“Nguum Pared Ko Thin Ni Gu Be Machibnag”

“Faan gimed ra par ko thin ni gu be machibnag ngomed ma aram e kari mudugil ni kam manged pi gachalpeg.”​—John 8:31.

1. (a) Nap’an ni sul Jesus nga tharmiy, mang e ke magay u fayleng? (b) Mang boch e deer ni gad ra weliy morngaagen?

NAP’AN ni sul Jesus Kristus ni ir e ke tababnag e teliw ni Kristiano nga tharmiy ma de magay u fayleng boch e babyor ni ir e ke yoloy, maku de magay boch ban’en ni ke toy, maku de magay e salpiy ni boor ni ke kunuy. Machane ke magay u fayleng boch pi gachalpen nge boch ban’en ni thingari rin’ be’ nge mang gachalpen. U lan e Gospel ni yoloy John e bay dalip ban’en ni thingari rin’ be’ nge mang gachalpen Jesus. Mang fa dalip i n’en nem? Ma mang e rayog ni ngada rin’ed ya ngada manged pi gachalpen Jesus? Ma mang e rayog ni ngada rin’ed e ngiyal’ ney ya ri mich ni nge bung rogodad ni ngada manged pi gachalpen?a

2. Mang e ba t’uf ni faanra mang be’ reb i gachalpen Jesus nrogon ni yoloy John u Gospel rok?

² Gonapan nel’ e pul u m’on ni yim’ Jesus me yan nga Jerusalem nge machibnag e girdi’ ni kar ranod e ngaram ni ngar madenomnaged e Madenom ko Piyuw ni reb e wik n’umngin nap’an. Bochan e machib ni tay, ma gonapan lukngun fare madenom ma “boor e girdi’ u fithik’ fapi girdi’ ni aram urngin ni mich Jesus u wan’rad.” Ka be machib Jesus ma bin tomur e rran ko fare madenom ma “pire’ e girdi’ ni mich Jesus u wan’rad.” (John 7:10, 14, 31, 37; 8:30) Aram e ngiyal’ ni i non Jesus ngak e piin ni ka fini mich u wan’rad me yog e n’en ni thingari rin’ be’ nge mang gachalpen. Me yoloy apostal John ni gaar: “Faan gimed ra par ko thin ni gu be machibnag ngomed ma aram e kari mudugil ni kam manged pi gachalpeg.”​—John 8:31.

3. Mang e ba t’uf ni faanra “ngii par be’ ko machib rok Jesus”?

³ Nap’an ni yog Jesus e re thin nem ma gathi be yog ni dariy e michan’ rok e piin ni ka fin nra manged pi gachalpen. Danga’, ya be yog ngorad ni rayog ni ngar manged e tin riyul’ i gachalpen​—ni faan nguur pared ko thin rok ma nge gum’an’rad. Ke mich e thin rok Jesus u wan’rad, ma chiney e thingari mudugil e michan’ rorad ma nguur pared ko thin rok. (John 4:34; Hebrews 3:14) Ri baga’ fan u wan’ Jesus ni nge guman’ pi gachalpen, ma bin tomur e sabathin ni tay ngak pi gachalpen nrogon nyoloy ko Gospel rok John e i yog ngorad ni l’agruw yay ni gaar: “Nguum lekeg.” (John 21:19, 22) Ma aram e n’en ni rin’ boor e tin somm’on e Kristiano. (2 John 4) Mang e i ayuwegrad ni nge gum’an’rad?

4. Mang e ke ayuweg e tin somm’on e Kristiano ni ngar gum’an’gad?

⁴ I weliy apostal John e n’en ni baga’ fan ni ke ayuwegrad, ma ir reb I gachalpen Jesus nib yul’yul’ ni medlip i ragag e duw. I pining e sorok ngak e pi Kristiano nib yul’yul’ ni gaar: “Ya kam gelgad; ya be par e thin rok Got u lanin’med ma kam gelgad ngak Faanem nib Kireb.” Pi cha’ nem ni yad pi gachalpen Jesus e ur gumˈan’gad ara kar pared ko thin rok Got ya thin rok Got e bay u lanin’rad. Ri yad ma tay fan e thin rok Got u gumercha’rad. (1 John 2:14, 24) Ku arrogon e ngiyal’ ney, ni thingari par e thin rok Got u lanin’dad ni faan gad ra “gum’an’ nge mada’ ko tomur.” (Matthew 24:13) Uw rogon ni ngada gum’an’gad? Bay e fulweg riy ko reb e fanathin rok Jesus.

