Mu Guy Rogom Ni Ngam Yaliy Boch E Girdi’ Ni Rogon Ni Be Yaliyrad Jehovah

“Der ma yaliy Got ban’en nrogon ni ma yaliy e girdi’ ban’en.”​—1 SAMUEL 16:7, NW.

1, 2. Uw rogon nib thil rogon ni be yaliy Jehovah Eliab nra ngan taarebnag nga rogon ni yaliy Samuel, ma mang e gad ra fil ko biney?

ULAN e bin 11 e chibog B.C.E., me l’og Jehovah Samuel ni profet nge rin’ reb e maruwel nib mith. Me yog ngak ni nge yan nga naun rok reb e pumoon ni Jesse fithingan ni nge puog e gapgep nga daken reb i pi fak Jesse nge mang pilung nu Israel boch nga ram. Nap’an ni ke guy Samuel Eliab, ni fak Jesse ni bin nganni, ma kari mudugil laniyan’ ni ke pirieg e en Got e ke mel’eg. Machane me yog Jehovah ni gaar: “Dabi l’eg owchem nga n’umngin nge feni pichoay, ya kug n’ag. Ya der ma yaliy Got ban’en nrogon ni ma yaliy e girdi’ ban’en, ya dagathi rogon ni ma guy e girdi’ ban’en e aram rogon ni ma guy Got, ya girdi’ e ma guy u wuru’ i downgin; machane Jehovah e ma yaliy rarogon e gum’ircha’.” (1 Samuel 16:6, 7, NW) De yog rok Samuel ni nge yaliy Eliab nrogon ni ma yaliy Jehovah.a

² Rib mom ni nge oloboch e girdi’ u rogon ni ma susunnag felngin boch e girdi’! Ma reb, e rayog ni ngad olobochgad u rogon ni gad ma yaliy e girdi’ nib fel’ yaan u wuru’ i downgin machane dariy fan e kenggin e motochiyel u wan’. Maku reb, e rayog ni ngad gelfen gad u rogon ni ngad susunnaged felngin e girdi’ nib yul’yul’ ma bay ngongolen ni be magawonnag an’dad.

3, 4. (a) Faanra sum e magawon u thilin l’agruw e Kristiano, ma ra bagayow ma susun nge rin’ e mang? (b) Mang boch e deer e thingarda fithed gadad riy u nap’an ni ra dabi taareban’dad reb e walag?

³ Rayog ni nge sum e magawon nfaanra kaygi papey ni ngad turguyed ban’en nga daken yugu boch e girdi’​—ni kub muun ngay e piin ni kad nanged yad u lan boor e duw. Susun en Kristiano ni tafager rom nrib fel’ thilmew e kam chamgow nib gel. Ga baadag ni ngam pithig e magawon romew nge fel’ thilmew biyay? Mang e rayog ni nge ayuwegem ni ngam fal’eg rogon e re n’ey?

⁴ Mang fan ni ri dab mu yaliy nib n’uw nap’an, muum lemnag e tin nib fel’ ni rin’ walagem ni Kristiano ni pumoon ara ppin ni tafager rom kafram? Ma ngam yodorom ni ga be lemnag e thin rok Jesus ni gaar: “Dariy be’ nrayog ni nge yib ngog ni faanra gathi en ni Chitamangiy e pow’iy nge yib ngog, ni ir e ke l’ugeg ku gub.” (John 6:44) Mag fithem: ‘Mang fan ni i pow’iy Jehovah e cha’ ney nge yib ngak Fak? Mang boch e felngin nib fel’ ni bay rok? Gu be dariyfannag ara gu be lemnag ni ireray e n’en ni gathi rib ga’ fan? Mang fan ni mang tafager rog ko som’mon? Mang e n’en ni ke k’aringeg kug adag daken e cha’ ney?’ Som’mon, e sana mo’maw’ ngom ni ngam lemnag e pi felngin nib fel’, ni baga’ ni faanra ke n’uw nap’an ni um lem nib kireb. Machane, ireray e n’en nib ga’fan ma rayog ni ngan sulweg e fager romew nga rogon. Rogon ni ngan dag ko uw rogon ni ngan yodor, e ngada yaliyed felngin l’agruw e pumoon ni yu ngiyal’ e yima lemnagrow nrogon e tin ni kar olobochgow riy. Gali cha’ ney e Jonah ni fare profet nge Peter ni apostal.

