Fel’ nge Kireb: Fonow Nra Yib Angin

Aningeg e kanawo’ ni ke ayuweg e Bible bokum milyon e girdi’ riy.

1. Mabgol

Ba wu’ i mabgol ni yow bay u wen ni yow be felfelan’ u taabang.

Ba thilthil rogon ni ma lemnag e girdi’ e mabgol nge rogon nrayog ni ngar pirieged e felfelan’ u lan e mabgol.

BE GAAR E BIBLE: “Urngin e pumoon e thingari t’uf rok leengin ni gowa ir, ma urngin e ppin ni thingari ta’ fan figirngin.”—Efesus 5:33.

N’EN BE YIP’ FAN: Got e ir e sunmiy e mabgol, ere manang e n’en nib t’uf rok ba wu’ e mabgol ya nge yag nra piriegew e felfelan’. (Mark 10:6-9) Faanra bagayow fa wu’ i mabgol me lemnag bagayow ko bin nge bagayow ma yigoo ir e nga i lemnag ir, ma aram e yow ra felfelan’. Be’ ni figirngiy nib t’uf leengin rok e ra i ayuweg nib fel’ rogon ma be dag e sumunguy ngak. Ma be’ ni leengiy nib t’uf figirngin rok e ra i ayuweg ma be non ngak u fithik’ e tayfan.

BAY ANGIN E FONOW U BIBLE: Quang nge Thi ni yow ma par u Vietnam e ra lemnagew ndab ra piriegew e felfelan’ u lan e mabgol rorow. Quang e ba ga’ nder ma dag e sumunguy. I yog ni gaar: “Da gur ma lemnag rogon laniyan’ Thi, mab ga’ nug ma k’aring e tamra’ ngak.” Baadag Thi ni ngar dargow. I yog ni gaar: “Gu lemnag ndabkiyog ni nge pagan’ug ngak figirngig mug tayfan.”

Munmun mar filew e n’en be yog e Bible nge rogon ni ngar folgow ko fare thin ni bay ko Efesus 5:33 u lan e mabgol rorow. I yog Quang ni gaar: “I ayuwegeg e re thin ney ni nggu nang fan nib t’uf ni nggu dag e sumunguy mug dag ngak Thi nib t’uf rog ma gu be pi’ e tin nib t’uf rok. Nap’an nug ra rin’ e re n’ey, ma ma dag e t’ufeg nge tayfan ngog.” Ma Thi e yog ni gaar, “Nap’an ni ug fol ko fare thin ni bay ko Efesus 5:33 mug dag ngak figirngig nug be tayfan, ma aram mi i dag ngog ni be t’ufegeg, ma be tayfag, miki ayuwegeg ni nge gapas lanin’ug.”

Ra ngkum nang boch ban’en u murung’agen e mabgol, mag beeg fare Awake! No. 2 2018 ni kenggin e “12 Secrets of Successful Families” ko jw.org.

Be ayuweg be’ nib pin ba wu’ e mabgol ni ngar piriegew reb e chugum u kantin. Be dag e sumunguy ngorow ni yugu aram rogon ni yugu ba thil yaarow ma boor e gachow u dowrow.

2. Rogon e Ngongol Rodad ko Girdi’

Bay e girdi’ ni yad ma gafgownag yugu boch e girdi’ ni bochan ramaen dowrad, ara nam rorad, ara rogon yaarad, ara teliw rorad, ara bochan ni yad e pumoon ni ma un ko pumoon ara ppin ni ma un ko ppin.

BE GAAR E BIBLE: “Mi gimed ta’ fan urngin e girdi’.”—1 Peter 2:17.

N’EN BE YIP’ FAN: Be yog e Bible nib kireb ni ngan fanenikan e girdi’ nib thil ramaen dowrad, ara nam rorad, ara pumoon ni ma un ko pumoon ara ppin ni ma un ko ppin. Ya be yog ni ngaud ted fan urngin e girdi’ ni yugu demtrug ramaen dowrad, ara nam rorad, ara rarogorad. (Acts 10:34) Mus ni faanra de m’agan’dad ko n’en nib mich u wan’ boch e girdi’ ara rogon e ngongol rorad, ma ka rayog ni ngad daged e sumunguy nge tayfan ngorad.—Matthew 7:12.

