Yira Thapegey Nga Reb E Fayleng Nib Biech Mab Mat’aw

“Bay ra pired u fithik’ e gapas ni yad ba falfalan’.”​—PSALM 37:11.

1, 2. (a) Uw rogon nib thil rogon ni ra ayuwegdad Jehovah ko ngiyal’ ney ko ngiyal’ ni ke ayuweg e girdi’ rok kakrom? (b) Ra uw rarogon e fayleng ni ra fl’eg Jehovah ni fan ko girdi’ rok?

JEHOVAH e ir e Got ni ma ayuwegey. Kakrom ma boor yu ngiyal’ ni ke ayuweg e girdi’ rok. Machane dan ayuwegrad u fithik’ e gafgow ni kari mus rogon ya dawori pufthinnag Jehovah e m’ag rok Satan ni polo’. Machane ngiyal’ ney ma dabki n’uw nap’an ma ra ayuweg Jehovah e pi tapigpig rok u rogon nth’abi fel’. Ya ra chuweg urngin ban’en nib l’ag ko m’ag rok Satan u gangin e fayleng, ma ra fl’eg e fayleng nib biech mab mat’aw ni fan ko pi tapigpig rok.​—2 Peter 2:9; 3:10-13.

² I micheg Jehovah ni gaar: “Dabki n’uw nap’an me yan e piin nib kireb nga bayang . . . Machane piin ni yad mmunguy e bay ra pired u daken e nam u fithik’ e gapas, mu ur pired u fithik’ e gapas ni yad ba falfalan’.” (Psalm 37:10, 11) Uw n’umngin nap’an? “Piin ni yad mmat’aw e bay ra pired u daken e binaw u fithik’ e gapas, me par ni taferad ni dariy n’umngin nap’an.” (Psalm 37:29; Matthew 5:5) Machane u m’on riy ma ra gel e gafgow ko re fayleng ney ni kab gel ko reb e gafgow ni kaa yib.

Fare “Gafgow ni Baga’”

3. Mang e ke weliy Jesus u morngaagen fare “gafgow ni baga’”?

³ Nap’an e duw ni 1914 ma ke tabab e ngiyal’ ni “tin tomren e rran” ko re fayleng ney. (2 Timothy 3:1-5, 13) Chiney ma ke pag 83 e duw nga tomren ma ke chugur ko ngiyal’ nra thumur, ma ke yiiynag Jesus ko mang e ra buch u tomren ni gaar: “Ya gafgow ko re ngiyal’ n’em e ri kab mal’af ni kab gel e gafgow riy nga reb e gafgow ni kaa yib, ni ka nap’an ni sum e fayleng nge mada’ ko bin daba’ e rran, fa ki yib reb e gafgow ntaareb rogon ngay.” (Matthew 24:21) Arrogon, kab gel e gafgow ni ra yib ko bin ni yib u nap’an e World War II, ma ngiyal’ nem me yim’ 50 milyon e girdi’. Be yib nib pay e ngiyal’ nra rurug e fayleng!

4. Mang fan ni ra pufthinnag Got “Babylon nib Gilbuguwan”?

⁴ Ra yib fare “gafgow ni baga’” nib tomgin, “u lan taareb e awa.” (Revelation 18:10) Ra tabab e re ngiyal’ nem u nap’an nra gechignag Got urngin pi yuraba’ i teliw ni googsur, ni be yog e Bible e “Babylon nib Gilbuguwan” ngay. (Revelation 17:1-6, 15) N’en th’abi lingagil ko yu Babylon kakrom e liyor ni googsur. Fare Babylon ko ngiyal’ ney e taareb rogon ngay ni be yip’ fan e pi yuraba’ i teliw ni googsur u gangin e fayleng. Ke ngongliy e ngongol ko darngal ya ma un ko politic. Miki tay tanggin e mahl me yibilay e yu raba’ i salthaw ni ra baraba’ ma be cham nga baraba’, ni aram e girdi’ ni be un ko taab raba’ i teliw ni ra bagayad ma be li’ bagayad. (Matthew 26:51, 52; 1 John 4:20, 21) Ma ke felan’ ko sasaliyeb ko girdi’ rok ma ke gafgownag e tin riyul’ e Kristiano.​—Revelation 18:5, 24.

