Mu Gayiy e Kanawo’ rok Got Nge Pow’iyem u Gubin Ban’en

“Re Got ney e ir e Got rodad ni dariy n’umngin nap’an. Ir e ra pow’iydad nge mada’ ko ngiyal’ ni gad ra yim’.”​—PS. 48:14, NW.

1, 2. Mang fan nsusuna ngad folgad ko kanawo’ rok Jehovah ko bin ni ngad pagedan’dad ko gonop rodad, ma mang boch e deer ni ke sum?

RA UD lemnaged e tin ndariy fan ara tin nra kirebnigey, mab mom ni ngad bannaged gadad. (Prov. 12:11) Faanra rriyul’ ni gad baadag ni ngad rin’ed ban’en nde puluw ni nge rin’ reb e Kristiano, ma ra i suk’ ngan’dad boch i fan ni ngad rin’ed fare nem. (Jer. 17:5, 9) Ere, fare psalmist e dag e gonop u nap’an ni meybil ku Jehovah ni gaar: “Mpi’ e tamilang rom nge thin rom nib riyul’ nge yog ngog, ngar pow’iyew gag.” (Ps. 43:3) Ke pagan’ ku Jehovah, ma gathi gonop rok, ma kanawo’ rok Jehovah aram e bin nth’abi fel’ e kanawo’ ni ke sap ngay. Susuna ngad sapgad ku Got ni nge pow’iydad, ni bod rogon ni rin’ fare psalmist.

² Ere, mang fan ni ngari pagan’dad nga rogon nima pow’iyey Jehovah? Mingiyal’ e ngad gayed e kanawo’ rok? Mang ngongol e thingarda maruweliyed ya nge yog ni fel’ rogodad riy, ma uw rogon ni ma pow’iydad Jehovah e ngiyal’ ney? Pi deer ney nib ga’ fan e yira weliy u lan e re article ney.

Mang Fan ni Nge Pagan’dad Nga Rogon ni Ma Pow’iydad Jehovah?

3-5. Mang fan ni ngari pagan’dad nga rogon ni be pow’iydad Jehovah?

³ Jehovah ir e Chitamangidad u tharmiy. (1 Kor. 8:6) Ri manang rarogodad ni be’ nge be’ ma rayog ni nge guy e n’en ni bay u gum’irchadad. (1 Sam. 16:7; Prov. 21:2) I gaar David ni Pilung ngak Got: “Ga manang urngin e tin ni gu ma rin’; ra mpar u urel ma ba tamilangan’um u urngin e tin ni gu be lemnag. Ni mus nra dawor gog ban’en ma ga manang e tin ni bay gog.” (Ps. 139:2, 4) Bochan ni manangdad Jehovah nrib fel’ rogon, ma dariy e maruwar riy ni manang e n’en nib fel’ ngodad. Maku reb e, Jehovah e ba gonop. Ma guy urngin ban’en, mab toar e sap rok ko girdi’, ma manang e n’en nra buch u ban’en ni ka aram ko som’on riy. (Isa. 46:9-11; Rom. 11:33) Ir “Got nri taareb, ni ke mus ni ir e ba gonop.”​—Rom. 16:27.

⁴ Tin kub muun ngay e, gad ba t’uf rok Jehovah ma baadag e tin nib fel’ ni fan ngodad. (John 3:16; 1 John 4:8) Bochan ni ir reb e Got ni ma t’ufegey, mab gol ngodad. I yoloy James nreb i gachalpen Jesus ni gaar: “Urngin e tin nib fel’ ni be pi’ Got ngodad nge urngin e tow’ath nrib manigil ma be yib u tharmiy ngodad, ni be yib rok Got nga but’, ni ir e sunumiy urngin ban’en ni be gal ramaen u lan e lang.” (Jas. 1:17) Piin ni yad ma paged yad ngak Got nge pow’iyrad e ma yib angin e gol rok ngorad.

