Dabmu Rus Ni Bod Jeremiah

“Mu pagan’um ngak Jehovah; dabmu rus mu par nib mudugil lanin’um. Arrogon, mu pagan’um ngak Jehovah.”​—PSALM 27:14, NW.

1. Mang flaab e boor ni ke falfalan’nag e Pi Mich Rok Jehovah?

PI MICH ROK JEHOVAH e yad be par u paradis nib spiritual. (Isaiah 11:6-9) U lan e re fayleng ney nrib wagey, e yad bay ko gin ni bay pi walagrad ni Kristiano riy nib liyegrad ma kar falfalan’gad ko tirok Got ban’en, ma bay e gapas u thilrad Jehovah Got nge girdi’ ni be’ nge be’. (Psalm 29:11; Isaiah 54:13) Ma paradis rorad nib spiritual e be ga’ iyan. Urngin e girdi’ ni ‘yad be rin’ e tin nib m’agan’ Got ngay u polo’ e yafas rorad’ e kar ayuweged i ga’nag. (Efesus 6:6) Uw rogon? Kar pired ni yad be fol ko kenggin e motochiyel u Bible ma yad be fil ngak boch e girdi’ ni ngar folgad riy, ma aram e yad be piningrad ni ngar uned ko flaab nib ga’ ni bay ko re paradis nem.​—Matthew 28:19, 20; John 15:8.

2, 3. Mang e thingari kadan’ e tin riyul’ e Kristiano riy?

² Machane, yugu aram rogon ni gad be par ko paradis nib spiritual ma gathi be yip’ fan ni dabki yib e skeng ngodad. Ku daworda flontgad e re ka ma yib ngodad e gafgow nbochan e m’ar, nge pillibthir, ma tomur riy e yam’. Maku, gad be guy ni be lebug e pi yiiy ni murung’agen e “tin tomren e rran.” (2 Timothy 3:1) Mahl, nge oloboch, nge m’ar, nge gafgow ko ggan, nge boch e magawon nib gel ni be gafgownag urngin e girdi’, nib muun ngay e Pi Mich Rok Jehovah.​—Mark 13:3-10; Luke 21:10, 11.

³ Tin ni kub muun ngay, e ri gad manang ni yugu demtrug rogon e pagan’ ko fare paradis rodad nib spiritual ma ku rayog nge togopuluw ngodad nib gel e piin ni gathi bang riy. I ginang Jesus pi gachalpen ni gaar: “Bochan ni gathi gimed bang ko fayleng, ma kug mel’egmed, ma arfan ni ke fanenikaymed e girdi’ nu fayleng. Mu ted fanmed i yan ko n’en ni ku gog ngomed, En ni sib e gathi kabga’ ko masta rok. Faanra kar gafgowniged gag, ma bay kur gafgowniged gimed.” (John 15:18-21, NW) Maku aram rogon e ngiyal’ ney. Oren e girdi’ e baga’ ni dawora nanged fan ara dar ted fan e liyor rodad. Boch e girdi’ e ma gathibthibnagdad, ma ma moningnagdad, ara ku​—arrogon ni i ginangey Jesus—​yira fanenikaydad. (Matthew 10:22) Baga’ ni, yima wereg i yan e thin nde riyul’ mab kireb ni ba togopuluw ngodad u daken e news. (Psalm 109:1-3) Arrogon, gad gubin e ma yib ngodad e magawon nib mo’maw’, ma boch i gadad e ke tabab ni nge war e michan’ rok. Uw rogon ma rayog ni ngada kadedan’dad riy?

4. U uw e ngad gayed e ayuw riy ma rayog ni ngad kadedan’dad?

⁴ Ra ayuwegdad Jehovah. Fare psalmist ni kan thagthagnag ngak e ke yoloy ni gaar: “En nib mat’aw e boor e gafgow ni ma yib ngak, machane i Somol e ma chuweg u fithik’ ni gubin.” (Psalm 34:19; 1 Korinth 10:13) Boor i gadad e rayog ni nge micheg nfaanra ngarda pagedan’dad ngak Jehovah, me pi’ gelngidad ni ngad kadan’dad ko urngin e magawon. T’ufeg rodad ni fan ngak nge fare felfelan’ ni kan ta’ nga p’eowchedad e ra ayuwegdad ni dabi mulan’dad ma dabda rusgad. (Hebrews 12:2) Ma, nap’an ni ra yib e magawon, ma ra par nib mudugil lanin’dad.

