Piin Ni Fel’ Yangaren Ni Yad Ma Kemnag E An Sunumiyrad

“Mu lemnag e en ni sunumiyem ko ngiyal’ ni ka gab pagal.”​—EKLESIASTES 12:1.

1. Mang e yog be’ ni 11 e duw rok ni be dag ni ke riyul’ e Ani Sunumiydad u wan’?

UW fene fel’ u nap’an ni ma dag e piin fel’ yangaren ko thin rorad nge ngongol rorad ni ba riyul’ Jehovah Got u wan’rad ma yad ba adag ni ngar felan’naged! Reb e pagal ni 11 e duw rok e ke gaar: “Ngiyal’ ni goo gag ni gu ra sap ko winda nga wen, ma gu ma guy e pi n’en nrib fel’ ni ke sunumiy Jehovah. Ma gu ma lemnag ko ra uw rogon fene fel’ yaan’ e Paradis ni bay nga m’on nrayog ni nggu pared e pi gamanman ko ngiyal’ nem.” (Isaiah 11:6-9) Miki gaar: “Ngiyal’ ni goo gag ni gu be par ma gu ma meybil ku Jehovah. Gu manang ndabi puwan’ ni gu ma non ngak u gubin ngiyal’. Ya gu manang ni gubin ngiyal’ ma be guyeg.” Aram rogon fene riyul’ u wan’um e Ani Sunumiydad ni bod rogon e re pagal ney fa?

Uw Fene Riyul’ Got u Wan’um?

2. (a) Uw rogon me yog ni nge mich u wan’um e Ani Sunumiyem e riyul’ ni ir be’? (b) Uw rogon nrayog ni nge ayuweg e gallabthir e bitir rorad ngar ted fan Got ni ir be’ nib riyul’?

² Ra nge riyul’ Jehovah nge pi n’en ni micheg u wan’um ma som’on ma thingar mu fil morngaagen nge morngaagen e gabul nge langleth u lan fare fayleng nib biech mab mat’aw ni bay ko Bible. (Revelation 21:3, 4) Faanra fil e gallabthir rom ngom u morngaagen e pi n’ey ma bay fan ni ngam pining e magar riy ya aram rogon nrayog ni mu fol ko re motochiyel ney ni gaar: “Mu lemnag, e en ni sunumiyem.” (Eklesiastes 12:1) Weliy reb e fel’ yangaren u mornaagen rogon ni fonownag e gallabthir rok ni gaar: “Gubin ban’en ko yafas e kan puluwnag ku Jehovah. Aram fan ni gu ma lemnag e An sunumiyeg.” Ma yugu reb e ppin ni fel’ yangaren e gaar: “Ri gu ma pining e magar ko gallabthir rog ya ur filew ngog ni Jehovah e ir be’ nib riyul’. Ur dagew ngog rogon ni nggu t’ufeg mar weliyew ni bay e falfalan’ riy ni ngan pigpig ngak ni full-time.”

3, 4. Mang e ra ayuwegem ngam lemnag ni riyul’ ni Jehovah e ir be’?

³ Machane boor e girdi’ e mo’maw ni ngar lemnaged Got ni ir be’ nib riyul’ ma ma lemnagrad. Ma uw rogon gur? Bay reb e fel’ yangaren ni kan ayuweg ni nge lemnag Got ko re thin ney u lan fare The Watchtower: “Dad nanged uw gangin Jehovah Got.” Ma rogon fene ga’ fan Got e de tor nga daken gangin fa yaan, ya bin migid e thin ko re gi Watchtower nem e gaar: “Rogon fene ga’ Got e ma yan u rogon miti mang Got ir,” ni ir be’ nib yul’yul’ mab wurengan’ ma ma t’ufegey, ma ma n’ag fan e kireb ko girdi’.a (Exodus 34:6; Deuteronomy 32:4; Psalm 86:5; James 5:11) Aram rogon Jehovah u wan’um ni ir be’ ni ga ma pagan’ ngak, ma ba fel’ thilmew fa? ​—Isaiah 41:8; James 2:23.

