Faanra Ba T’uf Jehovah Rom Mab Ga’ Fan u Wan’um e Tin Ke Rin’ ni Fan Ngom, Ma Ga Ra Adag ni Ngam Un ko Taufe

1-2. Mang e k’aring fare moon nib tolang u Ethiopia ni nge un ko taufe nrogon ni bay ko Acts 8:27-31, 35-38?

GA BAADAG ni ngan taufenagem ngam mang reb i gachalpen Kristus, fa? Boor e girdi’ ni kar dugliyed ni ngar rin’ed e re n’ey ni bochan e ba t’uf Jehovah rorad mab ga’ fan u wan’rad e tin ke rin’ ni fan ngorad. Am lemnag e n’en ni buch rok ba moon nib tolang ni ma pigpig ngak be’ nib pin u Ethiopia nib pilung.

² Nap’an ni fil e re moon nu Ethiopia nem u lan fare Babyor nib Thothup nsusun e nge un ko taufe, ma aram me un ko taufe ni ka chingiyal’ nem. (Mu beeg e Acts 8:27-31, 35-38.) Ere mang e k’aring ni nge adag ni nge un ko taufe? Ba tamilang nib ga’ fan u wan’ e Thin rok Got ni bochan e be beeg yu yang ko fare babyor rok Isaiah u nap’an ni be yan u ba karrow ni ma girngiy e os. Ere nap’an ni non Filip ngak, mi ri ga’ fan u wan’ e n’en ke rin’ Jesus ni fan ngak. Machane mang fan ni yan e re moon ney ni ir be’ nib tolang nga Jerusalem? Bochan nib t’uf Jehovah rok. Uw rogon ni kad nanged e re n’ey? Ya ngiyal’ nem e ka fini sul u Jerusalem ya ka i liyor ngak Jehovah u rom. Ere ba tamilang nre moon ney e ke digey e teliw ni ilal riy, ma ke un ngak girdien fare nam ni kar ognaged yad ngak e bin riyul’ e Got. Bochan nib t’uf Jehovah rok, ma aram e n’en ni k’aring ni nge rin’ ban’en nib ga’ fan ni aram e nge un ko taufe me mang reb i gachalpen Kristus.​—Matt. 28:19.

3. Mang e rayog ni nge taleg be’ ndabi un ko taufe? (Mu guy fare kahol ni kenggin e “Gab Miti Mang Girdi’?”)

³ T’ufeg rom ngak Jehovah e rayog ni nge k’aringem ni ngam un ko taufe. Machane t’ufeg e ku rayog ni nge talegem ndab mu un ko taufe. Ni uw rogon? Baaray boch ban’en nrayog ni nge talegem. Rayog nrib t’uf rom chon e tabinaw rom nge pi fager rom ndawor ra nanged e tin riyul’ ma be magafan’um nrim un ko taufe mar fanenikayed gur. (Matt. 10:37) Fa reb e bay boch e ngongol ni kam mecham ngay ni ga manang ni ma fanenikay Got nib mo’maw’ ngom ni ngam taleg ni bochan e ga baadag e pi ngongol nem. (Ps. 97:10) Fa reb e rayog nnap’an ni ka gab bitir ke mada’ ko ngiyal’ ni kam ilal ni ga ma un nga boch e madnom ni ke sum ko teliw ni googsur. Ere rayog ni bay boch ban’en ni um rin’ ko pi madnom nem kafram ni ga ra lemnag ma ma yibnag e felfelan’ ngom. Bochan e pi n’ey ma rayog ni nge mo’maw’ ngom ni ngam tal ndab kum un nga boch e madnom ndabun Jehovah. (1 Kor. 10:20, 21) Ere deer nthingar mu fithem riy e, “Mang ara mini’ e th’abi t’uf rog?”

