Piin Fel’ Yangaren, Dab Mpaged Talin e En ni Sunmiymed

“Mu lemnag e En ni Sunmiyem ko ngiyal’ ni ka gab pagal.”​—EKL. 12:1, NW.

1. Uw rogon ni ma dag Jehovah e pagan’ rok u daken e pi tapigpig rok ni fel’ yangaren?

PIIN fel’ yangaren e rib ga’ farad u wan’ Jehovah maku taareb rogorad ko waangchal ni ma gal ramaen ni kadbul. Arrogon, i yog u m’on riy ni rorran nra “mahl” fak, ma pi pagal nge rugod e ra “bagayad me ir e ra ognag ir” ko maruwel rok Kristus. (Ps. 110:3) Re yiiy nem e ra lebug u ba ngiyal’ ndakir fol e girdi’ rok Got, ma ke par ni yigoo yad nge salpiy rorad e yad be lemnag, ma dakurur folgad. Machane, manang Jehovah ni piin fel’ yangaren ni yad ma pigpig ngak e yad ra par nib thil. Rib gel e pagan’ rok ngomed e pi walag ni pagal nge rugod!

2. Ra nge dab ni pagtalin Jehovah ma mang e ba muun ngay?

² Mu lemnag e felfelan’ nima tay Got u nap’an nima guy e piin fel’ yangaren ndarur paged talin e En ni Sunmiyrad. (Ekl. 12:1) Boor ban’en nib muun ko dabin pagtalin Jehovah. Be yip’ fan ni ngan rin’ ban’en​—ngan rin’ e tin nib m’agan’ ngay, min pag e motochiyel rok nge pow’iy e yafas rodad ni gubin e rran. Ku be yip’ fan ni nge pagan’uy ngak Jehovah, ya gad manang nima lemnag rarogodad. (Ps. 37:3; Isa. 48:17, 18) Errogon ni gama lemnag e En ni Sunmiyem, fa?

‘Mu Pagan’um Ngak Jehovah u Polo’ i Lanin’um’

3, 4. Uw rogon ni ke dag Jesus ni be pagan’ ngak Jehovah, ma mang nib ga’ fan ni nge pagan’dad ngak Jehovah?

³ En nri i pagan’ nib fel’ rogon ngak Got ni ngan folwok rok e, Jesus Kristus. I par nibe fol ko fapi thin u Proverbs 3:5, 6 ni gaar: “Mu pagan’um ngak Somol u polo’ i lanin’um, ma ri dab mu tor ko tin ni ga be finey ni ga manang. Nguum lemnag Somol u fithik’ urngin ban’en ni ga be rin’, me dag ngom e bin nib mat’aw e kanawo’.” De n’uw nap’an u tomren ni kan taufenag Jesus, me yib Satan ngak, me gay rogon ni nge waliy nge adag e pi am nge flaab ko fayleng. (Luke 4:3-13) De yog nni bannag Jesus. Ya manang ni bin nriyul’ e ‘flaab, nge ta’ fan, nge yafas’ e ‘angin e sobut’an’ nge madgun Jehovah.’​—Prov. 22:4.

⁴ Fayleng e chiney e ke suwey e chogow nge lem ni fel’ ngak. Gad ba gonop ni faan gadra folwok rok Jesus, u lan e re fayleng ney. Maku dab mu paged talin, ndemtrug e n’en nra rin’ Satan ni nge chefeg e pi tapigpig rok Jehovah nga wuru’ e kanawo’ ni yan ko yafas. Baadag ni nge guy gubin e girdi’ ni yad be yan ko fare pa’ i kanawo’ nib ga’ radan nibe sor iyan ko magothgoth. Dab mu paged nge bannagmed! Ya ngaum lemnaged e En ni Sunmiymed. Mu pagedan’med ngak u polo’ i lanin’med, mi gimed chichiiy paamed ko “bin nriyul’ e yafos,” ndabisiy nra yib.​—1 Tim. 6:19.

Piin Fel’ Yangaren, Mu Gonopgad!