Thin Rok Got e Ke Gelnag Jeremiah

5, 6. (a) Mang e tin nib fel’ ni ngan fol riy ni bay rodad u murung’agen e piin ni liyor rorad e ba riyul’ ma yad ma kadan’rad? (b) Mang e rin’ Jeremiah ko ngiyal’ ni kan pining ni nge mang reb e profet?

⁵ N’umngin nap’an chepin e girdi’, ma pi tapigpig rok Jehovah nib yul’yul’ e keb e felfelan’ ngorad nyugu aram rogon ni keb e magawon ngorad nib mo’maw’. Boch i yad e kar pared u nap’an e pufthin ko ngiyal’ ni ke dag Jehovah e damumuw rok ngak e piin nde yul’yul’. Boch ko picha’ nem nib yul’yul’ e Jeremiah nge boch e girdi’ ko re ngiyal’ nem, ma kub muun ngay fapi Kristiano ko bin som’mon e chibog. Tin ka ra rin’ed nib fel’ ni ngan fol riy e kan yoloy nga Bible ni fan ni nge pi’ e athamgil nga lanin’dad, ma boor ban’en ni gad ra fil riy ni ra ngad bieged. (Roma 15:4) Mu lemnag Jeremiah.

⁶ Nap’an ni kab pagal Jeremiah, min pining ni nge pigpig ni ba profet u Judah. De mom e re maruwel nem. Boor e girdi’ u rom ni ma liyor ko got ni googsur. Yugu aram rogon ni i par Josiah nib yul’yul’, ni ir e pilung ko ngiyal’ ni tabab Jeremiah ko machib, ma urngin e pilung ni yib nga tomuren e dar yul’yul’gad, ma oren e piin ni ke mil fan ngorad ni ngar filed ban’en ko girdi’​—ni aram e pi profet nge prist—​e dar ma uned ko tin riyul’. (Jeremiah 1:1, 2; 6:13; 23:11) Ere, uw rogon u wan’ Jeremiah u nap’an ni ke pining Jehovah ni nge mang reb e profet? Ke rus! (Jeremiah 1:8, 17) I yib ngan’ Jeremiah e n’en ni rin’ ko som’mon me gaar: “Ma aram me lungug, ‘Somol ni Got, da gu nang rogon e welthin; ya kayigi gel fanag bitir.’”​—Jeremiah 1:6.

7. Mang e ke rin’ e girdi’ ni ke mada’nag Jeremiah ko binaw ni ma machib riy, ma mang e ke rin’?

⁷ Girdi’ ko binaw ni ma machib Jeremiah riy e baga’ ni daburad, ma ri ma yib e togopuluw ngak nib gel. Ba biyay ni Pashhur, ni reb e prist, e toy Jeremiah me ta’ nga lan fare stock. I weliy Jeremiah e n’en ni i lemnag ko ngiyal’ nem ni gaar: “Machane faanra lungug u wan’ug, Dab kug lemnag Somol [Jehovah] ma dab kug weliy fithingan ngak e girdi’.’” Sana yu ngiyal’ ma ga ma lemnag ni aram rogon​—ni kam adag ni ngam tal. Mu gu’ ko mang e n’en ni ke ayuweg Jeremiah ni nge kadan’. I yog ni gaar: “Mi i gak’ e thin rom [thin rok Got] ni bod ba nifiy u fithik’ i lanin’ug ngu fithik’ e yil rog ni dabiyog ni nge chuw. Me ngochngochan’ug ni kug tay rog ndagur yog mu gu par ndabkiyog ni nge dab gog.” (Jeremiah 20:9) Ireray e n’en ni ma rin’ e thin rok Got ngom, fa?

