De Tal Jeremiah i Weliy Murung’agen Jehovah

Bay yu ngiyal’ ni ma moningnagdad e girdi’ ara ra damumuwgad ngodad u nap’an ni gad ra weliy murung’agen Jehovah ngorad. Re n’ey e rayog ni nge k’aringdad ni ngad dabuyed ni ngad weliyed murung’agen Got. Bay ba ngiyal’ ni kam lem ni aram rogon, fa?​— Be weliy e Bible murung’agen reb e pagel nrib t’uf Jehovah rok, machane yan i taw nga ba ngiyal’ me chugur ni nge tal ndaki machibnag murung’agen Jehovah. Re pagel nem e Jeremiah. Ngad weliyed boch murung’agen.

Nap’an ni kab fel’ yangaren Jeremiah, me yog Jehovah ngak ni nge yog ko girdi’ ni ngar talgad i rin’ e tin nib kireb. Rib mo’maw’ ngak Jeremiah ni nge rin’ e re n’ey, ya i rus. I yog ngak Jehovah ni gaar: ‘Dagnang ko mang e nggog. Ya ku gub bitir.’ Machane, me yog Jehovah ngak ni gaar: ‘Dab mu rus. Ya gu ra ayuwegem.’

Ere, tabab Jeremiah ni nge yog ko girdi’ ni faanra dab ra thilyeged e ngongol rorad ma yira gechignagrad. Ga be lemnag ni ke motoyil e girdi’ ngak Jeremiah, fa?​— Danga’, ya ur moningnaged mu ur damumuwgad ngak. Ku immoy boch i yad ni baadag ni nge li’ nge yim’! Ga be lemnag, ma mang e i lemnag Jeremiah?​— I rus me gaar: ‘Dab kug weliy murung’agen Jehovah.’ Machane, ga be lemnag ma rriyul’ ni tal?​— Danga’. De yag ni nge tal i weliy murung’agen Jehovah ni bochan e rib t’uf rok. Ma aram fan ni ayuweg Jehovah nde buch ban’en rok.

Bod ni immoy bayay ni chel boch e pumoon ni yad ba kireb ngar koled nga ron’ed nga lan ba luwed ni bay e bar riy. Dariy e ggan ni nge kay nge ran ni nge unum. Baadag e pi pumoon nem ni ngar digeyed Jeremiah u rom nge yim’. Machane, ke ayuweg Jehovah ni nge chuw u lan fare luwed!

Mang e rayog ni ngam fil rok Jeremiah?​— Yugu aram rogon ni immoy yu ngiyal’ ni i rus, machane de tal i weliy murung’agen Jehovah. Nap’an ni ga ra weliy murung’agen Jehovah, ma sana ra moningnagem e girdi’ ara ra damumuwgad ngom. Ere, rayog ni ngam tamra’ ara mu rus. Machane, dab mu tal i weliy murung’agen Jehovah. Ya gubin ngiyal’ nra ayuwegem ni bod rogon ni ayuweg Jeremiah.