Ba Ga’ Fan u Wan’um e N’en ni Ke Yag Ngom, Fa?

1. Mang e ba ga’ ni ma lemnag e girdi’ u murung’agen e pi n’en ni bay rorad?

DABISIY ni ga ma rung’ag e re thin ni baaray ni yima yog ni ma lunguy: ‘Ra m’ay ban’en mfin aram e ngiyal’ ni ga ma finey fare n’em.’ Bay ba ngiyal’ ni kam lem ni aram rogon, fa? Bod ni faanra ke ilal be’ u reb e tabinaw nib fel’ rogon, nnap’an ni yugu ra yog ban’en min fek ngan pi’ ngak, ma dabisiy ni gathi rib ga’ fan fapi n’em u wan’. Rayog ni nge buch e re n’ey ko piin fel’ yangaren. Bochan ni boor ban’en ndawor ra nanged, ma rayog ni nge dab ra tedan’rad ko pi n’en nib ga’ fan u lan e yafos rorad.

2, 3. (a) Mang lem e ba t’uf ni nge siyeg e pi Kristiano ni kab fel’ yangarrad? (b) Mang e rayog ni nge ayuwegdad ni nge ga’ fan u wan’dad e pi n’en ni bay rodad?

² Faanra gur reb e fel’ yangaren, ma mang e ba ga’ fan u wan’um? Yooren e fel’ yangaren e ngiyal’ ney e kab ga’ fan u wan’rad e maruwel nib fel’, nge naun nib fel’ yaan, ara boch ban’en ni kab beech nib tolang puluwon ni bod rogon e cell phone, nge computer, ara ku boch ban’en. Machane, faanra kemus ni yigoo ireray e n’en nib ga’ fan u wan’dad, ma aram e bay ban’en ndariy rodad. Re n’em e aram e tha’ u thildad Got. Ma rib gel e kireban’ riy ni bochan e boor e fel’ yangaren e ngiyal’ ney ni gathi ireray e n’en ni yad be lemnag. Gimed e pi fel’ yangaren ni gallabthir romed e yad boch e Kristiano e thingar mu kol ayuwgad ndab mu darifannaged e re tow’ath ney ni bay romed. (Matt. 5:3) Ya faan gimed ra darifannag, ma rayog ni nge yib wenegan ngomed nra magawonnagmed u n’umngin nap’an e yafas romed.

³ Machane, bay boch ban’en nrayog ni ngam rin’ed ya nge dabi buch e re n’ey romed. Mang e ra ayuwegmed ni nge ga’ fan u wan’med e pi tow’ath ni ke yag ngomed ni fan ko tirok Got ban’en? Ngad weliyed murung’agen boch e girdi’ u Bible nrayog ni nge ayuwegdad ni ngad nanged feni ga’ fan ni ngad ayuweged e pi tow’ath ni ke yag ngodad ni fan ko tirok Got ban’en. Pi n’ey e gathi kemus ni goo piin fel’ yangaren e rayog ni nge ayuwegrad ya ku rayog ni nge ayuweg urngin e Kristiano ni nge ga’ fan u wan’rad e pi n’en ni ke pi’ Jehovah ni fan ngorad.

DE GA’ FAN U WAN’RAD

4. Mang e be yog e 1 Samuel 8:1-5 u murung’agen fa gali pagel ni fak Samuel?

⁴ Bay boch e girdi’ ni be weliy e Bible murung’agrad ni boor e tow’ath nrib manigil ni yag ngorad ni fan ko tirok Got ban’en, machane de ga’ fan u wan’rad. Ireray e n’en ni buch u lan e tabinaw rok reb e profet rok Jehovah ni ka nog Samuel ngak. I tabab Samuel ko pigpig ngak Jehovah u nap’an ni kab bitir ma i par nib fel’ u wan’ Jehovah ni bochan e ir be’ nib yul’yul’. (1 Sam. 12:1-5) Rib fel’ e kanawo’ ni dag Samuel nrayog ni nge folwok Joel nge Abijah riy, ni l’agruw i pagel ni fak. Machane, dar folgow, ma aram mi yow mang l’agruw ni’ ni yow ba kireb. Be yog e Bible ni yow ba thil ko chitamangirow ni bochan e “da ur pithigew e oloboch nge yan i aw nrogon.”​—Mu beeg e 1 Samuel 8:1-5.