⁵ Bin tomur e, Jehovah e ba gel gelngin. I yoloy fare psalmist murung’agen ere n’ey ni gaar: “En nra yan ngak e en ni Th’abi Tolang ni bochan e nge dab ki buch ban’en rok, en nra i par ni en ni Gubin ma Rayog Rok e be yoror rok, e rayog ni nge gaar ngak Somol, ‘I gur e ga be yoror rog me gur e gu be naf ngom! I gur e Got rog; ni gur e ke pagan’ug ngom.’” (Ps. 91:1, 2) Raud folgad u rogon ni ma pow’iydad Jehovah, ma aram e gad be gayiy e manab ko fare Got ndabi oloboch. Mus ko ngiyal’ ni gad ra mada’nag e togopuluw, ma ra ayuwegdad Jehovah. Dabi digeydad. (Ps. 71:4, 5; Mu beeg e Proverbs 3:19-26.) Arrogon, manang Jehovah e n’en nib fel’ ngodad, ma baadag ni nge yog e n’en nib fel’ ni fan ngodad, maku bay gelngin ni nge pi’ e n’en nib fel’ ngodad. Gad bbalyang ni faanra dabda folgad u rogon ni be pow’iydad! Ere, mingiyal’ e ba t’uf ni nge pow’iydad?

Mingiyal’ e Ba T’uf ni Ngan Pow’iydad?

6, 7. Mingiyal’ e ba t’uf ni nge pow’iydad Jehovah?

⁶ Rriyul’ nib t’uf ni nge pow’iydad Got u n’umngin nap’an e yafas rodad, nnap’an ni kab fel’ yangardad nge ni mada’ ko ngiyal’ ni kad pilibthirgad. I gaar fare psalmist: “Re Got ney e ir e Got rodad ndariy n’umngin nap’an. Ir e ra pow’iydad nge mada’ ko ngiyal’ ni gad ra yim’.” (Ps. 48:14, NW) Kristiano nib gonop e darur siyeged ni ngar sapgad ngak Got ni nge pow’iyrad, ni bod ni rin’ fare psalmist.

⁷ Riyul’, ni bay yu ngiyal’ nrib t’uf e ayuw rodad nib gur. Yu ngiyal’ e kad pirieged ni kad ‘gafgowgad,’ ya sana kad mada’naged e togopuluw, ara m’ar nib ubchiya’, ara kan talegdad ko maruwel rodad nib tomgin. (Ps. 69:16, 17, NW) Faanra buch ni aray rogon mab t’uf ni ngad chelgad ku Jehovah, nge pagan’dad ngak nra gelnagdad nge yog nda k’adedan’dad me pow’iydad ngad mel’eged boch ban’en u fithik’ e gonop. (Mu beeg e Psalm 102:17.) Machane, kub t’uf e ayuw rok rodad u boch ban’en. Bod ni, nap’an ni gad be machibnag e piin ni buguli yoror rodad u murung’agen fare thin nib fel’ ko Gil’ilungun Got, mab t’uf ni nge pow’iydad Jehovah ni faanra ngeb angin e machib rodad. Ma ngiyal’ nib t’uf ni ngad dugliyed ban’en​—ndemtrug ko fafel, mad ni ngad chuwgad ngay nge rogon yaadad, piin ni ngad chaggad ngorad, maruwel ni ngad uned ngay, skul ni ngad uned ngay, ara yugu ban’en—​ma gad be ngongol u fithik’ e gonop ni faanra da folgad ko kanawo’ rok Jehovah. Riyul’ riy e, ba t’uf ni ngan pow’iydad u gubin ban’en ko yafas rodad.

