Angin Nra Yib Ngom Nfaanra Ba T’uf Rom E Thin Rok Got
“Nge t’uf e gonop rom, ma ra ayuwegem. . . . Ma ra n’ufem ni bochan e kam fol riy.”—PROVERBS 4:6, 8, New World Translation.
1. Mang e ba l’ag ngay ni nge t’uf rodad e Thin Rok Got?
BA T’UF ko pi Kristiano ni ngar bieged e Bible. Machane, gathi ke mus ni ga ra bieg ma aram e mich riy ni ba t’uf rom e Thin Rok Got. Ya faanra poy be’ e Bible machane ra rin’ e tin nib togopuluw ngay? Ba tamilang ni de t’uf rok e Thin Rok Got ni bod rogon fa en ni ke yoloy e bin 119 guruy ko Psalm. Bochan ni ba t’uf rok e Thin Rok Got ma aram e ke par nib puluw ko pi motochiyel riy.—Psalm 119:97, 101, 105.
2. Mang angin nra yib ko gonop ni bay ko Thin Rok Got?
2 Ba t’uf ni nge par be’ ni be thiliyeg e lem rok ni fan ni nge par nib puluw ko Thin Rok Got. Aram e kanawo’ nib gonop, ya kan fol ko thin ni kan fil u lan e Bible. “Nge t’uf e gonop rom, ma ra ayuwegem. Mu tolangnag nge par nib rir ma ra n’ufem. Ra n’ufem ya kam chichiy paam riy. Ra mang teeliyaw u lolugem nib fel’ yaam; ma ra n’igin ngam par nib gamog.” (Proverbs 4:6, 8, 9) Uw feni fel’ ni be pi’ e athamgil nga lanin’dad ni nge t’uf rodad e Thin Rok Got ma gad fol riy! Mini’ e dabun ni ngan ayuweg ma ngan n’uf, ma ngan tay nib rir?
Ran Ayuwegdad Ndabi Yib e Kireb Ngodad Ndariy N’umngin Nap’an
3. Mang fan nib t’uf ko pi Kristiano ni ngan ayuwegrad, ma ngan ayuwegrad rok mini’?
3 Uw rogon ma ran ayuweg be’ ko gonop ni ke yog ngak ni bochan e ma fil e Thin Rok Got ma be fol riy? Ya yibe ayuweg rok Satan ni Moonyan’. I fil Jesus ngak pi gachalpen ni ngar meybilgad ni ngan ayuwegrad rok Satan. (Matthew 6:13) Ngiyal’ ney ma ri ba t’uf ni ngad yibilayed e re n’em. Ya kan nin’ Satan nge pi moonyan’ rok nga wuru’ e tharmiy u tomren e 1914, ma aram ma “kari damumuw, ya manang ni daki n’uw nap’an ni nge par.” (Revelation 12:9, 10, 12) Ma bochan ni kar chugur nga tomur ma dabi siy ni kari gel e damumuw rok ma be cham ngak e “piin ni yad be fol ko pi motochiyel rok Got ma yad ba yul’yul’ ko fare thin nib riyul’ ni yib i yog Jesus ngan nang.”—Revelation 12:17.
4. Uw rogon ni yibe ayuweg e pi Kristiano ko pi wup rok Satan?
4 Be damumuw Satan me ere be sunmeg e magawon ko pi Kristiano ma be guy rogon ni ngan gafgownagrad nib elmirin fa ngan rin’ yugu boch ban’en ni ngan taleg e maruwel rorad ko machib. Maku ba adag ni nge wawliy e pi tamachib ko Gil’ilungun Got ni dabkura mon’ognaged e machib mi yad lek e par nib tolang, ara fafel, fa ngar leked e chugum, nge par nib falfalan’. Mang e ra ayuweg e pi tapigpig rok Got ndabra awgad ko wup rok Satan? Meybil nge par nib fel’ thilmew Jehovah, nge michan’uy ko tin ni ke yog. Ma pi n’ey ni gubin e ba l’ag ko tamilangan’ ko Bible min par nib mudugilan’uy ni ngan fol riy. Ma ra yog e re n’ey ni faanra ga ra poy e Bible nge yugu boch e babyor, ma ngam un ko pi muulung ko Kristiano, ma ngam fol ko fonow ni ra pi’ reb e Kristiano ngom, ma ngam fl’eg i lemnag e pi motochiyel ko Bible u fithik’ e meybil ma kan ni thothup rok Got e ra yibnag ngan’um.—Isaiah 30:21; John 14:26; 1 John 2:15-17.
