Mabgol nge Ngan Mang Gallabthir ko Ngiyal’ Ney ko Tomur

“Daki yoor e tayim ni ke magey.”​—1 KOR. 7:29.

1. (a) Mang e pi n’en ni ke thil ma ke ‘mo’maw’nag e par’? (b) Mang fan ni bay rogon ngodad e thil ni be tay e tabinaw?

THIN rok Got ni ka nog u m’on e ra ‘taw ko tomur’ ma pow riy e mahl, nge durru’, nge uyungol, nge liliy nib machreg nima af. (Dan. 8:17, 19; Luke 21:10, 11) Bible e be puguran ni ngiyal’ ney nib ga’ fan u chepin e girdi’ e boor ban’en nra thil u rarogon e par ko girdi’. Ba muun ngay rarogon e tabinaw ‘ni ke mo’maw’ e par’ riy ko “tin tomren e rran.” (2 Tim. 3:1-4) Mang fan ni bay rogon ngodad e pi n’em nra thil? Ya bochan nib gel gelngin ni ke garer ma rayog ni k’aring e Kristiano e ngiyal’ ney u rogon ni yad be lemnag e mabgol nge ngan mang gallabthir. Ni uw rogon?   

2. Uw rogon u wan’ e girdi’ nu fayleng e mabgol nge ngan wer?

² Ngiyal’ ney, e kari mom ni be wer e mabgol, ma boch e nam e kari yoor e mabgol riy ni be wer. Yugu demtrug rogon, ma nge tamilang u wan’dad ni Jehovah e ba thil rogon nima lemnag e mabgol nga rogon ni ma lemnag e girdi’ u fayleng nib liyegdad. Ere, mang e be lemnag Jehovah ngay?

3. Uw rogon u wan’ Jehovah nge Jesus e mabgol?

³ Jehovah Got e be lemnag ni piin ni ke un ko mabgol e ngar pared ni yad ba yul’yul’ ko mabgol rorad ni kar micheged. Ya nap’an ni chagiy e bin nsom’on e pumoon nge ppin ni ngar mabgolgow me gaar Jehovah, ‘be’ nib moon . . . e nge yan i chag ngak e ppin rok, ngar pirew ni kar taab girdi’gow.’ I sul Jesus u daken ere bugithin nem ni gaar: “Ere thingari dabi dareg e girdi’ e gali cha’ ni Got e ke chagiyrow.” Ki yog Jesus ni gaar: “En nra chuweg leengin ni gathi ban’en ni ke par fare pin nge be’ ngki leengiy yugu reb e ppin, e aram e ke th’ab e motochiyel, ya kar pirew yugu reb e ppin ni gathi mabgol rok.” (Gen. 2:24; Matt. 19:3-6, 9) Ere, rogon nima lemnag Jehovah nge Jesus e mabgol e ngan m’ag ni n’umngin nap’an e yafas nge mada’ ko ngiyal’ nra yim’ bagayow. (1 Kor. 7:39) Bochan ni mabgol reb e yaram nib thothup, ere ngan wer e gathi ban’en nib mom ni ngan rin’. Bin nriyul’ riy, e be gaar e Thin rok Got, dabun Jehovah ni ngan wer nde puluw ko Bible.a​—Mu beeg e Malaki 2:13-16; 3:6.

