Kam Tay Talpem Ni Fan Ko Rran Rok Jehovah?

“Be chugur iyib e rorran rok Jehovah. Kari chugur ma be gur iyib ni nge taw.”​—ZEFANIAH 1:14.

1. Mang e be weliy e Bible u morngaagen e rran rok Jehovah?

FARE “rran rok Jehovah ni baga’ ma ba gel e marus riy” e ra yib u nap’an e re m’ag nib kireb ney. Be weliy e Bible ni nap’an e re rran nem rok Jehovah ma yira cham, ma ra talumor lan e lang, ma yira damumuw, ma ra i maga’fan’uy, ma yira kireban’, ma yira gin ngay, ma yira gathey boor ban’en. Machane ra moy e piin nra magay nib fas, ya “urngin e piin ni ra pining fithingan Jehovah e yad ra fos.” (Joel 2:30-32; Amos 5:18-20) Arrogon, aram e ngiyal’ nra thang Got e pi toogor rok me ayuweg e girdi’ rok.

2. Mang fan nsusun ni ngad lemnaged ni be gur iyib e rran rok Jehovah?

² Ke tamilangnag e pi profet rok Got ni be gur iyib fare rran rok Jehovah. Yoloy Zefaniah ni gaar: “Be chugur iyib e rran rok Jehovah. Kari chugur ma be gur iyib ni nge taw.” (Zefaniah 1:14) Ma kari gel e gur ko ngiyal’ ney ya Jesus Kristus ni Pilung ni ir Fa En nra Thang e girdi’ e be n’en ni nge ‘m’ag e sayden rok nga daken ay me yan nga daken e os ni be yan u fithik’ e riyul’, nge sobutan’, nge mat’aw.’ (Psalm 45:3, 4) Kam tay talpem ko re rran nem fa?

Boor Ban’en ni Ur Lemnaged Nra Buch

3. Mang boch ban’en ni lemnag e pi Kristiano u Thessalonika, ma mang l’agruw ban’en ni kar olobochgad riy?

³ Boor e girdi’ e ur lemnaged boch ban’en u morngaagen e rran rok Jehovah ma de lebug. Boch e Kristiano nu Thessalonika e ur gaargad, ‘Re rran nem rok Jehovah e ke taw!’ (2 Thessalonika 2:2) Machane bay l’agruw fan ni de taw ko ngiyal’ nem. Weliy apostal Paul morngaagen reb ni gaar: “Ngiyal’ nem e ra gaar e girdi’ e ke gapas ndariy ban’en nra buch, ma yad ra da’da’ ni ke taw e riya’ ngorad.” (1 Thessalonika 5:1-6) Gad be par ko “ngiyal’ ko tomur” ma gad be sonnag e ngiyal’ nra lebug e pi thin nem. (Daniel 12:4) Ku ban’en ni de micheg ni ke taw e rran rok Jehovah u nap’an piyu Thessalonika e baaray ni yog Paul ngorad ni gaar: “Re rran nem e dab kaa yib nge yan i mada’ ko ngiyal’ nra m’ug tomren e Togopuluw ni ngan ta’ ngak Got.” (2 Thessalonika 2:3) Nap’an ni yoloy Paul e pi thin nem (sogonapan 51 C.E.), ma dawori gel “fare Togopuluw” u fithik’ e tin riyul’ e Kristiano. Ngiyal’ ney ma gad be guy ni kari gel e re n’em ni aram Kristendom. Machane yugu demtrug ni de lebug e n’en ni ur lemnaged ma piyu Thessalonika ni kan dugliyrad ko kan ni thothup e kur pigpiggad nib yul’yul’ ku Got nge yan i mada’ ko ngiyal’ ni kar m’ad ma ranod nga tharmiy. (Revelation 2:10) Ku arrogodad ni yira taw’athnagdad nfaanra gad ra par nib yul’yul’ ku Jehovah u nap’an ni gad be sonnag e rran rok ni nge yib.