Piin nib Chag Ngak Jeremiah

8, 9. (a) Mang ngongol nde fel’ ni dag Urijah ni reb e profet, ma mang angin? (b) Mang fan ni ke mulan’ Baruch, ma uw rogon ni kan ayuweg?

⁸ Jeremiah e gathi goo ir e be rin’ e maruwel rok ni ba profet. Immoy boch e girdi’ nib chag ngak, ma baga’ ni kar pied e athamgil nga laniyan’. Machane, yu ngiyal’, ma piin nib chag ngak e dar rin’ed ban’en u fithik’ e gonop. Ni bod ni baaray, yugu reb e profet ni Urijah fithingan e ke yoor pa’ u puluwon ni be ginang yu Jerusalem nge yu Judah “ni bod urngin fapi thin ni yog Jeremiah.” Machane, nap’an ni i motochiyelnag Jehoiakim ni pilung ni ngan li’ Urijah ngem’, me rus fare profet me mil nga Egypt. N’en ni i rin’ e de ayuweg e yafas rok. Girdi’ ko pilung e kar lo’lo’ged, mi yad kol, kar sulweged nga Jerusalem biyay, ma kar lied ngem’ u rom. Baga’ ni kari gin Jeremiah ngay!​—Jeremiah 26:20-23.

⁹ Ma bagayad e piin ma chag ngak Jeremiah e faen ni tayol rok, i Baruch. Rib gel e ayuw ni ma pi’ ngak Jeremiah, machane ba’ bayay ni ku ke war e changar rok ko tirok Got ban’en. Me tabab ko gun’gun’, ni gaar: “Kug gafgow e chiney, ya bochan ke puthuy Jehovah e kireban’ ko amith rog! Kug war ma gu be gel’gel’, ma dariy bang ni kug pireg nrayog ni nggu toffan ngay.” Bochan ni ke mulan’ Baruch, me tabab i lemnag ni dariy fan e tirok Got ban’en. Yugu aram rogon, me pi’ Jehovah e fonow nib gonop ngak Baruch u fithik’ e gol, min yal’uweg. Min micheg ngak nra magay nib fas u nap’an ni yira gothey Jerusalem. (Jeremiah 45:1-5, NW) Rib mudugil ni kari felfelan’ Jeremiah u nap’an ni kan sulweg Baruch nga rogon!

Ma Ayuweg Jehovah e Profet Rok

10. Mang boch e ayuw ni ke micheg Jehovah ngak Jeremiah?

¹⁰ N’en nrib ga’ fan, e de pag Jehovah Jeremiah. Manang ko mang e be lemnag e profet rok me pi’ gelngin nge tin nib t’uf rok. Ni baaray rogon, nap’an ni kefin ni tabab Jeremiah ko machib me yog ni ke maruwaran’ u murung’agen e salap rok, me yog Jehovah ngak ni gaar: “Dabmu tamdag nga owcherad, ya ‘gu bay rom ni nggu ayuwegem’, e yog Jehovah ni aram rogon.” Ngemu’, tomren ni weliy ngak e profet rok murung’agen e maruwel ni kan pi’ ngak, me yog Jehovah ni gaar: “Rib mudugil ni ngar chamgad ngom, machane dabra gelgad ngom, ya ‘gu bay rom ni nggu ayuwegem’” ireray e n’en ni yog Jehovah. (Jeremiah 1:8, 19, NW) Thin ni ri ma fal’eg lanin’uy! Ma ke riyul’nag Jehovah e thin rok.

