Report Ko Piin Ni Ma Wereg Fare Thin Nib Fel’ Ko Gil’ilungun Got

“Nge Gal Raamed u P’eowchen e Girdi’”

NAP’AN ni welthin Jesus u daken e Burey me gaar ngak pi gachalpen: “Gimed bod e tamilang ngak e girdi’ nu fayleng ni polo’.” Miki gaar ngorad: “Nge gal raamed u p’eowchen e girdi’, ya ngar guyed e tin nib fel’ ni gimed be rin’ mi yad yog e sorok ngak e Chitamangimed ni bay u tharmiy.”​—Matthew 5:14-16.

U Italy ma kan guy e pi n’en nib fel’ ni ma rin’ e Pi Mich Rok Jehovah. Susun, ngongol rorad nib fel’ u nap’an ni yad ma un ko convention rorad e ma n’uf Got, ya arrogon ni be yog ko reb e report:

▪ U lan in e duw ma reb e ppin u Terni, Italy, e ke ayuweg fak ni ppin ko kantin rok nib chugur nga reb e tagil’ e gosgos ko re mach nem. Ke gaar: “Kug guy ni rib baga’ e thil riy ko piin ni ma yib ngaram ko gosgos ko soccer nge piin ni ma un ko convention ko Pi Mich Rok Jehovah u rom. Pi Mich e rib yaram nge yalen e munmad rorad ma yad ba yul’yul’ ma yad ma tay fan e girdi’. Ug lemnag ko uw rogon nrayog ko girdi’ nib thil thil raenrad ni ngar pared u taabang nib fel’ thilrad.

“Ma reb e rran me yib reb e Pi Mich ngog u kanawo’ me fitheg ko faanra gu manang fithingan Got. Ma dagu nang, ma bochan ni gu manang ni Pi Mich Rok Jehovah e yad e girdi’ nib fel’, ma ke fel’ u wan’ug ni ra yib e cha’ nem nga tafenag. Kug fith boch e deer ngak ko uw rarogon e yam’, ma ke pi’ e fulweg ni bay ko Bible. Dagu tinna’ ni nggu filew e Bible u taabang ma l’agruw e wik nga tomren ma kug un ko pi muulung.

“Som’on me togopuluw fakag ngog, machane bochan e ngongol rog nib fel’ ma rogon ni ke mudugilan’ug, ma ke thil e lem rok. Mereb e pul faram e kug tabab ni nggu fil e Bible. Ma chiney fakag nge ani figirngin e yow ma tay fan e Pi Mich ni ma yib ko kantin rorow ni tafen e damunmun. Me gag e kug un ko taufe u lan e re tagil’ e gosgos ney.”

▪ Tomren reb e convention u Roseto degli Abruzzi ma reb e manager riy e ke weliy ni gaar: “Ku guy ni rib yul’yul’ e Pi Mich Rok Jehovah ko urngin ban’en ni yad ma rin’. Fa binem e wik, ma immoy 40 iyad ko campsite, ma dar wageygad. Ma kari mus ni go yad e yad ra yog ngom ni ke un boch e girdi’ ko trailer ara tento rorad mi yad pi’ puluwon. Tafinay rog e yad e tin th’abi fel’ e customer.”

▪ Tomren e re convention nem ma reb e manager ko hotel e ke gaar: “Urngin e Pi Mich Rok Jehovah e yad ba gapas. Dar ur wageygad, ma yad ma mol ndawori n’uw e nep’. Ma ri yad ba gol, mab yul’yul’, mab sumunguy. Ra fel’ nfaan manga urngin e girdi’ e ra bod yad. Ya yugu boch e girdi’ e ma iring urngin ban’en—fapi vase, nge ashtray, nge mus ko tissue ko kolosis nge suga! Dariy ban’en ni aram rogon ni gimed ma rin’. Ma nap’an ni ma fek e pi bitir romed e ice cream ko icebox ni balayal’, ma dariy fan ni nggu yaliy nggu guy ko mang e kar feked. Ya yad ma sumarnag ko in puluwon e tin ni kar feked mi yad yib ngog min pi’ puluwon ngog e chi ngiyal’ nem. Kari pagan’ug ngorad. Ri ra uw fene fel’ nfaanra aram rogon yugu boch e girdi’! Ri gu ba adag ni urngin e girdi’ ni nge un ko hotel rog e yad e Pi Mich Rok Jehovah.”

Ba lingagil e Pi Mich Rok Jehovah u Italy, nge yu yang u fayleng. Ya yad ma par ‘u fithik’ e pi nam nib fel’ pangirad’ mi yad fek i yib e sorok ngak e bin riyul’ e Got, ya bay e ngochol rok rorad.​—1 Peter 2:12.