Ngan Yaliy Jonah u Fithik’ e Yul’yul’

5. Mang maruwel ni kan pi’ ngak Jonah, ma mang e ke rin’?

⁵ I pigpig Jonah ni reb e profet u northern kingdom nu Israel u nap’an ni Jeroboam II, ni fak Jehoash e ir e pilung rorad. (2 Kings 14:23-25) Reb e rran, me tay Jehovah chilen ngak Jonah ni nge chuw u Israel nge yan nga Ninevah, ni fare mach nib ga’ nu Assyria ni Am rorad e kab gel ko yugu boch e am. Mang e maruwel ni kan pi’ ngak? Ra yan ni nge ginang e girdi’ riy ni re mach rorad nem nib ga’ e yira gothey. (Jonah 1:1, 2) De fol Jonah ko thin ni yog Got ngak, ma aram me mil! I un ko fare barkow ni yan nga Tarshish, ni reb e binaw nib palog u Ninevah.​—Jonah 1:3.

6. Mang fan ni ke mel’eg Jehovah Jonah ni nge yan nga Ninevah?

⁶ Faan ga ra fal’eg i lemnag murung’agen Jonah ma mang e n’en ra yib ngan’um? Ga ra yog ni ir reb e profet ni der ma fol? Ra ngan lemnag nib papey ma rayog ni ngeb ngan’uy ni aram rogon Jonah. Machane ke dugliy Got Jonah ni nge mang reb e profet ya ir be’ ni der ma fol? Ri danga’! Jonah e bay bochi felngin nrib fel’. Mu lemnag e n’en ni i rin’ ni ir reb e profet.

7. U tan e mang magawon e i pigpig Jonah riy ku Jehovah u Israel, ma faan ga ra nang e re n’en ney ma uwrogon ni ga ra lemnag Jonah?

⁷ Riyul’ ni i maruwel Jonah u Israel u fithik’ e yul’yul’, nib binaw ni girdi’ riy e dar motoyilgad ngak. Amos ni profet, ni ku immoy ko ngiyal’ nem, e ke weliy murung’agen piyu Israel ni yad e girdi’ nib chogow ma ri yad baadag e fafel.b Tin nib kireb e ri ma buch ko re binaw nem, machane dariyfan e pi n’en nem u wan’rad. (Amos 3:13-15; 4:4; 6:4-6) Yugu aram rogon, ma i rin’ Jonah e maruwel rok ni ma machibnagrad u fithik’ e yul’yul’ ni gubin ngiyal’. Faanra gur reb e tamachib ko fare thin nib fel’, ma ga manang feni mo’maw’ ni ngan machibnag e girdi’ ni be lemnag ni dakuriy ban’en nib t’uf ko yafas rorad ma dariy fan e machib u wan’rad. Ere, yugu aram rogon ma dabda dariyfannaged e tini i rin’ Jonah ni be dag riy ni ke meewar, ma dabda paged talin felngin nib fel’ ni i par nib yul’yul’ me yog rok ni nge kadan’ u nap’an ni be machibnag piyu Israel ni de mich Got u wan’rad.

