Mu Sap nga Fel’ngin e Maruwel ni Ga Be Tay

1. Mang e rayog ni nge malmalnagdad ko machib?

¹ Kan sunmiy e girdi’ ni ngar ‘felfelan’gad ko tin ni kar thognaged.’ (Ekl. 2:24) Machane, faanra dab da sapgad nga angin e machib ni gad be tay, ma rayog ni nge mulan’dad ma aram e dab kud felfelan’gad ma dab kud pasiggad. Mang e rayog ni nge ayuwegdad ni ngaud sapgad nga fel’ngin ban’en?

2. Mang fan ndab da lemnaged angin e machib ni gad be tay nge pag rogon?

² Dabi Pag Rogon ni Ngad Lemnaged Angin e Machib: Dab mu pagtalin ni yugu aram rogon ni buchuuw e girdi’ ni ur motoyilgad ngak Jesus, machane ba fel’ rogon e machib ni i tay. (John 17:4) I weliy Jesus ko fare fanathin ni murung’agen facha’ ni yung e awoch ni yooren e girdi’ e dab ra adaged ni ngar motoyilgad ko fare thin nib fel’ ni murung’agen Gil’ilungun Got ni yibe wereg ni bod rogon e awoch. (Matt. 13:3-8, 18-22) Yugu aram rogon, ma boor ban’en ni be yog ni ngad rin’ed ni bochan e athamgil ni gad be tay.

3. Uw rogon ni nge yib wom’engidad ni yugu aram rogon ni buchuuw e girdi’ ni yad be motoyil ko machib ni gad be tay?

³ Rogon ni Ma Yib Wom’engidad nib Pire’: Rogon ni yog Jesus ko fanathin rok e piin ni yad ra motoyil ko fare thin nib fel’ mi yad fol riy e yad ra “k’uf” ara yib wom’engirad. (Matt. 13:23) Nap’an nra ilal e wheat nge fel’ rogon, ma wom’engin nra yib e gathi nochi konyel e wheat ya aram boch e awoch nib beech. Ere angin e machib ni ma tay e pi Kristiano ni ma yib e gathi boch i gachalpen Jesus nib beech, ya urngin e awoch ni kad wereged ni aram e thin ni kad machibnaged u murung’agen Gil’ilungun Got. Re n’ey e ma yib ko “tin” nib fel’ ni kad rin’ed nrayog ni ngad felfelan’gad ngay ni yugu demtrug ko ke motoyil e girdi’ ngodad fa danga’. N’en ni gad be rin’ e be tayfan fithingan Jehovah nib thothup. (Isa. 43:10-12; Matt. 6:9) Ku gad be felfelan’ ko fare tow’ath ni bay rodad ni aram e gad be maruwel Got u taabang. (1 Kor. 3:9) Ma pi ‘maligach ney ni gad ma pi’ u dap’ilangdad’ e ri ma felfelan’nag Jehovah.—Heb. 13:15, 16.

4. Mang angin e machib ni gad ma tay ndarud nanged?

⁴ Maku reb e rayog ni be yib angin e maruwel nib gel ni gad be tay, machane darud guyed. Rayog ni immoy boch e girdi’ ni ur guyed Jesus ni i machib machane dar manged boch i gachalpen. Fin tomuren ni sul nga tharmiy e aram e ngiyal’ nra manged boch i gachalpen. Ere ku aram rogon awochngin e tin riyul’ ni gad be wereg nrayog ndabi ilal u gum’irchaen boch e girdi’ e chiney, machane rayog ni nge boch ngaram mi yad yib ko tin riyul’. Arrogon, ba ga’ angin e machib ni gad ma tay. Ere, manga yigi ‘yib wom’engidad nib pire’’ ma gad micheg ni gad pi gachalpen Jesus.—John 15:8.