Ngan Par Ni Fan Ko Ngiyal’ Ney Fa Fan Ko Ngiyal’ Nga M’on Ndariy N’umngin Nap’an?

“Yu daken e l’agan’ rodad e ir e thapegdad Got riy ngak.”​—ROMA 8:24.

1. Mang e machib ni Epicurean ma uw rogon ni ke suwey laniyan’ e pi Kristiano?

YOLOY apostal Paul ngak e pi Kristiano u Korinth ni gaar: “Ra diin me yog boch i gimed ni piin ni kar m’ad e dab ni fasegrad ko yam’?” (1 Korinth 15:12) Ba gagiyel ni fare yub ko machib rok Epicurus ni be’ ni Greek e ke suwey laniyan’ boch e Kristiano u nap’an e bin som’on e chibog. Ere ke weliy Paul morngaagen e re machib nem ni Epicurean: “Mmarod nguud abichgad ma gadad be garbod, ya bayi gabul ma kad m’ad.” (1 Korinth 15:32) Pi gachalpen Epicurus e de mich u wan’rad e yafas u tomren ni ke yim’ be’ me ere ur lemnaged ni kari mus fan e yafas rorad e ngan lek e tin ni be ar’arnag dowey me yog e falfalan’ ngorad. (Acts 17:18, 32) Machib ni Epicurean e ba siin, ma yima lemnag ni urngin ban’en nra aw nib kireb, ma ma kirebnagey.

2. (a) Mang fan ni bay e riya’ riy ni ngan nog ni dariy e fas ko yam’? (b) Uw rogon ni ke ayuweg Paul e pi Kristiano nu Korinth nge gel e michan’ rorad?

² Bochan ni kan nog ni dariy e fas ko yam’ ma bay wenegan. I weliy Paul fan ni gaar: “Faan mang e ba riyul’ e bug nir e thin, me ere ke yan i aw nda ni faseg Kristus ko yam; ma faanra da ni faseg Kristus ko yam’, me ere dariy ban’en ni nggu machibnaged murung’agen ngak e girdi’, ma dariy ban’en ni ir e nge michan’med ngay. . . . Ma faanra l’agan’ rodad ngak Kristus e ke mus ni fan ko biney e tamilang, me ere susun e gadad e piin ni ngari kireban’uy ngodad u roy u fayleng.” (1 Korinth 15:13-19) Arrogon, faanra dariy e athap ko par ndariy n’umngin nap’an ma ke “m’ay fan” ni ngan mang Kristiano. Ya dariy ban’en ni yad be nameg. Re machib ney ni dariy rogon ko Kristiano e ke suwey laniyan’ e ulung nu Korinth me ere aram fan ni ke yoor e magawon ko re ulung nem. (1 Korinth 1:11; 5:1; 6:1; 11:20-22) Ere ke guy Paul rogon ni nge gelnag e michan’ rorad u morngaagen e fas ko yam’. Ke weliy fan boch ban’en, me puthuy ko thin ko Bible, ma ke weliy boch e fanathin, ma aram me micheg ni fas ko yam’ e gathi ban’en nde riyul’ ya aram ban’en nib mutrug nra lebug. Ere ke yog ko pi Kristiano ni gaar: “Um pired ni gimed mmudugil. Gubin ngiyal’ ma nguum muruwliyed e maruwel romed ni fan ngak Somol, ya gimed manang ni pigpig ni gimed be tay ngak Somol e gathi ra yan ni aw nib m’ay fan.”​—1 Korinth 15:20-58.

“Mu Tedan’med ko Matanag”

3, 4. (a) Rogon ni yog Peter, ma mang lem nib kireb e ra suwey laniyan’ boch e girdi’ u nap’an e tin tomren e rran? (b) Mang e thingar nguuda pugurannagdad riy?