8. Mang boch e magawon e rayog ni nge mada’nag reb e profet nu Israel u Ninevah?

⁸ Fare maruwel ni ngan yan nga Ninevah ko machib e kab gel e mo’maw’ riy. Ra ngan taw ko re mach nem ni nge yan Jonah u but’ ma sogonapan 500 e mile palgin ni nge milekag​—ni ireray e milekag nib mo’maw’ ni sogonapan reb e pul n’umngin nap’an. Nap’an ni taw fare profet nga ram, ma susun ni nge machibnag piyu Assyria, ni yimanangrad ni yad e girdi’ nib maangach. Ma mahl ni yad ma ta’ e baga’ nib muun ngay ni ur gafgownaged e girdi’ nrib pag gelngin. Maku yad ba uf nga rogon e ngongol rorad ni bod e gamanman. Dabni gin ngay ni Ninevah ni ka nog ni “fare mach ko puog racha’”!​—Nahum 3:1, 7.

9. Nap’an ni ke magawon e sala nbochan e keb fare yoko’ nib gel, ma mang boch e felngin ni dag Jonah?

⁹ Ba samo’maw’ rok ni nge fol ko thin ni ke ta’ Jehovah chilen ngak, ma aram me un Jonah nga reb e barkow nge yan ko gin rib palog ko fare binaw ni ir e kan l’og ngay. Yugu aram rogon, ma de yog Jehovah ni nge tal ko maruwel rok ni reb e profet ara ke yarmiy ni nge yan be’ nga lon. Tin ni rin’ Jehovah, e i ayuweg Jonah ni ngeb ngan’ feni ga’fan e maruwel ni kan pi’ ngak. I gagiyegnag Got ni ngeb e yoko’ nga maday. Me magawon fare barkow ni be fek Jonah nbochan ni puw e n’ew. Ke chuchugur ni nge yim’ boch e girdi’, ndariy ban’en ni kar bucheged ni bochan Jonah! (Jonah 1:4) Mang ke rin’ Jonah? Bochan dabun ni nge yim’ fapi sala nbochan e n’en ni ke rin’, me yog ngorad ni gaar: “Mon’ed gag nga maday, me mocha’ e day ngomed.” (Jonah 1:12) Dariy tapgin ni nge lemnag Jonah ni nap’an ni girdien e barkow e yad ra yin’ nga maday, ma ra yib Jehovah ni nge ayuweg. (Jonah 1:15) Machane, ba m’agan’ Jonah ngay ni nge yim’ ma dabi yim’ fapi sala. Gathi gad be guy u roy e pi felngin ni der ma rus, nge sobut’an’, nge t’ufeg?

10. Mang e ke buch u nap’an ni ke pi’ Jehovah biyay ngak Jonah fare maruwel rok?

¹⁰ Tomur riy, me yib Jehovah nge ayuweg Jonah. Gur dabkiyog rok Jonah ni nge pigpig ku Got nbochan e n’en ni kafin i rin’? Danga’, ya ki pi’ Jehovah e maruwel rok ngak bayay u fithik’ e wurengan ngu fithik’ e t’ufeg ni nge machibnag piyu Ninevah. Nap’an ni taw Jonah nga Ninevah, ma de rus ni nge weliy ngak e girdi’ ni ke nang Got e ngongol rorad nrib kireb ma 40 e rran min gothey e mach rorad. (Jonah 1:2; 3:4) Tomren ni kar motoyilgad ko thin ni yog Jonah nib tamilang, me kal piyu Ninevah ngan’rad, ma dariy ban’en ni buch ko mach rorad.

11. Mang e be dag ni ke fil Jonah ban’en nib ga’ fan?

¹¹ Machane ku dawori puluw e lem rok Jonah. Machane u daken e n’en ni rayog ni ngan guy nga owchey, e ayuweg Jehovah Jonah ni nge nang ni gathi kemus nrayog ni Nge guy wuru’ i downgin be’. Ma fal’eg i yaliy gum’irchaey. (Jonah 4:5-11) N’en ni be dag ni ke fil Jonah ban’en nib ga’ fan e aram fare chep nib yul’yul’ mab tamilang ni ir e ke yoloy. Bochan e ba m’agan’ ngay ni nge yoloy murung’agen e oloboch rok maku ke uneg ngay e n’en ni yira tamra’ ngay e ku be micheg ni ir be’ nib sobutan’. Ba t’uf e lem rok be’ ni der rus ma rayog ni nge yog e oloboch ni ke rin’!

