Muulung Rodad ni District Convention e Ra Tamilangnag e Tin Riyul’
1. Mang e pi n’en nib ga’ fan ni rayog ni nga i fal’eg i lemnag piyu Israel ma ur weliyed u nap’an ni yad be un ko pi madnom ni yad ma tay?
1 Piyu Israel kakrom e yad ma muulung u nap’an e pi madnom rorad ni dalip yay u gubin e duw. Yugu aram rogon ni ke mus ni pumoon e rib t’uf ni ngar uned, machane ba ga’ ni urngin e girdi’ u lan e tabinaw ni yad ma un. (Deut. 16:15, 16) Pi madnom nem e ke bing e kanawo’ ni ngan fal’eg i lemnag min weliy murung’agen e tin nib riyul’ mab ga’ fan. Mang e pi n’ey? Reb, e Jehovah e ir e Got nib gol, ma ma ayuweg e girdi’ u fithik’ e t’ufeg. (Deut. 15:4, 5) Maku reb e rayog ni ngan pagan’uy ngak nra pow’iydad ma ra ayuwegdad. (Deut. 32:9, 10) Ma piyu Israel e ku rayog ni ngar lemnaged ni yad e girdi’ ni yad be fek fithingan Jehovah, ere thingari m’ug ko ngongol rorad e pi motochiyel rok nib mat’aw. (Deut. 7:6, 11) Pi district convention ni gad ma tay u gubin e duw e ku rayog ni nge fel’ rogodad riy.
2. Uw rogon nra tamilangnag e tin riyul’ e pi n’en ni yira rin’ u nap’an fare convention ni ba yib?
2 Pi N’en ni Yira Rin’ u Nap’an fare Muulung e Ma Tamilangnag e Tin Riyul’: Nap’an e district convention rodad, e yima pi’ e welthin, nge demonstration, nge interview nra ayuwegdad ni nge tamilang u wan’dad feni ga’ fan e thin nu Bible. (John 17:17) Boor e maruwel e kan tay ni fan ko fare convention ni ba yib. Ke fal’eg e ulung rok Jehovah boch ban’en u nap’an fare convention nib l’ag rogon ko tin nib t’uf ko girdi’ u ga’ngin yang e fayleng e ngiyal’ ney. (Matt. 24:45-47) Gur, ga baadag ni ngam guy ara motoyil ko pi n’en ni yira rin’ u nap’an e re convention nem?
3. Mang e thingar da rin’ed ya nge yog nda fal’eged rogodad ko pi n’en ni yira rin’ u nap’an e muulung?
3 Riyul’ nra fel’ rogodad riy ni faan gad ra un ngay ma ngad tedan’dad u nap’an e muulung. Faanra dawor mu non ngak e en ga’ ko maruwel rom ni dab mu un ko maruwel u nap’an fare convention, mu non ngak e chiney. Ma nap’an fare nep’ u m’on ko fare convention e ba fel’ ni ngam mol nib fel’ rogon ya nge yog ni ngam tiyan’um u nap’an e muulung. Boor ko pi walagdad e ke yog ni ngar motoyilgad nib fel’ rogon ya kar tedan’rad ngak e piin ma pi’ e welthin ma yad ma yoloy nga but’ murung’agen boch ban’en ni kar rung’aged. Dab mu pag e cell phone rom ara pager nge magawonnagem nge yugu boch e girdi’. Nap’an ni yibe muulung ma dab mu non non, ma dab mu textnag be’ ma dab ni abich ara ngan unum ban’en.
4. Uw rogon ni nge ayuweg e pi gallabthir e bitir rorad u nap’an fare convention?
4 Piyu Israel kakrom e yad ma un ko fare Madnom ko Nochi Naun, ma ngiyal’ nem e yad ma motoyil u nap’an ni yibe beeg fare Motochiyel. Ma nap’an e re muulung nem e ku ra un e ‘pi bitir’ ngorad ya ‘nge gubin e girdi’ me rung’ag ma ngar filed rogon’ ban’en.’ (Deut. 31:12) Ri gad ba felfelan’ ni ngad guyed reb i chon e tabinaw ni yad ma par u taabang u nap’an fare convention ma pi bitir rorad e yad ma tiyan’rad ko muulung. Ere tomuren fare convention, mang fan ni dab mu weliyed chon e tabinaw rom e pi n’en ni kam rung’aged ma kam yoloyed nga but’ nri gimed baadag? Be yog e Bible ni gaar: “Gubin e bitir ni yad bbalyang, ma yad ba wagagey,” ere ba fel’ ni nge ayuweg e pi gallabthir e pi bitir rorad nib muun ngay e piin fel’ yangaren ko bin ni ngar ‘paged.’—Prov. 22:15; 29:15.