4. (a) Mang e kan puluwnag e rran rok Jehovah ngay u 2 Thessalonika 2:1, 2? (b) Mang e lem ko piin ni ka nog e Pi Chitamangin e Galesiya ngorad u mornaagen e ngiyal’ nra sul Kristus nge tin nib l’ag ngay?

⁴ Be puluwnag e Bible e “rran rok Jehovah ko ngiyal’ ney ni baga’” ko ngiyal’ ni “bay Jesus Kristus ni ir e Somol rodad.” (2 Thessalonika 2:1, 2) Fapi girdi’ ni kan nog ni yad e Pi Chitamangin fare Galesiya e ur weliyed e lem rorad u morngaagen e ngiyal’ nra sul Kristus, nge ngiyal’ ni ba’, nge ngalan’ ni Gagiyeg Rok u Lan Biyu’ e Duw. (Revelation 20:4) Nap’an e bin l’agruw e chibog C.E., ma Papias nu Hierapolis e ke lemnag ni nap’an fare Biyu’ e Duw ko Gagiyeg rok Kristus ma ngari fel’ rogon urngin ban’en me yib e woldug ni pire’ ni pire’. Ma ke weliy Justin Martyr u morngaagen e ngiyal’ ni ba’ Jesus me sulweg Jerusalem ni ir tagil’ e Gagiyeg Rok nga rogon. Miki weliy Irenæus nu Lyons ni tomren ni kan thang fare nam nu Roma ma ra m’ug Jesus min guy nga owchey, ma ran m’ag Satan ma ra gagiyeg u Jerusalem u fayleng.

5. Mang e yog boch e scholar u morngaagen e “Bin L’agruw e Advent” rok Kristus nge Gagiyeg Rok u lan Biyu’ e Duw?

⁵ Philip Schaff ni ir e historian e ke yog ni fa ngiyal’ u m’on ni kan tay fare muulung ni Council of Nicaea ko duw ni 325 C.E. ma “fa bin th’abi lingagil e n’en ni ka nog e aram e thin ni kan weliy ni ran guy e gagiyeg rok Kristus u fayleng ni yad fapi saint ni kan fasegrad ko yam’ mara gagiyeggad u lan bbiyu’ e duw u m’on ni ngan faseg yugu boch e girdi’ ko yam’ min pufthinnagrad.” Ma reb e babyor ni A Dictionary of the Bible, ni fl’eg James Hastings e begaar: “Tertullian, Irenæus, nge Hippolytus e ur rogned ni fare Advent fa ngiyal’ nra yib Jesus e ke chugur iyib; machane fapi girdi’ ni kan nog e Alexandrine Fathers ngorad e ba thil e lem rorad. . . . Ya ke puluwnag Augustine fare Biyu’ e Duw ko ngiyal’ ni yima yog e Church militant ngay me ere fa bin L’agruw e Advent e ka bay nga m’on nib orel.”

Rran rok Jehovah nge Ngiyal’ ni Ba’ Jesus

6. Mang fan nsusun dabda lemnaged ni kab palog nga orel e rran rok Jehovah?

⁶ Bochan ni dan nang fan nrogon me ere ke mulan’uy, machane dabda lemnaged ni kab palog nga orel e rran rok Jehovah. Ya ke yib Jesus ma ba’ e chiney ma be puluwnag e Bible e re n’ey ko rorran rok Jehovah. Kan weliy u lan fare babyor ni The Watchtower nge yugu boch e babyor ko Pi Mich Rok Jehovah ni be micheg e Bible ni ke yib Kristus ko duw ni 1914 ma ba’ e chiney.a Ere mang e yog Jesus u morngaagen e ngiyal’ ni ra moy riy?

7. (a) Mang boch ban’en ni aram e pow ko ngiyal’ ni bay Jesus nge pow ko tin tomren e re m’ag ney? (b) Uw rogon nrayog ni ngad magaygad nib fas?