³ Ngiyal’ ney ma boor e girdi’ e ma lemnag ndariy e fel’ nga m’on rodad ere yad ma par ni yad ma rin’ e tin nra felan’nagrad e chiney. (Efesus 2:2) Aram rogon ni yog apostal Peter nra buch. Ke weliy morngaagen e piin ni “bay ur moninggad ngomed ni be lungurad: ‘I yog faram ni bay sul, er rogon ni yog fa danga’? Ere ba uw? Chitamangidad e kar m’ad machane urngin ban’en ni ka be par ni ka rogon ni ka nap’an e ngiyal’ ni sum e fayleng riy ke mada’ ko chiney.’” (2 Peter 3:3, 4) Faanra un e tin riyul’ e Kristiano ko re lem nem ma dabkura pared nib “passig me yib angin ngorad.” (2 Peter 1:8, New World Translation) Machane gathi arrogon boor e girdi’ rok Got ko ngiyal’ ney.

⁴ Dariy e kireb riy ni ngan adag ni ngan nang u morngaagen e ngiyal’ nra thumur e re m’ag nib kireb ney. Mu lemnag rogon ni ba adag e pi apostal rok Jesus ni ngar nanged: “Somol, ra taw ko re ngiyal’ i n’ir ma aram ma ga fulweg e nam nu Israel nga rogon?” I fulweg Jesus ni gaar: “Ngalan’ nge pi rran e ke dugliy e Chitamag u daken mat’wun, ma dariy rogon ni ngam nanged.” (Acts 1:6, 7) Pi thin nem e ba puluw ko n’en ni yog u nap’an ni yad bay u daken fare Burey nu Olives ni gaar: “Da mu nanged e chirofen ni bay yib e Somol romed riy. . . . En ni Fak e Girdi’ e ra yib u reb e awa ndamur fineyed nra yib riy.” (Matthew 24:42, 44) Thingarda pugurannaged ngodad e re thin nem u gubin ngiyal’! Sana ra lemnag boch e girdi’ ni, ‘Sana nggu sagaal buch uw ma dab kuugu maruwel nib elmirin.’ Ba oloboch e re n’em! Mu lemnag James nge John, ni ka nog “Pi fak e Dirra’” ngorow.​—Mark 3:17.

5, 6. Mang e rayog ni ngad filed rok James nge John?

⁵ Gad manang ni rib passig apostal James. (Luke 9:51-55) U tabolngin fare ulung ko Kristiano ma dabiy siy ni boor e maruwel ni ke tay riy. Machane nap’an ni kab pagal boch me li’ Herod Agrippa I kem’. (Acts 12:1-3) Ere bochan ni rib tomgin ni ke thumur e yafas ku James me ere ga be lemnag ni ke kireban’ ya ke passig ko machib nib elmirin fa? Ri danga! Dabi siy ni ke falfalan’ ya boor e duw ni ke pigpig ku Jehovah. Ma dariy bagadad ni rayog ni nge nang ko gad ra yim’ nib tomgin fa. (Eklesiastes 9:11; mu taarebnag ko Luke 12:20, 21.) Ere ba tamilang ni bay e gonop riy ni nguuda pared nib passig ma ngad maruwelgad nib elmirin ko pigpig ku Jehovah. Aram rogon ma gad ra par nib fel’ thildad ma gad par ni bay e athap rodad ko yafas ndariy n’umngin nap’an nga m’on.​—Eklesiastes 7:1.

⁶ Ku bay ban’en nrayog ni ngad filed rok apostal John, ni immoy u nap’an ni yog Jesus ni gaar: “Mu tedan’med ko matanag.” (Matthew 25:13; Mark 13:37; Luke 21:34-36) Ke tay John e pi thin nem nga gumerchaen, me pigpig u fithik’ e passig u lan boor e duw. Ma sana goo ir e ke magay u tomren ni ke yim’ urngin fa tinef e apostal. Nap’an ni kari pillibthir John, ma ke yog ni nge sap nga tomur ko yafas rok ni ke par nib yul’yul’, ma aram ma ke lemnag ni ke oloboch ko re n’em, ma de thabthabel rogon ni ke par fa? Ri danga’! Ya ka be sap nga m’on. Nap’an ni kan faseg Jesus ko yam’ me gaar, “Riyul’! Dab ki n’uw nap’an mu gub!,” Ma ke fulweg John ni gaar, “Amen! Moy, Somol Jesus.” (Revelation 22:20) De par John ni fan ko yafas ko ngiyal’ nem, ma de adag ni nge par nib paselag ko ‘yafas ni yugu yima par.’ Ya ke mudugil u wan’ ni ngii pigpig n’umngin nap’an e yafas rok nib elmirin nge mada’ ko ngiyal’ nra yib Somol. Uw rogon gadad?

