Piin Ni Fel’ Yangaren, Gimed Be Fal’eg Rogomed Ni Fan Ko Gabul Nge Langlath?
“Ri gu manang e n’en ni gu be lemnag ni fan ngomed, . . . lem ko gapas, ma gathi gafgow nib gel, ni nggu pi’ e gabul nge langlath ngomed nge athap.”—JEREMIAH 29:11, NW.
1, 2. Mang boch e kanawo’ nib thilthil ni ra yog ni ngan lemnag ko pi duw rok e piin ni pagel?
BAGA’ ni piin ni kar ilalgad e yad ma lemnag ni nap’an ni ra kab pagal be’ ma ireray e ngiyal’ ni rib fel’ ko yafas rok. Keb ngan’rad gelngirad nge pasig ni immoy rorad u nap’an ni ka yad ba pagal. Yad be fal’eg i lemnag e tayim ni kemus ni buchuw e maruwel nib mil fan ngorad, aram e ngiyal’ ni yugu yad ma falfalan’ ko fafel ma boor ban’en nrayog ni ngar rin’ed ko yafas rorad boch nga ram.
2 Gimed ni ka gimed ba pagel e baga’ ni bathil e n’en ni gimed ma lemnag. Sana kam magawon ko yafas rom ni ka gab pagel nbochan e be thil iyan e lem rom nge dowam. Sana be mochuchnagan’um nib gel e piin ni gimed nga skul. Sana ri ga be athamgil ni nge dab mu un i fanay e drug, nge alkul, nge ngongol ni darngal. Maku boor i gimed e be mada’nag e magawon ko ngan par u mathilin ara magawon nib peth ko michan’ romed. Arrogon, rayog ni nge mo’maw’ e yafas ko en kab pagal. Yugu aram rogon, ma ireray e tayim ni ke mab ni fan ngom. Ma deer riy e, Uw rogon ni ngam fanay e pi tayim nem ni ke mab ni fan ngom?
Mu Fanay e Tayim ni Ka Gab Pagal
3. Mang thin rok solomon ni be fonownagey ma be ginangey ni ke pi’ ngak e piin ni ka yad ba pagel?
3 Girdi’ ni kar ilalgad e yad ra yog ngom ni yafas rom ni ka gab pagal e dabi par nib n’uw nap’an, ma sororad. Kemus ni ra yan in e duw, me thumur e fel’ yangaren rom. Ere ngam falfalan’ ngay u nap’an ni ka ba’ rom! Ireram e fonow ni ke pi’ Solomon ni pilung, me yoloy ni gaar: “Gur be’ ni pumoon ni ka gab pagal, mu par ni gab felfelan’, mu pag gum’irchaem nge rin’ e tin ba fel’ ngom ko pi rran ni ka gab pagal, ma nga man u kanawoen gum’irchaem nge tin ni be guy owchem.” Machane, i ginang Solomon e piin ka yad ba pagal ni gaar: “Mu chuweged e kireb u lan gum’irchamed, ma ngam paloggad ko n’en nra kirebnag dowmed.” Miki yog ni gaar: “Yafas ko piin pagal nge nap’an ni kab gel gelngin e dariy fan.”—Eklesiastes 11:9, 10, NW.
4, 5. WMang fan ni bay e gonop riy ni piin ni ka yad ba pagel e nga ra fal’eged rogorad ni fan ko yafas rorad gabul nge langlath? Ngam dag rogon.
4 Ga manang fan e n’en ni yog Solomon? Rogon ni ngan nang fan, amu lemnag e en ni kab pagal ni ke yog reb e taw’ath nib tolang puluwon ngak, sana salpiy ko tabinaw ni f’oth rok. Mang e ra rin’ ngay? Rayog ni nge pi’ ni urngin ni nge chuw’iy boch ban’en nge felfelan’ ngay—ni bod fare pagal ni adbey e f’oth rok ko fanathin ni weliy Jesus. (Luke 15:11-23) Machane mang e ra buch u nap’an nra m’ay e salpiy rok? Ba mudugil ni ra kalngan’ ya de yog ni nge ayuweg! Ma reb, faanra ke fanay fare taw’ath ni nge cha’riy nge fal’eg rogon e yafas rok ko gabul nge langlath, ma sana ra ta’ oren e salpiy nge fol chuway ngay u fithik’ e gonop. Ma ra munmun, ma nap’an ni ke yib angin ngak e fol chuway ni ke ta’, ma uw rogon u wan’um ra kalngan’ ya de fanay e salpiy ni nge felfelan’ u nap’an ni kab pagal? Mutrug ndanga’!