Ngan Ayuweg e Mabgol

4. Mang fan ni ma kireban’ boch e fel’ yangaren ni Kristiano ni bochan e kar gurnaged e mabgol?

⁴ Re fayleng ney ni gad be par riy nib dar ku Got e ke sug ko ngongol ndarngal. Gubin e rran, ma gad ma mada’nag e tin ni be dag yaan e ngongol ndarngal. Dabiyog ni ngad feked owchedad u wenegan e pi ngongol ney, nib ga’ ni piin fel’ yangaren nib t’uf rodad u lan e ulung. Susun uw rogon e ngongol ko piin fel’ yangaren ni Kristiano ko pi n’ey ni ma kirebnigey ni ma pug e ar’ar rorad ko tin nib puwlag ni mus ko ngiyal’ ni yad be gay rogon ni ngar siyeged? Boch i yad e ke guy rogon ni nge un ko mabgol ndawori piilal ni bochan. Yad be rin’ ni aram rogon, ya ngar paloggad ko ngongol nde yalen. Machane boch i yad e ke kalngan’ ko n’en ni ke dugliy ni nge rin’. Mang fan? Ya nap’an ni ke n’uw boch nap’an ni kar uned ko mabgol, ma kar nanged nge piin mabgol rorad nde taareban’rad ko tin ni ma buch rorad u gubin e rran. Ere ba tamilang ni yu wu’ i mabgol ney e kar mada’naged boch e magawon nib ga’.

5. Mang e ra ayuweg ba wu’ e mabgol ngar pirew ni yow ba yul’yul’ ko n’en ni kar michegew ngorow u nap’an nra mabgolgow? (Kum guy e footnote.)

⁵ Ga ra leay be’​—ni mus nga reb e Kristiano—​nrib thil papangin nga rogon ni um lemnag ko som’on ma rib mo’maw’. (1 Kor. 7:28) Demtrug rogon feni mo’maw’ gubin ban’en, ma tin nriyul’ e Kristiano e yad manang ni nge wer e mabgol u rogon nde puluw ko Bible e gathi aram rogon ni ngan pithig e magawon ko mabgol. Ere, piin ni yad be athamgil ni ngar ayuweged e mabgol rorad ni bochan e dubrad ni ngar thilyeged e n’en ni kar micheged ko rorran nra mabgolgad riy e bay rogon ni ngan tayfarad me pi’ e ulung ko Kristiano e ayuw ngorad u fithik’ e t’ufeg.b

6. Susun uw rogon e mabgol u wan’ e pi Kristiano ni fel’ yangaren?

⁶ Ka gab pagal ndawor mu un ko mabgol, fa? Faanra arrogon, ma susun ni nge uw rogon u wan’um e mabgol? Rayog ndab mu pirieg boor e kireban’ nfaanra mu son ngam ilal boch, miki ilal e lem rom, nge rarogom ko tirok Got ban’en mfin mogew reb e Kristiano e mabgol. Riyul’, ya der yog e Bible yangarey ni ngan un ko mabgol.c Machane, Bible e be dag nib fel’ ni ngan son nge taw ko ngiyal’ ni ke thumur e ar’ar nib gel riy. (1 Kor. 7:36) Mang fan? Ya ar’ar nib gel e ma kirebnag rogon ni yima dugliy ban’en nib fel’ rogon ma rayog ni k’aringem ngam dugliy ban’en ndariy e gonop riy me tomur mag pirieg e kireban’ riy nib gel. Dab mu pagtalin ni fonow rok Jehovah u lan e Bible ni bay e gonop riy e fan ngom nge felfelan’ rom.​—Mu beeg e Isaiah 48:17, 18.

Ngan Ayuweg e Bitir nib Fel’ Rogon

7. Mang e ma mada’nag yu wu’ e mabgol ni kab gel e bitir rorad, ma mang fan nra magawonnag e mabgol e re n’ey?

⁷ Yu wu’ e mabgol e kar manged gallabthir ni kab gel e bitir rorad. Dawori yog ni ngar nangew farow nib fel’ rogon ma ke yog e bitir ngorow, nib t’uf ni ngar tewan’row ngak ni 24 e awa u reb e rran. Nap’an nra par ni goo fare tir e be tiyan’ fare matin ngak, ma ra i taliyeg e en figirngin. Maku, ra i kireb e chuchuw nnep’ mara sunmiy e magawon nge mochuch u thilin fagal mabgol. Yow ra nang ni ka yow bbitir ni gathi bod kafram nib puf rogorow. Chiney e daki puf rogorow ni nga ranow nga bang ngar rin’ew ban’en ni bod ni ur rin’ew kafram. Ere uw rogon ni ngar lemnagew rogorow ni ke thil?

