“Got E Be Pi’ Gelngin E Woldug Be Ga’”!

“Cha’ ni yung nge cha’ ni puog e ran ngay e gathi ri ba ga’ farow. Yi Got e ir e ba ga’ fan, yi ir e be pi’ gelngin e woldug be ga’.”​—1 KOR. 3:7.

1. Mang kanawo’ e gad be maruwel “Got riy u taabang”?

‘GAD be maruwel Got u taabang.’ Aram rogon ere miti maruwel ni yog apostal Paul nrayog ni ngad uned ngay. (Mu beeg e 1 Korinth 3:5-9.) Fare maruwel ni be weliy Paul murung’agen e aram e ngan yognag boch i gachalpen Jesus. I taareb rogonnag ko awoch ni yibe yung nge yibe tarannag. Faanra nge fel’ rogon i rin’ e re maruwel nem rodad, mab t’uf e ayuw rok Jehovah. Be puguran Paul ngodad ni “Got e be pi’ gelngin e woldug be ga’.”

2. Mang fan ni fare n’en ni ‘Got e be pi’ gelngin e woldug be ga’’ e ra ayuwegdad nge fel’ rogon i lemnag e maruwel rodad ni machib?

² Re thin riyul’ nem e ra ayuwegdad nge fel’ rogon ni gadad ma lemnag e maruwel rodad ni machib. Sana gad ba pasig ko machib nge rogon ni gad be fil ban’en ko girdi’, machane nap’an ra mang be’ reb i gachalpen Jesus me Jehovah e ir e bay rogon ni nga nog e sorok riy ngak. Mang fan? Ya demtrug rogon e athamgil ni gad ra tay ma dabiyog ni ngad nanged nib fel’ rogon rogon ni ma tugul ban’en. Solomon ni pilung e ke weliy nib fel’ rogon ni gaar: “Da mu nanged rogon e maruwel ko bin riyul’ e Got, ni ma rin’ urngin ban’en.”​—Ekl. 11:5, New World Translation.

3. Mange ba taareb u thilin e mayuw awoch nge ngan pingeg e girdi’ ngar manged boch i gachalpen Jesus?

³ Gur nge kankanan’dad nfaanra dad nanged rogon ni ke mon’og be’ ke mang reb i gachalpen Jesus? Danga’. Ya ra k’aringdad ni ngad sonnaged angin nra yib. I gaar Solomon ni Pilung: “Mu yung e woldug ko ley ni kadbul e yal’ nge mithigyal’; ma dabiyog ni ngam nang ko gubin nra tugul nib fel’ rogon fa danga’, fa reb e ra tugul bang e woldug rom nib fel’ rogon ma bang e dabi fel’ rogon.” (Ekl. 11:6) Riyul’, ya taareb rogon ko awoch ni yibe yung ndariy bagadad ni manang ko ra tugul fa danga’. Boor ban’en riy ndabiyog ni ngad gagiyegnaged. Taareb rogon ere n’ey ko ngan pingeg e girdi’ ngar manged boch i gachalpen Jesus. I tamilangnag Jesus ere n’ey u daken l’agruw e fanathin ni bay ko Gospel rok Mark ko guruy ni 4. Ngad guyed e n’en ni gad ra fil ko gal fanathin ney.

But’ nib Thilthil Rogon

4, 5. Mu weliy fare fanathin rok Jesus u murung’agen faen ma yung e awoch ni be wereg e awoch i yan.

⁴ Rogon ni kan yoloy u Mark 4:1-9, e weliy Jesus murung’agen be’ ni wereg e awoch, nga daken e but’ nib thilthil ni gaar: “Mu telmed! Be’ nib moon e yan ni nge wereg awochngin e woldug. Ma nap’an ni be wereg fapi awoch nga daken e milay’ me wer boch nga daken woen e girdi’ u milay’, me yib e arche’ i kay nge m’ay. Ma boch e wer nga daken bochi thal i but’ ni bay u daken e war. Ma de n’uw nap’an me tugul, ya dariy e but’ nib dib’ag u daken fapi awoch. Ma nap’an ni tolang e yal’ me li’ fapi woldug ni ka fini tugul, ni bochan e de yan lik’ngirad nib toar nga fithik’ e but’, ma aram ma de n’uw nap’an me mororoy. Ma boch fapi awochngin e woldug e wer nga fithik e pan ni bay rachangalen, me ga fapi pan ni bay rachangalen nge yabochboch ko fapi woldug nge li’, ma aram ma de k’uf. Machane boch fapi awoch e wer nga daken e but’ nib yong’ol, me tugul nge ga’ me k’uf, ni yu ken e guyey wom’engin, ma yu ken e nel’ i ragag, ma yu ken e raay.”