“Ngan Rung’ag Fare Thin”

5. (a) Mang fapi but’ ni weliy Jesus morngaagen ko reb e fanathin rok? (b) Mang e be yip’ fan fare awoch nge fare but’ ko fanathin rok Jesus?

⁵ I weliy Jesus reb e fanathin u morngaagen be’ ni tamilay’ ni ke yung e awoch, ma bay e re fanathin ney u lan e Gospel rok Matthew nge Mark nge Luke. (Matthew 13:1-9, 18-23; Mark 4:1-9, 14-20; Luke 8:4-8, 11-15) Ga ra bieg fare fanathin ni ke yoloy pi cha’ nem ma ga ra guy ni taareb miti awoch ni ke aw u daken e but’ nib thilthil, mab thil wenegan. Bin somm’on miti but’ e ba elel, ma bin l’agruw miti but’ e bochi tal u daken e war, ma bin dalip mit e but’ e be tugul e pan ni bay rachangelen. Ma bin aningeg miti but’ e ba thil ko fa dalip ya ba “fel’” mab “yang’ol.” I weliy Jesus fan e fanathin rok me yog ni fare awoch e be yip’ fan e machib u morngaagen Gil’ilungun Got ni bay ko Thin Rok Got, ma fare but’ e be yip’ fan e girdi’ nib thilthil rarogon gumercha’rad. Yugu aram rogon ni ba taareb rogon boch ban’en ko girdi’ ni be yip’ fan fapi but’ nib thilthil, machane pi girdi’ ni be yip’ fan fa bin aningeg miti but’ nib fel’ e yugu ba thil ko fa dalip.

6. (a) Uw rogon nib thil fa bin aningeg miti but’ ko fanathin rok Jesus ko fa dalip miti but’, ma mang fan e re thin nem? (b) Mang e ba t’uf ni faanra nge gum’an’ be’ ni gachalpen Jesus?

⁶ Fare thin ni bay ko Luke 8:12-15 e be dag ni fa aningeg miti but’ e “ke rung’ag e thin rok Got.” Machane fapi girdi’ nib “fel’ gumercha’rad” e gathi goo kar “rung’aged e thin rok Got.” Ya “yad tay u lanin’rad nguur folgad riy me par rorad nge yib wom’engirad.” Fare but’ nib fel’ mab yang’ol e ba munguy mab toar ma rayog ni nge yan lik’ngin fare awoch nib toar me tugul me yib waamngin. (Luke 8:8) Ma ku arrogon e piin nib fel’ gumercha’rad ni yad manang fan e thin rok Got mi yad tay fan. (Roma 10:10; 2 Timothy 2:7) Thin rok Got e ma par u fithik’rad. Aram fan ni ma k’uf waamngirad u fithik’ e guman’. Faanra nge guman’ be’ ni gachalpen Kristus ma ba t’uf ni nge tay fan e Thin Rok Got u gumerchaen. (1 Timothy 4:15) Uw rogon ni nge yog ngodad e re tay fan nem ko Thin Rok Got u gumercha’dad?

Rarogon Gumerchaey nge Ngan Fl’eg I Lemnag e Machib

7. Mang maruwel e kub muun ko ba gumerchaey nib fel’?

⁷ Mu tay fanam iyan riy ko mang maruwel ni be yog e Bible nib muun ko ba gumerchaey nib fel’. “Gumerchaen be’ nib mat’aw e ma fl’eg i lemnag ban’en ya nge pi’ e fulweg nrogon.” (Proverbs 15:28) “Mang e gu par nib fel’ u wun’um e thin ni be yib u l’ugunag nge pi n’en ni gu be fl’eg i lemnag.” (Psalm 19:14) “Bay ug fl’eg i lemnag e tin ni ba’ fan.”​—Psalm 49:3.

