“Nge Yib Waamngimed Ni Pire’”

“Faanra yib wom’engimed ni pire’; ara kanawoen mi gimed mang pi gachalpeg.”​—John 15:8.

1. (a) Mang e ke tay Jesus chilen ngak e piin ni yad ba adag ni ngar manged pi gachalpen? (b) Mang deer ni ngada fithed gadad?

KE TAW ko fare nep’ u mˈon ni yim’ Jesus. Me tay Jesus ba ngiyal’ ni nge pi’ e gel nga laniyan’ e apostal rok ni be non ngorad u fithik’ e runguy. Sana ke pag lukngun e nep’ machane ka be welthin Jesus ngak e pi tafager rok ni bochan e ri yad ba t’uf rok. Ma nap’an ni be welthin ngorad me yog ngorad ku reb e n’en ni thingar ra rin’ed ni faanra nguur pared ni yad pi gachalpen. Me gaar: “Ara’ rogon min ta’ fan e en ni Chitamangiy ni faan ra yib wom’engimed ni pire’; ara kanawoen mi gimed mang pi gachalpeg.” (John 15:8) Ma gadad, gad ma rin’ e n’en ni thingari rin’ pi gachalpen Jesus, fa? Mang fan fare thin ni “nge yib wom’engimed ni pire’”? Ngada sulod ko n’en ni be yog Jesus ko re nepˈ i n’em.

2. Mang fanathin u morngaagen waamngin e woldug ni ke weliy Jesus ko fare nep’ u m’on ni yim’?

² Fare thin ni yog Jesus ni nge yib waamngin ni pire’ e bang ko reb e fanathin ni ke weliy Jesus ngak e pi apostal rok. I gaar: “I gag e bin riyul’ i kenggin e grapes, ma Chitamag e ir e be ayuweg e woldug ni grapes. Urngin i pa’ngin nder k’uf e ma th’ab, ma ma tamilangnag owchen urngin i pa’ngin ni be yib wom’engin, ni fan e nge tamilang owchen nge yib wom’engin ni pire’. Ma gimed e kan mu’ i tamilangnag owchemed, ni aram e kam beechgad ni bochan fapi thin ni kug weliy ngomed. Mpired ni gimed ba peth ngog, mu gu par ni gub peth ngomed. Faanra dab mpired ni gimed ba peth ngog ma dabiyog ni nge yib wom’engimed, ni bod rogon pa’ngin e grapes ndabiyog ni nge yib wom’engin ni faanra dabi par nib peth nga kenggin. I gag e kenggin e grapes, ma gimed papa’ngin . . . Ara’ rogon min ta’ fan e en ni Chitamangiy ni faan ra yib wom’engimed ni pire’; ara kanawoen mi gimed mang pi gachalpeg. Gimed ba t’uf rog ni bod rogon ni gub t’uf rok e en ni Chitamangiy; ere mpired ni gimed ba t’uf rog. Faanra gimed fol ko tin ni kug ning chilen ngomed, ma gimed ra par ni gimed ba t’uf rog, ni bod rogon ni kug fol ko tin ni ning e Chitamag chilen ngog gu be par ni ku gub t’uf rok.”​—John 15:1-10.

3. Mang e thingari rin’ pi gachalpen Jesus ni fan e nge yib waamngirad?

³ U lan e re fanathin ney ma Jehovah e ma ayuweg e woldug ni grapes, ma Jesus e ir kenggin e grapes ma pi apostal ni be non Jesus ngorad e yad papa’ngin e grapes. N’umngin nap’an ni ra par e pi apostal ni yad ba “peth” ngak Jesus ma ra yib waamngirad. Me weliy Jesus rogon nrayog ni nge par e pi apostal ni ka yad ba peth ngak ni gaar: “Faan gimed ra fol ko tin ni kug ning chilen ngomed, ma gimed ra par ni gimed ba t’uf rog.” Boch nga tomren me yoloy apostal John boch e thin nib taareb rogon ngay ngak e pi Kristiano ni gaar: “En nra fol ko tin ni ke yog Got e be par u fithik’ Got.”a (1 John 2:24; 3:24) Ere faanra fol pi gachalpen Jesus ko pi motochiyel rok ma yad ra par nib peth ngak, ma ra yib waamngirad ni pire’ ni bochan e yad ba peth ngak. Mang e pi waamngin ni thingari yib rodad?