11. Uw rogon ni gad ra nang ni ke lebuguy Jehovah e tin ni ke micheg nra ayuweg Jeremiah?

¹¹ Ma aram, e tomren ni kan kalbusnag kan ta’ ko stocks me yib e girdi’ ngaur moningnaged, me yog Jeremiah u fithik’ e pagan’ ni gaar: “Ba’ Jehovah u ba’ rog nrib gel gelngin. Aram fan ni piin be togopuluw ngog e yad ra dol’ ma dabra gelgad. Ma riyul’ ni yad ra tamra’ nib gel.” (Jeremiah 20:11, NW) Tomren ni yan boch e duw u nap’an ni kan guy rogon ni ngan li’ Jeremiah ngem’, me i par Jehovah rok, ma ke magey Jeremiah nib fas u nap’an ni kan gothey Jerusalem me mang be’ nib pufrogon ni bod Baruch, ma piin kar togopuluwgad ngak nge piin kar dariyfannaged e thin kan wereg ni be ginangrad e boch i yad e kar m’ad ma boch i yad e kan fekrad nga Babylon u fithik’ e towasar.

12. Yugu aram rogon ni bay boch i fan ni nge mulan’dad, ma mang e thingar uda lemnaged?

¹² Ngiyal’ ney, ma boor e Pi Mich Rok Jehovah e kar gafgowgad ni bod Jeremiah. Ni bod ni kan weliy kafram boch, boch e gafgow e sum nbochan ni gadad e girdi’ ni daworda flontgad, ma boch e ke sum nbochan ni ke wagey e re fayleng ney, maku reb e bochan e piin ni be togopuluw ko maruwel rodad. Gafgow ni aram rogon e rayog ni nge mulan’uy riy. Ni bod Jeremiah, e ku rayog ni nge maruwaran’dad ko rayog ni ngada ululgad ko pigpig ku Got fa danga’. Tin riyul’ riy, bay ba ngiyal’ nrayog ni nge mulan’dad. Lem ni ke war e ran skengnag ngan nang feni gel e t’ufeg rodad ni fan ku Jehovah. Ere susun ni nge mudugil lanin’dad ni dabda paged e lem rodad ni ke war nge k’aringdad ngad pied keru’dad ko pigpig ku Jehovah ni bod ni rin’ Urijah. N’en ni ngada rin’ed, e ngada folwokgad rok Jeremiah ma ngada pagedan’dad nra ayuwegdad Jehovah.

Uw Rogon ni Ngan Togopuluw ko Lem ni Ke War

13. Uw rogon me yog ni ngau da folgad ko tin ni i rin’ Jeremiah nge David?

¹³ Ma non Jeremiah ngak Jehovah Got ni gubin ngiyal’, ni be yog ko mang e be thamiy u fithik’ ma ma ning gelngin. Ireray e n’en nib fel’ ni ngan fol riy. David ni immoy kakrom, e ki ning e ayuw ngak e cha’ nem ni Ir e Yib gelngiy Rok, i yoloy ni gaar: “Mu motoyil ko thin rog, O Jehovah; mu nang fan e gel’gel’ ni gu be ta’. Mu motoyil ngog ni gu be ning e ayuw ngom, ni gur e Pilung rog nge Got rog, ya gur e gu be meybil ngom.” (Psalm 5:1, 2, NW) Thin ni kan thagthagnag ni be weliy murung’agen e yafas rok David e be dag ni ke fulweg Jehovah taban e meybil rok David ni biyay nge biyay ni be ning e ayuw. (Psalm 18:1, 2; 21:1-5) Maku, nap’an ni keb e magawon nib mo’maw’ ni ngan kadan’uy riy ara magawon rodad e gowa mo’maw’ ni ngan pithig, ma rib fel’ ni ngad meybilgad ngak Jehovah ma ngad weliyed laniyan’dad ngak. (Filippi 4:6, 7; 1 Thessalonika 5:16-18) Jehovah e dabi siyeg ni nge dabi motoyil ngodad. Tin ni rin’, e ke micheg ngodad ni ‘be lemnag rogodad.’ (1 Peter 5:6, 7) Machane, de puluw ni ngan meybil ku Jehovah ma dab ni motoyil ko n’en ni ke yog, fa?

