‘Mpired Ni Gimed Ba Gel Ma Damur Rusgad!’
“Dab mu rusgad! Ya kug gel ko fayleng.”—JOHN 16:33.
1. Mang thin ni ke pi’ e gel nga laniyan’ piyu Israel u m’on ni ka ranod nga lan e binaw nu Canaan?
NAP’AN ni be n’en ni nge th’ab piyu Israel e lul’ nu Jordan nga ranod nga lan fare binaw ni kan micheg ngorad, me yog Moses ngorad ni gaar: “Mpired ni gimed ba gel ma damur rusgad. Dab mu tamdaggad ngorad. Ya Got romed ni aram Somol e bayi un ngomed.” Ma aram me pining Moses Joshua ni ir e nge mang e ga’ rok piyu Israel me ayuwegrad nga ranod nga lan e binaw nu Canaan, me yog ngak Joshua ni nge dabi rus. (Deuteronomy 31:6, 7) Boch nga tomren me pi’ Jehovah e gel nga laniyan’ Joshua ni gaar: “Mu gelnagem ma dab mu rus . . . Dab mu tamdag ma dabi mulan’um.” (Joshua 1:6, 7, 9) Bpuluw e pi thin nem ko ngiyal’ nem. Ya ba t’uf rok piyu Israel ni nge dab ra rusgad ko pi toogor rorad ni bay ko ba’ nem e lul’ nu Jordan.
2. Uw rarogodad e ngiyal’ ney, ma mang e ba t’uf rodad?
2 Ngiyal’ ney e be n’en ni th’ab e tin riyul’ e Kristiano nga ba’ nem nga ranod nga lan fare m’ag nib biech ni ke micheg Got, ma thingar da boded Joshua ma nge dab da rusgad. (2 Peter 3:13; Revelation 7:14) Machane ba thil rarogodad ngak Joshua. Ya i mahl Joshua me fanay e sayden nge sarey. Mahl ni gad be tay e be yip’ fan ban’en ma dab da fanayed talin e cham. (Isaiah 2:2-4; Efesus 6:11-17) Maku ba thil rarogodad ya i mahl Joshua u tomren ni un nga lan fare binaw ni ke micheg Got. Ma gadad e gad be magawon e chiney—u m’on ni gad ra th’ab nga ba’ nem nga lan fare m’ag nib biech. Ngada weliyed boch e magawon ni bay rodad nge fan ni thingar dab da rusgad.
Mang Fan Ni Thingar Da Athamgilgad?
3. Mang e be tamilangnag e Bible u morngaagen e bin ni baga’ e toogor rodad?
3 I yol apostal John ni gaar: “Gadad manang nib mil fadad ngak Got, ma tin ni ka ba’ e girdi’ nu fayleng e ke suweyrad Faanem nib Kireb.” (1 John 5:19) Re thin ney e ma tamilangnag fan nib gel e maruwel rok e pi Kristiano ni ngar pared nib gel e michan’ rorad. Nap’an ni ra yul’yul’ be’ ni Kristiano ma gonapan ni ke war Moonyan’. Ere ma yan Satan ni bod “ba layon ni be tolul” ni be guy rogon ni nge k’aring e marus ngak e pi Kristiano ma nge longuyrad. (1 Peter 5:8) Ma mahl ngak e pi Kristiano ni kan duguliyrad ko kan ni thothup maku ma mahl ngak e piin ni kar uned ngorad. (Revelation 12:17) Ma fanay Satan e girdi’ ko re mahl ney ni ngar pigpiggad ngak ni boch e girdi’ ni yad manang ni kar uned nga ba’ rok Satan nge boch e girdi’ ni dar naabgad ngay. Ere thingari gel laniyan’ be’ ni nge par nib mudugil u fithik’ e togopuluw rok Satan nge pi girdi’ rok.