Bay Rogon Ni Nge Yoor Boch Waamngin

4. Mang e gad be fil ko fare thin ni ma “tamilangnag” Jehovah gubin papa’ngin ni dariy waamngin?

⁴ U lan fare fanathin e ma “tamilangnag” Jehovah ara ma th’ab papa’ngin ni der ma k’uf waamngin riy. Mang e gad ra fil ko re thin ney? Gad ma fil riy ni thingari yib waamngin urngin pi gachalpen maku rayog rorad ni yad gubin ni nge yib waamngirad ni yugu demutrug rarogorad ara magawon rorad. Aram rogon ya de puluw ko t’ufeg rok Jehovah ni nge “tamilangnag”, ara n’ag be’ ni gachalpen Kristus ni bochan ban’en ni ri dabiyog rok.​—Psalm 103:14; Kolose 3:23; 1 John 5:3.

5. (a) Uw rogon ni be m’ug ko fanathin rok Jesus ni rayog ni nge yoor waamngidad? (b) Mang l’agruw miti waamngin ni gad ra weliy morngaagen?

⁵ Be m’ug ko fanathin rok Jesus u morngaagen fare woldug ni grapes ni rayog ni thingar da guyed rogon nge yoor boch e maruwel rodad ni gad pi gachalpen ni be yan u rogon rarogodad. Mu tay fanam iyan riy u rogon ni weliy Jesus ni gaar: “Urngin i pa’ngig nde k’uf e ma th’ab, ma ma tamilangnag owchen urngin i pa’ngig ni be yib wom’engin, ni fan e nge tamilang owchen nge yib wom’engin ni pire’.” (John 15:2) U tungun fare fanathin me yog Jesus ngak pi gachalpen ni nge “yib wom’engimed ni pire’.” (Verse 8) Mang e be yog Jesus? Be yog ni nge dabi malmal pi gachalpen nge fel’ u wan’rad urngin waamngin ni ke yib rorad. (Revelation 3:14, 15, 19) Danga’, ya thingar da guyed e kanawo’ ni nge yoor waamngidad. Miti mang waamngin e nge yib rodad ni pire’? Waamngin ni nge yib rodad e (1) “waamngin e kan ni thothup” nge (2) waamngin Gil’ilungun Got.​—Galatia 5:22, 23; Matthew 24:14.

Waamngin Ni Pi Felngin e Kristiano

6. Uw rogon ni ke tamilangnag Jesus Kristus fene ga’ fan e bin somm’on ko waamngin e kan ni thothup?

⁶ Kan tay e t’ufeg ni ir e bin somm’on ko “waamngin e kan ni thothup.” Kan ni thothup rok Got e ra n’igin ni nge m’ug e t’ufeg u fithik’ e pi Kristiano ya kar folgad ko fare motochiyel ni pi’ Jesus u m’on ni ke weliy fare fanathin u morngaagen fare woldug ni grapes ni ma pi’ waamngin. I gaar ngak e pi apostal rok: “Nggu pi’ reb e motochiyel nib beech ngomed, nge bigimed me t’ufeg bigimed rok.” (John 13:34) Boor yay ko re nep’ nem ni ir e bin tomur e nep’ ko yafas rok u fayleng ni i puguran ngak e pi apostal ni thingar ra daged e t’ufeg.​—John 14:15, 21, 23, 24; 15:12, 13, 17.

