Ma Yaliydad Jehovah Ni Bochan E Gad Ba T’uf Rok

“Be yaliy [Jehovah] e re fayleng ney ni ga’ngin ni nge dag gelngin ni fan ngak e piin yad be pigpig ngak u polo’ i gum’ircharad.”​—2 KRON. 16:9, NW.

1. Mang fan ni ma fal’eg i yaliydad Jehovah?

JEHOVAH e ir e Chitamangidad nib flont. Ri manangdad nib fel’ rogon ni ki mada’ ko n’en bay ko “tafinay [rodad].” (1 Kron. 28:9) Machane, gathi ma fal’eg i yaliydad ni bochan e nge pirieg thibngidad. (Ps. 11:4; 130:3) Ya baadag ni nge ayuwegdad ko tin ra kirebnag e tha’ u thildad ngak ara athap rodad ko yafas ni manemus.​—Ps. 25:8-10, 12, 13.

2. Chon mini’ e ma dag Jehovah gelngin ni fan ngorad?

² Rib gel gelngin Jehovah ma rayog ni nge guy gubin ban’en. Bochan e re n’em ma rayog ni nge ayuweg e piin yad ba yul’yul’ ngak u nap’an ni yad ra ning e ayuw ngak, maku rayog ni nge ayuwegrad u nap’an nra yib e skeng ngorad. Be gaar e 2 Kronicles 16:9, NW: “Be yaliy [Jehovah] e re fayleng ney ni ga’ngin ni nge dag gelngin ni fan ngak e piin yad be pigpig ngak u polo’ i gum’ircharad.” Ga ra guy ni ma fanay Jehovah gelngin ni fan ngak e piin ni yad be pigpig ngak u polo’ i gum’ircharad. Dabi dag e mit ney e ngongol ngak e piin nib sasalap ara piin yad ma dake modingniged yad.​—Josh. 7:1, 2, 21, 25; Prov. 1:23-33.

Um Marow Got u Taabang

3, 4. Mange be yip’ fan e nga ‘darod Got u taabang,’ ma mang boch e thin ko Bible nra ayuwegdad nge yog nda nanged fan e re n’ey?

³ Boor e girdi’ ni ma lemnag ndabiyog ni yan e girdi’ nge en ke Sunmiy gubin ban’en u ga’ngin e palpalth’ib u taabang ni be yip’ fan ban’en. Machane, aram e n’en ni baadag Jehovah ni ngad rin’ed. Nap’an e Bible, ma Enok nge Noah e u ranod Got u taabang. (Gen. 5:24; 6:9) Moses e par ni “gowa ke guy fare Got ndab ni guy nga owchey.” (Heb. 11:27) David ni Pilung e u ranow e Chitamangin nu tharmiy u taabang. I gaar: “Ba’ [Jehovah] u lanin’ug ni gubin ngiyal’; ba’ nrib chugur ngog, ma dariy ban’en nrayog ni nge rurgeg.”​—Ps. 16:8.

⁴ Arrogon, dabiyog ni ngad koled pa’ Jehovah nga u darod u taabang ni bod be’. Machane rayog ni nga darod u taabang nib fanathin. Uw rogon? I yoloy Asaph ni psalmist ni gaar: “Gubin ngiyal’ ni gu ba’ rom, ni ga be kol paag. Ga be pow’iyeg ko fonow ni ga be tay ngog.” (Ps. 73:23, 24) Ere faan gad ra fol ko fonow ni ma pi’ Jehovah u daken e Thin rok ngu daken “fare tapigpig nib yul’yul’ ma ba gonop” ma aram e bod ni gad be yan u taabang.​—Matt. 24:45; 2 Tim. 3:16.

5. Uw rogon ni ma yaliy Jehovah e piin yad ba yul’yul’ ngak ni bod ba matam ni ma t’ufegey, ma susuna nge uw rogon e lem rodad ngak?

