“Mu Tiyan’med”

“Ke chugur nga tungun urngin ban’en. . . . ma gimed be tiyan’med, nge yog ni um meybilgad.”​—1 PET. 4:7.

1. Mang kenggin e machib rok Jesus?

NAP’AN ni immoy Jesus u fayleng, ma Gil’ilungun Got e aram kenggin e machib rok. Bochan Gil’ilungun Got ma ra dag Jehovah ni bay mat’awen ni nge gagiyeg ma ni tay fan fithingan. I fil Jesus ngak pi gachalpen rogon e meybil ni gaar: “Min rin’ e tin nib m’agan’um ngay u roy u but’ ni bod rogon ni yibe rin’ u tharmiy.” (Matt. 4:17; 6:9, 10) Re am rok Got ney e ra thang Satan nge girdi’ rok ni ba kireb ma ra rin’ e tin nib m’agan’ Jehovah ngay u roy u fayleng. Bod rogon ni yog Daniel ni gaar, “bayi thirif u but’ urngin e pi pilung nem nge gagiyeg ni yad be tay me mang fa birok e gagiyeg e i par ndariy n’umngin nap’an.”​—Dan. 2:44.

2. (a) Uw rogon ni ke nang e tin riyul’ e Kristiano ni ke tabab Jesus ko gagiyeg? (b) Maku mang e be micheg fare pow?

² Ri ba ga’ fan Gil’ilungun Got u wan’ pi gachalpen, ma ra fithed Jesus ko mang e “n’en nra yib ni nge dag ni ke taw ko ngiyal’ ni bay mub riy nge ngiyal’ ni tomren e fayleng.” (Matt. 24:3) Dabiyog ni nge guy e girdi’ nu fayleng ni ke tabab Jesus ko gagiyeg machane yad ra nang ko pow ni yad ra guy. Re pow ney e boor bogi ban’en ni bay riy ni ra buch ni be weliy e Bible murung’agen. Ere tin riyul’ e Kristiano e kar guyed e pow ma ke tamilang u wan’rad ni ke tabab Jesus ko gagiyeg u tharmiy. Maku aram e ke tabab ba ngiyal’ ni be yog e Bible ni “tin tomren e rran” ko girdi’ nib kireb ni be gagiyegnag e re fayleng ney.​—2 Tim. 3:1-5, 13; Matt. 24:7-14.

Mu Tiyan’med ko Tin Tomren e Rran

3. Mang fan ni kari tiyan’ e pi Kristiano?

³ Be gaar apostal Peter: “Ke chugur nga tungun urngin ban’en. Thingar um pired ni gimed be filmunguyan’med ma gimed be tiyan’med, nge yog ni um meybilgad.” (1 Pet. 4:7) Kari tiyan’ e pi Kristiano ma kar nanged ni pi n’en ni be buch u fayleng e be dag ni ke tabab Jesus ko gagiyeg, ma dabki n’uw nap’an ma ni thang Satan nge girdi’ rok. Me yog Jesus ngak pi gachalpen ni gaar: “Ere mu tedanmed, ya da mu nanged e ngiyal nra sul e en ntafen e naun riy” ni aram e nge thang Satan nge girdi’ rok.”​—Mark 13:35, 36.

4. Mang e ba thil u rogon ni be lem e girdi’ rok Jehovah ko girdi’ ni be gagiyegnagrad Satan? (Mu yaliy fapi thin u lan e kahol.)

⁴ Boor e girdi’ nu fayleng e darur tiyan’rad ko pi n’en ni be buch u fayleng ni bochan ni Satan e be gagiyegnagrad. Darur nanged ni ke tabab Jesus ko gagiyeg. Machane be tiyan’ e tin riyul’ e Kristiano ma kar nanged ko mang fan ni ke buch bogi ban’en ni ke pag raay e duw. Nap’an e 1925, ma ke nang e Pi Mich Rok Jehovah ni fa Bin Som’on e Mahl ko Fayleng nge ku boch ban’en ni buch nga tomren e be dag e mich riy ni ke tabab Jesus Kristus ko gagiyeg u Gil’ilungun Got u tharmiy ko 1914. Ma aram e ke tabab e tin tomren e rran ku Satan nge girdi’ rok. Boor e girdi’ ni darur nanged fan e pi n’en ni buch ni ba thil u m’on ko Bin Som’on e Mahl ko Fayleng nge pi n’en ni buch nga tomren.​—Mu sap ko fapi thin ni bay u lan e kahol ni “Ngiyal’ ni Ke Tabab ni Nge Wagey Urngin Ban’en.”