5. Ra diin me tabab fare “gafgow ni baga’”?

⁵ Ra tabab fare “gafgow ni baga’” u nap’an nra togopuluw e pi nam ngak “Babylon nib Gilbuguwan.” “Bay ra fanenikayed fare ppin ni ma chuway’ ngak; bay ra feked urngin ban’en rok mi yad pag ndakuriy e mad u daken; ma bay ra longuyed e ufin u downgin mi yad li’ ko nifiy ngem’.” (Revelation 17:16) Nge mu’ ma piin ni ur ted tanggin faram e “bay ra dolo’loygad mi yad yor ni bochan.” (Revelation 18:9-19) Machane pi tapigpig rok Jehovah e ur nanged e re n’ey ni bayi buch me lungurad: “Ke sorok Jah, . . . ya ke gechignag fare ppin nib gilbuguwan ni ma pi’ ir ni chuway’ ni i kirebnag e fayleng nga ngongolen e darngal ni i rin’, miki fulweg taban ngak ni bochan e li’ e pi tapigpig rok ngar m’ad.”​—Revelation 19:1, 2.

Yira Togopuluw ko Pi Tapigpig rok Got

6, 7. Mang fan nrayog ni nge pagan’ e pi tapigpig rok Jehovah u nap’an ni yira togopuluw ngorad u nap’an fare “gafgow ni baga’”?

⁶ Faani gathey e pi nam e pi yuraba’ i teliw ni googsur, ma yad ra chel ngak e pi tapigpig rok Jehovah. Satan, ni ir “Gog ko binaw nu Magog” e begaar: “Gu ra yib nga daken e piin ndariy e wagey rorad, ni yad be par nib pagan’rad.” Ra lemnag nib mom ni ngan cham ngorad ma ra yib ngorad ko “ba ulung i salthaw ni pire’ . . . , ni yad bod e manileng ni ra upunguy e binaw.” (Ezekiel 38:2, 10-16) Manang e girdi’ rok Jehovah ni dabi m’ag e re togopuluw ney ya yad ma tor ngak Jehovah.

⁷ I lemnag Farao nge pi salthaw rok ni rayog ni ngar koled e pi tapigpig rok Got u tooben e Day ni Row, machane i ngongliy Jehovah e maangang me ayuweg e girdi’ rok me thang e pi salthaw nu Egypt. (Exodus 14:26-28) Nap’an fare “gafgow ni baga’,” ma ra lemnag e pi nam ni rayog ni ngar gelgad ngak e girdi’ rok Jehovah, ma aram ma ra fl’eg e maangang me ayuwegrad ya arrogon ni yog ni gaar: “Rofen nem . . . ma gu ra damumuw nib elmirin. Ma gu ra non u fithik’ e damumuw.” (Ezekiel 38:18, 19) Ma aram ma kari chugur nga tungun fare “gafgow ni baga’”!

8. Mang boch ban’en nib maluplup ni ra buch u m’on ni ra gechignag Jehovah e piin nib kireb, ma mang wenegan nra yib riy?

⁸ U ba ngiyal’ nga tomren ni ke tabab fare “gafgow ni baga’” machane u m’on ko ngiyal’ nra pufthinnag Jehovah e fayleng, ma bay boch ban’en nib maluplup nra buch. Mu tiyan’um ko mang wenegan nra yib riy. “Ma aram ma bayi m’ug e pow ko en ni Fak e girdi’ [Kristus] u lan e lang, ma aram e urngin e ganong nu fayleng ni bay ra yorgad, ma bay ra guyed e en ni Fak e girdi’ ni be yib nga but’ u daken e manileng ni bay gelngin ma rib galgal ramaen.” (Matthew 24:29, 30) “Ma bay e pow ni bayi m’ug u mit e yal’, ngu mit e pul, ngu mit e pi t’uf, . . . ma bayi aw e girdi’ nga but’ ko marus ko ngiyal’ ni baaram ni yad be sonnag e n’en ni be yib i yib nga daken e fayleng ni polo’.”​—Luke 21:25, 26.

