“Nge Par Lanin’uy Nib Mudugil” Ya Ke Chugur Nga Tungun Urngin Ban’en

“Ke chugur nga tungun urngin ban’en. Thingar um pired nib mudugil lanin’med.”​—1 PETER 4:7.

1. Mang e ba l’ag ko par nib “puluw lanin’uy”?

PI thin nem rok apostal Peter e susun ni nge yib angin ko pi Kristiano ngar pared ni yad ba mudugil ngay. Machane de yog Peter ko piin ni be poy e pi thin nem ni dabkur rin’ed e pi n’en nib mil fan ngorad u reb e rran nge reb ko yafas rorad; ma de yog ni nge magafan’uy ko magothgoth ni bay yib. Ya ke yog ni gaar: “Thingar um pared nib mudugil lanin’med.” Ra ngan par nib “mudugil lanin’uy” ma ba muun ngay ni ngan turguy boch ban’en nge thabthabel, ma dabkun ngongol nib pag rogon, ma ngan ngongol u fithik’ e gonop, mab puluw e thin nge ngongol rodad. Ma sor fan ko ngan pag ni Thin Rok Got e ngii pow’iy lanin’dad nge tin ni gad ma rin’. (Roma 12:2) Gad ma par “u fithik’ e girdi’ ndar yal’uwgad ma yad ba kireb,” me ere ba t’uf lanin’uy nge miyluy ni nge siyeg e magawon nge gafgow.​—Filippi 2:15.

2. Uw rogon ni ke yib angin ko pi Kristiano ko ngiyal’ ney ni bochan ni ke gum’an’ Jehovah?

² “Lanin’uy nib puluw” e ku ma ayuwegdad ngad lemnaged gadad rogon nib riyul’ mab puluw. (Titus 2:12; Roma 12:3) Ba t’uf e re n’ey ya ba puluw ko pi thin ko 2 Peter 3:9 ni be gaar: “Dawori sowath Jehovah ni nge rin’ e tin ni ke yog nra rin’, ni bod rogon ni be lemnag boch e girdi’. Ya be gum’an’nag ir u puluwmed, ni fan e dabun ni nge n’ag be’, ya ba adag ni nge urngin e girdi’ mi yad pi’ keru’rad ko urngin e denen ni yad be rin’.” Mu lemnag ngay ni be gum’an’nag Jehovah ir u puluwon e piin dawori michan’rad ngak, nge ku “u puluwmed”​—ni girdien e ulung ni Kristiano. Mang fan? Ya “dabun ni nge n’ag be’.” Sana ka bay boch e girdi’ ni thingara thiliyeged boch ban’en rorad ni nge yog e yafas ni manemus ngorad. Ere ngad lemnaged boch ban’en nrayog ni ngan thiliyeg boch ban’en riy.

“Lanin’uy nib Mudugil” u Thildad Boch e Girdi’

3. Mang boch e deer ni rayog ni nge fith e piin gallabthir ngorad u morngaagen e pi bitir rorad?

³ Tabinaw e susun gin ni bay e gapas riy. Machane tabinaw rok boch e girdi’ e aram “ba tabinaw nib sug ko . . . tugthin.” (Proverbs 17:1) Uw rogon e tabinaw rom? Gimed be par riy ni “da mur damumuwgad ma damur tolulgad ngak be’ u fithik’ e damumuw ara umogned e thin nib kireb ngak be’” fa? (Efesus 4:31) Uw rogon e bitir rom? Yad manang ni yad ba t’uf rom ma ga ma tay farad fa? (Mu taarebnag ko Luke 3:22.) Ga ma tay e tayim ni ngam fonownagrad ma ngam fil ban’en ngorad fa? Ga ma ‘fonownagrad u rogon e ngongol ni ngar pired riy ni ir e mmat’aw’ ma gathi u fithik’ e damumuw nge puwan’ fa? (2 Timothy 3:16) Bitir e “ba taw’ath ni ma pi’ Jehovah,” me ere ri be yaliy ko uw rogon ni yibe ngongol ngorad.​—Psalm 127:3.