5 Mu lemnag ni pi duw ko yafas rom ni ka gab pagal e ba taw’ath ni yib rok Got, ya riyul’ ni aram rogon. Uw rogon ni ga ra fanay? Rayog ni ngam adbey urngin gelngim nge yafas rom ni ka gab pasig ko ngongol rom nib pag rogon, ni gubin ngiyal’ ni ga ma un ko fafel ara felfelan’ ma dariy ban’en ni ga be lemnag ni fan ko gabul nge langlath. Machane, ra ngam rin’ e n’en ni aram rogon, ma “yafas rom ni ka gab pagal nge nap’an ni ri kab gel gelngim” e ra aw ni “dariy fan.” Kab fel’ ni ngam fanay e yafas rom ni ka gab pagal ni ngam fal’eg rogom ni fan ko gabul nge langlath!
6. (a) Mang fonow rok Solomon e be pow’iy e piin ni ka yad ba pagel? (b) Mang e baadag Jehovah ni nge rin’ ni fan ko piin ni ka yad ba pagel, ma uwrogon ni nge fel’ rogorad riy?
6 I weliy Solomon reb e kenggin e motochiyel nra ayuwegem ngam fanay nrib fel’rogon e yafas rom ni ka gab pagal. Me yog ni gaar: “Ere mu lemnag e en ni sunmiyem ko ngiyal’ ni ka gab pagal.” (Ecclesiastes 12:1) Ireram e n’en ni ra ayuwegem me fel’rogom—ni nguum motoyil ngak Jehovah ma ngam rin’ e tin nib m’agan’ ngay. I yog Jehovah ngak piyu Israel kakrom e n’en ni baadag ni nge rin’ ni fan ngorad ni gaar: “Ri gu manang e tin gu be lemnag ni fan ngomed, . . . lem ko gapas, ma gathi gafgow nib gel, ni nggu pi’ e gabul nge langlath ngomed nge athap.” (Jeremiah 29:11) Maku baadag Jehovah ni nge pi’ ngom e “gabul nge langlath nge athap.” Ra ngam lemnag Got ko ngongol rom, nge lem rom, nge tin ga ra duguliy, ma re gabul nge langlath nem nge athap e rayog ngom.—Revelation 7:16, 17; 21:3, 4.
“Mu Chuchugur ngak Got”
7, 8. Uw rogon ni nge chuchugur reb e fel’ yangaren ngak Got
7 I pi’ James e athamgil nga lanin’dad ni nguud lemnaged Jehovah u nap’an ni be fonownagdad ni gaar: “Mu chuchugurgad ngak Got, me chuchugur ngomed.” (James 4:8) Jehovah e ir e En Ta Sunmiy, ni Th’abi Tolang u tharmiy, ma ba’ rogon ni ngan liyor ngak min pining e sorok ngak. (Revelation 4:11) Arrogon, faan gad ra chuchugur ngak, me chuchugur ngodad. T’ufeg ni aram rogon e ra pug lanin’um fa?—Matthew 22:37.