5. Mang nib ga’ fan ni ngaun tiyan’uy?

⁵ Ke chugur ni nge gaman raay e duw e chiney ma pi n’en ni be buch u fayleng e be dag ni gadad be par ko tin tomren e rran. Dabki n’uw nap’an ma ra yog Jehovah ngak Jesus ni ngar chamgad e pi engel rok ngak Satan nge girdi’ rok. (Rev. 19:11-21) Thingari ulul e tin riyul’ e Kristiano ni ngar fal’eged rogorad ngar pired ya yad manang ni dabki n’uw nap’an ma ni thang Satan nge girdi’ rok. (Matt. 24:42) Thingar da tiyan’dad ma gad be fol rok Kristus ni ngad mu’naged fare maruwel u ga’ngin yang e fayleng.

Fare Maruwel u Ga’ngin e Fayleng

6, 7. Uw rogon ni ke mon’og fare maruwel ni yibe machibnag murung’agen Gil’ilungun Got ko tin tomren e rran?

⁶ Fare maruwel ni be rin’ e Pi Mich Rok Jehovah e bang ko fare pow ni be dag ni gadad bay ko tin tomren e rran ko re m’ag nib kireb ney. Re maruwel ney u ga’ngin yang e fayleng e tamilangnag Jesus u nap’an ni weliy boch ban’en ni ra buch ko tomur. Me uneg e re thin ney ni ba ga’ fan ni gaar: “Ma re Thin rok Got ney Nib Fel’ ni murung’agen e gagiyeg rok Got e bay ni machibnag u gubin yang u fayleng ni nge urngin e girdi’ me nang, ma aram mfini taw nga tomren e fayleng.”​—Matt. 24:14.

⁷ Am lemnag boch ban’en ni ba riyul’ ni yog Jesus ni ra buch. Ri buchuuw e girdi’ ni i machib u nap’an e tin tomren e rran ni tabab ko 1914. Chiney e ke yoor e girdi’ ni be machibnag fare thin nib fel’. Boor ko 7,000,000 e Pi Mich Rok Jehovah ni yad be machib u ga’ngin yang e fayleng. Ma bay 100,000 e ulung ko Pi Mich Rok Jehovah u ga’ngin yang e fayleng. Ma nap’an e Puguran ko Yam’ ni Tay Jesus ko duw ni 2008 ma ke un 10,000,000 e girdi’ ngay. Ere ke yoor boch e girdi’ ni ke un e biney e duw ko fa binem e duw.

8. Mang fan ni der yog ni nge taleg e togopuluw e machib?

⁸ Kan tamilangnag murung’agen Gil’ilungun Got ngak gubin mit e girdi’ u fayleng u m’on ni ngan thang e m’ag rok Satan! Ma aram e be micheg ni Satan e ir “fare kan nib kireb nu roy u fayleng.” (2 Kor. 4:4) Be gagiyegnag Satan e pi yurba’ i teliw ni googsur nge sasalap ko am nge pi ta siyobay nge girdi’ nib kireb. Uw rogon ni ke mon’og e machib ni yibe tay? Be pi’ Jehovah gelngin ma be ayuweg e re maruwel ney, ere be mon’og e re machib ney ni murung’agen Gil’ilungun Got ma dabiyog rok Satan ni nge taleg.

9. Mang fan ni mon’og ni gadad be tay e bod e maang’ang?

⁹ Rogon ni be mon’og e machib ma be yoor e girdi’ ni be fil murung’agen Jehovah e rayog ni nga nog ni bod e maang’ang. Dabiyog ni nge mon’og e machib ni faanra der pi’ Got e ayuw ngay. (Mu beeg e Matthew 19:26.) Rayog ni nge pagan’dad ni bochan gelngin Got ni be pi’ ngak e girdi’ ni baadag ni nge pigpig ngak. Ma aram e rayog ni ngan mu’nag e re maruwel ney ni machib ni ba fel’ rogon ‘ma aram me yib e tomur.’ Ri gad be chugur ko tomur e chiney.