4. (a) Mang e rayog ni nge buch nfaanra ba gel e ngongol ko en figirngin ngak leengin? (b) Uw rogon nrayog ko piin leengiy ni ngar mon’eged e gapas u thilrad Got nge falfalan’ u lan e tabinaw?

⁴ Ma uw rogon e ani mabgol rodad? “Pumoon e thingari t’uf rorad e piin nleengirad ni bod rogon nib t’uf dowrad rorad. Re moon nib t’uf leengin rok e aram e be t’ufeg ir. Ya dariy be’ ni kaa fanenikay e birok e dowef. Ya ma duruw’iy ma ma ayuweg, ni bod rogon e n’en ni ma rin’ Kristus ngak girdien e galesiya.” (Efesus 5:28, 29) Ba moon ni ma gafgownag e an leengin ara ma gagiyegnag u fithik’ e yargel, ara dabun ni nge nang fan salpen e gathi ke mus ni be kirebnag e gapas u lan e tabinaw rok ya ku be kirebnag thilrow Got. (1 Peter 3:7) Ma uw rogon e piin nleengiy? Ku arrogorad nsusun e ngar “pared u tan pa’ e piin figirngiyrad ni Somol e yad be yan nga laniyan’.” (Efesus 5:22, New World Translation) Ra lemnag e an leengin ni nge felan’nag Got ma rayog ni nge n’ag fan u wan’ thibngin figirngin me par u tan pa’ nder kireb e tafinay rok. Yu ngiyal’ ma rayog ni nge weliy e an leengin e tafinay rok ngak. Ya Proverbs 31:26 e be weliy u morngaagen e ppin nleengin nib llowan’ ni gaar: “Ma non u fithik’ e gonop, ma ma weliy boch ban’en u fithik’ e t’ufeg mab gol.” Ra ngongol ngak figirngin rogon nib gol ma be tay fan, ma aram ma be fl’eg e gapas u thilrow Got, ma be mon’eg e falfalan’ u lan e tabinaw.​—Proverbs 14:1.

5. Mang fan nsusun ni nge fol e piin fel’ yangaren ko fonow ko Bible u mornaagen rogon ni ngan ngongol ngak e gallabthir rorad?

⁵ Ma gimed e piin fel’ yangaren, uw rogon e ngongol romed ngak e pi gallabthir rom? Ba kireb rogon ni ga ma non ngorad, ni ga be dariy fannagrad ni bod rogon ni ma non e girdi’ nu fayleng fa? Fa ga ma fol ko thin ko Bible ni be gaar: “Piin ni bitir, thingar mu folgad rok e gallabthir romed nrogon girdien Kristus, ya ereray e tin nib mat’aw ni ngan rin’. ‘Mu liyor ko chitamam nge chitinam’ e bin som’on e motochiyel ni bay bbugithin nni yigey ngay ni gaar: ‘ni fan e nguum par nib fel’ rogom, me n’uw nap’an ni mu par u daken e binaw’”?​—Efesus 6:1-3.

6. Uw rogon nrayog ni ngad fl’eged e gapas u thildad e piin ni ma liyor ku Got?

⁶ Ku gad ma dag ni ba “mudugil lanin’dad” u nap’an ni gad ma “gayiy e gapas ma gad lek” u thildad e piin ni be liyor ku Got. (1 Peter 3:11) Yu ngiyal’ ma ra dabi puluw e lem ku be’ nge be’ mi yad tugthin. (James 3:2) Faanra ran pag ni ngki par nib kireb thilin be’ nge be’ ma ran kirebnag e gapas ko fare ulung ni polo’. (Galatia 5:15) Ere mu pithig e magawon nib pay; ma ga gayiy rogon ni nge yib e gapas.​—Matthew 5:23-25; Efesus 4:26; Kolose 3:13, 14.

“Lanin’uy nib Mudugil” nge Pi N’en Nthingarni Rin’ u Tabinaw

7. (a) Uw rogon ni ke yog Paul ko girdi’ ni ngar pared nib “mudugil lanin’rad” ni fan ko pi n’en ni yima rin’ u reb e rran nge reb? (b) Susun nge u rogon u wan’ e pi figirngiy nge pi leengiy ni Kristiano e maruwel rorad u tabinaw?