“Ke Chugur ni Ngan Chuwegmed u Fithik’ e Gafgow”

9. Mang fan nrayog ko pi tapigpig rok Jehovah ni ngar ‘sak’iygad mar changargad nga lang’ u nap’an nra buch e pi n’en nib maluplup?

⁹ Ngiyal’ nem e ra puluw ko pi thin ni kan yiiynag u Luke 21:28. Gaar Jesus: “Faanra tabab i m’ug e pi n’ey, mi gimed sak’iy ngam changargad nga lang, ya aram e ke chugur ni ngan chuwegmed u fithik’ e gafgow.” Ra da’da’ e pi toogor rok Got ko marus ya yad ra nang ni pi n’en ney nib maluplup e yib rok Jehovah. Machane ra falfalan’ e pi tapigpig rok Jehovah ya yad manang ni ke chugur ko ngiyal’ ni yira ayuwegrad.

10. Mang e be yog e Thin Rok Got u morngaagen e ngiyal’ ni tungun fare “gafgow ni baga’”?

¹⁰ Tomur riy ma ra gathey Jehovah e m’ag rok Satan: “Gu ra pufthinnag [Gog], ko m’ar ni ma af nib machreg nge racha’; nge n’uw ni ra aw nib baga’ nge ayis ni bod e malang ni ra aw nga but’, ma gu ra n’igin nge aw e nifiy nge sulphur nga daken nge nga daken e tirok ban’en . . . Ma yad ra nang ni gag Jehovah.” (Ezekiel 38:22, 23) Yira chuweg urngin ban’en ko m’ag rok Satan. Ma yira thang mit urngin e girdi’ ni dariy fan Got u wan’rad. Ereram e tomur riy ko fare “gafgow ni baga’” ni Armaggedon​—Jeremiah 25:31-33; 2 Thessalonika 1:6-8; Revelation 16:14, 16; 19:11-21.

11. Mang fan ni yira thapeg e pi tapigpig rok Jehovah u fithik’ fare “gafgow ni baga’”?

¹¹ Bay bokum milyon e piin ni ma liyor ku Jehovah u gangin e fayleng ni yira ayuwegrad u fithik’ fare “gafgow ni baga’.” Yad fare “ulung ni baga’” ni kar “bad u gubin e nam, nge ganong, nge gubin mit e girdi’, ngu gubin e thin.” Mang fan ni yira ayuwegrad rogon nib maluplup? Ya yad ma “pigpig ku Jehovah ni rran nge nep’.” Ere yad ra magay nib fas u tomren e re fayleng ney mi yad un nga reb e fayleng nib biech mab mat’aw. (Revelation 7:9-15) Ere yad ra guy ni ke lebug e thin ni yog Jehovah ni gaar: “Mpar ni Jehovah e ke l’agan’um ngak mu um fol ko tin ni ke yog, me pi’ gelngim ni ngam tafnay e binaw, ma bay mu guy e piin nib kireb ni kan tulufrad kar chuwgad u daken e binaw.”​—Psalm 37:34.

Fa Bin nib Biech e Fayleng

12. Mang e rayog ni nge athapeg e piin nra magay nib fas ko Armageddon ko ngiyal’ nga m’on?

¹² Rib fel’ ni ngan guy e pi n’em nra buch​—ya yira chuweg e kireb ma ra tabab ba ngiyal’ nth’abi fel’ ko girdi’! (Revelation 20:1-4) Piin nra magay nib fas ko Armageddon e ra pining e magar ku Jehovah ya kar thapgad nga reb e m’ag nib biech ni ngongliy Got, ni aram ba fayleng nib biech ma ra paradis e fayleng! (Luke 23:43) Ma dabki yim’ e girdi’ biid! (John 11:26) Arrogon, ngiyal’ nem iyan nga m’on ma rayog ni ngar pared n’umngin nap’an ni ma par Jehovah!