5. Uw rogon ma gonop ni bay ko Thin Rok Got e ma ayuwegdad?
5 Ku yibe ayuweg e piin nib t’uf rorad e Thin Rok Got u yugu boch e kanawo’. Susun, yad ma siyeg e m’ar nge magawon ko dowef nge lanin’uy ni aram wenegan e ngongol ndarngal nge drug abuse, nge tamaggow. (1 Korinth 5:11; 2 Korinth 7:1) Ma gathi yad ma kirebnag thilin e girdi’ ko dugdugthin ara thin nde gol. (Efesus 4:31) Ma gathi yad ma fil e lem ara philosophy ko girdi’ ni aram e gonop nu fayleng nib sasalap. (1 Korinth 3:19) Ba t’uf rorad e Thin Rok Got me ere yibe ayuwegrad rok e tin nra kirebnag thilrad Got nge athap rorad ni yafos ni dariy n’umngin nap’an. Yad ma par ni gubin ngiyal’ ma yad be ayuweg e piin buguli yoror rorad ni nge mich u wan’rad e tin ni be yog e Bible, ma yad manang ni aram rogon ni yad ra ‘ayuwegrad nge piin ni yad ma motoyil ngorad ngar thapgad ngak Got.’—1 Timothy 4:16.
6. Uw rogon ma gonop ni bay ko Thin Rok Got e ra ayuwegdad u fithik’ e magawon nib gel?
6 Briyul’ ni gubin e girdi’—ni mus ko piin ni ba t’uf rorad e Thin Rok Got—ma “ku ma buch boch ban’en ngodad.” (Eklesiastes 9:11) Ere dabi siy ni ku ra buch boch ban’en nib kireb ngak boch i gadad ni bod ni ma yib e yoko’, ara m’ar nib ubchiya’, ara gad ra maadad, fa da m’ad. Machane ka yibe ayuwegdad. Ya dariy reb e gafgow ni ra yib ngodad ni rayog ni nge kirebnag ni manemus be’ ni ba t’uf rok e Thin Rok Got. Me ere, susun ndabda pared ni ke magafan’dad ko mang e rayog ni nge buch nga m’on. Ngad rin’ed e pi n’en nrayog ni ngad ayuweged gadad nge mu’ ma gad pag fadad ngak Jehovah ma dabda paged e magafan’uy nge kirebnag e gapas rodad. (Matthew 6:33, 34; Filippi 4:6, 7) Ya rib mudugil fare athap ko fas ko yam’ nge par nib fel’ rogon nap’an nra ‘thiliyeg Got urngin ban’en nge beech.’—Revelation 21:5; John 11:25.
Ngam Micheg ni Gur e “But’ nib Yong’ol’”
7. Mang fanathin ni weliy Jesus ngak e piin ni kar bad ngak?
7 Reb e fanathin rok Jesus e be tamilangnag nib ga’ fan ni ngan lemnag e Thin Rok Got nrogon. Nap’an ni i weliy Jesus e machib u lan e binaw nu Palestine, ma boor e girdi’ e ur bad ngak. (Luke 8:1, 4) Machane gathi yad gubin ma ba t’uf rorad e Thin Rok Got. Dabi siy ni boor e girdi’ e yad ba adag ni ngar guyed e maangang fa yad ba adag ni ngar motoyilgad ngak ya ba salap ko welthin. Ere ke weliy Jesus e fanathin ngorad ni be gaar: “Be’ nib moon e yan ni nge wereg awochngin e woldug rok. Ma nap’an ni be wereg fapi awoch u daken e milay’, me wer boch nga daken marichlen woen e girdi’ u milay’, mu unit’ ma be kay e arche’. Ma boch e wer nga daken bochi thal i but’ ni bay u daken e war, ma faani tugul me mororoy, ya dariy e ran u fithik’ fachi thal i but’. Ma boch fapi awoch e wer nga fithik’ e pan ni bay rachangalen, me tugul fapi awoch nge fapi pan u taabang me yabochboch fapi pan ko fapi woldug me yim’ fapi woldug. Ma boch fapi awoch e wer nga daken e but’ nib yong’ol, me tugul nge k’uf nra ba ken ma raay wom’engin.”—Luke 8:5-8.