Tapgin ni Nge Michan’uy ko Yafas Ndariy N’umngin Nap’an

7. (a)Uw rogon ma fare athap ko yafas ni dariy n’umngin nap’an e immoy ko “ngiyal’ ndawori sunumeg e fayleng riy”? (b) Mang e tamilangnag Jesus u morngaagen e athap ko yafas ndariy n’umngin nap’an?

⁷ Fare athap ko yafas ndariy n’umngin nap’an e gathi ba lik’ay ko girdi’ ara yat. Titus 1:2 e be yog ni rogon e yul’yul’ ni gad be tay ku Got e bay u daken e “yafos ndariy n’umngin nap’an ni ir e nge l’agan’uy ngay. I Got nder ma ban e turguy e re yafos ney ndariy n’umngin nap’an ni nge pi’ ngodad ko ngiyal’ ndawori sunumeg e fayleng riy.” Som’on ko tabolngin me m’agan’ Got ngay ni nge par e piin nib yul’yul’ ndariy n’umngin nap’an. (Genesis 1:28) Mus ni ke togopuluw Adam nge Efa ngak, machane dariy ban’en nrayog ni nge taleg ni nge dabi lebuguy e n’en ke m’agan’ ngay. Be yog ko Genesis 3:15, ni ke micheg Got nra yib be’ ni “owchen” ni ra chuweg urngin e kireb ni yib ko girdi’. Nap’an ni yib e re “owchen” nem ara Messiah, ni Jesus, ma kenggin e machib ni tay e fare athap ko yafas ndariy n’umngin nap’an. (John 3:16; 6:47, 51; 10:28; 17:3) Ke pi’ e yafas rok nib flont ni nge biyuliydad, ma aram min pi’ mat’awun Kristus ni nge pi’ e yafas ni ndariy n’umngin nap’an ko girdi’. (Matthew 20:28) Boch e pi gachalpen ni yad 144,000 u gubin, e yad ra par ni manemus u tharmiy. (Revelation 14:1-4) Ere piin ni rayog ni ngar m’ad faram e ran pi e “yafas ni dabi m’ay biid” ngorad!​—1 Korinth 15:53.

8. (a) Mang e “yafas ni dabi m’ay biid,” ma mang fan ni ra pi’ Jehovah ngak fapi girdi’ ni yad 144,000? (b) Mang athap ni bay ko girdien “yugu boch e saf”?

⁸ “Yafas ni dabi m’ay biid” e gathi ke mus ni ma sor fan ko par ni dab ku unim. Ya ma sor fan ko “gelngin e yafas ndabiyog ni ngan thang.” (Hebrews 7:16; mu taarebnag ko Revelation 20:6.) Ere mang fan ni ra pi’ Got e taw’ath ni aram rogon fene ga’ fan? Mu lemnag e n’en ni yog Satan nib togopuluw ku Got ni dabiyog ni nge pagan’ Got ko n’en ni sunumiy ni nge par nib yul’yul’ ngak. (Job 1:9-11; 2:4, 5) Ere pi’ Got e yafas ni manemus ngak fa 144,000 e girdi’ ni be tamilangnag ni kari pagan’ ngorad ya kar pared nib yul’yul’ ngak. Machane uw rogon e tin ni ka bay e girdi’? Yog Jesus ngak e tin som’on e gachalpen ko “fachi ulung” ko Gil’ilungun Got ni yad ra “par nga tagil’ e pilung ngar gagiyegnaged fa ragag nge l’agruw i ganong nu Israel.” (Luke 12:32; 22:30) Re n’ey e ma tamilangnag ni yugu boch e girdi’ e ra par ndariy n’umngin nap’an u fayleng u tan Gil’ilungun. Pi girdi’ ney ni yad “yugu boch e saf” e gathi ran pi’ e yafas ni dabi m’ay biid ngorad, ya ran pi’ e “yafas ndariy n’umngin nap’an” ngorad. (John 10:16; Matthew 25:46) Yafas ndariy n’umngin nap’an e aram e athap ko urngin e Kristiano. Aram gathi ba lik’ay ya Got e ke micheg mi “Got nder ma ban,” ma kan pi’ puluwon nib tolang nga rachaen Jesus.​—Titus 1:2.

