Mu Filed Ban’en Rok e Pi Profet—Jonah
1. Mang boch pi fel’ngin Jonah?
1 Mang e ra yib ngan’um u nap’an ni ga ra lemnag murung’agen fare profet ni Jonah fithingan? Boch e girdi’ e yad ma lemnag ni ir be’ ni ma rus, ara ir be’ ndariy e runguy rok. Machane bin riyul’ riy e i dag e sobut’an’, ma ir be’ nder ma rus, ma i pag fan ir. Uw rogon ni gad ra ‘fil’ murung’agen pi fel’ngin Jonah?—Jas. 5:10.
2. Uw rogon ni ngad folwokgad ko sobut’an’ ni dag Jonah?
2 Sobut’an’: Som’on, me mil Jonah nga yugu reb e binaw, ni gathi ir e gin ni yog Jehovah ngak ni nge yan ngay. Ma re n’ey e gathi ban’en ni ngan gin ngay, ya fare binaw nu Nineveh e ka nog nib binaw nib “tathang e pogofan” ni bochan ni girdi’ nu Assyria ni yad ma par u rom e yimanangrad ni yad ba tathang e fan ko girdi’. (Nah. 3:1-3) Machane, nap’an ni yal’uweg Jehovah Jonah ko yay ni l’agruw, me dag e sobut’an’ nge rin’ fare maruwel ni ke yog Jehovah ngak. (Prov. 24:32; Jonah 3:1-3) Ere, yugu aram rogon ni mil ko som’on, machane me tomur, me rin’ e n’en nib m’agan’ Jehovah ngay. (Matt. 21:28-31) Ere ku gad ra ulul ko machib nyugu aram rogon ni kan fonownagdad ara bay reb e binaw nib mo’maw’ e machib riy?
3. U nap’an ni ga be un ko machib, ma mingiyal’ e thingar mu pag fam, ma ngkum dag ni damur rus?
3 Dabin Rus, ma Ngan Pag Fay: Nap’an ni ke nang Jonah ni ke tay e yafas rok girdien e sala u thatharen e riya’ ni bochan e n’en ni ke dugliy, ma ke m’agan’ ngay ni nge pag fan e birok e yafas ni fan ngorad. (Jonah 1:3, 4, 12) Me munmun, u nap’an ni be rin’ Jonah e maruwel rok me yan nga lukngun fare binaw nu Nineveh, ya sana be gay e gin nib puluw ya nge weliy ngak e girdi’ murung’agen e pufthin rok Jehovah. Re n’ey ni rin’ e be m’ug riy nder rus ya ir reb e profet rok Got nib mudugil laniyan’! (Jonah 3:3, 4) Ma uw rogodad e ngiyal’ ney? Ba t’uf ni nge yag ngodad e lem nib mudugil, ya nge yag ni ngad machibgad ndab da rusgad u nap’an nra yib e togopuluw ngodad. (Acts 4:29, 31) Ra ngan pag fay mab muun ngay ni ngad pied e tayim rodad nge ku boch ban’en nib t’uf ni fan ko fare maruwel ni machib.—Acts 20:24.
4. Mang fan nthingar da fal’eged i lemnag e pi n’en nib fel’ ni ke rin’ e pi profet rok Jehovah kakrom?
4 Gubin ngiyal’ ni ngam beeg reb e chep u murung’agen reb e profet rok Jehovah, ma ra fel’ rogom riy nfaanra ngam susunnag ni ga bay u rom. Mu fithem ni nge lungum: ‘Faan mang e gag fare profet, ma mang e susun ni gu ra rin’? Uw rogon ni nggu folwok ko pi fel’ngin nem u lan e yafas rog?’ (Heb. 6:11, 12) Tin ni ka bay e article nga m’on ni bay ko fare Machib ko Gil’ilungun e ku ra weliy murung’agen boch ban’en nib fel’ ni ke rin’ e pi profet rok Jehovah ni yad ba yul’yul’ ni ku rayog ni ngad filed ban’en riy.