Fel’ nge Kireb: Rayog ni Nge Pow’iyey e Fonow u Bible

Faanra gubin ngiyal’ ni gad ma mel’eg ban’en nrogon ni gad be lemnag ara be lemnag yugu boch e girdi’, ma dabiyog ni ngad nanged ko ra yan i aw nib fel’ fa danga’. Gathi kemus ni be weliy e Bible fan e re n’ey, ya ku bay ban’en ni be tamilangnag. Be ayuwegdad ni ngad nanged ko mang e ba fel’ nge mang e ba kireb ni aram e n’en nra yibnag e felfelan’ ngodad.

BA T’UF NI NGE POW’IYDAD GOT

Be yog Jehovaha Got u lan e Bible ni ke sunmiy e girdi’ ni ngaur sapgad ngak ni nga i pow’iyrad ma gathi yad e ngaur pow’iyed yad. (Jeremiah 10:23) Aram fan ni ke tay boch e fonow nga Bible ni nge pow’iy rogon e ngongol rodad. Ba t’uf e girdi’ rok ma dabun ni ngad dugliyed boch ban’en ni gad ra gafgow riy me mo’maw’ rogon e par rodad. (Deuteronomy 5:29; 1 John 4:8) Maku reb e bochan ni Ir e Ke Sunmiydad, ma aram fan nib gaman e gonop nge tamilangan’ rok ni nge pi’ e tin th’abi fel’ e fonow ngodad u rogon e ngongol ni ngaud rin’ed. (Psalm 100:3; 104:24) Machane der ma towasariy e girdi’ ni ngar folgad ko pi motochiyel rok.

I pi’ Jehovah ngak e bin som’on e pumoon nge ppin ni aram Adam nge Efa urngin ban’en nra yibnag e bin riyul’ e felfelan’ ngorow. (Genesis 1:28, 29; 2:8, 15) Ki pi’ e motochiyel ngorow nde mo’maw’ ni ngar folgow riy. Machane i pagrow ni ngar dugliyew rorow ko ngar folgow riy fa danga’. (Genesis 2:9, 16, 17) Ba gel e kireban’ riy ya ra mel’egew ni ngar rin’ew e n’en yow be lemnag ko bin ngar folgow ko pi motochiyel rok Got. (Genesis 3:6) Mang wenegan ni ke yib riy? Gur, be yag ni nge par e girdi’ ni yad ba felfelan’ ni bochan e yad rorad e yad be dugliy ko mang e ba fel’ ma mang e ba kireb? Danga’. Kab kafram i yib ni kad guyed ni faanra dabin fol ko pi motochiyel rok Got, ma dabiyog ni ngan par u fithik’ e gapas nge felfelan’.—Eklesiastes 8:9.

Be pi’ e Bible boch e fonow nra ayuwegdad ni ngad dugliyed boch ban’en nib fel’ ndemtrug rarogon e gin kad bad riy. (2 Timothy 3:16, 17; mu guy fare kahol ni kenggin e “Ba Ke Babyor ni Fan Ngak Urngin e Girdi’.”) Mu lemnag rogon ni be rin’ e Bible e re n’ey.

Mu fil fan nrayog ni nga nog ni Bible e aram e “thin rok Got.” —1 Thessalonika 2:13. Mu yaliy fare video ni Who Is the Author of the Bible? ko jw.org.

BA KE BABYOR NI FAN NGAK URNGIN E GIRDI’

Bochan ni En Ke Sunmiydad e ba gonop ma ma t’ufegey, ma aram fan ni ke pi’ e fonow ni fan ngak urngin e girdi’. Am lemnag e pi n’en baaray u murung’agen e Bible:

3,500+ Urngin mit e thin ni kan pilyeg yu yang ko Bible riy. Aram e re ke babyor nth’abi yoor mit e thin ni kan pilyeg ngay.
5,000,000,000+ Urngin ken e Bible ni kan ngongliy. Aram e re ke babyor nth’abi yoor e girdi’ ni bay rorad ndariy ba ken e babyor ni kan ngongliy ni taareb rogon ngay.

Der n’igin e Bible ni nge m’ug ni kab fel’ boch e girdi’ nga boch ni bochan ramaen dowrad, ara nam, ara ganong, ara yalen rorad. Riyul’ nre ke babyor ney e fan ngak urngin e girdi’.

Mu beeg e Bible u online (ba pag 250 mit e thin ni kan pilyeg ngay) ko jw.org

FAN NI YIMA LEMNAG NDABI AYUWEGEY E BIBLE

Bay boch e girdi’ ni yad ma yog ndariy e fonow u Bible nib fel’ nrayog ni nge pow’iy rogon e ngongol rodad. Baaray boch ban’en nrayog ni nga rogned.

N’en Yima Yog: “Ba togopuluw boch e thin nu Bible nga boch.”

Tin Riyul’: Som’on e rayog ni ngam lemnag ni bay boch e thin nu Bible nib togopuluw nga boch. Machane faan ga ra fil murung’agen rogon nni yoloy nge ngiyal’ nni yoloy riy ma ga ra nang nib puluw reb nga reb.

Ra ngam guy boch e pi n’ey, mag beeg fare article ni kenggin e “Are There Contradictions in the Bible?” ko jw.org.

N’en Yima Yog: “Girdi’ ni yad ma yog ni yad be fol ko Bible e yad ma rin’ boch ban’en nib kireb, ere dabisiy ndabiyog ni nge pow’iy rogon e ngongol rodad nib fel’ rogon.”