Ma Ka Bay nib Mal’af nga M’on fa?

9, 10. Mang boch ban’en ni be tamilangnag ni gad be chugur ko ngiyal’ ko tomur?

⁹ I yiiynag apostal Paul ni “ngiyal’ nib mo’maw e par” e ra tamilangnag ni kad tawgad ko ngiyal’ ni “tin tomren e rran.” Rarogon e girdi’ e be kireb iyan ya dariy e t’ufeg, ma yad ba siin, ma yad be rin’ e tin ni be ar’arnag dowrad, ma dariy fan Got u wan’rad, me ere gathi ke tamilang u wan’dad ni ke chugur ko rofen ni ra pufthinnag Jehovah e re m’ag nib kireb ney fa? Be yoor iyan e cham nge fanenikan, me ere gathi gad be guy ni ke lebug e pi thin rok Paul ney ni be gaar: “Girdi’ nib kireb nge piin ni yad be dake girdien Kristus e bayi gel farad kireb nguur banniged boch e girdi’ ma yibe bannagrad”? (2 Timothy 3:1-5, 13) Boch e girdi’ e ra lemnag nra fel’ boch nga m’on mi lungurad, “Gapas nge pagan’,” machane ra m’ay fan e l’agan’ ko gapas ya “ra taw e riya’ ngorad ma dabiyog ni ngar milgad riy ya bod e amith ni ma yib ngak be’ ni ppin ni be n’en ni nge gargel.” Dan pag ni ngad pared u fithik’ e lumor ya kan tamilangnag ngodad ko mang fan e ngiyal’ ney. Ere, “nguud pired ni gadad be od ma ba tamilangan’dad.”​—1 Thessalonika 5:1-6.

¹⁰ Ku be tamilangnag e Bible ni tin tomren e rran e “ba ngiyal’ nib ngoch.” (Revelation 12:12; mu taarebnag ko 17:10.) Ma ke chugur ni nge m’ay e re “ngiyal’ nem nib ngoch.” Susun, i yiiynag Daniel u morngaagen e magawon u thilin “fare pilung nu le’luch” nge “fare pilung nu yimuch” ni ke buch iyib ngaray ke taw ko re chibog ney. (Daniel 11:5, 6) Ma ke mus e n’en ni ka bay ndawori lebug e aram fa bin tomur e togopuluw nra tay “fare pilung nu le’luch,” ni bay ko Daniel 11:44, 45.​—Mu guy fare The Watchtower ko July 1, 1987, nge November 1, 1993, ni be weliy morngaagen e re thin ko profet ney.

11. (a) Uw rogon ni ke lebug e thin ko Matthew 24:14? (b) Pi thin rok Jesus ni bay ko Matthew 10:23 e be tamilangnag e mang?

¹¹ Ki yiiynag Jesus ni “re thin rok Got ney nib fel’ ni murung’agen e gagiyeg rok Got e bay ni machibnag u gubin yang u fayleng ni nge urngin e girdi’ me nang, ma aram mfini taw nga tomren e fayleng.” (Matthew 24:14) Chiney ma be machib e Pi Mich Rok Jehovah u 233 e binaw, nge donguch, nge territory. Rriyul’, ni ka bay boch e binaw ndaworni machib riy, ma sana ra taw ko ngiyal’ nra turguy Jehovah ni nge bing e kanawo’ ni ngan machib riy. (1 Korinth 16:9) Machane, bay e thin rok Jesus ko Matthew 10:23 ni be gaar: “Dabiyog ni gimed ra mu’nag e maruwel romed u lan gubin e binaw nu Israel u m’on ko ngiyal’ nra yib e en ni Fak e Girdi’ riy.” Ere yira wereg fare thin nib fel’ u gubin yang u fayleng, machane gathi gad ra taw nga gubin yang u fayleng ko fare thin nib fel’ u m’on ko ngiyal’ “nra yib” Jesus ni ir e Ta Puf Oloboch.