“Fare Gafgow ni Ba Ga’”

10. Uw rogon ni weliy Jesus fare gafgow nib ga’?

¹⁰ Yira gothey e re m’ag ni ba kireb ney u nap’an “fare gafgow ni ba ga’.” (Rev. 7:14) De yog e Bible ko uw n’umngin nap’an machane yog Jesus ni gaar: “Ya gafgow ko re ngiyal’ nem e ri kab mal’af ni kab gel e gafgow riy nga reb e gafgow ni kaa yib, ni ka nap’an ni sum e fayleng nge mada’ ko bin daba’ e rran, fa ki yib reb e gafgow ntaareb rogon ngay.” (Matt. 24:21) Nap’an ni gad ra lemnag e gafgow ni buch u nap’an e Bin L’agruw e Mahl ko Fayleng ni yim’ gonap’an 50 nge mada’ ko 60 milyon e girdi’, ere fare gafgow ni ba ga’ e ka ba gel boch e gafgow riy. Ma re gafgow ni ba ga’ ney e ra yan i mus u nap’an e Armageddon. Ireray e ngiyal’ ni ra thang Jehovah gubin ban’en rok Satan ko re fayleng ney.​—Rev. 16:14, 16.

11, 12. Mang e ra buch nra dag ni nge tabab fare gafgow ni ba ga’?

¹¹ De yog e Bible e ngiyal’ ni ra tabab fare gafgow ni ba ga’, machane be yog ni ra buch ban’en nib thil ni aram e pow riy ni ke tabab. Re n’ey ni ra buch ni ba thil e aram e ra thang e pi am nu fayleng e pi yurba’ i teliw ni googsur. U Revelation guruy ni 17 nge 18 e kan taarebnag e pi yurba’ i teliw ni googsur ngak be’ ni ppin ni ma pi’ ir ni chuway’, ya yad ma chag ngak e pi am nu fayleng ngar ngongliyed e ngongol nib togopuluw ngak Got. Revelation 17:16 e be dag ni dabki n’uw nap’an ma pi am nu fayleng e “bay ra fanenikayed fare pin ni ma chuway’ ngak; bay ra feked urngin ban’en rok mi yad pag ndakuriy e mad u daken; ma bay ra longuyed e ufin u downgin mi yad li’ ko nifiy ngem’.”

¹² Nap’an ni ra buch e re n’ey, ma ra “ta’ Got nga lan gum’ircharad ni ngar ngongliyed e tin ni be finey” ni aram e ngar thanged urngin ra ba’ e teliw ni googsur. (Rev. 17:17) Got e ra k’aring ni nge buch e re n’ey. Ireray e gechig nra pi’ ngak e pi yurba’ i teliw ni googsur ni ke n’uw nap’an ni yad be fil yugu boch e machib ngak e girdi’ ni gathi aram e tin nib m’agan’ Got ngay, maku yad be gafgownag e pi tapigpig rok. Girdi’ nu fayleng e darur nanged e re n’ey ni ra buch. Machane pi tapigpig rok Jehovah ni yad ba yul’yul’ e yad be yog e n’en ni ra buch ko tin tomren e rran ni gubin ngiyal’.

13. Mang e be dag ni yira thang e pi yurba’ i teliw ni googsur ni ri ba papey?

¹³ Ra gin e girdi’ u nap’an ni yira gothey e pi yurba’ i teliw ni googsur. Be dag e thin ko Bible ni boch e “pilung nu fayleng” e yad ra yog e magothgoth ni yira tay ko pi yurba’ i teliw ni googsur ni ra gaargad: “Kari gafgow fare binaw nib gilbuguwan! . . . Ma ke mul urngin ban’en u pa’ u lan taareb e awa!” (Rev. 18:9, 10, 16, 19) Ke fanay e Bible fare bugithin ni taareb e awa, ya ban’en ni ra buch ni rib papey.

14. Mang e ra rin’ Jehovah ni nge ayuweg e pi tapigpig rok?

¹⁴ Dabi n’uw nap’an u tomren ni yira gothey e pi yurba’ i teliw ni googsur ma aram e yad ra togopuluw ko pi tapigpig rok Jehovah ni ur weliyed murung’agen e pufthin ni ra tay Got. (Ezek. 38:14-16) Nap’an ni yad ra tabab ni ngar togopuluwgad ko pi tapigpig rok Jehovah ma aram e ra cham ngorad ya ke micheg ni ra ayuweg e girdi’ rok ni ba yul’yul’. Be gaar Jehovah: “Gu ra gagiyelnag u fithik i gawelngin e damumuw rog . . . Ma aram e bay ra nanged ni Gag fare Somol.” (Mu beeg e Ezekiel 38:18-23.) Ma ki yog ni gaar, “En ni ra math ngomed [pi tapigpig rok] e be math ko tir u owcheg.” (Zech. 2:8, NW) Nap’an ni ra tabab e pi toogor ni ngar chamgad ngak e pi tapigpig rok ma aram e ra cham Jehovah ngorad. Ireray e ngiyal’ ni nge taw ko tomur ko fare gafgow ni ba ga’ ni aram e Armageddon. Ra non Kristus, ma aram e ra cham e pi engel ngak e girdi’ rok Satan.