⁷ Yog apostal Paul ngak e pi Kristiano ni “ngar pared nib mudugil lanin’rad.” (Titus 2:12, NW) Ma faani yog Paul e re n’em miki yog ko piin ppin ni “nge t’uf figirngirad nge pi fakrad rorad, ma nge yog nra mudugil lanin’rad, ma ngar pired ni yad mmachalbog, ma ngar ngongliyed e maruwel nib fel’ u tabinaw rorad.” (Titus 2:4, 5) Yoloy Paul e pi thin nem u nap’an e duw ni 61-64 C.E., ni in e duw u m’on ni ke m’ay e m’ag ko yu Jew. Machane, kab baga’ fan e pi n’en ni yugu yima rin’ u reb e rran nge reb ni bod e maruwel u tabinaw. Ere piin figirngiy nge piin leengiy e susun ni ngar lemnaged e pi n’en nib mil fan ngorad u tabinaw ya aram e “dabiyog ni yog be’ nib kireb e thin ni yib rok Got.” Bay be’ ni ir lolugen e tabinaw ni ke siro’ ngak be’ ni yib nga tafen ni bochan nib wagagey yaan e tabinaw rok. Me weliy ni aram rogon ni “bochan ni be un ko pioneer.” Ffel’ ni ngad paged gadad ni fan ko Gil’ilungun Got, machane thingarda ayuwgad riy ni dabda paged e tin nib t’uf ko tabinaw rodad.

8. Uw rogon nrayog ko piin lolugen e tabinaw ni ngar ayuweged e tabinaw ko tin nib t’uf rorad u rogon nib puluw?

⁸ Be yog e Bible ko piin chitamangiy ni ngar mon’eged e tabinaw rorad, ya be weliy ni be’ ni dabi ayuweg e tabinaw rok e “e ke n’ag rogon nib mich Got u wan’, ma kab gel e kireb rok ngak be’ ndawori mich Got u wan’.” (1 Timothy 5:8) Ba thil thil e par ko girdi’ u gangin e fayleng, mab fel’ ni dabi pag rogon e chugum ni nge yog ko tabinaw rom. En ni yoloy e Proverb 30:8 e ke yibil ni gaar: “Dab mu pag ni nggu un ko par nib gafgow ara fel’ rogon.” Machane, susun ndabi siyeg e gallabthir i ayuweg e bitir rorad ko tin nib t’uf rorad. Susun, bay e gonop riy ni nge pag be’ e tabinaw rok ndariy e tin nib t’uf rorad ma be gayiy rogon ni nge un ko boch e maruwel u lan e ulung fa? Gathi ra k’aring e kankanan’ ko bitir ko re n’ey fa? Be yog ko Proverbs 24:27 ni gaar: “Som’on ma ngam yarmiy urngin ban’en ni bay u wen ngam fl’eg rogon e binaw; mfin aram e ngam ayliy e naun rom nge tabinaw rom.” Arrogon, bay rogon ni ngan lemnag e chugum machane kub baga’ fan ni ngan ‘ayliy e naun nge tabinaw’​—ni fan ko tirok Got ban’en nge lanin’uy.