BAY ANGIN E FONOW U BIBLE: Ni fil ngak Daniel ni nga i tay ni girdi’ nu Asia e yad boch e girdi’ nrayog ni ngar magawonnaged e nam rok. Bochan e re n’ey ma aram mi i fanenikan e girdi’ nu Asia, mab ga’ ni ma yog e thin nib kireb ngorad u fithik’ e girdi’ ni yoor. I yog ni gaar, “Ug lemnag ni aram e gu be ayuweg e nam rog, machane da ug nang nde puluw rogon e lem nge ngongol ni ug tay.”

Munmun me fil Daniel e n’en be yog e Bible. I yog ni gaar: “Thingar gu thilyeg e lem rog nib polo’. Thingar ug sap ko girdi’ ni bod rogon ni ma sap Got ngorad, ni aram e ngaug tay ni gad gubin ni taareb rogodad ndemtrug e gin kad bad riy.” I weliy Daniel rogon laniyan’ u nap’an nra mada’nag e girdi’ ni gaar: “Ba ga’ nda gur ma lemnag e gin yad be’ riy. Gu ma t’ufeg urngin mit e girdi’ e chiney, ma bay boch e girdi’ nrib pach e thin romad nib thilthil e nam u fayleng ni kar bad riy.”

Ra ngkum nang boch murung’agen, mag beeg fare Awake! No. 3 2020 ni kenggin e “Is There a Cure for Prejudice?” ko jw.org.

Be’ nib pumoon ni bay u lan ba karrow ni yima pi’ boch ban’en riy ni chuway’ ni be pi’ e ggan ngak be’ ni chuway’.

3. Salpiy

Boor e girdi’ ni yad ma guy rogon ni nge yoor e salpiy rorad ya ngar felfelan’gad me fel’ e par rorad boch nga m’on.

BE GAAR E BIBLE: “Ra yororiyem ni bod rogon e salpiy. Gonop e ra ayuwegem ndabi buch ban’en rom—ireray fel’ngin e llowan’.”—Eklesiastes 7:12, BT.

N’EN BE YIP’ FAN: Ba t’uf e salpiy rodad, machane salpiy e dabiyog ni nge micheg ni gad ra felfelan’ ara fel’ e par rodad boch nga m’on. (Proverbs 18:11; 23:4, 5) Ra nge yag e bin riyul’ e felfelan’ ngodad miki fel’ e par rodad boch nga m’on, ma aram e ba t’uf ni ngad folgad ko fonow rok Got u Bible ni bay e gonop riy.—1 Timothy 6:17-19.

BAY ANGIN E FONOW U BIBLE: Cardo nreb e pumoon ni ma par u Indonesia e i nameg ni nge yoor e salpiy rok. I yog ni gaar: “Gubin ban’en ni ma athapeg e girdi’ ni nge yag ngorad e goo bay rog. Rayog ni nggu milekag nga bang, mug chuw’iy boch e chugum nib tolang puluwon, nge karrow, nge naun.” Machane munmun me m’ay e salpiy rok. I yog ni gaar: “Bay be’ ni bannageg nge fek urngin e salpiy rog ni kug maruweliy ni nge yag ngog u lan boor e duw. Boor e duw nug maruweliy ni nge yoor e salpiy rog, machane yan i tomur riy me kireban’ug ni bochan e dakuriy ban’en rog mug lemnag ndakuriy fag.”