12. (a) Uw rogon ni ngad nanged ni Jesus e taareb rogon ku Jehovah u rogon ni yow ma yaliy e girdi’? (b) Kan pi’ e athamgil nga lanin’dad ni nguuda yaliyed e mang ko girdi’ ni gad be machibnag fare thin nib fel’ ngorad? (Mu guy fare kahol ni bay ko page 12.)

¹² Tomren ni ke yan in e chibog, me yog Jesus Kristus boch e thin nib fel’ u murung’agen e n’en ni buch ko yafas rok Jonah. Me yog ni gaar: “Rogon ni par Jonah u lan yin fare nig ni ba ga’ ndalip e rran nge dalip e nep’, e ku er rogon e en ni Fak e Girdi’ ndalip e rran nge dalip e nep’ nra par u fithik’ e fayleng u ar.” (Matthew 12:40) Tomren ni kan faseg Jonah ko yam’, ma ra nang ni ke taarebrogonnag Jesus e tayim Rok ni immoy u fithik’ e fayleng u ar ko tayim ni immoy fare profet u lan yin fare nig. Gur gathi gad ba felfelan’ ni ngad pigpiggad ku reb e Got ni der ma n’ag e tapigpig rok u nap’an ni kar olobochgad? I yoloy fare psalmist ni gaar: “Rogon feni gol ba matam ngak pi fak, e aram rogon feni gol Somol ngak e piin ni yad be par ni bay madgun u wun’rad. Manang e n’en nni ngongliydad ngay; ma manang ni gadad e fiyath.” (Psalm 103:13, 14) Riyul’, re “fiyath” ney​—nib muun ngay e girdi’ ni de flont e ngiyal’ ney—​e rayog rorad ni ngar rin’ed ban’en ni baga’ angin u daken e ayuw ko kan ni thothup rok Got!

Ngan Guy Peter nib Thabthabel

13. Mang wok rok Peter e ra yib ngan’uy, machane mang fan ni ke mel’eg Jesus ni nge mang reb e apostal?

¹³ Chiney e ngada weliyed buchuw e bin l’agruw, ni aram e Peter ni apostal e rin’. Faanra kan nog ngom ni ngam weliy murung’agen Peter, ma ba papey ni ra yib ngan’um ni ir be’ ni ma papey ngab n’en, maku ir be’ ni ma rin’ ban’en ni dan pi’ mat’awon? Yu ngiyal’ e ma dag Peter e wok ni aram rogon. Machane, ke mel’eg Jesus Peter ni nge mang bang ko fa 12 e apostal nfaanra riyul’ ni ir be’ ni ma papey ngab n’en, ara ma rin’ ban’en ni dan pi’ mat’awon? (Luke 6:12-14) Riyul’ ni gathi aram rogon! Ba tamilang ni Jesus e luk’af e changar rok e pi oloboch nem me tiyan’ ko pi felngin Peter nib fel’.

14. (a) Mang e ra tamilangnag ko mang fan ni Peter e gowa ir be’ ni ri ma yog boch ban’en? (b) Mang fan ni susun ni ngad pininged e magar ya bochan ri ma fith Peter boch e deer?