⁷ Boch u m’on ni yim’ me weliy Jesus u morngaagen e ngiyal’ nra moy. Ma tomren ni ke yiiynag ni ran thang fare tempel u Jerusalem me fith e pi apostal ni Peter nge James nge John nge Andrew ngak mi lungurad: “Mog ngomad ko wuin e ra buch e pi n’en ney, ma mang e pow ni ga bay nge pow ko tomren e re m’ag ney?” (Matthew 24:1-3; Mark 13:3, 4) Ke fulweg Jesus ngorad me yiiynag ni ra yib e mahl, nge uyungol, nge durru’, nge yugu boch ban’en ni aram “fare pow” ni ba’ nge pow ko tin tomren e re m’ag ney. Miki gaar: “En nra athamgil nge mada’ ko tomur e ra yog e yafas ngak.” (Matthew 24:13) Gad ra magay nib fas nfaanra gad ra athamgil ni ngad pared nib yul’yul’ ku Got nge mada’ ko yam’ fa nge mada’ ko ngiyal’ ntomren e re m’ag nib kireb ney.

8. U m’on ni ke thumur e m’ag ko piyu Jew ma mang e thingari lebug, ma mang e yibe rin’ e ngiyal’ ney?

⁸ U m’on nra taw ko tomur ma bay ban’en ni baga’ fan ko ngiyal’ ni ba’ Jesus ni ra lebug. Ke weliy u morngaagen ni gaar: “Ma re thin rok Got ney nib fel’ ni morngaagen e gagiyeg rok Got e bay ni machibnag u gubin yang u fayleng ni nge urngin e girdi’ me nang, ma aram mfini taw nga tomren e fayleng.” (Matthew 24:14) U m’on ni thang yu Roma Jerusalem me thumur fare m’ag ko yu Jew ko duw ni 70 C.E., ma ke yog Paul ni “kan machibnag fare thin nib fel’ ngak urngin e girdi’.” (Kolose 1:23) Ma ngiyal’ ney ma be machibnag e Pi Mich Rok Jehovah urngin e girdi’ u “gubin yang u fayleng.” Boch e duw faram me bing Got e kanawo’ nrayog ni ngan machibnag e girdi’ u Ngek u Europe. Ma ulung rok Jehovah e ke bung rogon ni ngan ga’nag e maruwel rorad ni mus nga lan e “pi binaw ni dan machib riy faram” ya bay e pi naun ni ma fl’eg e babyor riy u ga’ngin e fayleng. (Roma 15:22, 23) Ere be k’aringem gumerchaem ni ngam rin’ urngin ban’en nrayog rom ni ngam machibnag e girdi’ u m’on nra taw e ngiyal’ ko tomur fa? Faanra er rogon, ma ra gelnagem Got ni ngam un ko maruwel ni ka bay nga m’on rodad.​—Filippi 4:13; 2 Timothy 4:17.

9. Mang e ke tamilangnag Jesus u Matthew 24:36?

⁹ Be lebug e chiney e n’en ni kan yiiynag ni ran wereg fare thin ko Gil’ilungun Got nge yugu boch ban’en ni aram e pow ko ngiyal’ nra moy Jesus. Ere, ke chugur e ngiyal’ ntomren e re m’ag nib kireb ney. Rriyul’ ni yog Jesus ni gaar: “Re rran nem nge re awa nem e dariy be’ ni manang e ngiyal’ nra taw riy ni mus ko pi engel ni yad bay u tharmiy, ara en ni Fak Got; ya ke mus ni en ni Chitamangiy e manang.” (Matthew 24:4-14, 36) Machane fapi thin ni yiiynag Jesus e ra ayuwegdad ngad ted talpdad ko “re rran nem nge re awa nem.”

