Pi District Convention—Ba Ngiyal’ ko Liyor u Fithik’ e Felfelan’
1. Uw rogon ma pi madenom ko piyu Israel e ba taareb rogon ko pi district convention ko ngiyal’ ney?
1 Gubin e duw ni ma yan Josef, Maria, nge pi bitir rorow nge yugu boch e girdi’ nga Jerusalem ni ngar uned ko pi madenom ni yima tay u gubin e duw. Yad ma tal ko maruwel rorad nge yugu boch ban’en ni fan ni ngar tedan’rad ko tin kab ba ga’ fan ko tirok Got ban’en. Nap’an e pi madenom ney ma rayog ni ngar fal’eged i lemnag mar weliyed u murung’agen pi fel’ngin Jehovah nge Motochiyel rok. Nap’an e pi district convention rodad e rayog ni ngad liyorgad ku Jehovah u fithik’ e felfelan’.
2. Mang e susun ni ngad rin’ed ni ngad fal’eged rogodad ko district convention?
2 Ba T’uf ni Ngan Fl’eg Rogoy: Jesus nge tabinaw rok e kar milekaggad u but’ 120 e mayal. Dad nanged ko in pi walagen Jesus, machane goo gad manang ko uw fene gel e athamgil ni thingari tay Josef nge Maria ni ngar fal’eged rogorad. Kam fal’eg rogon e tin nib t’uf ya nge yog ni ngam un ko district convention fa? Sana ba t’uf ni ngam tal ko maruwel ara ngam mog ko ani ga’ ko maruwel rom ara sensey ko bitir rom ni gimed ra un ko convention. Rayog ni ngam ayuweg be’ u lan e ulung ni ba t’uf e ayuw rok nge un ko convention?—1 John 3:17, 18.
3. Uw rogon ni ngad daged ni dab da dariy fannaged e pi walagdad ni Kristiano?
3 Ba adag fare tapigpig nib yul’yul’ mab gonop ni ra bagadad e ra pi’ e athamgil nga laniyan’ bagadad ma aram fan ni yad ma yarmiy ni ngad uned u taabang ngad motoyilgad ko pi welthin u nap’an e district convention ma gathi ke mus ni ngad beeged e pi thin nem ko babyor. (Heb. 10:24, 25) Ere ngam fal’eg rogom ni ngam man u m’on ni nge tabab e convention ya nge yog ni ngam mada’gad yugu boch e girdi’ u m’on ni nge yog faen chairman ni nge tabab e musik min par ko chiya’. Dab darod nga bang ko abich ya ngad feked e ggan rodad ya nge yog ni ngad sabathingad yugu boch e girdi’. Pi walagdad ni Kristiano e yad e tow’ath ni pi’ Jehovah ngodad me ere dab da dariy fannaged yad.—Mik. 2:12.
4. Mang e ra ayuwegdad nge fel’ rogodad ko muulung?
4 Ba Ngiyal’ ko Skul: Ka nap’an ni kab bitir Jesus, i un nga boch e madenom ni fan e nge fil u murung’agen Chitamangin nu tharmiy. (Luke 2:41-49) Mang e ra ayuwegdad nge girdien e tabinaw rodad nge fel’ rogodad ko pi welthin ni yira pi’? Nap’an e muulung, dab un yan yan ara un sabathin. Dab mu fanay e cell fon, ara pager, ara yugu boch ban’en nra magawonnag e girdi’. Nga mu sap ngak fa en ni be pi’ e welthin, ma ga yoloy boch e thin nga but’. Nga mu dugliy ni girdien e tabinaw rom e gimed ra par u taabang ni bochan e nge yog ni ngam ayuwegrad ngar motoyilgad u nap’an e muulung. Nap’an e balayal’ ma rayog ni ngam weliyed murung’agen boch e pi n’en ni gimed baadag ni kam rung’aged u nap’an e convention.
