Ba Fel’ u Wan’dad ni Ngad Athamgilgad ko Pigpig ku Jehovah!

¹ I felan’ apostal Paul ni nge “pi’ urngin e tin ni ba’ rok nge ir” ni fan e nge rin’ e tin nib mil fan ngak ko machib ko Kristiano. (2 Kor. 12:15) Ku arrogon e ngiyal’ ney ni boor e Kristiano ni yad be maruwel nib elmirin ni yad e pioneer. Ma boch e girdi’ e thingara ayuweged e tabinaw rorad ni yugu demtrug ni boor pa’ u puluwrad ma yad ma un ko machib u gubin e wik. Ma boch e girdi’ e yad ba m’ar ni yad ma fanay gelngirad ni ngar mon’eged Gil’ilungun Got. Rib fel’ ni ngan guy girdien Jehovah ni demtrug salperad ara duw rorad ma yad ma athamgil ko pigpig ku Jehovah!

² Ba T’uf Rodad e Piin Buguli Yoror Rodad: Dariy ban’en nra methan’dad ngay ni faanra gad ra rin’ urngin ban’en nrayog rodad ko pigpig ku Jehovah ya gad be dag nib t’uf Jehovah rodad nge piin buguli yoror rodad. I athamgil Paul nge mus rogon ni nge wereg fare thin nib fel’ me ere rayog ni nge gaar: “Ri gu be yog ngomed e daba’ ni be lungug: Faanra malog bigimed, me gag e dariy rogon ngog.” (Acts 20:24, 26; 1 Thess. 2:8) Gad ra un ko machib u rogon nrayog rodad ma dariy e kireb rodad.​—Ezek. 3:18-21.

³ Ra yib e falfalan’ ngodad ni ngad maruwelgad nib elmirin ni ngad ayuweged e girdi’. (Acts 20:35) Yog reb e walag ni gaar: “Nap’an ni ke aw e yal’ ma kug sul nga tabinaw u tomren ni kug pigpig ku Jehovah reb e rran ma riyul’ ni ke magaf dowag. Machane kug falfalan’ ma gu ma pining e magar ku Jehovah ya ke pi’ e falfalan’ ngog ndariy be’ nrayog ni nge chuweg.”

⁴ Ba T’uf Got Rodad: Bin th’abi ga’ fan ni gad ma athamgil ni ngad pigpiggad ku Jehovah e bochan ni ma felan’ e Chitamangidad ngay. Bochan ni ba t’uf Got rodad ma gad ma fol ko pi motochiyel rok, nib muun ngay ni ngan machibnag e girdi’ min ayuwegrad ngar manged pi gachalpen Jesus. (1 John 5:3) Mus ni dabun e girdi’ e machib ma yad be togopuluw ngay ma gad ba falfalan’ ni ngad ul’ulgad i rin’ e maruwel nib elmirin ni fan ku Jehovah.

⁵ Gathi ereray e ngiyal’ ni ngan tal. Gad be par ko ngiyal’ ko mokun woldug. (Matt. 9:37) Be’ ni tamokun woldug e boor e awa ni ma maruwel u nap’an e ngiyal’ ni mokun woldug ya dabki n’uw nap’an me kireb e woldug. Maku arrogon e ngiyal’ ko mokun woldug nib spiritual e ba ngoch nap’an. Dabda paged talin e ngiyal’ ni gad be par riy ma nguud athamgilgad nge mus rogodad ko machib.​—Luke 13:24; 1 Kor. 7:29-31.