13. Uw rogon nra sul Jesus ko maruwel ni ke rin’ u fayleng faram ni ke golnag e m’ar?

¹³ I dugliy Jehovah Jesus ni nge mang Pilung u tharmiy, ma ra mil suwon ngak ni nge flaabnag e piin ni kan ayuwegrad mi yad falfalan’. Nap’an ni immoy u fayleng, ma ke pithig lan mit e piin nib malmit nge tel e piin nib biling, ma ke “golnag e girdi’ u urngin mit e liliy nge m’ar.” (Matthew 9:35; 15:30, 31) Ra golnag e girdi’ biyay u lan e bin nib biech e fayleng ma ra rin’ u gangin e fayleng. Ir e Ani Owchen Got me ere ra lebuguy e pi thin ney ni gaar: “[Got] e bayi n’ag urngin e lu’ u owcherad. Ma aram e dab ku unim’, ma dab ki i kireban’uy, ma dab ku un yor, ma dab ku un amith. Ya tin kakrom ban’en e ke chuw.” (Revelation 21:4) Dabki t’uf e togta nge piin ni ma fl’eg rogon e gum’eyag!​—Isaiah 25:8; 33:24.

14. Uw rogon nra ayuweg Jehovah e pi tapigpig rok ni goo kar m’ad?

¹⁴ Ku yira ayuweg e pi tapigpig rok Got ni kar m’ad faram. U lan e fayleng nib biech ma yira fasegrad ko yam’. Be micheg Jehovah ni gaar: “Bayi faseg urngin e girdi’ ko yam’, ni tin nib mat’aw nge tin nde mat’aw.” (Acts 24:15, NW) Sana yira faseg e “tin nib mat’aw” u m’on boch ma yad ra ayuweg i paradisnag e fayleng. Ri fene fel’ ni nge rung’ag e piin nra magay nib fas ko Armageddon e thin ko piin nib yul’yul’ ni kar m’ad kakrom, mar fasgad biyay!​—John 5:28, 29.

15. Mu weliy boch rarogon e bin nib biech e fayleng.

¹⁵ Urngin e piin nib fas ko ngiyal’ nem e ra nang fan e thin ni kan yoloy ko psalm u morngaagen Jehovah ni begaar: “Ba gaman urngin ni be pi’ ngorad nge yan i aw ni ke fel’ u wan’rad ni yad gubin e tin ni ke yog ngorad.” (Psalm 145:16) Ma dabki yim’ e girdi’ ko bilig: Ya ran sulweg e fayleng nga rogon me thabthabel ko ecology ma ra yoor e woldug. (Psalm 72:16) Ma dabki par e girdi’ ni dariy e naun rorad ya: “Girdi’ e bay ra toyed e naun mi yad par riy,” ma gubin e girdi’ ma bayi be’ “me par u fithik’ e gapas u tooben e woldug rok ni grapes nge woldug ni yu ke gek’iy ni fig, ma be par ndakuriy be’ nra k’aring e marus ngak.” (Isaiah 65:21, 22; Mikah 4:4) Ma dabkun par nib marus: Ya dakuriy e mahl, nge cham, nge bugel. (Psalm 46:8, 9; Proverbs 2:22) “Ra toffan e girdi’ u gangin e fayleng, ya dakuriy e wagey. Ke falfalan’ e girdi’ mi yad tolulnag e falfalan’.”​—Isaiah 14:7.

16. Mang fan kari mus ni goo tin nib mat’aw ban’en e ra moy u lan e bin nib biech e fayleng?

¹⁶ U lan e bin nib biech e fayleng, ma yira chuweg e propaganda media rok Satan ni aram rogon ni ma wereg e tirok ban’en. Ma “piin ni ma par u daken e but’ nib yang’ol e ra fil e tin nib mat’aw ban’en.” (Isaiah 26:9; 54:13) U reb e duw nge reb ma yira fil e tin nib mat’aw ban’en, ma “girdi’ ko nam e ri bayi tamilangan’rad u morngaagen Jehovah ni bod rogon lan e yungi day nib sug ko day.” (Isaiah 11:9, NW.) Ra lemnag e girdi’ e tin nra ubungey mi yad ngongol nib puluw ngay. (Filippi 4:8) Mu lemnag urngin e girdi’ u gangin e fayleng ni dariy bagayad e ma un ko bugel, ara tolangan’uy, ara awan’​—ya yad walag ma bay felngin e kan ni thothup rok Got rorad. Arrogon, mus ko chiney ma fare ulung ni baga’ e be ngongliy e pi felngin nem.​—Galatia 5:22, 23.