5. Uw rogon u wan’um e n’en ni bayi buch ko re fayleng ney boch nga m’on?

⁵ Piin fel’ yangaren ndarur paged talin e En ni Sunmiyrad e yad ba gonop. (Mu beeg e Psalm 119:99, 100.) Bochan e yad ma sap nga ban’en nrogon nima sap Got ngay, ma yad manang ndabki n’uw nap’an min thang ere m’ag ney. Gimed e piin fel’ yangaren e yugu aram rogon ndawori n’uw nap’med, ma dariy e maruwar riy ni kam guyed ni girdi’ ko re fayleng ney e yad be rus ma yad be magafan’ u murung’agen e tin ni bay yib boch nga m’on. Faanra ki gimed be un nga skul, ma dabisiy ni kam rung’aged murung’agen e yub, yafang ni be kireb, gek’iy ni yibe li’, nge ku boch e magawon nib chuchugur ko tiney. Be magafan’ e girdi’ ko pi n’ey, machane kemus ni yigoo Pi Mich Rok Jehovah e ri yad manang ni aray bang ko fare pow ni be dag ni ke chugur ni nge mus e fayleng rok Satan.​—Rev. 11:18.

6. Uw rogon ni kan bannag boch e fel’ yangaren?

⁶ Ba kireban’, ya boor e pi tapigpig rok Got nib fel’ yangarad ndakurur tedan’rad ma dakurur sapgad ngay nre fayleng ney e dabki n’uw nap’an ni bayi par. (2 Pet. 3:3, 4) Bochi yad e kan waliy ke un nga boch e denen nrib gel e kireb riy u daken e piin ni yad be chag ngak nge yaan e ngongol ni puwlag. (Prov. 13:20) Rib gel e kireban’ riy ni nge dab kud pired ni gad ba fel’ u wan’ Got e chiney ni kar da chugurgad ko tomur! Mu filed ban’en ko n’en ni buch rok piyu Israel ko duw ni 1473 B.C.E u nap’an ni yad be par ko Tagapas nu Moab, ni kari chugur ni ngar tawgad nga lan fare Nam ni Kan Micheg. Mang e buch u rom?

Nap’an ni Kari Chugur ni Ngar Tawgad ko Gin ni Yad Be Nameg Mar Paged Yad

7, 8. (a) Mang ban e fanay Satan ko Tagapas u Moab? (b) Mang ban e be fanay Satan e ngiyal’ ney?

⁷ Ngiyal’ nem, e baadag Satan ni nge taleg ni nge dabi yog ngak piyu Israel e n’en ni kan micheg ngorad. Nap’an nde yog ni bucheg Balaam waathrad, miki fanay Satan yugu reb e ban’en ni nge bannagrad; i gay rogon ni nge dabkiyog nra fel’gad u wan’ Jehovah. I fanay fapi ppin nu Moab ni ngar bannaged yad, ma ri gel fare Moonyan’ ko re n’ey. I tabab e girdi’ ni ngar uned ko fapi ppin nu Moab ko ngongol ndarngal mar uned ko liyor ngak Baal nu Peor! Yugu aram rogon ni kar chugurgad ko fare Nam ni Kan Micheg, ma sogonap’an 24,000 piyu Israel nra m’ad. Rib gel e kireban’ ko re n’em!​—Num. 25:1-3, 9.

⁸ Ngiyal’ ney, e karda chugurgad nga reb e nam ni kan micheg ni kab gel e fel’ riy​—ni aram fare m’ag nib beech. Maku taareb rogon, ya ku be fanay Satan e ngongol nde yalen ni nge kirebnag e girdi’ rok Got. Lem ko fayleng u rogon pangiy e daki fel’ ya mus ko ngongol ndarngal maku daki kireb u wan’uy ma par ko pumoon nge pumoon ara ppin nge ppin e yima sap ngay ni ban’en nra be’ ma ir rok e nge dugliy. I yog reb e walag ni ppin ni Kristiano ni gaar, “Kemus nu lan e tabinaw ngu lan e Kingdom Hall e ma fil pi fakag riy ni par ko pumoon nge pumoon ara ppin nge ppin nge ngam pirew be’ ni gathi mabgol rom e ba kireb u mit Got.”