EN THINGARI T’UF RODAD

4. Mang e bin th’abi ga’ i fan ni ngam un ko taufe?

⁴ Sana rayog ni boor ban’en nib manigil nib t’uf rom ma kub ga’ fan u wan’um. Bod nu m’on nim tababgad e Pi Mich Rok Jehovah ko fol Bible, ma rayog nrib ga’ fan e Bible u wan’um. Ku rayog nib t’uf Jesus rom. Ma chiney ni kam nang e Pi Mich Rok Jehovah e sana ga baadag ni ga ma chag ngorad. Machane pi n’ey e dabiyog ni nge k’aringem ni ngam ognagem ngak Jehovah ngam un ko taufe. Bin th’abi ga’ i fan ni ngam un ko taufe e bochan nib t’uf Jehovah Got rom. Faanra kab gel e t’ufeg rom ngak Jehovah ko tin ka bay ban’en, ma aram e dariy ban’en ara be’ ni ga ra pag ni nge talegem ndab kum pigpig ngak. T’ufeg rom ngak Jehovah e ra k’aringem ni ngam un ko taufe, miki ayuwegem ni ngam par ni gab yul’yul’ ngak u tomuren ni kam un ko taufe.

5. Mang deer e gad ra weliy e fulweg riy?

⁵ I yog Jesus nthingari t’uf Jehovah rodad u polo’ i gum’ircha’dad, nge lanin’dad, nge lem rodad, nge gelngidad. (Mark 12:30) Uw rogon ni ngam nang rogon ni ngari t’uf Jehovah rom, miki ga’ fan u wan’um? Faan gad ra fal’eg i lemnag gelngin ni gad ba t’uf rok Jehovah, ma aram e n’en nra k’aringdad ni nge t’uf rodad. (1 John 4:19) Ku mang boch ban’en ni ga ra thamiy mu kum rin’ u tomuren ni ke t’uf Got rom?b

6. Mang reb e kanawo’ nrayog ni ngam fil murung’agen Jehovah riy nrogon ni bay ko Roma 1:20?

⁶ Mu fil murung’agen Jehovah u daken e tin ke sunmiy. (Mu beeg e Roma 1:20; Rev. 4:11) Mu fal’eg i lemnag murung’agen e pi woldug nge gamanman ni ke sunmiy Jehovah, nge rogon ni be m’ug riy feni gonop. Kum lemnag rogon ni kan ngongliy e dowef rom u reb e kanawo’ ni yira ngat ngay. (Ps. 139:13, 14) Kum lemnag gelngin e yal’ ni ke sunmiy Jehovah. Yal’ e aram reb u fithik’ bokum bilyon e t’uf ni ke sunmiy Jehovah. (Isa. 40:26) Ga ra fal’eg i lemnag e pi n’ey ma rra ga’ fan Jehovah u wan’um. Ba ga’ fan ni ngad nanged ni Jehovah e ba gonop ma kub gel gelngin. Machane faanra ngari gel e t’ufeg rodad ngak me mang fager rodad, ma aram e ba t’uf ni ngkud nanged boch ban’en u murung’agen.

7. Faanra ngari t’uf Jehovah rom, ma mang e ba t’uf ni nge mich u wan’um?

⁷ Ba t’uf ni nge mich u wan’um nri gab t’uf rok Jehovah. Gur, ba mo’maw’ ni nge mich u wan’um ni En Ke Sunmiy e tharmiy nge fayleng e be guyem ma gab t’uf rok? Faanra aray rogon e lem rom, ma dab mu pagtalin ni “dariy bagadad nib mal’af Got rok nga orel.” (Acts 17:26-28) “Manang gubin e tafinay” rodad ma ke micheg ngom ni “faan ga ra sul ngak ma ra rung’ag e meybil rom [“faan ga ra gay ma ra pagem ngam pat ngak,” NW].” (1 Kron. 28:9, BT) Bin riyul’ riy e, fan ni ga be fil e Bible e chiney e bochan ni ke ‘pow’iyem’ Jehovah ngak. (John 6:44) Ra yoor ban’en nim nang u murung’agen e tin ke rin’ Jehovah ni fan ngom, ma aram e ra gel e t’ufeg rom ngak.