8. Mang e be yip’ fan fare awoch?
8 Fare fanathin rok Jesus e be tamilangnag ni ba thil thil e n’en nra rin’ e girdi’ ni ra rung’ag fare thin nib fel’, ya ma tor ko uw rogon gum’ercharad. Fare awoch ni yibe wereg e aram e “thin rok Got.” (Luke 8:11) Ma yugu reb e babyor ni be weliy e re fanathin nem e be yog ni fare awoch aram “e thin rok Got ni murung’agen e gagiyeg rok.” (Matthew 13:19) Rayog ni nge yog Jesus e gali thin nem ya kenggin e Thin Rok Got aram e thin u murung’agen Gil’ilungun Got u tharmiy ma Jesus Kristus e Pilung riy ma aram rogon nra n’uf Got fithingan ma ra micheg ni bay rogon ni nge gagiyeg. (Matthew 6:9, 10) Me ere fare awoch ni aram e thin nib fel’ ni bay ko Thin Rok Got nu Bible. Ma Pi Mich Rok Jehovah e yad ma tamilangnag e re thin ney ko Gil’ilungun Got u nap’an ni yad ma wereg e awoch ni bod rogon ni i rin’ Jesus Kristus. Ma mang angin ni ma yib riy?
9. Mang e be yip’ fan e awoch ni wer nga (a) marichlen woen e girdi’? (b) ngu daken bochi thal i but’ ni bay u daken e war? (c) ngu fithik’ e pan ni bay rachangalen?
9 Yog Jesus ni boch e awoch e wer nga daken marichlen woen e girdi’ mu unit’. Re n’ey e be sor fan ko piin ni kayigi elmirin ni yad be un ko yugu boch ban’en ma aram e dabiyog ni nge taw fare awoch ko Gil’ilungun Got nga gum’ercha’rad. U m’on nrayog ni nge t’uf rorad e Thin Rok Got “me yib moonyan’ i fek fapi thin rok Got nge chuweg u lanin’rad, ya nge dabi mich e re thin nem u wun’rad nge dabiyog nra thapgad ngak Got.” (Luke 8:12) Ma boch e awoch e wer nga daken boch i thal i but’ ni bay u daken e war. Aram e piin ni yad ba adag fare thin ko Bible machane ri de rich nga fithik’ i lanin’rad. Ere nap’an ni ra yib e togopuluw ngorad mab mo’maw ni ngar folgad ko thin ko Bible, ma “dakur folgad ko fapi thin” ya dariy lik’ngirad. (Luke 8:13) Ma bay e piin ni ma rung’ag fare thin machane bochan e “magafan’ nge fel’ rogon nge felfelan’ nu fayleng ni yibe m’oneg” ma aram me thang fare thin rok Got u lanin’rad. Ma bod e woldug ni ke yabochboch e pan ngay ma dabi “lol wom’engirad.”—Luke 8:14.
10, 11. (a) Mini e be yip’ fan fare but’ nib fel’? (b) Mang e thingarda rin’ed nge “par” e Thin Rok Got u gum’ercha’dad?
10 Ma bin tomur e fapi awoch ni wer nga daken e but’ nib yong’ol. Aram e be yip’ fan e piin nrung’aged e thin rok Got ma ba “ffel’ gum’ercha’rad mab manigil.” Dabi siy ni gad ba adag ni nge puluw e re n’em ngodad. Machane n’en nib ga’ fan e rogon u wan’ Got. (Proverbs 17:3; 1 Korinth 4:4, 5) Ma be weliy ko Thin Rok ni gad ma micheg nib “fel’ gum’ercha’dad mab manigil” u daken e ngongol rodad e chiney nge mada’ ko ngiyal’ ni gad ra yim’ fa ngiyal’ nra thang Got e re m’ag nib kireb ney. Faanra kad adaged e thin ko Gil’ilungun Got u nap’an ni kan machibnagdad ko som’on mab manigil. Machane piin nib fel’ gum’ercha’rad mab manigil e yad ma fol ko Thin Rok Got “mi yad tay u lanin’rad nguur folgad riy me par rorad nge yib wom’engirad u fithik’ e k’adan’ ni yad ma tay.”—Luke 8:15.