4. Mang ginang ni i pi’ Jesus, machane uw rogon laniyan’ e tin riyul’ e Kristiano?
4 Manang Jesus ni ra gel e togopuluw rok Satan nge pi girdi’ rok ni yad be togopuluw ko fare thin nib fel’, ere i ginang Jesus pi gachalpen ni gaar: “Ma aram e bayi kolmed e girdi’ ngar pied gimed ngan gechignagmed ma bay nthang e fan romed. Ma urngin e girdi’ ni bay ra fanenikayed gimed ni bochag.” (Matthew 24:9) Bpuluw e re thin nem u nap’an e bin somm’on e chibog ma kub puluw e ngiyal’ ney. Gafgow ni ke tay e Pi Mich Rok Jehovah e ngiyal’ ney e bod gelngin e gafgow ni tay e pi Kristiano kakrom. Arrogon, machane der rus e tin riyul’ e Kristiano u fithik’ e pi gafgow nem. Yad manang ni “piin nra tamdag ngak e girdi’ e ra aw ko wup” ma dubrad ni ngan kolrad u lan e wup.—Proverbs 29:25.
5, 6. (a) Mang boch ban’en ni ma buch ni dab da rusgad ngay? (b) Mang e ma rin’ e pi Kristiano ni yad ba yul’yul’ u nap’an ni yira skengnagrad?
5 Ku bay yugu boch e magawon ni gathi togopuluw ni dab da rusgad ngay. Boch e girdi’ e mmo’maw’ rorad ni ngar machibnaged fare thin nib fel’ ngak yugu boch e girdi’ ni dar nanged owcherad. Kan skengnag gelngin laniyan’ boch e bitir rodad u skul u nap’an ni ka nog ngorad ni ngar siro’gad ko nam ara flag. Pi bitir ni Kristiano e kar duguliyed lanin’rad ni ngar falan’naged Got ma dar siro’gad nga yugu boch ban’en. Ngongol rok e pi bitir nem e ma falan’nagdad.
6 Ma ku thingari gel lanin’dad u nap’an ni ra sasalap e pi toogor rodad ni yad be wereg e thin u morngaagen e pi tapigpig rok Got ni yad be guy rogon ni ngar taleged e machib rodad ko makath ni yad be tay. (Psalm 94:20) Ra uw rogon lanin’dad ni faanra bay e sasalap u shimbung ara radio ara television ni be kirebnag morngaagen e Pi Mich Rok Jehovah? Gad ra gin ngay, fa? Danga’. Ya gad manang ni ra yib e thin ni aram rogon. (Psalm 109:2) Ma dab da gingad ngay ni ra tay boch e girdi’ ni ba riyul’ e pi sasalap nem ya “be’ ni de yoor ban’en ni manang e ra mich urngin e thin u wan’.” (Proverbs 14:15) Machane pi Kristiano ni yad ba yul’yul’ e dabi mich u wan’rad urngin e thin u morngaagen pi walagrad, ma dab ra paged e sasalap ni nge n’iginrad ni ngar talgad ko muulung, ara machib u mit e tabinaw ara nge maruwaran’rad. Danga’ ya “urngin ban’en ni yad be rin’ e yad be dag riy ni yad bogi tapigpig rok Got . . . Kan tay farad ma kan n’ag farad, ma ka nog e thin nib kireb ngorad ma ka nog e sorok ngorad. Yibe finey ni yad be lifith l’ugunrad, machane yad be weliy e tin nib riyul’.”—2 Korinth 6:4, 8.
7. Mang boch e deer ni ngada fithed gadad?
7 I yol Paul ngak Timothy ni gaar: “Ya kan ni thothup ni ke pi’ Got ngodad e dar ma ngongliydad ni ngad rusgad, machane kan ni thothup rok e ma pi’ gelngidad . . . Ere dab mu tamra’ ni nguum weliy murung’agen e Somol rodad.” (2 Timothy 1:7, 8; Mark 8:38) Kada bieged e re thin nem u Bible, ere ngada fithed gadad: “Gu ma tamra’ ni bochan e michan’ rog, fa ba gel lanin’ug? Yi manang u taban e maruwel (ara u skul) ni gag reb e Mich Rok Jehovah, fa gu ma mithag? Gu be tamra’ ni bochan e gub thil ko yugu girdi’, fa gub falfalan’ ni bochan e ba fel’ thilmow Jehovah?” Faan manga ke tamra’ be’ ni bochan e be machibnag fare thin nib fel’ ara be rin’ ban’en ni der ma rin’ e yugu girdi’ ma dabi pag talin fare thin ni yog Jehovah ngak Joshua ni gaar: “Dab mu rus ma ga par ni gab gel.” Ma dab mu pag talin ni n’en ni baga’ fan e gathi lem rok e girdi’ ni gad ma maruwel u taabang ara girdi’ ni gad nga skul ya n’en ni baga’ fan e lem rok Jehovah nge Jesus Kristus.—Galatia 1:10.