12. (a) Fare ‘pow ni kan tay nga peri’ e girdi’’ ni bay ko Revelation 7:3 e ma sor fan ko mang? (b) Mang e ke tamilang ni bochan ni ke buch uw e girdi’ ni kan dugliyrad ni ka bay u fayleng?

¹² Mu lemnag fare thin ko Revelation 7:1, 3, ni be yog ni fa “aningeg e nifeng” ko magothgoth e yibe taleg nge mada’ ko ngiyal’ “ni bay gu mu’gad i tay e pow nga peri’ e pi tapigpig rok e Got rodad.” Pi thin ney e de sor fan ko yay ni som’on ni kan tay e pow nga peri’rad, ni aram e n’en ni buch u nap’an ni kan dugliy e piin ni yad bang ko fa 144,000 ni ngar ranod nga tharmiy. (Efesus 1:13) Ya ma sor fan ko yay ntomur ni ran dugliyrad nib mmutrug ni yad e “pi tapigpig rok e Got rodad” ya kan skengnagrad mar pared nib yul’yul’. Ke buch uw e piin ni kan dugliyrad ni yad pi fak Got ni ka yad bay u fayleng e chiney. Maku be tamilangnag e Bible ni “bochan e piin ni girdien Got ni ke mel’egrad” ma bayi “lichnag” e pi rran ni tabolngin fare gafgow ni baga’. (Matthew 24:21, 22) Ma baga’ ni piin ni yad ma yog ni kan dugliyrad e goo kar pillibthirgad. Ere gathi be tamilangnag e re n’ey ni ke chugur ko ngiyal’ ko tomur fa?

Ba Matanag nib Yul’yul’

13, 14. Mang e mil fan ngak e girdi’ ni yad e matanag?

¹³ Ma nap’an ni gad be sonnag mab fel’ ni ngad tedan’dad ko pi n’en ni ma yog fare ‘tapigpig nib yul’yul’.” (Matthew 24:45) U boor ko raay e duw ma fare “tapigpig” ko ngiyal’ ney e be yul’yul’ ko maruwel ni ir e “matanag.” (Ezekiel 3:17-21) Fare Wulyang Ntagil’ E Damit ko January 1, 1984, e ke gaar: “Re matanag ney e be yaliy e pi n’en ni be buch u fayleng ni be lebuguy e thin ko profet ko Bible, ma yad ma ginang e girdi’ ko fare ‘gafgow ni baga’’ ni bayi yib ni aram e ‘gafgow ni ri kab mal’af ni kab gel e gafgow riy nga reb e gafgow ni kaa yib, ni ka nap’an ni sum e fayleng’ maku ma wereg e ‘thin nib fel’ u morngaagen ban’en ni kab fel’.’”​—Matthew 24:21; Isaiah 52:7.

¹⁴ Dab mu pag talin: Mmil fan ngak e en matanag ni nge yog “e n’en ni ke guy.” (Isaiah 21:6-8) Nap’an e ngiyal’ ko Bible ma ra ginang e matanag e girdi’ u m’on ni mus ni dawori tamilang e riya’ ni be yib ya kab mal’af nga orel. (2 Kings 9:17, 18) Ere dabi siy ni bay yu ngiyal’ ni kan ginang e girdi’ ma dariy e riya’. Machane ba matanag nib fel’ e dabi tinna’ ni nge ginang e girdi’ ni bochan ni ra tamra’. Faan mang be yik’ e naun rom, ma ra uw rogon u wan’um nfaanra de yib e girdi’ ni ra thang e nifiy ni bochan ni ur lemnaged ni sana gathi riyul’ e re n’em? Danga’, gad ba adag e pi girdi’ nem ni ngar bad nib pay faanra be m’ug riy ni bay e riya’. Ku arrogon e piin ni yad e matanag e ur ginanged e girdi’ ko boch ban’en ko ngiyal’ nib puluw.