5, 6. Mang e buch ko fapi pumoon ni fak Josiah nge reb e pumoon ni tungin?

⁵ Ku aram e n’en ni buch ko fapi pumoon ni fak Josiah ni Pilung. Josiah e ir reb e Pilung ni ma pigpig ngak Jehovah nib yul’yul’. Nap’an nni pirieg fare babyoren e Motochiyel rok Got min beeg ngak, me athamgil ni nge fol ko pi n’en ni bay riy. I chuweg e pi liyos nge ngongolen e pig ni un rin’ ko re nam nem, me pi’ e athamgil nga laniyan’ e girdi’ ni ngar folgad rok Jehovah. (2 Ki. 22:8; 23:2, 3, 12-15, 24, 25) Rib manigil e tow’ath ni yag ngak fapi pumoon ni fak! Dalip ko pi pumoon ni fak nem nge taareb e pumoon ni tungin e ra manged pilung. Machane, dariy bagayad ni dag nib ga’ fan u wan’ e tow’ath ni ke yag ngak ni fan ko tirok Got ban’en.

⁶ Nap’an ni mang Jehoahaz nreb i fak Josiah e Pilung, mi “i denen nib togopuluw ngak Somol.” Kemus ni dalip e pul ni gagiyeg riy, ma aram me kol reb e Farao ni ir e Pilung u Egypt e ngiyal’ nem nge tay nga kalbus. Boch nga tomuren me yim’ u tafen nib kalbus. (2 Ki. 23:31-34, BT) Tomuren, me gagiyeg reb e pumoon ni walagen ni ka nog Jehoiakim ngak u lan 11 e duw. Re pilung ney e ku taareb rogon ngak walagen ya ku de ga’ fan u wan’ e n’en ni i fil e chitamangin ngak. Ma bochan nrib kireb e ngongol rok, ma aram me yiiynag Jeremiah murung’agen ni gaar: “Yira k’eyag ni bod ba donkey.” (Jer. 22:17-19, BT) Zedekiah ni fak Josiah nge Jehoyachin ni tungin Josiah e ku yow ba kireb, ma dariy bagayow ni lemnag ni nge folwok rok Josiah.​—2 Ki. 24:8, 9, 18, 19.

7, 8. (a) Uw rogon ni darifannag Solomon e tow’ath ni yag ngak ni fan ko tirok Got ban’en? (b) Mang e rayog ni ngad filed ko n’en ni buch ko pi girdi’ ney nra darifannaged e tow’ath ni yag ngorad ni fan ko tirok Got ban’en?

⁷ Solomon e ku ir be’ ni boor ban’en nib fel’ ni fan ko tirok Got ban’en ni fil David ni chitamangin ngak. Yugu aram rogon, me munmun me darifannag e pi tow’ath nem ni yag ngak. “Nap’an ni pilibthir ma [ke waliy fapi ppin ni leengin] ke un i tayfan yugu boch e got. Ma daki yul’yul’ ngak Somol ni Got rok, ni bod David ni chitamangin.” (1 Ki. 11:4, BT) Bochan e re n’ey, ma aram ma daki par Solomon nib fel’ u wan’ Jehovah.

⁸ Rib gel e kireban’ ko n’en ni buch ko pi pumoon ney. Ya yad gubin nni fil murung’agen Jehovah ngorad, ma aram me mab e kanawo’ ngorad ni ngar rin’ed e tin nib fel’, machane mar darifannaged e tow’ath ni ke yag ngorad! Yugu aram rogon, ma gathi gubin e pi fel’ yangaren ni bay murung’agrad u Bible ni ireray e n’en ni buch rorad, maku arrogon e chiney. Ere, ngad weliyed murung’agen boch e fel’ yangaren kakrom nrayog ni nge folwok e pi Kristiano ni kab fel’ yangarrad rorad e ngiyal’ ney.