⁴ I ayuweg Jesus pi gachalpen nge fel’ thilrad Got. Ere ke weliy apostal John morngaagen e ngiyal’ nran faseg ko yam’ nge yan nga tharmiy ni gaar: “Gad ra bod [Got], ya gad ra guy nrogon.” (1 John 3:2; 1 Korinth 15:44) Rayog ni ngan ayuweg e piin fel’ yangaren ko ngiyal’ ney ngar nanged Got ni ir be’ nib riyul’, ma rayog ni nge fel’ thilrad ni yugu aram rogon ndabiyog ni ngan guy. Gaar reb e pagal: “Ke ayuwegeg e gallabthir rog ni nggu lemnag Jehovah ya ur fithew boch e deer ngog ni bod e tin baaray, ‘Mang e ra yog Jehovah u morngaagen e re n’ey? Uw rogon ni ngam weliy ko thin rom? Mang fan e re n’em?’” Gathi ma n’igin e pi deer ni aray rogon ni ngad lemnaged ko uw rogon thildad Got?

Fan e Ngan Lemnag

5. Mang boch e thin ko Bible ni ma dag ni ngan lemnag be’ e gathi ke mus ni ngam nang fithingan?

⁵ Ra ngan fol ko fare motochiyel ni “Mu lemnag, e en ni sunumiyem,” ma gathi ke mus ni nge yib ngan’um. Ya ba l’ag ko ngan rin’ ban’en, ma ngan rin’ e tin nra felan’nag. Yog fa en nib kireb u charen Jesus ni gaar: “Ri ga ra lemnigeg ko ngiyal’ ni ga ra yib ni gur e kam mang pilung,” ma gathi ke mus ni ba adag ni nge nang Jesus fithingan. Ya ba adag ni nge rin’ Jesus ban’en ni fan ngak ni aram e nge faseg ko yam’. (Luke 23:42) Ku arrogon Josef u nap’an ni immoy u kalbus me yog ku fa en ni ma ayuweg e kap ku Farao ni nge lemnag ir ngak Farao. Ma nap’an ni meybil Job ku Got ni gaar, “Mu lemnigeg,” ma aram e be ning Job ku Got ni nge faseg ko yam’ ko ba ngiyal’ nga m’on.​—Job 14:13; Genesis 40:14, 23.

6. Uw rogon ni fare bugithin ni Hebrew ni bpuluw ko “lemnag” e ba rogon ko t’ufeg?

⁶ Kan nog ni fare bugithin nu Hebrew nni piliyeg ni “lemnag” e ma sor fan ko “adag nge ngongol ni ngan rin’ ban’en ni bochan.” Ba tamilang ni fare thin ni “lemnag” e ba l’ag ko “adag” ya nap’an ni immoy fapi girdi’ ni “piin ni gathi yad piyu Israel” u daken e ted mar gaargad: “Gamad be lemnag e nig ni ud kayed u Egypt!” Bod rogon ni ning Job ku Got ni nge lemnag ma ku arrogon Hezekiah, nge Nehemiah, nge David, nge be’ ni yoloy e thin ko psalm e ku ur ninged ku Jehovah ni nge lemnagrad me runguyrad ni bochan e ur pared nib yul’yul’ ngak.​—Numbers 11:4, 5; 2 Kings 20:3; Nehemiah 5:19; 13:31; Psalm 25:7; 106:4.

7. Faanra gad ra lemnag Got u fithik’ e t’ufeg ma ra uw rogon e ngongol rodad?

⁷ Ere ngad fithed gadad ni, ‘Gad ma lemnag e en sunumiydad u fithik’ e t’ufeg ma gad ma siyeg i rin’ ban’en nra kirebnagan’ fa ra amithnag fa?’ Gaar reb e fel’ yangaren: “Nina rog e ke ayuwegeg nggu nang ni rayog ni ngan kirebnagan’ Jehovah, ma nap’an ni ku gub achig ma kug nang ni ngongol rog e ra kirebnagan’ fa ra felan’nag.” (Psalm 78:40-42) Miki yog yugu reb e fel’ yangaren ni gaar: “Gu nang ni n’en ni gu ma rin’ e ra ayuweg fa ra kirebnag e thin ni yog Satan ku Jehovah. Ma kug adag ni nggu felan’nag gumerchaen Jehovah ma aram e n’en ni ke ayuwegneg ma ka be ayuwegneg e chiney.”​—Proverbs 27:11.

8. (a) Mang e gad ra mon’eg ma ra dag ni ga be lemnag Jehovah u fithik’ e t’ufeg? (b) Mang boch e deer nib fel’ ni nge lemnag e piin fel’ yangaren?