Ra Uw Rogodad

15. Gad manang ni be chugur e tomur, ere mang e thingar da rin’ed?

¹⁵ Ra uw rogodad ni faanra gadad manang ni be chugur e ngiyal’ ko tomur? Be gaar apostal Peter: “Faanra urngin ban’en ma bay ni kirebnag ni ara’ rogon, me ere mit i mang girdi’ e susun e ngam boded? Pangimed e nge par nib thothup ma kam pied gimed nga pa’ Got.” (2 Pet. 3:11) Pi thin nem e be tamilangnag ni ba t’uf ni ngad tedan’dad ko ngongol rodad nge puluw ko pi n’en nib m’agan’ Got ngay nge rogon e pi maruwel ni gadad ma tay ni fan ngak Got nge rogon ni ba t’uf Jehovah rodad. Fare thin nib fel’ ni murung’agen Gil’ilungun Got ni gad be machibnag u m’on ni nge yib e tomur e ku bang ko pi maruwel ney. Ki yog Peter ni gaar: “Ke chugur nga tungun urngin ban’en. Thingar um pired ni gimed be filmunguyan’med ma gimed be tiyan’med, nge yog ni um meybilgad.” (1 Pet. 4:7) Ra ngada chugurgad ngak Jehovah ma gad dag ni ba t’uf rodad ma aram e ngada meybilgad ngak ni gubin ngiyal’ ya nge pow’iydad u daken gelngin nib thothup nge ulung rok u ga’ngin e fayleng.

16. Mang fan ni ba t’uf ni ngada folgad ko fonow rok Jehovah?

¹⁶ Ngiyal’ ney ni ke yoor e kireb, ba t’uf ni ngada folgad ko fonow rok Got ni gaar: “Um ayuwgad u rogon e ngongol romed. Dab um ngongolgad ni bod e girdi’ ndawori tamilangan’rad, machane nguum ngongolgad ni bod rogon e girdi’ nib gonop. Urngin yay nra mab e kanawo’ ngomed ma ngam maruwelgad ngay ni fan ko tin nib fel’, ya tiney e rran e mmo’maw’.” (Efe. 5:15, 16) Ke yoor e kireb e chiney ko kafram. Boor ban’en ni ma fanay Satan ni nge taleg e girdi’ ni nge dabku ra rin’ed e tin nib m’agan’ Jehovah ngay me magawonnag lanin’rad. Gadad e pi tapigpig rok Got, e dabda paged ban’en ni nge kirebnag e yul’yul’ rodad ngak Got. Maku gad manang ko mang e ra buch ni dabki n’uw nap’an ma be pagan’dad ngak Jehovah.​—Mu beeg e 1 John 2:15-17.

17. Mu weliy rogon e piin ni yad ra magey nib fas u tomren Armageddon u nap’an ni yira faseg e yam’.

¹⁷ Ma ra lebug e n’en ni micheg Got ni bayi fas e yam’, ya gaar, ‘bayi faseg urngin e girdi’ ko yam’, ni tin nib mat’aw nge tin ni de mat’aw.’ (Acts 24:15) Mu lemnag rogon ni micheg ni gaar: “Bayi faseg urngin e girdi’ ko yam”! Dariy e maruwar riy ni ke micheg Jehovah e thin rok! U Isaiah 26:19 e be gaar: “Girdi rodad ni kar mad e yad ra fos bayay! . . . Bay ra odgad mi yad tangnag e felfelan.” Pi thin nem ni micheg Got ko girdi’ rok kakrom e ke riyul’ ya ra sulod ko nam rorad, maku be ayuwegdad ni nge pagan’dad ni ra riyul’ e pi thin nem ko ngiyal’ ni ra paradis e fayleng. Rib gel e felfelan’ ni ra tay e piin ni kan fasegrad ko yam’ nge piin ni kar mageygad nib fas u tomren Armageddon. Arrogon, kari chugur nga tomuren e gagiyeg rok Satan, ma dabki n’uw nap’an me gagiyegnag Got e girdi’. Ri ba ga’ fan ni ngada tedan’dad!