8. Susun uw rogon ni ngan sap ko fare maruwel ni ngan mang gallabthir, ma mang fan?

⁸ Ngan mang gallabthir e ngan sap ngay nib maruwel mab tow’ath ni ke pi’ Got, ni taareb rogon ko mabgol nsusun e ngan ayuweg. Yugu demtrug e n’en nra thil u lan e yafas rok ba wu’ e mabgol ni bochan e kar fakayew e bitir, ma susuna ngar thilyegew boch ban’en ko yafas rorow. Bochan ni Jehovah e ke pi’ gelngin e girdi’ ni ngar fakayed e bitir, me ere ba t’uf ni nge lemnag e gallabthir ni fare tir e ba “tow’ath ni yib rok Somol.” (Ps. 127:3) Ba matin nge ba matam ni Kristiano e ngar athamgiliyew e maruwel ko ‘gallabthir nrogon girdien Kristus.’​—Efe. 6:1.

9. (a) Mang e ba muun ko chugol bitir? (b) Mang e rayog ni nge rin’ e en figirngiy nge yog ni ayuweg leengin nge par nib gel ko tirok Got ban’en?

⁹ Chugol bitir e ba muun ngay e pagfay. Ba t’uf ni ngan fanay boor e tayim nge gelngiy ni fan ko re n’ey. Reb i figirngiy ni Kristiano e thingari nang nrayog ndab i tiyan’ leengin u nap’an e muulung maku rayog nra buchuuw e tayim rok ko fol Bible me fal’eg i lemnag, in e duw nga tomren ni ke gargel. Re n’ey e rayog ni warnag ko tirok Got ban’en. Ra ngan chuguliy e bitir ma be dag nib t’uf ni nge rin’ e en ni figirngiy e tin nrayog rok nge pi’ e ayuw i chuguliy fare tir. Rayog ni guy rogon nge tiyan’ ko tin nde yog ni nang e en leengin u nap’an e muulung ngar weliyew u tabinaw. Maku rayog ni thil e ayuw rorow u rogon i ayuweg fare tir ya nge yog ni un leengin ko machib.​—Mu beeg e Filippi 2:3, 4.

10, 11. (a) Uw rogon ni ngan chuguliy e bitir ‘nrogon ni ma fonownigey Jehovah’? (b) Mang ni bay rogon ni ngan pining e magar ngak e pi gallabthir ni Kristiano?

¹⁰ Ngan ayuweg e bitir nib fel’ rogon e ba muun ngay boor ban’en, gathi kemus ni ngan pi’ ggan fare tir, nge mad rok, nge gin ni nge par riy, min ayuweg ko tin nib t’uf u rarogon e dowef rok. Ya ngiyal’ ney ko tin tomren e rran, e ba t’uf ko piin fel’ yangaren ni ngar filed boch e motochiyel nge pow’iyrad ko yafas rorad u nap’an ni ka yad bbitir. Ere bitir e susun ni ngan ‘chuguliyrad nrogon ni ma fonownigey Jehovah.’ (Efe. 6:4) Re ‘fonow’ ney e ba muun ngay ni ngan tay e lem rok Jehovah nga laniyan’ fare tir ni ka nap’an ni kabran nge ni mada’ ko ngiyal’ ni ke fel’ yangaren.​—2 Tim. 3:14, 15.

¹¹ Nap’an ni yog Jesus ngak pi gachalpen ni ‘ngar pingeged girdien e pi nam,’ ma be yip’ fan ni nge ayuweg e gallabthir pi fakrad ngar manged boch i gachalpen. (Matt. 28:19, 20) Ba mo’maw’ ere n’em nbochan e ba gel e towasar ni be tay e re fayleng ney ngak e piin fel’ yangaren. Ere gallabthir nib fel’ rogon ni kar chuguliyed pi fakrad kar manged Kristiano e rriyul’ ni bay rogon ni ngan pining e magar ngorad u lan e ulung. Kar ‘gelgad’ ko fayleng u daken e michan’ nge yul’yul’ rorad nga feni fel’ rogon ni kar chuguliyed fakrad.​—1 John 5:4.