⁵ Bochan nrib ga’ fan u wan’ Jehovah e piin yad ma yan u taabang, ma ma fal’eg i yaliyrad ni bod rogon ba matam, ma ma ayuwegrad ma ma yoror rorad ma ma fil ban’en ngorad. Ke gaar Got: “Bay gu fil ngom e kanawo’ ni ir e ngam man riy; bay gog ngom e tin ni ngam rin’ ma bay gu fonownigem.” (Ps. 32:8) Mu fithem ni nge lungum: ‘Gu ma lemnigeg ni gamow be yan Jehovah u taabang gu be motoyil ngak ni be fil ngog e gonop rok ma gu manang ni be yaliyeg u fithik’ e t’ufeg, fa? Gur bochan ni gu manang ni bay, ma be rin’ ban’en ko lem rog nge thin rog nge ngongol rog? Ma nap’an ni gu ra oloboch, ma gu ma sap ngak Jehovah ni ir e Chitamangidad ni ma t’ufegdad, ma ma runguyey ma baadag ni nge ayuweg e piin ni kar kalgadngan’rad ko kireb rorad nge yog ni fel’ bayay e tha’ u thilrad, fa gu ma sap ngak ni be’ nib kireb mab gel e thin rok?’​—Ps. 51:17.

6. Mange n’en rayog ni nge rin’ Jehovah ndabiyog ni nge rin’ e girdi’?

⁶ Yu ngiyal’ e ma ayuwegdad Jehovah ni ki mada’ nga nap’an ni gad be n’en ni nga darod u kanawoen e kireb. Bod nrayog ni nge guy ni ke tabab gum’irchadad nib sasalap i ar’arnag e tin nde fel’. (Jer. 17:9) Faanra ke buch ban’en ni aray rogon rodad, ma rayog ni nge rin’ ban’en nib gur nib thil ko girdi’ ni bochan e rayog ni nge “yaliy” e n’en bay u fithik’ i lanin’dad. (Ps. 11:4; 139:4; Jer. 17:10) Mu lemnag e n’en ni rin’ Got ku Baruch, ni tayol ku Jeremiah ma kub fel’ e thin rorow.

Bod Ba Matam Ngak Baruch

7, 8. (a) Mini’ Baruch, ma mang ar’ar nde fel’ e sum nga gum’irchaen? (b) Uw rogon ni dag Jehovah ni be lemnag Baruch ni bod rogon ba matam?

⁷ Baruch e reb e tayol ni ur maruwelgow Jeremiah u fithik’ e yul’yul’ u boch e maruwel nib mo’maw’​—ni aram e ur machibnigew murung’agen e pufthin nra tay Jehovah ngak piyu Judah. (Jer. 1:18, 19) Nap’an ni yan i taw nga ba ngiyal’ ma Baruch ndabisiy ni yib u ba tabinaw nib gilbuguwan e tabab ni nge nameg yugu boch e ‘flaab’ ni fan ngak. Sana ke tabab i ar’arnag boch ban’en ni nge fel’ ngak ara nge yoor e chugum rok. Demtrug e n’en ni buch machane ke guy Jehovah nre lem nem ni bay e riya’ riy e ke tabab ni nge sum u gum’irchaen Baruch. Me gur Jehovah nge non u daken Jeremiah ni gaar: “Ga be yog ni ga be gaar: Kug gafgow e chiney, ya ke puthuy Jehovah e gafgow ko amith rog! Ke m’ay gelngig ko gel’gel’, dakiyog ni nggu pirieg e toffan.” Me gaar Got: “Mog ga be guy rogon ni gur e ngan rin’ ban’en ngom ni yugub thil ko girdi’? Dab mu rin’ ni arrogon.”​—Jer. 45:1-5, NW.

⁸ Yugu aram rogon nib gel e thin rok ngak Baruch, ma de ngongol Jehovah u fithik’ e damumuw ya u fithik’ e t’ufeg ni bod ba matam. Ba tamilang ni yugu aram rogon ni ke guy Jehovah ni ke ar’arnag Baruch boch ban’en ni bay e riya’ riy machane de kireb gum’irchaen. Ku manang Jehovah ni ke chugur ni nge thang yu Jerusalem nge yu Judah, ma dabun ni nge oloboch e ngiyal’ nem nib mo’maw’ e par riy. Ere, puguran Got ngak ni bayi “fek e riya’ nga daken gubin e girdi’” ni bochan e nge yog ni thil e ngongol ko tapigpig rok, miki yog ngak nfaanra ngongol u fithik’ e gonop ma rayog ni nge magey nib fos. (Jer. 45:5) I gaar Got ngak: ‘Baruch, dab mu pagtalin e n’en bayi buch. Dab mu pagtalin e n’en bayi buch rok piyu Judah nge yu Jerusalem ni tadenen. Mpar ni gab yul’yul’ ya nge dab mum’! Gu ra yoror rom.’ Dabisiy ni taw e thin rok Jehovah nga gum’irchaen Baruch ni bochan e fol ko n’en nnog ngak me magey nib fos u nap’an nni gothey yu Jerusalem 17 e duw nga tomren.