5. Susun mang e ngad lemnaged u rogon ni gad ma fal’eg yaadad?
5 Rogon ni Gad Ma Fal’eg Yaadad: Pi ta fol chuway’ e rayog ni ngar poyed Jesus nge chon e tabinaw rok nge yu Jew ni yad be milekag ni ngar uned ko pi madenom ni bochan rogon e munmad rorad nge ku bochan e bay e matharthar nib raen mak’ef u taban e mad rorad. (Num. 15:37-41) Yugu aram rogon ni pi Kristiano e ngiyal’ ney e darur munmadgad ni bod yu Jew kakrom, machane munmad ni gad ma tay e ba klin mab yaram. Susun ni ngad lemnaged rogon e munmad rodad ko ngiyal’ ni ngad darod ko convention nge ngiyal’ ni ngad sulod nga tabinaw rodad, ma ngad fanayed e badge card rodad. Aram rogon ma gad ra thil ko girdi’ ni gathi yad e Pi Mich ma gadad ra fel’ u wan’ e girdi’.
6. Mang fan ni ngad uned ko maruwel ni fan ko convention?
6 Ba T’uf Boch e Girdi’ ni Ngar Pied e Ayuw: Ba t’uf boor e girdi’ ni ngar maruwelgad u nap’an e convention. Rayog ni ngam pi’ e ayuw? (Ps. 110:3) Maruwel ni yima tay ni fan ko convention e aram bang e pigpig ni gad ma tay ma rayog ni nge yog boch e girdi’ e thin nib fel’ u murung’agen e ulung rodad. En ni ba ga’ ko fare naun ni ngan tay e convention riy e kari felfelan ko ngongol rok e piin ni ur klinnaged me yoloy ni gaar: “Gu ba adag ni nggu pining e magar ngomed ni bochan e rib fel’ e ngongol romed. Kug rung’ag ni Pi Mich Rok Jehovah e yad e girdi’ nib fel’ ya yad ba thil ngak yugu boch e girdi’ ya yad ma klinnag e naun ni yad ma fanay ni fan ko muulung rorad. Gimed e kam klinnaged e re naun ney nrib fel’ ma ke adag e girdi’ ni ngar bad ngay. Ma kug felfelan’ ni kug nangmed ni gimed e girdi’ nib gol.”
7. Uw rogon me mab e kanawo’ me yog ni ngad machibnaged e girdi’ u lan e binaw ni yibe tay e convention riy?
7 Ke Mab e Kanawo’ ni Ngan Machib: Faanra ba fel’ e munmad rodad ma gad be fanay e badge card rodad, ra sap boor e girdi’ ngodad ma sana ra pug e tafinay rorad, ma aram rogon nra bung rogon ni ngad machibnaged yad u murung’agen e convention. Reb e bitir e ke fek e babyor nib beech ni kan pi’ u nap’an e convention nga reb e restaurant u tomren ni kan mu’ ko muulung me dag ngak fare ppin ni be maruwel u rom. Bochan e re n’ey ma ke mab e kanawo’ ni nge pining e galabthir ko fare tir fare ppin ni nge un ko fare convention.
8. Uw rogon ni ngad folwokgad ko n’en ni ma rin’ e tabinaw rok Jesus ni ur ted fan e pi madenom ni ke yarmiy Jehovah?
8 Piyu Jew e ur athapeged e pi madenom ni yima tay kakrom ni ngar uned ngay. (Deut. 16:15) Ere tabinaw rok Jesus e kar felfelan’gad mar fal’eged rogorad ni bochan e nge yog ni ngar uned ngay me fel’ rogorad riy. Ku er rogodad ngad ted fan e pi convention rodad, ma ngad lemnaged ni aram e tow’ath rok Chitamangidad nu tharmiy. (Jas. 1:17) Chiney e ngad fal’eged rogodad ya nge yog ni ngad uned ko re madenom ney ni yima tay ntaab yay u gubin e duw ni fan ko pigpig ku Jehovah!
[Kahol ko page 6]
Boch Ban’en ni Yibe Puguran ni Fan ko District Convention
◼ Abich ko Misiw’: Wenig ngom mu fek e ggan rom ni ngam koy ko misiw’ ya nge dab mu chuw ko gin ni yibe tay e convention riy ni ngam man ko abich. Rayog ni ngam fek e cooler nib achig nrayog ni nge taw nga tan e chiya rom. Dab ni fek e cooler nib ga’ ara boch ban’en ni bay u melor nga lan e gin ni ngan tay e muulung riy.
◼ Salpiy ni Ayuw: Rayog ni ngad daged ni gad be tayfan e yaram ko convention ni aram e ngad pied e ayuw ni fan ko fare maruwel ni yibe tay u ga’ngin yang e fayleng. Ra kan pi’ ni check ma ngan yoloy e “Jehovah’s Witnesses” nga daken.