11 Kari mus rogon ni nge par e Thin Rok Got u gum’ercha’dad e ngad bieged ma ngad filed ni goo gadad nge pi walagdad u taabang. Ba muun ngay ni ngad filed e pi n’en ni ma pi’ fapi girdi’ ni kan dugliyrad ni ngar ayuweged pi gachalpen Jesus ko tirok Got ban’en. (Matthew 24:45-47) Aram rogon, ma piin ni ma par e Thin Rok Got u gum’ercha’rad e yibe k’aringrad ni nge “yib wom’engirad u fithik’ e k’adan’ ni yad ma tay.”
12. Mang fapi wom’engin ni ra yib ngodad u fithik’ e k’adan’?
12 Ma mang wom’engin ni ma yib ko fare but’ nib yong’ol? U fayleng ma ma tugul e awoch me mang woldug ni ma yib wom’engin ni taareb rogon awochngin, ma aram e rayog ni nge wer nga daken e but’ mi yib wom’engin. Ku aram rogon e piin nib fel’ gum’ercha’rad mab manigil, ma ma tugul fare awoch u fithik’rad, me n’igin ni ngar ilalgad iyan ko tirok Got ban’en, nge mada’ ko ngiyal’ ni rayog ni ngar yunged e awoch nga gum’ercha’en yugu boch e girdi’. (Matthew 28:19, 20) Ma yad ma yung e awoch u fithik’ e k’adan’uy. I tamilangnag Jesus fene ga’ fan ni ngan k’adan’ u nap’an ni yibe wereg e awoch ye gaar: “En nra athamgil nge mada’ ko tomur e ra yog e yafos ngak. Ma re thin rok Got ney nib fel’ ni murung’agen e gagiyeg rok Got e bay ni machignag u gubin yang u fayleng ni nge urngin e girdi’ me nang, ma aram mfini taw nga tomren e fayleng.”—Matthew 24:13, 14.
“Ma Yib Wom’engin i Pangimed u Fithik’ Urngin Mit e Maruwel nib Fel’ ”
13. Mang meybil ni yog Paul ni ba peth e wom’engin nge tamilangan’ ko Thin Rok Got ngay?
13 Ki weliy apostal Paul u murung’agen rogon nib t’uf ni nge wom’engin me yog ni ba l’ag e re n’em ko Thin Rok Got. I meybil ku Got ni fan ko pi walag ni nge “tamilangnag lanin’rad ngar nanged e tin nib m’agan’ [Got] ngay ni ir e ngar rin’ed, nib chag urngin e gonop nge tamilangan’ ngay ni ma pi’ e kan ni thothup rok. Ma aram me yog ni ur ngongolgad nrogon ni ba adag [Jehovah], mu ur rin’ed e tin nib m’agan’ ngay ni gubin ngiyal’ me yib wom’engin i pangirad u fithik’ urngin mit e maruwel nib fel’.”—Kolose 1:9, 10; Filippi 1:9-11.
14-16. Rogon nib puluw ko meybil rok Paul, ma mang wom’engin ni ra yib ko piin nib t’uf rorad e Thin Rok Got?