8 Gad ra chuchugur ngak Jehovah u boor e kanawo’. Ni bod ni yog Paul ni apostal ni gaar: “Dab mpaged e meybil, ma nguum pared ni gimed be od, ni gimed be pining e magar.” (Kolose 4:2) Be yip’ fan, ni ngam maruweliy ma ga mecham ko meybil. Dabi fel’ rogom ni kemus ni nga mog e amen u tomren ni ke fek e chitamam ara reb e walag u lan e ulung e meybil. Ka mog e tin ni ri ga be lemnag nge n’en ni ri ga be thamiy, nge mang e be k’aring e marus ngom, nge pi magawon ni kam mada’nag? Kaam mog ngak boch ban’en ni ga be tatamra’ ni nga mog ngak e girdi’ ndemtrug? Meybil nib yul’yul’ ni keb u gum’irchaey e ra yibnag e gapas. (Filippi 4:6, 7) Pi n’en ney e ra ayuwegdad ni ngad chuchugurgad ngak Jehovah ma gad ra nang ni be chugur ngodad.
9. Uw rogon ni nge motoyil e piin kab pagel ngak Jehovah?
9 Gad ra guy reb e kanawo’ ni ngad chuchugurgad riy ngak Jehovah ko pi thin ney ni kan thagthagnag ni gaar: “Mu motoyil ko fonow ma ngam fol ko thin ni be llowan’nagey, ma ga ra mang be’ nib gonop ko gabul nge langleth.” (Proverbs 19:20, NW) Arrogon, ra ngam motoyil ngak Jehovah ma ga fol rok, ma aram e ga be fal’eg rogom ni fan ko gabul nge langlath. Uw rogon ni ngam dag ni ga be motoyil ngak Jehovah? Dariy e maruwar riy ni ga ma un ko muulung ko piin Kristiano ma ga ma motoyil ko program riy u gubin ngiyal’. Maku, ngam “tayfan e chitamam nge chitinam” ni ga ma un ko fol Bible u tabinaw. (Efesus 6:1, 2; Hebrews 10:24, 25) Ma rib fel’. Yugu aram rogon, ga ma ‘ta’ e tayim’ ni ngam fal’eg rogom ni fan ko muulung, ma ngam bieg e Bible ni gubin ngiyal’, ma ngam fal’eg i gay? Kam guy rogon ni ngam fol ko tin kam bieg, ma rayog ni ngam man ni ‘gab gonop’? (Efesus 5:15-17; Psalm 1:1-3) Ra ngam rin’ e n’en ni aram rogon, ma aram e ga be chuchugur ngak Jehovah.
10, 11. Mang angin ni baga’ e ra yib ngak e piin ka yad ba pagel u nap’an ni yad ra motoyil ngak Jehovah?
10 Tin som’mon e thin ko fare babyor ni Proverbs, ma en kan thagthagnag ngak ni nge yoloy e be weliy fan ni kan fal’eg e re ke babyor nem. Me yog ni kan fal’eg ni fan, “nra ayuwegem ngam nang e gonop nge fonow nib fel’, ma ga nang fan e thin nib toar fan. Pi thin ney e rayog ni fil ngom rogon ni nguum ngongol u fithik’ e tamilangan’, nge rogon ni nguum par ni gab yul’yul’, ma gab yal’uw ma gab fel’. Pi thin ney e rayog ni nge ayuweg e piin ndawor ni sukulnagrad nge tamilangan’rad, me fil ngak e piin ni pagel rogon ni nguur gonopiyed ban’en.” (Proverbs 1:1-4) Arfan ni, nap’an ni ga be beeg ma ga be fol ko thin ni bay ko Proverbs—maku arrogon boch i yang ko Bible—ma nguum ayuweg e ngongol rom nib mat’aw mab yal’uw, ma ra felfelan’ Jehovah ni ngam chuchugur ngak. (Psalm 15:1-5) Ra nguum maruweliy ni ngam salap u rogon ni ngam dugliy ban’en, ma nge yoor e tamilangan’ rom, ma nge gel gelngim i gonopiy ban’en, ma ra fel’ rogon ni ngam dugliy ban’en.