15, 16. (a) Mang fan ni yibe thiliyeg boch ban’en ni gad be weliy u morngaagen e thin ko profet? (b) Mang e rayog ni ngad filed ko pi tapigpig rok Got ni ur lemnaged boch e thin ko profet ni gathi arrogon?

¹⁵ Ma nap’an ni be buch iyan boch ban’en ma yibe tamilangnagan’dad iyan ko pi thin ko profet. Chepin e girdi’ e ma dag ni tomren ni ke lebug e thin ko profet ma aram fini tamilang u wan’uy. Yog Got ku Abram ko ri uw n’umngin nap’an ni ra par e piin ni owchen “e bay ra pired ni yad e milekag u lan ba nam ni gathi nam rorad,” ni 400 e duw n’umngin nap’an. (Genesis 15:13) Machane i lemnag Moses ni nge mang ta ayuw ko girdi’ rok u m’on riy.​—Acts 7:23-30.

¹⁶ Ku mu lemnag e pi thin ko profet u morngaagen fare Messiah. Ngan sap nga tomur mab tamilang ni kan yiiynag u morngaagen e yam’ nra tay fare Messiah min faseg ko yam’. (Isaiah 53:8-10) Machane de tamilang e re n’ey u wan’ pi gachalpen Jesus. (Matthew 16:21-23) Dar nanged fan ni ra lebug e thin ko Daniel 7:13, 14 ko ngiyal’ nra moy Kristus nga m’on ni aram e pa·rou·siʹa, ara “ngiyal’ ni ba’.” (Matthew 24:3) Ere ke chugur ko 2,000 e duw nib mal’af e n’en ni ur sumarnaged u nap’an ni ur fithed ku Jesus ni gaar: “Somol, ra taw ko re ngiyal’ i n’ir ma aram ma ga fulweg e nam nu Israel nga rogon?” (Acts 1:6) Mus u tomren ni kan dugliy fare ulung ko Kristiano, ma ka yad be lemnag boch ban’en nra buch ma gathi aram rogon. (2 Thessalonika 2:1, 2) Immoy boch i yad ni ke oloboch e lem rorad machane ke flaabnag Jehovah e maruwel ni tay e pi Kristiano u nap’an e bin som’on e chibog!

17. Susun uw rogon u wan’dad ni yibe thiliyeg boch ban’en ni kan weliy u morngaagen e thin ko Bible?

¹⁷ Piin ni yad e matanag ko ngiyal’ ney e ku thingara thiliyeged boch ban’en ni ur rogned yu ngiyal’. Machane rayog ku be’ ni nge maruwaran’ ni be flaabnag Jehovah fare “tapigpig nib yul’yul’’ fa? Maku faanra ran lemnag e pi n’en ni kan thiliyeg ma gathi ri ba achig e pi n’en nem fa? Ya pi n’en ni kad nanged fan ko Bible e de thil. Kari mudugil lanin’dad ni gad bay ko ngiyal’ ni tin tomren e rran!

Ngan Par ni Fan ko Yafas Ndariy N’umngin Nap’an

18. Mang fan ni thingarda siyeged i par ni fan ko ngiyal’ ney ma kari mus?

¹⁸ Rayog ni nge gaar e girdi’ nu fayleng ni ‘Mmarod nguud abichgad ma gadad be garbod, ya bayi gabul ma kad m’ad,’ machane thingari dabda lemgad ni aram rogon. Ya mang fan ni ngam athamgil ni nge yog e falfalan’ ngom e chiney ma ra aw nib m’ay fan ko bin ni ngam athamgil ni nge yog e yafas ni manemus ngom? Re athap nem ndemtrug ko yafas ndariy n’umngin nap’an u tharmiy ara yafas ni manemus u fayleng, e gathi ba lik’ay ara ba yat. Ya aram ban’en ni ke micheg Got ni “der ma ban.” (Titus 1:2) Bay boor e mich riy ni ke chugur ko ngiyal’ nra lebug e n’en ni ke l’agan’dad ngay! “Daki yoor e tayim ni ke magey.”​—1 Korinth 7:29.