14 Ere be dag Paul ni gathi ke mus ni ngan nameg ni nge tamilangan’uy ko thin ko Bible. Ya faanra ba t’uf rodad e Thin Rok Got ma aram e ra k’aringdad ni ngad “ngongolgad nrogon ni ba adag Jehovah” ma nge yib ‘wom’engin i pangidad u fithik’ urngin mit e maruwel nib fel’.’ Mang mang fare maruwel nib fel’? Aram e ngan machibnag fare thin nib fel’ ko Gil’ilungun Got ya aram e maruwel ni kan pi’ ko pi Kristiano ko ngiyal’ ney. (Mark 13:10) Maku piin nib t’uf rorad e Thin Rok Got e yad ma pi’ e salpiy ni ayuw ni fan ko re maruwel ney. Ke falfalan’rad ni ngar uned ko re taw’ath ney ya yad manang ni “Got e ba t’uf rok e en ni ma pi’ ban’en u fithik’ e felfelan’.” (2 Korinth 9:7) Yad ma pi’ e ayuw ni fan ko pi naun ni Bethel nib boor ko raay ma aram e gin ni yibe pow’iy e machib ma yibe fl’eg e Bible nge yugu boch e babyor riy. Ma ayuw ni yad ma pi’ e ku fan ko pi muulung ko Kristiano ni convention ma fan ni ngan ayuweg e piin ni ma lekag e ulung, nge pi missionary, nge piin ni ma un ko machib nib full-time.
15 Ma yugu boch e maruwel nib fel’ ni yad ma rin’ e yad ma toy boch e naun ni fan ko bin riyul’ e liyor. Bochan nib t’uf rorad e Thin Rok Got ma aram e ma k’aring e piin ni ma liyor ngak ni ngar guyed rogon nge par e pi muulung rorad nib klin mab fel’ yaan ni aram e pi Assembly Hall nge Kingdom Hall. (Mu taarebnag ko Nehemiah 10:39.) Bay fithingan Got u daken e pi naun nem, me ere baga’ fan ni ra par nib klin u langgin ngu wuru’ ma piin ni ma un ngay e ra par nib fel’ e ngongol rorad. (2 Korinth 6:3) Kab boor ban’en nrayog ni nge rin’ boch e Kristiano. Bochan nib t’uf rorad e Thin Rok Got ma aram e yad ma milekag nib palog ni fan ni ngar uned ko maruwel ni ngan toy e naun ni fan ko liyor u yu yang u fayleng ya ba t’uf e ayuw ko yu gin nib gafgow fa dariy be’ nib salap ko dimow naun riy.—2 Korinth 8:14.
16 Rogon ni nge yib “wom’engin i pangidad u fithik’ urngin mit e maruwel nib fel’ ” e kub muun ngay ni ngan ayuweg chonggin e tabinaw rodad nge pi Kristiano. Bochan nib t’uf rodad e Thin Rok Got ma ma k’aringdad ni ngad lemnaged e tin nib t’uf ko “piin ni kad manged girdien e tabinaw rok Got u fithik’ e mich u wun’uy ngak Kristus” ma ngad “ngongliyed e maruwel rodad nrogon e maruwel ni ma tay girdien Kristus ngak girdien e tabinaw rodad.” (Galatia 6:10; 1 Timothy 5:4, 8) Ere ba manigil ni ngad guyed e piin nib m’ar ma ngad pied e athamgil nga laniyan’ e piin ni ke kireban’rad. Ma rib fel’ e maruwel ni be tay e piin piilal nge piin ni bay ko fare Hospital Liaison Committee ni yad be ayuweg e girdi’ nib magawon ko tafalay! (Acts 15:29) Maku be yoor iyan e gafgow ni be buch—boch e yib ko pi n’en ni bod e yoko’ ma boch e sum ko girdi’ nib balyang. Kan ni thothup rok Got e ke ayuweg e Pi Mich Rok Jehovah ni ngar ayuweged e pi walagrad nge piin ni kar gafgowgad ko maadad nge yugu boch ban’en. Pi n’ey ni urngin e aram wom’engin nib fel’ ni yib rok e piin nib t’uf rorad e Thin Rok Got.
Angin nib Fel’ ni Bay Nga M’on
17, 18. (a) Mang angin ni be yib ni bochan e yibe wereg awochngin Gil’ilungun Got? (b) Mang boch ban’en nra buch ni ra guy e piin nib t’uf rorad e Thin Rok Got?
17 Be yib angin ko girdi’ ni bochan e yibe wereg awochngin Gil’ilungun Got. Boor ko 300,000 e girdi’ u gubin e duw ni ke taw fare thin ko Bible nga gum’ercha’rad mar ognaged yad ku Jehovah mar uned ko taufe u fithik’ e ran. Rib fel’ e n’en ni bay nga m’on rorad!