9. Mang fan ni nge gonop e piin lolugen e tabinaw ni ngar lemnaged e n’en nra buch ya ri chey me yim’ ara nge m’ar?

⁹ Kam guy rogon ni ngam ayuweg e tabinaw rom nfaanra ri chey ngam mum’ fa? Proverbs 13:22 e be gaar: “Be’ nib fel’ e ra fl’eg rogon ban’en ni fan ko bitir ko bitir rok ngar fanayed.” Piin gallabthir e yad ra pi’ ko bitir rorad e tamilangan’ u morngaagen Jehovah nge par nib fel’ thilrad, maku susun ni ngar lemnaged ni ngar fl’eged rogon ban’en ni nge fanay e bitir rorad. U boor e binaw ma piin lolugen e tabinaw e ma guy rogon ni ngan tay boch e salpiy nga bang, ngan fl’eg e babyor ni will, nge insurance. Ya ku girdien Got e gathi dabi “buch ban’en ngorad u ba ngiyal’ ndan nang.” (Eklesiastes 9:11) Fan e salpiy e “ngan ayuwegey,” ma faanra ngan fl’eg rogon ban’en nib fel’ rogon ma rayog ni ngan siyeg e gafgow. (Eklesiastes 7:12) U boch e binaw ma am e dabi pi’ puluwon e tafalay, me ere boch e girdi’ e ma turguy ni ngar ted boch e salpiy nga bang ni fan ko tafalay, fa yad ma pi’ puluwon e health coverage.a

10. Uw rogon ni rayog ko pi gallabthir ko Kristiano ni ngar “ted talpen” pi fakrad?

¹⁰ Ku be yog e Bible ni gaar: “Gathi bitir e ma lemnag e n’en ni nge yog ngak e gallabthir rorad, ya gallabthir e ma lemnag e n’en ni nge yog ngak e bitir rorad.” (2 Korinth 12:14) Pi gallabthir nu fayleng e baga’ ni yad ma tay e salpiy nga bang ni fan ni nge un e bitir rorad ko skul nib tolang boch nga m’on nge fan ko ngiyal’ ni yad ra un ko mabgol ni aram e rayog ko fare tir ni nge dabi gafgow ko par u tabolngin e yafas rok ni ke piilal. Kaamu lemnag ni ngam tay boch ban’en nga bang ni ngam ayuweg e bitir rom ko tirok Got ban’en fa? Susun, faanra ba adag reb e bitir nib ilal boch ni nge un ko machib u gubin ngiyal’. Piin ni ma un ko machib u gubin ngiyal’ e susun ndabra lemnaged ni bay rogon ni ngar lemnaged ni ra pi’ e girdi’ e ayuw ngorad, machane piin gallabthir ni ma t’ufeg e bitir rorad e rayog ni ngar turguyed ni ‘ngar pied boch e tin ni ba’ rorad ko ngiyal’ ndabi siy ni nge yog ngorad’ ni fan ni nge yog ni nge un ko machib u gubin ngiyal’.​—Roma 12:13; 1 Samuel 2:18, 19; Filippi 4:14-18.

11. Faanra ran lemnag e salpiy nib puluw ma aram e be dag ni dariy e michan’uy fa? Mu weliy fan.

¹¹ Ngan lemnag e salpiy nib puluw e gathi be dag ni dariy e michan’uy ni ke chugur ni ra m’ay e m’ag nib kireb rok Satan. Ya be dag e “gonop” nge lem nib puluw. (Proverbs 2:7; 3:21) Bay biyay ni yog Jesus ni “girdi’ u roy u fayleng e kab gel farad gonop u rogon ni yad ma gagiyegnag e tirorad ban’en ko girdi’ ni yad girdien e tamilang.” (Luke 16:8) Ere aram fan ni ke tamilang u wan’ boch e girdi’ nib t’uf rorad ni ngar thiliyeged rogon ni yad be fanay e tirorad ban’en, ni aram e rayog ni ngar ayuweged e tabinaw rorad ko tin nib t’uf rorad.