I tabab Cardo ni nge fol ko fonow u Bible ni murung’agen e salpiy. Ere chiney e dakir ma guy rogon ni nge yoor e salpiy rok, ya ke mel’eg ni nge momnag rogon e par rok. I yog ni gaar: “Chiney e ke yag e bin riyul’ e flaab ngog ni bochan e ba fel’ e tha’ u thilmow Got. Ra nep’ ma rayog ni nggu mol nib fel’ rogon, ma ke yag e bin riyul’ e felfelan’ ngog.”

Ra ngkum nang boch ban’en ni be yog e Bible u murung’agen e salpiy, mag beeg fare article ni kenggin e “Rayog ni Nge Ayuwegem e Skul nge Salpiy ni Nge Fel’ e Par Rom Boch Nga M’on, Fa?” ni bay ko Fare Wulyang ko Damit No. 3 2021 ko jw.org/yap.

4. Par ko Pumoon nge Ppin

Ra be’ ma rogon ni ma lemnag e par ko pumoon nge ppin.

BE GAAR E BIBLE: “[Dab mu] darngalgad ara par be’ nge be’ ni gathi mabgol rok. Ra bigimed e piin ni pumoon ma susun e nge nang rogon ni nge fek be’ ni ppin ni nge leay u lan e kanawo’ nib thothup ma dariy thibngirow riy, ma gathi bochan e ar’ar rok, ni bod e piin ndar nanged Got.”—1 Thessalonika 4:3-5.

N’EN BE YIP’ FAN: Be yog e Bible ni bay e gin ngad musgad riy u rogon e pi n’en gad ma rin’ ni bay rogon ko ar’ar rodad ko par ko pumoon nge ppin. Fare bugithin ni ‘darngal’ e ba muun ngay ni nge par be’ nge be’ ni gathi mabgol rok, ara nge pi’ be’ ir ni chuway’, ara nge par l’agruw ni’ ndawor ra mabgolgow, ara par u thilin e pumoon nge pumoon ara ppin nge ppin, ara girdi’ nge gamanman. (1 Korinth 6:9, 10) Par ko pumoon nge ppin e ba tow’ath ni ke pi’ Got ni kemus ni fan ngak be’ nib pumoon nge be’ nib pin ni yow ba mabgol.—Proverbs 5:18, 19.

BAY ANGIN E FONOW U BIBLE: Bay be’ nib pin u Australia ni ka nog Kylie ngak ni yog ni gaar: “Bochan ndawor gu un ko mabgol, ma aram mug lemnag ni faan gu ra un ko par ko pumoon nge ppin ma gu ra nang ni yibe t’ufegeg me pagan’ug. Machane gathi aram e n’en ni buch, ya daki pagan’ug miki kireban’ug.”

Boch nga tomuren me fil Kylie e n’en be yog e Bible u murung’agen e par ko pumoon nge ppin, me fol riy. I yog ni gaar: “Kug nang ni kan ngongliy e pi motochiyel rok Got ni nge ayuwegdad u boch ban’en ni ma amithnag lanin’dad. Chiney e ke pagan’ug ma kug nang ni yibe t’ufegeg ni bochan e gu be rin’ boch ban’en u rogon ni baadag Jehovah ni ngad rin’ed. Bochan ni kug fol ko fonow u Bible ma ke yag ni nggu siyeg boor ban’en nra amithnag lanin’ug!”

Ra ngkum nang boch murung’agen, mag beeg fare article ni kenggin e “What Does the Bible Say About Living Together Without Marriage?” ko jw.org.

Ma ayuwegdad e En Ke Sunmiydad ni ngad nanged e tin nib fel’ nge tin nib kireb. Yugu aram rogon ni gathi gubin ngiyal’ nib mom ni ngad folgad ko pi fonow rok, machane dabi yan i aw nib m’ay fan. Ya rayog ni nge pagan’dad ngay ni gubin ngiyal’ nra yibnag e felfelan’ ngodad.

Fare pagel ni kan dag yaan ko fa binem e article ni be yan u daken boch pa’ i kanawo’ nib achichig ni bay e chen u marichlen. Rayog ni ngan guy ba wethal nge p’ebugul bburey nga palog.