9. Mang e ra buch u nap’an ni ke ‘fel’ yangarey,’ ma mang e rayog ni rin’ e piin fel’ yangaren ko re n’ey?

⁹ Piin fel’ yangaren ndarur paged talin e En ni Sunmiyrad e yad manang ni par ko pumoon nge ppin e ba tow’ath nib thothup ni bay rogon ko yafas nge ngan fakay e bitir. Ere, kar nanged ni par ko pumoon nge ppin e kemus ni ngan rin’ u rogon nib m’agan’ Got ngay​—ni aram e, u lan e mabgol. (Heb. 13:4) Machane, nap’an nike ‘fel’ yangarey’ ni aram e ngiyal’ nib gel e ar’ar ko dowef ma rayog ni thil e lem ku be’​—ma aram e ngiyal’ nib mo’maw’ ni ngan par ni yib machalbog. (1 Kor. 7:36) Mang e rayog nim rin’ u nap’an nra yib e lem nib kireb ngom? Ngam meybil nib gel ku Jehovah nge ayuwegem ngam fal’eg i tiyan’um ko tin nib machalbog ban’en. Gubin ngiyal’ nima motoyil Jehovah ngak e piin ni yad ma sap ngak u fithik’ e yul’yul’. (Mu beeg e Luke 11:9-13.) Yira weliy murung’agen e tin nib machalbog nge tin nra gelnag e michan’ ma ra ayuwegdad nge yog nda tedan’dad ko tin nib fel’ bayay.

Mu Mel’eg e Tin ni Ngam Nameg u Fithik’ e Gonop!

10. Ba miti mang lem e gad baadag ni ngad siyeged, ma mang deer e rayog ni ngad fithed gadad riy?

¹⁰ Reb i fan ni boor e piin fel’ yangaren u fayleng e chiney ni kar thum’gad nga wuru’ ma yad be par ni kemus ni fan ko tin ni baadag dowrad e bochan ndawor ni “piliyeg e changar” rorad​—dar pow’iyrad Got ara de mudugil e athap rorad ni fan ko gabul nge langlath. (Prov. 29:18) Yad bod piyu Israel u nap’an Isaiah nda ur folgad rok Got mu ur pired ni yad be “felfelan’ . . . ma yad be abich ma yad be garbod.” (Isa. 22:13, NW) Mang ndab da sapgad ko fare athap ni ke pi’ Jehovah ni fan ngak e piin ni yad ba yul’yul’ ngak ko bin ni nge awan’dad ngak e pi girdi’ ney? Faanra gur reb e tapigpig rok Got nib fel’ yangarem, ma ga be sap nga m’on ko bin nib beech e fayleng, fa? Ga be athamgil ni ngam ‘par ni gabe t’ar lanin’um . . . u nap’an ni [ga be] sonnag fare Rran nib fel’ ni ir e ke l’agan’dad ngay’ ni ke tay Jehovah nga peowchedad, fa? (Titus 2:12, 13) Fulweg rom e bay rogon ko tin ni gara nameg nge tin ni gara tay nib m’on u wan’um.

11. Mang fan ni ngari maruwel nib gel e pi Kristiano ni fel’ yangaren ni ka yad bay u skul?

¹¹ Fayleng e baadag ni nge tay e piin fel’ yangaren gelngirad i nameg e tin nde ga’ fan. Rogon riy, e gimed e piin ni ki gimed bay u skul e thingar maruwelgad nib gel ni fan nge yog e skul nib t’uf romed. Dab mu paged talin ni, n’en ni gimed be nameg e gathi kemus ni nge yog reb e maruwel nib fel’ ngomed machane ngki yog nni fanaymed u lan e ulung mi gimed pi’ e athamgil ngak boch e girdi’. Ra nge yog ere n’em ngomed, mab t’uf ni nge yog ni mu nonad nib fel’ rogon, mi gimed lem nib fel’ rogon, mi gimed non nib gapas u fithik’ e tayfan ngak e girdi’. Machane, piin fel’ yangaren ni yad be fil e Bible mi yad athamgil ni ngar folgad ko pi kenggin e motochiyel riy e ke yog e bin nth’abi fel’ e skul ngorad ma kar toyed e def ni fan ngorad nra par ndariy n’umngin nap’an.​—Mu beeg e Psalm 1:1-3.a

12. Mang ban’en nib fel’ nra folwok e tabinaw ko Kristiano riy?

¹² U Israel e, rib ga’ fan e skul nima tay e gallabthir ngak pi fakrad. Ma skulnag e pi gallabthir pi fakrad u gubin ban’en ko yafas, ni ba ga’ ni tirok Got ban’en. (Deut. 6:6, 7) Ere, piin fel’ yangaren u Israel ni ur folgad ko gallabthir rorad nge piin ni bay madgun Got u wan’rad e gathi kemus ni yog e tamilangan’ ngorad ya ki yog e gonop ngorad​—boch e fel’ngin nra yog ni faanra ni fil murung’agen Got nge pi motochiyel rok. (Prov. 1:2-4; 2:1-5, 11-15) Tabinaw ko pi Kristiano e ngiyal’ ney e ku thingar ra fal’eged i yaliy e skul.