Riya’ Riy ni Faanra Dabda Gayed Got ni Nge Pow’iydad

8. Mang e be dag e n’en ni rin’ Efa ni kay wom’engin fare ke gek’iy nsusuna dabi kay?

⁸ Dab mu pagtalin nthingari m’agan’dad ngay ni nge pow’iydad Jehovah. Dabi towasariydad Got ni ngad rin’ed ere n’ey ni faanra dubdad. Bin nsom’on e girdi’ ni mel’eg ndabi pow’iy Jehovah e Efa, ma n’en ni rin’ e be dag feni gel e riya’ ko n’en ni mel’eg. Kum lemnag e n’en ni be dag e ngongol rok. I kay Efa wom’engin fare gek’iy nnog ngorow ndabra kew ni bochan e baadag ni nge “bod Got, me tamilangan’ nge nang e n’en nib fel’ nge n’en nib kireb.” (Gen. 3:5) N’en ni rin’ e be dag ni baadag ni nge yog ngak ban’en nib milfan ku Got, me dugliy e tin baadag ko bin ni nge fol ko kanawo’ rok Jehovah. Ere, togopuluw ko gagiyeg rok Jehovah. Baadag ni ire nge guy e n’en ni nge rin’. Ma Adam, ni figirngin, e ki mel’eg ni ngki togopuluw.​—Rom. 5:12.

9. Faanra dabda paged Jehovah ni nge pow’iydad, ma mang e gad be rin’, ma mang fan nde gonop ere n’em?

⁹ Ngiyal’ ney, e faanra dabda folgad u rogon ni be pow’iydad Jehovah, maku taareb rogodad ngak Efa nde dag ni Jehovah ir e bay mat’awun ni nge gagiyegnagdad. Bod be’, ni ke mecham i yaliy yaan e ngongol ni puwlag. Faanra chag ko ulung ko Kristiano, ma manang e fonow rok Jehovah u murung’agen ere n’ey. Tin nib alit ban’en e susun ndabi un u fithik’ e sabethin, maku thingar dab ni adag ni ngan sap ngay. (Efe. 5:3) Ra siyeg be’ ere fonow ney, ma be togopuluw nga mat’awun Jehovah ni nge gagiyeg, ma ku be togopuluw ngak ni ir Lolugdad. (1 Kor. 11:3) De gonop ere n’ey, ya gaar Jehovah ngak Jeremiah, “de mil fan ngak e girdi’ ni be yan ni nge pow’iy rogon i wuf ay.”​—Jer. 10:23, NW.

10. Mang fan nsusuna ngad ngongolgad u fithik’ e gonop u rogon ni gad be fanay mat’awdad i mel’eg e tin nib fel’ ara tin nib kireb?

¹⁰ Sana boch e girdi’ e de puluw u wan’rad e n’en ni ke yog Jeremiah, ya yad be lemnag ni bochan ni ke pi’ Jehovah mat’awdad ni ngad mel’eged e tin nib fel’ ara tin nib kireb, ma susun dabi togopuluw nga rogon ni gad be fanay. Machane, dab mpagtalin ni mat’awdad ni kan pi’ ni ngad mel’eged e tin nib fel’ ara tin nib kireb e bay ban’en riy nib milfan ngodad ni ngad rin’ed maku ba tow’ath ni fan ngodad. Gadra weliy ngak Got e n’en ni kad mel’eged ni nga doged ara da rin’ed. (Rom. 14:10) I gaar Jesus: “L’uguney e ma weliy e n’en ni ke sugnag lanin’uy.” Miki gaar: “Laniyan’ be’ e ma yib e lem nib kireb riy ni ir e ma pingeg faanem nge li’ be’ ngem’, fa ra pirew be’ ni gathi mabgol rok, ma be rin’ yugu boch ban’en ni aram e ngongol ko darngal; me moro’ro’ u fithik’ e yargel, me lifith l’ugun, me t’ar e thin nga daken e girdi’.” (Matt. 12:34; 15:19) Ere, thin nge ngongol rodad e ir e ma dag e n’en ni bay u lan gum’irchadad. Be dag e bin nriyul’ i rarogodad. Arfan ni be’ ni Kristiano nib gonop e ma gayiy Jehovah ni nge pow’iy u gubin ban’en. Faanra aram rogon, mab ‘mat’aw gum’irchaen’ ma ra ‘rin’ e tin nib fel’’ ngak.​—Ps. 125:4.