11 De puluw ni ngan lemnag ni en ni kab pagel e ra ngongol u fithik’ e gonop ni aram rogon? Danga’, ya bochan ni boor e Kristiano ni ka yad ba pagal ni kar yodoromgad. Ma angin nra yib, e yugu boch e girdi’ e yad be tayfarad ma ‘dar ma dariyfannaged gur ni bochan e ka gab pagel.’ (1 Timothy 4:12) Gallabthir rorad e bay rogorad ni ngar ufgad ngorad, ma be yog Jehovah ni kar felfelan’naged gum’irchaen. (Proverbs 27:11) Yugu aram rogon ni ka yad ba pagel, ma rayog ni nge mudugil lanin’rad ni pi thin ney ni kan thagthagnag e ba puluw ngorad ni gaar: “Mu yaliy e en ni dariy thibngin nge en nib yal’uw e ngam sap ngak, ya bochan ra aw nib gapas e gabul nge langlath rok e cha’ nem.”—Psalm 37:37, NW.
Mu Mel’eg e Bi nib Fel’
12. Mang reb u fithik’ e pi n’en nib ga’ fan ni nge mel’eg e piin ka yad ba pagel, ma mang fan ni yira mel’eg ban’en riy ma ba’ angin ni ra par nib n’uw nap’an?
12 Nap’an ni kab pagel be’ ma ireray e tayim ni nge mel’eg ban’en, ma boch riy e ba’ angin ni ra par nib n’uw nap’an. Boch ban’en ni ngam mel’eg e chiney e ra rin’ ban’en ngom ko gabul nge langlath. Ngan mel’eg ban’en u fithik’ e gonop e ra yibnag e yafas nib felfelan’, mab fel’ rogon. Ngam mel’eg e n’en nib kireb e ra kirebnag e yafas rom ni polo’. Mu lemnag ko uw feni riyul’ e re n’em u l’agruw i ban’en ni thingar mu mel’eg. Som’mon e: Mini’ e ngam mel’eg ni nguum chag ngak? Mang fan nib ga’ fan e re n’em? Thin ko proverb ni kan thagthagnag e be yog ni gaar: “Mpachegem ngak e piin ni yad ba gonop me yog e gonop ngom. Mm’agem ngak e girdi’ ni balyang ma ga kireb.” (Proverbs 13:20) Be yip’ fan ni, munmun ma gad ra bod e piin ni gad be chag ngorad—ndemtrug ko be’ nib gonop ara balyang. Mit i mang girdi’ e ga baadag ni ngam bod?
13, 14. (a) Chagil e gathi kemus ni ngan un ara nga non ngak e girdi’, ya kub muun ngay e mang? (b) Mang oloboch e thingari siyeg e piin ni ka yad ba pagel?
13 Nap’an ni ngam lemnag murung’agen e chag, e baga’ ni ngam lemnag ni ngam chag ngak be’. Ba puluw e re n’em, machane ka bay ban’en ni kub muun ngay. Nap’an ni ga be yaliy reb e program ko television, ma ga be motoyil ko reb e musik, ara ga be bieg reb e babyor, ara ga be yaliy reb e kachido, ara ga be fanay e Internet, e ga be chag ngak be’. Faanra ireray e chag ni ri be dag e ngongol ndariy e runguy nge ngongol ndarngal ara be pi’ e athamgil ni ngan fanay e drug, min chingaw, ara ban’en nib togopuluw ko kenggin e motochiyel u Bible, ma aram ga be chag ngak e en “nib balyang,” ni yad be ngongol ni bod ni dariy Jehovah.—Psalm 14:1.
14 Sana ga be lemnag ni bochan ni ga ma un ko muulung ko Kristiano ma gab pasig ko maruwel u lan e ulung, ma gab gel e chiney ndariy ban’en ni nge rin’ ngom e kachido ni ma dag e ngongol ndariy e runguy ara musik nib fel’ e tune riy machane de fel’ e thin riy. Sana ga be lemnag ni dariy ban’en ni nge rin’ ngom ni faan ga ra sap nib papey nga reb e pornographic Web site ko Internet. Paul ni apostal e be yog ngom ba kireb e lem rom! Be yog ni gaar: “Nchag ngak e girdi’ nib kireb me kireb pangiy nib fel’.” (1 Korinth 15:33) Ba kireban’, ya boor e Kristiano ni bay e athap rorad ma ke kireb pangirad nib fel’ nbochan e chag nib kireb. Ere, mu dugliy lanin’um ni dabkum chag ko girdi’ ni aram rogon. Faanra ngam mu rin’ e n’en ni aram rogon, ma ngam fol ko fonow rok Paul ni gaar: “Dabmu folgad ko ngongol ni yibe rin’ u roy u fayleng, machane mpied gimed ngak Got nge piliyegmed, ni aram e kan piliyeg lanin’med ni polo’. Ma aram e rayog ni ngam nanged e tin nib m’agan’ Got ngay - ni tin nib fel’, nib fel’ u wan’ Got ma rib yal’uw.”—Roma 12:2.