5. Uw rogon ni ngad ayuweged e girdi’ ngar guyed ni gadad be fol ko bin riyul’ e liyor u rogon e munmad ni gad ma fanay u nap’an fare convention?
5 Faanra ngad fanayed e convention badge rodad, ma aram e gad be ayuweg ni nge nang e girdi’ murung’agen e convention rodad maku rayog ni nge poydad e pi walagdad. Maku rayog ni nge nang e girdi’ ni gadad be fol ko bin riyul’ e liyor. Yad ra guy ni piin yad be fanay e convention badge e ba fel’ e munmad rorad ma de taareb rogon ko mad ni ma fanay e girdi’ nu fayleng. (1 Tim. 2:9, 10) Ere thingar da fanayed e mad nib yalen nge rarogon yaadad u nap’an e convention rodad. Ma faanra kad dugliyed ni ngad thilyeged e mad rodad u tomuren e muulung u nap’an ni nga darod nga tafen e abich, ma susun dab da fanayed e mad ni yugu demtrug.
6. Mang reb e kanawo’ nrayog ni ngad daged ni gadad e Kristiano ni ke taareban’dad u nap’an e convention rodad?
6 Nap’an ni be madnomnag piyu Israel e pi madnom nem ma aram e ngiyal’ ni yad ma chag ngak pi walagrad nra bad u boch e binaw nge yu yang u fayleng, ma ke ayuwegrad e re n’em ni nge taareban’rad. (Acts 2:1, 5) Nap’an e district convention rodad ma rayog ni ngan guy ni gadad e Kristiano ni ke taareban’dad ma gadad ba thil ko yugu boch e girdi’. Ba ga’ ni ma gin e girdi’ ni kar guyed e convention rodad. (Ps. 133:1) Ere ba fel’ ni ngad feked e ggan rodad ni buchuuw ma ngad abichgad u roy u Kingdom Hall ma aram e rayog ni ngad uned ko sabethin ngak e pi walagdad.
7. Mang fan nib fel’ ni ngad uned ko maruwel ni fan ko convention ni faanra rayog rodad?
7 Ba ga’ ni ma gin e girdi’ ya kar guyed nib yaram e convention rodad, maku yad ma gin u nap’an ni yad ra nang ni urngin e girdi’ ni ma un ko pi maruwel nem e dariy puluwrad riy. Gur, rayog ni ngam ‘ognagem’ ni ngam pi’ e ayuw ko pi maruwel ney? (Ps. 110:3) Ba ga’ ni urngin e girdi’ u lan e tabinaw e yad ma pi’ e ayuw ko pi maruwel nem ya ireray reb e kanawo’ ni ngan skulnag e pi bitir ngar nanged rogon ni ngar pied e ayuw. Faanra gur be’ ni gab tatamra’, ma nap’an ni ngam pi’ e ayuw ko pi maruwel ney e rayog ni ngam mada’nag boch e girdi’. Reb e walag ni ppin e yog ni gaar: “Gathi ri boor e girdi’ ni gu manangrad. Machane nap’an ni kug un ko klin ma ke yog ni nggu mada’nag boor e girdi’ u lan e ulung. Kar gu felfelan’ ngay!” Ere nap’an ni ngad uned ko maruwel ni fan ko convention ma rayog ni ngad pirieged boor e fager ma ra yibnag e felfelan’ ngodad. (2 Kor. 6:12, 13) Faanra dawor mu un ko re maruwel ney ma ngam fith e piin piilal ko uw rogon ni ngam un ngay.
8. Uw rogon ni ngad pininged e girdi’ ngar uned ko fare convention?
8 Mu Pining Boch e Girdi’ ni Ngar Motoyilgad ko Tin Riyul’: Rogon ni kan rin’ ko pi duw ni ke yan, ma dalip e wik u m’on ko convention ma kad tababgad i wereg e babyor ni fan ko convention, ya ngad pininged e girdi’ ngar uned ngay. Gad baadag ni boor e binaw e rayog ngad wereged e pi babyor ney riy. (Mu guy fare article ni kenggin e “Uw Rogon ni Ngad Wereged e Pi Babyor Ney?”) Tin ni ka bay ko pi babyor ney e ngan fek nga Kingdom Hall. Rayog ni ngan fanay e pi n’ey ko machib u fithik’ e sabethin u nap’an fare convention.
9. Mu weliy boch ban’en ni buch ni be m’ug riy ni fare babyor ni fan ko convention ni yima wereg u gubin e duw e ke yib angin.