⁸ Re fayleng ney e ba kireb ere de mom ni ngan lemnag Jehovah ni gubin ngiyal’ min rin’ e n’en nra felan’nag. Machane ra fel’ ni ngam folwok ko n’en ni ke rin’ Timothy u nap’an e bin som’on e chibog​—nge n’en ni rin’ bokum biyu’ e piin fel’ yangaren e ngiyal’ ney ni bay madgun Got u wan’rad​—ma ga un ko maruwel ko Kristiano nib full-time ngam mang reb e pioneer! (Acts 16:1-3; 1 Thessalonika 3:2) Machane ku rayog ni ngan fith, Rayog ni ngam ayuwegem ko tin nib t’uf rom ko ngiyal’ ni ga be pioneer fa? Ma faan ga ra un ko mabgol, ma rayog ni ngam rin’ reb e maruwel ni nge yog ni mu ayuweg e tabinaw rom ko tin nib t’uf rorad fa? (1 Timothy 5:8) Rib baga’ fan e pi deer ney, ma baga fan ni ngari mu fl’eg i lemnag.

Ngan Un ko Skul ni Bay Fan

9. Mang e thingari turguy e piin fel’ yangaren u morngaagen e skul nib tolang?

⁹ Be mo’maw iyan e par u fayleng me ere sana ba t’uf ni nge yoor e skul ni ga be tay ni fan ni ngam un ko reb e maruwel ni rayog ni nge ayuwegem ngam un ko pioneer. Sana kam guy ni mus ko piin ni kar uned ko skul nib tolang e thingara uned ko skul biyay ni ngar filed e tin nib biech ban’en nib t’uf ko maruwel ko ngiyal’ ney. Ere in e skul ni gimed ra un ngay ni gimed e pi fel’ yangaren ni ba adag ni ngam felan’naged Got? Ra mu turguyed ban’en ma susun ni mu lemnaged e re motochiyel ney ni gaar: “Mu lemnag e en sunumiyem.”

10. Mang e bin th’abi fel’ e skul ni bay?

¹⁰ Dabi siy ni ga ba adag ni ngam un ko fare skul ni aram e skul ni mus ko girdi’ nu fayleng e yad ma yog ni bin th’abi fel’​—aram e ngan fil e Thin Rok Got. Reb e girdi’ nu German ni Johann Wolfgang von Goethe fithingan e ke gaar: “Rogon ni be mon’og iyan e llowan’ ko girdi’ e aram rogon ma rayog ni ngan fanay e Bible ni ir e def me ir e talin e maruwel ko skul.” Arrogon ngam fil e Bible ma kab fel’ boch ko urngin mit e skul ya ra ayuwegem ngam par ni ke bung rogon e yafas rom!​—Proverbs 2:6-17; 2 Timothy 3:14-17.

11. (a) Mang e bin th’abi fel’ e maruwel ni rayog ni ngad uned ngay? (b) Mang fan ni turguy reb e fel’ yangaren ni nge un nga boch e skul nib tolang?

¹¹ Tamilangan’ u morngaagen Got ni ma pi’ e yafas e aram fa bin th’abi fel’ e maruwel nrayog ni ngam rin’ e ngiyal’ ney ni ngam wereg e re tamilangan’ nem ngak yugu boch e girdi’. (Proverbs 3:13-18; John 4:34; 17:3) Ra ngam rin’ e re n’ey nib fel’ rogon ma ba t’uf ni ngan skulnagem u boch ban’en. Ba t’uf ni ngam lemnag ban’en nib tamilang, ma ga non nib tamilang, ma ga weliy e thin nib tamilang, ma ga poy e babyor nib tamilang, ma ga yoloy e thin nib tamilang​—aram e pi n’en ni yima fil u skul. Ere mu tiyan’um ko tin ni ga be fil u skul ni bod rogon Tracy ni reb e fel’ yangaren u Florida, U.S.A., ni ke mu’ ko high skul me fek e honors. Ke weliy e n’en ba adag ni i athapeg ni gaar: “Gubin ngiyal’ ma kug nameg ni nggu un ko pigpig nib full-time ni fan ku Jehovah ni Got rog, ma gu be athapeg ni skul ni kug tay e ra ayuwegneg nge yog e re n’ey ngog.”