7. Uw rogon ni ke tamilangnag apostal Peter ni waamngidad e bay rogon ko pi felngin e Kristiano?

⁷ Immoy Peter ko re nep’ nem ma manang ni thingari m’ug e t’ufeg nge pi felngin e Kristiano u fithik’ e tin riyul’ i gachalpen Kristus. In e duw nga tomren me pi’ Peter e athamgil nga laniyan’ e pi Kristiano ni ngar guyed rogon ni nge yog ngorad pi felngin e Kristiano ni bod e t’ar laniyan’, nge runguy, nge t’ufeg. Me ul’ul ngay me yog ni faanra bay pi felngin nem rorad ma “ereray e pi n’en ni nge yog ngomed, ya rayog ngomed ni pired ma gimed ra pasig.” (2 Peter 1:5-8) Yugu demutrug rarogodad, ma rayog ni nge yog ngodad pi waamngin e kan ni thothup. Ere ngada guyed rogon ni nge yoor boch e t’ufeg, nge runguy, nge sumunguy nge yugu boch pi felngin Kristus ya “dariy e motochiyel nib togopuluw ko pi n’ey.” (Galatia 5:23) Ere nge yib “waamngidad ni pire’.”

Waamngin Gil’ilungun Got

8. (a) Mang e be puthuy waamngin e kan ni thothup nge waamngin Gil’ilungun Got? (b) Mang deer ni gad ra weliy e fulweg riy?

⁸ Pi waamngin ni ma yib ko woldug ni boor raen ara ba fel’ lamen e ma pi’ gamogen fare woldug. Machane felngin pi waamngin e woldug e gathi ke mus ni bochan e ba fel’ yaan. Ya bay e awoch ko pi waamngin ni yima yung me yoor fare woldug. Maku arrogon waamngin e kan ni thothup e gathi ke mus ni fan e nge fel’ pangidad ni gad e pi Kristiano. Pi felngin ni bod e t’ufeg nge michan’ e ma n’igindad ni ngada wereged e machib u morngaagen Gil’ilungun Got ni bay ko Thin Rok Got ni bod ni yima wereg e awoch. Mu tay fanam iyan riy u rogon ni ke puthuy Paul e machib ni yad ma wereg nge pi waamngin e kan ni thothup. Be gaar: “Kug welthin ni bochan e ke michan’ug [ni bang ko waamngin e kan ni thothup] ngak Got.” (2 Korinth 4:13) Ki weliy Paul ni gaar: “Nguud pininged e magar ngak Got ni gubin ngiyal’ nge mang maligach rodad ngak” ma re maligach nem e aram e waamngin l’igindad​—ma aram e bin l’agruw miti waamngin ni thingari yib rodad. (Hebrews 13:15) Rayog ni nge yoor waamngidad ni gad be wereg e machib u morngaagen Gil’ilungun Got, fa?

9. Waamngin ni ra yib rodad e be yip’ fan ni ngan ayuweg yugu boch e girdi’ ni ngar manged pi gachalpen Jesus, fa? Mu weliy.

⁹ Faanra nge puluw e fulweg rodad ko re deer nem, ma thingar da nanged ko be mang waamngin Gil’ilungun Got. Bpuluw ni ngan lemnag ni re waamngin nem e be yip’ fan ni ngan ayuweg yugu boch e girdi’ ni ngar manged pi gachalpen Jesus, fa? (Matthew 28:19) Re waamngin nem e be yip’ fan e piin ni gad ra ayuweg ni ngar uned ko taufe, fa? Danga’. Ya faan manga arrogon ma ra gel e kireban’ rok e Pi Mich Rok Jehovah ni bokum e duw ni ur wereged e machib u morngaagen Gil’ilungun Got u boch e binaw ni gathi ri yi ba adag e machib riy. Faan manga waamngin Gil’ilungun Got e be yip’ fan piin ni ka fin ra manged pi gachalpen Jesus, ma Pi Mich Rok Jehovah nem e yad bod e papa’ngin ni dariy waamngin riy ko fanathin rok Jesus! Machane gathi aram rogon. Ere mang waamngin Gil’ilungun Got ni ma yib ni bochan e gad ma wereg e machib?

