: “Gadad yu yang i downgin taab dowef.” Ireray e n’en ni gad ma guy u nap’an ni ke yib e yoko’, ara durru’, ara boch ban’en ni yima gafgow riy. Nap’an e December ko duw ni 2011, me aw e yoko’ nga reb e binaw u Manila ni ka nog yu Mindanao ngay, me yib e ran nge tharey e binaw. U lan taareb e nep’, mab pag 40,000 e naun ni mathrow ko ran ni kub muun boor e naun ko pi walag ngay. Machane, rogon ni yog e branch ofis u rom e, “u m’on ni nge yib e pi walag ni yad bay u boch e ulung ni kan yarmiy rogon ni yad ma pi’ e ayuw ko yungi n’en ni ke yib e gafgow ngay, ma bay boch e walag ni yad ma par nib chugur ko re binaw nem nra pied e ayuw ko pi walag ney.”

²⁰ Ku arrogon e n’en ni buch u nap’an ni aw reb e durru’ nib gel ko pi binaw ni bay ko ngek u Sapan, me yib e day nga arow. Boor e walag nra pared ndakuriy e naun rorad nge tin nib t’uf rorad. Yoshiko e ir bagayad e pi walag nem ni par ndakuriy e naun rok, ma sogonap’an 25 e mayel palogin e gin ni ma par riy ko Kingdom Hall. I yog ni gaar: “Kar gu felfelan’gad u tomuren ni gu nanged ni ke yib e circuit overseer romad nge reb e walag ni yow be gaymad.” Miki yog ni gaar: “Kub gel e felfelan’ ni gu ted ni bochan e ki pi’ e ulung e pi n’en nib t’uf romad ni fan ko tirok Got ban’en. Mu kur pied e mad, nge sus, nge kabang, nge madan e mol ni fan ngomad.” Reb e walag ni ir bang ko re ulung ni baaram ni ma pi’ e ayuw ko pi walag ko yungi n’en ni ke yib e gafgow ngay e ki yog ni gaar: “Gubin e pi walag u Sapan ni ur maruwelgad u taabang nib taareban’rad, ma yad be guy rogon ni ngar ayuweged yad. Mus ko pi walag nu Meriken ni kur bad ni ngar pied e ayuw. Nap’an nni fithrad ko mang fan ni kar bad ni aram feni palog, me lungurad, ‘Gamad ma maruwel e pi walagmad u Sapan ni gamad ba taareb, mab t’uf e ayuw rorad.’” Gathi ga be felfelan’ ngay ni gur bang ko re ulung ney nri ma ayuweg girdien nib fel’ rogon? Dariy e maruwar riy nri ma felfelan’ Jehovah ni ma guy e pi tapigpig rok nrib taareban’rad.

²¹ Ra yag e biney e lem ngodad e chiney ma ra ayuwegdad ni nga darod u fithik’ e pi magawon ni gad ra mada’nag boch nga m’on nib taareban’dad, ni mus ni faanra yan i taw ko ngiyal’ nem ma dabkiyog ni ngad nonad ngak pi walagdad ni yad bay u boch e nam. Maku reb, e re n’ey e ku be ayuwegdad u rogon ni ngad pithiged boch e magawon ni dabisiy ni gad ra mada’nag u nap’an ni gad be chugur i yan ko ngiyal’ ni yira thang e re m’ag nib kireb ney. Fumiko nreb e walag ni immoy u nap’an ni ki aw reb e yoko’ nga Sapan e yog ni gaar: “Kari chugur e tomur. Ere, ba t’uf ni ngad ululgad ngaud ayuweged pi walagdad u nap’an ni gad be sonnag e ngiyal’ ni bayi taw ngay ma dakuriy e yoko’, nge durru’, nge ku boch ban’en ni ma yib ni yima gafgow riy.”

22. Faanra ud pared nib taareban’dad, ma mang angin nra yib ngodad nra par ndariy n’umngin nap’an?

²² Pi fel’ yangaren nge piin ni kar piilalgad ni yad be fil rogon ni ngaur pared nib taareban’rad e ulung rok Got e yad be fal’eg rogorad ni fan ko ngiyal’ ni yira thang e re m’ag nib kireb ney. Got rodad e ra ayuweg e girdi’ rok ni bod ni i rin’ kakrom. (Isa. 52:9, 10) Dab mu pagtalin ni faan gimed ra par e girdi’ rok Got nib taareban’med, ma rayog ni ngkun ayuwegem u nap’an nra yib Got ni nge ayuwegrad. Reb e ban’en ni ku rayog ni nge ayuwegdad e aram e nge ga’ fan u wan’dad e n’en ni ke yag ngodad. Ireray e n’en ni yira weliy ko bin migid e article.