BA GA’ FAN U WAN’RAD E N’EN NI KE YAG NGORAD

9. Uw rogon ni dag fapi pagel ni fak Noah e kanawo’ nib fel’ ni ngan folwok riy? (Mu guy e sasing ni bay u tabolngin e re article ney.)

⁹ Ba fel’ e n’en ni rin’ fapi pagel ni fak Noah. I yog Got ko chitamangirad ni nge toy ba arke ni nga ranod chon e tabinaw rok nga langgin. Ba ga’ fan u wan’rad e n’en ni ke yog Jehovah ni ngar rin’ed. Ere dariy e maruwar riy ni kar folgad ko chitamangirad. Tomur riy, ma aram mar mu’gad i ngongliy fare arke, ngemu’ mi yad yan nga langgin ni yad gubin. (Gen. 7:1, 7) Mang angin e fol nra ted? Be yog e Genesis 7:3 nra feked e gamanman nga lan fare arke ya ngar ‘pared ni yad ba fos ngkur diyengad bayay u daken e fayleng.’ Maku arrogon e girdi’. Bochan nib ga’ fan u wan’ fapi pagel ni fak Noah e n’en ni ke fil e chitamangirad ngorad, ma aram fan ni yag ni ngar ayuweged ni nge dabi math mit e girdi’ u fayleng me yag ni ngki sul e bin riyul’ e liyor nga rogon u tomuren ni kan beechnag e fayleng.​—Gen. 8:20; 9:18, 19.

10. Uw rogon ni dag fa aningeg i pagel ni Hebrew ni faan ni fekrad nga Babylon nib ga’ fan u wan’rad e tin riyul’ ni kar filed?

¹⁰ Boch e chibog nga tomuren, maku immoy aningeg e pagel ni Hebrew ni kur daged ni bay boch ban’en ni kar filed nib ga’ fan. Fithingan e pi pagel nem e Hananiah, Mishael, Azariah, nge Daniel. Ni kolrad ngan fekrad nga Babylon u nap’an e duw ni 617 B.C.E. Pi pagel nem e yad ba pichoay ma yad ba llowan’, ere ba mom ni nge fel’ rogon e par rorad u Babylon. Machane, yugu aram rogon, ma n’en ni kar rin’ed e ke m’ug riy nib ga’ fan u wan’rad e pi n’en ni kan fil ngorad. I tow’athnagrad Jehovah ni bochan e ra folgad ko pi n’en nni fil ngorad ni ka nap’an ni ka yad ba bitir.​—Mu beeg e Daniel 1:8, 11-15, 20.

11. Uw rogon ni ke yib angin ko girdi’ e pi tow’ath ni ke yag ngak Jesus ni fan ko tirok Got ban’en?

¹¹ Jesus ni Fak Got e aram e en th’abi fel’ ni ngan folwok rok ni bochan e rib ga’ fan e tirok Got ban’en u wan’. Boor ban’en ni fil e Chitamangin ngak, ma i par nib ga’ fan u wan’. I tamilang e re n’ey u nap’an ni gaar: “Gu be yog e tin ni ke yog e en ni Chitamangiy ngog ni nggog.” (John 8:28) Kub m’agan’ ngay ni nge yib angin e pi n’en ni ke fil ngak boch e girdi’. I yog ngak ba ulung i girdi’ ni kar muulunggad nga taabang ni gaar: “Dabi siy ni ngku gu machibnag u boch e binaw i yan fare Thin Nib Fel’ ni murung’agen e gagiyeg rok Got, ya ke l’ugeg Got ku gub ni ereray e n’en ni nggu rin’.” (Luke 4:18, 43) I tamilangnag ko piin ni ur motoyilgad ngak ni “gathi ka yad” e girdi’ nu fayleng, ni bochan ni girdi’ nu fayleng e de ga’ fan e thin rok Got u wan’rad.​—John 15:19.