Rogon Ni Ngada Gelnaged Lanin’dad
8, 9. (a) Uw rogon ni kan skengnag gelngin e tin riyul’ e Kristiano? (b) Mang e rin’ Peter nge John u nap’an ni kan nog ni ngan rin’ ban’en nib kireb ngorow, machane mang e buch rorow nge pi walagrow?
8 Uw rogon nrayog ni ngada gelnaged lanin’dad ni fan e nguuda pared ni gad ba yul’yul’ e chiney nib mo’maw’ e par riy? Uw rogon ni ke gelnag e tin somm’on e Kristiano lanin’rad? Amu lemnag e n’en ni buch u nap’an ni yog e tin tolang ko prist nge pi tolang nu Jerusalem ngak Peter nge John ni ngar talgow ko machib u fithngan Jesus. Dar talgow, mi nog ngorow ni ngan gechignagrow min pagrow. Ma nap’an ni kar sulow ngak pi walagrow kar meybilgad u taabang ni lungurad: “Somol, mu changar ko tin ni ka rogned ni yad ra rin’ ngomad ma ga ayuwegmad e pi tapigpig rom nggu weliyed e thin rom ndab kug rusgad.” (Acts 4:13-29) Me fulweg Jehovah taban e meybil rorad me gelnagrad ko kan ni thothup, ma boch nga tomren e ke yog e pi tayugang’ nu Jew ni “kar suguyed Jerusalem” ko machib rorad.—Acts 5:28.
9 Ngada fl’eged i yaliy e n’en ni ke buch ko re ngiyal’ i n’em. Nap’an ni gelnag e pi tolang rok yu Jew e thin rorad, de lemnag fa gali gachalpen Jesus ni ngar talgow. Danga’, ya i meybil pi gachalpen Jesus ni nge yib e gel ngorad ni nguur machibgad. Ma aram e kar ngongolgad nrogon e meybil rorad, me gelnagrad Jehovah me pi’ e kan ni thothup rok ngorad. N’en ni buch rorad e be dag nib puluw e thin rok Paul ngak urngin e Kristiano u nap’an ni yira gafgownagrad. I gaar Paul: “Demturug e mit i n’en ni gu ra mada’nag ma ba’ gelngig ni ke pi’ Kristus nrayog ni gu par riy.”—Filippi 4:13.
10. Uw rogon ni ra yib e ayuw ngak e piin ni yad ba satamra’ ni bochan e n’en ni buch rok Jeremiah?
10 Ra uw rogon ni faanra ba satamra’ be’. Rayog rok ni nge pigpig ku Jehovah ni de rus u nap’an e togopuluw, fa? Rayog! Dab mu pag talin e thin rok Jeremiah u nap’an ni ke duguliy Jehovah Jeremiah ni nge mang reb e profet. I gaar fare pagal: “Kaygi gel fanag bitir.” Rib tamilang ni i lemnag Jeremiah ni de bung rogon ni nge mang reb e profet. Machane i pi’ Jehovah e gel nga laniyan’ Jeremiah ni gaar: “Dab mog ni kayigi gel fanam bitir, ya ngam man ngak e girdi’ ni bay gu piem ngam man ngorad, ma ga weliy ngorad urngin e tin ni bay gog ngom ni ngam weliy.” Dab mu tamdag ngorad, ya bay ug un ngom nguug yoror rom.” (Jeremiah 1:6-10) I pagan’ Jeremiah ngak Jehovah, me pi’ Jehovah e gel ngak ni nge dabki satamra’ me mang Jeremiah reb e mich ni dariy e tamdag rok u Israel.