Nge Yib Waamngin Ni Bochan Awochngin Gil’ilungun Got Ni Yibe Wereg

10. Uw rogon ni be m’ug ko fanathin rok Jesus u morngaagen e ani be wereg e awoch nga daken boor miti but’ ko be mang waamngin Gil’ilungun Got ma mang e gathi waamngin Gil’ilungun Got?

¹⁰ Fanathin rok Jesus u morngaagen e ani be wereg awochngin e woldug u daken boor miti but’ e ma pi’ e fulweg ko fare deer​—ma re fulweg ney e ra pi’ e athamgil nga laniyan’ e piin ni yad ma machib u boch e binaw ni gathi ri yi ba adag e machib riy. I yog Jesus ni fare awoch e be yip’ fan e machib u morngaagen Gil’ilungun Got ni bay ko Thin Rok Got ma fapi but’ e be yip’ fan gumerchaen e girdi’. Boch e awoch e ke aw “ko but’ nib yang’ol; me tugul nge k’uf.” (Luke 8:8) Mang waamngin ni yib riy? Woldug ni wheat e ra tugul me ga’ me yib waamngin, ma waamngin e gathi yu yang e wheat ya yugu boch e awoch nib biech. Ku arrogon e pi Kristiano ni ra yib waamngirad ni gathi yugu boch i gachalpen Jesus nib biech, ya ra yib waamngirad ni machib u morngaagen Gil’ilungun Got.

11. Mang waamngin Gil’ilungun Got?

¹¹ Ere re waamngin nem e gathi yugu boch i gachalpen Jesus nib biech ara pi felngin e Kristiano. Fare awoch ni kan yung e ir e thin u morngaagen Gil’ilungun Got, ere fare waamngin nra yib riy e taareb rogon ko fare awoch ni yibe wereg ni pire’. Ere re waamngin ney e be yip’ fan e thin u morngaagen Gil’ilungun Got ni yibe wereg. (Matthew 24:14) Rayog rodad ni gad gubin ni nge yib waamngin Gil’ilungun Got ni yugu demutrug rarogodad, fa? Rayog rodad! I weliy Jesus fan ni rayog u lan fare fanathin.

Ngada Pied e Tin Th’abi Fel’ ni Fan ni Ngan Nog e Sorok Ngak Got

12. Rayog rok urngin e Kristiano ni nge yib waamngin Gil’ilungun Got rorad, fa? Mu weliy.

¹² Be gaar Jesus: “Ma awochngin e woldug ni wer nga daken e but’ ni yong’ol e be yip’ fan e piin nrung’aged e thin rok Got mi yad nang fan; mi yad k’uf, ni boch i yad e man e raay wom’engin, ma boch i yad e nel’ i ragag, ma boch i yad e guyey.” (Matthew 13:23) Awochngin e grain ni yima yung u milay’ e ra k’uf ma ba thil thil urngin ni be yan u rarogon e milay’. Maku arrogon gadad ni ba thilthil e pi n’en ni rayog ni ngada rin’ed ni gad be wereg fare thin nib fel’ ni be yan u rarogodad, me tamilang ko thin rok Jesus ni manang ni aram rogon. Boch e girdi’ e ba mab e kanawo’ ni ngar machibgad, yugu boch e girdi’ e ba fel’ boch fithik’ i dowef rorad, ma boch i yad e bay gelngirad. Ere pi n’en ni rayog ni ngada rin’ed e boor boch ngak yugu boch e girdi’ ara ba lich boch, machane faanra gad ra rin’ e tin th’abi fel’ ni rayog rodad ma ra falan’ Jehovah ngay. (Galatia 6:4) Faanra kada pilibthirgad ara ke yib e m’ar ngodad ma dabiyog rodad ni ngada machibgad nrogon ni gad ba adag, machane Jehovah ni Chitamangidad nu tharmiy ni ma t’ufegdad e ma tay ni ba taareb rogodad ngak e piin ni “boor waamngirad.” Mang fan? Ya gad ma pi’ ngak “urngin e tin ni bay rodad ban’en”​—ma gad ma pigpig ngak u polo’ i gumercha’dad.b​—Mark 12:43, 44; Luke 10:27.