8. Uw rogon ni ngam dag nib ga’ fan u wan’um e t’ufeg rok Jehovah?

⁸ Reb e kanawo’ ni ngam dag riy nib ga’ fan u wan’um e t’ufeg rok Jehovah e aram e ngaum non ngak u daken e meybil. Faanra um weliy ngak Got e pi magafan’ rom ma ga be pining e magar ngak u gubin e tin ke rin’ ni fan ngom, ma aram e ra gel e t’ufeg rom ngak. Ra gel e chugur ko tha’ u thilmew Jehovah u nap’an ni ga ra guy rogon ni be fulweg taban e meybil rom. (Ps. 116:1) Ra mich u wan’um ni manang rogon lanin’um. Machane faanra nge chugur e tha’ u thilmew Jehovah, mab t’uf ni ngam nang rogon ni ma lem. Kub t’uf ni ngam nang e n’en ni baadag ni ngam rin’. Taare kanawo’ ni bay nrayog ni ngam nang e re n’ey riy e aram e ngam fil e Thin rok ni aram e Bible.

9. Uw rogon ni ngam dag nib ga’ fan e Bible u wan’um?

⁹ Mu fil rogon ni nge ga’ fan e Bible u wan’um, ni aram e Thin rok Got. Kemus ni yigoo Bible e bay e tin riyul’ riy u murung’agen Jehovah nge n’en nib m’agan’ ngay ni fan ngom. Ra m’ug nib ga’ fan e Bible u wan’um ni faanra um beeg ni gubin e rran, mag fil e babyor rom u m’on ni nge yib e en gimew be fil e Bible i guyem, mag fol ko tin ga be fil. (Ps. 119:97, 99; John 17:17) Bay e schedule rom ni fan ko beeg Bible, fa? Ga ma fol ko re schedule nem, ma ga ma beeg e Bible rom ni gubin e rran, fa?

10. Mang reb e ban’en ni yugu ba thil ko Bible?

¹⁰ Reb e ban’en ni yugu ba thil ko Bible e aram e bay boch ban’en u murung’agen Jesus riy ni yoloy e piin ra guyed. Kemus e re ke babyor ni bay e tin riyul’ riy u murung’agen e tin ke rin’ Jesus ni fan ngom. Nap’an ni ga ra fil murung’agen e pi n’en ni i yog Jesus nge pi n’en ni i rin’, ma aram e ga ra adag ni nge fel’ e tha’ u thilmew.

11. Uw rogon ni ngam fil rogon ni nge t’uf Jehovah rom?

¹¹ Ga ra fil rogon ni nge t’uf Jesus rom, ma aram e ra gel feni t’uf Jehovah rom. Mang fan? Bochan ni Jesus e i m’ug pi fel’ngin e Chitamangin rok nrib fel’ rogon. (John 14:9) Ere faanra yoor ban’en nim fil u murung’agen Jesus, ma aram e rayog ni nge tamilangan’um u murung’agen Jehovah me ga’ fan u wan’um. Am lemnag rogon e runguy ni dag Jesus ngak e piin un darifannagrad ni bochan e yad ba gafgow, ara yad ba m’ar, ara yad ba meewar ndabiyog ni ngar ayuweged yad. Kum lemnag e pi fonow ni ke pi’ nra yib angin ko pi n’en ni ga ma rin’ ni gubin e rran nge rogon nra fel’ boch e par rom ni faan ga ra fol ko pi fonow nem.​—Matt. 5:1-11; 7:24-27.