11. Mang e rayog nda filed ko n’en ni buch rok piyu Israel?

¹¹ Mu lemnag e n’en ni buch rok piyu Israel. I ayuwegrad Jehovah u nap’an ni ur mel’eged e tin nib fel’, me yad be fol ko motochiyel rok. (Josh. 24:15, 21, 31) Machane, boor yay ndar fanayed mat’awrad nib fel’ rogon. Nap’an Jeremiah, me weliy Jehovah murung’agrad ni gaar: “Dar folgad ara ra tedan’rad ko tin ni ku gog. Mi yad thilyeg nguur rin’ed e tin ni be yog ngorad e gelan’ rorad nge lem rorad nib kireb, ma aram ma ra piggad ngari gel e kireb rorad.” (Jer. 7:24-26) Rib gel e kireban’ riy! Manga yugu dabda siyeged ndab da paged Jehovah nge pow’iydad ma gad yan u rogon ni gad baadag ngad ‘piggad ngari gel e kireb rodad’ ni bochan e gad ba gelan’ ara gad baadag ni ngad rin’ed e tin ni gad baadag!

Mang e Ba T’uf ni Faanra Ngan Fol ko Fonow rok Got?

12, 13. (a) Mang boch e fel’ngin ni be k’aringdad ni ngad folgad u rogon ni be pow’iydad Jehovah? (b) Mang fan nib ga’ fan e michan’?

¹² T’ufeg rodad ku Jehovah e ir e ra k’aringdad ni ngad folgad u rogon ni be pow’iydad. (1 John 5:3) Machane, ki tamilangnag Paul ban’en nib t’uf rodad u nap’an ni gaar: “N’en ni ke michan’dad ngay e ir e be gagiyegnag e ngongol rodad u roy u fayleng, ma gathi n’en ni gadad be guy.” (2 Kor. 5:6, 7) Mang nib ga’ fan e michan’? Jehovah e ma pow’iydad ko “bin nib mat’aw e kanawo,” machane re kanawo’ nem e dabi fekey i yan ko flaab nge fel’ rogon ko re fayleng ney. (Ps. 23:3) Bochan ere n’em, ma thingar da yiluyed e michan’ rodad ko pi tow’ath ni ma yib ko pigpig rodad ku Jehovah. (Mu beeg e 2 Korinth 4:17, 18.) Ma michan’ rodad e ma ayuwegdad ni nge fel’ u wan’dad e tin bay rodad nyugu aram rogon ni buchuuw.​—1 Tim. 6:8.

¹³ I dag Jesus ni bin nriyul’ e liyor e ba muun ngay e pagfay, ni kub t’uf e michan’ riy. (Luke 9:23, 24) Boch e pi tapigpig nib yul’yul’ e kar paged farad, kar k’adedan’rad ko gafgow, nge mat’awrad ni yibe magawonnag, nge laniyan’ ni yibe tay ngorad, ni kub muun ngay e togopuluw nib gel. (2 Kor. 11:23-27; Rev. 3:8-10) Kemus ni yigoo michan’ nib gel e ke ayuwegrad ni ngar rin’ed e re n’em u fithik’ e felfelan’. (Jas. 1:2, 3) Michan’ nib gel e ra gelnag e pagan’ rodad nfaanra da folgad u rogon ni ma pow’iydad Jehovah ni gubin ngiyal’. Ra yib angin ngodad ni gubin ngiyal’. Dariy e maruwar riy ni tow’ath nra yib ngak e piin ni yad ra k’adan’ u fithik’ e yul’yul’ e kab ga’ ko gafgow ni be yib ngorad ndabki n’uw nap’an me m’ay.​—Heb. 11:6.