11. Mang e ma ayuweg e pi Kristiano e chiney ni ngar boded Jeremiah?
11 Kan pi’ e maruwel ngak e pi Kristiano ni kan duguliyrad ko kan ni thothup ni taareb rogon ko maruwel rok Jeremiah, ma ke un fare “ulung ni baga’” ko “yugu boch e saf” ngorad ni ngar wereg e thin u morngaagen e tin nib m’agan’ Jehovah ngay, ni mus ko ngiyal’ ni yira togopuluw ngorad ara moningnagrad ara dariy fannagrad. (Revelation 7:9; John 10:16) Kar gelgad ni bochan e thin rok Jehovah ngak Jeremiah ni gaar: “Dab mu tamdag ngorad.” Dar paged talin ni Got e ke pi’ fare maruwel ngorad ma machib rok e yad be wereg.—2 Corinthians 2:17.
Morngaagen e Piin Nib Gel Ma Ngan Folwok Rorad
12. Mang kanawo’ nib fel’ ni ke pi’ Jesus ngodad, ma uw rogon ni ke pi’ e gel nga laniyan’ pi gachalpen?
12 Rayog ni ngada gelgad ni faanra gad ra fl’eg i lemnag morngaagen e piin ni dar rusgad ni bod Jeremiah ni de tamdag. (Psalm 77:12) Susun, faan gad ra lemnag e machib ni tay Jesus ma gad ra guy ni de tamdag u nap’an ni yib Satan ngak ni be guy rogon ni nge waliy ara nap’an ni ke gel e togopuluw rok e pi tolang nu Jew ngak. (Luke 4:1-13; 20:19-47) Bochan gelngin Jehovah e ke par Jesus nib mudugil, ma u m’on ni ke yim’ i yog ngak pi gachalpen ni gaar: “Bayi gafgownagmed e fayleng. Machane dab mu rusgad! Ya kug gel ko fayleng!” (John 16:33; 17:16) Maku rayog ni nge gel pi gachalpen Jesus ni faan yad ra folwok rok Jesus. (1 John 2:6; Revelation 2:7, 11, 17, 26) Machane thingar “dab ra rusgad.”
13. Mang e yog Paul ngak piyu Filippi ni nge pi’ e gel nga lanin’rad?
13 In e duw nga tomren ni yim’ Jesus, min kalbusnag Paul nge Silas u Filippi. Ma boch nga tomren me pi’ Paul e gel nga laniyan’ e ulung nu Filippi ni ngar “pared ni yad mudugil ntaa ban’en ni yad be nameg, ma yad be athamgiliy u taab yang ni taa ban’en e yad be athapeg ni aram e nge mich u wan’ e girdi’ fare Thin Nib Fel’ ni yib rok Got. Ri dar rusgad ngak e pi toogor rorad.” I pi’ Paul e athamgil nga lanin’rad ni gaar: “Ma nge athamgil lanin’med ni gubin ngiyal’, erera’ e re n’en [ni yibe gafgownag e pi Kristiano] nra micheg ngorad ni bay ra wargad [e piin ni yad gafgownag e pi Kristiano], ma gimed e bay mu gelgad—yi Got e ir e bayi ayuwegmed ngam gelgad! Ya ke mel’egmed Got ni ngam pigpiggad ngak Kristus ni gathi ke mus ni ngam pired nib mich u wun’med, machane ngku um gafgowgad ni fan ngak.”—Filippi 1:27-29.
14. Mang angin e gel ni tay Paul u Roma?
14 Nap’an ni yol Paul ngak e ulung nu Filippi, immoy u kalbus u Roma. Machane ka be machibnag yugu boch e girdi’ ni dariy e marus rok. Mang angin e machib ni tay? I yol ni gaar: “Me ere chiney e urngin e matanag u tafen e en ni pilung nge urngin e girdi’ ni yad bay u roy ni kar nanged ni ka non’eg nga kalbus ni bochan e gag reb e tapigpig rok Kristus. Ma kalbus ni kug tay e ke gelnag e pagan’ rok yooren pi walagdad ni girdien Kristus ngak Somol, ni gubin ngiyal’ ma yad be machibnag e thin rok Got ngak e girdi’ ndakurir tuntungad ma dakurir tamdaggad.”—Philippians 1:13, 14.