¹⁴ Yu ngiyal’ ma Peter e ma yog e thin ni pa’ boch e apostal. Boch e girdi’ e ma lemnag ni ireray e mich riy ni goo ma rin’ Peter e n’en ni susun dabi rin’. Machane riyul’ ni aram rogon? Boch e girdi’ e ma yog ni sana ba ilal Peter ngak yugu boch e apostal​—ma sana ba ilal ngak Jesus. Faanra riyul’ ni aram rogon, ma ra ayuweg ni nge tamilangnag ko mang fan ni Peter e baga’ ni ir e ma non nib m’on ngak boch e girdi’. (Matthew 16:22) Machane, ka bay reb ni kub t’uf ni ngan lemnag. Peter e ir be’ ni ri ma lemnag e tirok Got. Bochan nkeb e belel ngak ko tamilangan’ ma aram e n’en ni be k’aring ni nge fith boch e deer. Re n’em e keb angin ngodad. Boor e thin nib fel’ ni ke weliy Jesus ni ireray e fulweg ko pi deer rok Peter, ma kan chaariy e pi nem u lan e Bible. Ni bod ni, nap’an ni ke fulweg Jesus e thin ni yog Peter ni i weliy murung’agen “fare tapigpig nib yul’yul’.” (Luke 12:41-44) Ma ngam lemnag e deer rok Peter ni gaar: “A mu guy, kug paged gubin ban’en gamad be un ngom. Ere mang e bay yog ngomad?” Bochan e re n’ey me micheg Jesus ban’en nra gelnagey ni gaar: “Ma urngin e girdi’ ni kar digeyed e tabinaw rorad, ara pi walagrad ni pumoon, ara pi walagrad ni ppin, ara matam, ara matin, ara bitir, ara yungi binaw ni taferad ni bochag, e raay yay e pi n’ey ni bayi mun ngorad, ma yira pi’ e yafas ndariy n’umngin nap’an ngorad.”​—Matthew 15:15; 18:21, 22; 19:27-29.

15. Mang fan ni rayog ni ngan nog ni Peter e riyul’ ni ba yul’yul’?

¹⁵ Peter e ka ba’ reb i felngin nib manigil​—ni aram ir be’ nib yul’yul’. Nap’an ni boor ko fapi gachalpen e ka ra digeyed Jesus ni dakura uned ngak ya bochan reb e machib ni i fil ngorad ndar nanged fan, ma de maruwaran’ Peter ni nge non ni pa’rad fa 12 i apostal me gaar: “Somol, i mini’ e gamad ra yan ngak? Yi gur e bay fapi thin rom ni ir e ma pi’ e yafas ndariy n’umngin nap’an ngak e girdi’.” (John 6:66-68) Pi thin nem e kari falfalan’nag gum’irchaen Jesus! Me taaboch, u nap’an ni keb e girdi’ ni ngar koled fare Masta, ma boor fapi apostal e ra milgad. Machane, i lek Peter fare ulung be par nib palog boch rorad me yan nga lan fare yoror ko fare prist nib tolang. Lem ni der rus e ke k’aring ni nge yan nga ram. Nap’an ni yibe fith Jesus, me un Peter nga reb e ulung ni piyu Jew ni yad be par nib chuchugur ko nifiy ni yad be ror. Bagayad fapi sib ko fare prist e ke poy Peter me yog ni i chag ngak Jesus. Arrogon, i mithag Peter ni manang e Masta rok, machane dabda paged talin ni bochan e yul’yul’ nge runguy rok ngak Jesus ma ke taw Peter nga ram nri bay e riya’ riy, ni aram e n’en ni boor fapi apostal ni dar yodoromgad.​—John 18:15-27.

16. Ri mang fan ni kad weliyed murung’agen e pi felngin Jonah nge Peter nib fel’?

¹⁶ Fapi felngin Peter nib fel’ e keb i gagiyel ko oloboch ni ke rin’. Ku arrogon Jonah. Ni bod ni karid yaliyed e tin nib fel’ rok Jonah nge Peter, ma ku thingarda guyed rogon ni ngarda yaliyed e tin nib fel’ rok e pi walagdad ni fan ko tirok Got ni piin pumoon nge ppin ko ngiyal’ ney. Ran yodorom ma ra fel’ e tha u thildad nge yad. Mang fan ni rib t’uf ni ngan rin’ e re n’en ney?