⁵ U nap’an e Bible, ma rogon ni yima yung e awoch e yima wereg nga daken e but’ i yan. En ma yung e awoch e ma tay nga lan e mad rok ara nga lan ban’en me fek nga i wereg iyan. Ere re fanathin ney e be dag ni faen ni ma yung e awoch e gathi ir rok e be yan i yung fapi awoch nga daken e but’ nib thilthil. Ya, fapi awoch e ke wereg ke yan i aw nga daken e but’ nib thilthil.

6. Uw rogon ni weliy Jesus fare fanathin u murunga’gen faen ma yung awoch?

⁶ De t’uf ni ngad sananaged fan ere fanathin ney. Ya ke weliy Jesus fan, ni ba’ ko Mark 4:14-20 ni gaar: “En ni ma wereg e awoch e er e en ni be wereg e thin rok Got. Ma fapi awoch ni wer nga daken woen e girdi’ u milay’ e be yip’ fan e piin ni rung’ag e thin rok Got, me yib moonyan’ i fek fapi thin rok Got ni kan wereg nga lanin’rad. Ma boch e girdi’ e bod e awoch ni wer nga daken bochi thal i but’ ni bay u daken e war. Nap’an ni yugu yad ra rung’ag e thin rok Got nnog ngorad mi yad fol riy ni kar felfelan’gad ngay. Machane ri de rich nga fithik’ i lanin’rad, ma aram e de par fapi thin rok Got u lanin’rad nib nuw nap’an. Ma faani yib e gafgow fa togopluw ni bochan e re thin rok Got nem, ma ra paged yad ni ka chingiyal’ nem. Ma boch e girdi’ e yad bod e awoch nni wereg nga fithik’ e pan ni ba’ rachangalen. Ereray e pi cha’ nrung’aged e thin rok Got, machane bochan e pi n’en ni ma magafan’ e girdi’ ngay ko biney e tamilang, nge chogowen e fel’ rogon, nge urngin mit ban’en ni yad be chogownag ni nge yog ngorad e sugnag lanin’rad nge thang fapi thin rok Got u lanin’rad, ma aram ma dakur k’ufgad. Machane boch e girdi’ e bod e awoch nni wereg nga daken e but’ nib yong’ol. Nrung’aged e thin rok Got, mi yad fol riy mi yad k’uf, ni boch i yad e guyey wom’engin, ma boch i yad e nel’ i ragag wom’engin, ma boch i yad e raay wom’engin.”

7. Mange be yip’ fan fare awoch nge fapi but’ nib thilthil?

⁷ Mu tay fanam i yan riy nde yog Jesus nib thilthil e miti awoch ni kan yung. Ya, i weliy murung’agen taab mit e awoch ni aw nga daken e but’ nib thilthil, nra reb ma rogon ni ke tugul. Fa mit nsom’on e but’ e ba elel; ma bin migid e de dib’ag; ma bin dalip e ba sug e pan riy ni bay rachangalen; ma bin aningeg e ba yong’ol. (Luke 8:8) Ere mang fare awoch? Aram fare thin ko Gil’ilungun Got ni ba’ ko Thin rok Got. (Matt. 13:19) Mange be yip’ fan fapi but’ nib thilthil? Be yip fan e girdi’ nib thilthil rarogon gum’ircharad.​—Mu beeg e Luke 8:12, 15.

8. (a) Mini’ e be yip’ fan faen ni ma yung e awoch? (b) Mang nib thilthil e n’en ma rin’ e girdi’ u nap’an ni yad ra rung’ag fare machib ko Gil’ilungun?

⁸ Mini’ e be yip’ fan faen ni ma yung e awoch? Be yip’ fan e piin yad ma maruwel Got u taabang, ni aram e piin yad ma wereg fare thin nib fel’ ni murung’agen Gil’ilungun. Bod Paul nge Apollos ni ur yungew e awoch ma yow be puog e ran ngay. Yugu aram rogon nib gel e maruwel nra tew, machane ba thilthil angin. Mang fan? Ya bochan e ba thilthil rarogon gum’irchaen e piin nrung’aged fare thin nib fel’. Fare fanathin e be dag riy ni faen ni ma yung e awoch e dabiyog ni gagiyegnag angin. Rra fal’eg e re n’ey lanin’uy, nib ga’ ni pi walag nib yul’yul’ ni ke yoor e duw ni kar maruwelgad, ma buchuuw angin e maruwel ni kar ted.a Mang fan ni aray rogon?