13. (a) Mang e bin th’abi ga’ fan ni nge yib waamngin Gil’ilungun Got rodad? (b) Mang e ra ayuwegdad ni nge yib waamngidad u boch e binaw ni gathi ri yi ba adag e machib riy? (Mu guy e thin ko page 19.)

¹³ Yugu demutrug urngin waamngin Gil’ilungun Got e ma yib rodad, ma rayog ni nge yib “waamngidad ni pire’” ni faanra dab da paged talin fan ni nge yib waamngidad. (John 15:16) I weliy Jesus e bin ni baga’ fan ni nge yib waamngidad ni gaar: “Ara’ rogon min tay fan e en ni Chitamangiy ni faan ra yib wom’engimed ni pire’.” (John 15:8) Arrogon, machib ni gad ma tay e ma tay fan e ngochol rok Jehovah u p’eowchen urngin e girdi’ nu fayleng. (Psalm 109:30) Be’ ni ppin ni Honor fithngan ni gonapan 70 e duw rok e ke gaar: “Mus ko pi binaw ni gathi ri yi ba adag e machib riy ma reb e taw’ath ni baga’ e nge mang be’ owchen e Ani Th’abi Tolang.” Un fith ngak Claudio ni ir be’ Mich Rok Jehovah ni ka nap’an e duw ni 1974 ko mang fan ni ka ma machib ni yugu aram rogon ni ri buchuw e girdi’ ko binaw rok ni ba adag e machib. Me fulweg e re deer nem me bieg e thin u John 4:34 ni thin rok Jesus ni gaar: “Ggan rog e nggu fol ko tin ni finey e en ni l’ugeg ku gub, ma nggu mu’nag e maruwel ni ke pi’ ngog ni nggu muruwliy.” Me ul’ul Claudio ngay ni gaar: “Gu ba adag ni nggu bod Jesus ni gathi ke mus ni nggu tabab ko machib ya nggu mu’nag e maruwel rog ni nggu wereg e machib u morngaagen Gil’ilungun Got.” (John 17:4) Ku arrogon laniyan’ e Pi Mich Rok Jehovah u fayleng iyan.​—Ku mu guy fare thin “Rogon ni Nge Yib Waamngim U Fithik’ e Guman’.”

Ngan Wereg e Thin Ma Ngan Fil e Machib Ngak Yugu Boch e Girdi’

14. (a) Mang l’agruw i fan e maruwel rok John ni Tataufe nge maruwel rok Jesus? (b) Mu weliy rogon e maruwel rok e pi Kristiano e ngiyal’ ney?

¹⁴ Ani somm’on ni wereg e machib u morngaagen Gil’ilungun Got u lan e pi Gospel e ir John ni Tataufe. (Matthew 3:1, 2; Luke 3:18) I machib John ni fan e nge “wereg e thin” me rin’ e maruwel rok u fithik’ e michan’ ni fan e “nge rung’ag e girdi’ mi yad gubin me mich u wun’rad.” (John 1:6, 7) Boch e girdi’ ni i machibnagrad John e kar manged pi gachalpen Kristus. (John 1:35-37) Gathi ke mus ni ke wereg e thin ya ke ayuweg yugu boch e girdi’ ni ngar manged pi gachalpen Jesus. Maku arrogon Jesus ni ir be’ ni tamachib maku ir e sensey. (Matthew 4:23; 11:1) Me tay Jesus chilen ngak pi gachalpen ni gathi ke mus ni ngar wereged e machib u morngaagen Gil’ilungun Got ya ngkur ayuweged yugu boch e girdi’ ni ngar manged pi gachalpen. (Matthew 28:19, 20) Maruwel rodad e chiney e ngada wereged e machib ma ngada filed e machib ngak yugu boch e girdi’.