NGE GA’ FAN U WAN’UM E N’EN NI KE YAG NGOM

12. (a) Mang rogon fare thin ni bay ko 2 Timothy 3:14-17 ngak boor e fel’ yangaren e ngiyal’ ney? (b) Mang boch e deer nthingari lemnag e pi Kristiano ni kab fel’ yangarrad?

¹² Sana gur be’ ni kam ilal ko tin riyul’ ni bochan e gallabthir rom e yow ma pigpig ngak Jehovah Got. Ere, taareb rogom ngak fapi pumoon ni kad weliyed murung’agrad. Faanra aray rogon, ma sana ba m’ag ngom fapi thin ni be yog e Bible u murung’agen Timothy. (Mu beeg e 2 Timothy 3:14-17.) Gallabthir rom e ‘kar filew ngom’ murung’agen e bin riyul’ e Got nge rogon ni ngam rin’ e tin nib m’agan’ ngay. Dabisiy ni tabab e gallabthir rom i fil murung’agen Got ngom u nap’an ni ka gab achichig. Re n’ey e ke “tamilangnigem u rogon ni yima thap ngak Got, ni ma yog u daken e michan’ ngak Kristus Jesus,” ma ke ayuwegem ni nge ‘bung rogom’ ni ngam pigpig ngak Got. Machane, reb e deer ni ka bay e, Ga ra dag nib ga’ fan u wan’um e re tow’ath ney ni ke yag ngom, fa danga’? Ra ngam nang e fulweg ko re deer ney, ma sana ba t’uf ni ngam fal’eg i yaliy rarogom. A kum fithem ni nge lungum: ‘Uw rogon u wan’ug e pi tapigpig rok Jehovah ni yad ba yul’yul’ ni ka ur moyed ni yad ba m’on rog? Gub felfelan’ ngay ni gag reb e pi tapigpig rok Got u fayleng e ngiyal’ ney, fa danga’? Ba ga’ fan u wan’ug e re tow’ath ney ni ke yag ngog ni aram e kug nang e tin riyul’, fa danga’?’

13, 14. Mang boch ban’en ni yima waliy e pi Kristiano ni kab fel’ yangarrad ngay? Mang fan nde fel’ ni ngar paged yad ko pi n’ey? Mu weliy ban’en ni ke buch rok be’.

¹³ Bay boch e fel’ yangaren ni gallabthir rorad e yad boch e Kristiano nder tamilang u wan’rad feni thil e tirok Got ban’en ko re fayleng rok Satan ney nrib gel e kireb riy. Bay boch i yad ni ke guy rogon ni nge nang rarogon e par ko girdi’ ko re fayleng ney. Machane, uw rogon u wan’um, ga ra yan nga mit ba karrow ni be yan u kanawo’ ni bochan e ngam guy ko ga ra maad’ad fa ga ra yim’? Ba mudugil ni danga’! Ere, de t’uf ni ngam un ko “ngongol nib kireb” ni yibe rin’ ko re fayleng ney ni bochan e ngam guy wenegan nra yib ngom ko tomur.​—1 Pet. 4:4.

¹⁴ Gener ni ma par u reb e nam u Asia e nni chuguliy ko tin riyul’. Nap’an ni gaman 12 e duw rok me un ko taufe. Machane, munmun me adag ni nge nang rogon e par ko girdi’ ko re fayleng ney. I yog ni gaar: “Gu baadag ni nge yag ngog e ‘puf rogon’ ni be ognag e re fayleng ney ko girdi’.” Ere, tabab Gener ni nge un i rin’ boch e ngongol nib kireb. Nap’an ni gaman 15 e duw rok, me tabab ni nga i un i rin’ boch e ngongol nib kireb ni ma rin’ e pi girdi’ ni baaram ni ma chagil ngorad. Ba ga’ ni ma chingaw nib pag rogon ma ma yog e thin nib kireb ni bod e n’en ni ma rin’ e pi girdi’ nem. Ba ga’ ni ma yib Gener nga tabinaw ni ke sagaal ni bochan e yad ma fafel e pi fager rok nga boch e gosgos ko computer ni yaan e cham. Machane, munmun me nang ni pi n’em ni be rin’ e der yibnag e felfelan’ ngak. Dariy gam’engin e pi n’em ni be rin’. I weliy murung’agen e ngiyal’ ni sul ko ulung bayay ni gaar: “Yugu aram rogon ni boor e magawon ni gu ma mada’nag, machane bin riyul’ riy e, ka boor e tow’ath ni be pi’ Jehovah ngog.”