9. Mang thin riyul’ nra fal’eg lanin’uy e ke tamilangnag apostal Paul nge Jesus?

⁹ Yul’yul’ ko faen ni be yung e awoch e der yan u rogon angin e maruwel ni ke tay. I tamilangnag Paul ere n’em ni gaar: “Bayi bagayow me pi’ puluwon u rogon e maruwel ni tay.” (1 Kor. 3:8) Re puluwon nem e be yan u rogon e maruwel ni kan tay, gathi angin ni keb riy. Ki tamilangnag Jesus ere n’ey u nap’an ni sul pi gachalpen u bayay e machib ni ranod ngay. Kari gel e felfelan’ rorad ya mus ngak e pi moonyan’ ma kar folgad rorad ni bochan fithingan Jesus. Yugu aram rogon nib gel e felfelan’ ni kar ted, machane me gaar Jesus ngorad: “Dabi felan’med ni fan e be fol e pi moonyan’ romed; machane nge felan’med ni fan e kan yoloy fithingmed nga babyor u tharmiy.” (Luke 10:17-20) Yugu aram rogon nder guy be’ angin e maruwel ni be tay, ma gathi be yip’ fan ni kab pasig ara kab yul’yul’ boch e girdi’ ngak. Ba ga’ ni, angin e be yan u rogon gum’irchaen e en ni ke rung’ag. Machane, Got e ir e be pi’ gelngin be ga’!

N’en nib Milfan Ngak e Piin Yad Be Rung’ag fare Thin

10. Mange ra turguy ko be’ ni ke rung’ag fare thin e bod e but’ nib yong’ol fa danga’?

¹⁰ Uw rogon e piin yad be rung’ag fare thin? Gur kan dugliy e n’en ni yad ra rin’ u nap’an ni yad ra rung’ag fare thin? Danga’. Yad e ngar turguyed ko ngar boded e but’ nib yong’ol’ fa danga’. Riyul’ ni rarogon gum’irchaen be’ e rayog ni nge thil nge fel’ ara nge kireb. (Rom. 6:17) U lan e fanathin rok Jesus, e yog ni “yugu nap’an ni rung’ag [boch i yad]” fare thin, me yib moonyan’ i fek. Machane rayog ni nge dabi buch e re n’ey. Yibe pi’ e athamgil nga laniyan’ e piin Kristiano u James 4:7 ni ngar ‘togopuluwgad ngak fare moonyan’,’ me mil rorad. I weliy Jesus murung’agen yugu boch e girdi’ nrung’aged fare thin som’on mi yad felfelan’ machane mar mulgad nbochan e ‘de rich nga fithik’ i lanin’rad.’ Machane kan tay chilen ko pi tapigpig rok Got ni nge yan ‘lik’ingirad nga fithik’ e t’ufeg mi yad par riy nge mang def ngorad’ nge yog nra nanged fan “feni ga’ radan nge feni n’uw nge feni tolang nge feni toar rogon feni t’uf e girdi’ rok Kristus.”​—Efe. 3:17-19; Kol. 2:6, 7.

11. Uw rogon ma dabi pag be’ e magafan’ nge fel’ rogon ko biney e tamilang nge thang fapi thin rok Got ni ke rung’ag?

¹¹ Boch e girdi’ ni kar rung’aged fare thin e kar paged e pi “n’en ni ma magafan’ e girdi’ ngay ko biney e tamilang, nge chogowen e fel’ rogon” ni nge sugnag lanin’rad me thang fapi thin rok Got u lanin’rad. (1 Tim. 6:9, 10) Uw rogon ni ngar siyeged ere n’ey? I fulweg apostal Paul ni gaar: “Dabi m’on e salpiy u lanin’med, ma ngam pired ni nge fel’ u wan’med e tin ni ba’ romed ban’en. Ya ke yog Got ni ke gaar: ‘Ri dab gu pagem; ma ri dab gu n’igem.’”​—Heb. 13:5.