Kar Ted Talperad

10. Uw rogon ni gad manang ni rayog ni ngan par nib od ko tirok Got ban’en?

¹⁰ Ra ngad magaygad nib fas ko rran rok Jehovah ma thingarda pared nib od ko tirok Got ban’en, ma gad par nib mudugil lanin’dad ko bin riyul’ e liyor. (1 Korinth 16:13) Goo gad manang ni rayog e re n’em ya immoy reb e tabinaw ni ur yodoromgad mar magaygad nib fas u nap’an ni kan tharey e fayleng ko fare Ran ni ke thang urngin e piin nib kireb ko duw ni 2370 B.C.E. Ke taarebnag Jesus e ngiyal’ i n’em ko ngiyal’ nra moy me gaar: “Ngiyal’ nra moy e en ni Fak e Girdi’ e ra bod e n’en nrin’ ko fa ngiyal’ i n’em nnap’an Noah. Ni bod rogon fapi rran ni ba aram ni immoy nga m’on ko fa ngiyal’ i n’em ni yib e ran nge tharey e binaw, un abich ma yibe garbod, ma be mabgol e pumoon nge ppin nge yan i mada’ ko rofen ni baaram ni yan Noah riy nga lan fare ark; machane da ur nanged e n’en ni bay yib ngorad nge yan i mada’ ko ngiyal’ ni baaram ni yib e ran nge tharey e binaw nge fekrad ni yad gubin. Ere aram rogon e ngiyal’ ni baaram ni ra moy e en ni Fak e Girdi’ riy.”​—Matthew 24:37-39.

11. Mang kanawo’ ni lek Noah ni yugu aram rogon ni kari kireb e fayleng ko ngiyal’ nem?

¹¹ Ku arrogodad ni bod Noah nge tabinaw rok ni ur pared u lan e fayleng nib kireb. Boch e engel ni yad “pi fak e bin riyul’ e Got” e ur fanayed downgin e girdi’ mar pared boch e ppin mar diyennaged e bitir ni ka nog e Nephilim ngorad ni yad ba gilbuguwan​—ya ur towasariyed e girdi’ u fithik’ e yargel me gel e kireb u fayleng. (Genesis 6:1, 2, 4; 1 Peter 3:19, 20) Ma i par “Noah ni ba’ Got rok” me michan’ ngak. Ya ir be’ nib “fel’ ni ke mus ni ir e immoy ni kab fel’ u wan’ Got e ngiyal’ nem”​—ni aram ba mfen nib kireb. (Genesis 6:9-11) Gad ra taga’ ngak Got u fithik’ e meybil ma aram e ku rayog ni ngad yodoromgad u lan e re fayleng ney nib kireb ma gad be sonnag e rran rok Jehovah.

12. (a) Ku mang maruwel e rin’ Noah ni gathi ke mus ni toy fare arke? (b) Uw rogon u wan’ e girdi’ e machib ni i tay Noah, ma mang wenegan ni yib ngorad ni bochan?

¹² Ba gilbuguwan Noah ya ir fa en ni toy fare arke ni nge par e girdi’ nib fas riy u nap’an ni yib fare Ran. Miki “machibnag e tin nib mat’aw,” ma tin ni ka bay e girdi’ ko ngiyal’ nem e “da ur tedan’rad” ko thin rok Got ni be machibnag. Ya ur pared ni yibe abich ma yibe garbod, ma be mabgol e pumoon nge ppin, ma yibe chugul bitir, ma yibe rin’ e tin ni yima rin’ ko par u gubin e rran nge yan i mada’ ko rofen ni yib e ran nge tharey e binaw nge fekrad ni yad gubin. (2 Peter 2:5; Genesis 6:14) Ur dabuyed ni ngar rung’aged u morngaagen e thin nge ngongol nib mat’aw, maku aram rogon e girdi’ ko re mfen ney ni yad ma ning telrad ko n’en ni ma yog e Pi Mich Rok Jehovah ngorad ni “ngar pied keru’rad ko denen ni yad be ngongliy mi yad sap ngak Got,” me mich Kristus u wan’rad, nge tin nib mat’aw ban’en, nge morngaagen e “chirofen ni baaram ni bayi pufthinnag Got e girdi’ riy.” (Acts 20:20, 21; 24:24, 25) Dan nang ko in e girdi’ ni immoy u fayleng u nap’an ni be machibnag Noah e thin rok Got. Machane kari mudugil ni kari lich e girdi’ u nap’an e 2370 B.C.E.! Ya fare Ran ni ke tharey e fayleng e ke chuweg e tin nib kireb e girdi’ ma ke mus ni piin ni kar ted talperad ko n’en nra rin’ Got e ur magaygad nib fas​—ni aram Noah nge medlip e girdi’ ko tabinaw rok.​—Genesis 7:19-23; 2 Peter 3:5, 6.

