Ba Ngiyal’ ni Ngan Kay e Ggan ko Tirok Got Ban’en Min Felfelan’ Ngay
1. Uw rogon ni ma pi’ Jehovah e tin nib t’uf ko tirok ban’en ngak e pi tapigpig rok?
1 Ma pi’ Jehovah e tin nib t’uf ko tirok ban’en ngak e pi tapigpig rok. Yugu aram rogon ni kem’ e girdi’ ko re fayleng ney ko bilig ko tirok Got ban’en, machane gadad e rib fel’ rogodad. (Isa. 65:13) Reb e kanawo’ ni ma pi’ Jehovah e ggan ko tirok ban’en riy ngodad e nap’an e pi district convention ni yima tay u gubin e duw. Gabe fl’eg rogom ni fan e nge yog nim un ko fare District Convention ni yira tay ko biney e duw ni kenggin e “Kan ni Thothup rok Got e Be Pow’iydad”, fa? Boor e ggan ni fan ko tirok Got ban’en nib fel’ ni kan ngongliy ni fan ngodad.
2. Mang e ba muun ko tin ni ga be fal’eg rogom riy ni fan ko convention?
2 Mu Lemnag Boch Ban’en e Chiney: “Tin ni be lemnag e en ta maruwel ni bayi rin’ e ra aw nri ba’ angin.” (Prov. 21:5) Ere nap’an ni kam dugliy ni ngam un ko fare convention, ma dab mu sagaal ni ngam non ngak e en nib ga’ ko maruwel rom ngam ning e matal rom nfaanra ba t’uf ni ngam tal ko maruwel in e rran ni fan e ngam un ko convention. Faanra ba t’uf bang ni ngam par riy, ma kan yarmiy, fa? Maku ba t’uf ni gara lemnag rogon e abich rom ko misi’ ni fan e nge yog nim abichgad e pi walag ko gin ni yira tay e convention riy. Mu fl’eg rogom nge yog nim taw ko gin ni ngan tay e convention riy u m’on ni ngan tabab nge yog nim pirieg bang ni ngam par ngay mu kum un ko bin som’on e tang nge meybil.
3. Bmiti mang mad e susun ni ngad chuwgad ngay?
3 Gad ba adag ni ngad munmadgad nib fel’ rogon mab puluw. (1 Tim. 2:9, 10) Pi district convention e ma bing e kanawo’ ngodad nge yog nda machibnaged e girdi’ ko gin ni gad be yan riy. Faan gad ra munmad nib fel’ rogon mab puluw u nap’an ni ka darod ko fare binaw ni yira tay e convention riy mu ka gad tay e pi convention badge rodad ko mad rodad, ma aram e gad ra m’ug ni gad ba thil u fithik’ e piin nde michan’rad mad fel’gad u wan’ e piin ni yad be guydad.
4. Mang e ra ayuwegdad nge girdien e tabinaw rodad nge yog ni fel’ rogodad ko muulung ni yira tay?
4 Mmotoyil nib Fel’ Rogon: Ba mudugil ndubdad ni nga nog ban’en ko re abich ney ko tirok Got ban’en ndab da nanged! (Prov. 22:17, 18) Rayog ni ngad tedan’dad u nap’an e muulung nfaan gad ra un i beeg e pi thin nu Bible ni yibe yog ni ngan beeg ma ka gad yoloy boch ban’en nib ga’ fan nga but’. Ma tomren ni kan mu’, ma rayog nda fanayed e pi n’en ni kad yoloyed nga but’ u nap’an ni gad be sabethin boch e girdi’. Kan guy fa in ni baaray e duw ni ke yan ni boch e fel’ yangaren e yad ma par u taabang nguur sabethinggad u nap’an ni yibe muulung ara ur text message gad ko cell phone rorad. Faanra bay e bitir rodad, nib muun ngay e piin fel’ yangaren, mab fel’ ni ngad pared u taabang ngad motoyilgad ko n’en ni yibe yog u nap’an e muulung, ko bin ni ngad paged pi fakdad nga ranod ra pired ngak yugu boch e bitir u bang nib palog rodad.