“Lanin’uy nib Mudugil” ni Morngaagen e Skul

12. Uw rogon ni fil Jesus ngak pi gachalpen ni ngar pared ni yad be sumunguy ko boch ban’en nib biech?

¹² “Re fayleng ney ni bod rogon e chiney ni ba’ e be thil thil iyan,” ma boor boch ban’en ni be mon’og iyan nib pay ni fan ko salpiy nge technological development. (1 Korinth 7:31, NW) Machane, i fil Jesus ko pi gachalpen ni ngar pared ni yad ba ta’reb nga taabang. Ke yog ngorad u nap’an ni l’ograd ko machib ko yan nsom’on ni gaar: “Dab mon’ed e gol, nge silber, nge salpiy nrow nga lan e bayil ko mad romed ngam feked; dab mu feked ba tutuw ni ma fek e piin ni ma man ban’en ko re milekag ney, fa reb e kenggin e mad ni ngam thiliyeged ko bin ni ba’ u dakenmed, fa reb e sus, fa ba ley i sog. Ya en ni girdien e maruwel e susun e ngan pi’ ngak e tin ni nge yog ngak.” (Matthew 10:9, 10) Machane boch nga tomren me yog Jesus ni gaar: “Chiney e en ni ba’ tafen e salpiy rok ara ba tutuw e thingari fek; ma en ndariy e sayden rok e thingari pi’ wuru’ e mad rok ni chuway’ nge fek e salpiy riy nge chuw’iy reb ngay.” (Luke 22:36) Mang e ke thil? Ke thil rarogon boch ban’en. Ya ke gel e togopuluw ngorad, me ere chiney ma thingara feked boch ban’en nge ayuwegrad.

13. Mang fan ni ngan un ko skul, ma uw rogon nrayog ni nge tay e pi gallabthir tanggin e bitir rorad ko re n’ey?

¹³ Ku arrogon e ngiyal’ ney ma ba t’uf ko piin gallabthir ni ngar lemnaged rarogon e economy ko ngiyal’ ney nib puluw. Susun, kam guy rogon ni nge gaman e skul ko pi bitir rom fa? Fan e skul e ngan ayuweg e piin fel’ yangaren ni ngar pigpiggad ku Jehovah nib fel’ rogon. Ma bin th’abi ga’ fan e skul e skul ko tirok Got ban’en. (Isaiah 54:13) Ku ba adag e piin gallabthir ni nge yog ko bitir rorad ni ngar ayuweged yad ko salpiy. Ere mu pow’iyed e pi bitir romed, mi gimed ayuwegrad ni ngar mel’eged ko mang e yad ra fil u skul, ma gimed puruy ko bay e gonop riy ni ngan un ko skul nib tolang fa danga’. Pi n’en nem ni ngan turguy e mmil fan ngak e tabinaw, ma yugu boch e girdi’ e susun ndabra gathibthibnaged e n’en ni kan turguy. (Proverbs 22:6) Ma uw rogon e piin ni kar turguyed ni ngar skulnaged e bitir rorad u tabinaw?b Boor e gallabthir e kar rin’ed e re n’ey nib fel’ rogon, machane boch e gallabthir e ur pirieged nib mo’maw rorad, ma dan ayuweg e bitir nib fel’ rogon. Ere faanra ga be lemnag ni ngam skulnag e bitir rom u tabinaw, ma ga fl’eg i lemnag e re n’em nib puluw ko rayog ni ngam rin’ nge rayog ni ngam yul’yul’ ko re maruwel nem fa danga’.​—Luke 14:28.

‘Dab Mu Gayiy Rogon Nge Yog e Fel’ Rogon Ngom’

14, 15. (a) Uw rogon ni daki par Barak nib puluw laniyan’ ko tirok Got ban’en? (b) Mang fan nib balyang be’ ni nge ‘gayiy rogon nge yog e fel’ rogon ngak’?

¹⁴ Bochan ndawori taw nga tungun e re m’ag ney, ma be lek boch e girdi’ e pi fel’ rogon ko fayleng​—ngan rin’ ban’en nib gilbuguwan, fa ngan un ko maruwel nib fel’, fa nge yoor e salpiy rorad. Mu lemnag Baruk ni ta yol rok Jeremiah. Ke gun’gun’ ni gaar: “Kari gu gafgow ya ke uneg Jehovah e kireban’ nga gafgow rog! Ke chachalbag ya yug gu be gelgel, ma dawor gu pateg e toffan.” (Jeremiah 45:3) Ke aw parowen Baruk. Ya maruwel rok ni ir e tayol ku Jeremiah e ba mo’maw, ma bay e magafan’ riy. (Jeremiah 36:14-26) Ma ke lemnag ni dabi mus e maga’fan rok. Ya ka bay 18 e duw fini thang yu Jerusalem.