13. Mang e ke turguy Got ni ke pagan’ Noah ngay, ma uw rogon ni ke ngongol nib puluw ngay?

¹³ Gathi boor e duw u m’on riy ni ke ginang Got Noah ko rofen nge awa ni ra yib fare Day. Ma nap’an ni ke 480 e duw rok Noah me gaar Jehovah: “Dab gu tay e girdi’ ngar pired ni yad ba fos ndariy n’umngin nap’an, ya dowrad e ra war. Chiney i yan nga m’on e dab kur pired ni yad ba fos nge pag 120 e duw yangarrad.” (Genesis 6:3) Ke michan’ Noah ko re n’ey ni turguy Got. Ere tomren ni ke gaman 500 e duw rok “me gargelnag Shem, Ham nge Jafeth,” ma yalen ko ngiyal’ nem e fini ra gaman 50 fa 60 e duw rok be’ fin ra un ko mabgol. Ma nap’an ni kan nog ngak Noah ni nge toy fare arke ni ngan par riy ni yib fas u nap’an ni ra yib e Ran, ma pi fak nge pi leengirad e ur ayuweged e re maruwel nem. Me taab ngiyal’ ni yibe toy fare arke ma ku be machibnag Noah e “tin nib mat’aw,” me ere boor pa’ u puluwon u nap’an e tin tomren e duw ko ngiyal’ nem ni sogonapan 40 ara 50 e duw u m’on ni yib fare Ran. (Genesis 5:32; 6:13-22) Nap’an e pi duw nem ma ir nge tabinaw rok e ur ngongolgad nib puluw ko michan’ rorad. Ngad dugliyed e michan’ rodad ma gad machibnag fare thin nib fel’ ma gad be sonnag e rran rok Jehovah.​—Hebrews 11:7.

14. Faani munmun ma mang e yog Jehovah ngak Noah ma mang fan?

¹⁴ Nap’an ni ke chugur ni nge m’ay fare arke, ma sana ke lemnag Noah ni ke chugur ni nge yib fare Ran ni yugu aram rogon nde nang ko wuin e ra yib. Munmun me yog Jehovah e ngiyal’ nra yib e ran me gaar ngak: “Ya ka medlip e rran mu gu pi’ e n’uw nge yib nga daken e fayleng ni bayi par ni nge aw ni 40 e rran nge nep’.” (Genesis 7:4) Ere ba gaman e tayim ni nge yog ku Noah nge tabinaw rok ngar kunuyed urngin mit e gamanman nga ranod nga lan fare arke nge mu’ mi yad yan nga langgin nfini yib fare Ran. De t’uf ni ngad nanged e rran nge awa ni ra tabab ni nge thang e re m’ag ney; ya de t’uf ni ngad ayuweged e pi gamanman, ma piin ni ra magay nib fas e yad be yan nga lan fare n’en ni be yip’ fan fare arke, ni aram fare paradis nib spiritual ko ulung rok Got.

“Mu Fl’eged Rogomed Ngam Pared”

15. (a) Mu weliy ko thin rom e thin ni yog Jesus u Matthew 24:40-44? (b) Bochan ndan nang e ngiyal’ nra yib Jesus ni nge pufthinnag e girdi’ me ere uw rogon ni yibe par?