Muchugbil ara Dariy e Bitir ni Fan ko Tin nib Ga’ Fan

12. Mang fan ni bay boch e Kristiano ni kar mel’eged ni ngar pired nib muchugbil u ba ngiyal’?

¹² Thin rok Got e be yog ngodad ni ngad lemnaged fel’ngin e muchugbil ni bochan e “daki yoor e tayim ni ke magey” ma ‘rarogon e re fayleng ney e be thil i yan.’ (1 Kor. 7:29-31) Ere, boch e Kristiano e kar mel’eged ni ngar pared nib muchugbil u nap’an e yafas rorad ara lan in e duw me munmun mar uned ko mabgol. Ffel’ ni gathi yad be par nib puf rogorad ni bochan e ngar nameged boch ban’en nra fel’ rogorad riy. Bochi yad e ke par nib muchugbil ni fan e nge pigpig ku Jehovah ‘nib puf rogon.’ (Mu beeg e 1 Korinth 7:32-35.) Boch e Kristiano nib muchugbil e be un ko machib ni polo’ e tayim rorad ara yad be un ko maruwel u Bethel. Boor i yad e ke guy rogon ni nge yoor e tayim ni nge fanay ni fan ko ulung rok Jehovah ma aram ma ke un ko Ministerial Training School. Riyul’ riy, e pi arorad nib muchugbil ni ke un ko machib ni polo’ e tayim u ba ngiyal’ me munmun me turguy ni nge un ko mabgol e kar guyed ni ka be yib angin ngorad e pi n’en ni kar filed u nap’an ni ka yad ba pagal.

13. Mang fan ni yu wu’ e mabgol ni Kristiano e yad ma dugliy ndab ra fakayed e bitir?

¹³ Yu yang u fayleng, e ba thil rarogon e tabinaw riy​—ya yu wu’ e mabgol e kar turguyed ndab ra fakayed e bitir. Boch e ma rin’ ni bochan e buchuuw e salpiy; ma boch e nge puf rogon ni fan ko maruwel nib tolang puluwon. U fithik’ e pi Kristiano, e bay yu wu’ e mabgol riy ni yad ma siyeg ni ngar fakayed e bitir. Machane, yad ma rin’ ni fan e nge dabi magawonnag e pigpig rorad ku Jehovah. Re n’ey e gathi be yip’ fan ni yugu ba thil rogon e mabgol rorad. Ya ku taareb rogon. Yugu aram rogon, ma ke bung rogorad ni ngar mon’eged fare Gil’ilungun nga boch e tow’ath ko mabgol. (1 Kor. 7:3-5) Boch ko yu wu’ i mabgol ney e yad ma pigpig ngak Jehovah nge pi walagrad ni yad e circuit ara district overseer maku boch i yad e ma maruwel u Bethel. Ma boch i yad e pioneer ara missionary. Dabi pagtalin Jehovah e maruwel rorad nge t’ufeg ni kar daged nga fithingan.​—Heb. 6:10.

‘Gafgow ni Be Pirieg e Piin Mabgol’

14, 15. Mang “gafgow ni be pirieg e piin ni mabgol” e rayog ni nge yib ko piin gallabthir ni Kristiano?

¹⁴ I yog apostal Paul ko pi Kristiano nra ur pirieged e “gafgow ni be pirieg e piin ni mabgol.” (1 Kor. 7:28) Re n’ey e rayog ni nge un ngay e m’ar ni keb ko fagali mabgol, ara pi fakrow, ara gallabthir rorow ni ke pilibthir. Kub muun ngay e magawon nge amith u lanin’uy nib peth nga rogon i chuguliy e bitir. Kan weliy u tabolngin e re article ney, ni ke yog e Bible ni “tin tomren e rran” e bayi ‘mo’maw’ e par.’ Boch ban’en ni ke mo’maw’nag e par e ba muun ngay e bitir ni ‘dakurur liyorgad ngak e gallabthir rorad.’​—2 Tim. 3:1-3.