9. Uw rogon ni gara fulweg fapi deer ni kan weliy u lan e paragraph?

⁹ Nap’an ni ga be lemnag fare chep ni murung’agen Baruch, mag lemnag fapi deer nge thin nu Bible ni gaar: Rogon ni ngongol Jehovah ngak Baruch e mange be dag u murung’agen nge rogon e lem rok ngak e pi tapigpig rok? (Mu beeg e Hebrews 12:9.) Mange rayog nda filed ko fonow rok Got ngak Baruch nge n’en ni rin’ Baruch ni bay rogon ko ngiyal’ ney ni gad be par riy? (Mu beeg e Luke 21:34-36.) Uw rogon ni nge folwok e piin piilal ni Kristiano ku Jeremiah ngar lemnaged e pi tapigpig rok Jehovah nrogon ni ma lemnagrad Jehovah?​—Mu beeg e Galatia 6:1.

Ke Folwok e En Fak ko T’ufeg Rok e Chitamangin

10. Mang fan rayog rok Jesus ni nge rin’ e maruwel rok ni ir Lolugen e ulung ni Kristiano?

¹⁰ U m’on ko ngiyal’ ni immoy e Kristiano riy, me m’ug e t’ufeg rok Jehovah ngak e girdi’ rok u daken e pi profet nge boch e pi tapigpig rok nib yul’yul’. Ma ngiyal’ ney e ma m’ug u daken e en Lolugen e ulung ko Kristiano ni aram, Jesus Kristus. (Efe. 1:22, 23) Kan weliy rogon Jesus u lan fare babyor ni Revelation nib fak e saf ni bay “medlip i lan mit, ni ereram fa medlip i kan rok Got nnol’ograd nga gubin yang u fayleng.” (Rev. 5:6) Arrogon, rib gel e tamilangan’ rok Jesus ni bochan ni kan ni thothup rok Got e ke ayuweg. Ku manang e n’en ni bay u gum’irchadad, ma manang gubin ban’en ni ma buch.

11. Mange maruwel rok Kristus, ma ngongol rok ngodad e be dag e mang ko ngongol rok e Chitamangin?

¹¹ Machane, ku taareb rogon Jesus ngak Jehovah, gathi ba polis ni ke par u tharmiy be yaliyey. Reb e liw rok ni “Chitamangiy ni Manemus,” e be puguran ngodad e n’en nra rin’ u nap’an nra pi’ e yafas ndariy n’umngin nap’an ngak e piin ra michan’rad ngak. (Isa. 9:6) Maku, bochan ni ir Lolugen e ulung ni Kristiano, ma rayog ni nge k’aring e piin piilal u lan e ulung ni kar ilalgad ko tirok Got ni ngar pied e fonow mar fal’eged laniyan’ e piin ni ke t’uf e ayuw rorad.​—1 Thess. 5:14; 2 Tim. 4:1, 2.

12. (a) Mange be dag fa yungi babyor ni yan ngak e pi ulung u Asia Minor u rarogon Jesus? (b) Uw rogon ma ngongol rok e piin piilal ngak e pi tapigpig rok Got e be dag e ngongol rok Kristus ngorad?

¹² Rogon feni ma lemnag Kristus e pi tapigpig rok Got e ke m’ug u daken e babyor ni yan ko fa medlip i ulung nu Asia Minor. (Rev. 2:1–3:22) U lan e pi babyor nem me yog Jesus ni manang e n’en ni be buch u lan e pi ulung nem nge rogon feni be lemnag pi gachalpen. Machane ri kub gel rogon ere n’ey e ngiyal’ ney ni bochan e fapi n’en ni kan yoloy nga Revelation ni ke lebug u nap’an e “chirofen ni Rran rok Somol.”a (Rev. 1:10) T’ufeg rok Kristus e ba ga’ ni ma m’ug u daken e piin piilal ni yad e pi tachugol saf u lan e ulung. Rayog ni nge k’aring e pi ‘tow’ath ni girdi’’ ney ni ngar pied e athamgil nga lanin’uy nge fonow ko ngiyal’ nib t’uf riy. (Efe. 4:8; Acts 20:28; mu beeg e Isaiah 32:1, 2.) Ga ma sap nga gelngin e athamgil ni yad ma tay ni pow ko lem ni ma tay Kristus ngom, fa?