¹⁵ Yog Jehovah ku Barak ni gaar: “Msap! N’en ni kug ubing e nggu buthug, ma n’en ni kug yung e gu ra pug nga lang, nu lan e binaw ni polo’. Machane gur e ga be gayiy rogon nge yog e fel’ rogon ngom. Dab kum gayiy.” De par Barak nib mudugil laniyan’. Ya ke tabab ni nge ‘gayiy rogon nge yog e fel’ rogon ngak,’ ni sana ke lek e chugum ara liw nib tolang, ara par nib fel’ rogon. Ra pug Jehovah “urngin ban’en u lan e binaw ni polo’,” me ere mang fan ni ngan lek e pi n’en nem? Ere i puguran Jehovah ku Barak ni gaar: “Ya gu ra thang mit urngin e yafas . . . , ma gu ra pi’ ngom e pogofan rom nib taw’ath u gubin yang ni ga ra yan ngay.” Chugum e dabi magay u nap’an ni ran thang yu Jerusalem! Kari mus ni “pogfan rok” ni ra pi’ Jehovah ngak nib taw’ath.​—Jeremiah 45:4, 5.

16. Mang e rayog ni nge fil e girdi’ rok Jehovah ko ngiyal’ ney ko n’en ni buch ku Barak?

¹⁶ Ba t’uf rok Barak ni nge fonownag Jehovah, ma ke riyul’ e n’en ni micheg Jehovah ngak ya ke par nib fas. (Jeremiah 43:6, 7) Aram ban’en nib fel’ ni rayog ni nge fil e girdi’ rok Jehovah ko ngiyal’ ney! Gathi ereray e ngiyal’ ni ‘ngan gayiy rogon nge yog e fel’ rogon ngodad.’ Mang fan? Ya “re fayleng ney nge urngin ban’en ni ba’ riy ni be yim’ e girdi’ ni bochan e bayi m’ay.”​—1 John 2:17.

Bin Th’abi Fel’ e Fel’ Rogon e Ngan Fanay e Chi Tayim ni ka Bay

17, 18. (a) Uw rogon u wan’ Jonah faani kal yu Nineveh ngan’rad? (b) Mang e ke fil Jehovah ku Jonah?

¹⁷ Ere uw rogon nrayog ni ngad fanayed e chi tayim ni ka bay nrogon nth’abi fel’? Ngad filed ban’en rok Jonah ni profet. Ke “yan nga Nineveh . . . , me tabab i weliy ngak e girdi’ ni be gaar: ‘Ka aningeg i ragag e rran min kirebnag yu Nineveh.’” Kari gin Jonah ngay ya ke kireban’ yu Ninevah ko thin rok mar kalgadngan’rad! Ere de thang Jehovah e re mach nem. Ma uw rogon u wan’ Jonah e re n’em? “O Jehovah, mu thang e pogofan rog, ya kab fel’ ni gu ra yim’ ko bin ni nggu par nib gub fas.”​—Jonah 3:3, 4; 4:3, NW.

¹⁸ Ma aram me fil Jehovah ban’en nib baga’ fan ku Jonah. Ke “gagiyegnag ba ke ban’en nge ilal nge yib i upunguy Jonah, nge pi’ e tagalul’ ngak ni fan e nge dabi gafgow ko gowel, me ri manigil fare ke n’em u wan’ Jonah.” Machane ba ngoch nap’an ni ke falfalan’ Jonah ya de n’uw nap’an me mororoy fare ke n’en. Me ri “damumuw” Jonah ni bochan ni ke yib e gowel ngak. I tamilangnag Jehovah ban’en ni gaar: “Ke kireban’um ko re ke n’ey . . . Ere gur gathi ngar gu runguy yu Nineveh ya bbinaw ni baga’ nib pag raay nge reliw’ i biyu’ e bitir ni ba’ riy ndawor ra bucheged ban’en, ma ku er rogon e garbaw ni pire’ ni ba’ riy?”​—Jonah 4:6, 7, 9-11.