15. Mang e bin l’agruw nrayog ni nge mel’eg e piin ni ka yad ba pagel, ma yu ngiyal’ ma mang e ra mochuchnagrad ni bochan e re n’ey?
15 Baaray e bin l’agruw ni ga ra mel’eg. Ra yib e tayim nib t’uf ni ngam duguliy ko mang e ga baadag ni ngam rin’ u tomren ni kam mu’ ko skul. Faanra ga be par ko reb e binaw ni mo’maw’ ni ngam pirieg e maruwel riy, ma rayog ni ngam lemnag nrib t’uf ni ngam fek nib papey e maruwel nib fel’ nrayog. Faanra ga be par ko reb e nam nib fel’ rogon, ma sana boor e maruwel e rayog ni ngam mel’eg reb riy, ma boch riy e rib ga’ ni yib baadag. Ma sensey rom fa gallabthir e yad be lemnag ban’en nib fel’ ngom, ma rogned ngom ni ngam fil reb e ban’en nib mab e kanawo’ riy ngom ma ra dab kum magawon ko salpiy, ma sana ra yoor e chugum rom. Machane, ga ra fil rogon e re n’em ma rayog ni ngari lichnag e tayim rom nrayog ni ngam fanay ko pigpig ku Jehovah.
16, 17. Mu weliy ko uw rogon ni nge ayuwegey e thin nu Bible nib thilthil ni be’ ni kab pagel e nge fel’ rogon i lemnag rok rogon e maruwel.
16 Dabmu pagtalin ni ngam bieg e Bible u m’on ni ngam dugliy ban’en. Fare Bible e be pi’ e athamgil nga lanin’dad ni ngad uned ko maruwel, ni be dag nib mil fan ngodad ni ngad ayuweged gadad. (2 Thessalonika 3:10-12) Yugu aram rogon, kub muun ngay boch ban’en. Gamad be pi’ e athamgil nga lanin’um ni ngam bieg e pi thin nu Bible ni baara’ ma ngam lemnag ko uw rogon ni nge ayuweg be’ ni kab pagal ni nge par nib thabthabel laniyan’ rogon ni nge mel’eg reb e n’en ni nge rin’: Proverbs 30:8, 9; Eklesiastes 7:11, 12; Matthew 6:33; 1 Korinth 7:31; 1 Timothy 6:9, 10. Tomren ni kam bieg e pi verse nem, ma kam guy ko uw rogon u wan’ Jehovah e re n’ey?
17 Maruwel rodad ni fan nge yog boch e salpiy ngodad e thingar dabi mang ban’en ni rib ga’ fan nra magawonnag e pigpig rodad ku Jehovah. Faanra rayog ni ngam un ko maruwel nrayog ni nge yog ngom boch e salpiy nib t’uf rom ni kemus ni kam mu’nag e high school ma manigil. Faanra kub t’uf rom ni ngam ulul i fil ban’en u tomren e high school, ireray e n’en nib t’uf ni gur nge gallabthir rom e ngam weliyed murung’agen. Machane, ri dab mu pagtalin e “tin th’abi ga’ fan”—ni aram e tirok Got ban’en. (Filippi 1:9, 10) Dabmu rin’ e oloboch ni bod Baruch, ni ir fare tayol rok Jeremiah. Me aw ndakuriy fan u wan’ e pigpig ni ma ta’ me yan i ‘gay boch ban’en nib tolang puluwon ni fan ngak.’ (Jeremiah 45:5) Me pagtalin nib ngoch nap’an ni dariy ban’en u roy u fayleng ‘nib tolang puluwon’ nra ayuweg ni nge chuchugur ngak Jehovah ara ra ayuweg ni nge magay nib fas u nap’an ni ran gothey fare Jerusalem. Maku rayog ni nga nog ngodad ban’en ni aram rogon e ngiyal’ ney.