Tin Riyul’: Gathi Bible tapgin e ngongol nib kireb ni be rin’ e piin ndarur folgad ko thin riy. Ke yiiynag ni boor e girdi’ ni yad ma yog ni yad be fol ko Bible nib muun e pi tayugang’ ko teliw ngay ndabi puluw e ngongol rorad ko n’en be yog. Ku be yog nra i yog e girdi’ e “thin nib kireb nib togopluw” ko pi machib u Bible ni bochan e re n’ey.—2 Peter 2:1, 2.

Ra ngam nang reb e kanawo’ nder fol e pi tayugang’ ko teliw ko n’en nri be fil e Bible, mag beeg fare article ni kenggin e “Is Religion Just Another Big Business?” ko jw.org.

N’en Yima Yog: “Girdi’ ni yad ma fol ko Bible e darur ted fan e piin nib thil e ngongol rorad.”

Tin Riyul’: Be yog e Bible ni ngan tayfan e girdi’. Be yog nib kireb ni. . .

ngam lemnag ni ka gab fel’ ko tin ka bay e girdi’.—Filippi 2:3.
ngam darifannag e piin nib thil e tin nib ga’ fan u wan’rad ara michan’ rorad.—1 Peter 2:17.
ngam towasariy yugu boch e girdi’ ni nge m’agan’rad ko n’en ga be lemnag.—Matthew 10:14.

Be yog e Bible ni gubin ngiyal’ ni ma dag Got e sumunguy ko girdi’ mab mat’aw e ngongol rok ngorad, maku aram e n’en baadag ni ngad rin’ed.—Roma 9:14.

Ra ngkum nang boch ban’en, mag beeg fare article ni kenggin e “Tolerance—How the Bible Can Help” ko jw.org.

BE YOG E BIBLE E N’EN BAADAG GOT NI NGAD RIN’ED

Bay murung’agen rogon ni ma ngongol Jehovah ko girdi’ u lan e Bible. N’en bay riy e be ayuwegdad ni ngad nanged e n’en nib fel’ nge n’en nib kireb u wan’ Got, nge n’en nra yib angin ngodad, nge n’en nra gafgownagdad. (Psalm 19:7, 11) Gad ma fil boch i kenggin e motochiyel riy ni gubin ngiyal’ nra ayuwegdad ni ngad mel’eged boch ban’en nib fel’ ni ngad rin’ed u reb e rran ngu reb.

Bod ni am lemnag fare fonow ni bay ko Proverbs 13:20 ni be gaar: “Mpachegem ngak e piin ni yad ba gonop me yog e gonop ngom. Mm’agem ngak e girdi’ ni balyang ma ga kireb.” Ra yib angin e re thin ney ngodad e ngiyal’ ney ni bod ni i yib angin kakrom. Ba sug kenggin e motochiyel u lan e Bible nra ayuwegey mab ga’ fan.—Mu guy fare kahol ni kenggin e “Ka Ra Yib Angin e Fonow u Bible.”

Machane sana ra lungum u wan’um, ‘Uw rogon nrayog ni nge pagan’ug nra yib angin e pi fonow u Bible?’ Bin migid e article e ra weliy murung’agen boch e girdi’ ni ke yib angin e fonow nu Bible ngorad.

a Jehovah e aram fithingan Got. (Psalm 83:18) Be yog e foreword ko fare Bible ni Thothup ni “fithingan Got ni Hebrew e Yahweh (YHWH) ni kan piliyeg ni SOMOL ko thin ni waab.”

KA RA YIB ANGIN E FONOW U BIBLE

Yugu aram rogon ni ke chugur ni nge gaman 2,000 e duw ni kan ngongliy e Bible, machane ka ra yib angin ngodad e ngiyal’ ney. Kab kafram i yib ni baadag e girdi’ ni ngar felfelan’gad me fel’ e par rorad. (Eklesiastes 1:9) Rayog ni nge ayuwegdad e fonow u Bible ni ngad rin’ed e re n’ey.

Yul’yul’

“Thingar ra daged ni gubin ngiyal’ ma yad ba fel’ ma yad ba yul’yul’ u fithik’ urngin e tin ni yad be rin’.”—Titus 2:10.
“Cha’ ni be moro’ro’ e nge tal ko moro’ro’ nge tabab ko maruwel.”—Efesus 4:28.

Tha’ u Thiliy

“Ra be’ ma gathi go ir e ngi i tafinaynag e tin nib fel’ ngak, ya ngki tafinaynag e tin nib fel’ ngak boch e girdi’.”—1 Korinth 10:24.
“Nge bigimed mi i ayuweg bigimed ko meewar rok u fithik’ e runguy, mu um n’iged fan u wun’med e n’en ni manga ke kirebnag bigimed u laniyan’ bigimed.”—Kolose 3:13.

Ngan Dugliy Ban’en

“Be’ nib balyang e yug demtrug ban’en ma ra mich u wan’; ma girdi’ nib tamilangan’ e ri ma fal’eg i yaliy ban’en.”—Proverbs 14:15, BT.
“Be’ nib gonop e ra guy e oloboch ni be yib me pilo’ riy, machane piin nib balyang e darir pilo’gad riy, me yan i tomur mi yad kolngan’rad.”—Proverbs 22:3.