¹⁵ Weliy Jesus u morngaagen e ngiyal’ ni ra moy riy ni gaar: “Re ngiyal’ nem e ra bay l’agruw i pumoon ni yow be maruwel u milay’, ma bay ni fek bagayow nge yan, mi ni pag bagayow. Ra bay l’agruw i ppin ko fen e bil flowa, ni yow be bilig e flowa, ma bay ni fek bagayow nge yan, mi ni pag bagayow. Ere mu fl’eged rogomed ngam pired, ya da mu nanged e chirofen ni bay yib e Somol romed riy. Mu ted fanmed i yan ko re bugithin ney; faan mang e manang e en ntafen e naun e ngiyal’ nra yib e moro’ro’ riy, ma ra i par ni be od nge dabiyog ni yan e moro’ro’ nga naun rok. Ereray fan ni ngkum pired ni gubin ngiyal’ ni kam fl’eged rogomed kam pired, ya en ni Fak e girdi’ e ra yib u reb e awa ndamur fineyed nra yib riy.” (Matthew 24:40-44; Luke 17:34, 35) Dada nanged e ngiyal’ nra yib Jesus ni nge pufthinnag e girdi’ me ere ngad pared ni gad be tiyan’dad ngay ma gubin e rran ma gad ra micheg ni gad ma pigpig ku Jehovah ni gathi bochan e tin nrayog ngodad.

16. Mang e ra buch ko piin ni kan “pagrad” nge piin ni kan “fekrad ngar ranod”?

¹⁶ Piin ni ran “pagrad” ngar uned ko piin nib kireb ko magothgoth e ku ra un ngay e piin ni kan tamilangnagrad ko thin riyul’ machane kar paged mar uned ko par nib siin. Ngad athamgilgad ni gad e piin ni ran “fek nge yan” ni aram e piin nib yul’yul’ ku Jehovah ma ri yad ma pining e magar ngak ko pi n’en nib spiritual ni ma pi’ u daken “fare tapigpig nib yul’yul’ mab gonop.” (Matthew 24:45-47) Nge mada’ ko tomur ma ngad pigpiggad ku Got u fithik’ e “t’ufeg ni ma yib ko gumercha’ nib machalbog, ma ma yib u lanin’uy ni der yog ngom gur be’ ni kam rin’ ban’en nib kireb, ma ma yib ko bin nib riyul’ i rogon nib mich Kristus u wan’uy.”​—1 Timothy 1:5.

Ba T’uf e Ngongol nib Thothup

17. (a) Mang e kan yiiynag u 2 Peter 3:10? (b) Mang boch e ngongol ni yibe weliy u morngaagen u 2 Peter 3:11?

¹⁷ Yoloy apostal Peter ni gaar: “Chirofen ni rran rok Jehovah e bayi taw ni bod rogon ba moro’ro’. Chirofen nem e bay yan nga bayang lan e lang ni be falgar lingan, ma urngin e tin ni bay u lan e lang ban’en ni bayi yik’ nge kireb, ma fayleng nge urngin e tin ni ba’ riy e bay chuw.” (2 Peter 3:10) Pi n’en ni be yip’ fan e tharmiy nge fayleng e dabi par nib fas ko gowelngin e damumuw rok Got. Miki gaar Peter: “Faanra urngin ban’en ma bay ni kirebnag ni ara’ rogon, me ere mit i mang girdi’ e susun e ngam boded ko ngongol nib thothup ma ngongol nib yul’yul’ ku Got?” (2 Peter 3:11) Pi ngongol nem e ba muun ngay ni ngan un ko urngin e muulung ko Kristiano, ma ngan rin’ e tin nib fel’ ngak yugu boch e girdi’, ma ngan un i machibnag fare thin nib fel’.​—Matthew 24:14; Hebrews 10:24, 25; 13:16.