Mu Tayfan e Tirok Got Ban’en
18, 19. (a) Piin buguliy yoror rom e yad ba gafgow ko mang, ma susun uwrarogorad u wan’um? (b) Mang fan ni boor e girdi’ e de yib e bilig ngorad ko tirok Got?
18 Kam guy ko news boch e sasing ko pi bitir ko pi nam ni kaygi gel e gafgow ni keb ngorad? Faanra kam guy, ma mutrug ni kam runguyrad. Maku kam runguy e piin buguli yoror rom fa? Mang fan nib t’uf ni ngam runguyrad? Ya bochan e boor i yad e ku be yim’ ni bilig. Kar gafgowgad nrogon ni yiiynag Amos ni gaar: “‘Ba’ ba ngiyal’ ni be yib ni bay gu pi’ e uyongol nge yib nga daken e re nam ney. Bay yib e bilig ngak e girdi’, machane gathi fan ko ggan; ma bay yib e belel ngorad, machane gathi fan ko ran. Bay ra m’ad ni bochan bbugithin ni nge yib rok Somol ngorad ni bod be’ ni yib e bilig ngak nib gel nge yim’ ni bochan e ggan. I gag Somol ni Got e ku gog e pi thin ney.’”—Amos 8:11.
19 Riyul’ ni, oren e piin ni kar gafgowgad ko tirok Got e dar ma “lemnaged e tin nib t’uf rorad e tirok Got.” (Matthew 5:3) Boor e girdi’ nde yib e bilig ngorad ko tirok Got. Ma boch i yad e sana yad be lemnag ni kan duruiyrad nib fel’rogon. Machane faanra riyul’ ni aram rogon, ma bochan ni yad ma kay e ggan ni dariyfan ni aram e “gonop ko fayleng,” nib muun ngay e chogowen e chugum, nge tamilangan’ ko science ni be sananag ban’en, nge lem ko girdi’ u murung’agen e ngongol, nge boch ban’en ni aram rogon. Boch e girdi’ e yad be lemnag ni machib ni yib u Bible e ke kakrom nbochan e “gonop” ko girdi’ e ngiyal’ ney. Machane, “fayleng e dar nanged Got nbochan e gonop rok.” Gonop ko fayleng e dabi ayuwegem ni ngam chuchugur ngak Got. Ireray e n’en ni ke “mma’y fan u p’eowchen Got.”—1 Korinth 1:20, 21; 3:19.
20. Mang fan ni de puluw ni ngan folwok rok e girdi’ ni dar ma pigpig ku Jehovah?
20 Ga ra guy e pi sasing ko girdi’ ni keb e bilig ngorad, ma kam adag ni ngam bod yad? Ri danga’! Yugu aram rogon, boch e piin ni pagel u lan e tabinaw ko Kristiano e kara daged ni yad baadag ni ngar boded e piin ni keb e bilig ngorad ko tirok Got ni be liyegrad. Picha’ nem e baga’ ni yad be lemnag ni piin fel’ yangaren u fayleng e dariy e magawon rorad, ma rib felfelan’ e yafas rorad. Kar paged talin ni pi fel’ yangaren nem e yad ba dar rok Jehovah. (Efesus 4:17, 18) Maku, kar paged talin e n’en ni ra buch rok be’ ni kari gafgow ko tirok Got ban’en. Boch ko tin nib kireb nib riy e aram e diyen ko fel’ yangaren ndariy e pumoon ma nge sum e magawon ko dowef nge lem nbochan e ngongol ni darngal, nge thoy e tamagow, nge chingaw, nge ngan fanay e drug. Ngan gafgow ko tirok Got e ra mon’eg e lem ni togopuluw, nge dakuriy e athap, ma dakuriy ban’en ni be pow’iy e yafas.