14. Mang e ke rin’ e thin rok Jehovah ngak Jeremiah?

¹⁴ Uw rogon ni ma non Jehovah ngodad? Mu lemnag Jeremiah biyay. Bochan ni Jeremiah e reb e profet, ma non Jehovah u puluwon ngak. I weliy Jeremiah e n’en ni rin’ e thin rok Got nga gum’irchaen ni gaar: “Kan pirieg e thin rom, ma ke mang ggan ngog; ma thin rom e ke felfelan’nag gum’irchaeg; ma yibe pining fithingam ngog, O Jehovah ni Got ko pi salthaw.” (Jeremiah 15:16, NW) Arrogon, ke felfelan’ Jeremiah ya yibe pining fithingan Got ngak, ma thin Rok e baga’ fan ngak fare profet. Arfan, ni ri baadag Jeremiah ni nge machibnag e thin ni kan pagfan ngak ni bod Paul ni apostal.​—Roma 1:15, 16.

15. Uw rogon ni ngad yunged e thin rok Jehovah nga lan gum’irchadad, ma mang e ngad lemnaged nra ayuwegdad ni nge mudugil lanin’dad ni dabda th’abed gulungdad?

¹⁵ Ngiyal’ ney e dabki non Jehovah u puluwon ngak e girdi’. Machane, bay e thin rok Got rodad u lan e Bible. Arfan ni, faanra gad ba yul’yul’ u rogon ni gad ma fil e Bible ma ri gad ma fal’eg i lemnag e n’en ni kad filed, ma ke aw ni thin rok Got e ra mang ban’en ni ku ra k’aring e “felfelan’” nga gum’irchadad. Ma gad ra felfelan’ ni gad be fek fithingan Jehovah u nap’an ni gad ra yan nga u dogned e pi thin ney ngak boch e girdi’. Dabda paged talin ni dariy yugu boch e girdi’ u fayleng e chiney ni yad be machibnag fithingan Jehovah. Kemus ni Pi Mich e yad be machibnag e thin nib fel’ ko Gil’ilungun Got ni ke m’ay i sunmiy ma yad ma fil ko piin nib sobut’an’rad ngar manged pi gachalpen Jesus Kristus. (Matthew 28:19, 20) Ri gad ba felfelan’! Bochan e n’en ni ke pag Jehovah fan ngodad u fithik’ e t’ufeg, ma u rogon ni ngad th’abed gulungdad?

Ngad Kol Ayuwgad ko Piin Gad Ma Chag

16, 17. Uw rogon u wan’ Jeremiah e chag ko girdi’, ma uw rogon ni rayog ni ngada folwokgad rok?

¹⁶ Maku ke weliy Jeremiah murung’agen ban’en ni i ayuweg ni nge dabi rus. I yog ni gaar: “Da gu par nga but’ ni nggu un ko girdi’ ko thin ni gosgos ni gu ba felfelan’. Ya bochan paam mu gu ma par nga but’ ni goo gag, ya bochan kam suguyeg ko fonow nib gel.” (Jeremiah 15:17, NW) Baadag Jeremiah ni nge par ni goo ir ko bin nge kireb pangin ni bochan e chag ko fager nib kireb. Ngiyal’ ney e ngad lemgad ni aram rogon. Dabda paged talin e thin rok Paul ni apostal ni be ginangdad ni gaar, “Nchag ngak e girdi’ nib kireb me kireb pangiy nib fel’,” ni mus ko pangidad nib fel’ ni immoy rodad u lan boor e duw.​—1 Korinth 15:33.

¹⁷ Bochan e chag nib kireb ma rayog ni nge yib alitnag e lem ko fayleng laniyan’dad. (1 Korinth 2:12; Efesus 2:2; James 4:4) Ere, ngada ayuweged gelngin lanin’dad ma rayog ni nge nang ko mang e chag nib kireb ma ngada paloggad riy ni polo’. (Hebrews 5:14) Faan manga ka ba’ Paul nib fas u fayleng e chiney, mang e ga be lemnag ni ra yog ngak reb e Kristiano ni ke guy e kachido ko darngal nge maangach nge gosgos ndariy e runguy riy? Uw rogon ni nge fonownag reb e walag ni be m’ag fager ngak e piin denangrad ko Internet? Susun uw rogon u wan’ reb e Kristiano ni ma fanay boor e awa ni be fafel ko video games ara ma yaliy e television machane dariy e yaram rok nib fel’ ko fol babyor?​—2 Korinth 6:14b; Efesus 5:3-5, 15, 16.