19, 20. (a) Uw rogon u wan’ Jehovah e pi n’en ni kad paged fadad riy ni fan ko Gil’ilungun? (b) Mang fan ni thingarda pared ni fan ko yafas ndariy n’umngin nap’an?

¹⁹ Rriyul’ ni boor e girdi’ e ma lemnag ni ke pag nap’an ni ka bay e re m’ag ney. Ma sana be lemnag boch e girdi’ ni faan mang ur nanged e re n’ey boch kafram ma dab ra paged farad ni bod ni ur rin’ed e chiney. Machane susun ndabi kireban’ be’ ni bochan ni ke pag fan ir. Ya bang ko ngongol ko Kristiano e ra be’ me pag fan ir. Piin Kristiano e yad ma ‘pag talrad.’ (Matthew 16:24) Susun ri dabda lemnaged nib m’ay fan e athamgil ni kad ted ni ngad felan’naged Got. I micheg Jesus ni gaar: “En nra pag e tabinaw rok, ara pi walagen ni pumoon, ara pi walagen ni ppin, ara chitiningin, ara chitamangin, ara pi fak, ara yungi binaw ntafen ni bochag nge bochan e thin nib fel’ e ka boor e tin nrayog ngak ko biney e tamilang nra reb ma raay yay e ke mun ngay . . . ma bin bay yib e tamilang e bay yog e yafos riy ngak ndariy n’umngin nap’an.” (Mark 10:29, 30) Reb e biyu’ e duw nga m’on ma ra uw fene ga’ fan u wan’um e maruwel rom, ara naun rom, ara salpiy rom ni bay ko bank? Ma pi n’en ni kam pag fam riy ni fan ko Jehovah e ra aw nib baga’ fan u wan’ u lan bokum milyon e duw nga m’on​—nge reb e bilyon e duw nga m’on! “Gathi bayi pag talin Got e maruwel ni kam ngongliyed.”​—Hebrews 6:10.

²⁰ Ere nguud pared ni ke l’agan’dad ko par ni manemus, ma dabi l’ag owchedad ko “pi n’en ni yibe guy nga owchey, ya pi n’en ndanir guy nga owchey. Ya n’en ni yibe guy nga owchey e bayi m’ay; ma n’en ndab ni guy nga owchey e bay i par ndariy n’umngin nap’an.” (2 Korinth 4:18) Yoloy Habakkuk ni profet ni gaar: “Dawori taw nga nap’an ni nge yib i m’ug e pi n’ey. Machane ngalan’ e be yib nib machreg, ma n’en ni ku gog ngom e bay yib i m’ug. Bay mu lemnag nib sowath ni be yib, machane ngam sonnag; ya ra yib i m’ug ko ngiyal’ ni kug dugliy, ma dabi sowath.” (Habakkuk 2:3) Bochan ni gad be ‘sonnag’ e ngiyal’ ko tomur ma uw rogon ni gad be rin’ e tin nib mil fan ngodad ni ngad rin’ed ngodad nge ngak e tabinaw rodad? Bin migid e thin e ra weliy e pi n’ey.

Boch Ban’en ni Ngan Lemnag

◻ Mang e rin’ boch e girdi’ ko ngiyal’ ney ya ke m’ug riy ni ke sowath ni nge yib e tomur ko re m’ag ney?

◻ Mang tapgin e athap rodad ko yafas ni dariy n’umngin nap’an?

◻ Susun uw rogon u wan’dad e pi n’en ni kad paged fadad riy ni fan ko Gil’ilungun Got?

[Sasing ko page 7]

Thingarni mu’nag e machib u gangin e fayleng u m’on ni nge taw ko tomur