12. Mang fan ni piin ni bod e but’ nib yong’ol e yad be k’uf nib thilthil urngin wom’engirad?

¹² Tomur riy, me yog Jesus ni piin ni kan yungrad nga daken e but’ nib yong’ol e ra “k’uf ni bochi yad e guyey wom’engin, ma boch i yad e nel’ i ragag wom’engin, ma boch i yad e raay wom’engin.” Yugu aram rogon nib fel’ gum’irchaen boch e piin kar rung’aged fare thin ma yad be k’uf, ma tin ni be yog ni ngar rin’ed u rogon i wereg fare thin nib fel’ e be yan u rogon rarogorad. Rayog nbochan e kan pilibthir ara m’ar ma ke buchuuw e tayim nrayog ni nge fanay boch e girdi’ ni fan ko machib. (Mu taarebrogonnag ko Mark 12:43, 44.) Bayay, faen ni ma yung e awoch e buchuuw ara dariy ban’en nrayog ni nge rin’ ko re n’ey, machane be felfelan’ ni be guy ni Jehovah e be pi gelngin fare woldug be ga’.​—Mu beeg e Psalm 126:5, 6.

Faen ni Yung e Awoch Me Mol

13, 14. (a) Mu weliy fare fanathin rok Jesus u murung’agen be’ ni ma wereg e awoch. (b) Mini’ e be yip’ fan faen ma yung e awoch, ma mang fare awoch?

¹³ U Mark 4:26-29, e gad ra guy riy yugu reb e fanathin u murung’agen be’ ni ma yung e awoch ni gaar: “Gagiyeg rok Got e bod be’ ni wereg e awoch u milay’ rok. Mi i mol nnep’ ma be od ni rran, ma be tugul fapi awoch ni be ga’ i yan. Machane de nang rogon e nen ni rin’ me yodorom. But’ e ir e ayuweg e woldug nge ga’ nge yib wom’engin; som’on e muk’uf riy ni ka fini bor ni kab mererey, ma bin migid e ke m’ug fare muk’uf riy ni polo’ ndawori puf, me migid me puf i man wom’engin me m’ug wom’engin ni pire’. Ma nap’an ni el fapi wom’engin ma aram me fek faanem e kama rok nge tabab ko maruwel, ya ke taw ngal’an ni ngan th’ab e woldug ngan fek wom’engin.”

¹⁴ Mini’ ere ta mayuw awoch ney? Boch e Kristiano ni googsur e ba mich u wan’rad ni Jesus e cha’ ney. Machane uw rogon ni nga nog ni ke mol Jesus ma de nang rogon ni tugul fare awoch? Riyul’ ni manang Jesus rogon ni be mon’og! Re ta mayuw awoch ney, e taarebrogon ngak faanem ni kan weliy ko som’on, ni be’ yip’ fan e pi tamachib ko Gil’ilungun, ni piin ni kar yunged awochngin fare Gil’ilungun u daken e machib ni yad be tay u fithik’ e pasig. Fare awoch ni kan wereg nga daken e but’ e aram fare thin ni yad be machibnag.b

15, 16. Mange riyul’ u murung’agen e mon’og u ban’en nge rogon e mon’og ko tirok Got ni weliy Jesus u lan e fanathin rok u murung’agen faen ni ma yung e awoch?

¹⁵ I yog Jesus ni faen ni ma yung e awoch e be “mol nnep’ ma be od ni rran.” Re n’ey e gathi be dag nder tiyan’ faen ni be yung e awoch. Ya kemus ni be dag rogon e yafas rok yooren e girdi’. Fapi thin ni kan fanay ko re verse ney e be dag ni yibe maruwel ni rran min mol nnep’ u ba ngiyal’ ni bay n’umngin nap’an. I tamilangnag Jesus e n’en ni i buch ko re ngiyal’ i n’em. I gaar: “Be tugul fapi awoch ni be ga’ i yan.” Miki ulul ngay ni gaar: “Machane de nang rogon e n’en ni rin’ me yodorom.” N’en ni be tamilannag e fare woldug e i ga’ i yan ‘ni ir rok.’c

¹⁶ Mange be tamilangnag Jesus u roy? Mu tay fanam iyan riy ni n’en ni be tamilangnag e rogon ni be ilal i yan nge rogon ni be buch. “But’ e ir e ayuweg e woldug nge ga nge yib wom’engin; som’on e mukuf riy ni ka fini bor ni kab mererey, ma bin migid e ke m’ug fare mukuf riy ni polo ndawori puf, me migid me puf i man wom’engin me mug wom’engin ni pire.” (Mark 4:28) Re mon’og ney e buchuuw ma buchuuw. Dabiyog ni ngan gurnag nge papey. Re n’ey e taareb rogon ko mon’og ni be tay be’ ko tirok Got ban’en. Ra buch e re n’ey ni buchuuw ma buchuuw u nap’an ni be pag Jehovah ni nge ilal e thin nriyul’ u gum’irchaen be’ ni baadag ni nge nang e tin nriyul’.​—Acts 13:48; Heb. 6:1.