8. (a) Nap’an ni gad ra bieg e Bible, mang e dab da rin’ed, ma mang e ngada rin’ed? (b) Mang boch fel’ngin nrayog ngodad ni faan gad ra fl’eg i lemnag e Thin Rok Got u fithik’ e meybil? (Ku mu guy fare thin ni “Nguum Par Nib Mudugil Ko Machib Nriyul’.”

⁸ Thingar da boded e pi cha’ ney ni kar yoloyed e Bible ni gad be fl’eg i lemnag u fithik’ e meybil e Thin Rok Got nge maruwel ni be fl’eg. Nap’an ni gad ra bieg e Bible ara pi babyor ni ma weliy fan e Bible ma thingar dab da boded e girdi’ nu yugu reb e nam ni yad be sebaliy e binaw ni yad be gurgur ni ngar guyed yugu reb e binaw nge reb, ni boor ban’en ni yad be sasingnag machane ri buchuw ban’en ni yad be guy. Danga’, ya nap’an ni gad be fol Bible ma thingar da talgad yu ngiyal’ ma ngada falan’gad ko thin riy ni gowa gad be falan’ ko sebal ni gad be tay.b Nap’an ni gad ra fl’eg i lemnag e pi n’en ni gad ra bieg ma bay angin ko gumercha’dad. Gad ra thamiy angin u gumercha’dad ma ra suruy rogon e lem rodad. Maku ra k’aringdad ni ngada weliyed ngak Got u lan e meybil e tin ni bay u fithik’ lanin’dad. Ma aram e ra gel fare thin nib fel’ u thildad Jehovah, ma bochan e ba t’uf Got rodad ma gad ra lek Jesus ni yugu aram rogon ni bay e mo’maw’ riy. (Matthew 10:22) Ere ba tamilang ni thingar da fl’eged i lemnag e thin rok Got ni faan gad ba adag ni ngada yul’yul’gad nge mada’ ko tomur.​—Luke 21:19.

9. Uw rogon nrayog ni ngada micheged ni ra par gumercha’dad ni ba adag e Thin Rok Got?

⁹ Ku be m’ug ko fanathin rok Jesus ni bay boch ban’en ni ra magawonnag fare awoch ni be tugul ma fare awoch e be yip’ fan e thin rok Got. Ere faan gad ra par ni gad pi gachalpen Jesus ma thingar da (1) nanged e pi n’en ni ra magawonnag fare awoch ni be tugul ara ngada nanged ko mang e pi but’ ni de fel’ ko fare fanathin, (2) ma thingar da pithiged e pi magawon nem ara ngada siyeged. Aram rogon ni gad ra micheged ni nge par gumercha’dad nib munguy ma nge tugul awochngin Gil’ilungun Got riy ma nge yib waamngin.

“U Merichilen e Kanawo’” —Ke Yoor e Tafinay

10. Mu weliy fa bin somm’on miti but’ ko fanathin rok Jesus, ma ga weliy ko mang e be yip’ fan.

¹⁰ Bin somm’on miti but’ ni ke aw e awoch nga daken e bay u “marichilen woen e girdi’ u milay’ mu unit’.” (Luke 8:5) Ba elel e but’ u marichilen e kanawo’ u milay’ ni bochan e ma yan e girdi’ u daken. (Mark 2:23) Maku arrogon gumerchaen e girdi’ ni kar paged ni nge yan yan e fayleng u daken gumercha’rad me fanay e fayleng e tayim rorad nge gelngirad ma dabiyog ni ngar ted fan e Thin Rok Got ni bochan e ke yoor lanin’rad. Kar rung’aged e thin rok Got machane dar fl’eged i lemnag. Ere ke par gumercha’rad nib el. Ma u m’on ni rayog ni nge t’uf rorad e thin rok Got “me yib moonyan’ i fek fapi thin rok Got nge chuweg u lanin’rad, ya nge dabi mich e re thin nem u wun’rad nge dabiyog nra thapgad ngak Got.” (Luke 8:12) Rayog ni ngan siyeg e re magawon ney, fa?