19. Mang lem nib siin ni ngad siyeged?

¹⁹ Ke par Jonah ni kari mus ni be lemnag ir! Ke kireban’ ko re ke n’em, machane de runguy yu Nineveh​—ni yad e girdi’ ni gowa ‘dar nanged e ba’ ni mat’aw i pa’rad nge ba’ ni gilay’.’ Sana ku arrogodad ni gad be sonnag e ngiyal’ ni ran thang e re m’ag nib kireb ney ma bay rogon e re n’em! (2 Thessalonika 1:8) Machane nap’an ni gad be sonnag ma mmil fan ngodad ni ngad ayuweged e girdi’ nib yul’yul’ ni gowa dar nanged ‘e ba’ ni mat’aw i pa’rad ko ba’ ni gilay’ ni re n’em e ma sor fan ko tirok Got ban’en. (Matthew 9:36; Roma 10:13-15) Ga ra fanay e chi tayim ni ka bay ni ngam ayuweg urngin e girdi’ nrayog rom ni nge yog e tamilangan’ ngorad u morngaagen Jehovah fa? Mang maruwel e kab baga’ e falfalan’ riy ko bin ni ngan ayuweg e girdi’ nge yog e yafas ngorad?

Nguun Par nib “Mudugil Lanin’uy”

20, 21. (a) Mang boch e kanawo’ nrayog ni ngad daged nib “mudugil lanin’dad” ko pi rran nga m’on rodad? (b) Mang boch e taw’ath e ra yib ngodad ko par nib “mudugil lanin’uy”?

²⁰ Be chugur iyan e m’ag rok Satan ko magothgoth, me ere dabi siy ni ra sum boch ban’en ni ra magawonnagdad. Kan yiiynag ko Bin L’agruw e Timothy 3:13 ni gaar: “Girdi’ nib kireb nge piin ni yad be dake girdien Kristus e bayi gel farad kireb nguur banniged boch e girdi’ ma yibe bannagrad.” Machane dabi “mulan’med ngam paged gimed.” (Hebrews 12:3) Mu taga’gad nga daken Jehovah ni nge pi’ gelngimed. (Filippi 4:13) Mu fil rogon ni ngam sumunguy, ni ngam thiliyeg boch ban’en rom ni nge yog ni mu par u fithik’ e re fayleng ney ni be kireb iyan, ma gathi ngam par ni ga be lemnag e tin kafram ban’en. (Eklesiastes 7:10) Mu fanay e gonop, ma nguum par ni ga be fol ko “fare tapigpig nib yul’yul’ mab gonop” ni yad be pow’iydad.​—Matthew 24:45-47.

²¹ Dada nanged ko in e tayim ni ka bay. Machane, rayog ni nga dogned nib mudugil ni “ke chugur nga tungun urngin ban’en.” Nge mada’ ko ngiyal’ nem ma ngada pared nib “fel’ rogon lanin’dad” u rogon ni gad ma ngongol ngak bochi bagadad, nge rogon ni gad ma ayuweg e tabinaw rodad, nge rogon ni gad ma rin’ e maruwel rodad. Faan gad ra yodorom, ma rayog ni nge mich u wan’dad ni yira turguy ni gad “mmachalbog ma dariy thibngidad u p’eowchen Got ma gad par u fithik’ e gapas”!​—2 Peter 3:14.

[Boch e Thin nra Tamilangnag Murung’agen]

Pi N’en ni Ngan Sul Nga Daken

◻ Uw rogon nrayog ni ngad daged ni ke “mudugil lanin’dad” u rogon thildad e girdi’?

◻ Uw rogon nrayog ni ngad daged ni ba puluw rogon ni gad ma ayuweg e pi n’en nib mil fan ngodad ko tabinaw rodad?

◻ Mang fan ni thingari lemnag e piin gallabthir e skul ni be tay e pi bitir rorad?

◻ Mang boch ban’en ni kad filed rok Barak nge Jonah?

[Sasing ko page 10]

Nap’an nra kireb e ngongol ko figirngiy nge leengiy ngorow, ma aram ma yow be kirebnag thilrad Jehovah

[Sasing ko page 11]

Susun ni nge adag e pi gallabthir ni ngar nanged fan e skul ko pi bitir rorad