U Mu Par ko fare Paradis nib Spiritual

18. Mang e ra ayuwegdad ma rayog ni ngada pared ni gadad ba gel ko tirok Got?

¹⁸ Ri gad be tay fan fare paradis rodad nib spiritual. Ri dariy ban’en u fayleng e chiney ni taareb rogon ngay. Musko girdi’ ni de michan’rad ma yad ma weliy murung’agen feni fel’ e t’ufeg riy, nge ngaun lemnag be’, nge gol ni ma dag e piin Kristiano ngorad. (Efesus 4:31, 32) Yugu aram rogon, ma chiney ni de bod kafram mab t’uf ni ngad chamgad ngay ni dabi mulan’dad. Chag ko piin ba fel’, nge meybil, nge ngan mecham ko fol babyor nib fel’ rogon e ra ayuwegdad ma gad par nib gel e michan’ rodad. Pi n’en ney e ra gelnagdad ni gad ra mada’nag e skeng ni yugu demtrug ma rib pagan’dad ngak Jehovah.​—2 Korinth 4:7, 8.

19, 20. (a) Mang e ra ayuwegdad ma rayog ni ngaud kadedan’dad? (b) Bin migid e article e ba puluw ngak mini’, ma ku mini’ e ra adag?

¹⁹ Ri dabda rusgad ngad paged e michan’ rodad nbochan e thin ni ma yog e piin ni be fanenikay e thin nu Bible ni gad ma yog. Ni bod fapi toogor ni ur gafgownaged Jeremiah, ma piin ni yad be cham ngodad e yad be cham ngak Got. Dabra gelgad ngodad. Jehovah, ni en ni kab gel ko pi toogor rodad e be yog ngodad ni gaar: “Mu pagan’um ngak Somol! Nge michan’um ngak, dabi mulan’um. Mu pagan’um ngak Somol.” (Psalm 27:14) Bochan ni be pagan’dad ngak Jehovah ni kari taw nga gum’ircha’dad, ma gomanga yigi mudugil lanin’dad ndabda talgad ni nguuda rin’ed e tin nib fel’. Yibe athapeg ni ngari gel e pagan’ rodad, ni bod Jeremiah nge Baruch, ma gad t’ar wom’engin nfaanra dabi chalbadad.​—Galatia 6:9.

²⁰ Ra ngan athamgil ni nge dabni mulan’uy e aram ban’en ni ma athamgiliy boor e Kristiano. Machane, piin fel’ yangaren e yad be mada’nag e magawon nrib thil. Machane ku bay ban’en nib ga’ ni kan bing ngorad. Bin migid e article e kan ngongliy nib puluw ko piin fel’ yangaren ni bay u fithik’dad. Maku baadag e piin gallabthir nge urngin e Kristiano u lan e ulung ni kar ilalgad ni kar ognaged yad, ni rogon e thin, nge ngongol, ngu daken e ayuw rorad e bay rogon nrayog rorad ni ngar ayuweged e piin ni fel’ yangaren u lan e ulung.

Uw Rogon ni Ngam Pi’ e Fulweg?

• Mang fan nrayog ni ngeb ngodad boch ban’en ni ma mulan’nagey, ma mini’ e gad ra ning e ayuw ngak?

• Uw rogon ni ke gel Jeremiah ko kireban’ ni keb ngak ni yugu demtrug feni mo’maw’ e maruwel ni kan pi’ ngak?

• Mang e ra ‘felfelan’nag’ gum’irchadad nyugu aram rogon ni gad bay u fithik’ e magawon?

[Picture on page 18]

I lemnag Jeremiah ni dabiyog ni nge mang reb e profet ya kab bitir ma dariy ban’en ni manang

[Picture on page 20]

Mus ko ngiyal’ ni yibe gafgownag Jeremiah, ma manang ni bay Jehovah rok ni “en ni rib gel gelngin”