11. Uw rogon nrayog ni ngada ayuweged gumercha’dad nge siy nge el ni bod fare but’ nib el?

¹¹ Bay boor ban’en nrayog ni ngan rin’ ya nge siy ni nge el gumerchaey ni bod e but’ u marichilen e kanawo’ ni dabiyog ni nge tugul e woldug riy. Rayog ni nge yang’ol e but’ nib el ni yima yit’ daken ni faan yira gi’ min tay ni nge dabi yan e girdi’ u daken. Maku arrogon gumerchaey ni rayog ni nge bod e but’ nib fel’ mab yang’ol ni faan yira fil e Thin Rok Got ma nge fl’eg i lemnag e thin riy. Bin ni baga’ fan riy e nge dabi yoor e tafinay ma ngan mit ko tin nu fayleng ban’en. (Luke 12:13-15) Danga’, ya mu duguliy e ngiyal’ ni ngam fl’eg i lemnag e “tin ni ka baga’ fan boch” ko yafas rodad.​—Filippi 1:9-11.

“U Daken Bochi Thal I But’ ni Bay u Daken e War”​—Marus

12. Mang fan ni ke moro’roy fare woldug ko fa bin l’agruw miti but’ ni weliy Jesus ko fanathin rok?

¹² Nap’an ni aw e awoch nga daken e bin l’agruw miti but’, gathi bod fa bin somm’on miti but’ ni yugu be par fare awoch u daken e but’. Ya ke tugul me for nga lang. Machane nap’an ni ke gel e yal’, ke moro’roy fachi woldug ni bochan gelngin e yal’. Machane mu tay fanam iyan riy ko re n’en ney ni baga’ fan. Gathi ke moro’roy fachi woldug ni bochan gawelngin e yal’. Ya fare woldug ni be tugul ko fare but’ nib fel’ e ku be aw e yal’ nga daken, machane de moro’roy​—danga’ ya ke fel’ rogon ni bochan e yal’. Ere mang e ba thil riy? I weliy Jesus ni ke moro’roy ni bochan e ke aw nga daken “bochi thal i but’ ni bay u daken e war ma dariy e ran u fithik’.” (Matthew 13:5, 6; Luke 8:6) Bay ba war u tan fare thal i but’ ere dabiyog ni nge yan lik’ngin fare awoch nga toar ko gini bay e ran riy. Ke moro’roy fare woldug ni bochan e de toar e but’.

13. Miti mang girdi’ e bod fare thal i but’ u daken e war, ma mang fa bin riyul’ i fan ni yad ma rus mi yad thay ko machib?

¹³ Re fanathin ney e be yip’ fan e “piin nrung’aged e re thin rok Got nem mi yad fol riy ni kar felfelan’gad” mi yad fol rok Jesus ni “de n’uw nap’an.” (Luke 8:13) Machane nap’an ni yib e “gafgow ara togopuluw” ni bod e yal’ nib gel’ me yib e marus ngorad me m’ay e falfalan’ rorad mi yad pag Kristus. (Matthew 13:21) Tapgin e marus rorad e gathi fare togopuluw. Ya bay bokum million pi gachalpen Kristus ni yima togopuluw ngorad ma yad ma gum’an’rad u fithik’ e yul’yul’. (2 Korinth 2:4; 7:5) Bin riyul’ i fan ni ke yib e marus ngorad mi yad thay e gowa bay ba war u gumercha’rad ere dabiyog ni nge rich e machib nga toar ni bochan e dar fl’eged i lemnag e machib nge tin nib fel’ ban’en. Ere gathi rib gel e tay fan ni yad be tay ngak Jehovah nge Thin Rok ma dariy gelngirad ni ngar pared ni yad mmudugil u fithik’ e togopuluw. Mang e rayog ni nge rin’ be’ nge siy ni ngar boded miti but’ nem?

14. Mang boch ban’en nrayog ni nge rin’ be’ ya nge ayuweg gumerchaen ni nge dabi bod fare thal i but’ u daken e war?

¹⁴ Thingari ayuw be’ ni nge dariy ban’en nib el ni bod e malang u gumerchaen ni bod e awan’ ara dogol ara ban’en nib el ni bay u toar u gumerchaen. Machane faan manga bay ban’en nib el u gumerchaey ma gelngin e Thin Rok Got e rayog ni nge pirdiiy nge ngal’ ni ab. (Jeremiah 23:29; Efesus 4:22; Hebrews 4:12) Ma faanra fl’eg i lemnag e machib u fithik’ e meybil ma rayog ni nge rich e thin rok Got nga gumerchaen. (James 1:21) Ma aram e rayog gelngin ni nge athamgil u nap’an ni ke mulan’ ma nge dabi rus ma nge yul’yul’ u fithik’ e skeng nra yib ngak.