Ma Pi’ e Ayuw ko Ngiyal’ nib T’uf Riy

13-15. Uw rogon nra mel’eg Got ni nge fulweg taban e meybil rodad? Mu weliy boch e kanawo’.

¹³ Ka immoy ba ngiyal’ ni kam yibilay e ayuw min fulweg taban u daken reb e walag ni Kristiano? (Jas. 5:14-16) Fa kan pi’ e ayuw ngom u daken reb e welthin ko pi muulung ko Kristiano ara pi babyor ni gad ma beeg. Ba ga’ ni aray rogon ni ma fulweg Jehovah taban e meybil rodad. Bod ni, tomren ni pi’ reb e piilal ba welthin meb i non reb e walag nib pin ngak ni bochan e bay e magawon rok in e wik ni ke yan nib puluw ko n’en ni kan weliy ko fare welthin. I pining e magar ngak ko n’en ni ke weliy ko fare welthin ni ke yibnag e athamgil nga laniyan’ ma de non non ni bochan e magawon rok. Ba puluw ko magawon rok ma kari fal’eg laniyan’! Kari yib e felfelan’ ngak ni bochan e ke un ko muulung e rorran nem!

¹⁴ Mu lemnag e n’en ni buch rok dalip i pumoon u kalbus nra nanged e tin riyul’ u Bible u nap’an ni yad ba kalbus ngemu’ mar manged boch e tamachib. Bochan e cham ma boor ban’en nni taleg rok e kalbus. Ma aram me tabab e togopuluw. I dugliy gubin e kalbus ni tomren e abich ni kadbul, ma dab kur fulweged e plet rorad. Thingari dugliy fa dalip i tamachib ndawor ra uned ko taufe ban’en. Faan yad ra un ko wagey ma aram e kar th’abed e motochiyel rok Jehovah ni bay ko Roma 13:1. Ma faanra dab ra uned ko wagey, ma ra chel e tin ka bay e kalbus ngar gafgowniged yad.

¹⁵ Ere meybil e dalip i pumoon ney ni yad be ning e ayuw ni bochan e dabiyog ni ngar nonad ngorad. Faani bin migid e rran mar nanged ni kar dugliyed taab n’en​—ni aram e dab ra uned ko abich ni kakadbul. Nap’an ni yib e piin ni yad ma matanagiy e kalbus ni ngar feked e plet, ma dariy e plet ni nge pi’ fa dalip i pumoon ngorad. Kar ra felfelan’gad ni bochan e ba chugur e en ni ma “fulweg taban e meybil” ngorad!​—Ps. 65:2.

Ngan Sap ko Gabul nge Langlath u Fithik’ e Pagan’

16. Uw rogon ni be m’ug rogon feni ma lemnag Jehovah e piin yad bod e saf u daken fare maruwel ni machib?

¹⁶ Fare maruwel ni machib e ku reb e mich riy ni be lemnag Jehovah e piin ni yad ba yul’yul’, ndemtrug e gin ni yad ma par riy. (Gen. 18:25) Ba ga’ ni ma fanay Jehovah e pi engel rok ni ngar pow’iyed e pi tapigpig rok ko piin ni yad bod e saf ni mus nfaanra be par e pi girdi’ ney u bang ndawori taw fare thin nib fel’ ngay. (Rev. 14:6, 7) Bod ni fanay Got e engel ni nge pow’iy Filip, nreb e tamachib ko bin som’on e chibog, nge yan i gay reb e tayugang’ nu Ethiopia nge weliy fan e thin nu Bible ngak. Mang angin nib riy? I motoyil fare moon ko fare thin nib fel’ me un ko taufe nge mang reb i gachalpen Jesus.b​—John 10:14; Acts 8:26-39.