14. Mang fan thingari dag Hagar e sobut’an’?

¹⁴ Kum lemnag rogon nib t’uf e sobut’an’ nra ngan fol u rogon ni be pow’iyey Jehovah. I m’ug ere n’ey ko n’en ni rin’ Hagar ni tapigpig ku Sarah. Nap’an ni nang Sarah ndabiyog ni nge fakay e bitir, me pi’ Hagar ku Abraham, me diyen Hagar rok Abraham. Ma aram me, tolangan’ Hagar ngak fare masta rok ndabiyog ni nge fakay e bitir. Angin riy e, tabab Sarah i “gafgownag” Hagar ma aram me mil nge chuw. Ma aram me mada’nag reb e engel rok Jehovah Hagar me gaar ngak: “Mu sul ngak Sarai ngam pagem ngak nge mang ir e i gagiyegnagem.” (Gen. 16:2, 6, 8, 9) Sana ba thil rogon ni lemnag Hagar ni ngan pow’iy. Thingari thilyeg e ngongol rok, ya nge yog ni fol u rogon ni ke pow’iy fare engel. Machane, me rin’ Hagar e n’en ni ke yog fare engel ngak u fithik’ e sobut’an’, ma aram me gargeleg fak, ni Ishmael, u lan e tento rok chitamangin fare tir.

15. Mu weliy boch ban’en nib t’uf e sobut’an’ riy ni faanra ngan fol u rogon ni be pow’iyey Jehovah.

¹⁵ Ngan fol u rogon ni ma pow’iyey Jehovah e rayog ni be yip’ fan ni ngad sobut’niged gadad. Boch e girdi’ e thingari fel’ u wan’rad nde adag Jehovah ba mit e fafel ni yad baadag. Sana bay reb e Kristiano ni ke k’aring e damumuw ngak be’ mab t’uf ni nge wenig ngak. Ara sana ke oloboch u ban’en mab t’uf ni nge micheg nriyul’ ni ke oloboch. Ma uw rogon ni faanra ke rin’ be’ reb e denen nib ubchiya’? Ba t’uf ni nge sobut’nag ir me weliy e n’en ni ke rin’ ko piin piilal. Ara sana ku bay be’ ni kan tharbog ko ulung. Ra nge sul ko ulung bayay, mab t’uf ni nge sobut’nag ir nge kalngan’ me digey e kireb ni ke rin’. Rayog ni nge fal’eg lanin’uy fare thin u Proverbs 29:23 (NW) ko pi n’ey nge ku boch ban’en ni taareb rogon ngay, ni gaar: “Tolangan’ rok be’ nib moon e ra sobut’nag, machane en nra sobut’an’ e yira tayfan.”

Uw Rogon ni Ma Pow’iydad Jehovah?

16, 17. Uw rogon nra fel’ rogodad ko Bible ni polo’ nge mang kanawo’ ni yib rok Got ngodad?

¹⁶ Bin nth’abi ga’ fan e fonow ni ma yib rok Got, e bay u lan e Bible, ni aram e Thin Rok ni kan thagthagnag. (Mu beeg e 2 Timothy 3:16, 17.) Ra nge yib angin e Thin rok Got ngodad, ma gad ba gonop ndab da sonnaged ni nge yib e magawon nib mo’maw’ ngodad mfin da gayed e ayuw u lan e Bible. Ya ngad mechameged ngodad ni ngaud beeged e Bible rodad ni gubin e rran. (Ps. 1:1-3) Ra aram rogon, ma rayog ni ngad nanged e n’en ni bay u lan e Thin rok Got ni kan thagthagnag. Lem ku Got e ku ra mang lem rodad, ma ra fel’ rogodad ni ngad mada’naged e magawon ni mus ko tin nda da nanged.

¹⁷ Tin kub muun ngay e, ba ga’ fan ni ngad fal’eged i lemnag e n’en ni gad be beeg u lan e Bible ma gad meybil nib puluw ngay. Ra ud fal’eged i lemnag e thin ko Bible, ma rayog ni ngad nanged rogon nra ayuwegdad u boch ban’en. (1 Tim. 4:15) Nap’an nra yib e magawon nib gel ngodad, ma rayog ni ngad meybilgad ku Jehovah, ma gad ning e ayuw ngak nge yog ni pi’ e fonow nib t’uf rodad. Kan ni thothup rok Jehovah e ra ayuwegdad ni nge yib ngan’dad boch e thin nu Bible ni bay e motochiyel riy ni kad beeged u Bible ara pi babyor ni kan fek e thin riy ko Bible.​—Mu beeg e Psalm 25:4, 5.