21. Uw rogon ni ngada yororiyed gadad ma dabi af ngodad e lem nge ngongol rok e piin ni dar ma pigpig ku Jehovah?
21 Ere, nap’an ni ga bay u skul u fithik’ e piin ni gathi tapigpig rok Jehovah, dabmu pag ni nge gel pangirad ngom. (2 Korinth 4:18) Boch i yad e ra non ni be moningnag e tirok Got. Maku, girdien e news ni ma yog boch e thin, ni be dag nib fel’ ni ngan un ko ngongol ni darngal, ma ngan chingnag, ara nog e thin nib kireb. Mu togopuluw ko re lem nem. Mu par ni ga be chag ngak e girdi’ “ni ke michan’rad mab fel’ e nangan’ rorad.” Mu par ni nguum maruweliy e “maruwel rom ni fan ngak Somol.” (1 Timothy 1:19; 1 Korinth 15:58) Mu par ni ga ma un ko maruwel u Kingdom Hall nge fare maruwel ni ngan wereg e machib. Nap’an e pi duw ni ga ma un ko skul, ma yu ngiyal’ e ngam mu un ko pioneer ni ayuw. Ngam mu gel ko tirok Got ni aram rogon, ma rayog ni ngam par ni ga be filmunguyan’um u fithik’ urngin ban’en.—2 Timothy 4:5.
22, 23. (a) Mang fan ni reb e Kristiano ni kab pagel e baga’ ni ma mel’eg ban’en ni dabi nang boch e girdi’ fan? (b) Kan pi’ e athamgil nga laniyan’ e piin ni ka yad ba pagel ni ngara rin’ed e mang?
22 Ngam changar nga ban’en ni ga be puluwnag ko tirok Got e baga’ ni ga ra dugliy ban’en ma dabi nang boch e girdi’ fan. Ni bod reb e Kristiano ni kab pagel nib cheg ko musik ma reb e student nib tolang e grade rok ko urngin e subject u skul. Tomren ni ke chuw u skul, me un ko chitamangin ko maruwel rok ni ma biechnag e winda ni fan ni nge ulul ko maruwel ni ke mel’eg ni reb e tamachib ni polo’ e tayim rok, ara pioneer. Pi sensey rok e dar nanged fan e n’en ni ke dugliy, machane faanra gur e kam chuchugur ngak Jehovah, ma ke mudugil lanin’mad ni ga manang fan.
23 Ga ra fal’eg i lemnag ko uw rogon ni ngam fanay e tin ni bay rom nib tolang puluwon ni gur be’ ni ka gab pagel, ‘ngam maruweliy nib sasaf’og ni nge yog ngom reb e def nib fel’ ko yafas rom ko gabul nge langlath, ma aram rayog ni ngarim chichiiy paam ko fa bin riyul’ e yafas.’ (1 Timothy 6:19) Mu athamgil ni nge mudugil lanin’um ni nge ‘dabmu pagtalin e En ni Ga’ ni ke Sunmiyem’—ni ka gab pagel nge yafas rom ni polo’. Kemus ni ireray e kanawo’ ni ngam ayuweg e yafas rom ko gabul nge langlath ni ra fel’ rogom, ndariy n’umngin nap’an.
Mang e Kam Dugliy u Wan’um?
• Mang fonow ni kan thagthagnag e ra ayuweg e piin ka yad ba pagel ko tin yad be nameg ko yafas rorad ko gabul nge langlath?
• Mang boch e kanawo’ ni en kab pagel e rayog ni nge “chuchugur ngak Got” riy?
• Mang boch ban’en ni ma dugliy e en kab pagel nra rin’ ban’en ko yafas rok gabul nge langlath?
[Pictures on page 23]
Ga ra pag e tin ni ga be nameg ni nge fek urngin gelngim nge lem ni pasig ni ka gab pagel?
[Picture on page 24, 25]
Pi Kristiano ni ka yad ba pagel e yad be athamgil ni nge par nib tamilang e changar rorad ko tirok Got