15. Uw rogon ni ba taareb rogon e machib u wan’ e girdi’ ko bin somm’on e chibog nge machib ni gad be tay e chiney?

¹⁵ Nap’an e bin somm’on e chibog e ke rung’ag boch e girdi’ e machib rok Paul “ma ba’ boch i yad ni mich e thin ni ke yog u wun’rad, ma boch i yad e de mich u wun’rad e thin ni ke yog.” (Acts 28:24) Maku arrogon e ngiyal’ ney. Ba gafgow, ya boor awochngin Gil’ilungun Got ni ke aw nga daken e but’ ni dabiyog ni nge tugul riy. Machane ma aw boch e awoch nga daken e but’ nib fel’, me yan lik’ngin me tugul, ni bod rogon ni yog Jesus. U gubin e wik ko yu duw ma gonapan 5,000 e girdi’ nra manged pi gachalpen Kristus u fayleng iyan! Piin ni ka fin nra manged pi gachalpen Jesus e “ke mich u wan’rad” ni yugu aram rogon ni de mich u wan’ yugu boch e girdi’. Mang e ke n’igin gumercha’rad ni nge adag e machib u morngaagen Gil’ilungun Got? Kar adaged e machib ni bochan e t’ufeg e Pi Mich Rok Jehovah e girdi’​—ni gowa yad be puog e ran nga daken e awoch ni ka fin yung. (1 Korinth 3:6) Ngada weliyed morngaagen l’agruw ni’.

Ngan T’ufeg e Girdi’ Ma Bay Angin

16, 17. Mang fan ni ngada t’ufeged e girdi’ ngak e piin ni gad be machibnag?

¹⁶ Karolien, ni ir be’ nib fel’ yangaren nu Belgium ni ir reb e Mich Rok Jehovah e ke machibnag be’ ni ppin nib pilibthir ni gathi ri ba adag e machib. Ke guy Karolien ni kan bachiy pa’ fare pilibthir ere ba adag Karolien nge ani yow ni ngar piew boch e ayuw, machane dubun fare pilibthir. L’agruw e rran nga tomren me sul fa gali Mich Rok Jehovah nga tafen fare ppin ngar nangew salpen fare pilibthir. Be gaar Karolien: “Ba’ angin, ya ke gin ngay ni ri gamow be t’ufeg. Me piningmow nga lan tafen me tabab reb e Bible study.”

¹⁷ Sandi, ni ir reb e Mich Rok Jehovah u Meriken e ma t’ufeg e piin ni ma machibnagrad. Ma bieg e shimbung ni be gay e piin ni ka fin nra gargel, me yan nga taferad nge pi’ fare ke babyor ni Babyor Rog Ni Chep Nu Biblec ngak e gallabthir. Baga’ ni bay e matin u tabinaw ni kari falfalan’ me dag e bitir rok ngak Sandi, ma baga’ ni yad ra sabathin. Be gaar Sandi: “Gu ma weliy ngak ni baga’ fan ni ngan bieg e babyor ngak e bitir. Mu gu weliy rogon fene mo’maw’ ni ngan chuguliy e bitir e ngiyal’ ney.” Bochan e machib ni aray rogon ma de n’uw nap’an faram e ke un reb e matin nge nel’ e bitir rok ko machib me pigpig ku Jehovah. Gad ra dag e t’ufeg ni aram rogon maku ra yib angin e machib ni gad ma tay.

18. (a) Mang fan ni rayog rodad ni nge yib waamngidad ni pire’? (b) Mang fa dalip i n’en ni thingari rin’ urngin pi gachalpen Jesus nrogon ni bay ko Gospel rok John ni ga ra rin’?

