Ngii Yib “Wom’engimed nib Pire’”

¹ I weliy Jesus u fithik’ e fanathin ni ir e be yip’ fan e bin riyul’ i kenggin e grapes, ma Chitamangin e ir fa En ni be ayuweg e woldug, ma pi gachalpen ni kan dugliyrad ko kan ni thothup e be yip’ fan pa’ngin e woldug ni be yib wom’engin. Nap’an ni be weliy Jesus u murung’agen e maruwel ni tay fa En ni be ayuweg e woldug me tamilangnag ko uw fene ga’ fan ni ngan par nib peth nga kenggin. (John 15:1-4) N’en ni yibe fil ngodad e gubin e girdi’ ni ke fel’ thilrad Jehovah e thingara boded pa’ngin e “bin riyul’ i kenggin e grapes,” ni aram Jesus Kristus. Thingarda pared ni bay wom’engin fare “kan ni thothup” rodad ma be yib wom’engin Gil’ilungun Got ngodad.​—Gal. 5:22, 23; Matt. 24:14; 28:19, 20.

² Wom’engin fare Kan ni Thothup: Rogon ni gad be mon’og iyan ko tirok Got ban’en e be m’ug u rogon ni gad be dag wom’engin fare kan ni thothup. Ga ma athamgil ni nge m’ug wom’engin fare kan ni thothup rom ma ga be fil ma ga be fl’eg i lemnag e Thin Rok Got u gubin ngiyal’? (Fil. 1:9-11) Dabmu tinna’ ni ngam meyil ni nge ayuwegem fare kan ni thothup ya rayog ni nge yib ngom felngin ni ma n’uf Jehovah ma ga ra mon’og iyan ko tirok Got ban’en.​—Luke 11:13; John 13:35.

³ Gad ra athamgil nge m’ug wom’engin fare kan ni thothup rodad ma gad ra pasig ko machib. Susun, t’ufeg nge michan’ e ra k’aringdad ni ngad fl’eged e schedule rodad ni ngad uned ko machib u gubin ngiyal’. Pi felngin ni gapas, nge k’adan’, nge gol, nge sumunguy, nge t’ar laniyan’ e ma ayuwegdad ngad pied e fulweg nib fel’ ko piin ni ma togopuluw ngodad. Falfalan’ e ma ayuwegdad nge felan’dad ko machib ni mus ni dabun e girdi’ e machib.

⁴ Wom’engin Gil’ilungun Got: Ku gad ba adag ni nge yib wom’engidad ko Gil’ilungun Got. Aram e ba muun ngay ni “nguud pininged e magar ngak Got ni gubin ngiyal’ nge mang maligach rodad ni aram e gubin ngiyal’ ni nguud pininged e magar nga fithingan u lungudad nga dogned ni ir e Somol.” (Heb. 13:15) Gad ma rin’ e re n’ey u nap’an ni gad ma pasig i wereg fare thin nib fel’. Ga be athamgil ni nge yib wom’engin Gil’ilungun Got ma ngam mon’og ko machib ni ga be tay?

⁵ I tamilangnag Jesus ni pi gachalpen nib yul’yul’ e ra yib wom’engirad nib thilthil urngin. (Matt. 13:23) Ere susun dabda taareb naged gadad ngak yugu boch e girdi’ ya ngad pied e tin th’abi fel’ rodad ngak Jehovah. (Gal. 6:4) Ngad yaliyed gadad ko uw rarogodad nge rogon nib m’ag ko Thin Rok Got ma ra ayuwegdad nguud n’ufed Jehovah ya “nge yib wom’engidad ni pire’.”​—John 15:8.