15. Mang e susun ni ngki lemnag e piin fel’ yangaren ni gallabthir rorad e gathi yad boch e Kristiano?

¹⁵ Ku bay boch e fel’ yangaren u lan e ulung ni gallabthir rorad e gathi yad boch e Kristiano. Faanra gur bagayad e pi cha’ney, ma ngam lemnag feni manigil e tow’ath ni ke yag ngom ni bochan e ke yag ni ngam nang Jehovah ni ir e ke Sunmiy urngin ban’en ma ga be pigpig ngak! Bokum milyon e girdi’ u fayleng. Machane, gab tow’ath ya gur bagayad e piin ni ke pow’iy Jehovah ngak ma ke ayuwegem ni ngam nang e tin riyul’ u Bible. (John 6:44, 45) Faan yira lemnag, ma kemus ni 1 u fithik’ 1,000 e girdi’ u fayleng e ngiyal’ ney e ke nang e tin riyul’ u Bible, ma gur bagayad e pi girdi’ ney. Ere, demtrug rogon ni kad nanged e tin riyul’, ma susun ni ngad felfelan’gad ngay. (Mu beeg e 1 Korinth 2:12.) I yog Gener ni gaar: “Gubin ngiyal’ ni gu ra lemnag e re n’ey ma ma puthputh e ulum nga dakenag. Gag mini’ ni nggu mang tapigpig rok Jehovah ni ir e ba Milfan e re palpalth’ib ney ngak?” (Ps. 8:4) Ki yog reb e walag nib pin ni gaar: “Ma felfelan’ e bitir ni skul ni faanra dag e sensey rorad ni be tay farad. Ere, ri kab gel e fel’ riy ni nge fel’ e tha’ u thilmew Jehovah ni ir e Bin Th’abi Tolang e Sensey rodad!”

MANG E GA RA RIN’?

16. Mang e ba fel’ ni nge rin’ e pi Kristiano ni kab fel’ yangarrad e ngiyal’ ney?

¹⁶ Mu lemnag feni manigil e tow’ath ni bay rom, ma ga dugliy u wan’um ni ngam pigpig ngak Jehovah. Faan ga ra rin’ ni aray rogon, ma aram e ga be folwok ko n’en ni i rin’ e pi tapigpig rok Got ni yad ba yul’yul’ kakrom. Kab fel’ ni ngam rin’ e re n’ey ko bin ni ngam un ko n’en ni be rin’ e tin ni ka bay e fel’ yangaren e ngiyal’ ney ni yad be un ko re fayleng ney i yan ko magothgoth.​—2 Kor. 4:3, 4. 

17-19. Mang fan ni kab fel’ ni ngam par ni gab thil ko girdi’ nu fayleng?

¹⁷ Re n’ey e gathi be yip’ fan nib mom ni ngan par ni yib thil ko re fayleng ney. Machane, faan ga ra fal’eg i lemnag, ma ka gab gonop ni ngam par ni gab thil. Baaray rogon nrayog ni ngan susunnag: Am lemnag reb i girdien e gosgos ni be fal’eg rogon ni nge un ko Olympic. Ba mudugil ni faanra nge un ko gosgos ni yira tay, ma thingar dabi un ko pi n’en ni ma rin’ e pi taab yangar rok. Boor ban’en nthingari siyeg ni bochan e rayog ni nge magawonnag ko gosgos nra un ngay. Maku reb e dabun ni nge un ko pi n’en ni be rin’ e girdi’ u tooben ni bochan e nge yag ni fal’eg rogon ko re miti gosgos nem ni nge un ngay me yag ni un ngay nib fel’ rogon.