Mang Fan nib N’uw Nap’an?

17. Mang fan ni ke son Jehovah nib n’uw nap’an fini chuweg e kireb?

¹⁷ Mang fan ni ke son Jehovah nib n’uw nap’an u m’on ni nge chuweg e kireb me thapeg e girdi’ rok nga reb e fayleng nib biech? Mu lemnag boch ban’en ni thingarni rin’. N’en nth’abi ga’ fan e ngan nog e sorok ku Jehovah ni ir e Pilung ma bay mat’awun ni nge gagiyeg. Ke pag ba ngiyal’ nib n’uw boch nap’an ni nge micheg ni dabiyog ko girdi’ ni ngar gagiyegnaged yad ndariy e ayuw rok riy. (Jeremiah 10:23) Ere rib puluw ni nge tay Jehovah e Gagiyeg Rok u tharmiy ni Kristus e Pilung riy nga lon e gagiyeg ko girdi’.​—Daniel 2:44; Matthew 6:9, 10.

18. Wuin ni ra tafanay pi fak Abraham fare binaw nu Kanaan?

¹⁸ N’en ni buch u nap’an e pi chibog ney e taareb rogon ko n’en ni buch u nap’an Abraham. Yog Jehovah ku Abraham ni pi fak e ra tafanay fare binaw nu Kanaan​—machane yad ra son aningeg miriay e duw fin pi’ ngorad ya “dawori aw ni mus rogon e kireb ko yu Amorite.” (Genesis 12:1-5; 15:13-16) Kan pining piyu “Amorite” (ni reb e ganong nib gel) ngak urngin e girdi’ nu Kanaan. Ere ra yan aningeg e chibog fini pag Jehovah e girdi’ rok ngar tafanayed fare binaw nu Kanaan. Ma ke pag Jehovah e pi nam nu Kanaan ni ngar gagiyegnaged yad. Ma mang wenegan riy?

19, 20. Uw rogon e ngongol ko piyu Kanaan?

¹⁹ Fare ke babyor ni The Bible Handbook, ni ke yoloy Henry H. Halley, e be weliy riy ni ke pirieg e piin ni archaeologist e tempel ku Ashtoreth ni got ni ppin ku Baal u Megiddo. Me yoloy ni gaar: “Immoy reb e teliw nib chugur ko re tempel ney, ma kan pirieg boor e melor riy ni bay e tin ni ke magay ko bitir ni kan pi’ ni maligach u lan e re tempel ney . . . Pi profet ku Baal nge Ashtoreth e yad e ta thang e fan ko bitir.” “Ma ku reb i ban’en nib kireb ni ur rin’ed e ka nog ‘maligach ko def’ ngay. Ya nap’an ni ngan toy e naun, ma ran pi’ e bitir ni maligach, min tay e dowef rok nga langgin e rungrung.”

²⁰ Begaar Halley: “Rogon ni un liyor ku Baal, nge Ashtoreth, nge yugu boch e got nu Kanaan e kan un ko ngongol ndarngal nib elmirin; me ere pi tempel rorad e aram tagil’ e ngongol nib puwlag. . . . Piyu Kanaan e ra liyorgad ko pi got rorad ko ngongol ndarngal nib pag rogon, . . . nge mu’ mi yad li’ e tin nganni’ i bitir rorad min pi’rad ni maligach ko pi got ney. Ere fare binaw nu Kanaan e ke bod yu Sodom nge yu Gomorrah machane kab ga’ e gin suwon. . . . Bay rogon ba nam i girdi’ ni aram rogon fene alit e ngongol rorad mab kireb ni ngar pared? . . . Pi archaeologist ni ma fl’eg i gayiy boch ban’en ko pi mach nu Kanaan kakrom e ma lemnag ko manga de thangrad Got u m’on ko ngiyal’ ni ke rin’.”​—Mu taarebnag ko 1 Kings 21:25, 26.