“U Fithik’ e Pan ni Bay Rachangelen”​—Ke Ruw Raba’ Lanin’uy

15. (a) Mang fan ni ngada tedan’dad ko fa bin dalip miti but’ ni weliy Jesus morngaagen? (b) Mang e ke buch ko woldug ko fa bin dalip miti but’, ma mang fan?

¹⁵ Thingar ni tayan’ ko bin dalip miti but’ ni bay e pan riy ni bay rachangelen ya ba taareb rogon ko fare but’ nib fel’ u boor e kanawo’. Ma tugul e awoch ko fare but’ ni bay e pan riy ni bay rachangelen ni bod rogon fare but’ nib fel’. U tobolngin ma dariy ban’en nib thil ko fare awoch ni be tugul ko fagal miti but’ nem. Machane munmun ke buch ban’en ni ke kirebnag fare woldug. Ke thil ko fare but’ nib fel’ ya munmun me tugul boch e pan ni bay rachangelen riy. Nap’an ni be ga’ fare woldug ma ra togopuluw fare pan ni bay rachangelen ngak. Ra togopuluw fare woldug nge fare pan machane munmun me “yabochboch fapi ngak ko fapi woldug me yim’ fapi woldug.”​—Luke 8:7.

16. (a) Miti mang girdi’ e bod fare but’ ni bay e pan ni bay rachangelen riy? (b) Rogon fa dalip i Gospel, mang e be yip’ fan fare pan ni bay rachangelen?​—Ku mu guy e footnote.

¹⁶ Miti mang girdi’ e ba taareb rogon ko fare but’ ni bay e pan riy ni bay rachangelen? I weliy Jesus ni gaar: “Ma awoch ni wer nga fithik’ e pan ni bay rachangelen e be yip’ fan e piin nrung’aged e thin rok Got; machane bochan e magafan’, nge fel’ rogon nge felfelan’ nu fayleng ni yibe m’oneg ko thin rok Got ko biney e tamilang e sugnag lanin’rad nge thang fapi thin rok Got u lanin’rad, ma aram e de lol wom’engirad.” (Luke 8:14) Fare awoch ni kan yung e be tugul u taabang ko fare pan ni bay rachangelen, maku aram e n’en ni be rin’ boch e girdi’ ni yad be guy rogon ni ngar suguy lanin’rad ko thin rok Got maku yad be un ko “felfelan’ nu fayleng.” Fare machib ni riyul’ ni bay ko Thin Rok Got e be tugul u gumercha’rad, machane ku bay yugu boch ban’en ni be togopuluw ngay. Ke yoor raba’ gumercha’rad. (Luke 9:57-62) Ma aram e dabiyog ni nge yog e tayim riy ni fan ni ngan fl’eg i lemnag e Thin Rok Got u fithik’ e meybil. Dar tedan’rad ko thin rok Got me ere dabiyog ni ngar gumˈan’gad ni bochan e dariy e tay fan rorad. Munmun me war e tirok Got ban’en u wan’rad ya kar m’oneged e tin nu fayleng ban’en u wan’rad me ri “yabochboch” fare pan ngak.c Kari gafgow e piin ni de t’uf Jehovah rorad u polo’ i gumercha’rad!​—Matthew 6:24; 22:37.