9 Gur, bay boch e girdi’ ni kar uned ko convention ni bochan e kan pi’ fare babyor ngorad? U nap’an reb e convention ma reb e walag e ke ayuweg ba wu’ i mabgol ni nge yog ni ngar piriegew e chiya. Ka rognew ngak ni kan pi’ e babyor ngorow ni fan ko re convention nem ma “kar adagew ni ngar unew ngay.” Ere kar bow ko karrow rorow nib pag 200 e mayel palngin! Maku reb e walag ni ppin e ke pi’ fare babyor ngak reb e pumoon ni baadag ni nge nang murung’agen fare convention. Ere ke weliy fan fare babyor nib n’uw nap’an boch. Nap’an ni be un e re walag nem ko fare convention me guy fare pumoon nge fager rok ni yow be fek e pi babyor ni kan wereg u nap’an e re convention nem.
10. Mang fan nib ga’ fan ni ngad uned ko district convention rodad ni yima tay u gubin e duw?
10 Pi madnom ni ma madnomnag piyu Israel kakrom e ke pi’ Jehovah ngorad ni nge ayuwegrad ni nge yog ni ngar ‘pigpiggad ngak u fithik’ e tiyan’ nge yul’yul’.’ (Josh. 24:14) Maku arrogon gadad ni pi convention rodad ni yima tay u gubin e duw e be ayuwegdad ni rayog ni ngad ‘folgad ko tin riyul’’ ma ireray bang ko liyor rodad nib ga’ fan. (3 John 3) Yibe athapeg nra tow’athnag Jehovah e athamgil ni ma tay urngin e piin nib t’uf e tin riyul’ rorad ma rayog ni ngar uned ko re muulung nem ma ra fel’ rogorad riy!
[Blurb ko page 4]
Ra tamilang e tin riyul’ u daken e ngongol romed nib fel’ u nap’an e muulung
[Blurb ko page 5]
Dalip e wik u m’on ko convention ma ngad tababgad i wereg e babyor ni fan ko convention ya ngad pininged e girdi’ ngar uned ngay
[Kahol ko page 3-6]
Boch Ban’en Ni Yibe Puguran Ni Fan Ko District Convention Ko 2012
◼ Ngal’an e Muulung: Ra tabab e muulung ko 9:20 ni kakadbul. Nap’an nra tabab e musik ma susun e ngad pared ko chiya rodad ya ke chugur ni nge tabab e muulung.
◼ Chiya ni Yibe Tay ni Fan Ngak Boch e Girdi’: Kemus ni ngan tay e chiya ni fan ko girdi’ nu tabinaw nge piin ni ma un ngodad nge piin ni gadad ma fil e Bible ngorad.—1 Kor. 13:5.
◼ Abich ko Misiw’: Ngam fek e ggan rom ko misiw’ ya nge dab mu chuw ko convention. Rayog ni ngam tay e ggan nga lan e cooler nib achig.
◼ Salpiy ni Ayuw: Rayog ni ngad daged ni gad be tayfan e yaram ko convention ni aram e ngad pied e ayuw ni fan ko fare maruwel ni yibe tay u ga’ngin yang e fayleng. Ra kan pi’ ni check ma ngan yoloy e “Watch Tower” ngay.
◼ Maad’ad: Faanra maad’ad be’ nib tomgin u nap’an e convention ma nga nog ngak reb e attendant, ya nge yog ni ngan ayuweg. Faanra ba ubchiya’ mab t’uf ni ngan callnag e 911.
◼ Falay: Faanra ba t’uf e falay rom ma ga fek ya dariy ko convention rodad.
◼ Tafen e Abich: Mu pining e sorok nga fithingan Jehovah u daken e ngongol rom nib fel’ u nap’an ni ga bay u tafen e abich. Ngam pi’ e tip nfaanra ireray e n’en ni yima rin’.
◼ Ngam Pi’ e Ayuw nga Boch e Maruwel: Piin ni yad baadag ni ngar pied e ayuw ko pi maruwel ni yibe rin’ e susun ni nga ranod ko Volunteer Service Department u lan fare convention. Bitir ni dawori gaman 16 e duw rorad e rayog ni ngar uned ko gallabthir rorad ara yugu be’ nib ilal ko maruwel.
[Kahol ko page 6]
Uw Rogon ni Ngad Wereged e Pi Babyor Ney?
Susun dab dogned boor e thin ma rayog ni ngad wereged e pi babyor ni fan ko convention u lan e pi binaw ni gad ma machib riy. Rayog ni nga dogned ni nge lungudad: “Gad ma un i wereg e re gi babyor ney ni yibe rin’ u ga’ngin yang u fayleng. Baaray e birom. Rayog ni nge tamilang u wan’um e n’en ni be weliy e re ke babyor ney ni faanra ngam beeg.” Ngam wereg u fithik’ e pasig. Nap’an ni ngam un i wereg e re gi babyor ney u nap’an e Sabado ara Madnom, ma ngkum wereg e pi’ magazine rodad ni faanra rayog.