15. U uw e rayog ni ngada pirieged e thin riy ni ra gelnagdad ni nge dab da rusgad?
15 Ngongol rok Paul e ma gelnagdad. Maku arrogon e ngongol rok e pi Kristiano ko ngiyal’ ney ni kar athamgilgad u fithik’ e togopuluw u boch e binaw nib gel e thin ko am ara pi tamachib. Kan weliy morngaagen e pi Kristiano ney u lan e Watchtower ara Awake! ngu lan e Yearbooks of Jehovah’s Witnesses. Nap’an ni ga ra bieg morngaagen e pi girdi’ nem ma dab mu pag talin ni yad yugu girdi’ ni bod gadad; machane nap’an ni ke yib e magawon ngorad, ke pi’ Jehovah gelngirad ni ngar gum’an’gad. Ma rayog ni nge mich u wan’dad ni ku ra ayuwegdad u fithik’ e magawon rodad.
Ma Falfalan’ Jehovah Min Nog e Sorok Ngak U Nap’an Ni Gad Ra Par Ni Gad Mudugil ni Dariy e Marus Rodad
16, 17. Uw rogon nrayog ni nge gel lanin’dad?
16 Faanra par be’ nib mudugil ni fan ko tin riyul’ nge tin nib mat’aw ma ba gel faanem. Machane faanra par be’ nib mudugil ni yugu aram rogon ni ke rus, ma kab gel boch. Arrogon, yugu demutrug be’ ni Kristiano ma rayog rok ni nge par nib gel ni faanra ba adag ni nge rin’ e tin nib m’agan’ Jehovah ngay, ma mudugil u wan’ ni nge yul’yul’, ma gubin ngiyal’ ma ra pagan’ ngak Got, ma dabi pag talin ni ke gelnag Jehovah bokum e girdi’ ni bod ir. Ma faanra gad manang ni faanra gad ra par nib mudugil ni gad ba gel ma ra falfalan’ Jehovah ngay min nog e sorok ngak ni bochan, ma rayog ni ngki gel lanin’dad. Ke fel’ u lanin’dad ni ngan moningnagdad ara ngan rin’ e kireb ngodad ni bochan e ri ba t’uf Got rodad.—1 John 2:5; 4:18.
17 Dab mu pag talin ni nap’an ni gad ba gafgow ni bochan e michan’ rodad, gathi be yip’ fan ni kada rin’ed ban’en nib kireb. (1 Peter 3:17) Yibe gafgownagdad ni bochan e gad bay ko ba’ rok Jehovah, ma gad be rin’ e tin nib fel’, ma gathi gad bang ko fayleng. Be gaar apostal Peter: “Machane faanra mu k’adedan’med ko gafgow ni mus ko ngiyal’ nib mat’aw e tin ni kam ngongliyed, ma ra fal’eg Got waathmed riy.” Ki gaar Peter: “Ere piin ni yibe gafgownagrad ni fan e ba’ fan u wan’ Got ni ngar gafgowgad e susun e nguur pired ni yad be ngongliy e tin nib mat’aw ma kar paged farad ngak e en ni ir e ke sunumiyrad, ni gubin ngiyal’ ma be tay u gil’ e tin ni ke yog nra rin’.” (1 Peter 2:20; 4:19) Arrogon, michan’ rodad e ma falan’nag Jehovah ni Got rodad ni ma t’ufegdad ma yira yog e sorok ngak ni bochan. Aram fan ni dad ba rusgad!
Nap’an Ni Gad Ra Non Ngak e Pi Tayugang’
18, 19. Nap’an ni gad ra par nib mudugil u p’eowchen e tapufthin, gowa mang e gad be yog?