12. Faanra kan turugy ni ngan un ko skul nib tolang ma susun ri mang fan?

¹² Kam mu lemnag ko mang fan ni ga ma un ko skul fa? Ri er fan ni ga ba adag ni ngam mang reb e tapigpig rok Jehovah ma bay angin e pigpig ni ga ra tay fa? Faanra er rogon, ma ngam lemnag ko uw rogon ni be ayuwegem e skul ni ga be tay ni fan e nge yog e re n’ey ngom. Sana kam puruygad e gallabthir rom, nge mu’ ma kan turguy ni ka ga ra un ko boch e skul u tomren ni kam mu’ ko skul ni be yog e am. Ma sana aram rogon ma rayog ni ngam un nga reb e maruwel ni ra ayuwegem ko tin nib t’uf rom ma ka bay e tayim rom nge gelngim ni ngam fanay ko maruwel ko Gil’ilungun Got.​—Matthew 6:33.

13. Uw rogon ni dag l’agruw e Kristinao nu Russia e tin nib m’agan’row ngay faan ranow ko skul nib tolang?

¹³ Boch e girdi’ e ma un ko pioneer u nap’an ni yad ma un ko skul nib tolang. Aram rogon Nadia nge Marina ni yow e ppin nib fel’ yangaren u Moscow, Russia. Kar unew ko taufe ko April 1994 mar tababgow ko auxiliary pioneer. De n’uw nap’an nga tomren ma kar mu’gow ko high skul ma aram mar unew ko skul ko accounting ni l’agruw e duw n’umngin nap’an. Nap’an e May 1995 mar unew ko regular pioneer, ma ku yow be un ko skul ma yow be fek e A ko class rorow. Maku bay 14 e Bible study rorow u gubin e wik u nap’an ni yow be un ko skul. Be athapeg e gali ppin ney ni skul ni yow be tay e ra ayuwegrow ngar unew nga reb e maruwel ni ra ayuwegrow ko tin nib t’uf rorow u nap’an ni yow be pioneer.

14. Yugu demtrug ko mang e gad ra turguy u morngaagen e skul ni gad ra un ngay, machane susun mang e n’en th’abi ga’ fan ko yafas rodad?

¹⁴ Faanra ngkum un nga reb e skul u tomren ni kam mu’ ko high skul ma ga lemnag ko mang fan ni ngam yodorom. Ya ga ba adag ni ngan nog e sorok ngom ma nge fel’ rogom ko chugum fa? (Jeremiah 45:5; 1 Timothy 6:17) Fa ga be nameg ni ngam un ko skul nib tolang ni bochan e ngam yoornag e tayim ni ga be pigpig ku Jehovah? Lydia ni ir e fel’ yangaren ni be un ko skul nib tolang e ke weliy nib baga’ fan u wan’ e tirok Got ban’en ye gaar: “Yugu boch e girdi’ e ma un ko skul nib tolang ma yad ma pag nge ga’ fan e chugum u wan’rad mi yad pag talin Got. Ma n’en th’abi ga’ fan u wan’ug e rogon thilmow Got.” Rib fel’ ni ngad lemgad ni aram rogon!

15. Uw rogon nib thilthil e skul ni i tay e pi Kristiano u nap’an e bin som’on e chibog?

¹⁵ Pi Kristiano e ba thilthil e skul ni ur ted. Fagali apostal ni Peter nge John, e “dariy e skul rorow” ya dar unew ko skul ko rabbi. (Acts 4:13) Ma apostal Paul e un ko skul ni taareb rogon ko skul ko university ko ngiyal’ ney. Machane de yog Paul nib sorok ni bochan; ya ke fanay e llowan’ rok ni nge machibnag urngin mit e girdi’. (Acts 22:3; 1 Korinth 9:19-23; Filippi 1:7) Ku arrogon Manaen, ni “yow Herod ni am nni skulnagrow u taabang ngar ilalgow,” e ku ir be’ ni ke ayuweg e ulung u Antiok.​—Acts 13:1.

Mang Fan ni Ngam Gonopiy i Ayuweg e Salpiy Rom nib Fel’ Rogon?

16. (a) Mang fan nib mo’maw ni ngad lemnaged e An Sunumiydad nfaanra bay e malfith rodad? (b) Uw rogon ni ma tamilangnag e fanathin ku Jesus ko uw fene ga’ fan ni ngad lemgad u m’on ni ngad chuw’iyed ban’en?