18 Piin nib t’uf rorad e Thin Rok Got e yad manang ni dabi n’uw nap’an ma ra rin’ Jehovah Got ban’en me ga’nag fithingan. Ran thang “Babylon nib Gilbuguwan,” ni be yip’ fan e pi yuraba’ i teliw nu fayleng. (Revelation 18:2, 8) Ma aram ma Jesus Kristus ni Pilung e ra thang e piin ni dubrad ni ngar folgad ko Thin Rok Got. (Psalm 2:9-11; Daniel 2:44) Nge mu’, ma Gil’ilungun Got e ra chuweg e bugel, nge mahl, nge pi n’en nib kireb. Dabki t’uf ni ngan fl’eg laniyan’ e girdi’ ni bochan e amith, nge m’ar, nge yam’.—Revelation 21:3, 4.
19, 20. Ra uw rogon e gabul nge langleth ko piin nib t’uf rorad e Thin Rok Got?
19 Ma rib fel’ e maruwel ni ra rin’ e piin nib t’uf rorad e Thin Rok Got! Piin ni ra magay nib fas u tomren Armageddon e yad ra maruwel me paradis e fayleng. Ma yad ra fl’eg rogon e pi n’en nib t’uf ko piin ni kar m’ad ni bay u low ko yam’ e chiney ma ka yad bay u laniyan’ Got ma yira fasegrad ko yam’. (John 5:28, 29) Ngiyal’ nem ma ra pi’ Jehovah ni Somol Nth’abi Ga’ e thin ngak e girdi’ nu fayleng u daken Jesus Kristus. Ma ran ‘pithig e babyor mu kun pithig ba ken,’ ni be tamilangnag e n’en nib m’agan’ Jehovah ngay ni fan ko par u lan e bin nib biech e fayleng.—Revelation 20:12.
20 Ma nap’an ni ke taw ko ngiyal’ ni turguy Jehovah ma ran fek urngin e pi Kristiano ni kan dugliyrad nga ranod nga tharmiy mi yad un ngak “Kristus ko gagiyeg.” (Roma 8:17) Nap’an fare Gagiyeg rok Kristus ni Biyu’ e Duw ma urngin e girdi’ u fayleng nib t’uf rorad e Thin Rok Got e yad ra flont u dowrad nge lanin’rad. Ma tomren ni kar pared nib yul’yul’ u fithik’ e skeng, ma yira taw’athnagrad ko yafos ni manemus ma yad ra par nib puf rogorad “mi yad un ko flaab rok pi fak Got.” (Roma 8:21; Revelation 20:1-3, 7-10) Rib fel’ ni ngan par ko ngiyal’ nem! Rriyul’, ndemtrug ni ke taw’athnagdad Jehovah ko yafos u tharmiy ara fayleng, ma n’en nra ayuwegdad e nge t’uf rodad e Thin Rok ma nge mudugilan’dad ni ngad pared nib puluw ko gonop rok Got. Ma ba ngiyal’ nga m’on ma ra ‘n’ufdad ni bochan e kad chichiyed paadad riy.’—Proverbs 4:6, 8.
Rayog ni Ngam Weliy?
◻ Mang ayuw ni ra yib ngodad ni bochan e ba t’uf rodad e Thin Rok Got?
◻ Mang e be yip’ fan e awoch ko fanathin rok Jesus, ma uw rogon ni yibe wereg?
◻ Uw rogon ni nge aw ni gad e “but’ nib yong’ol”?
◻ Mang flaab ni bay nga m’on ko piin nib t’uf rorad e Thin Rok Got?
[Picture on page 26]
Fare awoch ko fanathin rok Jesus e be yip’ fan fare thin nib fel’ ni bay ko Thin Rok Got
[Credit Line]
Garo Nalbandian
[Picture on page 27]
Pi Mich Rok Jehovah e ma folwok rok fa En ni Ga’ ni ma Wereg e Awoch
[Pictures on page 28]
Piin ni ra magay nib fos u tomren Armageddon e yad ra kay wom’engin e woldug u fayleng