Ngan Fol Riy e Ngiyal’ Ney

17, 18. (a) Mang fan ni ma sum e tugthin u thilin e piin Kristiano? (b) Mang fonow nu Bible e ra ayuwegdad ni ngad pithiged e magawon nra sum u fithik’ e pi walag?

¹⁷ Piin pumoon nge ppin nge pi bitir nyugu demtrug e par rorad nge feni tolang e skul rorad nge raen dowrad e yad be pigpig ku Jehovah u taabang e chiney. (Revelation 7:9, 10) Rib boor mit e wok e rayog ni ngad guyed u lan e ulung ko Kristiano! Bochan ni gad be pigpig ku Got u taabang, ma dabisiy ni yu ngiyal’ e ma sum e magawon ko tugthin.​—Roma 12:10; Filippi 2:3.

¹⁸ Yugu aram rogon ni gad ma guy e oloboch rok e pi walagdad, ma dabda ted ngan’dad. Ngada folwokgad rok Jehovah, ni fare psalmist e i yon’ e tang u murung’agen ni gaar: “Faan mang e mu tay ngan’um e kireb ni gamad be rin’, me mini’ e rayog rok ni nge thay ndab ni gechignag?” (Psalm 130:3) Dabda ted ngan’dad pangin be’ ni ra yoor raba’nagdad, ya kab fel’ ni nga “ud nameged e pi n’en ni ra fek e gapas i yib, nge pi n’en ni ma gelnagdad.” (Roma 14:19) Ngad athamgilgad ni ngad guyed e girdi’ nrogon ni ma guyrad Jehovah, ma aram e ngad paged talin e kireb rorad ma ngad yiluyed owchedad ko pi felngin ni bay rorad nib fel’. Faan gad ra rin’ ban’en ni aram rogon, ma ra ayuwegdad ni nge “bagadad me dag e gum’an’ ngak bagadad.”​—Kolose 3:13.

19. Mu dag boch ban’en ni rayog ni nge rin’ reb e Kristiano ni fan ni nge pithig e magawon nib gel.

¹⁹ Uw rogon ni faanra sum e magawon u fithik’dad ni dabiyog ni ngad pithiged ma be par ni be magawonnag gum’irchadad? (Psalm 4:4) Ke sum e magawon ni aram rogon u thilmew reb e walag? Mang fan ni dabmu guy rogon ni ngam pithig e magawon? (Genesis 32:13-15) Som’mon, mu meybil ngak Jehovah, ma ngam ning ngak ni nge pow’iyem. Ngemu’, mman ngak ni ga be dag felngin e “sumunguy nib l’ag ngay e gonop” ni ga be lemnag felngin nib fel’. (James 3:13) Mog ngak ni ga baadag ni nge aw e gapas u thilmew. Dabmu pagtalin fare fonow ni kan thagthagnag ni gaar: “Dabmu paged talin ni gubin e girdi’ ma thingar ra gurgad ko motoyil, machane dabra gurgad ngar welthingad, ma dabra gurgad ngar damumuwgad.” (James 1:19) Fare fonow ni “dabra gurgad ngar damumuwgad” e be yip’ fan ni be’ e rayog ni nge rin’ ara yog e thin ni ra k’aring e damumuw ngom. Faanra buch ban’en ni aram rogon, ma ngam ning e ayuw rok Jehovah ni fan e nge yog ni nguum t’ar lanin’um. (Galatia 5:22, 23) Mu pag walagem ni nge weliy ko mang fan ni be gun’gun’, ma ngam motoyil nib fel’ rogon. Dabmu non u nap’an ni ka be weliy murung’agen ban’en, nyugu aram rogon ni dabum urngin ban’en ni be yog. Sana de puluw rogon ni be lemnag, machane ba t’uf ni ngam tay ngan’um ni ireray rogon ni be lemnag nge rogon ni be thamiy e chiney. Mu guy rogon ni ngam guy e magawon nrogon ni be lemnag. Ni ba muun ngay ni ga be susunnag ni lem rom e taareb rogon ko lem rok.​—Proverbs 18:17.