12. Nap’an ni ga ra fil murung’agen Jesus, ma mang e rayog ni nge k’aringem e re n’ey ni ngam rin’?

¹² Ra gel feni t’uf Jesus rom ni faan ga ra fal’eg i lemnag fare maligach ni pi’ ya nge yag ni ngan n’ag fan e denen rodad. (Matt. 20:28) Nap’an nra tamilang u wan’um nib m’agan’ Jesus ngay ni nge yim’ ni fan ngom, ma aram e rayog ni nge k’aringem e re n’ey ni ngam kalngan’um ko denen rom mag wenig ngak Jehovah ni nge n’ag fan. (Acts 3:19, 20; 1 John 1:9) Ra gel feni t’uf Jesus nge Jehovah rom, ma aram e ga ra adag ni ngaum chag ngak e piin yow ba t’uf rorad.

13. Mang e ke pi’ Jehovah ni fan ngom?

¹³ Mu fil rogon ni nge t’uf chon e tabinaw rok Jehovah rom. Sana chon e tabinaw rom nge pi fager rom kafram e dabiyog ni nge tamilang u wan’rad fan ni ga baadag ni ngam ognagem ngak Jehovah. Ku rayog ni ngar togopuluwgad ngom. Machane rayog ni nge ayuwegem Jehovah ni aram e nge pi’ boch e walag u lan e ulung ni ngar manged chon e tabinaw rom. Faan ga ra par ni gab chugur ngorad, ma yad ra t’ufegem mar ayuweged gur. (Mark 10:29, 30; Heb. 10:24, 25) Ra munmun ma rayog ni nge un chon e tabinaw rom ko pigpig ngak Jehovah mi yad fol ko pi motochiyel rok.​—1 Pet. 2:12.

14. Mang e kam guy u rogon kanawoen ni baadag Jehovah ni ngan rin’ ban’en nrogon ni bay ko 1 John 5:3?

¹⁴ Mu fil rogon ni nge ga’ fan u wan’um rogon kanawoen ni baadag Jehovah ni ngan rin’ ban’en, mag fol riy. U m’on ni ngam nang murung’agen Jehovah, ma sana rayog ni gur rom e ga ma dugliy ko mang e ba fel’ ma mang e ba kireb. Machane chiney e rayog ni ngam guy nrogon kanawoen ni baadag Jehovah ni ngan rin’ ban’en e aram e bin nib fel’. (Ps. 1:1-3; mu beeg e 1 John 5:3.) Am lemnag e fonow ni bay u Bible ni fan ngak e piin figirngiy, nge piin leengiy, nge piin gallabthir, nge piin bitir. (Efe. 5:22–6:4) Ke yag ni nge felfelan’ boch e tabinaw rom ni bochan e kam fol ko re fonow ney, fa? Ke yag ni ngam mang be’ nib manigil ni bochan e ga be fol ko pi fonow rok Jehovah u murung’agen e piin susun e ngaun chag ngorad, fa? Ke yag ni ngam par ni gab felfelan’, fa? (Prov. 13:20; 1 Kor. 15:33) Ba mudugil ni fulweg rom ko pi deer ney e arrogon.

15. Mang e rayog ni ngam rin’ ni faanra ba t’uf e ayuw rom u rogon ni ngam fol ko pi kenggin e motochiyel u Bible?

¹⁵ Yu ngiyal’ e rayog ni nge mo’maw’ ngom ni ngam fol ko pi kenggin e motochiyel u Bible ni ga be fil. Aram fan ni be fanay Jehovah e ulung rok ni nge pi’ boch e babyor nib puluw e thin riy ko Bible nra ayuwegem ni ngam nang e tin nib fel’ ko tin nib kireb. (Heb. 5:13, 14) Nap’an ni ga ra beeg mag fil e pi babyor ney, ma aram e rayog ni ngam guy rogon nra yib angin ma kub tamilang e thin riy. Re n’ey e ra k’aringem ni ngam adag ni ngam chugur ko ulung rok Jehovah.