¹⁶ Faanra dabmu ayuweg e salpiy rom u fithik’ e gonop ma ra mo’maw ni ngam lemnag e en sunumiyem ni ngam rin’ e tin nib m’agan’ ngay. Ya faanra boor e malfith rom ma aram me ir e masta rom. Be weliy e Bible ni gaar: “Ga ra ning e salpiy ku be’ ma aram ma kam mang sib rok.” (Proverbs 22:7, Today’s English Version) Reb e fanathin ku Jesus e be tamilangnag fene ga’ fan ni ngan lem u m’on ni ngan chuw’iy ban’en. Gaar Jesus: “Faanra ba’ bigimed ni be finey ni nge ngongliy ba wulyang ntafen e damit, ma som’on e ra par nga but’ nge tafinaynag rogon puluwon, nge guy ko ba gaman e salpiy rok nra mu’nag fare maruwel ngay fa danga’. Ma faanra dabi rin’ ni aram rogon, ma dabiyog rok ni nge mu’nag fare wulyang ni tafen e damit ko ngiyal’ ni ke mu’ i ngongliy e def riy; ma urngin e girdi’ ni yad ra guy e n’en ni ke rin’ e ra ur minmingad ngak.”​—Luke 14:28, 29.

17. Mang fan nib mo’maw ni ngan siyeg e chuway’?

¹⁷ Ere bay e gonop riy ni ngam fol ko re thin ney ko Bible ni begaar ni ‘dab mu tay taab malfith ku be’ ya ke mus nre malfith ni nge aw nga puluwmed e nge bigimed me t’uf bigimed rok.’ (Roma 13:8) Machane rib mo’maw e re n’ey ya gubin ngiyal’ ma bay e tin nib biech ban’en ni yibe dag ngom ma be yog e piin shiyobay ni aram ban’en nib t’uf rom. Bay reb e gallabthir ni ke guy rogon ni nge ayuweg e bitir rok ngar gonopgad ko chugum me gaar: “Kug weliyed nib fel’ rogon u morngaagen ko be mang e tin nib t’uf nge tin ni ke mus ni yi ba adag.” Ma dan fil e pi n’en nem u skul, ma ri buch uw e n’en ni yad ma fil u morngaagen rogon ni ngan ayuweg e salpiy nrogon. Reb e social worker e ke gaar: “Gad ma mu’nag e high skul ma kab boor ban’en ni gad manang u morngaagen e isosceles triangle ko tin ni gad manang ko uw rogon ni ngan ayuweg e salpiy. Ere mang e ra ayuwegem ngam ayuweg e salpiy rom nib fel’ rogon?

18. Mang e baga’ fan ni ngan lemnag me yog ni ngan ayuweg e salpiy nib fel’ rogon ma mang fan?

¹⁸ Ga ra fol ko fare thin ni be yog ni ngamu “lemnag e en ni sunumiyem,” ma aram rogon ni ngam ayuweg e salpiy rom u fithik’ e gonop. Aram rogon ya nap’an ni ga ra fol ko re thin nem ma n’en nth’abi ga’ fan u wan’um e ngam felan’nag Jehovah, ma rogon ni ba t’uf rom e ra suwey lanin’um rogon ni ngam chuway’ ko salpiy rom. Ma aram e dab mu pag e tin ni ga ba adag ni nge kirebnag e pigpig nib polo’ ni ga ma tay ku Got. (Matthew 16:24-26) Ere ga ra athamgil ni nge par lan owchem nge “mom” ni fan e nge tamilangnag e sap rom nga Gil’ilungun Got nge tin nib m’agan ngay ni ngam rin’. (Matthew 6:22-24) Me ere ga ra lemnag fare thin ni be yog ni ngam “tay fan Jehovah ko tirom ban’en” ma aram ba taw’ath ni ga ra falan’ ngay ni ngam rin’.​—Proverbs 3:9.