20. Nap’an ni yibe pithig e magawon, ma mang fan nib ga’ fan ni ngam motoyil nib fel’ rogon ko n’en nra weliy be’ u m’on ni ngam pi’ e fulweg?

²⁰ Nap’an ni ke taw nga nap’an ni gur e ngam non, ma ngam non u fithik’ e sumunguy. (Kolose 4:6) Mog ngak walagem e tin ma rin’ ni ga baadag. Ngam wenig ngak ko urngin ban’en ni kam rin’ ni ireray tapgin e magawon. Faanra kam sulweg thilmew nga rogon nbochan e n’en ni kam rin’ u fithik’ e sobut’an’, ma ngam pining e magar ngak Jehovah. Faanra de yib angin, nguum ning ngak Jehovah ni nge pow’iyem ma ngam gay yugu reb e kanawo’ ni nge aw e gapas u thilmew.​—Roma 12:18.

21. Uw rogon ni nge ayuwegem e re article ney nrayog ni ngam yaliy yugu boch e girdi’ nrogon ni be yaliyrad Jehovah?

²¹ Urngin e pi tapigpig rok Jehovah e yad ba t’uf rok. Ba falfalan’ ni nge fanaydad ko pigpig ngak ni gadad gubin ni yugu aram rogon ni daworda flontgad. Gad ra nang boor ban’en ko uw rogon boch e girdi’ u wan’, ma ra ayuwegdad ni nge gel e t’ufeg rodad ngak e pi walagdad ni pumoon nge ppin. Faanra ke war e t’ufeg rodad ngak e pi walagdad, ma rayog ni ngan gelnag biyay. Ra yib e taw’ath ngodad ni boor nfaan gad ra maruwel nib elmirin ni ngad guyed e tin nib fel’ rok yugu boch e girdi’​—arrogon, ngad yaliyed yad nrogon ni be yaliyrad Jehovah!

[Footnotes]

Uw Rogon ni Ngam Pi’ e Fulweg?

• Uw rogon ni ma yaliy Jehovah e kireb ni ke rin’ e pi tapigpig rok nib yul’yul’?

• Mang boch e felngin Jonah nge Peter nib fel’ nrayog ni ngam mog reb nge reb?

• Uwrogon ni ngaum lemnag e pi walagem ni kam duguliy ni nga um rin’?

[Box on page 12]

Mu Lemnag ko Uwrogon Yugu Boch e Girdi’ u Wan’ Got

Nap’an ni ga be fal’eg i lemnag e chep nu Bible u murung’agen Jonah, ma kam guy nib t’uf ni ngam thiliyeg rogon ni ngam yaliy e girdi’ ni ga ma machibnag ngorad fare thin nib fel’ ni gubin ngiyal’? Sana yad e girdi’ ni be dag ni gowa dakuriy ban’en nib t’uf ko yafas rorad ara dariy fan ban’en u wan’rad, ni bod piyu Israel, ara yad ma togopuluw ko thin rok Got. Machane, uw rogon ni be yaliyrad Jehovah Got? Musko girdi’ nib gilbuguwan ko re m’ag ney e rayog ni nge chel ngak Jehovah reb e rran, ni bod ni ke kalngan’ fare pilung nu Ninevah nbochan e machib ni i tay Jonah.​—Jonah 3:6, 7.

[Picture on page 8]

Ga be yaliy yugu boch e girdi’ nrogon ni be yaliyrad Jehovah?

[Picture on page 10, 11]

I pirieg Jesus ban’en nib fel’ ni nge yog u murung’agen e tin ni buch rok Jonah