17. Mang e thingar da mel’eged ni faanra dabi yabochboch fare rachangel ngodad?

¹⁷ Bochan ni gad ma m’oneg e tirok Got ban’en ma gathi chugum nu fayleng ma dabiyog ni nge yabochboch e magawon nge felfelan’ nu fayleng ngodad. (Matthew 6:31-33; Luke 21:34-36) Dab da paged e fol Bible ma ngada fl’eged i lemnag e pi n’en ni gad ra bieg riy. Ra yoor e tayim ni rayog ngodad ni ngada fl’eged i lemnag e Bible u fithik’ e meybil ni faanra mom boch e par rodad. (1 Timothy 6:6-8) Aram e n’en ni ke rin’ boch e pi tapigpig rok Got​—gowa kar puged e pi pan ni bay rachangelen ya nge yog yangˈolen e but’ ngak fare woldug ni bay waamngin—​ma kar pirieged e flaab ni yib rok Jehovah. Be gaar Sandra ni be’ ni ppin ni 26 e duw rok: “Nap’an ni gu ra fl’eg i lemnag e flaab ni yib ko fare machib nriyul’, ma ri tamilang u wan’ug ni dariy ban’en u fayleng nib taareb rogon ngay!”​—Psalm 84:11.

18. Uw rogon ni nguuda pared ko thin rok Got ma ngada gum’an’gad ni gad e Kristiano?

¹⁸ Ere rib tamilang ni gad gubin ni demutrug ko gad ba fel’ yangaren ara pilibthir, ma gad ra par ko thin rok Got ma rayog ni nguuda gum’an’gad ni faanra par e thin rok Got u fithik’dad. Ere ngada turguyed ni nge dabi el fare but’ ni be yip’ fan gumercha’dad, ara nge par ni bochi thal i but’ ara nge yoor e pan u daken, machane nge par nib munguy mab toar ni gubin ngiyal’. Ra arrogon, ma rayog ni nge yog e thin rok Got ngodad ma “nge yib wom’engirad u fithik’ e guman’.”​—Luke 8:15.

[Footnotes]

Mang e Fulweg Rom?

• Mang fan ni “nguuda pared ko thin rok Jesus”?

• Uw rogon ni gad ra pag nge par e Thin Rok Got u gumercha’dad?

• Miti mang girdi’ e be yip’ fan fa aningeg miti but’ ko fanathin rok Jesus?

• Uw rogon nrayog e tayim ngom ni ngam fl’eg i lemnag e Thin Rok Got?

[Box/Picture on page 8]

“Gimed Mudugil U Fithik’  E Tin Riyul’ E Machib”

BOOR pi gachalpen Kristus ni kar pared “ni yad mudugil u fithik’ e tin riyul’ e machib” ni bokum e duw. (2 Peter 1:12) Mang e ke ayuwegrad ni nguur guman’gad? Amu lemnag boch e thin rorad.

“U tungun gubin e rran e gu ma bieg bang e Bible mu gu meybil. Ma aram e gu ra fl’eg i lemnag e n’en ni ka fini gu bieg.”​—Jean, un taufenag ko duw ni 1939.

“Gu ma fl’eg i lemnag rogon fene tolang Jehovah nge fene gel e t’ufeg rok me yib e gel ngog ni rayog ni nggu pagan’ug ngak me ayuwegeg ni nggu yul’yul’ ngak.”​—Patricia, un taufenag ko duw ni 1946.

“Gu ma fil e Bible ma ri ma mit lanin’ug ko “tin toar e machib rok Got” ma pi n’en ney e ma ayuwegeg ni nggu athamgil boch.”​—1 Korinth 2:10; Anna, un taufenag ko duw ni 1939.

“Gu ma bieg e Bible nge pi babyor rodad ni ma weliy fan e Bible ya nggu skengnag gumerchaeg nge lanin’ug.”​—Zelda, un taufenag ko duw ni 1943.

“Ri baga’ e falfalan’ rog ko ngiyal’ ni rayog ni nggu wan u but’ ni gu be non ngak Jehovah u fithik’ e meybil ni gu be weliy lanin’ug ngak.”​—Ralph, un taufenag ko duw ni 1947.

“U tobolngin gubin e rran e gu ma bieg e thin ko Bible ko re rran nem, ma aram e gu ma bieg bang ko Bible. Ma aram e bay ban’en ni rayog ni nggu lemnag u lan e re rran nem.”​—Marie, un taufenag ko duw ni 1935.

Uw e ngiyal’ ni ga ma tay ni fan ni ngam fl’eg i lemnag e Thin Rok Got u fithik’ e meybil?​—Daniel 6:10b; Mark 1:35; Acts 10:9.

[Picture on page 11]

Faan gad ra m’oneg e tirok Got ban’en ma rayog ni nge yib “waamngidad u fithik’ e guman’”