5. Uw rogon ni ngki gel boch e felfelan’ rodad u nap’an e convention?
5 Nge Felfelan’uy ko Chag ni Yibe Tay u Taabang: Rra fel’ rogon e abich ni gad ra tay nfaanra gadad e pi fager rodad. (Prov. 15:17) Ere aram rogon ni chag ni gad ma tay e pi walag u taabang e ma gelnag e felfelan’ rodad u nap’an e convention. Ere nap’an ni kan tal ma rib fel’ ni nga darod da nonad ngak boch e girdi’ mad felfelan’gad u taabang! (Ps. 133:1) Faanra ke yog e en ni ir e chairman ni nga darod da pired ko chiya’ rodad, ma susuna ngad talgad ko sabethin nga darod da pired nga but’ ya nge tabab e muulung.
6. Mu weliy reb e epxerience ni be dag rogon nrayog ni ngad machibnaged e girdi’ ko binaw ni yira tay e convention riy?
6 Mu Fl’eg Rogom ni Ngam Machib: Baga’ ni ma bing e Convention e kanawo’ ni ngan machib riy. Boor e piin ni yad ma un ko convention ni yad ma yan nga tafen e damunmun u tomren e muulung ma ma fithrad e girdi’ u murung’agen kenggin e convention ni bay ko badge card rorad. Re n’em e ma k’aring ni nge tabab e sabethin me bing e kanawo’ ni ngan wereg e machib u murung’agen e thin riyul’. Boch e piin ni kar fithed boch ban’en e kan piningrad ko fare convention ma kar bad.
7. Mang fan nsusuna ngad uned ko fare district convention ni bay yib?
7 Bokum biyu’ e awa ni kan tay ni fan e ngan yarmiy rogon e muulung, min yarmiy e gin ni ngan tay e muulung riy, nge pi welthin, nge ku boch ban’en ni fan ko convention. Urngin e maruwel ni kan tay ni fan ni ngan fl’eg e re muulung ney ni fan ko tirok Got e be dag rogon feni ma lemnag Jehovah e girdi’ rok. Ere manga yugu da uned ngay ni gadad gubin nge yog ni fel’ rogodad riy! Ya faan gad ra rin’ ere n’ey ma gadad ra ‘tolul u fithik’ e felfelan’ ya ba fel’ rarogon gum’ercha’dad.’—Isa. 65:14.
[Kahol ko page 4]
Boch Ban’en ni Yibe Puguran ni Fan ko District Convention
◼ Ngal’an e Muulung: Yira bing e mab ko 8:00 ni kakadbul. Nap’an nra tabab e musik, ma gad gubin nsusuna ngad pared nga chiya rodad nge yog ni tabab e muulung nrogon.
◼ Chiya ni Yibe Tay ni Fan Ngak Boch e Girdi’: Kemus ni yigoo piin ni kam bad u taab karro ara piin ni gimed be par u taab tabinaw e rayog ni ngam tay e chiya rorad.
◼ Abich ko Misi’: Wenig ngom mu fek e ggan rom ni ngam koy ko misi’ ya nge ndab mu chuw ko gin ni yibe tay e convention riy ni ngam man ko abich. Rayog ni ngam fek e cooler nib achig nrayog ni nge taw nga tan e chiya’ rom. Dabni fek ban’en ni bay u melor ara alkul nga lan e Kingdom Hall.
◼ Salpiy ni Ayuw: Rayog ni ngad daged nib fel’ u wan’dad e yaram ko convention u daken e ayuw ni gad ra pi’ ni fan ko fare maruwel ni yibe rin’ u ga’ngin yang e fayleng. Ra kan pi’ ni check ma susun ni ngan yoloy e “Watch Tower” nga daken.
◼ Maad’ad: Faanra ke buch ban’en ku be’ u nap’an e convention, ma wenig ngom mog ngak reb e attendant nib chugur ngom nge yog ni yog ngak e girdi’ ko First Aid, ni yad e yad ra ayuweg.