18. Faanra gad be ararnag boch ban’en ko fayleng, ma mang e susun ni ngad rin’ed?

¹⁸ Ra ngad ngongliyed e “ngongol nib thothup nge ngongol nib yul’yul’ ku Got” ma ba t’uf ni ‘nguun ayuwegey nge dabi kirebnigey e kireb nu fayleng.’ (James 1:27) Ma ra diin faanra gad be ararnag boch ban’en ko fayleng? Sana yibe wawliydad ngad kirebgad u p’eowchen Got ko fafel nib kireb fa gad ma motoyil ko musik nge tang ni ma mon’eg e lem ko fayleng nib mal’af rok Got. (2 Korinth 6:14-18) Faanra er rogon, ma ngad gayed e ayuw rok Got u fithik’ e meybil ma aram e dabda uned ko magothgoth ko re fayleng ney ma gad par nib fel’ u wan’ fa en ni Fak e girdi’. (Luke 21:34-36; 1 John 2:15-17) Faanra kad ognaged gad ku Got, ma dabi siy ni gad ba adag ni ngad rin’ed urngin ban’en nrayog rodad ni ngad pared nib fel’ thildad Got ma kad ted talpdad ko rran rok Jehovah ni ra k’aring e marus.

19. Mang fan ni rayog ni nge lemnag fa piin ni ma wereg e thin ko Gil’ilungun Got ni yad ra magay nib fas u nap’an ni ran thang e re m’ag nib kireb ney?

¹⁹ Noah nge tabinaw rok e ur pared nib fas u fithik’ fare Ran ni ke tharey e fayleng ko ngiyal’ nem nkakrom. Piin nib mat’aw e ur magaygad nib fas u nap’an ni kan thang e m’ag ko piyu Jew ko duw ni 70 C.E. Ya kab fas apostal John ma be pigpig ku Got u nap’an e duw ni 96-98 C.E., ni aram e ngiyal’ ni ke yoloy fare babyor ni Revelation, nge fare Gospel rok, nge dalip e babyor ni kan thagthagnag nga laniyan’. Bokum biyu’ e girdi’ e ur uned ko bin riyul’ e michan’ u nap’an e Pentekost ko 33 C.E., ma dabi siy ni boor iyad e ur pared nib fas u nap’an ni kan thang e m’ag ko piyu Jew. (Acts 1:15; 2:41, 47; 4:4) Ngiyal’ ney ma bokum e piin ni ma wereg e thin ko Gil’ilungun Got e be athapeg ni ngar magaygad nib fas u nap’an e tin tomren e rran ko re m’ag nib kireb ney.

20. Mang fan ni susun ni ngad pasiggad i ‘machibnag e tin mat’aw’?

²⁰ Bay nga m’on rodad e par u lan e bin nib biech e fayleng me ere ngad pasiggad i ‘machibnag e tin nib mata’w.’ Ri gad ba taw’ath nrayog ni ngad pigpiggad ku Got ko ngiyal’ ney ni tin tomren e rran! Ma bay e falfalan’ riy ni ngan pow’iy e girdi’ ngar ranod nga lan fare “arke” ko ngiyal’ ney ni aram fare paradis nib spiritual ni bay ko girdi’ rok Got! Ere ngii par nib yul’yul’ e piin ni bay riy e chiney ni yad bokum milyon, mu ur pared nib od ko tirok Got ban’en, ma ur ted talperad ko rran rok Jehovah. Machane mang e ra ayuwegdad ngad pared nib od?

[Boch e Thin nra Tamilangnag Murung’agen]

Uw Rogon ni Ga Ra Fulweg?

◻ Mang e ma lemnag boch e girdi’ u morngaagen e rran rok Jehovah nge ngiyal’ ni bay Kristus?

◻ Mang fan nrayog ni ngan nog ni Noah nge tabinaw rok e ur ted talprad ko ngiyal’ nra yib fare Rran rok Jehovah?

◻ Mang e ra buch ko piin ni “kar fl’eged rogorad kar pared” nge piin ndabra yodoromgad?

◻ Mang fan nib t’uf e ngongol nib thothup u nap’an ni gad be chugur iyan ko rran rok Jehovah?