Mmotoyil Ngak e Piin ni Gab T’uf Rorad

13. Ba miti mang fonow e yima pi’ ngak e pi fel’ yangaren, ma mang fan nsusuna ngar kol ayuwgad?

¹³ Boor mit e girdi’ ni ma fonownag e piin fel’ yangaren​—ba muun ngay e pi tafonow ara counselor u skul, nib ga’ ni yad ma fonownag e bitir u rogon nra fel’ rogorad u lan e re fayleng ney. Wenig ngomed, mu meybilgad ku Got u nap’an ni gimed be fal’eg i lemnag gubin mit e pi fonow ney mi gimed fanay e Thin Rok Got nge pi babyor nima pi’ fare tapigpig nib yul’yul’ mab gonop. U daken e fol Bible ni gimed be tay, ma kam guyed ni piin fel’ yangaren e ri be namegrad Satan. Bod ni, nap’an fare milay’ nu Eden, me motoyil Efa ngak Satan, ni be’ nde dag buchuuw i t’ufeg ngak Efa. Gomanga fol rok Jehovah, ni ir e en ni ke micheg ngak nib t’uf rok u boor e kanawo’, mab thil e n’en nra buch!​—Gen. 3:1-6.

14. Mang fan nsusuna ngad motoyilgad ku Jehovah nge gallabthir rodad nib michan’rad?

¹⁴ Gimed ba t’uf rok e En ni Sunmiymed, ma ma rin’ ere n’em u reb e kanawo’ nrib machalbog. Baadag ni ngam felfelan’gad ni manemus, gathi kemus ni chiney! Ere, bod ba gallabthir nima ayuwegey, be yog ngomed nge gubin e piin ni yad ma pigpig ngak ni: “Ireray e kanawo’. Mmarod riy.” (Isa. 30:21) Faanra gallabthir romed e rriyul’ nib t’uf Jehovah rorad, maku ireray reb e tow’ath ngomed. Mmotoyilgad ko fonow rorad u fithik’ e tayfan u nap’an ni ngam dugliyed e tin ni nge m’on u wun’med nge tin ni ngam nameged. (Prov. 1:8, 9) Yad baadag ni nge yog e yafas ngomed, ban’en ni kab ga’ fan ko fel’ rogon nge gilbuguwan ko re fayleng ney.​—Matt. 16:26.

15, 16. (a) Mang e rayog ni pagan’dad ngak Jehovah riy? (b) Mang ban’en nib ga’ fan ni gad be fil ko n’en ni buch ku Baruch?

¹⁵ Piin ndawora paged talin e En ni Sunmiyrad e ba mom e yafas rorad, mab pagan’rad ni Jehovah e ‘ri dabi’ pagrad ‘ma ri dabi’ n’agrad. (Mu beeg e Hebrews 13:5.) Bochan nre ngongol ney e ba thil ko lem ko fayleng, ma thingar da kol ayuwgad ndab da paged e lem ko re fayleng ney nge kirebnagdad. (Efe. 2:2) Am lemnag e n’en ni rin’ e en tayol rok Jeremiah, ni Baruch fithingan, ni immoy ko tin tomuren e rran ni ke mo’maw’ e par riy u Jerusalem ni munmun min gothey fare mach riy ko duw ni 607 B.C.E.

¹⁶ Dabisiy ni baadag Baruch ni nge fel’ rogon boch e yafas rok. I guy Jehovah ere n’ey me ginang Baruch u fithik’ e sumunguy ndabi nameg e “tin nib tolang puluwon ban’en” ni fan ngak. I micheg Baruch nib sobut’an’ mab gonop, ya motoyil ngak Jehovah me magey nib fos u nap’an nni gothey yu Jerusalem. (Jer. 45:2-5, NW) Maku reb e, piin ni ur moyed u nap’an Baruch nra yognaged e “tin nib tolang puluwon ban’en” ni bod e chugum, ma dar ted Jehovah nib m’on u wan’rad, e m’ay gubin ban’en rorad nga pa’ piyu Chaldea (Babylonia). Maku boor i yad e yim’. (2 Kron. 36:15-18, NW) N’en ni buch ku Baruch e be ayuwegdad ngad guyed ni kab ga’ fan ni nge fel’ thildad Got ko bin ni nge yoor ban’en rodad me ga’ fadad u lan e re fayleng ney.