Pi Fel’ Yangaren nib Fel’ ni Ngan Folwok Rorad

19. Uw rogon ni lemnag e piin fel’ yangaren kakrom e An Sunumiyrad?

¹⁹ Bay e falfalan’ riy ya boor e piin fel’ yangaren kakrom nge ngiyal’ ney ni yad ma lemnag e Ani sunumiyrad. Nap’an ni ba achig Samuel me par nib mudugil ko pigpig u lan e tabernacle ni yugu aram rogon ni bay e girdi’ riy ni be ngongliy e ngongol nib kireb. (1 Samuel 2:12-26) Ma nap’an ni kab pagal Josef ma de yog ko ppin ku Potifar ni nge wawliy nge un ko ngongol ndarngal. (Genesis 39:1-12) Yugu aram rogon ni “kayigi gel fani bitir” Jeremiah machane de rus ni nge machibnag e girdi’ u fithik’ e togopuluw nib gel. (Jeremiah 1:6-8) Ma reb e buliyel nu Israel e de rus ni nge yog ku reb e pilung ko salthaw nu Syria ni nge yan nga Israel ngan ayuweg ma ra fil morngaagen Jehovah. (2 Kings 5:1-4) Ma Daniel nge pi fager rok e ka yad pagal u nap’an ni kar pared nib mudugil e michan’ rorad mar folgad ko pi motochiyel rok Got ni fan ko ggan ni ngan kay. Ma ke turguy Shadrak, nge Meshak, nge Abednego ni ngan nin’rad nga lan e stof ni bay e nifiy riy ni be yik’ ko bin ni ngar siro’gad ko liyos mar paged e yul’yul’ rorad ku Got.​—Daniel 1:8, 17; 3:16-18; Exodus 20:5.

20. Uw rogon ni nge lemnag e piin fel’ yangaren ko ngiyal’ ney e An Sunumiyrad?

²⁰ Chiney ma ke pag 2,000 e piin fel’ yangaren ni bay e duw rorad ko 19 nge mada’ ko 25 ni yad be pigpig u lan e tochuch ko Pi Mich Rok Jehovah u New York State, U.S.A. Yad boch ko fa bokum biyu’ e piin fel’ yangarad ni yad be lemnag e En nsunumiyrad u gangin e fayleng. Yad bod rogon Joseph kakrom, ni dar paged yad ngar uned ko ngongol nib kireb. Ma boor iyad e ur folgad ku Got ma gathi girdi’ u nap’an ni kan towasariyrad ngar mel’eged ko mini’ e yad ra pigpig ngak. (Acts 5:29) Nap’an e duw ni 1946 u Poland, ma kan gafgownag Henryka Zur ni 15 e duw rok ya de liyor ko liyos. Bagayad e girdi’ ni ur gafgownaged e ke gaar ngak: “Nge par lanin’um ni ke michan’um ko n’en ni ga ba adag ma ke mus ni ngam mup’ e kruth ko Katolik.” Ma bochan ni de rin’ ma kan fek nga fithik’ e gerger, min boyochnag, ma kari mudugil ni ran faseg ko yam’ me par ndariy n’umngin nap’an!b

21. Mang pong e ba fel’ ni ngad uned ngay, ma mang wenegan ni ra yib riy?

²¹ Rib falfalan’ Jehovah u lan in e chibog ko piin fel’ yangarad ni ur lemnaged ir! Me gur ga ra un ko fare pong ni yibe pinigem ni ngam “Lemnag, e en nsunumiyem” fa? Dabi siy ni bay rogon ni ngam lemnag! Gubin e rran ma ga lemnag u morngaagen urngin ban’en ni ke rin’ ni fan ngom nge pi n’en nra rin’ nga m’on ma ga fol ko re thin ney ni begaar: “Fakag, mu llowan’ u fithik’ e gonop ma ga felan’ag gumerchaeg ma aram ma rayog ni nggu fulweg lungun e en ni be moningnageg.”​—Proverbs 27:11.

[Boch e Thin nra Tamilangnag Murung’agen]

Ga Manang?

◻ Uw rogon nran ayuweg e piin fel’ yangaren nge mich u wan’rad ni Got e ir be’ nib riyul’?

◻ Mang fan fare thin ni ngam lemnag e Ani Sunumiyem?

◻ Faan ran un ko skul nib tolang ma mang fan?

◻ Mang fan nib baga’ fan ni ngam ayuweg e salpiy rom u fithik’ e gonop?

◻ Mini’ boch e piin fel’ yangaren nib fel’ ni ngan folwok rorad?

[Sasing ko page 17]

Kaamu lemnag ko mang fan ni ga ma un ko skul?

[Sasing ko page 18]

Ga be fil rogon ni ngam ayuweg e salpiy u fithik’ e gonop?