Ka Ga Manang?

• Mang kenggin e machib rok Jesus?

• Uw ga’ngin yang ni ke taw e machib ngay e chiney?

• Mang ni ba ga’ fan ni ngada tedan’dad?

• Mang e kam pirieg ko fare thin u Acts 24:15 ni be pi’ e athamgil ngom?

[Box/​Picture on page 18, 19]

Ngiyal’ Ni Ke Tabab Ni Nge Wagey Urngin Ban’en

Bay boch e thin u lan fare babyor ni yoloy Alan Greenspan ko duw ni 2007 [The Age of Turbulence: Adventures in a New World]. Alan Greenspan e ke chugur ni nge gaman 20 e duw ni ir e ma yog e thin ko fare ulung ni ma guy rogon e salpiy ko pi bank u Meriken. Ma ki yog ni pi n’en ni buch u tomren e duw ni 1914 e ri ba gel e thil riy nga rogon ni i lemnag e girdi’ ko som’on:

“Pi duw u m’on ko 1914 ma i lemnag e girdi’ nu fayleng ni be fel’ rogon thilin e girdi’ ma be mon’og e par ko girdi’ ma dakuriy ban’en ni ngan gafgow riy. Ma kan taleg ni dabkun pi’ e sib ni chuway’. Ma yibe lemnag ni be war e kireb i yan. . . . Ma ku be mon’og e llowan’ ma yibe sunumeg boor ban’en ni bod rogon e kanawo’, dengwa, gamig, tafen e kachido, masin, nge boch ban’en ni fan ko naun. Ke mon’og e taflay, ke yoor mit e ggan nib fel’, ma yibe pi’ e ran ni ngan unum ya yad be lemnag ni pi n’ey e ra n’uwnag nap’an e yafas ko girdi’ . . . Yibe lemnag ni ra ulul e pi n’ey.”

Machane nap’an e . . . “Bin Som’on e Mahl ko Fayleng e kirebnag e par nge yalen, me thiliyeg e pi n’en ni i lemnag e girdi’. Ma Bin L’agruw e Mahl ko Fayleng e rib gel e mogothgoth ni tay. Ma dabiyog ni nga gu thiliyeg e pi n’en ni un lemnag u m’on ko Bin Som’on e Mahl. Ba thil e n’en ni gad be guy e chiney ko n’en ni buch fa raay i duw ni ke yan. Marus, gowel ni be gel u fayleng, pi n’en ni be yog e am ni nge fol e girdi’ riy, ere rayog ko pi n’en ney ni nge thiliyeg e yafas u fayleng ni bod e n’en ni buch u tomren e Bin Som’on e Mahl, fa? Dariy be’ ni rayog ni nge pi’ e fulweg riy.”

Ke yib ngan’ Greenspan e thin ko sensey rok ni Benjamin M. Anderson (1886-1949) ni gaar: “Piin ni ke ilal e yad manang rogon e par ko girdi’ u m’on ko fa Bin Som’on e Mahl ko Fayleng ma yad ma tawrengnag rogon e yafas ko girdi’ e ngiyal’ nem. Ba pagan’ e girdi’ ni dariy ban’en ni ra buch rorad.”​—Economics and the Public Welfare.

Taabrogon ko n’en ni yog G. J. Meyer ko babyor rok ni kan fal’eg ko duw ni 2006 [ A World Undone]. Be gaar: “Pi n’en ni buch kakrom e ba ga’ ni yima yog ni ke ‘thiliyeg gubin ban’en.’ Ni bod rogon fa Bin Som’on e Mahl ko Fayleng [1914-1918]. Riyul’ ni mahl e ke thiliyeg boor ban’en; gathi kemus ni ke thiliyeg e mathil, nge am nge pi n’en ni be nameg e nam, machane ku be be thililiyeg rarogon e fayleng nge yafas ko girdi’ riy. Ma ke thiliyeg rogon e fayleng e chiney ko ngiyal’ ni baaram ni i par e girdi’ ni ba pagan’rad ko som’on.”

[Picture on page 20]

Ra pag Jehovah e pi engel ni ngar daged gelngirad u nap’an Armageddon