¹⁸ Yooren e girdi’ u fayleng e darur lemnaged wenegan e pi n’en ni yad ma rin’ nra yib ko tomur. Machane, faan ga ra thilyeg e lem rom ko lem ko girdi’ nu fayleng, ma ga siyeg e pi ngongol nib kireb nrayog ni nge kirebnag e tha’ u thilmew Jehovah, ma aram e rayog ni nge ‘yog ngom e yafos ni ir e bin riyul’ e yafos.’ (1 Tim. 6:19) Fare walag nib pin ni faan kan weliy murung’agen e ki yog ni gaar: “Faan ga ra par ni gab mudugil ni fan ko pi n’en ni ke mich u wan’um, ma ga ra felfelan’. Ya be micheg ni gab gel nrayog ni ngam togopuluw ko re fayleng rok Satan ney. Ma bin th’abi fel’ riy e ga ra par ni gowa ga be guy Jehovah Got ni kari felfelan’ ngom ma be sap ngom ni be siminmin! Ri ga ra felfelan’ ni ga be par ni gab thil!”

¹⁹ Ra yan i aw nib m’ay fan e yafos ku be’ ni faanra kaygi par ni be lemnag e tin nrayog ni nge yag ngak e chiney. (Ekl. 9:2, 10) Ga manang fan ni kan sunmiyem, ma bay e athap rom nrayog ni ngam par ni manemus. Re n’ey e ra ayuwegem ni ngam siyeg ndab ‘um ngongol ni bod rogon e piin ndar nanged Got,’ mag guy rogon ni ngam fanay e yafas rom u reb e kanawo’ nra yib angin ngom nib fel’.​—Efe. 4:17; Mal. 3:18.

20, 21. Faanra ba fel’ e n’en ni kad mel’eged ni ngad rin’ed ko yafas rodad, ma mang boch e tow’ath nra yag ngodad boch nga m’on? Machane, mang e thingar da rin’ed?

²⁰ Faanra ba fel’ e n’en ni kad mel’eged ni ngad rin’ed ko yafos rodad, ma aram e rayog ni ngad pirieged e felfelan’ e chiney me “yag” e yafas ndariy n’umngin nap’an ngodad u lan e bin nib beech e fayleng rok Got. Boor ni boor e tow’ath ni ke tay Jehovah ni fan ngodad boch nga m’on. (Matt. 5:5; 19:29; 25:34) Machane, gathi gubin e girdi’ nra pi’ e pi tow’ath ney ngorad. Ya bay ban’en nib t’uf ni ngad rin’ed. (Mu beeg e 1 John 5:3, 4.) Faan gad ra pigpig ngak e chiney ni gad ba yul’yul’, ma dab da kalgadngan’dad riy!

²¹ Ri gad ba tow’ath ya boor ban’en ni ke pi’ Got ni fan ngodad! Ke yag e tamilangan’ ngodad ko Thin rok ma kad nanged e tin riyul’ u murung’agen e tin nib m’agan’ ngay. Ku gad ba tow’ath ni bochan e gad be fek fithingan ma gad e Pi Mich rok. Ke micheg Got ngodad nra ayuwegdad. (Ps. 118:7) Ere, ngad athamgilgad ni gad gubin, ndemtrug ko kab fel’ yangardad fa kad pilibthirgad ni ngad daged nriyul’ nib ga’ fan u wan’dad e tow’ath ni ke yag ngodad ni fan ko tirok Got ban’en, mu kud daged nriyul’ ni gad baadag ni ‘nguud ted fan’ Jehovah ndariy n’umngin nap’an.​—Rom. 11:33-36; Ps. 33:12.