¹⁵ Chugol bitir e reb e magawon nib ga’ ko pi gallabthir ni Kristiano. Dabiyog ni ngad siyeged ndabi magawonnagdad e pi n’en ni bay e chiney ni ke ‘mo’maw’ e par.’ Ere, gallabthir ni Kristiano e ngar chamgad nib togopuluw ko pi n’en ni be suruyey nga “kanawoen e kireb nu fayleng” nrayog ni nge magawonnag pi fakrad. (Efe. 2:2, 3) Ma re cham ney e gathi gubin ngiyal’ ni gad ra gel ngay! Faanra tal reb i fak ba tabinaw ni Kristiano ko pigpig ngak Jehovah, ma rriyul’ ni aram e “gafgow” ngak fagal labthir ni yow be guy rogon ni ngar chuguliyew e bitir rorow ko tin riyul’.​—Prov. 17:25.

‘Bay Yib fare Gafgow nib Ga’’

16. Mang “gafgow” e yiiynag Jesus murung’agen?

¹⁶ Gubin e “gafgow” ni yira mada’nag u lan e mabgol ngu nap’an e chugol bitir, e ka bay reb e gafgow nib gel e ga’ riy ngay. I yiiynag Jesus murung’agen e ngiyal’ ni bay riy nge ngiyal’ ni tomren ere m’ag ney, ni gaar: “Ya gafgow ko re ngiyal’ nem e ri kab mal’af ni kab gel e gafgow riy nga reb e gafgow ni kaa yib, ni ka nap’an ni sum e fayleng nge mada’ ko bin daba’ e rran, fa ki yib reb e gafgow ntaareb rogon ngay.” (Matt. 24:3, 21) Tomur riy me dag Jesus ni bay reb e ulung nib ga’ nra magey nib fos ko re “gafgow” nib ga’ nem. Machane, m’ag rok Satan e ra ulul ko cham nib togopuluw ko Pi Mich Rok Jehovah ni yad ba gapas. Dariy e maruwar riy, nra mo’maw’ ngodad e ngiyal’ nem​—ntaareb rogon e piilal nge bitir.

17. (a) Mang fan nrayog ni ngad sapgad boch nga m’on u fithik’ e pagan’? (b) Mang e ra rin’ ban’en nga rogon ni gad ma sap ko mabgol nge ngan fakay e bitir?

¹⁷ Yugu aram rogon, ma dab da rusgad nge pag rogon ko tin bay yib gabul nge langlath. Gallabthir nib yul’yul’ ku Jehovah e rayog ni ngar athapeged ni yira ayuwegrad nge pi fakrad. (Mu beeg e Isaiah 26:20, 21; Zef. 2:2, 3; 1 Kor. 7:14) Ere, chiney ni ke mo’maw’ e par e manga yigi par lanin’dad nib mudugil u murung’agen e mabgol nge ngan mang gallabthir e chiney ko tomur. (2 Pet. 3:10-13) Ra aram rogon,​—ma rayog ni nga doged e sorok ngak Jehovah nge fare ulung ni Kristiano—​ni yugu demtrug ko gad ba muchugbil ara kad mabgolgad, ni ba’ ara dariy e bitir rodad.

[Footnotes]

Ngan Sul nga Daken

• Mang fan ndabi gurnag e pi Kristiano ni fel’ yangaren e mabgol?

• Mang e ba muun ko chugol bitir?

• Mang fan ni boor e Kristiano ni ke par nib muchugbil ma faanra mabgol, ma dabi fakay e bitir?

• Mang “gafgow” e rayog ni pirieg e gallabthir ni Kristiano?

[Picture on page 21]

Mang fan nib gonop e pi Kristiano ni fel’ yangaren nfaanra dabra gurgad ngar uned ko mabgol?

[Picture on page 22]

En figirngiy e rayog ni nge rin’ boch ban’en nge ayuweg leengin ko pigpig ni be tay ku Got

[Picture on page 23]

Mang fan ni yu wu’ e mabgol e kar turguyed ndab ra fakayed e bitir?