18. Mang boch e kanawo’ ni ma fanay Jehovah fare ulung ko Kristiano riy ni nge pow’iydad?

¹⁸ Rayog ni ngkud gayed e fonow rok Jehovah ko pi walag u lan e ulung. Bang nib ga’ fan ko re ulung ney e aram “fare tapigpig nib yul’yul’ mab gonop” ni fare Governing Body e owchen, ni ir e ma pi’ e ggan ko tirok Got ban’en u daken e pi babyor ni kan ngongliy nge pi muulung nge assembly ni yima tay. (Matt. 24:45-47; mu taarebnag ko Acts 15:6, 22-31.) Tin kub muun ngay e, fithik’ fare ulung i walag ni Kristiano e bay riy e piin ni kar ilalgad ko tirok Got, ni ba ga’ ni piin piilal, ni bay rogorad ni ngar pied e ayuw nge fonow u daken e thin rok Got. (Isa. 32:1) Piin fel’ yangaren u lan e ulung ko Kristiano e ku bay bang nrayog ni nge yib e ayuw riy ngorad. Gallabthir rorad ni ke michan’rad e aram e piin ni ma fanay Got ni nge pow’iyrad ma gubin ngiyal’ ni yibe pi’ e athamgil nga lanin’rad ni ngaur sapgad ngorad.​—Efe. 6:1-3.

19. Mang flaab e ma yib ngodad ni bochan e gad ma ulul i gay Jehovah ni nge pow’iydad?

¹⁹ Arrogon, boor e kanawo’ ni ma pow’iydad Jehovah riy, mab fel’ ni ngad folgad riy. I weliy David ni Pilung murung’agen ba ngiyal’ u nap’an ni par fare nam nu Israel nib yul’yul’ ni gaar: “Pi chitamangimad e ur pired nib pagan’rad ngom; ur pired nib pagan’rad ngom mu um yororiyrad. Ra pininged gur ni ngam ayuwegrad, ma ga chuwegrad u fithik’ e riya’; ur pired nib pagan’rad ngom, ma aram fan nde m’ingan’rad.” (Ps. 22:3-5) Faan gadra fol ko fonow rok Jehovah u fithik’ e pagan’, maku rayog ndabi ‘m’ingan’dad.’ Dabi kirebnag lanin’dad e athap rodad. Faanra da ‘pied gadad ngak Jehovah,’ ko bin ni nge pagan’dad ko gonop rodad, ma angin riy e rayog e tow’ath ni boor ngodad ni mus ko chiney. (Ps. 37:5) Ma faanra da k’adedan’dad u fithik’ e yul’yul’ ma gad yan ko re kanawo’ nem, ma pi tow’ath nem e ra par ni manemus. I yoloy David ni Pilung ni gaar: “Somol e ba t’uf rok e tin nib mat’aw, ma der ma pag e piin ni yad ba yul’yul’ ngak, ni aram girdien; ma yoror rorad ni gubin ngiyal’ . . . Piin ni yad mmat’aw e bay ra pired u daken e binaw u fithik’ e gapas, me par ni taferad ni dariy n’umngin nap’an.”​—Ps. 37:28, 29.

Rayog ni Ngam Weliy?

• Mang fan nib pagan’dad nga rogon ni ma pow’iydad Jehovah?

• Mang e be dag ni faanra da siyeged ndabi pow’iydad Jehovah?

• Mang boch ban’en nib t’uf ni nge sobut’an’ reb e Kristiano riy?

• Uw rogon ni ma pow’iydad Jehovah e ngiyal’ ney?

[Pictures on page 12]

Ga ma sap ku Jehovah u gubin yang u lan e yafas rom, fa?

[Picture on page 13]

I pi Efa keru’ nga mat’awun e gagiyeg rok Jehovah

[Picture on page 14]

Mang fel’ngin e ba t’uf rok Hagar ni faanra nge fol ko fonow ni ke pi’ fare engel ngak?