17. Mini’ era felfelan’ u nap’an ra yib wom’engin e maruwel?

¹⁷ Uw rogon nra un faen ni ke yung fare awoch ko mokun woldug u “nap’an ni el fapi wom’engin”? Nap’an nra ayuweg Jehovah ni nge ilal e thin nriyul’ u murung’agen fare Gil’ilungun u gum’irchaen e tin nib beech pi gachalpen Jesus, ma ra munmun mi yad mon’og ngar tawgad ko ngiyal’ nrayog ni ngar ognaged e yafas rorad ngak Got ni bochan e t’ufeg rorad. Yad ra dag e pow riy ni kar ognaged yad ni aram e ngan taufenagrad. Pi walag ni pumoon ni yad ra mon’og i yan ko tirok Got era munmun me yog ni milfan boch ban’en ngorad u lan e ulung. Facha’ nsom’on ni machibnag be’ nge mang reb i gachalpen Jesus nge ku boch e tamachib ni sana gathi yad e ra pirieged ko som’on e yad e yad ra t’ar wom’engin fare awoch. (Mu beeg e John 4:36-38.) Riyul’ ni, “re moon ni yung e woldug nge re moon ni t’ar e woldug e bay ra felfelan’gow u taabang.”

Tin Gad Ra Fil Riy e Ngiyal’ Ney

18, 19. (a) Uw rogon ni ke yibnag e pi fanathin rok Jesus ney e athamgil nga lanin’um? (b) Mange yira weliy ko bin migid e article?

¹⁸ Mang e kad filed ko gal fanathin ney ni bay u Mark guruy ni 4? Rib tamilang ni kad guyed ni bay e maruwel ni thingar da rin’ed​—ngan yung e awoch. Susun dabda paged e magawon nge mang tawey rodad ngad talgad i rin’ ere maruwel ney. (Ekl. 11:4) Ya gad manang feni fel’ ere maruwel ney ni gad be un ngay ni gad boch e tamaruwel rok Got. Jehovah e ir en ma ayuweg e girdi’ ngar manged pi gachalpen, ma ma tow’athnag e athamgil ni gad be tay nge piin ni ma motoyil ko fare thin ni gad ma weliy ngorad. Gad manang ndabiyog ni ngan towasariy be’ nge mon’og ko tirok Got ban’en. Maku dabi meewar lanindad ara mulan’dad nfaanra ba sowath ara der mon’og be’ ko tirok Got ban’en. Rra fel’ lanin’dad ni ngad nanged ni mon’og ni gad be tay ko machib e be tor nga daken e yul’yul’ rodad ngak Jehovah nge fare tow’ath ni ke pi’ ngodad ni aram e ngad machibnaged fare thin ‘nib fel’ ni murung’agen e gagiyeg rok Got . . . nge urngin e girdi’ me nang.’​—Matt. 24:14.

¹⁹ Ku mang e ke fil Jesus ngodad u murung’agen rogon e mon’og ko tin nib beech i gachalpen nge fare maruwel ko Gil’ilungun? Fulweg ko re deer nem e yira pirieg ko yugu boch e fanathin ni bay ko fare Gospel. Gad ra guy boch e pi fanathin ney ko bin migid e article.

[Footnotes]

Ka Ga Manang?

• Mange taareb rogon u thilin e en ma yung e awoch nge en ma machibnag fare thin ko Gil’ilungun?

• Uw rogon ni ma yaliy Jehovah rogon e yul’yul’ rok reb e tamachib ko Gil’ilungun?

• Mange taareb rogon u thilin e mon’og ni be tay e awoch nge mon’og ni be tay be’ ko tirok Got ban’en ni tamilangnag Jesus?

• Uw rogon ni “re moon ni yung e woldug nge re moon ni t’ar e woldug e bay ra felfelan’gow u taabang”?

[Pictures on page 19]

Mang fan ni taareb rogonnag Jesus be’ ni ma machibnag Gil’ilungun Got ngak be’ ni ma yung e awoch?

[Pictures on page 21]

Piin ni yad bod e but’ nib yong’ol e yad ma un i machibnag Gil’ilungun Got u polo’ i gum’ircharad ni be yan u rogon rarogorad

[Pictures on page 22]

I Got e ir e be pi’ gelngin fare woldug be ga’