Mu Sap Ngak e Piin nib Fel’ ni Ngan Folwok Rorad

17. Mang fan nib fel’ ni nge folwok e pi tapigpig rok Jehovah ku Jesus, nge Paul, nge Timothy e ngiyal’ ney?

¹⁷ Thin rok Got e be dag ngodad boch e girdi’ nib fel’ ni ngan folwok rorad, nrayog ni ayuwegdad ni nga darod u kanawoen e yafas. Bod ni Jesus, e aram e cha’ ni immoy u fayleng nri boor ban’en nib cheg riy, machane yiluy e lem rok ko n’en nra ayuweg e girdi’ ni manemus​—aram fare thin nib fel’ ni “murung’agen e gagiyeg rok Got.” (Luke 4:43) Rogon ni yog rok apostal Paul ni nge pi’ e tin nth’abi fel’ rok ni fan ngak Jehovah, e digey e maruwel rok nib fel’ me fanay e tayim rok nge gelngin ni fan e nge machibnag fare thin nib fel’. Timothy ni ‘be’ nri fak u daken e michan’ ngak Kristus,’ e folwok ko n’en ni rin’ Paul. (1 Tim. 1:2) Gur, i kalngan’ Jesus, nge Paul, nge Timothy ko n’en nra mel’eged u lan e yafas rorad? Ri danga’! Tin nriyul’ riy e, yog Paul ni tin ni be ognag e fayleng e taareb rogon ko “chubung” ni faanra ngan taarebnag ko fare tow’ath ni ngan pigpig ku Got.​—Fil. 3:8-11.

18. Mang boch ban’en ni thilyeg reb e walag nib pagel u rarogon, ma mang nde kalngan’ riy?

¹⁸ Ngiyal’ ney e boor e piin fel’ yangaren ni Kristiano ni yad ma folwok ko michan’ rok Jesus, nge Paul, nge Timothy. Bod reb e walag nib pagel ni bay e maruwel rok nib tolang puluwon riy ni yoloy ni gaar: “Bochan ni gube par nib puluw ko pi kenggin e motochiyel nu Bible, ma de n’uw nap’an ma kan tolangnageg ko maruwel rog. Yugu aram rogon ni ke fel’ rogog ko salpiy, ma lanin’ug e gowa gube l’ol’og e nifeng ni nggu kol. Nap’an ni gu wan gguy e piin ni yad ba ga’ ko re company nem, nggu weliy ngorad e n’en ni gu be lemnag ni aram e nggu un ko machib ni polo’ e tayim rog, mar ognaged boor e salpiy ngog, ni yad be lemnag ni gura par ni faanra aram rogon. Machane kug mu’ i dugliy e lem rog. Boor e girdi’ ndar nanged fan ni kug digey e binem e maruwel nib fel’ kug un ko machib ni polo’ e tayim rog. Fulweg rog e riyul’ ni gu baadag ni nggu lebguy e n’en ni kug micheg ngak Got. Bochan ni kug tay nib m’on e tirok Got ban’en u lan e yafas rog, ma kab gel e felfelan’ rog mab fel’ u wan’ug e chuuw ni bay rog ban’en ndabiyog ni ngan taarebnag ko felfelan’ nra yib ngog ni bochan e salpiy nge gilbuguwan.”

19. Mang e n’en ni yibe pi’ e athamgil riy ngak e piin fel’ yangaren ni ngar mel’eged?

¹⁹ Ga’ngin yang e fayleng e, bokum biyu’ e piin fel’ yangaren nib chugur e n’en ni yad ma mel’eg. Ere, gimed e piin fel’ yangaren, nap’an ni gimed be lemnag e gabul nge langlath u puluwmed, ma dab mu paged talin e rran ku Jehovah. (2 Pet. 3:11, 12) Dabi awan’med ko piin ni boor ban’en rorad ko re fayleng ney. Ya, ngam motoyilgad ko piin nriyul’ ni gimed ba t’uf rorad. Ngan ulunguy e ‘flaab u tharmiy’ e aram e n’en nrayog ni pagan’med ngay maku ireram e n’en nra yib angin ngomed ndariy n’umngin nap’an. (Matt. 6:19, 20; mu beeg e 1 John 2:15-17.) Arrogon, dab mu paged talin e En ni Sunmiymed. Gimed ra rin’ ni aray rogon, ma ra tow’athnagmed Jehovah.

[Footnote]

Ka Ga Manang?

• Uw rogon ni ngad daged ni be pagan’dad ngak Got?

• Mang e bin nth’abi fel’ e skul ni bay?

• Mang e rayog nda filed ko n’en ni rin’ Baruch?

• Mini’ e piin nrayog ni ngan folwok rorad, ma mangfan?

[Pictures on page 17]

Jehovah e ir e ma pi’ e bin nth’abi fel’ e skul