16. Uw rogon ni ke yarmiy Jehovah e girdi’ rok?

¹⁶ Mu fil rogon ni nge t’uf e ulung rok Jehovah rom mag pi’ e ayuw ngay. Ke yarmiy Jehovah e girdi’ rok ni ngar manged reb e ulung. Ke tay Jesus ni Fak ni nge par ni ir lolugrad. (Efe. 1:22; 5:23) Ke dugliy Jesus bochi ulung i pumoon ni kan dugliyrad ni ngar yarmiyed fare maruwel ni baadag ni ngan rin’ e ngiyal’ ney. I yog Jesus ni chi ulung ney e yad “fare tapigpig nib yul’yul’ ma ba gonop,” mab milfan ngorad ni ngar pied e tin nib t’uf rom mar ayuweged gur ko tirok Got ban’en. (Matt. 24:45-47) Reb e kanawo’ ni ma ayuwegem e re tapigpig nib yul’yul’ ney riy e aram e ke tay boch e walag ni pumoon ni ngar manged piilal ni ngar ayuweged gur mi yad pow’iyem. (Isa. 32:1, 2; Heb. 13:17; 1 Pet. 5:2, 3) Pi piilal ney e ba m’agan’rad ngay ni ngar rin’ed urngin ban’en nrayog rorad ni fan ngom, mar fal’eged lanin’um, mar ayuweged gur ni ngari chugur e tha’ u thilmew Jehovah. Machane reb e ban’en nrib ga’ fan nrayog ni ngar rin’ed ni fan ngom e aram e ngar ayuweged gur ni ngam fil murung’agen Jehovah ngak boch e girdi’.​—Efe. 4:11-13.

17. Mang fan ni gad ma weliy murung’agen Jehovah ngak boch e girdi’ nrogon nib puluw ko Roma 10:10, 13, 14?

¹⁷ Mu ayuweg yugu boch e girdi’ ni nge t’uf Jehovah rorad. I yog Jesus ngak pi gachalpen ni ngar filed murung’agen Jehovah ngak yugu boch e girdi’. (Matt. 28:19, 20) Rayog ni ngad folgad ko re n’ey nni tay chilen ni ngan rin’ ni bochan e ban’en ni gad manang nsusun e ngad folgad riy. Machane nap’an nra gel e t’ufeg rom ngak Jehovah, ma rayog ni nge taareb e lem romed apostal Peter nge John ni faanra gaargow: “Dabiyog ni nge dab kug weliyew e n’en ni kug guyew nge n’en ni kug rung’agew.” (Acts 4:20) Rib gel e felfelan’ ni gad ra tay ni faanra yag ni ngad ayuweged be’ ni nge t’uf Jehovah rok. Am lemnag gelngin e felfelan’ ni tay Filip ni tamachib u nap’an ni ayuweg fare moon nu Ethiopia ni nge nang e tin riyul’ ni bay ko Thin rok Got me un ko taufe! Nap’an ni ga ra folwok rok Filip ma ga fol ko n’en ni tay Jesus chilen ni aram e ngan machib, ma aram e ga be micheg ni ga baadag ni ngam mang reb e Pi Mich Rok Jehovah. (Mu beeg e Roma 10:10, 13, 14.) Ra taw ko ngiyal’ nem ma sana ga ra fith fare deer ni faani fith fare moon nu Ethiopia ni gaar: “Mang ndab ntaufenigeg?”​—Acts 8:36.

18. Mang e gad ra weliy ko bin migid e article?

¹⁸ Nap’an ni ga ra dugliy ni ngam un ko taufe, ma aram e kam dugliy ni ngam rin’ e n’en th’abi ga’ fan ni ga ra rin’ u lan e yafos rom. Aram fan nib t’uf ni ngam fal’eg i lemnag e n’en ni be yip’ fan e re n’ey ni kam dugliy. Mang e ba t’uf ni ngam nang u murung’agen e taufe? Ma mang e ba t’uf ni ngam rin’ u m’on ngu tomuren ni kam un ko taufe? Gad ra weliy e fulweg ko gal deer ney ko bin migid e article.