21. Uw rogon ni taareb rogon piyu Kanaan ko girdi’ ko ngiyal’ ney?

²¹ Rogon fene elmirin e kireb ni i ngongliy yu Amorite e “kari mus rogon.” Ere bay mat’awun Jehovah ni nge thang owcherad. Ku aram rogon e ngiyal’ ney. Ke sug e re fayleng ney ko cham, nge ngongol ndarngal, nge togopuluw ko motochiyel rok Got. Ma ke kireban’dad ko pi bitir ni kan pi’ ni maligach u Kanaan kakrom, ma uw rogon e maligach ni yibe pi’ e chiney ko bokum milyon e piin fel’ yangaren ni yibe pi’rad ngar uned ko mahl, ma aram ban’en nkab gel e kireb riy ko tin ni rin’ yu Kanaan fa? Ere dabi siy ni bay rogon Jehovah ni nge chuweg e re m’ag nib kireb ney.

Ka Bay Ban’en ni Yibe Lubeg

22. Mang fan ni be k’adan’ Jehovah ko ngiyal’ ney?

²² Be k’adan’ Jehovah ko tin tomren e rran ya ka bay ban’en ni be lubeg. Be pag e tayim ni ngan kunuy min machibnag fare ulung ni baga’, ma chiney ma yad boor ko lal e milyon oren. Be pow’iyrad Jehovah ma kan yarmiyrad ni yad ba ulung ni be mon’og iyan. Yibe skulnag e piin pumoon, nge piin ppin, nge piin fel’ yangaren, ni ngar filed e thin riyul’ ko Bible ngak e girdi’. Pi muulung rorad nge pi babyor ni yad ma ngongliy e be fil ngorad e kanawo’ rok Got ni ma t’ufegey. (John 13:34, 35; Kolose 3:14; Hebrews 10:24, 25) Maku yad be fil rogon i toy e naun, nge rogon e gamig, nge rogon ni ngan fl’eg e babyor, nge yugu boch ban’en nra ayuweg i machibnag fare “thin nib fel’.” (Matthew 24:14) Dabi siy ni yira un ko machib ma yira toy boch ban’en u lan e bin nib biech e fayleng.

23. Mang fan ni gad ba taw’ath ya gad be par ko ngiyal’ ney?

²³ Arrogon, chiney ma be fl’eg Jehovah rogon e pi tapigpig rok ni nge bung rogorad ngar ranod nga fithik’ fare “gafgow ni baga’” mar thapgad nga reb e fayleng nib biech mab mat’aw. Ma aram ma dakuriy Satan nge fayleng rok nib kireb ni nge magawonnagey, ma dakuriy e m’ar, nge kireban’, nge yam’. U fithik’ e pasig nge falfalan’ ma ra tabab e girdi’ rok Got ni ngar fl’eged e fayleng me paradis, ma gubin e rran ma “yira falfalan’ riy.” Ri gad ba taw’ath ya gad be par ko ngiyal’ nib baga’ fan, ma gad manang Jehovah ma gad ma pigpig ngak, ma gad manang ni dabki n’uw nap’an ma gad ra ‘sak’iy ngad changargad nga lang, ya aram e ke chugur ni ngan chuwegdad u fithik’ e gafgow’!​—Luke 21:28; Psalm 146:5.

Boch e Deer ni Ngan Sul Nga Daken

◻ Be mang fare “gafgow ni baga’,” ma nge diin me tabab?

◻ Mang fan ndabi m’ag e cham ni ra tay Gog nib togopuluw ko pi tapigpig rok Jehovah?

◻ Mang e ra buch u tungun fare “gafgow ni baga’”?

◻ Mang boch e flaab ni ra moy u lan e bin nib biech e fayleng?

◻ Mang fan ni ke son Jehovah nib n’uw boch nap’an fini chuweg e re m’ag ney?

[Sasing ko page 16]

Ran fl’eg rogon e fayleng ni gangin nge mang paradis