17. Mang fan ndabi magafan’dad ko tin bay ko gabul nge langlath nge pag rogon?

¹⁷ Nap’an ni be chugur i yib e ngiyal’ nra mus e re m’ag ney riy, ma ra ulul “e amith ni ma yib ngak be’ ni nge gargel” nrogon ni kan yiiynag nra buch. (Matt. 24:8) Bod ni, be tolang puluwon e ggan ni bochan e be yoor i yoor e girdi’ u fayleng i yan nge yafang ni be kireb nge magawon ko salpiy. Ra mo’maw’ ni ngan pirieg e maruwel, ma girdien e maruwel e ra t’uf ni ngar maruwelgad u lan boor e awa. Demtrug e n’en nra buch, ma gubin e piin ni yad ra par nib m’on u wan’rad e pigpig rorad ku Jehovah mab ‘mom e sap rorad’ ara yad be tedan’rad nga taa ban’en e de t’uf ni nge magafan’rad. Yad manang ni yad ba t’uf rok Got ma ra ayuwegrad. (Matt. 6:22-34) Mu lemnag rogon ni ke pi’ Jehovah e tin nib t’uf rok Jeremiah ko tin tomren e rran ko m’ag rok yu Jerusalem ko duw ni 607 B.C.E.

18. Uw rogon ni ke dag Jehovah nib t’uf Jeremiah rok u nap’an nni kol yu Jerusalem?

¹⁸ Tomren ni kol piyu Babylon yu Jerusalem, mi nin’ Jeremiah nga kalbus u lan e Yoror u tafen e Pilung. Uw e nge fek e ggan ni nge kay riy? Ya faanra de kalbus, ma rayog ni nge gay ban’en ni nge kay. Machane ke taga’ ngak e piin ni ur med u rom, ni yooren i yad e dubrad daken! Machane, ke pagan’ Jeremiah ngak Got ni aram e en ni ke micheg ngak nra ayuweg ma gathi girdi’. Gur i rin’ Jehovah e n’en ni ke yog? Arrogon! I guy rogon ni gubin e rran ma bay “ba yal’ e flowa ni ka ni pi’ ngak . . . nge yan i mada’ ko ngiyal’ ni ke m’ay urngin e flowa ni bay u lan fare binaw.” (Jer. 37:21) De yim’ Jeremiah nge Baruch nge Ebedmelek nge ku boch e girdi’ ko ngiyal’ nem nnap’an e uyungol nge m’ar nge yam’.​—Jer. 38:2; 39:15-18.

19. Mange susuna ngad dugliyed ni ngad rin’ed e chiney i yan nga m’on?

¹⁹ Arrogon, ke yiluy Jehovah e changar rok ngak e “piin ni yad mmat’aw ma gubin ngiyal’ ni ma rung’ag e meybil rodad.” (1 Pet. 3:12) Ga be felfelan’ ngay ni be yaliydad e en ni Chitamangiy u tharmiy, fa? Ga be par nib pagan’um ni bochan e ga manang ni be yaliyem Jehovah, fa? Ere, mu par nib mudugilan’um ni nguum marow Got u taabang ndemtrug e n’en nra buch boch nga m’on. Rayog ni nge pagan’dad ni gubin ngiyal’ ma ra i par Jehovah ni be yaliy e piin ni yad ba yul’yul’ ngak ni bod rogon ba matam.​—Ps. 32:8; mu beeg e Isaiah 41:13.

[Footnotes]

Rayog ni Ngam Weliy?

• Uw rogon ni ngad daged ni gad be ‘yan Got u taabang’?

• Uw rogon ni dag Jehovah e t’ufeg rok ngak Baruch?

• Uw rogon ni ma dag Jesus fel’ngin e Chitamangin, ni ir Lolugen e ulung ni Kristiano?

• Mang boch e kanawo’ nrayog ni ngad daged riy ni be pagan’dad ngak Got ko ngiyal’ ney nib mo’maw’ e par riy?

[Pictures on page 13]

Bod rogon e n’en ni rin’ Jeremiah ngak Baruch, piin piilal e ngiyal’ ney e yad ma dag rogon ni ma lemnagey Jehovah

[Picture on page 14]

Uw rogon nrayog ni nge pi’ Jehovah e ayuw ngodad ko ngiyal’ nib puluw ni nge pi’ riy?