¹⁸ Rib fel’ ni ngan nang ni rayog rodad ni ngada folgad ko motochiyel rok Jesus ni nge “yib waamngidad ni pire’!” Gad gubin ni rayog ni nge yib waamngidad ni pire’ ni yugu demutrug ko ke fel’ yangardad ara kada pilibthirgad, ma ke fel’ fithik’ i dowef rodad ara de fel’, ma gad be machib u reb e binaw ni yi ba adag e machib riy ara gathi ri yad ba adag e machib. Uw rogon? Rayog ni faan gad ra dag waamngin e kan ni thothup maku rayog ni faan gad ra wereg fare machib u morngaagen Gil’ilungun Got u rogon nrayog rodad. Ma ngada guyed rogon ni “nguuda pared ko thin rok Jesus” ma “nge bagadad e nge t’ufeg bagadad.” Arrogon, faan gad ra fol ko fa dalip i motochiyel rok pi gachalpen Jesus nrogon ni bay ko gospel rok John ma rayog ni ngada micheged ni “ri gad pi gachalpen Kristus.”​—John 8:31; 13:35.

[Footnotes]

Boch e Deer ni Fan ko Skeng

• Miti mang waamngin ni nge yib rodad ni pire’?

• Mang fan ni rayog rodad ni nge “yib waamngidad ni pire’”?

• Mang fa dalip i n’en ni thingari rin’ pi gachalpen Jesus ni bay ko Gospel rok John ni kada weliyed?

[Box/Picture on page 19]

Rogon Ni Nge Yib “Waamngim U Fithik’ E Guman’”

MANG e ra ayuwegem ni ngam machib u fithik’ e yul’yul’ u reb e binaw ni gathi ri yi ba adag e machib riy? Ba aray boch e thin ni fulweg e re deer nem ni ra ayuwegem.

“Faan gad ra nang ni be ayuwegdad Jesus e ra ayuwegdad ni nge puluw lanin’dad ma ngada athamgilgad boch ni yugu demutrug rarogon e girdi’ u lan binaw.”​—Harry, ni 72 e duw rok; un taufenag ko duw ni 1946.

“Fare thin u lan e babyor nib thothup u 2 Korinth 2:17 e ma pi’ e gel ngog. Be yog e re thin nem ni gad be “weliy e tin nib riyul’ u p’eowchen nrogon e pi tapigpig rok Kristus.” Ere nap’an ni gu be machib ma be un fagali fager rog ngog.”​—Claudio, ni 43 e duw rok; un taufenag ko duw ni 1974.

“Bin riyul’ riy e gu ma magawon u nap’an ni gu ma machib u mit e tabinaw. Machane kug pirieg nib riyul’ fare thin u Psalm 18:29 ni gaar “Rayog ni nggu th’ab nga barba’ I yoror ni bochan e Got e be ayuwegeg.””​—Gerard, ni 79 e duw rok; un taufenag ko duw ni 1955.

“Faan rayog ni nggu bieg taa bugithin u lan e Bible u nap’an ni gu be machib ma rib fel’ lanin’ug riy ya ke skengnag e Bible gumerchaen be’.”​—Eleanor, ni 26 e duw rok; un taufenag ko duw ni 1989.

“Gu ma thil thilyeg rogon ni gu ma machib. Boor kanawoen e machib ma dabiyog ni nggu fanay urngin e pi kanawo’ nem u nap’an e yafas rog.”​—Paul, ni 79 e duw rok; un taufenag ko duw ni 1940.

“Faanra dubun be’ e machib ma de magawon e tafinay rog. Gu ma sabathin e girdi’ ma gu ma motoyil ko thin rorad.”​—Daniel, ni 75 e duw rok; un taufenag ko duw ni 1946.

Mang e be ayuwegem ni “nge yib waamngim u fithik’ e gum’an’”?​—Luke 8:15.

[Pictures on page 18]

Ra yib waamngidad ni pire’ ni faanra gad be dag waamngin e kan ni thothup ma gad be wereg e machib u morngaagen Gil’ilungun Got

[Picture on page 21]

Mang fan e thin rok Jesus u nap’an ni yog ngak e pi apostal ni gaar: “Nge yib waamngimed ni pire’”?