18 Nap’an ni yog Jesus ngak pi gachalpen ni yira gafgownagrad, ki gaar: “Mi gimed ayuw, ya bay e girdi’ ni bay ra koled gimed ngar feked gimed nga tafen e pufthin, ma bay ra toyed gimed u lan e pi tafen e muulung rorad. Ma bay ni pufthinnagmed u p’eowchen e piin ni ba ga’ lungurad nge pi pilung ni bochag, ni bochan e nga mogned e Thin Nib Fel’ ni yib rok Got ngorad nge ngak e piin ni gathi yad piyu Israel.” (Matthew 10:17, 18) Faanra yira fek be’ nga owchen e tapufthin ni bochan e kan sasalapiy ma thingari dabi rus. Machane faanra dab da rusgad ma gad machibnag girdien e court ma kada thilyeged e re magawon nem nge mang kanawoen ban’en nib fel’. Gowa gad be yog ngak e piin ni be pufthinnagdad fare thin rok Jehovah u lan e bin 2 e Psalm ni gaar: “Gimed e pi pilung mu gonopiyed; ma gimed e pi tapufthin, ngam paged ni ngan yal’uwegmed. Mu pigpiggad ngak Jehovah ni bay madgun u wan’med.” (Psalm 2:10, 11) Boor yay ni ke tay e pi tapufthin ni rayog ni nge machib e girdi’ nrogon raba’ i teliw rorad u nap’an ni kan sasalapiy e Pi Mich Rok Jehovah min fekrad nga court, ma gad ba falfalan’; ngay. Machane boch e tapufthin e kar paged ni nge suruyrad e pi tatogopuluw. Be non e Bible ngak e pi girdi’ nem ni gaar: “Ngam paged ni ngan yal’uwegmed.”
19 Thingari nang e pi tapufthin ni bin ni baga’ e motochiyel e yib rok Jehovah Got. Thingar ra nanged ni urngin e girdi’, nib muun e pi tapufthin ngay, ni bayi pufthinnagrad Jehovah Got nge Jesus Kristus. (Roma 14:10) Ma gadad e bay fan ni nge dab da rusgad ya be ayuwegdad Jehovah, ni yugu demutrug e n’en ni ra rin’ e pi tapufthin ni yad ba girdi’. Be gaar e Bible: “Ba falfalan’ urngin e girdi’ ni yad ra nab ngak Got.”—Psalm 2:12.
20. Mang fan nrayog ni ngada falfalan’gad ni faan gad ra athamgil u fithik’ e togopuluw?
20 Nap’an ni i machib Jesus u daken e Burey i yog ni gaar: “Ngam felan’gad ko ngiyal’ nra yog e girdi’ e thin nib tagan ngomed mi yad ngongliy e tin nib kireb ngomed ma yad ra tunguy urngin mit e thin nib kireb nib togopuluw ngomed ni bochan e gimed girdieg. Ngari felan’med, ya bay labgen ni bay ga’ ni fen ngomed ni kan tay u tharmiy. Ya erera’ rogon e gafgow ni i tay e girdi’ ngak e pi profet ni yad ba kakrom ngomed.” (Matthew 5:11, 12) Riyul’ ni de fel’ e gafgow, machane bay fan ni ngan falfalan’ ni faan gad ra par ni gad mudugil u fithik’ e gafgow nge sasalap. Ya be yip’ fan ni gad be falan’nag Jehovah ma bay e taw’ath riy. Gel ni gad tay e be dag ni ba riyul’ e michan’ rodad mab mich ni ke falan’ Got ngodad. Ma be dag ni kada pagedan’dad ngak Jehovah. Mab t’uf ni nge pagan’ e Kristiano, ma gad ra weliy ko bin migid e thin.
Mang E Kam Fil?
• Mang boch ban’en ni ra buch e chiney ni thingari gel lanin’dad riy?
• Uw rogon ni rayog ni ngada gelnaged gadad ni nge dab da rusgad?
• Chon mini’ e kar daged e kanawo’ ngodad ni dar rusgad?
• Mang fan ni gad ba adag ni nge dab da rusgad?
[Pictures on page 24]
Gathi gad ba tamra’ ni bochan fare thin nib fel’
[Picture on page 25]
Baga’ angin e gel ni tay Paul u kalbus